Archives par étiquette : Paul Kagame

Ese koko abanyarwanda babayeho neza ?

Maze igihe kitarenga gito nibaza ibyo abantu cyangwa abanyarwand bahora babeshyerwa na peresida wabo Paul Kagame. Mugihe aherutse muri ONU yavuze amagambo atangaje ngo « abanyarwanda bose bameze neza ».

Ntabwo aribyo nta kuri kurimo rwose, wenda iyo avuga ko ariwe umeze neza hamwe n’agatsiko ke gato ka (FPR) kubera impamvu :

-Umunyarwanda wo hasi abuzwa gucuruza ku gataro, ngo umwanda mu mujyi. Banamufata agakubitwa, akamburwa ibyo yarafite byose, akanafungwa ye. Bamwe bitwa abazunguzayi ;

-Abaturage b’i Nyarutarama (aho bita Bannyahe), barasenyewe amazu yabo kubera ko aho batuye hari umuntu washakaga kuhubaka kandi ntibahabwe ingurane, bakabaha amafaranga make atagize icyo yabamarira ;

– Abana, kwiga uburezi butagira ireme. Aho umwana agera mu wa gatanu primaire (5^ème) adashobora kwandika igihekane (nshy) na (sya), mu gihe abana b’ategetsi bajyanwa kwiga hanze iburayi America nahandi ;

-Umunyarwanda ntashorora guhinga imbuto, ashaka ahabwa amabwiriza na leta. Urugero :abaturage bo mu majyaruguru (ndavuga Musanze- Ruhengeri) kubera bajyaga beza cyane ibirayi n’imboga, yewe n’ibigori none leta yashizeho amabwiriza :

1) – Guhinga ibigori gusa.

2)-Kubijyana mu ma KOPERATIVE kandi abo ngabo bakaba ari abantu ba F.P.R bakagurira ku giciro bashaka.

3)- Umuturage unyuranyije n’ibi arafungwa.

-Gusenyerwa amazu, kuva hato na hato, iyo umuturage yubatse adasabye uruhushya leta mu kibanza cye arasenyerwa ntahabwe n’ingurane yibye byasenyuwe ;

-Kurwara amavunja kubera ubukene n’ubutindi, niyo mpamvu abanyarwanda batabayeho neza.

Swaibu Mvuyekure

Rwanda: Dr. Richard Sezibera, ministri w’ububanyi n’amahanga w’u Rwanda, ari mu gihirahiro

Quand un diplomate dit ˂˂ oui ˃˃ , cela signifie ˂˂ peut-être ˃˃, quand il dit ˂˂ peut-être ˃˃ , cela veut dire ˂˂ non ˃˃ ; et quand il dit ˂˂ non ˃˃, ce n’est pas un diplomate. H.-L. MENCKEN, Dictionary of quotations (1946).

Ni kuri uyu wa 20/11/2018 mu kiganiro cye cya mbere n’itangazamakuru aho asimburiye Louise Mushikiwabo ku mwanya wa Ministri w’ububanyi n’amahanga w’u Rwanda Bwana Dr. Richard SEZIBERA yagize icyo atangaza ku bibazo byugarije igihugu cyacu.

Abajijwe ku byerekeye ububanyi n’amahanga butifashe neza ku bihugu by’ibituranyi yashimangiye ko igitotsi gihari hagati y’ibihugu bya Ouganda n’u Burundi by’umwihariko ati aliko uwo mwuka mubi ukaba udaterwa nigihugu cyacu ahubwo ko uturuka ku bandi bantu bifuza guhungabanya umutekano w’u Rwanda bari muli ibyo bihugu ati bityo ibyo bihugu bikaba byaradanangiye inzugi ku Rwanda ruhora rukomanga !

Uyu mudiplomate abajijwe ku busabe bw’ibiganiro hagati ya leta y’u Rwanda , South Africa na Général KAYUMBA NYAMWASA wibumbiye mu mpuzamashyaka agize opposition nyarwanda bise P5 yahakanye yivuye inyuma ko atabizi ko niyo P5 atayizi ahubwo ko yumvamo PS IMBERAKURI rimwe mu mashyaka ya opposition yemewe n’amategeko hano mu Rwanda kandi akaba afite n’intebe mu nteko ishinga amategeko y’u Rwanda ati naho ayo bavuga niba ari za associations niba ari nyarwanda …..ntabyo nzi.. yakomeje ahakana ko nta biganiro leta y’u Rwanda ihuriyemo na South Africa na Kayumba Nyamwasa kandi ko nta muntu wakora ibyaha atera amagrenades mu Rwanda yitwaje politiki ngo yo kutabihanirwa ati niyo mpamvu abanyabyaha ibyabo bikemurwa n’ubutabera; yatsembye avuga ko niba hari abifuza ibiganiro bazitabira umushyikirano cyangwa bagashaka abandi banyarwanda mu bihugu barimo bakaganira , yongeraho kandi ko nta gitugu kigomba gukoreshwa k’ushatse kubana n’undi akabyanga ati kuko ukomanze bakanga kugukingulira nta burenganzira ufite bwo kumena umuryango w’uwanze kugukingulira ! nguko… yakomeje avuga ko ibiganiro bihari ari ibizakorwa na South Africa bihuriyeho n’u Rwanda nkuko ngo byasabwe na ba prezida Kagame na Ramaphosa bikazakorwa gusa mu rwego rwo kunoza umubano w’ibihugu byombi ati kandi nabyo ntibiratangira.

Banyarwanda rero nkurikije ibi bisobanuro by’uyu mu diplomate ndasanga prezida Kagame yagarura uriya mugore yohereje muli OIF kuko niwe wenyine wari ushoboye gutukana no kurya iminwa yishongora naho ubundi imibanire ye n’amahanga yaba isubiye muli bya bihe aho Dr. Charles MULIGANDE wayoboraga Minaffet icyo gihe yajyaga yirirwa yumvikanisha ikinyoma cy’uko nta ngabo z’u Rwanda zavogereye igihugu cya CONGO akemera no kubirahirira ku maradio y’amahanga nk’umukozi w’Imana dore ko yari azwiho nk’umukristo w’umurokore ! aliko ibyo byose byaje kurangira ikinyoma kimushyize ku karubanda nuko inkotanyi zitagira isoni ! muzamumbarize ! ijoro ribara uwariraye koko !

