Archives par étiquette : amasambu

Rwanda : Muri Gatsibo, abahinzi bakomeje kwamburwa amasambu mu buriganya

gatsiboNkuko bisanzwe bizwi ko mu Rwanda umuntu utabyumva kimwe na FPR agomba kunyagwa ibye ku ngufu, noneho ni agahomamunwa.

Mu ntara y’iburasirazuba, mu karere ka Gatsibo, mu murenge wa Rwimbogo, mu tugari twa Nyamatete na Rwikiniro.abaturage bararira ayo kwarika, kuko banyanzwe amasambu n’amazu byabo ku ngufu bitwaje ngo baguze mu mafamu (farm) ahantu hagenewe ubworozi.

Abo baturage baguze n’umugabo witwa NDIRIMA James na SESONGA (ntitwabashije kumenya irindi zina) abenshi muri abo baturage bamazemo imyaka irenga 10, none ubu FPR irimo kubirukana ngo nibave mu mafamu (farm) y’aborozi kandi banyiraho aribo bahabagurishije.

Ikibazo ni iki: ese abahabagurishije nibo bazahasubirana cyangwa ni abandi bazahaha? Nkuko bisanzwe bizwi aya ni amwe mu manyanga FPR ikoresha iyo ishaka kunyaga umuntu. Ibintu nkibi bikunda kuba mu turere twa Gatsibo na Nyagatare, ndetse mu myaka ishize i Nyagatare bimuye imiryango 110 yose irangara, ariko ikibabaje aho babimuye bavuga ko ari mu mafamu y’inka, bari bafitemo intoki n’amazu n’indi mirima byose na nubu birimo ahubwo babikoze neza cyane. Mu by’ukuri rero ni ubujura gusa buba bugamijwe nta kindi.

Aba baturage b’i Gatsibo rero baratabaza nubwo badafite uwo batakira kuko uwo batakira ariwe ubarenganya. Barashaka kubasubiza udufaranga tw’intica ntikize ariko abo baturage barayanze, ubu inzego zibanze na polisi zirimo kubatera ubwoba ngo bazabafunga nibindi.

Kuko nk’umuntu wahaguze mu myaka 10 ishize hegitari yayiguraga amafaranga atarenze 800.000 RF none ubu hegitari iragura 3.000.000 RF y’u Rwanda, ubwo rero umuntu arareba icyo ari bumaze 800.000 RF kikamuyobera.

Ngayo nguko.

J-Jules Rugero
Gatsibo-Rwanda

 

 

Rwanda/Nyamagabe : Leta ya FPR yahuguje amasambu abaturage baturiye inkengero z’ishyamba rya Nyungwe.

