Archives de l’auteur : Padiri Athanase Mutarambirwa

Inkono ihira ikibatsi ntihira ikibariro

Padiri Athanase Mutarambirwa

Padiri Athanase Mutarambirwa

Banyarwandakazi, Banyarwanda namwe nshuti z’u Rwanda namwe mwese abakurikirana iby’iwacu mbaramukije mbifuriza amahoro y’Imana, muzagire Noheli nziza n’umwaka mushya muhire.

Nyuma y’iminsi mike ntaheruka kubaganiriza mu bintu binyuranye biba binshishikaje binanteye inkeke nabashije kumva benshi muri mwe bantashya bambwirako dusangiye uburyo bwo kubona ibintu n’abandi bambaza gusa impamvu ntaheruka kugira icyo mbatangariza.

Muri make nagize gahunda zimfatira sinakunda kubona igihe ariko harimo n’uburyo bwo kwiha igihe gihagije nzirikana, ngo ntazagwa muri wa mutego ntakunda aho abantu bazavuga ngo tuzi gusa kuvuga amagambo meza ugasanga ntabikorwa bifatika tugeraho.

Ubu rero niba ngarutse nuko maze kubona nibura inzira zirenze ebyiri twashoramo ubushake maze tukagera kubikorwa nyabyo bihamya intego yo guhemuza Paul Kagame na fpr maze igihugu cyacu kikava ibuzimu, hamwe abanyarwanda bahora baboroga baririra ababo bapfuye n’abandi bapfa buri kanya, abandi bafungwa, abandi bahunga ; maze kikagaruka ibuntu mu mahoro uko twayabyinaga kera mu busabane nubwo wenda nabwo bitari shyashya kuko ntabyera ngo de !

Ntihagire unyumva nabi ngo yibwire ko nje guhinyura cyangwa gusuzugura ibyo abandi barimo gukora ahubwo ndashaka ko tubyongera tukanabisozera. Ari nayo mpamvu iki kiganiro nagihaye umutwe ugira uti : « Inkono ihira ikibatsi ntihira ikibariro ».

Mbere yo gukomeza ariko reka ngaruke inyuma gato ;  gusa sinshaka gutinda cyane mu byahise kuko ari ikintu akenshi kidukereza kuko kumenya amateka burya atari uguhora uyasubiramo bikageza naho ubura umwanya wo gutunganya ibihe by’ubu ndetse no guhangana n’ibyejo hazaza ; ahubwo ndifuza kubwira bamwe bavuga ngo kuberako kera habayeho ibintu bibi ngo nubu byabaho maze bakemera ibyo aribyo byose  bakarengera Kagame mu kinyoma cye ndetse bakamushyigikira mu bugome bwe igihe cyose batabwamagana ngo baharanire ko mu Rwanda haba ubutegetsi buhamye bwubahiriza uburenganzira bwose bwa muntu.

Uyu mugani ndawucira Kagame kuko niwe mberenambere mu munaniro n’ubwoba afite uhora yibaza uko azarangiza, igihe n’uburyo azava ku butegetsi n’abazamukuraho doreko adateze kuzaburekura ku bwende bwe. Ariko ndaboneraho mbwire abihuta cyane ko ntacyo bimaze, nuko mbwire n’abazarira ndetse n’abiranze ko mu gihe gikwiye igikorwa kizasohora ; erega ntagahora gahanze. Gusau ko byagenda kose amateka tugomba kuyagena kugirango ibihuru bitazongera kutubyarira ibihunyira cyangwa ngo amahanga yongere kudupfunyikira amazi akazana undi muntu nka Kagame.

Umunaniro n’ubwoba bya Kagame

Nshuti bavandimwe mu kinyarwanda baravuga ngo : «  ukuri ntikwica umutumirano » kandi ngo : « uvuzeko nyirurugo yapfuye siwe uba umwishe ». Mu gihe  hari Abanyarwanda benshi batemerako Kagame Paul yakomeza kuba perezida w’u Rwanda, hari n’abandi bake ariko bafite ubukana burenze bamushyigikiye cyane ndetse bakamwogeza bikabije kuburyo bamugize nk’ikimana cyabo aho ndetse mu buyobe n’ubujiji badatinya kumugereranya n’Imana nyayo ngo na Yezu Kristu, umuhanzi wa byose.

Abo bamutaka ngo bahera kubyo yabashije kugeraho ku buryo butangaje doreko yavuye kure, maze bakibeshyako ngo ntakintu cyamunanira. Nyamara ahubwo iyo ninayo mpamvu nemeza kimwe n’abandi tubyumva kimwe ko Kagame ananiwe. Urebye aho yavuye hariya kuri Rubaga road, akagera  ku buperezida ntugirengo buriya ntiyarangiye.Sinshaka kumera nkawe ngo nsuzugure umurimo yakoraga nk’uko aherutse gusebya ngo abantu baterura amakarito. Ariko ndagirango mbonereho mumenyeshe, kuko nziko atabizi, ko « ntamwuga ugoryamye ubaho, ahubwo ko gusuzugura umwuga uyu n’uyu aribyo kuba ikigoryi ».

Nigeze kwishimira politike ya FPR igihe bashyiraga mu mashuli ishami ry’ubumenyamuntu (sciences humaines) nibwiragako bizajya bituma hari ibyo abantu bumvikanaho kuburyo bworoshye maze yamvugo ngo « N’utagera ntagereranya » igacika mu kinyarwanda kuko twese twari kumenya gushyira mugaciro. Buriya se koko muri FPR n’abababyinira bandi, ntanumwe uribaza impamvu muri demukarasi bahisemo manda y’imyaka ine ishobora gusa kwikuba kabiri buzira ubwa gatatu ! Buriya koko ntibiyumvisha n’impamvu umuperezida yagombye kuba ajijutse bihagije !

Nonese  niba n’abize bazi ibyo bakora, bagakorera munzego zisanzwe kandi zikomeye baba bananiwe mu myaka cumi n’ine gusa, kuki Kagame, simvuzeko ari injiji, kuko hari n’uwo nigeze kubibwira inyibutsako ngo yahawe za doctorat nyinshi, kuki nka we umeze utyo, avuye mu ntambara, agategeka ahuzagurika igihugu kidafite inzego kandi kugeza na nubu, n’ibindi bibazo kuki ataba ananiwe nyuma y’imyaka irenga cumi n’itanu mvuze mike ? Si ikibazo nibaza ahubwo ndahamya ko ananiwe keretse niba muri iyo myaka yose ntacyo yigeze akora. Gusa biranigaragaza n’iyo wumvise amagambo aba avuga. Si amagambo y’umuperezida ufite gahunda n’icyerekezo ahubwo ni ay’umuntu unaniwe. Asigaye avuga utugambo nk’utw’umwana w’umunebwe uta igihe, ahunga imirimo.

Kandi uretse no kunanirwa ageze aho ananiza n’abandi. Kandi iyo niyo mvano y’ubwoba busigaye bumuranga kuko yishisha buri wese akikanga igikomye cyose. Nanone aho kuvuga bya bipindi by’inkotanyi n’imishinga myinshi itazaza ya za Singapuru, amaze igihe adatuza kwikanga abazamutera cyangwa ngo bamukombore ku butegetsi baba ab’inyuma cyangwa se imbere mu gihugu.

Aho gukora imishinga izamura igihugu asigaye yirirwa agura ibitwaro ari nako ahora yiruka amahanga ngo ashinga za ambasade zigamije gusa kuneka abo batavugarumwe no gucyeza ibihugu ngo igihe byamukomeranye azabone abacira akari urutega. Nubwo yafunze benshi mubanyapolitiki batavugarumwe, uheruka akaba Diyane Rwigara, ubwoba ntibushira kuko byumvikanako ahora iteka abikanga. Kandi ni mu gihe bose ntibarya indimi kandi bigaragara ko bafite abantu benshi babari inyuma nubwo ntako aba atagize ngo abantu babacikeho.

Ibimenyetso by’ibihe

Burya ngo ibijya gushya birashyuha kandi koko ngo ingoma yibyayemo amahari iba igiye guhirima. Ariko nanone burya iyo umugabo atangiye gusaba uwo yimye ake kaba kashobotse, hari aho Kagame nubwo yishongora yasigaye acungira kubo hambere yasuzuguraga ngo Jupiler izabashobora.