Mugire amahoro.

Byanditswe ku wa 21/11/2018, na :
A.BEN NTUYENABO, KIGALI-RWANDA.

Rwanda : iyo ibiza bimaze gusiga ingogo niho prezida Kagame na gouvernement bibuka abaturage bya nyirarureshywa

Uyu mugabo Pahulo Kagame ukomeje kwibera mu Kirere no kwigaragaza mu ma film atangwaho akayabo gaturutse mu mitsi ya Rubanda rutagira kirengera amenya ko Ibiza bihari ari uko byamaze abanyarwanda ari nabwo yumva ko agomba kubabeshya bya nyirarureshywa yihanganisha imiryango yabuze ababo ko hagiye gushyirwaho ingamba zo gufasha abibasiwe n’ibyo biza mu gihe kirambye. Byahe se birakajya! (ubundi se yakoraga iki mu myaka 24 yose ishize ? ).

Ministère ifite Ibiza mu nshingano zayo ivuga ko amatohoza yashoboye gukora kuva mukwa mbere kugeza kuri 30/04/2018 hapfuye abantu 189 bishwe n’ibiza biturutse ku myuzure, inkangu n’amazu byabaguye hejuru, abakomeretse bakaba 275, inzu zasenyutse burundu 1201 naho izangiritse 4130 , hakaba n’amatungo yose hamwe 705 yapfuye.

Ku byerekeranye n’imyaka mu mirima by’umwihariko hamaze kwangirika ibirenga hegitari ibihumbi 4000Ha wabiha agaciro bikangana na hafi Miliyari 4Frw zirenga. Ministère y’ubuhinzi n’ubworozi ikaba itangaza ko hari ikigega k’ingoboka isigaranye ku baturage bagizweho nizo ngaruka kirimo Toni ibihumbi 7 z’ibigori na Toni ibihumbi 4 z’ibishyimbo gusa kandi ko kwongera guhinga ari mu mpeshyi harebwa ku bijumba cyangwa imboga.
Ibindi byibasiwe ni ibiraro 33 by’imihanda byatengutse nkaho wasangaga imihanda imwe n’imwe itakiri nyabagendwa ifunze kubera imyuzure urugero nk’umuhanda hafi y’ikiraro cy’Uruzi rwa Nyabarongo ugana i Runda aho abaturage cyangwa imodoka ntoya bamara nk’iminsi ine badashobora kucyambuka bava cyangwa bagana mu mujyi wa Kigali kandi mu byukuri icyo kiraro hashize imyaka igera kuri itatu Gouvernement ibinyujije kuri Ministère yayo y’ibikorwa-remezo hakozwe inyigo y’ukuntu cyazamurwa hejuru ku buryo amazi ataba menshi ngo akirenge.

Mu gushaka umuti w’ibiza rero, Ministri Kaboneka Francis w’ubutegetsi bw’igihugu we avuga ko Leta igiye gukoresha ingufu mu kwimura abaturage batuye mu manegeka !

Banyarwanda , uyu mu Ministri arirengagizako hashize igihe kirekire hakozwe urutonde rw’abaturage ku rwego rw’imidugudu Leta yagombaga kwimura mu manegeka aliko ko kugeza ubu bamwe kuri urwo rutonde babuze aho icyo gikorwa cyahereye ! dore ko haje kwinjirwamo n’ikimenyane bamwe muri bo bagahanagurwa ku rutonde bivugwa ko ari abahutu bagomba kwirwariza kandi basabwa kuhava ! nguko !

Ministri Kaboneka akomeza avuga ko abanyarwanda bagomba kumvira inama zo kwimuka bahabwa n’abayobozi aho gutegereza kuzahavanwa n’ibiza!

Ministri ushinzwe Ibiza no gucyura impunzi Mme De Bonheur Jeanne d’Arc, umwe mu bafatanyamahano na Police y’igihugu mu kurasa impunzi z’abanyekongo mu nkambi ya Kiziba nazo zugarijwe n’inzara aho kuzirengera avuga ko Leta idashinzwe guhangana n’ibiza yonyine ati buri muturage wese agomba kugira uruhare mu guhangana nabyo!

Ministri Marie Solange Kayisire ushinzwe imirimo y’inama y’abaministres we araburira abanyarwanda ko imvura itarahita naho Ministre Dr. Biruta Vincent w’amashyamba n’ibidukikije ati bitewe nuko imvura ikigwa abanyarwanda bajye bakulikirana amakuru atangwa n’ibiro by’iteganyagihe ry’ikirere !

Banyarwanda bavandimwe uretse ko umuntu avuga ibigoramye umuhoro ukarakara murabona aya mangambure y’aba bayobozi hari icyo yafasha abaturage muli ibi biza ? dore ko nta na ONG z’abagiraneza nka CRS zikibarizwa mu gihugu cyacu ngo zibe zagoboka ba nyagupfa nkuko byari bimenyerewe! ndahamya rero ko nta gisubizo kirambye mbona kuko nta ntumbero Leta y’agatsiko ifite mu bigomba gukemurwa.

Byanditswe ku wa 07/05/2018, na :
A.BEN NTUYENABO, KIGALI-RWANDA.

Rwanda: Prezida Pahulo Kagame yiyambaje abayobozi b’inzego z’ibanze mu guhangana n’abashaka gukomanyiriza u Rwanda

Mu mwiherero w’abayobozi bose b’inzego z’ibanze mu gihugu hose wabaye kuri 28 kugeza kuri 30 werurwe 2018 mu nsanganyamatsiko igira iti « Imiyoborere mpinduramatwara ishingiye ku muturage » ukaba warafunguwe na Prezida Kagame, mw’ ijambo rye yabagejejeho nkuko akunze kuryita impanuro yakomoje uko igihugu kibanye n’amahanga ! ati iyo umuntu atakwifuriza kubaho aramutse agufungiye amazi kabe naho yayubakira urukuta rukomeye rute ntiwabura aho utoborera ngo ugere kuri ya mazi ati aliko inzira nziza akaba ari ugutekereza cyane uburyo wahanga ayawe wacukura umwobo ukayakura ikuzimu cyangwa urëka ayo ku nzu uzifashisha kugeza ikindi gihe cy’imvura n’ibindi……bitavuga ko umuntu yaguhima ukaba wakwiyahura ahubwo bigomba kuguha imbaraga no gutekereza cyane ushaka igisubizo.