nyungwe-forest-2Nibyo koko rero mu Karere ka Nyamagabe mu cyahoze ari prefegitura ya Gikongoro harashimangirwa akarengane k’imiryango isaga ijana aho imaze gusubizwa ku isuka na Leta ya FPR ibambura ubutaka buriho n’amashyamba yabo, biherereye ku nkengero za Parc  ya Nyungwe ariryo bitaga ishyamba rya Nyungwe mu Murenge wa Kitabi.
Ubwo butaka bukaba bwareguriwe New Forest Company yari isanzwe yita ku mirimo y’iryo shyamba ku mpamvu abo baturage bavuga ko zidahwitse  uretse gushaka kuhabahuguza by’akamama kubera inyungu za FPR.
Mu by’ukuri rero uretse kwirengagiza ikibazo kwa Leta ya FPR bikaba bigaragalira buri wese ko aya masambu bahugujwe ari ayo bari barasigiwe n’ababyeyi babo bataritaba Imana.
Iyi Kompanyi « New Forest Company » imaze kwegukana imitungo  y’aba baturage ku ngufu za FPR ntiyagarukiye aho kuko ikimara no gutangira kuyisaruramo yiyongereyeho no kwigabiza amashyamba y’aba baturage, ifatanyije n’ubuyobozi bw’akarere bategekwa kutazongera na rimwe kugira icyo bahakorera uretse  New Forest Company ko ariyo ihafiteho uburenganzira yonyine.
Yifashe ku kananwa n’agahinda kenshi Anastase  MUNYANZIZA umwe mu baturage bahugujwe ubutaka n’isambu yasigiwe n’ababyeyi be ndetse banashyinguwe kuri ubwo butaka yadutangarijeko ibyo bakorewe biteye agahinda no kwiheba! ati  aya masambu tuvuka twasanze ari ay’ababyeyi bacu bagera aho batabaruka tuyasigaramo ati yewe n’ikimenyimenyi niho abenshi bashyinguwe!none se izi mva turazivanamo tuzerekeze hehe kandi natwe bari mukutwirukankana? Ati rwose turasaba kurenganurwa! Ati gusa ni uko nta wuburana n’umuhamba!
Bwana Philbert Mugisha,umuyobozi w’akarere ka Nyamagabe we atangaza ko hakurikijwe ubushakashatsi bwakozwe na ministeri y’ubutaka mu nshingano zayo basanze iyo mitungo atari iy’abo baturage ahubwo ari  iya Leta bari barigabije imyaka myinshi ishize,ati niyo mpamvu basabwe gusarura bwa nyuma ibyo bahinzemo no kutongera kugira icyo babukoreramo nyuma agahabwa New forest company ati kandi bamwe baranasaruye.
Nimwiyumvire namwe ibyo uyu muyobozi w’akarere avuga!yirengagije ko na bamwe mu banyarwanda bari bamaze imyaka irenga 30 mu buhungiro cyangwa abana babo batahutse nyuma y’intambara ya 1994 basubijwe ibyabo cyangwa ibya ba Sekuru batari bakiriho kuburyo abenshi muli bo bavukiye iyo hanze iyo bigwa wasangaga nta n’agasanira bagifite mu Rwanda aliko nta cyababujije kwongera guhabwa ubutaka mu rwababyaye,nkaswe noneho umuturage gakondo nka Anastase MUNYANZIZA  werekana n’imva za ba Se na ba Sekuru zishyinguye aho ugatinyuka ukavuga ko yatuye ku butaka butari ubwe n’imyaka ahamaze?
Amarira y’abaturage akomeje kwiyongera hirya no hino mu gihugu cyacu, twavuze kenshi ko abayobozi bacu barwaye virus yo giteknica ikaba imaze kubokama nta kivurwa, niyo mpamvu buri munyarwanda asabwe kwirwanaho, buri wese ku giti cye ashake uburyo yakwigobotora amabi y’iyi ngoma ya FPR-KAGAME dore ko isigaye isa nirembaremba hejuru y’amazi  kuko akarengane mbona muli iki gihugu katazakemurwa n’ubuvugizi bw’ibinyamakuru gusa, iki gihugu gikenewe gutabarwa mu maguru mashya.Murakoze.
 
Byanditswe kuwa 17/10/2016, na:
A.BEN NTUYENABO,KIGALI-RWANDA.  


PENTAX DIGITAL CAMERA

Kubarura amasambu mu Rwanda bihishe iki?

Hashizi iminsi Leta y’u Rwanda yaratangiye igikorwa cyo kubarura amasambu. Ni igikorwa cyiza ariko ntibyatinze kubona ko kigamije kwambura masambu abaturage binyuze mu mateko adahwitse. Agaco gateka u Rwanda kahise kavuga ko buri muntu agomba gusorera isambu ye. Abaturage, batagira n’urwara rwo kwishima,  bahise ahenshi batabaza, berekana ko ayo mafaranga ntayo babona ko ari menshi cyane kuko batanafite n’ikibatunga. Ahenshi inzara iranuma ndetse n’uwejeje abuzwa kurya icby yingiye. Ni akumiro.

Nkuko rero ari itegeko rishyiraho uwo musoro w’amasambu, abatazashobora kuwutanga, amaherezo amasambu yabo azatezwa cyamunara. Azagurwa na ka gatsiko kari ku butegetsi cyangwa amashumi yako kuko bafite amafranga atagira uko angana, ari ayo bakuye mu bintu basahuye bafata u Rwanda muri 94, cyane cyane mu migi nka Kigali, ari n’ayo bakuye muri Kongo bagurisha amabuye y’agaciro cyangwa ayo bateruye mu mabanki y’icyo gihugu.

Nta sambu kandi ari yo yari imutunze, umuturage azasigara ari umutindi nyakujya, yicwe n’indwara n’inzara. Nicyo ako gatsiko gashaka  kugeraho : kurimbura imbaga kandi kagoresheje itegeko! Amategeko aragwira ariko ayo mu Rwanda yo ni agahoma munwa. Mperutse kubona ngo Depite asaba ko yongererwa imishahara. Akora iki uretse kwemeza amategeko yo gukandamiza abaturage bamutoye?

