Archives par étiquette : FPR

Ese urupfu rwa Alphonse Marie Hagengimana rwo ruzabasha guhumura amaso abiyemeje gukurikira no gushyigikira buhumyi FPR ya Paul Kagame?

Mu mwaka wa 2010 ubwo Paul Kagame yazaga muri za nama nsesaguramutungo ziswe Rwanda-Day ariko mu byukuri ari Kagame-Day, abantu batandukanye icyo gihe bo muri Diaspora y’Ububiligi batanguranwaga Micro babaza ibibazo, rimwe na rimwe biterekaranye byo kwereka ko bashyigikiye ingoma ye. Muri abo banyarwanda bo muri diaspora yo mu Bubiligi hagaragayemo Bwana Alphose Marie Hagengimana nawe wabajije ikibazo acinya inkoro ku mwami Paul Kagame. Uwo Alphonse Marie Hagengimana akaba ariwe turi bwibandeho muri iki kiganiro.

Alphonse Marie Hagengimana yari muntu ki?

Alphonse Marie wari uzwi cyane mu gihugu cy’ububiligi ku kazi k’akabyiniriro ka Kenyenge, ni mwene Alfred Ntibitegera na Winifrida Mukandutiye akaba yaravutse ku itariki ya 26/09/1972. Alphonse rero nk’uko yakundaga kubisubiramo kenshi akaba akomoka muri karere k’Ubukonya muri Commune ya Gatonde ariko naho yakuye agatazirano ka “De Bukonya”. Twabibutsa ko Commune Gatonde ifite umwihariko mu mateka kuko yavukagamo bamwe mu byegera bya Perezida Habyarimana, aha twavuga nka Nyakwigendera Ngarukiyintwari Francois wahoze ari Ministre w’Ububanyi n’amahanga w’u Rwanda nyuma akaza kuba Ambassadeur, Nyakwigendera Dr. Akingeneye wahoze ari umuganga wihariye wa Perezida Habyarimana, General Rusatira wabaye umukuru w’ibiro bya Perezida Habyarimana, n’abandi benshi. Iyo Commune ya Gatonde kandi akaba ariyo ikomokamo nyakwigendera Colonel Alexis Kanyarengwe wabaye umuyobozi wa FPR-Inkotanyi ndetse ikanakomokamo umugabo Magayane wamenyekanye cyane kubera ubuhanuzi bwe.

Alphonse Marie Hagengimana rero akaba yarize amashuri abanza mu bice bitandukanye by’igihugu kubera akazi Papa yakoraga katumaga ahora yimuka. Amashuri yisumbuye nayo Alphonse yayize mu bigo bitandukanye harimo APE Rugunga, EEC Rushaki, n’Urwunge rw’amashuri rwa Janja aho mu Bukonya nyine, kera icyo kigo kikitwa Ecole d’Economie et de Commerce de Janja. Abiganye nawe muri iyo myaka ya za 80 kugeza mu ntangiriro za 90 bakaba bemeza ko Alphonse Marie yari umuntu ukunda cyane gusabana, gushimisha abandi no kwambara neza. Icyo abenshi twaganiriye biganye nawe bamwibukiraho ngo badateze kwibagirwa ngo ni ukuntu yajyaga i Kigali kuzana za Ochestre gucurangira bagenzi be cyane cyane kuri Janja, abazwi cyane yazanye aho akaba ari Orchestre Ingeli ndetse na Orchestre yitwaga Galaxy Band. Ibi kandi bikaba byarakomeje kumuranga no mu gihugu cy’Ububiligi aho wasangaga nawe adatinya kujya imbere y’abantu akabyina kandi agasaba abantu kwidagadura.

Alphonse rero akaba yarageze mu gihugu cy’ububiligi ahunze nk’abandi mu mwaka wa 1999 avuye mu nzira ndende aho bivugwa ko yanyuze muri Republika iharanira Demokrasi ya Kongo, Centrafrique ndetse na Cote D’Ivoire mbere yo kuza kuba impunzi mu Bubiligi aho yabaye imyaka itari mike mbere yo kwerekeza mu Rwanda muri 2014 muri ya gahunda ya FPR bakunze kwita Garuka-Urebe.

Alphonse Marie Hagengimana yayobotse ate FPR?

Iki kibazo kiragoye kugisubiza. Ariko igisubizo kigaragarira muri interview Alphonse Marie we ubwe yahaye umunyamakuru w’ikinyamakuru cya FPR Igihe.com, Bwama Karirima Ngarambe, ugihagarariye mu Bubiligi. Icyo kiganiro kigaragara kuri Facebook y’uwo Karirima kandi cyakwirakwijwe hirya no hino ku mbuga nkoranya mbaga, Alphonse Marie Hagengimana, alias Kenyenge, agaragara avuga ya magambo tumenyereye ku bantu biyemeje kuyoboka FPR buhumyi aho aba yemeza ko ngo ubutegetsi bwa kera bwa Habyarimana ngo bwari bubi naho ubutegetsi bwa FPR bwo bukaba ari ubutagatifu bwera de! Muri icyo kiganiro avugamo ngo ukuntu Papa we yafunzwe inshuro 6 n’ubutegetsi bwa Habyarimana ngo azira ko yari murumuna wa Ambassadeur Kagenza Alphonse Marie, uyu Ambassadeur Kagenza akaba yarafunzwe muri ya nkundura ya kudeta yapfubye ya ba Lizinde muri za 1980.

Muri icyo kiganiro, Alphonse Marie alias Kenyenge uretse gusebya ubutegetsi bwa Habyarimana asingiza ubwa Kagame, akomeza agira ati: ” Iyo uba mu Bubiligi, abantu bakubwira ibintu bitari byo, Ngo nugera ku Kibuga abantu bazahita bakubaga. Kandi sibyo siko bimeze”.

Ikibabaje cyane nuko ibyo yavugaga muri 2010 gutyo, ari byo byamubayeho muri 2021, agapfa ku myaka 48 mu rupfu rubabaje kandi rutunguranye kandi rwuje amayobera ari nabyo tugiye kubasobanurira muri iki nyandiko duhereye kuri ubwo buhumyi Alphonse Marie yagaragaje muri icyo kiganiro bukaba bwarahindutse ubuhanuzi bwamusohoreyeho nyamara yaraburiwe kenshi akavunira ibiti mu matwi!

Abashaka kwirebera icyo kiganiro mwanyarukira kuri Facebook ya Karirima Ngarambe cyangwa ku Gihe.Com niba DMI itarabategeka kugisiba.

Ukoze isesengura ry’ibyo Nyakwigendera Alphonse Marie Hagengimana yatangarije muri icyo kiganiro yagiranye na Karirima wa Igihe.com, ukongeraho ikibazo-gisingizo yabajije Paul Kagame muri Kagame Day yo mu Bubilligi muri 2010, usanga Alphonse yari yizeye ko nataha akagera i Kigali yari guhabwa imyanya, agakomera muri Politiki nk’uko ababikoze nkawe nka Nduhungirehe wari inshuti ye, Sandrime Maziyateke Sadidi, Evode Uwizeyimana, n’abandi byabandegekeye. Nyamara Alphonse yirengagije nkana imiburo y’inshuti n’umuryango we, wamuburiraga ko agatsiko ka FPR ya Kagame ari agati kadacanwa kandi ari inyama itaribwa kabiri.

Alphonse Marie ntiyashoboye gutsinda ibishuko bya FPR yari imaze gushora akayabo k’amadolari muri Gahunda yo gucyura bamwe mu bana b’impunzi bakomoka ku bahoze ari abayobozi cyangwa se abantu bakomeye mu butegetsi bwa Perezida Habyarimana, kandi ikibabaje bakagenda babuvuga ibinyoma mu rwego rwo kwerekana ko ubutegetsi bw’inkotanyi bwera naho ubwabunjirije bukijima. Ndetse bamwe muri abo bana ntibatinye no gusebya ba Se ku mugaragaro bababashyera.