Prezida Kagame yakomeje avuga ko mu minsi ishize hari umuntu wamubwiye ko bagiye gukumira igihugu cy’u Rwanda ku buryo bakizenguruka haba amajyepfo, amajyaruguru, uburasirazuba ndetse n’uburengarazuba hakavuka inzara tukaryana ntaho dusohokera mbese bakatuniga ati aliko ibyo ntibishoboka ati urugero uzafate amavuta y’inka mu kiganza uyakande uzabona ko havamo amazi anyuze hagati y’intoki ati natwe rero nuko tugomba kubigenza kuko muri mwese ntawe utabona ibibazo igihugu gifite ati niyo mpamvu buri wese asabwa kuzuza inshingano ze ubutaruhuka yirinda ruswa n’ibiyikomokaho kugirango tudatanga icyuho kuri wa wundi ugambiriye kudukanda ngo tutinyagambura maze dupfe.

Prezida Kagame yasabye abo bayobozi kujya bakemura ibibazo bashoboye ku buryo bwihuse bitaraba byinshi cyangwa ngo bibande ku bibatwara amezi n’imyaka nta gisubizo bitari no mu nyungu z’igihugu kandi hari ibyo bakabanje gukemura vuba biboroheye ati ariyo mpamvu hari ibihora bigaruka mu manama menshi nkaya. Yakomeje abahanulira ko kubaho kwabo ari iki gihe ko bagomba kwima amatwi abababwira ko umunezero wabo uri imbere hazaza ati kuko abo bajya mu matwi y’abandi babashuka ko bagomba kwihutisha ibintu hari ubwo bashaka ubajya imbere bakabura n’umwe ! nguko.

Banyarwanda rero akaba nta gushidikanya kugihari muriyumvira uyu mugabo Pahulo ko akenshi impanuro ze ari impungenge aterwa nabo batavuga- rumwe mu miyoborere y’igihugu cyacu ariyo mpamvu yibanda ku iterambere ryihuse ategekesha igitugu gikabije nkaho aricyo kibazo nyamukuru abanyarwanda dufite ! ntidukeneye kubaho nka kimwe abanyaburayi bise ‘’ la culture du micro-onde ‘’ kuko nta musaruro urambye twabyungukiramo kdi iyihuse yabyaye ikiboze.

Byanditswe ku wa 02/04/2018, na :
A.BEN NTUYENABO, KIGALI-RWANDA.

Mu Rwanda abantu bakomeje gupfa mu buryo budasobanutse

Umuco wo kwicana Pahulo Kagame yabibye mu Banyarwanda uranze ubaye akarande.

Nibyo koko rero hano mu Rwanda ihotorana cyangwa ubwicanyi bukorerwa mu miryango itandukanye buri munsi burabandanyije aho Leta ya Kagame nayo ahanini ibigiramo uruhare ari nako ihitamo gushishikariza abambari bayo kujya batanguranwa mu gutangariza abanyarwanda ko abapfuye muli ubwo buryo bikamenyekana bizajya byitirirwa ko bazize urw’ikirago cyangwa biyahuye kubera indwara z’ibisazi noneho police n’abaganga akaba aribo bemeza icyahitanye umuntu nyuma y’amaperereza n’isuzuma byabo.

Ntawe bitatangaza kuko atari amabwiriza atunguranye kuko n’ubundi byari bisanzwe aho inzego z’umutekano nka Dasso, Police, amarondo n’abandi aribo bamaze abantu ! urugero rwa hafi muli iki cyumweru ku wa 23/01/2018 mu Murenge wa Kazo ,akarere ka Ngoma hiciwe umugabo witwa NZABONIMANA Vénuste ubwo abashinzwe umutekano ku izina rya Dasso bamukubitaga iz’akabwana ngo kuko yatonganije umugore we gusa akaza kujya kwa muganga bikamuviramo urupfu.

Mu kwirengagiza kw’ikiremwa-muntu gikomeje guhohoterwa n’abambari b’agatsiko mu gihugu cyacu umuyobozi w’ako Karere ka Ngoma Bwana Nambaje Aphrodise akaba nta kindi abivugaho uretse ngo gutegereza iperereza rya Police ku cyateye urupfu rwe. Muriyumvira rwose !

Ni kuri uyu wa 22/01/2018 na none mu Kagari ka Mukungu, umurenge wa Kitabi akarere ka Nyamagabe, umugore witwa MUHAYIMANA Cécile w’imyaka 24 y’amavuko bamusanze iwe mu nzu yaratuyemo yapfuye yarafitanye umwana umwe n’umugabo bashakanye. Gitifu w’akagari ka Mukungu Mme Phoebe Mukamana yadutangarije kuri Phone ngendanwa ko nawe yabimenye aho umugabo wa Nyakwigendera atabarije ubwo yatahaga ahagana mu ma saa tatu z’ijoro agasanga umugore we mu ruganiriro rw’inzu yabo yapfuye ari mu mugozi usanzwe uzirikishwa inka yabo. Ati twahise dutabara twifashishije inzego z’umutekano ati tukaba dutegereje iperereza ku bufatanye na Police iby’urwo rupfu . Nguko !

Urundi rupfu kuri uyu wa 22/01/2018 ni urw’umugabo NKOMATI Pascal wari mu kigero cy’imyaka 35 y’amavuko wo mu Murenge wa Tare, akagari ka Gasarenda ho muli District Nyamagabe, umurambo ukaba watoraguwe mu Bwiherero bw’ishuri bigaragara ko yahotowe akajyanwa guhishwa muli uwo musarani w’ishuli aliko Gitifu w’umurenge wa Tare Bwana Mporayonzi David nawe kuri phone ngendanwa akaba yaradutangarije ko uwo Nyakwigendera yari asanzwe afite uburwayi bwo mu mutwe bityo ngo akaba yarituye mu cyobo cy’ubwiherero cy’ishuri primaire rya MUSE hafi yaho atuye. Ati ubu umurambo we uri gusuzumirwa mu bitaro bya Kigeme.

Banyarwanda muriyumvira ! tugereranije ibyiyumviro by’aba bayobozi twasanga tudashidikanyije ko ibyo Mr. TRUMP Donald avuga ku banyafrika ko ibihugu byabo bimeze nk’imisarani bisa n’ukuri , aho abayobozi b’agatsiko ka FPR baba bubaka ubwiherero budapfundikiye abantu bagwamo ! ni agahomamunwa !