Ikimenyetso cyambere kandi gikomeye nuko abagabo bukuri bageze aho bakanga gukomeza mu kinyoma n’ubugome bwa FPR  bakemera gusubira mubuhungiro kandi biyemeje nubundi kongera kurwanira ukuri n’ubumwe bw’Abanyarwanda baharaniye kuva na kera. Hano ndavuga abo bose  bari kurugamba nyarwo batagamije inyungu zindi.

Ubukene buri mu Rwanda n’ikinyoma cyo kubuhishira nabyo ni ikimenyesto kiboneka gihamya ko ubutegetsi bwa Kagame budahagaze neza kuko politike nyayo ubundi, ari imibereho myiza y’abaturage n’iterambere rizira ubusumbane n’ivangura.

Uretse n’ibyo kandi Kagame yihaye guhindura itegekonshinga afata ubutegetsi kuri manda ya gatatu none iyo urebye neza ubutegetsi bwe ntiburemerwa nyabyo ari nayo mpamvu nyine agihanganye no guhiga no gutoteza abo batavugarumwe kuko bo bagishishikajwe no kwerekanako batemera ibyakozwe ngoafate iriya manda.

Impagarara hagati y’u Rwanda n’abaturanyi ni ikindi kimenyetso kiboneka ko ubutegetsi bwa Kagame bugeze aharenga. Gukomeza gusonzera no gusahura iby’abandi, aka Maheru doreko ngo ariwe wafataga iby’abandi akibyita ibyiwabo, nkuko abigira muri Congo,ni impamvu ihagije no kurwego mpuzamahanga ko wagira gutya ukabona agiye aka Amini cyangwa se kubera ubwicanyi ahakorera akisanga mukagozi nka Charles Tayrol.

Guhungabanya ubusugire n’umutekano w’ibindi bihugu ndavuga u Burundi na Uganda birimo umuziro ushobora kumuviramo umuvumo utuma bamukomanyiriza, agashyirwa mu kato ibisumizi bye bikamutera imirwi we wahoze abeshya ngo aharanira amahoro y’afrika yose.

Ibyo kandi bitumwe tuzirikanako ariwe wirirwa akora amaserzerano yo kugurisha no kwangaza abana ba Afrika. Uretse se bamwe acuruza na Isiraheli na za mpunzi za Libiya ashaka kuvutsa nibura n’uburenganzira bwo gusubira iwabo,  umunsi Abakongomani n’Abarundi bari mu Rwanda bavumbuyeko batwawe bunyago ngo umuhungu yirire agafaranga k’abazungu, hazacura iki?

Ahandinaho Kagame wirirwanaga na Bill Clinton na Tony Blair asigaye, nk’uko nigeze kubivuga yangara ashakisha uwa murahurira ngo abone urumuri rw’iyo yaba arimo kugana kuko imishinga ye yugarijwe n’umwijima.

Noneho kandi hari ikindi kimenyetso kigaragazwa n’ibinyamakuru byo mu Rwanda ko aho Kagame yibwiraga ko yashinze ibirindiro ubu asigaye ahishisha n’indiri za banetsi be zikaba zisigaye zijagajagwa mu bwisanzure. Ibyitso bye byaravumbuwe n’intore  zigiye kurwibonera kuko zaramenyekanye.

Magingo aya nk’uko bivugwa na benshi itekinika ryose kagame yakoreshaga, doreko ari nk’umunyeshuri ukopera, ryaravumbuwe kuburyo na babaterankunga yajyaga akangisha ubu batangiye kumutera utwatsi kuburyo nareba nabi kaserumu bazagafunga.

Intambwe yizihiye

Mu Kinyarwanda iyo abantu bari mukugenda hamwe berekeza hamwe bavugako bajyana. None kandi natwe niko tumeze ninako tuvuga, twemeza rwose ko turimo tujya kwimika umuco mwiza iwacu, tugastimbura ikinyoma n’ubwikanyize bya Kagame. Niba rero imvugo ari iyo, n’ingiro nibe imwe, maze tugendane koko.

Abihuta cyane ndabumva rwose kuko nubundi hagomba kugira abiyemeza bagahaguruka naho ubundi ntawategereza umusaruro gusa atazindutse ngo ajye kubiba. Kandi nanone burya iyo abantu bari ku rugendo ni byizako abihuta aribo batanga intambwe kugirango urugendo rutazaba rurerure cyane hakagira abahera mu nzira. Ariko ni na byiza ko bagerageza kunyuzamo bagakebuka, bakareba abandi ndetse byanarimba bagatuza, bakicara, bakabarinda, naho ubundi ntitwakoresha rya jambo kujyana.

Mu Kinyarwanda banavugako “iyihuse yabyaye ibihumye”. Bityo rero ndashima ibakwe n’ijabo ry’abasore banyaruka, ariko ndanabibutsa ko kugenda usize abawe, ntacyo uba ujyanye. Mboneyeho gusaba rero, ntawe ntunze urutoki,  abantu bose byabaye ngombwako baba batakigendana n’abandi, kuko bumva bagomba kwihuta, kunyemerera ntibajye kure y’abandi, batazaza bakayoberwa aho barengeye maze bahura n’umwanzi ku itabaro, bakazabura ubatera ingabo mu bitugu.

Mwibuke mu gitekerezo cya Rwabugiri na Rwanyonga; nubwo bahigaga  Rwanyonga iyo adatabara, aba yarasanze umushi cyangwa umubisha Kabego, naringiye kuvugango umubisha Kagame,  yarigusanga Kabego yivuganye Rwabugiri.

Mu rugendo ndetse no kurugamba, hari ubwo abihuta baza inyuma kugirango babashe no kuyamba abagenda biguru ntege.

Hano rwose ndagirango nsabe abo bose bihuta ko bagomba kwibukako aribo bafite uruhare runini mu rugendo turimo ndetse no mu rugamba turwana. Ndabasabye kandi ngo bareke kwiyemeza bonyine kuko byakwitwa kwiyemera igihe cyose byatera gutatana no kutavuga rumwe kuko byaba byishe igisobanuro cyo kujyana.

Kimwe n’abandi banyarwanda mu ngeri zose ntibabujijwe kugira amashyirahamwe bihariye kubera ibitekerezo bahuriyeho ariko nanone birinde rwose kwihugika ukwabo ahubwo nibaze begerane n’abandi cyane cyane abo bigeze kugenda by’umwihariko kuko basanzwe babazi intambuko maze ahubwo babe umusemburo utuma amashyirahamwe yose atutumbamo ingufu zo kwihutisha ibintu.

Abagenda buke nabo nk’uko bivugwa, ntibikange igitutu n’isibo by’abandi.Nziko wenda kuribo babyita gushishoza ariko nabibutsako mubaromani bavugaga ngo: “Ikintu wibajije watekereje washunguye neza haba hasigaye kugikora unyaruka”.

Gushishoza ni ingenzi mu bintu byose.Ushishoza agomba gufata igihe,agasoma amateka, akagisha inama, agasaba umuganda, ariko ni byiza kwibuka ko aba afite n’inshingano agomba kugeraho. Mumbabarire munyumve neza, ariko usanze umuntu yicaye aho atekereza, akahatinda ntacyo agambiriye, ngira ngo wamwibazaho! Nkaba rero numva, impaka ziza hagati y’abihuta n’abagenda buke, zaba zifite ishingiro.

Gusa nanjye ndibaza:nta nshingano abagawa kugenda buke bafite, mu guhumuriza abihuta, babinjiza muri ubwo bushishozi bwabo? Ariko nano ndibaza, uwo mujyana yihuse, ari wowe ufite ubushishozi,muri ubwo bushishozi bwawe,ntaburyo wamurinda impirita, ugakoresha izo mbaraga ze mu buryo buboneye?