Iyo gahunda yo gucyura abana bo muri Diaspora cyane cyane bakomoka ku bategetsi ba kera, yari gahunda ikomeye yanatumye abenshi muri bo bagaragara bamamaza Kagame mu matora nk’uko byagaragaye ku mafoto no ku mbuga nkoranyambaga. Nguko uko urubyaro rwa General Rusatira, rwa Col Ruhashya, Col Nsekalije, Ex Ministre Nduhungirehe, bene wabo ba Col Bagosora, n’abandi n’abandi batashye. Iyo gahunda yatangijwe kera cyane na Colonel Patrick Karegeya akiyobora urwego rushinzwe iperereza ryo hanze (atarashwana na Kagame) na n’ubu nyuma y’imyaka itari mike ikaba igikomeje aho ejo bundi umwana w’uwahoze ari Ministre w’Ububanyi n’Amahanga Francois Ngarukiyintwali wari nsoma mbike wa Hayarimana, nawe yahawe umwanya mu nama y’ubuyobozi y’ikigega agaciro. Ibi wenda umuntu udasobanukiwe akaba yakumva ari ibintu bisanzwe ariko ushyize ku munzani umubano wa Perezida Habyarimana na Ministre Ngarukiyintwali, ugashyira ku munzani uruhare FPR Inkotanyi yagize mu kwica no kwanduza isura ya Perezida Habyarimana kugeza kuri uyu munota, wakumva igisobanuro cya wa mugani uvuga ngo: Umwana w’umupfu yiteye inkanda y’inka yicaga nyina!

Ni muri iyo nkundura rero Alphonse Marie ukomoka kuri Alfred Ntibitegera wahoze ari Substitut nawe yamanutse mu Rwanda rwa FPR kwamamaza Kagame yizeye ko azabona ishimwe mu gifu akaba ahakuye urupfu rutunguranye, rubabaje rusigiye abe agahinda gusa.

Alphonse Marie ageze i Kigali ikizere cyabyaye amasinde! Ese yaba koko yari maneko wa FPR?

Amakuru dukura mu nshuti ze za hafi mu Rwanda na hano mu Bubiligi, yemeza ko Alphose Marie akigera i Kigali atabonye ibyo yari yizeye guhabwa. Uretse kunywa biere no kujya mu maraha mu mahoteli hirya no hino mu Rwanda, Alphonse nta kintu gifatika yakuye muri FPR. Abantu benshi bakaba barakundaga kumubona asangira n’abamaneko bakomeye ba FPR, abo muri Diaspora bemeye kujya muri iyo gahunda yo kwambika icyera FPR no gusebya ubutegetsi bwayibanjirije, ndetse n’abo mu nzego z’umutekano.

Ikindi cyagiye kigaragara ku mbuga nkoranyambaga no mu binyamakuru bimwe na bimwe Alphonse yakuye muri FPR, ni amafoto yagiye yifotozanya na bamwe mu bikomerezwa bya FPR cyane cyane akaba yaragaragaye mu Bireau bya General James Kabarebe inshuro zirenze imwe.

Aha umuntu akaba atabura kwibaza icyo yabaga agiye kumarayo kuko nk’uko twabibwiye b’abari i Kigali ntabwo ari buri wese ushobora kwinjira mu Bureau bya Kabarebe kandi agasohokamo bamaze kwifotozanya. Uretse General Kabarebe, Alphonse Marie yagaragaraga mu mafoto ari kumwe n’ibindi bikomerezwa byo muri FPR umuntu akaba atabura gutebya avuga ko amafoto nabo banyabubasha b’ingoma ya Kagame ari cyo Alphonse Marie yakuyemo gusa bikanarangira abuze ubuzima.

Ese mama Alphonse yaba yarahabwaga ubutumwa bwo kuneka na FPR? Ibi nabyo iperereza twakoze rikaba ritaratugejeje ku makuru y’impamo ariko umuntu wese umenyereye imikorere ya FPR akaba atabura kugira amakenga kuko FPR ni agatsiko gato ahubwo gakoresha abantu nka ba Alphonse kugira ngo kagere ku bo gashaka kagamije kubinjiza muri syteme yako cyangwa se kagamije kubagirira nabi iyo biri mu nyungu zako. Dukurikije rero uko Alphonse yabagaho kuva yasubira mu Rwanda tukaba tutabura kuvuga ko kuri FPR yari nka ka gakoresho abafaransa bahaye izina rya “marionette”.

Alphonse Marie mu rupfu rwa Rwasibo Bernard. Ese Alphonse Marie ari mu babigizemo urahare cyangwa yarakoreshejwe ?

Mu kiganiro cyahise kuri RTV-Inkingi mu minsi ishize gifite umutwe ugira uti: JB Rwasibo ni umwe mu bashinze Republika|Uko Yabayeho|Guta umurongo|Ubuhamya bw’Abakobwa be, mu buhamya abakobwa ba Rwasibo batanze bakaba baragarutse ku rupfu rwababaje abantu cyane rwa musaza wabo Bwana Bernard Rwasibo witabye Imana mu buryo bw’amayobera i Kigali muri 2017. Muribuka ko abo bakobwa ba Rwasibo badutangarije ko musaza wabo yahamagawe na bagenzi be bamuhatiriza kuva aho yari acumbitse ngo akaza bagasangira ikirahuri. Muribuka ko batubwiye ko yabanje kwangira ariko kubera kumuhatiriza birangira aje asangira n’abo bagenzi be, ariko ngo akaza kumva atameze neza akajya mu modoka ngo atahe yarenga metero nkeya bakabona yikubise hasi arapfuye.

Nk’uko bigaragara ku ifoto ya nyuma ya Bernard Rwasibo yifotoje n’abo “bagenzi be” umwe muri bari muri iyo groupe ni Alphonse Marie Hagengimana.

Biragoye kwemeza uruhare Alphonse Marie yaba yaragize mu guhamagara Bernard Rwasibo kuza kunywa Biere bikarangira ahaguye. Biragoye kandi kumenya niba Alphonse Marie hari icyo yaba yari azi, cyangwa yaramenye kitatangajwe ku rupfu rwa Bernard Rwasibo. Ariko icyo twakwemeza ni kimwe: ni uko muri FPR harimo urupfu. Kuva muri 1990 kugeza ubu, gupfa imfu zidasobanutse ni ibintu bimaze kuba umuco wabaye akarande k’ingoma ya FPR. Ibyo tutabona ni ibihishwe, ariko ibigaragara byo turabibona ni imfu zidasobanutse ntizigire na enquete.

Ikintu cyonyine cyatuma abantu bamenya ukuri dukeka ni uko rwaba urupfu rwa nyakwigendera Bernard Rwasibo, rwaba urupfu rwa nyakwigendera Alphonse Hagengimana, nuko hakorwa enquete idafite uruhande ibogamiyeho ikubiyemo enquete criminelle ndetse na bimwe bita autopsie byose bikozwe n’inzego zigenga. Ibi byatuma ukuri kumenyakana. Nyamara kubera guhisha ukuri ibi FPR ntibikozwa muri izo affaires zose. Ubu umuryango wa Alphonse Hagengimana ukaba nta kindi wakora uretse kurira no kumuherekeza gusa. Ninako byagenze kuri Kizito Mihigo nk’uko mwabikurikiranye. Ikibabaje kuri Alphonse Hagengimana nuko mbere yo kumanuka i Kigali, imiburo y’ibyo byose yayihawe ariko akanga kumva none akaba ahasize ubuzima. Ese uru rupfu rwe hari isomo rusigiye abameze nkawe?