Byanditswe ku wa 25/01/2018, na :
A.BEN NTUYENABO, KIGALI-RWANDA.

Rwanda: Pahulo Kagame ageze aho afunga gereza ya kigali 1930 ayishakamo umusaruro.

Gereza ya Kigali 1930 ni imwe mu nyubako zubatswe mu gihe cy’abakoloni zari zisigaye zitarasenywa na Leta y’agatsiko. Biravugwa ko rero Gereza 1930 ya Nyarugenge ari imwe mu bizaranga umurage w’amateka y’u Rwanda nkuko ubuyobozi bw’umugi wa Kigali buherutse kubitangaza bwemeza ko iyo Gereza isanzwe yubatswe ku butaka buri mu maboko y’umugi wa Kigali nta kabuza ariwo ugomba kugena ikibukorerwaho nyuma yo kwimurwa kw’abagororwa bose bari bayifungiyemo bityo hakazubakwamo amacumbi hashakirwa n’abashoramari bazahakorera indi mishinga yumvikanyweho na Leta y’agatsiko ari nako hasigasirwa inyubako y’iyo Gereza yari ihasanzwe.

Hagati aho ikigo gishinzwe ingoro z’umurage z’amateka y’u Rwanda kikaba gitangaza ko Gereza ya 1930 izatanga umusaruro mu bukerarugendo kuko ngo izaba yerekana amateka ya ba Rutuku b’ababiligi mu Rwanda nkuko ay’abadage yerekanwa n’inzu ya KANDT.

Ni muli urwo rwego abari bayifungiyemo barimo gushwirashwizwa bajyanwa mu yandi magereza hirya no hino mu gihugu ari nako abo bafungwa ba nyakujya bakomeje kuburana n’ababo babasuraga batagisobanukirwa neza naho bimurirwa.

Nkuko urwego rushinzwe imfungwa n’abagororwa (RCS) rwabitangaje rero, abagororwa b’abagore bagera kuri 500 bari bakiri muli iyo Gereza ya Nyarugenge izwi nka 1930 barimo n’abanyepolitiki nka Mme INGABIRE Victoire Umuhoza utavugarumwe na Leta y’agatsiko bategereje kwimurirwa muli Gereza shya ya MAGERAGERE bitarenze ukwezi kwa Gicurasi 2018. Bamwe muri bagenzi babo nabo b’abagabo bakaba barimuriwe muli Gereza ya MUHANGA bita GWANTANAMO y’i Rwanda .Nguko.

Banyarwanda nkuko bamwitaga akiri hakurya muli NRA ya Ouganda, uyu Pilato Pahulo Kagame aho gufungura abo amaze kurundarunda muli ibyo bihome ku bwinshi nk’imbagwa kuri we yumva yahitamo kubakiza ubuzima abahotora niko yamye ateye Pilato ka Yezu ! mu gihe yakagombye kuba atera ikirenge mu cya mugenzi we Prime Minister of Ethiopia DESSALEH uherutse gutangaza ko imfungwa zose za politiki mu gihugu cye zirekurwa ! aliko kuri we imbabazi za bihehe zava he ! keretse ku iherezo rye .

Byanditswe ku wa 08/01/2018 , na :
A.BEN NTUYENABO, KIGALI-RWANDA.

Inkono ihira ikibatsi ntihira ikibariro

Padiri Athanase Mutarambirwa

Banyarwandakazi, Banyarwanda namwe nshuti z’u Rwanda namwe mwese abakurikirana iby’iwacu mbaramukije mbifuriza amahoro y’Imana, muzagire Noheli nziza n’umwaka mushya muhire.

Nyuma y’iminsi mike ntaheruka kubaganiriza mu bintu binyuranye biba binshishikaje binanteye inkeke nabashije kumva benshi muri mwe bantashya bambwirako dusangiye uburyo bwo kubona ibintu n’abandi bambaza gusa impamvu ntaheruka kugira icyo mbatangariza.

Muri make nagize gahunda zimfatira sinakunda kubona igihe ariko harimo n’uburyo bwo kwiha igihe gihagije nzirikana, ngo ntazagwa muri wa mutego ntakunda aho abantu bazavuga ngo tuzi gusa kuvuga amagambo meza ugasanga ntabikorwa bifatika tugeraho.

Ubu rero niba ngarutse nuko maze kubona nibura inzira zirenze ebyiri twashoramo ubushake maze tukagera kubikorwa nyabyo bihamya intego yo guhemuza Paul Kagame na fpr maze igihugu cyacu kikava ibuzimu, hamwe abanyarwanda bahora baboroga baririra ababo bapfuye n’abandi bapfa buri kanya, abandi bafungwa, abandi bahunga ; maze kikagaruka ibuntu mu mahoro uko twayabyinaga kera mu busabane nubwo wenda nabwo bitari shyashya kuko ntabyera ngo de !

Ntihagire unyumva nabi ngo yibwire ko nje guhinyura cyangwa gusuzugura ibyo abandi barimo gukora ahubwo ndashaka ko tubyongera tukanabisozera. Ari nayo mpamvu iki kiganiro nagihaye umutwe ugira uti : « Inkono ihira ikibatsi ntihira ikibariro ».

Mbere yo gukomeza ariko reka ngaruke inyuma gato ; gusa sinshaka gutinda cyane mu byahise kuko ari ikintu akenshi kidukereza kuko kumenya amateka burya atari uguhora uyasubiramo bikageza naho ubura umwanya wo gutunganya ibihe by’ubu ndetse no guhangana n’ibyejo hazaza ; ahubwo ndifuza kubwira bamwe bavuga ngo kuberako kera habayeho ibintu bibi ngo nubu byabaho maze bakemera ibyo aribyo byose bakarengera Kagame mu kinyoma cye ndetse bakamushyigikira mu bugome bwe igihe cyose batabwamagana ngo baharanire ko mu Rwanda haba ubutegetsi buhamye bwubahiriza uburenganzira bwose bwa muntu.