Padiri Athanase MUTARAMBIRWA

Soma umwandiko wose : Inkono ihira ikibatsi ntihira ikibariro

Ivanjili si umugani n’ukwemera si inzozi : ni ubuzima

Padiri Athanase Mutarambirwa

Padiri Athanase Mutarambirwa

Banyarwanda mwese ndabaramukije. Ubundi kera mu Rwanda indamukanyo zacu zari : « Gira impagarike, gira ubugingo, gira umugabo, mashyo, murakoma, muraho, murakomeye ? Ariko igihe cyarageze haza ubukirisitu buduha indi ndamukanyo kuko nibwirako twari twahinduye uburyo bwo kubona ibintu n’ubwo kubaho ; none kenshi dusigaye turamukanya tuti : Yezu akuzwe, Yesu ashimwe, Gira Yezu na Mariya. Izo zikaba indamukanyo zerekanako Abanyarwanda bemera Imana kuburyo bwa gikristu kuko bagaruka cyane kuri Yezu ariwe Kristu umwana w’Imana. Indamukanyo imwe ya kera yavugaga Imana ntiyakoreshwaga hose, kuko  tuyisanga gusa mu mihango yo guterekera aho bagiraga ngo : « Gahorane Imana Ryangombe » cyangwa bakeza umwami bati : « Kagire Imana Nyagasani ».Reka mbaramutse noneho ngira nti : « Muraho, Yezu akuzwe, mugire Yezu na Mariya ».

Ndisobanura : Mu ndamukanyo yange ndagirango mbibutse ko tugomba gukomera yego ku muco wacu ariko ko tutanareka kwakira n’ibyiza by’ahandi bitatubujije kwamaganira kure imico y’ahandi yatsemba uwacu.

Hashize imyaka irenga makumyabiri u Rwanda rubayemo intambara na jenoside byatsembye abantu batagira ingano. None muri ibi bihe usanga umunyarwanda yibera mu bwoba, yarabaye undi doreko byo n’amahanga twayagenze. Ubundi ikibazo cyo kongera kwegeranya Abanyarwanda cyakabaye icya Leta ariko mwese muziko Leta yacu ahubwo ariyo ituma turushaho gutatana no kunyanyagira mu mahanga y’irya n’ino. None rero ndumva buri wese akwiye gushyiraho ake by’umwihariko kugirango u Rwanda rugire ihumure kandi twongere tubane twunze ubumwe.

Ibi rero mwambaza ngo byanjemo bite ? Ejo bundi nitegereje ifoto ya muka Rwigara madamu Adeline Rwigara ariko atari ukubahuka munyemerere muvuge mu mazina ye bwite madamu Adeline naramwitegereje rero muri ibi bihe umuryango wabo umerewe nabi mbona agenda yikingiye cyangwa yitwaje Bibiliya.

Ngarutse kuri zandamukanyo zacu rero, iza kera usanga ziganisha ku buzima, ubuzima bwiza, gukomera no kudamarara naho izavuba zibanda ku Mana nk’uko nabivuzeho gato hejuru. Gukira ugasenga akenshi ntibyoroha. Ariko uriya mudamu bakunze kuvuga ko asenga, ku buryo kumubona mu bihe nka biriya yitwaje Bibiliya ntawakeka ko hari indi mpamvu itari ukwemera yifitemo, gupima uko kwemera nabyo ntitwabishobora. Turebe gusa ikimenyetso yitwaje turebe niba kuruhande rwacu hari icyo kitubwira.

Ntagoranye rero njye yatumye nongera kwibaza kubukristu bwanjye no kubukristu muri rusange. Nibajije ku matotezwa  y’Abakristu yagiye aba ntekerezako nubwo abakristu badakunze gutabara bahangana n’umwanzi nsanga nibura nk’uko byanabaye kuri Yezu ubwe abantu bagerageza kwifatanya n’utotezwa kabone naho hari abagomba kubigwamo kuko Abakristu bigora bagakora uko bashoboye kose kugirango ikibi kiranduke cyanecyane ikibangamira ubuzimaby’umwihariko. Ubwo rero narakomeje ndatekereza  nibuka Amaabonekerwa ya Kibeho n’ubutumwa Bikiramariya yahaduhereye. Abenshi ntibakimuvuga  gutyo bivugira gusa ngo « Umubyeyi ».

Ibyo byose byanteye nanone kwibaza  ku mpamvu uwo mubyeyi yaje iwacu no kuburyo twakiriye ubutumwa bwe ari nabyo rero biduha kumenya uko dutwara ukwemera kwacu.Reka twibuke ubutumwa yaduhaye.

UBUTUMWA BWA BIKIRA MARIYA I KIBEHO

1-Abantu nibisubireho bidatinze, bagarukire Imana: “Nimwicuze nimwicuze, nimwicuze! Nimuhinduke inzira zikigendwa”.

2-Isi imeze nabi, igiye kugwa mu rwobo: ari byo kuvuga guhora mu byago byinshi kandi bidashira”. Isi yarigometse, nta rukundo n’amahoro yifitemo.

3-Agahinda ka Bikira Mariya : Afite ishavu ryinshi kubera abantu b’iki gihe barangwa n’ukwemera guke n’ukutihana.

4-Ukwemera n’ubuhakanyi bizaza mu mayeri.

5-Agaciro k’ububabare mu mibereho y’abantu no mu buzima bwa gikristu.

6-“Nimusenge ubutitsa kandi nta buryarya” Bikra Mariya arasaba gusenga tubikuye ku mutima kandi nta buryarya.

7-Kubaha no kwiyambaza Umubyeyi Bikira Mariya: Bikira Mariya aratugira inama yo kuvuga Rozari kenshi tubikuye ku mutima.

8-Ishapule y’ububabare burindwi bwa Bikira Mariya.

9-Kubaka shapeli yibutsa Bikira Mariya i Kibeho.

10-Gusenga ubutitsa dusabira Kiliziya kuko amakuba akomeye ayitegereje.

Rwiagara Diane na Nyina azamuye Bibiliya igihe Polisi yari ibashoreye

Rwigara Diane na Nyina azamuye Bibiliya igihe Polisi yari ibashoreye

Iyo usesenguye neza ubu butumwa, usanga koko twari dukwiye kuburirwa: Twari twaribagiwe ibyiza by’umuco wacu nko gufashanya tugamije kuzahura abato n’abakene,gutumirana ngo twese turyoherwe dore ko ngo biryoha bisangiwe, gutabarana umuntu agize ingorane,erega ntibatabara gusa iyo umuntu yavuyemo umwuka, n’iyo akaruru kavuze buri wese akora kuri nangagasaku, nkundamahoro cyangwa ikibamfasha maze akajya guhashya inyangabirama.

Ubu rero ikibabaje ni uko tutigeze duhinduka. N’ubwo usanga benshi bahimbaza uko kuza kwa Bikira Mariya nk’umunsi w’ibyishimo, twari dukwiye kuzirikanako cyane cyane yazanywe n’impuruza no kutuburira: Nimwicuze, nimwicuze ni ukuvuga ngo nimuhinduke muhindure imikorere.

Gusenga ntiyigeze abitindaho ahubwo yongeyeho ati nimusenge mubikuye kumutima. Ati muvuge Rozari n’Ishapule y’ububabare kandi musabire Kiliziya yugarijwe n’amakuba. Aha narazirikanye numva ko tugomba kuzirikana cyane ubuzima bwa Yezu tukabucengera; nonese iyo tuvuga ishapule si imibereho ye tuba dutondagura haba mu ishavu cyangwa mu byishimo kukamukuza, tukamusaba n’urumuli? Nonese kuri buri yibukiro ntidusaba n’inema arizo mbaraga zidushoboza ubundi ibigora mwenemuntu?

Nibyo koko, nk’uko Elizabeti mutagatifu yabivuze ati: “mbikesha iki kkugirango nyina w’umutegetsi wange angenderere?” natwe tugomba gushimishwa n’uko Umubyeyi Bikiramariya Nyina wa Jambo yaje iwacu ariko tujye tunibukako yatubwiye no kumenya guha agaciro ububabare buba mu buzima bwacu,tukirinda uburyarya kugirango twubake Isi irimo urukundo n’amahoro.