Urupfu rwa Alphonse Marie: Amayobera y’ingoma mpotozi ya FPR arakomeje.

Amakuru twashoboye gukura mu nshuti ze za hafi haba mu gihugu cy’ububiligi cyangwa mu Rwanda ni uko Alphonse Marie uko iminsi yagiye yisunika yagiye abona ko ibyo yabwiwe kuri FPR akanga kubyumva byari ukuri. Uretse ko umuntu atahakana ko atari abizi ahubwo yabyirengagije nkana kubera gushaka indonke.

Ikintu cya mbere cyagoye Alphonse Marie ni uko FPR itamuhaye umwanya yari yizeye atega indege agenda ayisingiza. Ikindi cya kabiri ni uko kuba mu Rwanda byamuhumuye amaso akibonera akarengane abanyarwanda babamo buri munsi ndetse hari n’abatubwiye ko mbere y’urupfu rwe Alphonse nawe ubwo bukene bwari butangiye kumugeraho kubera ko agafaranga kari kamaze kumushirana, nta kazi kazwi afite, ndetse n’iyo FPR yizeye imureba nk’uko isanzwe ireba abo itagikeneye cyane nk’umutaka nyumva y’imvura, cyangwa shikreti nyuma yo kunyunyuzwa.

Hari umwe mu bo twaganiriye watwibwiriye ko Alphonse Marie yari yaratangiye kubihirwa ku buryo yari atangiye kujya akritika ubutegetsi bwa FPR mu ibanga.

Yashatse kugaruka mu Bubiligi biranga!

Alphonse Marie rero ngo yashatse kugaruka mu gihugu cy’Ububiligi ariko biranga. Muti byagenze bite? Alphonse Marie twashoboye kumenya ko nta bwenegihugu bw’ububiligi yari afite mbere yo kujya i Kigali. Icyangombwa yari afite kimwemerera kuba mu Bubiligi kikaba cyaramwemereraga kuba yasohoka ku Butaka bw’Ububiligi ariko ntarenze igihe runaka ari hanze yabwo. Alphonse ageze i Kigali yariraye, aryoherwa n’iraha, yizera FPR, birangira arengeje igihe, maze agerageje kugaruka ababiligi bamubera ibamba.

Abuze amahitamo, yemeye gutura mu Rwanda ategereza ko FPR wenda yazamwibuka araheba. Guhora yifotozanya n’abakomeye, asangira inzoga na ba maneko ntacyo byamumariye. Ahubwo ikizere yagiriye FPR cyamubyariye amazi nk’ibisusa.

Urupfu rwa Alphonse Marie ruhishe byinshi

Itariki ntarengwa rero yabaye umunsi wa Assomption ku itariki ya 15 Kanama 2021. Kuri iyo tariki nk’uko tubikura mu nshuti ze za hafi ngo Alphonse Marie yabyutse ari muzima nta n’igicurane ataka. Ndetse ngo yabyutse yifuriza abantu umunsi mwiza wa Assomption ku mbuga nkoranyambaga dore ko biri mu byamurangaga kumenya kuganira no gusabana.

Mu masaha y’igicamunsi rero nibwo inkuru zatangiye gucicikana ngo Alphonse Marie yagize ikibazo cy’uburwayi butunguranye akaba ari muri Urgences z’ibitaro bikuru bya Kigali CHUK. Ntibyatinze Alphonse Marie aba agiye muri Coma.

Abagize umuryango bafatanyije n’inshuti ngo bihutiye kureba ko yagezwa byihutirwa mu bitaro byitiriwe umwami Faycal ngo ahabwe ubuvuzi bwisumbuyeho. ariko biranga ubushobozi burabura, na ya FPR yagiye asingiza ntiyamwishingira, ngo biza kurangira ajyanywe mu bitaro bya gisirikare i Kanombe.

Hari umuntu utaramenyekanye watanze ubuhamya muri audio ko yiboneye Alphonse Marie ari muri CHUK avirirana amaraso ariho arwana n’umutima ubona hari icyo ashaka kuvuga ariko bikanga umutima uramwangira birangira agiye muri Coma.

Ageze i Kanombe rero nta cyo byatanze, mu gihe abaganga bari bakireba icyo bakora nibwo ku wa kabiri tariki ya 17 Kanama 2021, Alphonse Marie Hagengimana alias Kenyenge waburaga ukwezi ngo yuzuze imyaka 49 kuri iyi si, yahise yitaba Imana.

Ibintu byabaye nyuma y’urupfu rwa Alphonse Marie biteye kwibaza byinshi. Akimara gupfa Bwana Gatabazi Jean Marie Vianney, Ministre w’Ubutegetsi bw’Igihugu ku butumwa yanyujije kuri twitter yemeje (mbere y’uko byemezwa na muganga) ko ngo uwo yise “umuvandimwe we” Alphonse Marie yitabye Imana azize indwara yo guturika udutsi two mu bwonko bakunze kwita Stroke.

Bukeye ku itariki ya 18 Kanama, igihe umuryango n’inshuti bari mu gahinda no gutungurwa n’urupfu rwa Alphonse Marie, hatangiwe gucicikana ku mbuga nkoranya mbaga za audios ziteye isoni zemeza ko ngo Alphonse Marie yaba yaragiye kurya iraha na ba bakobwa bicuruza maze ngo akanywa ya miti yongerera ubushake abagabo yitwa Viagra ngo akayivanga na Whisky maze ubwonko bugaturika!

Kubera ko abantu bamaze kurambirwa ibinyoma bya FPR, aya ama audios yahise avuguruzwa n’abantu biboneye Alphonse ari muri CHUK cyane cyane audio nayo yacicikanye y’umuntu bigaragara ko ari mu Rwanda yemeza ko ibyo byavugwaga muri izo audios zisebanya bitari ukuri na gato.

Nyuma kandi kuri uwo munsi hatangiwe gukwirakwizwa ifoto ya Alphonse Marie agaragara avirirana amaraso ku buryo abenshi mu bayibonye, bakaniyumvira izo audios zakwirakwije akimara gupfa bahise bibuka ibyavuzwe Kizito akimara gupfa ko ngo yiyahuje amashuka yararagamo, maze umunyamakuru Cyuma Hassani akaza gutangaza ibimenyetso by’ibikomere umurambo wa Kizito wari ufite abantu bakumirwa.

Alphonse Marie Hagengimana rero wanze kumva umuhanano aba arapfuye agenda asize imfubyi, yaranze kumva imiburo y’abamubuzaga kwigemurira ingoma yica ya FPR.

Mu bantu twashoboye kuganiriza i Kigali bari bazi Alphonse Marie batifuje ko amazina yabo yatangazwa kubera impamvu z’umutekano wabo, bemeza ko Alphonse yagendaga mu bikundi n’ubundi byari kuzamukoraho. Alphonse uretse kwikundira kurimba, gusahinda, abamumenye bemeza ko nta bundi bugoma agira.

Ese mama yaba yarahawe Misiyo akayinanirwa agahitanwa?
Ese yaba yarumvise amabanga amucisha umutwe?
Ese ryaba ryaramucitse akidoga abo bicanyi bikikanga ko azabavamo bakamubanza icumu?

Dukurikije ibyo twabwiwe n’inshuti ze za hafi dusanga ibi bibazo byose byasubizwa no kumenya ibi bikurikira :

Kumenya abantu bari kumwe na Alphonse ku munsi wa Assomption.
Kumenya ibyavugiwe kuri telephone ye uwo munsi wose
Gukora autopsie ikozwe n’umuganga wigenga mu bitaro byigenga bidafite aho bihuriye na FPR
Gukora enquete ku rupfu rwe ikozwe n’inzobere mu gukora enquete criminelle yigenga idafite aho ihuriye na FPR.

