Archives de l’auteur : Amakuru ki ?

Rwanda : Leta ya FPR irimo kuvana abaturage mu manegeka ibarunda mu nsengero nkuko yabikoraga nyuma y’intambara ishaka kubatikiza

Paul Kagame et Edouard Ngirente

Ubwo yihanganishaga imiryango 18 y’abaturage babuze ababo mu Karere ka Karongi intara y’iburengerazuba kubera guhitanwa n’ibiza, Ministri w’intebe Dr. NGIRENTE Edouard yagize ati : Gouvernement yababajwe n’ibiza byabagwiririye ikaba yampaye ubutumwa bubihanganisha ati kandi ikaba yongeye gusaba abaturage muri rusange ubufasha mu gukumira ibi biza kugirango bidakomeza kutumaraho abantu . ngaho rero ! aho kuba abazaniye inkunga yihuse ahubwo nawe ayibategerejeho ! nanone ubwo yahuraga n’itangazamakuru rya hano mu gihugu kuri uyu wa 11/05/2018 akaba yashimangiye ko Leta idafite ubushobozi bwo kwita kubagezweho n’ibiza bose aka kanya nubwo bwose imaze gutanga asaga miliyoni 300 , ko hari gahunda ndende izafata imyaka irenga ibili ngo bose babe bashoboye kubona aho bikinga. Tubibutse ko kugeza ubu abantu barenga 215 bamaze kwicwa n’ibyo biza wongeyeho amazu arenga ibihumbi 10 yasenyutse burundu na hegitari zirenga ibihumbi 5000 Ha z’ubutaka buhinzeho imyaka yangiritse ku buryo hategerejwe indi nzara mu minsi iri mbere.

Banyarwanda burya koko izina niryo muntu ! Ministri w’intebe Dr. NGIRENTE SE ? uyu mugabo akibereye muli FMI nta bibazo by’amatiku n’ubutiriganya yahuraga nabyo aliko ubu akaba amaze guhitamo kugendana n’ikinyoma cya Semuhanuka igihugu cyubakiyeho kandi aziko ahagaraliye abanyarwanda bose. Birababaje !

Bamwe mu baturage ba Karongi basigaye iheruheru naganiriye nabo n’agahinda kenshi nibo bagize bati : aliko gouverinoma yacu izahora mu magambo yo kutwihanganisha gusa nkaho igifu kiyasya ! abandi nabo bati ngiyo guvernoma y’ubumwe bw’abanyarwanda duhora turirimba isigaye ibunza amagambo gusa ku itabaro imbere y’abakomeje guhitanwa n’ibiza hirya no hino mu gihugu cyacu. Ibyo akaba ari bimwe mu byiyumviro by’abaturage.

Si i Karongi gusa rero kuko umugi wa Kigali nawo umaze gufata icyemezo gikarihiye abaturage cyo kubavana ku ngufu za Leta aho bise amanegeka hose ukaba urimo kubarundanyiriza mu nsengero Leta yari iherutse gufunga kubera kutagira ibyangombwa nk’ibigega by’amazi, parking , za toilettes zihagije n’ibindi…. Ibyo ngo mu gihe bategereje aho bazaberekeza. Ikibabaje nuko ari izo nsengero ahanini zari zubakishijwe ibiti n’ibyondo ari nutwo tuzu twa banyagucibwa mu gihugu cyabo kuko bakennye cyane usanga ntaho bitaniye! byose wabifata nk’amanegeka ! Icyo gikorwa kikaba cyarahereye mu Karere ka Nyarugenge mu Murenge wa Kimisagara ahamaze kubarurwa ingo zigera kuri 90 zatangiye gucumbikirwa muli izo nsengero ari nako bahita bafungisha soudure amazu babagamo. Ubuyobozi bw’umugi wa Kigali bukaba butangaza ko icyo gikorwa kigomba gukomeza no mu yindi mirenge.

Umwe mu baturage bimuwe yabajije Gitifu w’umurenge wa Kimisagara ati aho kudushyira muli izi nsengero namwe muziko mwazifunze kubera ko ntaho zitaniye n’amanegeka mwabaye mutujyanye muli stade ya Kigali ko nibura ho hisanzuye umuntu akajya abona uko yinyagambura ku manywa ashakisha imibereho noneho agataha hano ku mugoroba ? Gitifu yamusubije ko byatera ubuzererezi n’umwanda mu mugi.