Ubwo rero nitegereje madamu  Adeline Rwigara ukuntu yitwaje Bibiliya numva tugomba kumwitaho nk’uwacu rwose abemera Kristu. Hari uwabaza ati ese dukore iki? Nabonye amatangazo agira ati twifatanye dusabire umuryango wa Rwigara ni byiza, ariko nge iriya Bibiliya Adeline atwaye, yatumye nibukako inatubwira intwaro tugomba kugira,nk’uko Pahulo izitubwira mu banyefezi umutwe wa gatandatu, kuva ku murongo wa cumi kugera kuwa cumi n’umunani.(Eph 6,10-18)

Aragira ati:”ahasigaye rero, nimugire ubutwali muri Nyagasani, mugire imbaraga zibashoboza byose. Nimwambare intwaro zikomoka ku Mana, kugirango mubashe guhangara imitego ya Sekibi.Erega abanzi turwana si abantu, ahubwo abo turwana ni Ibikomangoma, n’Ibihangange, n’Abagenga b’iyi si y’umwijima, n’izindi Roho mbi zo mu kirere. Nuko rero nimwitwaze intwaro z’Imana, kugirango muzashobore gukomera ku munsi mubi, muzatsinde mudacogoye. Ngaho rero, nimuhagarare gitwari! UKURI  mukugire nk’umukandara mukenyeje, UBUTUNGANE mubwambare nk’ikoti ry ‘icyuma, UMWETE WO KOGEZA INKURU NZIZA Y’AMAHORO ubabere nk’inkweto mu birenge. Ariko cyanecyane muhorane UKWEMERA, kubabere nk’ingabo izazimya imyambi igurumana ya Nyakibi. Nimwakire ingofero y’Umukiro, n’inkota muhawe na Roho, ariyo JAMBO RY’IMANA. Igihe cyose muhore musenga kandi mwambaza kuburyo bwose mubwirijwe na Roho, mubyitondere kandi musabire ubutitsa abatagatifujwe bose “.

Nge numva aya amagambo rero ari ay’ukuri, atera n’ubugabo kandi ko yageza ku mugambi w’ubuzima. Ninayo mpamvu natangiye mvuga mumutwe w’iri jambo nti:” ivanjili si umugani n’ukwemera si inzozi : ni ubuzima

Ngaho rero nk’uko byahoze, kuva kuri Yezu igihe uwanyu afashwe ntimukamutererane, mujye mumuba hafi mwitwaje ziriya ntwaro. Nimwongera kumva mu Rwanda hari uwo baje gufata mukarengane, mwikore mumushyigikire,  mumwome munyuma n’iyonka , ababeshyerwa mubavugire, abafunze mubasure maze murebe ngo ikibazo kirakemuka.Ubutwari nibusimbure ubwoba maze ukuri guhemure ikinyoma.

Bakristu bavandimwe, bino, byatumye nibukako nka Kizito tutamweretse urukundo, mu bihe bikomeye kandi ngo inshuti uyibona mu byago, muribuka ubwinshi bw’abantu babaga bari mubitaramo bye, afunzwe se nakoze iki, wakoze iki? Twoye gukora amakosa kabiri, dutangire ubu twibohore. Muribuka aririmba Inuma y’amahoro, muribuka atwibutsa ubukristu na bwa bubabare Bikiramariya atubwira agira ati urupfu nicyo kibi kiruta ibindi ariko rutubera inzira igana ikiza kiruta ibindi? Ariko ntiyavugaga gupfa uhagaze mu mwiryane,ubusambo,ishyari, ubugome n’andi mabi nkayo. Yavugaga kuba imfura ikunda ukuri n’ubutabera ntiyanduranye byaba ngombwa ikabizira.

Mugusoza ndagirango mbibutseko Pahulo atubwirako tugomba guhagurukira ibinyabubasha ko tutagomba guhangana n’abantu, ari nayo mpamvu natwe ntawe ufite uburenganzira bwo kudukumira igihe cyose dukereye ukuri dutabara inzira karengane cyangwa tugiye kurengera ubutabera. Dushirike ubwoba, dukore ibitureba, twibohore maze nanone nk’uko dukunda kubibyina kanyobwe kanyobwe abafitanye ibibazo babikemure.

Mukomere mugire Yezu na Mariya.

Padiri Athanase MUTARAMBIRWA

 

 

 

 

 

 

 

 

 

 

 

Tariki ya mbere Nyakanga, Ubwigenge mu Rwanda

1962_IndependanceRwanda-300x209U Rwanda rumaze imyaka mirongo itanu n’ine rwingenga. Nta muntu ugomba kuruvogera yaba ava i mahanga cyangwa se umwenegihugu wakwibeshya ko yakwigarurira byose ngo arutegeke nk’aho rutagira banyirarwo.

Ubundi ubwigenge bw’igihugu ni ukwibohora kikava ku ngoyi n’agacinyizo k’umunyamahanga cyangwa agatsiko kaba kagikandamije, maze abenegihugu bakabona bakisanzura iwabo.

Ni ukugira ubusugire n’ubwigenge busesuye, maze igihugu kikayoborwa na benecyo kandi atari bamwe bakandamiza abaturage bagasigara batunzwe no kurya imitsi ya rubanda ; si ukureba ibyiza n’ubukungu bukirimo ngo wirengagize abagituye, amateka yabo, umuco wabo n’imibereho yabo.

Muri uyu mwaka by’umwihariko, Banyarwanda, ndabasaba guhuguka mukibuka ko hari ubutegetsi bumaze guhindura inkingi z’igihugu mu guhindura itegekonshinga mu buryo bufifitse no munyungu zitari iz’Abanyarwanda muri rusange. Ibyo ntitugomba gutuma bigerwaho na mba.

Muzirikane indirimbo yubahiriza igihugu : iriho ubu usanga itaka igihugu n’ukuntu gikwiye kumera neza maze abonka bakonka ; ni byiza…gusa ivuga buke uruhare rw’umunyarwanda mubigomba gukorwa. Naho iya kera, usanga yibutsa umunyarwanda uwo ariwe, amateka n’ingorane igihugu kigobotoye kandi igashishikariza buri wese kwita ku byabaye, kubikomeza no guteganya ejo heza. Igaruka cyane ku bwigenge n’ubwumvikane.

Aho u Rwanda rugeze ubu, usanga hari byinshi bishobora kubangamira ubwigenge bwabo.

Nibyo koko ngo ntabyera ngo de, ariko nanone ibyiza birarutana !

Kwibagirwa ubwigenge bw’u Rwanda nkuko bikorwa ubu, numva ari inenge ikomeye y’ubutegetsi buriho, kuburyo umuntu yanavuga ko ariyo mvano y’ibibazo byinshi biriho muri iki gihe kuko usanga bivamo no guta indangagaciro z’Umunyarwanda zihuye n’ubwigenge nk’uko tuzisanga mu ndilimbo y’igihugu ya kera. Iyo urebye neza usanga indirimbo y’ubu igenda igenekereza iya kera ariko nk’igiterocya nyuma kikabura rwose :

-Ibendera ntacyubahiro rishobora guhabwa mu gihe dusa n’aho tugenda tugana mu gihe cya Kalinga aho ubutegetsi buriho bwigaragariza mu bisiganzwa by’abanyarwanda, abazize GENOCIDE cyangwa abo bugenda bwikindagurira ubwabwo.

-Ihame ryo kubaha Perezida n’Abategetsi muri rusange ryo ryagiye rugikubita igihe Kagame ahanuye indege ya Perezida Habyarimana, we ngo ni igikomangoma gusa ngo kiganje iteka.

-Abaturage b’igihugu bo ngo baragashira umugenda aho usanga ingabo zagombye kubarinda zisigaye zibereyeho kubarasa amanywa y’ihangu.

-Intego yo kwishyira ukizana ntawe wayibwira, umususu n’ubwoba bireze mu Rwanda.

-Iterambere nubwo rikivugwa, naryo ni baringa nta terambere inzara igutema amara.

Nyamara Banyarwanda bavandimwe, ntitwibagirwe, turigenga ntituzananirwa igitugu cy’agatsiko ka bene wacu.

Mboneyeho kubibutsa ko ubwo bukoloni twabutsinze twese kuburyo mu ntwali turirimba harimo Abatwa, Abahutu n’Abatutsi; Abakiga n’Abanyanduga nubwo tutarumvikana ku buryo bwo gutwara igihugu cyacu.