Reka tubagezeho amwe mu magambo yanditswe ku rukuta rwe rwa Facebook n’uwitwa Emmanuel Nzabakirana Mwiseneza asezera kuri munywanyi we Alphonse Marie. Emmanuel yagize ati:

Ubu butumwa bwa Emmanuel Nzabakirana Mwiseneza ni bumwe mu butumwa bwinshi bwatangajwe n’abantu batandukanye haba muri diaspora cyangwa mu Rwanda, haba abashyigiye FPR cyangwa abayirwanya ndetse n’abadashishikajwe na politiki bose muri rusange bigaragara ko babajwe n’urupfu rwa Alphonse Marie. N’ubwo yanze kumva umuhanano, ariko Alphonse Marie abantu bose mu bice bitandukanye bagarutse ku kintu cy’uko Alphonse yari azi gusahinda, gusabana, kurimba, ariko cyane cyane kutita ku bintu aribyo Emmanuel yise kuba “naif”. Ibi rero bikaba ari byo abantu benshi bakurikira FPR bazira kubera ko FPR ni agatsiko criminelle kegereye Paul Kagame kagamije gukora byose ngo kagume ku butegetsi. Ubuzima bw’aba bagakurikira buhumyi bukaba ntacyo buvuze na gato mu gihe nako ubwako kikora mu nda kagahitana abo mu ngoma imbere.

Ni somo ki urupfu rw’amarabira rwa Alphonse Marie Hagengimana rusigiye abiyemeje gushyigikira buhumyi FPR-Inkotanyi ya Paul Kagame

Umuntu arebye uko bimeze ubu, yasubiza iki kibazo mu ijambo rimwe ati: NTARYO. Nta somo rwose impumyi zishobora kubona. Cyangwa se rizibona bigoranye. Ngira ngo muribuka igisubizo Evode Uwizeyimana yasubije uwari umuburiye maze akamusubizanya ibitutsi umuntu atasubiramo ngo inkotanyi nizinyica ntuzandirire.

Ibi rero bya Evode akaba atariko twe tubyumva kuko n’ubwo umuntu nka Alphonse Marie yanze kumva akaba yumviye ijeri ahasize agatwe, twe nk’abantu bafite umutima turamuririra. Kandi tukibaza niba wenda urupfu hari abo rwasigira isomo. Gusa biragoye.

Ni kenshi abantu baburiwe. Bizimungu, Kanyarengwe, Kajeguhakwa, Sendashonga, Kabera Assiel, Mazimpaka Patrick, Kayitare witwaga Intare batinya, Fred Rwigema, Bayingana Bunyenyezi, Adam Waswa, Patrick Karegeya, Assinapol Rwigara, bamaze gupfa, gucecekeshwa, gukeneshwa n’akaboko kamwe. Ese abo banyarwanda baburirwa bakanga kumva tuzabite ba Bazumva ryari?

Alphonse Marie Hagengimana Imana imuhe iruhuko ridashira.

Jean-Michel Manirafasha

Ese koko abanyarwanda babayeho neza ?

Maze igihe kitarenga gito nibaza ibyo abantu cyangwa abanyarwand bahora babeshyerwa na peresida wabo Paul Kagame. Mugihe aherutse muri ONU yavuze amagambo atangaje ngo « abanyarwanda bose bameze neza ».

Ntabwo aribyo nta kuri kurimo rwose, wenda iyo avuga ko ariwe umeze neza hamwe n’agatsiko ke gato ka (FPR) kubera impamvu :

-Umunyarwanda wo hasi abuzwa gucuruza ku gataro, ngo umwanda mu mujyi. Banamufata agakubitwa, akamburwa ibyo yarafite byose, akanafungwa ye. Bamwe bitwa abazunguzayi ;

-Abaturage b’i Nyarutarama (aho bita Bannyahe), barasenyewe amazu yabo kubera ko aho batuye hari umuntu washakaga kuhubaka kandi ntibahabwe ingurane, bakabaha amafaranga make atagize icyo yabamarira ;

– Abana, kwiga uburezi butagira ireme. Aho umwana agera mu wa gatanu primaire (5^ème) adashobora kwandika igihekane (nshy) na (sya), mu gihe abana b’ategetsi bajyanwa kwiga hanze iburayi America nahandi ;

-Umunyarwanda ntashorora guhinga imbuto, ashaka ahabwa amabwiriza na leta. Urugero :abaturage bo mu majyaruguru (ndavuga Musanze- Ruhengeri) kubera bajyaga beza cyane ibirayi n’imboga, yewe n’ibigori none leta yashizeho amabwiriza :

1) – Guhinga ibigori gusa.

2)-Kubijyana mu ma KOPERATIVE kandi abo ngabo bakaba ari abantu ba F.P.R bakagurira ku giciro bashaka.

3)- Umuturage unyuranyije n’ibi arafungwa.

-Gusenyerwa amazu, kuva hato na hato, iyo umuturage yubatse adasabye uruhushya leta mu kibanza cye arasenyerwa ntahabwe n’ingurane yibye byasenyuwe ;

-Kurwara amavunja kubera ubukene n’ubutindi, niyo mpamvu abanyarwanda batabayeho neza.

Swaibu Mvuyekure

Ministri Soraya Hakuziyaremye nawe yatangiye kuvugishwa

Minisitiri w’Ubucuruzi n’inganda, Madamu Soraya Hakuziyaremye yasabye abakozi ba leta kujya bambara ibikorerwa mu Rwanda. Yabitangaje tariki ya 25 Ukwakira 2018 mu gikorwa cyo gutangiza ku mugaragaro gahunda yo guteza imbere ibikorerwa mu Rwanda. Asaba ko iyi myambaro yazajya yambarwa ku wa Gatanu wa nyuma wa buri kwezi.

Ndetse mu binyamakuru bimwe, babona icyo cyifuzo ari itegeko. Muri hose.rw, handitse ngo : « Abakozi ba leta bategetswe kwambara imyenda n’inkweto bikorerwa mu Rwanda buri wa gatanu wa nyuma w’ukwezi mu rwego rwo guteza imbere ibikorerwa mu Rwanda ».

Urebye neza koko, si icyifuzo ahubwo ni itegeko kuko yavuze n’umunsi bagomba kwambara iyo mwambaro.

Ibyo ari byose, ariya magambo aracuramye ntiyagombye kuvugwa n’impuguke yaminuje mu by’ubucuruzi. Twibutse ko Soraya yize mw’ ishuri rizwi cyane ry’ubucuruzi rya Solvay mu Bubiligi no mu rindi rya Thunderbird muri Leta Zunze Ubumwe za Amerika. Yabaye umukozi mukuru muri za Banki nka ING i Londres mu Bwongereza, muri BNP Paribas i Paris no muri Bank of New York i Bruxelles mu Bubiligi.

Ariya magambo rero ni ayo bamuvugisha kuko nkuko tubivuze haruguru, akurikije ubwenge yize ntiyayavuga. Ariko nyine, ni ukwibuka ko FPR-Inkotanyi ntacyo ikora itareba inyungu zayo. Mwibuke ko leta y’u Rwanda yaciye Caguwa kubera ko nyine ya masosiyete ya FPR afite inganda ngo zikora imyenda, ariko ikaba yarabuze isoko kubera guhenda ndetse no kuba itanoze, nta muderi ifite. Mbese ni imyenda ikojonjoye.

Biriya bintu murumva ko birimo itekinika rihanitse.

Ministri Soraya Hakuziyaremye rero nawe atangiye kuvugishwa nkuko ba Evode Uwizeyimana, ba Bamporiki, n’abandi bavugishwa.