Undi nawe ati aliko muli uyu mugi harimo imidugudu ihagije yubatswe ku bufatanye na Leta mwita iy’icyerekezo kandi akaba nta bantu bayibamo yewe habuze nuyikodesha cyangwa ngo agure hafi imyaka itanu irashize mwadusabiye bakaba bayiducumbikiyemo niba koko mu gihe gito muzaba mutuboneye aho kuba? (baramwirengagije ntacyo yasubijwe).

Banyarwanda rero muriyumvira abwirwa benshi akumva bene yo ! niyo mpamvu nkurikije ibyiyumviro by’aba baturage ndasanga kiriya gikorwa nta mpuhwe zikirangwa ahubwo cyagereranywa na za camps de concentration (voir NAZI) , kuko si ubwa mbere si n’ubwa nyuma FPR imenyereye kuragira abanyarwanda mu bwonko nk’amatungo ngaho ngo ni impuhwe ibagirira kandi hari andi matekinike ishaka gukorera kuri aba baturage ibasaruliraho! none se wasobanura ute ukuntu nka Leta ushinzwe abaturage usohora umuntu mu kazu ke ugashyiraho ingufuri na soudure ntaho ufite umwerekeza ako kanya! Ibiza biruta ibyo se ni ibihe ? aho kubimukiza birahumira ku murari bivuga ngo nta rupfu rwaruta urwo. Nguko!

Byanditswe ku wa 16/05/2018, na :
A.BEN NTUYENABO, KIGALI-RWANDA.

Rwanda:Leta ya FPR igiye gushyiraho umusoro mushyashya w’ubukode ku nzu zo guturamo, iz’ubucuruzi niz’inganda.

Mu gihe abanyarwanda batari bake binubira imisoro y’urudaca igamije kubacuza utwabo yinjizwa mu mifuka y’abagize Leta y’agatsiko ka FPR-INKOTANYI, kwambura ubutaka abaturage ari nako ibarandulira imyaka abandi nabo ngo ntibakwiye guhinga ibyo bishakiye mu mirima yabo bitajyanye na gahunda ya gouvernement ubundi ngo hagenewe ibikorwa-remezo ; ni muli urwo rwego kuwa 06/04/2018 mu mpera z’icyumweru gishize mu nteko nshingamategeko y’u Rwanda habereye impaka mu badepite bagize commission ya politike n’ubukungu ubwo bahabwaga ibisobanuro n’intumwa za gouvernement ku byerekeranye n’uwo mushinga zikaba zari zigizwe na Ministri Gatete w’igenamigambi atarahindurirwa imirimo, Richard Tumusabe w’ikigo k’igihugu gishinzwe imisoro n’amahöro bakaba barasobanuriye abadepite ko uwo mushinga mushya w’ubukode ku nzu zo guturamo, iz’ubucuruzi niz’inganda atari umwihariko w’u Rwanda ko ahubwo no mu bindi bihugu by’amahanga ubarizwayo kandi ko u Rwanda nk’igihugu gito ku isi ugereranije n’ibindi nta wundi mutungo w’ibanze rufite uretse ubutaka n’ibiwubarizwaho. Nguko!

Mu gusobanurirwa abadepite byagaragaye ko babigizeho impungenge ubwo babazaga Ministri Gatete niba bitazabera abaturage umugogo bikaba byabyara amakimbirane bati dore ko abaturage bananiwe no gutanga umusoro usanzwe w’ubutaka ? Ministri Gatete yasubije ko nubwo haba hari abaturage bigometse ku misoro isanzwe cyangwa bayibuze bitavanaho kuba hashyirwaho indi misoro hakurikijwe amategeko ! ati nta gihugu kidaca imisoro kandi nta n’ibyubusa bihari twese tugomba gosora ! ngaho rero !

Ministri Gatete yakomeje avuga ko uwo musoro mushya uzafata imugongo iterambere ry’igihugu harebwa cyane cyane umusoro ku mazu y’ubucuruzi afite agaciro kari hejuru ya Miliyoni 30 kuko azajya asoreshwa hafi 110/100% bivuga ko zizasoreshwa agaciro kayo havanywemo izo miliyoni 30. Ati naho inzu ziri munsi ya miliyoni 30 zikazajya zisoreshwa hakurikijwe agaciro k’inzu mu ibarura rizakorwa n’ikigo cy’igihugu gishinzwe ibarurishamibare.