Iyo rero si impamvu akazu, nkuko byabaye mu bihe bishize cyangwa se agatsiko nkuko bimeze ubu, katajya aho ngo kibeshyeko tuzakunamira iteka. None se abadukolonije ko tubanye neza ni iki kitubuza kubana hagati yacu nk’Abanyarwanda. Erega ubwigenge no kugira ijambo mu bandi  si ukwishongora, kwirata, kwica cyangwa gusahura abandi; ari nayo mpamvu mu rwego rwo guhamya ubwigenge bwacu no kwamagana ingoma mbi mu Rwanda,  ngirango ngaruke ku ibango ry’indilimbo ya kera ritinyitse ku ngoma y’ubu itugoye, tugomba kwibohora ikavaho: Bavandimwe b’uru Rwanda rwacu twese nimuhaguruke turubumbatire mu mahoro n’ubumwe, mu bwigenge no mu bwumvikane .

Padiri Athanase MUTARAMBIRWA

Espace politique : Urubuga rwa politiki

Padiri Athanase Mutarambirwa

Padiri Athanase Mutarambirwa

Banyarwandakazi, Banyarwanda kandi bavandimwe, nongeye kubaramutsa mbifuriza imigisha y’Imana yo soko y’ubuzima n’ibyiza byose. Imana yaremye muntu imuha ubwigenge n’ubwisanzure ntayega ku buryo ntawe ushobora kubumuvutsa.

Tumaze iminsi twumva ijambo « espace politique ». Naritekerejeho ngerageza kurisobanukirwa, cyanecyane ko uburyo barivuga, numva ryatuma abanyarwanda barushaho kwiheba. Akenshi baravuga ngo FPR na KAGAME bafunze  espace politique, ngo nta rubuga rwa politique ruri mu Rwanda ; nyamara ariko Kagame we ndetse n’abandi kubera gutinya abakorera politiki hanze, bakemeza ko ushaka umusaruro yagombye kujya gukorera mu Rwanda n’ubwo tuziko we aba agira ngo bamwegere abone uko abatoteza. Reka tubanze twibaze ku gisobanuro cy’iri jambo ubwaryo.

Mu rurimi rw’igifaransa ijambo « espace » nubwo rikoreshwa cyane, ni ijambo rigoye gucengera igisobanuro cyaryo ; bityo rero no mu Kinyarwanda  kuribonera igisobanuro nya cyo biragoye. Rikunze gukoreshwa bavuga « umwanya » muburyo bwo gutandukanya ahantu n’igihe « temps », nubwo wasanga hari aho rinakoreshwa mukuvuga igihe runaka. Mu kugenekereza dukoresha urubuga ariko ntibihuye neza.

Tutagiye muri byinshi ariko, ndagira ngo twumvikane  ko iyo bavuze « espace » bidasobanura ahantu runaka hazwi n’iyo tuvuze urubuga binyuranye no kuvuga ikibuga kuko cyo kiba gifite imbibi zituma umuntu yamenya aho gitangirira n’aho kirangirira. Ikibuga wagifunga ariko urubuga mugisobanuro cya « espace » ntushobora kurufunga.

Iyo noneho twongeye ho politiki, birushaho kuba ibindi kuko tuzi ko politiki ari cyane cyane ibitekerezo ;  ntibibaho rero gufunga igitekerezo.

Muri iki kiganiro rero turafatanya kureba inzira iboneye abanyarwanda bakora politiki n’uburyo abayikora badakwiye kugira impungenge ko hari uwabasha kubambura uburenganzira bwa bo, cyangwa kubakura k’ urubuga ikinirwa ho. Hano munyumve neza : simvugira Kagame mu rwego rwo kunaniza abakora politiki ; ariko sinagamije kunenga abatavuga rumwe nawe bavuga ko yafunze urubuga rwa politiki, ahubwo ndagirango nerekane ko hari uburyo bundi abantu bakoresha kabone n’aho ubutegetsi bwa Kigali bwaba bwibwirako bwakumiriye ababurwanya ku buryo bwose.

Mbere na mbere tubanze twibuke ko politiki ari uburyo bwo kugena umurongo w’imibereho y’umuryango runaka (organisation de la société). Ari nayo mpamvu twibanda cyane ku muryango nyarwanda aho ubarizwa hose, tugamije kureba igikwiye ngo ugire amahoro n’imibereho myiza.

Umuryango nyarwanda

Iyo tuvuze umuryango tuba dushaka kuvuga abantu babana kandi bafite ibyo bahuriye ho bibagira kimwe. Umuryango nyarwanda ni imbaga y’abantu bakomoka mu gihugu cy’u Rwanda cyangwa se n’abandi bose biyemeje, ku mpamvu zinyuranye, kwimika mu mibereho yabo imico n’imibereho y’abanyarwanda. Bityo rero twavuga abanyarwanda mu buryo bw’inkomoko no mu buryo bw’imico n’imibereho, baba batuye mu Rwanda cyangwa ahandi.

Ubundi, umuryango- nyarwanda wagombye kubarizwa mu Rwanda, abatahatuye bakaba bafite inshingano zinyuranye bari mo hanze, mu mahanga kuburyo buzwi kandi buboneye ; kuko u Rwanda rwiza rutakwibuza kubana n’amahanga bakaba  bagira n’ibyo bafatanya mu mibereho ndetse no mu mikorere. Nyamara ariko kubera politiki mbi, Abanyarwanda ntibabayeho neza mu gihugu, bikabatera guhunga ; none ubu bakwiriye hafi ku Isi hose ku buryo kuvuga ko batatanye bitaba ari ugukabya.

Urubuga rwa politiki rero rw’Abanyarwanda ni ibitekerezo byose byiza bigamije kwerekana umurongo uboneye imibereho myiza yabo, aho baba batuye aho ariho hose. Ibyo bitekerezo bigomba(simvuze bishobora…)bigomba gutangwa na buri munyarwanda nta mususu kandi ntawe ugombye kubisabira uruhusa. Umunyarwanda aho ava akagera, uwo ari we wese agomba kugira uburenganzira n’ubwisanzure busesuye, ari mu bitekerezo no mu buryo bwo kubitanga.

Bityo buri wese mu byo asabwa (devoirs) akitanga atishisha, ntacyo yikanga ariko n’uburenganzira bwe(droits) agaharanira kubwisanzuramo kuko nta numwe ushobora kubumuvutsa. Umunyarwanda ni umuntu nk’undi uwo ariwe wese ; uburenganzira bwe ntawundi abukesha keretse gusa uwamuhanze. Nkuko azira kubangamira abandi, nabo bazira kubimugirira, kabone naho baba bitwaje ko ari abategetsi. Amategeko n’ubutegetsi ahubwo biza kumurengera no kumurenganura ngo abeho neza,  agire umutekano n’umudendezo maze yisanzure muri byose.

Gukora politiki mu Rwanda

Politiki mu bisobanuro byayo byose, (uburyo umuryango  ubayeho, imiterere y’amategeko ugendera ho, uburyo ubutegetsi bumeze n’uko ababuharanira bitwara, cyangwa se uburyo bukoreshwa mu kwigobotora ingorane runaka), igomba kuganisha kumibereho myiza ya buri muturage aho kumusenya.

– Kubaho mu bwoba no mu gihirahiro ni ikimenyetso ko umuryango uba udafite politiki cyangwa se ko iba ikorwa nabi.

– Iyo amategeko yahindutse imashini yo gukanda n’urukuta rukumira abaturage, biba bigaragaza ko politiki itabafasha kumererwa neza, bikaba imvano y’amahugu, itotezwa, akarengane n’imvururu mu bantu.

– Mu gihe ubutegetsi buhuzagurika butakibasha gusubiza ibibazo by’abaturage ahubwo ugasanga abategetsi barangwa gusa n’ikinyoma no gushakisha amaronko n’inyungu zabo, politiki iba yapfuye hasigaye ahubwo amanyanga n’amatiku ari nabyo bibyara amacakubiri n’intambara zidashira.

– Iyo hariho ingorane, hakabura inzira yumvikanywe ho ngo zicyemuke ku nyungu za bose, usanga hasigayeho agatsiko k’abatoni b’ingoma, rubanda igakena, igihugu kikorama, kuko nta mikoro, ituze n’ikizere biba bikiharangwa.

Kubona cyangwa gukosora ibyo byose  ntisaba viza kuko aho umuturage yaba ari hose, ashobora kubona igikwiye kandi agaharanira kugikemura. Aho niho u Rwanda rugeze ubu ; kuburyo rukeneye gutabarwa.