None se nawe uyu mwanya ubwenge bwe abushyize mu gifu ? Ariko kuko ari muri rwa rubyiruko rwabaye intore kuva hambere, azi Inkotanyi uko zikora, niba hari uwabimwongoreye kandi amukuriye mw’ishyaka, ntiyari kuvuga ibitandukanye.

Soraya Hakuziyaremye amenye ko itabi ry’i Bugoyi ari kaburabuza.

Jean-Michel Manirafasha

Rwanda: Leta ya FPR igiye kugura cameras 124 zo gukaza umutekano mu mugi wa Kigali

photo www.bankinfosecurity.com

Ibi bikaba byaremejwe mu nama y’igihe gisanzwe ya commission y’inteko ishinga amategeko y’u Rwanda ishinzwe gusuzuma ingengo y’imari , yabaye mu cyumweru gishize mu rwego rwo kwemeza ingengo y’imari y’ikigo gishinzwe ikoranabuhanga mu Rwanda mu mwaka 2018-2019 (RISA) mu magambo avunaguye.

Nkuko abisobanura CIP Theos BADEGE, umuvugizi wa police y’u Rwanda yagize ati hifashishijwe ikoranabuhanga izo cameras (ni izo mu bwoko bwa CCTV : closed-circuit television) ziteganijwe gushyirwa ahantu hahulira cyangwa hateranira abantu benshi mu mugi wa Kigali bikazatuma police n’izindi nzego zifafatanije umutekano zigera ku ntego zazo hadakoreshejwe amafranga menshi. Ati izi cameras zikazafasha mu gukumira no gutahura ibyaha zinerekana uburyo bworoshye bwo gukora amaperereza.

Uku kwikanga abahungabanya umutekano kwa Leta y’agatsiko ka FPR kukaba kwagarutsweho kuri uyu wa 16/05/2018 na Commissaire Général wa police y’u Rwanda CIGP Emmanuel GASANA ubwo yakiraga intumwa z’igihugu cya Angola zishinzwe iby’umutekano n’ubutabera baganira no kuwa karere muli rusange aho yagaragaje ko mu Karere nta mutekano ushoboka kubera cyane cyane imitwe yitwaje intwaro ihakorera ati ni ugukomeza gufatira hamwe ingamba zo kuzitira iyo mitwe, agakomeza atunga agatoki FDLR na RNC avuga ko yishyize hamwe ikaba ibangamiye umutekano w’u Rwanda by’umwihariko ! nguko !

Député Théobald MPORANYI umwe mu bakunze kumvikanisha ijwi mu nteko y’u Rwanda akaba yemeza iyo gahunda ya za cameras ikenewe kandi ko nta kabuza abadepide bagomba kuyishyigikira uko byakabaye kuko ngo ari intambwe ikomeye mu iterambere ry’igihugu ko bagomba kuryamira amajanja !

Banyarwanda muriyumvira ! none se wa mutekano bavuga bafite ni uwuhe mu gihe bakiryamiye amajanja no gushyira mu majwi amashyaka y’impunzi z’abanyarwanda bashaka kwitahira mu mahoro mu rwababyaye ? jye rero nsanga umuti atari uko wakabaye uhora wikanga abo mwonse rimwe ubafata nk’inyangarwanda abandi urunda mu bihome ngo uriho urashaka umutekano w’agatsiko gato kagizwe na FPR ! ahubwo wafungura amarembo ya politiki bikakugeza iyo byakakujugunye inzira zigipfa kugendwa aho gukomeza kubiba amacakubiri y’amoko n’urwango mu banyarwanda kandi tuzi aho bamwe byatugejeje na nubu bikidukurikiranye, ababyeyi n’abavandimwe bacu tutazi iyo baroshywe kubera Jenoside yo muli 1994 mu gihe abandi bashyingurwa mu cyubahiro! ni akaga !

Banyarwanda rero nkuko bavuga ko muli politiki nta nshuti ihoraho akaba nta n’umwanzi uhoraho ni nako abanyarwanda twari dukwiye nibura kwitwara naho ubundi ntaho igihugu kiva ntaho kigana !

Byanditswe ku wa 18/05/2018, na :
A.BEN NTUYENABO, KIGALI-RWANDA.

Kwibuka bibangamiye ubumwe n’ubwiyunge, kuko bihora bikongeza inzika n’urwango hagati y’abanyarwanda

photo capture youtube.com

Nkuko bisanzwe buri mwaka mu Rwanda, uno mwaka nabwo habaye icyunamo uko bigaragara ni ibisanzwe uretse ko ubona ibyuno mwaka nta ngufu byari bifite nki’by’umwaka ushize.

Uno mwaka ka gahato ko kwakwa amafaranga kungufu karagabanutse, ushaka akaba ariwe uyatanga hari naho batayatse, ikindi ni uko ubundi gukererwaho niminota 2 bagucaga amafaranga wayabura ugafungwa, ariko ubu ubona byaragabanutse.

Gusa nkuko bisanzwe abantu barafunzwe bazira kuvuga ibyo Fpr idashaka kumva, ibyo FPR yita gufobya genocide yakorewe abatutsi, ndetse n’ingengabitekerezo ya genocide. Aha ngaha hibasirwa cyane abahutu bagafungwa kakahava, ibijyanye no kujya kubakira, guhingira no gukorera abacikacumu byo byarakomeje.

Abaturage twabashije kuganira nababajije icyo bavuga kubijyanye no gufobya genocide ndetse n’ingengabitekerezo ya genocide. Bansubije ko kuvuga ukuri atari ugupfobya genocide ko ahubwo ikibazo ari uko mu Rwanda kuvuga ukuri bitemewe. Kubijyanye n’ingengabitekerezo bambwiye ko bamwe mu bantu baturutse Bugande n’abandi bene ingoma ntawabarusha ingengabitekerezo, kuko uhura nawe no mu muhanda akakubwira ngo »DORE IYO MBWA Y’UMUHUTU ». Ubwo kandi waba utirutse ngo uhunge ugakubitwa, bati ibyo Leta ntibyita ingengabitekerezo, ariko umuhutu yavuga ko yapfushije abantu byonyine akabizira yaba atishwe agafungwa imyaka 25 ngo ni ruharwa.

Mu cyunamo cyuno mwaka FPR hari udushya yadukanye, nko kwigisha abantu ko mu Rwanda nta moko abamo, kandi mu kanya bati abahutu bishe abatutsi, bati abahutu ni abicanyi.

Kandi bati hari abarokotse genocide yakorewe abatutsi, noneho ukibaza niba abo barokotse barahise bahinduka abatwa cyangwa abahutu bikakuyobera. Bati mwa bahutu mwe muri abicanyi mwishe abatuts. Aha naho ukibaza aho abahutu bavuga ko bishe abatutsi bagiye bikakuyobera. Mu byukuri mu Rwanda amoko arimo ndetse ubu noneho harimo nivangura rishingiye ku moko ritigeze ribaho igihe icyo aricyo cyose.

Badukanye kandi ijambo bise ngo ni »UBUDASA » aha baba bashaka kuvuga ko u Rwanda rufite ibyo rurusha amahanga. Bakavugamo nk’iterambere, n’uburezi ngo n’ubumwe n’ubwiyunge n’ibindi binyoma byinshi.

Ibyo byavuzwe mu gihe bamwe barimo kwamburwa amasambu yabo ngo hagenewe abanyenka, ngo si abahinzi, biravugwa kandi mu gihe abantu basenyerwa amazu yabo ku ngufu za Leta ngo ntiyujuje ibisabwa uboshye kare kose aba yarubatswe batareba, n’andi mabi menshi akorerwa mu Rwanda.