Uyu mugani ndawucira Kagame kuko niwe mberenambere mu munaniro n’ubwoba afite uhora yibaza uko azarangiza, igihe n’uburyo azava ku butegetsi n’abazamukuraho doreko adateze kuzaburekura ku bwende bwe. Ariko ndaboneraho mbwire abihuta cyane ko ntacyo bimaze, nuko mbwire n’abazarira ndetse n’abiranze ko mu gihe gikwiye igikorwa kizasohora ; erega ntagahora gahanze. Gusau ko byagenda kose amateka tugomba kuyagena kugirango ibihuru bitazongera kutubyarira ibihunyira cyangwa ngo amahanga yongere kudupfunyikira amazi akazana undi muntu nka Kagame.

Umunaniro n’ubwoba bya Kagame

Nshuti bavandimwe mu kinyarwanda baravuga ngo : « ukuri ntikwica umutumirano » kandi ngo : « uvuzeko nyirurugo yapfuye siwe uba umwishe ». Mu gihe hari Abanyarwanda benshi batemerako Kagame Paul yakomeza kuba perezida w’u Rwanda, hari n’abandi bake ariko bafite ubukana burenze bamushyigikiye cyane ndetse bakamwogeza bikabije kuburyo bamugize nk’ikimana cyabo aho ndetse mu buyobe n’ubujiji badatinya kumugereranya n’Imana nyayo ngo na Yezu Kristu, umuhanzi wa byose.

Abo bamutaka ngo bahera kubyo yabashije kugeraho ku buryo butangaje doreko yavuye kure, maze bakibeshyako ngo ntakintu cyamunanira. Nyamara ahubwo iyo ninayo mpamvu nemeza kimwe n’abandi tubyumva kimwe ko Kagame ananiwe. Urebye aho yavuye hariya kuri Rubaga road, akagera ku buperezida ntugirengo buriya ntiyarangiye.Sinshaka kumera nkawe ngo nsuzugure umurimo yakoraga nk’uko aherutse gusebya ngo abantu baterura amakarito. Ariko ndagirango mbonereho mumenyeshe, kuko nziko atabizi, ko « ntamwuga ugoryamye ubaho, ahubwo ko gusuzugura umwuga uyu n’uyu aribyo kuba ikigoryi ».

Nigeze kwishimira politike ya FPR igihe bashyiraga mu mashuli ishami ry’ubumenyamuntu (sciences humaines) nibwiragako bizajya bituma hari ibyo abantu bumvikanaho kuburyo bworoshye maze yamvugo ngo « N’utagera ntagereranya » igacika mu kinyarwanda kuko twese twari kumenya gushyira mugaciro. Buriya se koko muri FPR n’abababyinira bandi, ntanumwe uribaza impamvu muri demukarasi bahisemo manda y’imyaka ine ishobora gusa kwikuba kabiri buzira ubwa gatatu ! Buriya koko ntibiyumvisha n’impamvu umuperezida yagombye kuba ajijutse bihagije !

Nonese niba n’abize bazi ibyo bakora, bagakorera munzego zisanzwe kandi zikomeye baba bananiwe mu myaka cumi n’ine gusa, kuki Kagame, simvuzeko ari injiji, kuko hari n’uwo nigeze kubibwira inyibutsako ngo yahawe za doctorat nyinshi, kuki nka we umeze utyo, avuye mu ntambara, agategeka ahuzagurika igihugu kidafite inzego kandi kugeza na nubu, n’ibindi bibazo kuki ataba ananiwe nyuma y’imyaka irenga cumi n’itanu mvuze mike ? Si ikibazo nibaza ahubwo ndahamya ko ananiwe keretse niba muri iyo myaka yose ntacyo yigeze akora. Gusa biranigaragaza n’iyo wumvise amagambo aba avuga. Si amagambo y’umuperezida ufite gahunda n’icyerekezo ahubwo ni ay’umuntu unaniwe. Asigaye avuga utugambo nk’utw’umwana w’umunebwe uta igihe, ahunga imirimo.

Kandi uretse no kunanirwa ageze aho ananiza n’abandi. Kandi iyo niyo mvano y’ubwoba busigaye bumuranga kuko yishisha buri wese akikanga igikomye cyose. Nanone aho kuvuga bya bipindi by’inkotanyi n’imishinga myinshi itazaza ya za Singapuru, amaze igihe adatuza kwikanga abazamutera cyangwa ngo bamukombore ku butegetsi baba ab’inyuma cyangwa se imbere mu gihugu.

Aho gukora imishinga izamura igihugu asigaye yirirwa agura ibitwaro ari nako ahora yiruka amahanga ngo ashinga za ambasade zigamije gusa kuneka abo batavugarumwe no gucyeza ibihugu ngo igihe byamukomeranye azabone abacira akari urutega. Nubwo yafunze benshi mubanyapolitiki batavugarumwe, uheruka akaba Diyane Rwigara, ubwoba ntibushira kuko byumvikanako ahora iteka abikanga. Kandi ni mu gihe bose ntibarya indimi kandi bigaragara ko bafite abantu benshi babari inyuma nubwo ntako aba atagize ngo abantu babacikeho.

Ibimenyetso by’ibihe

Burya ngo ibijya gushya birashyuha kandi koko ngo ingoma yibyayemo amahari iba igiye guhirima. Ariko nanone burya iyo umugabo atangiye gusaba uwo yimye ake kaba kashobotse, hari aho Kagame nubwo yishongora yasigaye acungira kubo hambere yasuzuguraga ngo Jupiler izabashobora.

Ikimenyetso cyambere kandi gikomeye nuko abagabo bukuri bageze aho bakanga gukomeza mu kinyoma n’ubugome bwa FPR bakemera gusubira mubuhungiro kandi biyemeje nubundi kongera kurwanira ukuri n’ubumwe bw’Abanyarwanda baharaniye kuva na kera. Hano ndavuga abo bose bari kurugamba nyarwo batagamije inyungu zindi.

Ubukene buri mu Rwanda n’ikinyoma cyo kubuhishira nabyo ni ikimenyesto kiboneka gihamya ko ubutegetsi bwa Kagame budahagaze neza kuko politike nyayo ubundi, ari imibereho myiza y’abaturage n’iterambere rizira ubusumbane n’ivangura.

Uretse n’ibyo kandi Kagame yihaye guhindura itegekonshinga afata ubutegetsi kuri manda ya gatatu none iyo urebye neza ubutegetsi bwe ntiburemerwa nyabyo ari nayo mpamvu nyine agihanganye no guhiga no gutoteza abo batavugarumwe kuko bo bagishishikajwe no kwerekanako batemera ibyakozwe ngoafate iriya manda.