Uwo mubonano ukaba warasubitswe mu gihe abadepite n’abahagaraliye guvernement bumvikanyeko umusoro ku nzu zo guturamo by’umwihariko uzabanza gushyirwa ku 0.5% ukazajya kuri 1% nyuma y’imyaka 4.

Banyarwanda rero muribonera ko ntacyo tutabwirwa ! jye ndabona ya mavuta y’inka Pahulo Kagame aherutse gucaho umugani avuga ko utayakandira mu kiganza ngo uyaherane abure aho anyura ari twebwe abanyarwanda yashakaga kwigirizaho nkana nubwo tutumvaga ibyo atubwira ahubwo tukamukomera amashyi twishimye ko twakiriye impanuro z’umubyeyi ! mbega akaga ! ngaho rero niduhaguruke dushake aho dupfumurira ha hagati y’intoke ze naho ubundi araduheranye, aratunize impande zose haba amajyaruguru amajyepfo iburasirazuba cg iburengerazuba.

Byanditswe ku wa 10/04/2018, na :
A.BEN NTUYENABO, KIGALI-RWANDA.

Rwanda : Toni 14 z’ibitabo bya QOR-AN z’Abayisilamu zigiye gutezwa cyamunara

FPR-Inkotanyi se yaba yatangiye gushyira mu bikorwa itegeko ryo kujya imulikirwa imvano y’imitungo n’impano z’amatolero n’amadini kandi ritaremezwa n’inteko imitwe yombi? byaba ari agahomamunwa !

Ni muli iyi minsi aho ikigo k’igihugu cy’imisoro n’amahôro gitangarije ko kigiye guteza cyamunara Tonnes 14 na kg 470 z’ibitabo bitagatifu bya kisilamu aribyo QOR-AN n’amacartons 1444 apima Tonnes 22 na kg 100 by’imbuto z’imizabibu bita ‘Itende’ abayisilamu bakunze kurya mu gisibo cya Ramadhan, bikaba bimaze hafi imyaka ibili mu bubiko bwa MAGERWA ( Magasins généraux du Rwanda ) aho byafatiriwe n’ikigo cy’imisoro n’amahôro (RRA). Cyamunara iteganijwe ku wa 28/01/2018.

Umuryango w’abayisilamu mu Rwanda ukaba uvuga ko nta bushobozi ufite wo kwishyura miliyoni 30 zose z’amanyarwanda usoreshwa nicyo kigo kuri uwo muzigo.

Nkuko tubikesha Sheikh Mbarushimana Suleyman akaba n’umujyanama wa Mufti w’u Rwanda yadutangarije ko ibyo bikoresho byose byari impano yatanzwe n’igihugu cya Arabie Saoudite ku bayisilamu bo mu Rwanda, ati ntibyumvikana kuba byishyuzwa umusoro kandi atari iby’ubucuruzi cyangwa iby’umuntu ku giti cye ahubwo ari ibintu birebana n’idini gusa ubusanzwe bidasora.

Sheikh Mbarushimana Suleyman akomeza avuga ko nubundi ibyo bitabo ari ibyabayisilamu gusa kuko aribo bigenewe ati naho iyo cyamunara yashyirwa mu bikorwa ntitwakwemera ko byandagara kuko mu bayisilamu igitabo cy’Imana tugiha agaciro gakwiye bityo bikazaba ngombwa ko ari twe tunabigura mu gihe ibiganiro twasabye na Leta kuri icyo kibazo bitagize icyo bigezeho.

Banyarwanda, bakristu, bayisilamu, kimwe na Bibiliya ku bakristu, QOR-AN nayo ni igitabo gitagatifu cyubahwa cyane n’abayisilamu n’abandi batari bo ku isi hose bityo kikaba kitari gikwiye gutezwa cyamunara kuko byaba ari igikorwa kidahesha Imana icyubahiro yo idakorera mu muvundo cyangwa muli ba Rusahuliramunduru nk’ikigo cy’imisoro n’amahôro cya Pahulo Kagame (RRA).