Abari mu gihugu  bafite inshingano ya mbere kuko ibibazo aribo babibonera hafi n’ingaruka akaba aribo zigwira bwa mbere.

Abari hanze nabo ntibagomba gusinzira kuko kutaba iwabo ari impunzi, bibavutsa uburenganzira bwinshi nkandi bw’ibanze.

Ku byo mu Rwanda, ubu hari abavugako abakorera politiki hanze bata igihe cyabo. Sibyo kuko umuryango nyarwanda bavugira uri hose : imbere mu gihugu ndetse no hanze ; kandi  baba bavuga ko bose bashaka ineza ibafasha bakibona kimwe, bakanumva ari umuryango umwe koko, ubayeho neza kandi wunze ubumwe.

Nyamara mu gihe cyose ijwi ry’abari mu gihugu ritumvikana imbere ya Leta ihari, ari nayo yagombye gukemura ibibazo, ahubwo bagahutazwa kuburyo bwose, kugera naho bahora biteze kuraswa igihe icyo aricyo cyose, wibaza niba kujya guhangana n’urupfu, aribwo buryo bwiza bwo gutambutsa ibitekerezo, no kugena politiki yo kurengera uburenganzira n’ubuzima bwa buri wese.

Abakora politiki bari hanze ntibata igihe bakomere ahubwo nibavugane cyane n’abakorera mu gihugu kuko bo batsikamiwe, ibitekerezo byabo bombi babyegeranye, babigeze mu rwego mpuzamahanga, babisobanure neza kandi mu ijwi rya bose. Imikorere imwe (kabone naho baba batari hamwe) niyo igaragaza mbere na mbere umurongo wabo wa politiki, kurusha amategeko bazashyira ho n’ibikorwa bazakora muri rusange mu rwego rwo guhindura ibyo ubutegetsi buriho ubu bwangije. Ubwo bumwe rero bushingiye kumyumvire, ntibusaba kuba abantu bari mu Rwanda cyangwa  batuye hamwe.   Ikigenzi ni uko abakorera munzego zo hejuru mu mashyaka anyuranye baba bari kumwe na rubanda bavugira mu rwego rw’ibitekerezo. Abo hejuru bagomba kumva ibyo rubanda ikeneye, bakabishungura, bakabavuganira kandi bakagena imishinga n’ingamba y’ukuntu byagerwaho. Buri wese ku rwego rwe  agomba kugira inshingano yuzuza yaba hafi cyangwa kure, yaba ari mu gihugu cyangwa hanze yacyo.

Gusura u Rwanda no gutahuka bifite koko ingaruka muri politiki. Ku banyarwanda bagenda gusa batembera, bagasura ababo n’ibyabo bakagaruka nta kibazo; ibyo ni ibisanzwe kandi burya ngo n’umwana ujya iwabo ntawe umutangira. Nyamara bamwe bibwira ngo hanze haragoye bagataha, n’ubwo nabo ari uburenganzira bwabo, usanga hari aho baba barushijeho guca intege abari mu gihugu kuko ubutegetsi burushaho kubatera ubwoba, bukabumvisha ko nta kundi byagenda, ko bwabifatiye ndetse ko n’abagiye bananirwa bakagaruka; burya abantu bakwiye kujya babanza bagashishoza. Ugenda wenyine widegembya, ukabohesha agasozi kose.

Abanyapolitiki bo batashye (nka Madame Ingabire Victoire) twabonye uko byabagendekeye ku buryo kubongera mo undi byaba guhebya rubanda. Ahubwo hakenewe ijwi rivugira kure, rigatanga impuruza, rigategura imitima noneho umukiza akazasanga afite benshi bamwakira bamushagaye ku buryo ntabundi bubasha bwamuhangara. Kugira rubanda ni cyo gikenewe kandi kuyigira nta kundi ni ukuyivugira no kwemera kuyikorera mu bwitange ntabwikunde, ntabwikanyize na yo ikagucira inzira, igategura icyicaro.

Urubuga rwa politiki ntirutangwa n’ingufu z’ubutegetsi runaka cyangwa amategeko, ahubwo rutangwa n’uko umuryango uba ukeneye impinduka, noneho hakaboneka impamvu n’abantu bitanga  mu gushaka inzira iboneye yo kuzigera ho. Ntirugengwa n’ahantu cyangwa igihe, kuko urubuga (espace) nta mipaka rugira. Runyuranye n’akarere k’ubutegetsi (territoire) kandi igihe kigiye kugera ngo na ko gafatwe. Ni urubuga rw’ibitekerezo kandi tuzi ko uretse no kubyica ntawushobora kubihagarika cyangwa kubifungirana.  (Mwibuke inama za Mushayidi nubwo afunze, urubanza rwa Théoneste n’urwa Victoire ndetse n’igitabo cye). Njye nibwira ko akenshi tugwa mu mutego w’amayeri y’abatuyobya ngo hakomeze kuboneka impamvu zaha ubutegetsi buriho urwaho rwo kutarekura.Urubuga rurabangamiwe ariko rurahari.

Mu Rwanda ntihabuze espace politique ahubwo habuze espace vital. Ntihabuze urubuga rwa politiki habuze ubwinyagamburiro, nta buzima, ukopfoye barica ;  naho ubundi iyo abantu babayeho ntibananirwa gushakisha n’imibereho ndetse n’amikoro yose abafasha kubaho neza.

Ni nayo mpamvu abakora politiki batagombeye kuzuyaza gushakisha inzira zose zinyarutse zatuma ibintu bihinduka vuba mu Rwanda, batitaye ku iterabwoba ry’ubutegetsi buriho, cyangwa amarangamutima y’abanyamahanga baburi inyuma mu busahuzi, bahora bayobya uburari, igihe cyose inzira yo kubwigobotora iba igiye kugerwaho. Ngiyo imvano y’amakimbirane n’amacakubiri mu mashyaka, bamwe bagakomeza gukeka ko ari Leta ya Kigali gusa ibikora, n’ubwo nayo itabura mo ; ngiyo imvano y’itotezwa rya zimwe mu mpirimbanyi zishakira u Rwanda ibyiza, ngiyo imvano y’agasuzuguro n’ubwende buke bw’abanyamahanga n’imiryango inyuranye biri mu kuzarira no kwirengagiza nkana  ibibazo by’u Rwanda kandi babifitiye ibisobanuro n’ibimenyetso binononsoye. Espace politique, urubuga rwa politiki ku Banyarwanda ntiruhiniye  gusa mu Rwanda ; si Kagame urugena kandi ntanuwarufunga ; ahubwo rukenewe gukoreshwa mu mpande zarwo zose nta shiti.

-Mbere na mbere tugaragaze ko nta buzima buri mu Rwanda kuko nta burenganzira  namba bwa kiremwa muntu bwubahirizwa : Kwicwa, gufungirwa akamama, kunyagwa umutungo, gutotezwa…

-Dutinyuke duhinyuze mu ma nama, mu nyandiko no mu myigaragambyo  abafasha bose ubutegetsi bwa Kigali gutwikira ukuri  bapfukirana rubanda no gukwirakwiza ibinyoma babeshya amahanga ; naho abatwumva tubashyigikire nya byo.

-Tugaragaze ko imfungwa za Politiki zibumbatiye ikizere cy’impinduka nziza mu Rwanda, maze tugaragaze nyabyo ko tubakomeyeho kandi ko tubahuriyeho ;

-Twibumbire hamwe mu mikorere no mu mishyikirano tujyamo kugirango tugaragaze neza ikibazo cyacu kuko iyo tutari hamwe tuba twerekana ko kitaremereye ndetse ko hari ibindi bidushishikaje kurushaho, mbese muyandi magambo ko atari cyo kibazo gikomeye dufite. Twareka ibindi tukabohora igihugu kirabiruta.

Umwanzuro

Mu byukuri gufunga urubuga rwa politiki ni ugukora politiki izira amakemwa kuburyo ntawabona icyo akunenga. Iyo  n’ab’iyo bigwa babona ko igihugu kigowe,  ko ntabuzima ko ntabwinyagamburiro rubanda ifite, urubuga ahubwo ruba ruhari ; yewe runatanga impamvu zo gukoresha uburyo bwose ngo igihugu kibohoke haboneke inzira yo kuvugurura byimbitse ibyangijwe na politiki mbi. Mu Rwanda uretse gutinya no kujijisha ntawabura ibyo anenga Leta ya Kagame.