Hari umuturage twaganiriye,ambwirako ibi bintu byo kwibuka nkuko bitegekwa na FPR bibangamira ubumwe n’ubwiyunge bw’abanyarwanda, ngo kuko bihora bikongeza inzika n’urwango hagati y’abanyarwanda, iyi kandi ni intwaro FPR ikoresha ngo icecekeshe umuntu wese ushaka guharanira uburenganzira bwe. Bityo abahutu bahame mu bucakara bwa FPR.

Iyo uganiriye n’abanyarwanda nibura 95% bifuza ko ibi bintu byo kwibuka byavaho noneho abanyarwanda bagatangira amateka mashya mu bumwe n’ubwiyunge nta terabwoba n’agahato, abanyarwanda bose bakareshya ntawe uhora ashinjwa ko ari umwicanyi kandi genocide yarabaye ataravuka. Bati imana yonyine niyo izadukiza uru rusyo rushyushye twikorejwe na FPR. Nanjye nti namwe muzabigiramo uruhare. Ngayo nguko ibyo mu Rwanda rwa FPR.

J-Jules Rugero
Kigali-Rwanda

Rwanda : Muri Gatsibo, abahinzi bakomeje kwamburwa amasambu mu buriganya

Nkuko bisanzwe bizwi ko mu Rwanda umuntu utabyumva kimwe na FPR agomba kunyagwa ibye ku ngufu, noneho ni agahomamunwa.

Mu ntara y’iburasirazuba, mu karere ka Gatsibo, mu murenge wa Rwimbogo, mu tugari twa Nyamatete na Rwikiniro.abaturage bararira ayo kwarika, kuko banyanzwe amasambu n’amazu byabo ku ngufu bitwaje ngo baguze mu mafamu (farm) ahantu hagenewe ubworozi.

Abo baturage baguze n’umugabo witwa NDIRIMA James na SESONGA (ntitwabashije kumenya irindi zina) abenshi muri abo baturage bamazemo imyaka irenga 10, none ubu FPR irimo kubirukana ngo nibave mu mafamu (farm) y’aborozi kandi banyiraho aribo bahabagurishije.

Ikibazo ni iki: ese abahabagurishije nibo bazahasubirana cyangwa ni abandi bazahaha? Nkuko bisanzwe bizwi aya ni amwe mu manyanga FPR ikoresha iyo ishaka kunyaga umuntu. Ibintu nkibi bikunda kuba mu turere twa Gatsibo na Nyagatare, ndetse mu myaka ishize i Nyagatare bimuye imiryango 110 yose irangara, ariko ikibabaje aho babimuye bavuga ko ari mu mafamu y’inka, bari bafitemo intoki n’amazu n’indi mirima byose na nubu birimo ahubwo babikoze neza cyane. Mu by’ukuri rero ni ubujura gusa buba bugamijwe nta kindi.

Aba baturage b’i Gatsibo rero baratabaza nubwo badafite uwo batakira kuko uwo batakira ariwe ubarenganya. Barashaka kubasubiza udufaranga tw’intica ntikize ariko abo baturage barayanze, ubu inzego zibanze na polisi zirimo kubatera ubwoba ngo bazabafunga nibindi.

Kuko nk’umuntu wahaguze mu myaka 10 ishize hegitari yayiguraga amafaranga atarenze 800.000 RF none ubu hegitari iragura 3.000.000 RF y’u Rwanda, ubwo rero umuntu arareba icyo ari bumaze 800.000 RF kikamuyobera.

Ngayo nguko.

J-Jules Rugero
Gatsibo-Rwanda

Rwanda : Leta y’agatsiko ka FPR-inkotanyi irimo gusaza imigeri

foto kigalitoday.com

Hari uwavuze ngo « l’Afrique c’est très simple, je vais vous expliquer : c’est noir et ça grouille » (Général de Gaule 1890-1970) abanyarwanda umenya uwabaroze atarakarabye !

Mu gihe abashingamategeko b’u Rwanda basigaye birirwa batukana ku mugaragaro nk’abashumba;

Mu bucamanza naho bene Rwigara bakaba barateje impagarara mu baturage kubera urubanza baburana n’ingona mu kuba bagerekwaho ibyaha bihimbano kandi intandaro ari ihotorwa ry’umubyeyi wabo assinapol Rwigara, rukaba rwarabuze gicibwa nkurwayoberanye ;

Marie Ingabire Immaculée wa Transparency Internatinal nawe ati abaturage basigaye baraciye amazi ubucamanza bw’u Rwanda aho umuntu asigaye ahagarara imbere y’ubucamanza akabubwiza inani na rimwe ntacyo yikanga habe no kugira icyo akorwaho kandi twari tuzi ko abacamanza ari ndahangarwa Bwana Rugege Sam chairman wa supreme court abirebera ;

Abagabo bamwe nabo bakaba batakigira ijambo kubera gushumurizwa abagore babo na Leta y’agatsiko ngo ni uburinganire aho usanga uretse guhimbira ku bagabo babo gusa ntacyo bamariye na bagenzi babo banyuruzwa cyangwa bari mu bihome bahohoterwa na Leta y’agatsiko ku mugaragaro ! ngo umugabo ni umwe ni Pahulo Kagame ! mbega akaga !

Abandi banyarwanda nabo bakaba barigiswa cyangwa bakicwa umusubirizo bwana Busingye, ministry w’ubutabera n’igipolisi bakanuye amaso gusa kuko baba babigizemo uruhare wabaza ngo iperereza riracyakorwa, mu gihe ushinzwe kuvugurura amategeko Me Uwizeyimana Evode we amagambo yamaze kumushira imutwe ngo aratechnika amategeko atazigera yubahirizwa ;

Ministri Mushikiwabo na Dr. Bizimana wa CNLG nabo bati ko twari tuzi ko ibirego abafransa baturega kw’ihanurwa ry’indege ya Habyarimana byarangiye bigarutse bite ? bati turambiwe ibirego bitarangira bigamije gushaka kwegekaho u Rwanda icyaha n’abayobozi barwo cyo guhanura indege ya Habyarimana na Ntaryamira kugirango bivaneho Jenoside kandi tuzi ko yateguwe na mbere yuko iyo ndege ihanurwa ! none Jenerali wacu Kabarebe ngo niyitabe ubutabera bw’ubufransa abazwe imbonankubone hamwe n’abafatanyacyaha ! ibyo ntibishoboka kuko byaba bigamije guhirika ubutegetsi bw’u Rwanda;

Ngizo imanza z’abarwanashyaka ba FDU-INKINGI ishyaka rya Victoire Ingabire Umuhoza ritavugarumwe na Leta y’agatsiko bafungiye hirya no hino mu Rwanda ku buryo bw’iyicarubozo bakomeje kujujubwa bazira ubusa dont 1er v/c président Boniface Twagirimana, Fabien Twagirayezu, n’abandi baburiwe irengero voir Tuyisenge Jeanine et autres….;

Ngaho kwivana mu rukiko nyafrika ruharanira uburenganzira bwa muntu kubera Victoire Ingabire;

Nguko gushaka gusinyura amasezerano yo kutongera gukorana n’umuryango mpuzamahanga uharanira uburenganzira bwa muntu (HRW) kubera ubuhotozi n’iyicarubozo u Rwanda rushinjwa n’uyu muryango;

Nguko kubangamira akanama k’umuryango w’abibumbye (UN) gashinzwe igenzura ry’iyicarubozo mu magereza na za cachots z’u Rwanda bikakaviramo kwitahira katarangije mission yako;

Ngaho mu karere u Rwanda ruherereyemo, kurebana nabi n’igihugu cya Ouganda cyarubereye igicumbi kugeza inkotanyi zirutashyemo! ngo kubera umunyemari w’umunyarwanda Ayabatwa Rujugiro utavugarumwe na Leta y’agatsiko ugiye gushora akayabo mu kubaka inganda zitunganya itabi muli icyo gihugu; Ngiyo imitungo y’uyu Rujugiro yafatiriwe indi ikaba iri mu gutezwa cyamunara na Leta y’agatsiko (voir union trade center etc…) ku buryo hagize uzanira Pahulo Kagame agahanga ke yabigororerwa bikomeye;

Nguko kurebana ay’ingwe hagati ya Nkurunziza w’u Burundi na Kagame aliko uyu we asa naho yubikiriye kandi yarahatsindiwe icy’umutwe.