Bayisilamu nshuti z’Imana , ASSALAM ALAIKUM, nimuhaguruke muharanire uburenganzira bwanyu kuko igihe kirageze dore aho mwaherewe rimwe ngo mufatanije na wa mutwe w’iterabwoba Islamic state ubundi ngo nimuraswe ku manywa y’ihangu none ngo nibabasenyereho n’imisigiti ! (burya igitabo cy’amagambo y’ubutumwa bw’Imana nicyo musigiti cyangwa urusengero rwacu).

Byanditswe ku wa 12/01/2018, na :
A.BEN NTUYENABO, KIGALI-RWANDA.

Rwanda: General James Kabarebe arabiba ingengabitekerezo y’ubugome mu rubyiruko

Nyuma yo gutinya kwitaba convocation y’abacamanza b’abafransa ku ihanurwa ry’indege ya prezida Habyarimana Jenerali KABAREBE arimo guta ibitabapfu kubera ubwoba butagereranywa afite muli iki gihe aho uyu mujenerali w’ingabo za RDF ahora mu ndoto z’urugamba rwa 1994 we na Shebuja Giti mu jisho Pahulo Kagame nawe wibera mu kirere ashakisha aho asaza imigeri atareka akarenge karuhuka ngo arashakira imibereho abanyarwanda; bakaba bibwira ko techniques stratégiques bakoresheje mu kuvanaho ubutegetsi mu ntambara ya 1990 zikiri actives ndetse ko zarushijeho kunozwa kandi inka yarariwe kera hasigaye uruhu !

Mu biganiro yari amaze iminsi agirana n’urubyiruko rutandukanye rero, Jenerali Kabarebe yaruhamirizaga ko nta mubano namba bagifitanye n’igihugu cy’ubufransa ko ari umwanzi w’u Rwanda guhera cyane cyane mu mwaka wa 2006 ubwo umucamanza w’umufransa Jean Louis Bruguiѐre yashinjaga abayobozi b’u Rwanda nawe ku isonga mu kuba baragize uruhare mu ihanurwa ry’indege yari iya Prezida Habyarimana. Jenerali Kabarebe akomeza yemeza ko u Rwanda rutazigera rwiyunga n’ubufransa mu gihe Leta y’agatsiko avuga ko yahagaritse Jenoside ikiriho.

Banyarwanda kubera icyo gikorwa cy’ubwiyahuzi nanubu kikimukomanga, uyu mujenerali akaba yaratangarije rumwe muli izo ngaga z’urubyiruko rwari mu itorero ‘Urunana rw’urungano ‘ ko bidashoboka ngo u Rwanda ruzumvikane n’ubufransa kuko iteka buhora bushaka guhirika Leta y’u Rwanda ati rero ku bw’ibyo ntituzigera dukiranuka nabwo ! ati ibyo mubyibagirwe !

Banyarwanda rubyiruko rwacu, murabe maso iyi ngangabitekerezo y’ubugome mucengezwamo itazabaviramo kugera aho muzamarira ku icumu inshuti n’abavandimwe banyu nkuko Hitler yacengeje ingengabitekerezo y’ubugome mu rubyiruko abyita Patriotisme kugera aho batsembeye abayahudi batabarika.

Général Kabarebe yaniraririye kuri urwo rubyiruko ko abo bacamanza b’ubufransa ntacyo bakora ku Rwanda ko ari abantu basanzwe nk’abandi bose uretse gushaka gusa gukomeza gutesha u Rwanda umutwe. Ati umufransa twakubitiye i Byumba tukamutsimbura ku rutare rwa Ndaba tumwambura n’imbunda yari afite murumva iryo pfunwe yarishira kandi nta wundi numwe uramunesha muli Afrika ! ati twamunesheje tukiri mu ishyamba ubu rero ntaho yakora, ntiyaza ngo arwane aho yaba aturutse hose.

Banyarwanda burya akagabo gahimba akandi kataraza ! uyu mujenerali yabaye umugabo ntiyahagaze imbere ya bariya bacamanza aho guhitamo gukomeza kumokera mu gikari nk’imbwa ishaje? niyemere rero ashikame kuko urwishigishiye arusoma! kugeza igihe uru rubanza hagati ya Leta y’agatsiko ka FPR n’ubufransa ruzaciribwa uretse ko ari uruca-bana kandi byange bitinde amaherezo y’inzira ni munzu.