Ubundu buriganya buteye inkeke kandi butavuga, ni uko ubu ibyo byo kwamburwa masambu byatangiye ku bundi buryo. Umugambi ugeze kure ushyirwa mu bikorwa. Hari abambuwe amasambu kuva muri 94 ubwo babwirwaga ko bagabana n’abari batahutse. Abatarahasize agatwe baremye, bagasigarana umuhaga utera, aheza hagafatwa n’utahutse kuko yabaga hagarikiwe n’umuhungu we Afandi cyangwa undi mwene wabo ukomye mu Cyama. Ibyo byabaye cyane mu burengerazuba ndtse no muri Kigali muri payizana za Masaka, n’ahandi.

Ubu rero ikiriho ni uko mu duce tumwe tw’u Rwanda, abatware bahungutse cyangwa abana babo ndetse n’abuzukuru, bagaruye icyo bita « ibikingi ». Mbera ya 1959, ku ngoma ya gihake, umutware bamugabiraga guteka akarere, yahagera, akimura abaturage, ku musozi umwe cyangwa ibiri, ndetse n’itatu, akahagira urwuri rw’inka ze. Abaturage bimuwe bagasembera, bagatindahara. Ngo wirukankana umugabo kera ukamumara ubwoba. Byageze ubwo abo baturage bafata iya mbera, barivumbagatanya, bakuraho iyo ngoma ya gihake yari yarabashyize mu bucakara, bayikorera nta gihembo, ibambura utwabo, n’ibindi. Abo batware n’abo bari bafatanije kuzambya abaturage baruhunze. Muri 1994 aho abana babo bafatiye ubutegetsi baragaruka. Ubu rero, aho ibyo by’ibarura ry’amasaambu byaziye, abo bari bafite ibikingi biri ku masambu bambuye abaturage, baje kubibaruza, bimura abaturage karahava. Babifashwamo n’abahagariye Ibuka mu turere. Ubu mu Rwanda hari abantu batagira aho batuye cyangwa se basigaranye inzu itagira imbera cyangwa inyuma, kubera ko ba nyiri ibi bikingi bagaruye akamenyero kabo ka kera ko kwambura isambu umuturage nta nkurikizi. Mbese u Rwanda rwasubiye nka mbere ya 59.

Uwo mururumba uvanze n’ubugizi bwa nabi muribuka ko watangiwe na perezida Pahulo Kagame ubwo yafataga hegitari zirenga 40 ku nkengero z’ikiyaga cya Muhazi agashyiramo inka ze avuga ko iyo sambu yari iya mwene wabo. Abandi baboneyeho nabo baragenda mu karere k’Umutara, bimura abaturage, bafata za hegitare nyinshi (bamwe bari bafite izirenga ijana) nabo barazitira, abaturage bimuwe barangara. Ubwo byateye impagara, perezida ajyayo bya nyirarurehswa, avuga ko amasambu bayasubiza bene yo. Gukemura ikibazo abishinga generali Fred Ibingira, nawe wari ufite igikingi kinini cyane yirukanyemo abaturage.

Ibarura ry’amasambu rero, riri mu mugambi muremure wateguwe n’agatsiko ko muri FPR wo gusubiza abaturage mu bucakara, kandi kari hafi yo kuwugeraho. Muribuka ko batangiye basenya amazu ya nyakatsi abaturage benshi bakaba barara rwa ntambi kuko nta mafaranga bari bafite yo kugura amabati cyangwa amategura. Ubu abashoboye kubaka inzu ya kijyamber ngo nabo bagomba kuzisorera. Yewe burya ngo uwarose nabi burinda bucya.

Ninde uzarenganura abo baturage ko ubundi umutegetsi ariwe ufite iyo nshingano none akaba ariwe nyirabayaza? Bizagenda bite? Amaherezo ni ayahe?  Abaturage se bafite imbaraga nk’izo muri 59 ngo bivumbagatanye amazi atarerenga inkombe? Ntabwo byoroshye kuko ubu, buri gasozi kariho itsinda ry’abasilikari rifite imbunda. Hababa n’abakada kuri buri ngo icumi. Habaka intore,…  Hari umuturage uramutse ushatse kubyutsa umutwe, bawumena. Nta rwinyagamburiro afite na busa. Ni ukwemera, agapfa yumva.

Ariko rero, gupfa ni ugupfa. Bizageraho babe ibyihebe, bapfe nabo hari uwo bahitanye. Ibyo se abategetsi b’u Rwanda barabibona? Ntibabona se ko muri iyi minsi mu bihugu by’abarabu abaturage bemeye kuraswa bagahangana n’abasirikari kandi bagatsinda bagakuraho ubutegetsi bwari bwarabakandamije?

Guteka, ni ukumva icyo abaturage bavuga, icyo bashaka. Niyo demokarasi.

Gervais Gicumbi
10/01/2012