Impagarara hagati y’u Rwanda n’abaturanyi ni ikindi kimenyetso kiboneka ko ubutegetsi bwa Kagame bugeze aharenga. Gukomeza gusonzera no gusahura iby’abandi, aka Maheru doreko ngo ariwe wafataga iby’abandi akibyita ibyiwabo, nkuko abigira muri Congo,ni impamvu ihagije no kurwego mpuzamahanga ko wagira gutya ukabona agiye aka Amini cyangwa se kubera ubwicanyi ahakorera akisanga mukagozi nka Charles Tayrol.

Guhungabanya ubusugire n’umutekano w’ibindi bihugu ndavuga u Burundi na Uganda birimo umuziro ushobora kumuviramo umuvumo utuma bamukomanyiriza, agashyirwa mu kato ibisumizi bye bikamutera imirwi we wahoze abeshya ngo aharanira amahoro y’afrika yose.

Ibyo kandi bitumwe tuzirikanako ariwe wirirwa akora amaserzerano yo kugurisha no kwangaza abana ba Afrika. Uretse se bamwe acuruza na Isiraheli na za mpunzi za Libiya ashaka kuvutsa nibura n’uburenganzira bwo gusubira iwabo, umunsi Abakongomani n’Abarundi bari mu Rwanda bavumbuyeko batwawe bunyago ngo umuhungu yirire agafaranga k’abazungu, hazacura iki?

Ahandinaho Kagame wirirwanaga na Bill Clinton na Tony Blair asigaye, nk’uko nigeze kubivuga yangara ashakisha uwa murahurira ngo abone urumuri rw’iyo yaba arimo kugana kuko imishinga ye yugarijwe n’umwijima.

Noneho kandi hari ikindi kimenyetso kigaragazwa n’ibinyamakuru byo mu Rwanda ko aho Kagame yibwiraga ko yashinze ibirindiro ubu asigaye ahishisha n’indiri za banetsi be zikaba zisigaye zijagajagwa mu bwisanzure. Ibyitso bye byaravumbuwe n’intore zigiye kurwibonera kuko zaramenyekanye.

Magingo aya nk’uko bivugwa na benshi itekinika ryose kagame yakoreshaga, doreko ari nk’umunyeshuri ukopera, ryaravumbuwe kuburyo na babaterankunga yajyaga akangisha ubu batangiye kumutera utwatsi kuburyo nareba nabi kaserumu bazagafunga.

Intambwe yizihiye

Mu Kinyarwanda iyo abantu bari mukugenda hamwe berekeza hamwe bavugako bajyana. None kandi natwe niko tumeze ninako tuvuga, twemeza rwose ko turimo tujya kwimika umuco mwiza iwacu, tugastimbura ikinyoma n’ubwikanyize bya Kagame. Niba rero imvugo ari iyo, n’ingiro nibe imwe, maze tugendane koko.

Abihuta cyane ndabumva rwose kuko nubundi hagomba kugira abiyemeza bagahaguruka naho ubundi ntawategereza umusaruro gusa atazindutse ngo ajye kubiba. Kandi nanone burya iyo abantu bari ku rugendo ni byizako abihuta aribo batanga intambwe kugirango urugendo rutazaba rurerure cyane hakagira abahera mu nzira. Ariko ni na byiza ko bagerageza kunyuzamo bagakebuka, bakareba abandi ndetse byanarimba bagatuza, bakicara, bakabarinda, naho ubundi ntitwakoresha rya jambo kujyana.

Mu Kinyarwanda banavugako “iyihuse yabyaye ibihumye”. Bityo rero ndashima ibakwe n’ijabo ry’abasore banyaruka, ariko ndanabibutsa ko kugenda usize abawe, ntacyo uba ujyanye. Mboneyeho gusaba rero, ntawe ntunze urutoki, abantu bose byabaye ngombwako baba batakigendana n’abandi, kuko bumva bagomba kwihuta, kunyemerera ntibajye kure y’abandi, batazaza bakayoberwa aho barengeye maze bahura n’umwanzi ku itabaro, bakazabura ubatera ingabo mu bitugu.

Mwibuke mu gitekerezo cya Rwabugiri na Rwanyonga; nubwo bahigaga Rwanyonga iyo adatabara, aba yarasanze umushi cyangwa umubisha Kabego, naringiye kuvugango umubisha Kagame, yarigusanga Kabego yivuganye Rwabugiri.

Mu rugendo ndetse no kurugamba, hari ubwo abihuta baza inyuma kugirango babashe no kuyamba abagenda biguru ntege.

Hano rwose ndagirango nsabe abo bose bihuta ko bagomba kwibukako aribo bafite uruhare runini mu rugendo turimo ndetse no mu rugamba turwana. Ndabasabye kandi ngo bareke kwiyemeza bonyine kuko byakwitwa kwiyemera igihe cyose byatera gutatana no kutavuga rumwe kuko byaba byishe igisobanuro cyo kujyana.

Kimwe n’abandi banyarwanda mu ngeri zose ntibabujijwe kugira amashyirahamwe bihariye kubera ibitekerezo bahuriyeho ariko nanone birinde rwose kwihugika ukwabo ahubwo nibaze begerane n’abandi cyane cyane abo bigeze kugenda by’umwihariko kuko basanzwe babazi intambuko maze ahubwo babe umusemburo utuma amashyirahamwe yose atutumbamo ingufu zo kwihutisha ibintu.

Abagenda buke nabo nk’uko bivugwa, ntibikange igitutu n’isibo by’abandi.Nziko wenda kuribo babyita gushishoza ariko nabibutsako mubaromani bavugaga ngo: “Ikintu wibajije watekereje washunguye neza haba hasigaye kugikora unyaruka”.

Gushishoza ni ingenzi mu bintu byose.Ushishoza agomba gufata igihe,agasoma amateka, akagisha inama, agasaba umuganda, ariko ni byiza kwibuka ko aba afite n’inshingano agomba kugeraho. Mumbabarire munyumve neza, ariko usanze umuntu yicaye aho atekereza, akahatinda ntacyo agambiriye, ngira ngo wamwibazaho! Nkaba rero numva, impaka ziza hagati y’abihuta n’abagenda buke, zaba zifite ishingiro.