Byanditswe ku wa 21/12/2017, na :
A.BEN NTUYENABO, KIGALI-RWANDA.

Rwanda: Pahulo Kagame nacecekeshe n’abayobozi bahora bamuramya ngo « kuri Paul Kagame imvugo niyo ngiro ».

Uretse guha gasopo abayobozi be kutazongera gukoresha imvugo ngo barishimira ko amahanga akomeje kugira ibyo yigira ku Rwanda ; Pahulo Kagame yarakwiriye no kubategeka kutongera gukoresha imvugo ngo ˂˂ Kuri Paul Kagame imvugo niyo ngiro !˃˃, kuko azi neza ko ataribyo ahubwo ari ukubeshya abanyarwanda.

Ni muli congrѐs y’iminsi itatu y’umuryango FPR-INKOTANYI yari iteraniye ku cyicaro cy’umuryango i Rusororo mu Karere ka Gasabo, imbere y’abakada bagera ku bihumbi 2000 barimo abayobozi bakuru b’igihugu bose, abahagaraliye amwe mu mashyaka ya politiki y’ibihugu duturanye na bamwe mu bayobozi b’imitwe ya politiki mu gihugu cyacu yaherekeje Pahulo Kagame mu matora yo muli Kanama 2017; aho Pahulo Kagame yongeye gutorerwa CHAIRMAN w‘agatsiko kagizwe n’umuryango wa FPR-INKOTANYI mu gihe kiri imbere.

Muli iyo Kongre Pahulo Kagame akaba yararanzwe no gukemura abambari be abihanangiriza kutazongera gukoresha imvugo igira iti : ‘abanyamahanga bashishikajwe no kuza kwigira ku Rwanda imiyoborere n’iterambere byarwo’ nubwo bwose yigira nyoni nyinshi kandi ariwe wari warayibabibyemo none akaba abataye mu nama. Yakomeje yibaza nawe ubwe ati ese ubu dufite iki turatira abanyamahanga ku buryo baza kutwigiraho ? Ati hari byinshi byo gukemura bihari.

Muri kwa kwihagararaho no kwishongora asanganywe, Pahulo Kagame yavuze no ku basebya u Rwanda barimo abayobozi batahurwa bariye ibya rubanda bagatangira gusebanya bavuga ko mu Rwanda nta bwinyagambuliro buhari bakagera naho bamwe batangira kwikorera amakarto hanze iyo abandi nabo bikabaviramo gucumbikirwa muli za prisons hano. Yakomoje no kubyo avuga ko bituruka hanze bigamije guhungabanya umutekano w’igihugu ati ndabamenyesha ko ‘nda ndambara yandera ubwoba iturutse hanze’ ! akomeza ashimangira ko gutera u Rwanda uturutse hanze bidashoboka ati ntaho bamenera turamutse dushyize hamwe kandi tukubahana ati keretse iturutse mu gihugu imbere muli mwebwe byo ndemeza ko bishoboka ! nimwiyumvire namwe !

Pahulo Kagame akaba avuga ko aho bizaba ngombwa gufata ibyemezo bikomeye azabifata no guhangana n’ingaruka zabyo nkuko atabitinye na mbere hose !

Banyarwanda ngaho rero murarye muri menge ! Ko ihanurwa ry’indege ya Habyarimana yatumye horekwa imbaga y’abanyarwanda ibindi byemezo uyu mugabo aduteganiriza ni ibiki ? murabe maso nyabuneka ! aliko Imana irebera imbwa ntihumbya ! ntawe bitagaragalira ko uyu mugabo akomeje gusaza imigeri aho atabona neza ibihe yinjiyemo uko bimeze ntazi ko na nyina wundi abyara umuhungu! arakomeza gufungira abanyarwanda ubusa, kubica, kubaheza ishyanga n’ibindi ….. ngo kuri Paul Kagame na FPR imvugo niyo ngiro ! u Rwanda ngo ni ubudasa, akataraboneka kuko ngo bose bumva ibintu kimwe ! ko u Rwanda rutabagaho RPF itaraza! Banyarwanda nta gahora gahanze.