Kuvuga ko mu Rwanda nta rubuga ruhari ni imvugo ijijisha abadasobanukiwe neza, aho kumva ko rubanda itabaza bo bakumva ko ngo byose ari ntamakemwa. Ni ugutwikira amafuti ukerekana ko ntagikwiye kunengwa. Ni ugufata itekinika nk’ukuri, abashonje ukavuga ko bahaze, abasahura ukavuga ko bacunga umutungo neza, abo ruswa yarenze ukemeza ko batayizi kugeza n’aho abicanyi aribo wita abayobozi b’intangarugero wirengagije induru n’imiborogo biri mu karere.

Impamvu twe twavugako mu Rwanda nta espace politique ihari, ko nta rubuga rwa politiki ruhari ni imwe gusa ; ni uko nta espace vital ihari nta bwinyagamburiro bw’abantu bazima buhari, nta buzima buhari.Kagame n’ibyegera bye ni bo bafite  ubuzima  mu Rwanda.

Guharanira kubaho neza ni uko uba unariho. Umunyarwanda niyibohore mbere na mbere yizere kuramuka, agire ubuzima. Abakora politiki hafi ya bose bavuga ko bari ku rugamba kuko aho u Rwanda rugeze rukeneye ivugurura munzego zose. Ibyo bizashoboka rero ari uko rubanda irangajwe imbere n’abanyapolitiki bashize amanga kandi bashyize hamwe kugirango bagarukire igihugu koko, aho inyungu za rubanda zibanziriza izindi zose, aho amarangamutima, amaramuko n’inyungu z’amanjwe byibagirana. Nitwibohora ibiturimo, tuzibohora n’ingoma mbi; kandi nidukunda igihugu, tuzakivuganira.

Padiri Athanase Mutarambirwa

Ntawihuta nk’uwayobye

Kagame_PHashize iminsi hahita ibiganiro binyuranye bivuga kubijyanye n’ibyo bise « guhindura itegekonshinga » .Mu magambo atangwa usangamo impirita nyinshi , guhubuka ndetse no gushyanukana umuvuduko uteye impungenge. Aho kugaragaza aho itegeko risanzwe ryaba ribangamiye igihugu cyangwa umuryango nyarwanda muri rusange , usanga ahubwo abantu bibanda mugutakana ibikabyo byinshi Perezida Kagame Paul, nk’umuntu udasanzwe, kuburyo byanteye kwibaza aho u Rwanda rurimo kugana.Ngo atambutse abandi banyarwanda bose kuburyo akiriho ntawe bahiga?  Ngo  afite uburenganzira bwo guhindura amahame ibihugu bikoresha n’Isi yose igenderaho,ngo kko ariwe, bigatuma u Rwanda rusumba ibinhdi bihugubyose ? Ngo Kagame Paul ni ikirenga, ngo asigiye na Yezu Kristu ?!!

Hari ibintu umuntu muzima yumva akabyibazaho kandi akiyemeza kudaterera iyo, ngo bitazaba nabi akababazwa n’uko yabibonye ntagire icyo akora. Nanjye iyo numvise ibivugwa, mbona ibintu bitoroshye ; cyane cyane ko ababivuga mbona bazineza ibyo barimo; ahubwo ko akenshi baba bagamije guhuma amaso  rubanda idasobanukiwe . Nasubiye mumateka ngo ndebe  umutegetsi twafatiraho urugero mu rwego rwo gufasha Abanyarwanda guhumuka bakirinda guhubukira kurohama.   Mu by’ukuri mu mateka  hari benshi bitwaye nka Kagame. Ndetse n’ubu dusanga adatandukanye cyane n’abategetsi bamwe na bamwe bo mu karere kacu. Hose banyotewe demukarasi, hari ukwigwizaho umutungo gukabije, abategetsi basahura ibihugu byabo,  hari ubutabera buke, no gukabya gukandamiza abaturage…

Banyarwanda rero nibura nimurebe mu Kinyarwanda maze mwibukeko “utazi ubwenge ashima ubwe” mureke kohoka mu nzira y’ikinyoma, ibikabyo byo kwiyemera no kwirata gusa itazabata ku gasi? Kandi ntimwihutire kuvuga no kuyoboka  buhumyi mudashishoje kuko burya ngo “ntawihuta nk’uwayobye”.

Urugero nafashe ni urw’umugabo Nelson Mandela tuzi twese. Gusa mbere yo gukomeza reka nisegure kurubyiruko nabwiye umushinga w’iyi nyandiko rukanseka cyane .Barambwiye ngo nubwo bikundira Kagame Paul ngo ntibabona aho umuntu yahera amugereranya na Mandela;ngo nange singakabye .Nge nabirenzeho ngirango gusa nerekane isura y’umutegetsi mwiza kandi ngo abantu bose babashe gusobanukirwa ko Kagame Paul adashobora kuba na gato umuyobozi uboneye, bihereye ku matwara amuranga.

Mureke  twibaze. Niba Kagame Paul ameze uko avugwa,Mandela yaba yari iki  mumaso yacu? Naho  se niba Mandela yari uko tumuzi, aho ibyo tuvuga kuri Kagame Paul ntibyaba ari amahomvu,maze kumukurikira bikaba ari nko kwanga ukuri nkana no kwirahuriraho  umuriro ?

Nelson Mandela na Kagame Paul bose ni abanyafurika b’abaperezida barwaniye kubohoza bene wabo barenganaga; kandi babigeraho babona instinzi,buri wese mu nzira ze. Ntatinze kuri ibi ariko, nubwo biboneka ko aba bagabo hari bike bahuriyeho barananyuranye cyane kuburyo uwashaka guhitamo uwakoresheje inzira nziza muribo, atakwibeshya ,keretse abigira nkana.

Mu nkomoko navugako Nelson Mandela yavaga mu bakene ariko kandi bihagazeho kuko se yari umutware mu bwoko bwabo, ariko ntiyabikangishaga. Kagame Paul nawe inkomoko ye ntihambaye cyane ariko we yibwira ko kuba yarababaye bimuha kuba igihanganjye ngo kuburyo yanazungura umwami nk’igikomangoma rwose cyavukanye imbuto!

Nelson Mandela yarezwe neza ajya mu mashuli kandi n’ubwo yari akandamijwe n’abazungu yarize aramenya ndetse araminuza. Kagame Paul nawe yararezwe, yaranize. Ariko abamwumva avuga bashidikanyako yaba yararezwe neza; kandi niba wenda ataraminuje mu mashuli , si ikosa kuko yari impunzi n’ubwo hari benshi babubanyemo ,ndavuga ubuhunzi,bitabujije kurangiza za kaminuza.

Mu Kinyarwanda  ngo “imfizi ibyara uko ibyagiye”; ngo “ntanutanga icyo adafite” ariko nanone ngo “ubugabo buva hasi”. Buriya  Nelson Mandela uwo yariwe ari muto, niwe yabaye mu byo yakoze nubwo amateka yamukozeho akanamuvangira. N’undi ni uko.Ngaha rero dore inzira ebyiri zihabanye.

Inzira ya  Nelson Mandela yabaye inzira y’amahoro kuko ariyo yari amuri mu maraso. Inzira ya Kagame Paul yabaye iy’intambara kuko ariko ateye.Tutarondogoye, buri wese  mu magambo n’ibikorwa bya niho dusanga ibigaragaza imyumvire yabo ndetse bikanaduha gusobanukirwa n’imigirire ya buri muntu.

Nelson Mandela  yasobanuye uko yumvaga ibintu, bigatuma umuntu yahita yibwira uwo yari we akanumva imvano n’ishingiro ry’imiyoborere ye y’ indakemwa . Dore rero impamvu zihagije tuvuga ko yategetse neza,kandi bitaramutwaye igihe kinini ngo abe yanagwa muri wamutego mutindi wo kugundira ubutegetsi. Ntiyanategereje yewe na manda ya kabiri kuko yari amaze gutanga ikirekezo kiza kandi akinguriye buri mwana wa Afurika yepfo amahirwe angana n’ayabandi.