Gusa nanjye ndibaza:nta nshingano abagawa kugenda buke bafite, mu guhumuriza abihuta, babinjiza muri ubwo bushishozi bwabo? Ariko nano ndibaza, uwo mujyana yihuse, ari wowe ufite ubushishozi,muri ubwo bushishozi bwawe,ntaburyo wamurinda impirita, ugakoresha izo mbaraga ze mu buryo buboneye?

Padiri Athanase MUTARAMBIRWA

Soma umwandiko wose : Inkono ihira ikibatsi ntihira ikibariro

Rwanda: Pahulo Kagame nacecekeshe n’abayobozi bahora bamuramya ngo « kuri Paul Kagame imvugo niyo ngiro ».

Uretse guha gasopo abayobozi be kutazongera gukoresha imvugo ngo barishimira ko amahanga akomeje kugira ibyo yigira ku Rwanda ; Pahulo Kagame yarakwiriye no kubategeka kutongera gukoresha imvugo ngo ˂˂ Kuri Paul Kagame imvugo niyo ngiro !˃˃, kuko azi neza ko ataribyo ahubwo ari ukubeshya abanyarwanda.

Ni muli congrѐs y’iminsi itatu y’umuryango FPR-INKOTANYI yari iteraniye ku cyicaro cy’umuryango i Rusororo mu Karere ka Gasabo, imbere y’abakada bagera ku bihumbi 2000 barimo abayobozi bakuru b’igihugu bose, abahagaraliye amwe mu mashyaka ya politiki y’ibihugu duturanye na bamwe mu bayobozi b’imitwe ya politiki mu gihugu cyacu yaherekeje Pahulo Kagame mu matora yo muli Kanama 2017; aho Pahulo Kagame yongeye gutorerwa CHAIRMAN w‘agatsiko kagizwe n’umuryango wa FPR-INKOTANYI mu gihe kiri imbere.

Muli iyo Kongre Pahulo Kagame akaba yararanzwe no gukemura abambari be abihanangiriza kutazongera gukoresha imvugo igira iti : ‘abanyamahanga bashishikajwe no kuza kwigira ku Rwanda imiyoborere n’iterambere byarwo’ nubwo bwose yigira nyoni nyinshi kandi ariwe wari warayibabibyemo none akaba abataye mu nama. Yakomeje yibaza nawe ubwe ati ese ubu dufite iki turatira abanyamahanga ku buryo baza kutwigiraho ? Ati hari byinshi byo gukemura bihari.

Muri kwa kwihagararaho no kwishongora asanganywe, Pahulo Kagame yavuze no ku basebya u Rwanda barimo abayobozi batahurwa bariye ibya rubanda bagatangira gusebanya bavuga ko mu Rwanda nta bwinyagambuliro buhari bakagera naho bamwe batangira kwikorera amakarto hanze iyo abandi nabo bikabaviramo gucumbikirwa muli za prisons hano. Yakomoje no kubyo avuga ko bituruka hanze bigamije guhungabanya umutekano w’igihugu ati ndabamenyesha ko ‘nda ndambara yandera ubwoba iturutse hanze’ ! akomeza ashimangira ko gutera u Rwanda uturutse hanze bidashoboka ati ntaho bamenera turamutse dushyize hamwe kandi tukubahana ati keretse iturutse mu gihugu imbere muli mwebwe byo ndemeza ko bishoboka ! nimwiyumvire namwe !

Pahulo Kagame akaba avuga ko aho bizaba ngombwa gufata ibyemezo bikomeye azabifata no guhangana n’ingaruka zabyo nkuko atabitinye na mbere hose !

Banyarwanda ngaho rero murarye muri menge ! Ko ihanurwa ry’indege ya Habyarimana yatumye horekwa imbaga y’abanyarwanda ibindi byemezo uyu mugabo aduteganiriza ni ibiki ? murabe maso nyabuneka ! aliko Imana irebera imbwa ntihumbya ! ntawe bitagaragalira ko uyu mugabo akomeje gusaza imigeri aho atabona neza ibihe yinjiyemo uko bimeze ntazi ko na nyina wundi abyara umuhungu! arakomeza gufungira abanyarwanda ubusa, kubica, kubaheza ishyanga n’ibindi ….. ngo kuri Paul Kagame na FPR imvugo niyo ngiro ! u Rwanda ngo ni ubudasa, akataraboneka kuko ngo bose bumva ibintu kimwe ! ko u Rwanda rutabagaho RPF itaraza! Banyarwanda nta gahora gahanze.

Byanditswe ku wa 17/12/2017, na :
A.BEN NTUYENABO, KIGALI-RWANDA.

Rwanda : ingendo za Pahulo Kagame mu mahanga zikomeje kumunga umutungo w’Abanyarwanda

Nibyo koko rero mu gihe uyu muyobozi yaherukaga kwikoma mugenzi we Prezida Petero Nkurunziza amwagiriza ko yananiwe kuyobora igihugu aho ngo yirirwa yihishe ahantu hatazwi nyuma y’umugambi mubisha wari wamupangiwe n’uyu awurimo ukaza gupfuba hari mu mwaka wa 2015 ; Pawulo Kagame kuri we siko bimeze aho kwikingiranira mu gihugu cye muli ibi bihe agezemo bitamworoheye yahisemo kwiturira mu kirere nk’inyoni aho atakimara umwanya munini mu gihugu, niba atari ubwoba! agahora abungera mu mahanga yewe naho atatumiwe nguwo mu bihugu by’abarabu, amerika wagirango afiteyo business, ubwongereza bityo agahindukira agaruka muli afrika ngaho ngo arashakira umubano u Rwanda! umuntu akaba yakwibaza impamvu uyu mugabo akomeje kunyunyuza imitsi y’abanyarwanda barebera ! ngiyo Benzine itwara indege agendamo, ikiguzi cy’amahoteli ahenze yakira uyu mugabo n’ibindi ….biteye agahinda pe !

Nkuko bigaragarira amaso rero impamvu ikaba ari ukubera impungenge z’ibihe arimo aho asigaye abona ko kwicarana akanya na bamwe mu bayobozi be hano mu gihugu atabishira amakenga ko byazamuviramo ibyo imbwa yaboneye ku mugezi ! Ntawuruhunga ni umwana w’umunyarwanda byongeye kandi bavuze ko ‘ imburagihana yabuze gihambwa.’