Banyarwanda ntawabirondora ngo abimareyo twazakomeza ubutaha gusa ntawashidikanya avuze ko aba bayobozi biyicaje ku ntebe indi myaka 7 ntakabuza ari nko gusaza imigeri kuko burya umujinya w’imbwa ushirira mu kuzunguza umurizo .

Byanditswe ku wa 25/10/2017, na :
A.BEN NTUYENABO, KIGALI-RWANDA.

Rwanda :Urubanza rw’abo kwa Rwigara rwasubitse. Bafungiye iki niba iperereza ritararangira nkuko ubushinjacyaha bubivuga?

Ku ya 9/10/2017 niho abo kwa Rwigara bari bongeye kwitaba urukiko rwisumbuye rwa Nyarugenge aliko noneho bari baherekejwe n’umwunganizi wabo Me Buhuru Céléstin wasaga nuherekeje izo mfungwa zari mu mapingu buri wese n’abapolisi babili bafashe mu maboko kugera binjiye mu cyumba cy’urukiko cyari cyakubise cyuzuye abantu abandi hanze yacyo bategereje gukurikiranira urubanza kuri za microphones installés à l’extérieur ku buryo n’abahisi n’abagenzi bari barambirije aho.

Bikaba byagenze nk’ubushize bamwe muli buri ruhande bumvikanisha imbogamizi zituma urubanza rwasubikwa, nko ku ruhande rw’umwunganizi Me Buhuru Céléstin yasabaga igihe kingana n’icyumweru ngo abashe kwiga dossier neza yabo yunganira kandi anahabwe n’ibiyikubiyemo byose harimo ibimenyetso mu kubashinja ndetse na copie yabyo.

Ku ruhande rwa ba Rwigara nabo bakavuga ko batigeze babona dossiers zabo mbere yuko bajyanwa mu rukiko ku buryo batarashobora kumenya ibyo baregwa ! aha umuntu akaba yakwibaza impamvu ubushinjacyaha butwara abantu mu bucamanza butarabamenyesha ibyo baregwa !

Ku ruhande rw’ubushinjacyaha nabwo buti ntitwarekurira dossier Me Buhuru umwunganizi wabo ngo ayicukumbure neza kandi tukiri mu iperereza.

Izo mpaka zose zikaba zugariwe n’inteko y’abacamanza hafatwa umwanzuro usubika urubanza rukazasubukurwa ku wa gatatu taliki ya 11/10/2017 haburanishwa niba abaregwa bakomeza gukurikiranwa bafunze cyangwa bari hanze, bityo Me Buhuru akaba yahawe iminsi itatu yo kureba dossier y’abo yunganira aho kuba icyumweru nkuko yari yabisabye.

Hagati aho opinion publique iribaza byinshi kuri uru rubanza, nyirabayazana akaba ari ya Ngona y’inkazi Pahulo Kagame igihe yarahiriraga kwongera kuyobora u Rwanda mandat ya 3 ubwo yatungaga agatoki abanyereza umutungo w’abaturage avuga ko bidegembya uko bashatse ko bagomba kubiryozwa kabaye niyo baba barashatse kwiyamamariza umwanya w’umukuru w’igihugu bikabananira ! yavugaga Mlle Diane Rwigara.

None se Banyarwanda, aba benedata baba bafungiwe iki mu gihe bataramenyeshwa ibyo baregwa byose ? Ko atari urwumwe! Byumvikana bite ukuntu urubanza rugiye gutangira hakiri ibigikorwaho iperereza nkuko ubushinjacyaha bubivuga ? Ese amategeko y’u Rwanda yaba avuga ko iperereza rikorwa nyuma yo gufatwa cyangwa mbere ?

Banyarwanda, umanika agati wicaye kukamanura bikakubera ingorabahizi, uru rubanza rushobora kuzasiga umugani kuko nkeka ko mu kurusubika haba hagikorwa itechnika ryumvikanyweho n’ubushinjacyaha n’abacamanza dore ko bitaboroheye kuko n’ibyaha bimwe batangiye kubikuraho nk’icyaha cyo kunyereza umusoro kitagikurikiranywe n’ubushinjacyaha ! Aho amaherezo ntiwabona ibirego byose biregwa aba bene Rwigara bihindutse baringa ? Birabe ibyuya ntibibe amaraso. Tubitege amaso.

Byanditswe ku wa 09/10/2017, na :
A.BEN NTUYENABO, KIGALI-RWANDA.

Mu Rwanda imihigo ntishoboka kubera itechnika

Ni ku munsi w’ejo hashize taliki ya 6/10/2017 mu nteko ishinga amategeko y’u Rwanda imbere y’abayobozi batandukanye barimo abayobozi b’uturere 30 tugize igihugu bamweretse igihandure ubwo hakurikijwe amanota yahawe uturere mu rwego rwo kwesa imihigo 2016-2017 akarere kaje ku isonga ari Rwamagana kamwe mu turere tw’intara y’iburasirazuba kazahajwe n’inzara n’uruzuba rudashira aho abaturage baho bakomeje gusuhukira mu gihugu cya Ouganda. Ibiramambo ahubwo akarere ka Rubavu kakaba karashyizwe ku mwanya wa nyuma n’amanota 72.86 % kandi tuzi ko gasanzwe kagwa mu ntege umugi wa Kigali haba mu bikorwa by’amajyambere, ubukerarugendo n’ubucuruzi byongeye kakaba gafite n’ubuhahirane bukomeye na Republika iharanira demokrasi ya Congo hakurya, nubwo bwose kakunze kuvutswa umudendezo na Kagame agahindulira ubuyobozi buri gihe kubera kwikanga baringa.

Ni agahomamunwa ! aliko ntibitangaje kuri Leta yokamwe n’itechnika ryuzuye ikinyoma n’igitugu, Kagame nawe bikaba byaramubereye urujijo ubwo hatangazwaga amanota yiyo mihigo y’uturere harimo 82% y’akarere ka Rwamagana kabaye aka mbere, hamwe hakibarizwa bene ba baturage bibera mu nzuri z’inka badakora na busa batunzwe n’amata y’inka no kwinywera za Kanyanga ku buryo uhura na bamwe mu gitondo bareba nk’amakanya! Birababaje ! akaba yaragize ati: ntibyumvikana mugomba kujya musubiza amaso inyuma mukareba niba koko ayo manota akwiye ! ati imihigo si ukurangiza umuhango gusa hagomba no kugaragazwa ibimenyetso n’imibare ifatika, akaba yakomeje asaba ikigo cy’igihugu cy’ibarurishamibare kujya gisuzuma uko imihigo yushijwe mbere yuko hagenwa amanota.

Banyarwanda, dukurikije aya magambo ya Kagame ukareba n’urutonde rw’uturere twahawe amanota y’imbere n’ukuntu tudasiba gutumirwa mu nteko aho abayobozi batwo bahora bisobanura mu gukoresha nabi umutungo wa Leta no kuwunyereza ntiwabura guhamya ko iyi mihigo ari itechnika ryambaye ubusa, nkaba nsanga Kagame baramuhinduye injiji yize nkuko nawe yakunze kubibacyulira.