Kagame Paul nawe ngirango ibye bimaze gusobanuka ,kuburyo uretse gutinya kuvugisha ukuri, ntawuyobewe ko ubutegetsi bwe ntakigenda, kuburyo ubu arimo ashaka uko yabwizirikaho ngo kugera apfuye!Impamvu nuko ibibi byabaye byamaze kumutanga imbere kuburyo atazi icyo yavuga aramutse ibiryojwe atagifite ubudahangarwa. Aha ariko ntitwibagirwe hari n’ibyo nawe yaba yaragerageje kugeraho byiza nubwo aribyo bike.

Nelson Mandela yaravugaga ati narwanyije ubwikanyize bw’abazungu ndwanya n’ubwikanyize bw’abirabura .Ati umugambi wanjye mukuru wari uwo kubaka umuryango wisanzuye kandi ufite demukarasi ,kuburyo bose babana mu mudendezo kandi bafite amahirwe angana.

Kagame Paul we ntagaragaza neza abo yarwaniye ;rimwe ngo ni abanyarwanda ,ubundi ngo Afurika,n’ubwo yivugira itsembabwoko ryakorewe abatutsi ;ntiyerura ngo yemeze ko ubwoko bw’abatutsi bubaho ngo anature avuge ubwoko bw’abahuru kandi ngo aharanire inyungu za bose.

Nelson Mandela yaravuze ati:Isomo twakuye mungorane twabayemo igihe kirekire rituma tugomba kubaka umuryango abantu b’isi yose bazishimira.Arongera aca iteka ati :ntibikabe,ntibikabe mugihugu cyacu ntibizongera kubaho aho umuntu akandamizwa n’undi muntu.

Kagame Paul ahora gusa yishongora akavangavanga abantu ababi n’abeza ,akabogama akibwira ko hari abantu baruta abandi ndetse akagena n’imikorere aho we n’abe aribo bagomba kugenera abandi bose uko bagomba kubaho.

Nelson Mandela ati tuzakora ubumwe buzatuma twubaka umuryango aho Abanyafurikayepfo bose ari abirabura ari n’abazungu bazajya bagenda bose bemye,nta bwoba mu mutima,kandi bizeyeko uburenganzira bwabo bwa kiremwamuntu budashobora guhungabana; ati tuzubaka igihugu cy’amahoro kibereye amabara yose n’isi yose.

Kagame Paul ngo ni igihangange hazakorwa ibyo ashaka n’uko abishaka; nta gahutu nta gatutsi gatwa we rwose ni ibindi.Hari abagomba kugera I Kigali nabobahahiga amanywa n’ijoro,hari abaciriwe ku Iwawa ,ntawugipfa kwirahira se ,ntawukitabaza inshuti z’umuryango kuberako ngo bamwe babaye umwanda n’ibigarasha. Ariko igikomeye cyane ni uko mugihe Isi irimo iba umudugudu Umunyarwanda   we atakizerwa no mubihugu bituranyi kuburyo imipaka yahoze ari amasangano aduhuza n’abandi ,ubu yahindutse inkiko z’ irasaniro.

Nelson Mandela ngo yemeragako  umuntu ukandamiza abandi nawe akeneye kubohoka nkabo; akagira ati umuntu ubuza undi uburenganzira bwe aba ari imbohe y’urwango,aba aheranwe n’ibihindizo by’urwikekwe, aho kuba imfura aba ari imfunya ku mutima. Ibi byatumye akorana neza n’abari baramutoteje bagera kumwanzuro w’amahoro .Yahoberanye n’uwamuhemukiye.

Kagame Paul yemerako ubangamira mugenzi we akwiye gusa urupfu,ngo yanakoresha kinubi yica isazi. Iyo urebye neza niyo mpamvu agira inzika , agashobora guhora, aho kubohora abatsikamiwe n’ababatsikamiye. Ahubwo ubona ameze neza nk’uriya Mandela avuga ko atari imfura. Ibi nibyo byamuteye kudategereza imyanzuro y’imishyikirano , agahitamo gucura inkumbi abo bashyikiranaga ngo kuko yakekaga ko nabo bashobora kumuhitana gusa.Ubu asigaye anahiga ibyegera bye n’abajyanama be ndetse n’abavandimwe.

Ubundi Nelson Mandela ngo ikintu kimwe cyamubabaje ni uko atigeze aba icyamamare ku Isi mu mukino w’iterana makofe. Ni ukuvugako igihe yarwaniraga ko abanyafurikayepfo banganya amahirwe yashakaga ko buri muntu yajya anakora  icyo akunda kandi cyamufasha. Aha bitwibutse ukuntu yahereye ku ikipe yabo ya rugubi (rugby)kugirango yunge bene wabo.Abirabura mbere ntibayibonagamo kuko yari igizwe  n’abazungu gusa.Mugihe gito abonye ko bamaze kumva ikcyerekezo gikwiye, yareguye aregama ,arekera abandi banyafurikayepfo nabo bashyiraho akabo nanubu biragenda neza.

Kagame Paul we ngo ikimubabaza kuruta ibindi ni uko  atabamariye mo umujinya wose, ngo abamarire ku icumu kuburyo hari nabakigaruka bikaba ngombwa ko bakorana! Ni ukuvugako akibirwaye kuburyo aziha igihe gihagije ngo agere ku mugambi we. Mwibuke avuga ko ngo kumena amazi yuzuye ingunguru byagorana; ngo we azayavoma buhorobuhoro mpaka ayacogoje . Mugihe kirekire amaze ,arabona ko umugambi we atarawugeraho none agiye kwiyongeza kandi ngo ntawundi nkawe wabaho ngo azawurangize. Igihe bitaragerwaho azatsimbarara ku butegetsi ngo wenda azabuzire .

Maze rero Banyarwanda bavandimwe kuyavuga siko kuyamara .Gusa nafashe ingingo nke kuri bariya bagabo bombi ngo mbibutseko twibeshye mu gihe cyashize bikatugeza kure tutakekaga.Nkaba numva rero tudakwiye kugwa mu cyobo kabiri. Ngo Kagame Paul ni rudasumbwa ngo asigiye na Kristu ? Mboneyeho no kwibutsa uwabivuze ko Ubwami bwa Kristu atari ubwo kuri iyi si kandi ko we ataje ngo bamupfire nk’uko numvise babibwira Kagame, ahubwo yaje kudupfira ,ngaho niba Kagame ari mwiza nahare iyo ntebe ajye munka ze niba atarabeshyaga igihe yabivugaga.

Mu kwanzura ,ndagira nti “ akaburiye mu isiza ntikabonekera mu isakara”. Kagame yatangiye nabi akomeza nabi, azarangiza nabi. Bibiri nagatatu baduteye igipindi ngo Kagame Paul natorwa amahoro azaza haba haje Gacaca n’ibyayo; ngo ifaranga rizaboneka ,uko byabaye twarabibonye none ngo  niwe mahirwe y’u Rwanda ni mumureke akore ibyo ashaka?

Icyakora niba ashigaje igihe cyo kwihana no kwigorora mu byo yangije, twese tuzamutora.Gusa ntakizere igihe yica ba Karegeya na ba Rwigara,igihe agihiga ba Kayumba  agafunga ba Ingabire na Mushayidi na bagenzibabo bazira politiki, igihe akiyemerera ko abereyeho guhangana ,ikigambiriye kubarasa kumanywa y’ihangu; nge nabwira Abanyarwanda nti nimukenyere mukomeze kandi ijwi rya rubanda Imana iraryumva.

Kagame Paul yarivugiye ngo ntawambuka ikiraro atarakigeraho ;none iyo ndebye banyarwanda ingufu zakoreshejwe ngo abaturage bikorere ibikarito by’impapuro bazijyana I Kigali kandi amaposita akora,nkumva uko banyemeza ko mukanya nk’ako guhumbya Abanyarwanda ngo hafi ya bose bagize igitekerezo kimwe,bakakivuga mu gihe kimwe, mu buryo bumwe ngo Kagame agume ku butegetsi none n’inzego zose zikaba muminsi mike gusa zimaze kubisinyira ndababwiye ngo” ntawihuta nk’uwayobye”.Nimukanguke duhakanire Kagame Paul kunyura iriya nzirakuko imeze nk’imwe y’ubwato mu muhengeri.

Padiri Athanase MUTARAMBIRWA