Bwana Kagame siwe asigaye abona ahari bukeye kubera kwikanga baringa, kuri we kwirirwa azerera amahanga bishobora kuba bimuha agahenge nkaho yakwibwiye ati nzapfa nzakira simbizi wenda nzagwe ahandi, nguko !

Banyarwanda, kubera ingaruka z’ikibi zuzuye umutima unangiye by’uyu mugabo Kagame ageze aho agaragaza ibimenyetso yikanga baringa ntamenye yuko ariwe wahindutse yo ! mbega ibyago !

Bwana Kagame ntabona ko ibikombe arimo kujugunyirwa na ba Rutuku bamushimagiza ngo ni indashyikirwa mu cyerekezo cy’iterambere ari ukumuhema! ahubwo agakomeza gupfusha ubusa utuvuye mu mitsi y’abaturage yibereye mu ngendo zidafite icyo zibamariye. Bityo nawe nkaba nsanga yarakwiye gushakirwa kimwe muli bya bigo yishyiriyeho byakirirwamo inzererezi cyangwa ababyeyi bataye ingo.

Ese izo nshuti n’iterambere ajya kudushakira mu mahanga ya kure iyo bigwa zaba ziturutira umuturanyi nka RDC, OUGANDA, BURUNDI, TANZANIE ? bashobora kudutabara byihuse turamutse dutewe uretse ko nabo batakiducira akari urutega !

Byanditswe kuwa 08/11/2017, na :
A.BEN NTUYENABO, KIGALI-RWANDA.

Rwanda : Aho kureka guhonyora abantu, prezida Kagame yikomye bikomeye umuryango mpuzamahanga HRW n’umuyobozi wayo.

Abijuse babonana bwije koko ! kuri 27/10/2017 hashojwe inama y’ihuriro ‘Unity Club ry’abahoze muli gouvernement n’abayirimo ubu’, ikaba yari yatangijwe na First lady Jeannette Kagame Nyiramongi akaba n’umuyobozi wayo . Ni nyuma y’iminsi ibiri ubwo umushyitsi mukuru Pahulo Kagame nawe yari yitabiriye uyu muhango w’isoza mu isangira no kwizihiza isabukuru y’imyaka 21 uyu muryango umaze ushinzwe.

Mu ijambo rye Prezida Kagame yikomye bikomeye umuryango HRW n’umuyobozi wawo Bwana Kenneth Roth avuga ko bakabije gusebya u Rwanda.

Prezida Kagame warangwaga n’umujinya mwinshi nkaho rapport ya HRW yamwangije mu bwonko ku buryo atabitekerezaga yaboneyeho kwiyama Bwana Kenneth Roth mu guhora amusebya, asebya u Rwanda; amumenyesha agira ati ‘ndi mu mwanya mwiza wo guharanira uburenganzira bwa muntu kurusha uko wowe ubikora ati twashyize ubuzima bwacu mu kaga tubikorera abanyarwanda mu gihe ingabo zanyu (MINUAR) zacyurwaga abantu bicwa ! ati ese uburenganzira bwa muntu uvuga ni ubuhe ?

Kagame akomeza avuga ko ababaye abayobozi b’ibyamamare ku isi nk’intangarugero barimo ba Mandela, Gandhi n’abandi… baharaniye uburenganzira bwabo ku buryo butandukanye n’ubwacu kuko twe twararwanye kugeza ubwo dushobora no kuba twaraswa biruta guharanira uburenganzira bwawe wicaye muli gereza ! ati imyaka itanu yose narwanye muli Ouganda n’ine n’igice mu Rwanda umunsi ku wundi ntazi ko ndi buramuke nari kuba nanjye nicaye muli gereza hano nizeye kuzayivanwamo bishingiye ku mpuhwe z’abantu…….HRW n’abandi…. bahora bakoresha amagambo gusa ku munwa bansebya !!! muriyumvira ubwishongozi bw’uyu mugabo ! (umugabo mbwa aseka imbohe). Prezida Kagame yongeyeho ko ntawamukora mu jisho ngo ntanuwamutinyuka kuko noneho ubu afite igihugu, urugo. Ati ubu mfite u Rwanda narwaniye, mfite uburenganzira bwo gutunga agatoki uwariwe wese kuko narezwe mu buryo politic, ibitekerezo n’ibindi….

Kagame yanenze abanyaburayi bamuhatira demokrasi bakorera mu bihugu byabo ati aliko nuko bibagirwa kumbwira ikintu kimwe cy’ingenzi kuyo abanyarwanda bashaka, mu yandi magambo ntibatekereza ku banyarwanda, ku baturage, ahubwo batekereza ku bayobozi kugirango babone uko baturyanisha, yakomeje avuga ko akenshi abanyarwanda n’banyafrika muli rusange babura ubwisanzure kubera kwigira abacakara ba ba mpatsibihugu bityo imitekerereze ya gikoloni igakomeza kuyobora imibereho yacu mu ndorerwamo yuko bashaka uko tubaho. Nguko !

Banyarwanda , aha Prezida Kagame arirengagiza nkana urugendo rw’ubucakara yahereyeho kugirango azashobore guhunguka n’agatsiko ke aho yabanje gukora ubucakara mu nyeshyamba za Museveni NRA mu kumurwanirira aho yari yiyemeje gupfa cg akarokoka agamije kuzataha umunsi umwe mu Rwanda amwifashishije! ubucakara se buruta ubwo ni ubuhe ? ari Museveni wabanje kumukoresha ubucakara nkubwo aho yashoboraga kuzima burundu ari n’umunyaburayi wifuza kumutamika ntacyo abanje kumwaka urusha undi impuhwe ni nde ? ndasanga Pahulo Kagame atarakwiye gukomeza kubeshya abanyarwanda nkaho ariwe mukiza wabo ko ahubwo ibyo yakoraga byose byari mu nyungu ze n’agatsiko ke gusa, none abonye ko bamaze gutahura ibinyoma bye no kunyunyuza bene ngofero ati narwanaga ari mwe nkorera yewe baba weee…. ahora muli rutemikirere agana muli amerika cyangwa i Burayi se atagiye gupfukamira abo bampatsibihugu ngo arebe ko hari icyo bamujugunyira ! ibyo se byo bitaniye hehe n’ubucakara ? niyiririre…..

Byanditswe ku wa 29/10/2017, na :
A.BEN NTUYENABO, KIGALI-RWANDA.

Amakuru ki ?

Amakuru