Iyo mihigo yagendeweho ikaba yari igabanijemo inkingi enye za gouvernement arizo imibereho myiza, ubutabera n’ubukungu.

Byanditswe kuwa 07/10/2017, na :
A.BEN NTUYENABO, KIGALI-RWANDA.

Rwanda: Abaturage bararira ayo kwarika kubera imisanzu bakwa na FPR muri ibi bihe bya campain.

Kubera ikimwaro n’isoni byateye Leta y’agatsiko ka FPR kandi yari yarijeje abanyarwanda ko gahunda zose zijyanye n’amatora y’umukuru w’igihugu zarangije gutunganywa none abenshi mu bayobozi b’inzego zibanze bakaba baraboneyeho icyuho cyo gusakabaka abaturage utwabo bitwaje ngo barashaka inkunga yo gushyigikira umukandida wa RPF-INKOTANYI Paul Kagame; ni muli urwo rwego Bwana Francis Kaboneka Ministri w’ubutegetsi bw’igihugu mu kiganiro yagiranye na ba gouverneurs b’intara, uturere n’umujyi wa Kigali yavuze ko abayobozi bose batse amafranga abaturage bababeshya ko ari ayo gutera inkunga amatora y’umukandida wa RPF ku mwanya w’umukuru w’igihugu bagiye kubibazwa.

Banyarwanda banyarwandakazi, ubu se tuvuge yuko Ministri Kaboneka uretse kwirengagiza hari umunyarwanda numwe uyobewe ko ayo mabwiriza yo kwaka imisanzu yacuriwe muli cabinet yiwe n’abandi bafatanije barimo NEC(Commission y’igihugu y’amatora) ! none abonye abaturage bavugije induru ati abayobozi babigizemo uruhare ni bakurikiranywe ! ubonye iyo avuga ati mwamennye ibanga mwishyira ku karubanda ! gusa nyiri umutwe munini ntarengwa n’imijugujugu !

Banyarwanda banyarwandakazi, uku kunyunyuza imitsi ya benengofero batagira kivugira ni imwe mu ngeso zadukanywe na Leta y’agatsiko ka FPR kuva kafata ubutegetsi hashize imyaka 23 ! ku buryo abanyarwanda ni kwa kundi kwabo bapfira muli Nyagasani bagatangira guhwihwisa ibibazo byageze iwa Ndabaga ! ariyo mpamvu kuva kera na kare bemye bazi kwikiriza neza intero y’abayobozi. Ubu se iyo uyu mwambari Kaboneka atabikomozaho ko nta numwe wari waratatse n’igihe twabivugiye ? ahubwo ko wasangaga inyikirizo ari ya yindi ngo ‘’niwe…..niwe….niwe….’’! ahaaaa… ni ukuvuga ko bari bukomeze kubishegesherezwa mu mitima yabo aribyo akenshi igihugu cyacu cyakunze kuzira uretse nubundi ko ari hahandi !! aliko abaturage babika umubabaro mu mitima bagashinjagira bashira nyuma babona umwanya ibibarimo bigaturika nk’igisasu.

Banyarwanda banyarwandakazi, ubu se Ministri Kaboneka arabikoraho iki ko kugeza kuri uyu munota nandika bikomeje gukorwa aho abambari b’agatsiko babyukana uturumbeti buri gitondo bahamagalira abaturage kugera bwangu aho za Bus ziba zitegereje kujya kwamamaza umukandida wa RPF kandi ubwo baba baraye banyuze mu ngo zose baka iyo misanzu ku buryo mu karere ka Gasabo abaturage batagihumeka.

Bamwe mu baturage bashoboye kutugezaho ubuhamya bwabo bibaza impamvu bakwa amafranga buri kwezi y’umuryango wa RPF bakongeraho nayo gushyigikira umukandida wa RPF ntibabone nibura naga T-SHIRT ka 5000frw mu gihe cya campain ! bakomeje bansaba gutambutsa ubu butumwa basaba RPF kudakomeza kubiba umunabi mu banyarwanda, nguko nguko.

Si ibyo gusa kuko nakomeje kubona n’ubundi butumwa buturutse impande zose; hari NDIMUBANDI Emmanuel wo mu Karere ka Gatsibo uhamya ko buri rugo bagiye barwaka ibihumbi bibili byo gushyigikira RPF-INKOTANYI.

NYIRANDIKUMANA Thérésie ukora mu bitaro bya Murunda akarere ka Rutsiro nawe yantangarije ko we n’abandi bakozi bose bo mu bigo by’ubuvuzi bagiye bacibwa ibihumbi 30.000frw abandi 20.000frw abandi 10.000frw kuri buri wese ati aliko icyadushegeshe kikadutera n’urujijo ni ukuntu nyuma yuko Ministri Kaboneka avuze ko gucibwa amafranga yo gushyigikira umukandida wa RPF bitemewe aribwo twazindukiye mu nama ku bitaro bya Murunda iyobowe na Dr. NIRINGIYIMANA Eugène (Médecin directeur w’akarere k’ubuvuzi) atumenyesha ko yatumwe n’abayobozi bakuru ba RPF ko twatanze amafranga makeya ko ahubwo dusabwa byihutirwa gutanga andi 1/3 cy’umushahara duhembwa ! ibyo byose twarabyubahirije kuko ntawe uburana n’umuhamba ! ati ayo mafranga yose yashyizwe kuri compte ya BPR/AMATORA /RPF-RUTSIRO № 515421727110168. Uwo mubyeyi yakomeje agira ati mudufashe rwose umuryango wa RPF udusize iheruheru twitwa ngo turakora, amadeni aratwishe nta handi twakura !

Abandi ni abarimu bo mu Karere ka Ngororero barangije mu itorero ry’igihugu riyobowe na wa mumotsi Rucagu Boniface , ibyabo bikaba bisa n’ikinamico! Bavuga ko bakimara gusinyishwa ibyo barangije gukora bavuye mu itorero buri mwarimu wese avanwaho 1/30 cy’umushahara kuzageza igihe kitazwi guhera mu kwezi kwa 1/2017, bati none no guhera mu kwa 3/2017 abayobozi b’ibigo bazana listes tugasinyira andi 1/30 nanone yo bakaba bayakira mu ntoki batubwira ko ari umusanzu wo gushyigikira amatora y’umukuru w’igihugu; abo barimu bakaba batakambira Bwana Kagame ngo nagerayo azibuke mwarimu ! bati bayobozi ko namwe mugeze aho mugeze kubera kunyura imbere ya mwarimu, kubera iki mworoherwa aho kwibuka mwarimu ahubwo mukamwambura nutwo afite ? twasaba ko muduhemba muti abarimu muri benshi !!! ubu koko tuzabigenze dute ?

Ahandi twashoboye kugera naho ni mu Murenge wa Cyumba i Gatuna ku mupaka uduhuza na Ouganda aho chairman wa RPF yaka buri muntu ibihumbi 20.000frw akongeraho ko utazayatanza azahura n’ingaruka nyuma ! nguko nguko kimwe n’i Rutare ho mu Karere ka Gicumbi bakurikiza ibyiciro by’ubudehe aliko bo bagasanga ngo ari igisebo ku muryango wa RPF! bati mudukize ba rusahuliramunduru naho ubundi turashize!

Banyarwanda banyarwandakazi rero ntawarondora akababaro k’abaturage ngo akamareyo aliko mpamya ko iyi ari isura y’akababaro n’intimba byuzuye imitima y’abanyarwanda! umuntu akaba yakwibaza ati amaherezo azaba ayahe kandi uwo utakira ariwe ugusahura ? aliko haba kwihangana kuko nta gahora gahanze .

Mugire amahoro y’Imana.

Byanditswe ku wa 24/07/2017, na:
A.BEN NTUYENABO, KIGALI-RWANDA.