Byanditswe ku wa 17/12/2017, na :
A.BEN NTUYENABO, KIGALI-RWANDA.

Gakondo k’Iwacu

Iriburiro

Ikibazo cyashegeshe Igihugu cyacu n’Abagituye ni ukutamenya iwabo n’ababo. Uko umuco wa Kinyarwanda wagiye usobekerana n’indi mico, Abenegihugu bagiye bamira bunguri iby’imahanga bakirengagiza iby’iwabo, kumenya iwabo n’ababo ndetse no kumenyana ; ngo basangire basabane, byabaye ibango ryo gutatira igihango cya Gakondo ; biteye agahinda kamwe k’Umukubabibero !

Muri iyi nyandiko twise »Gakondo k’Iwacu tuzajya twibanda cyane ku Ndangagaciro z’Inkomoko ya buri bwoko zigenda zikendera ; zigateshwa agaciro cyangwa zigasimbuzwa nkana iz’ahandi aka ka gahararo gaca imbata

Tugiye kwibanda cyane cyane kuli Gakondo y’ahantu dutuye n’uko hahoze ari ibihugu byigenga. Muhawe rero ikaze ngo mutange ibitekerezo by’uko twasigasira Indagagaciro z’umuco wacu n’uko twakwagura amarembo tukakira n’iby’ahandi ariko byiza, atari ibibonetse byose.

Indangamuntu yacu nyayo ihera ku isoko, hariya kure cyane « Ibuvamuntu », ni ko kumenya neza uwo uri we, iyo uva ari byo biguha iyo ujya n’abo ubana nabo n’ibyo utunze ku mutima bifite isoko yabyo mu nkomoko y’Inyabutatu yateshejwe Ubusugi itaratera kabiri, umukokwe ibyaye ukaza kwokama abumva ko bakora Politike ; batabanje gucengera iremo ryayo, ngo bayitamire, bayishyire mu ijigo bayumve amajya n’amaza, ahubwo bagashimikira bashaka ishema ryabo bwite aho gushaka iry’Abanyarwanda muri rusange, ngo u Rwanda rube ruzima.

Abazima n’abazimu basabane mu Muterekero w’Indengakamere.

None wowe uzi gusoma niyo waba utabizi usomeshe ; Sesengura, maze imyumvire mizima igiye kugutaha ku mutima nawe uyituze mu mitima y’abo muturanye n’abo mu mpugu zindi kugira ngo ibe Gisaga ; isage u Rwanda rwose, ruzuke, ruzure umugara rufite Umugambi wo KUNGANA kw’Abanyarwanda, mu Rwanda ruzima rutamba IBITAMBAMBUGA, Ibikwerere n’Abakambwe bakdandagira ; u Rwanda rwimika MUNTUNKUNDI ndetse rugashyiraho n’akarusho ka MUNTUNDUNDI.

Gakondo

Iyo wumvise ijambo Gakondo, uhita utekereza Gukonda, igikoresho kikaba Inkonzo kuko umuntu yumva ko nyirumurimo ari mu ishyamba ry’inzitane. Nyirugukonda akaba Umukonde naho aho akonze hakaba Gakondo, bivuga ko aho hantu ari ahe ; akazaharaga abamukomokaho uko iminsi igenda iha indi.

Abakonde rero ni Abahinzi akaba ari nayo mpamvu bimitse Isuka yaje kwimura Inkonzo, Ubucuzi bumaze kuvumburwa n’Abahinzi.

Buri muntu yaba afite Gakondo ke kuko ari umuntu akagakomora ku Bukonde bw’abo akomokaho aribo Bakurambere be.

Reka tube duhujwe n’uru rurimi, ndaba ndetse kuruvuga izina kuko muri icyo gihe izina ryarwo rishobora kuba atari iryo rufite ubu.

Gakondo rero yagiye yaguka ndetse n’Abakonde bagenda biyongera. Uko bagenda bororoka baje guhuza Izina ni uko baritwa. Rigashobora gukomoka ku Mukurambere wabo cyangwa ku yindi sano bumva ko bahuje.

Uko bagenda bagura Ubwatsi bwabo baza kubugira Igihugu, barema Imihango ibaha Umwami uvuka mu Bwoko bwabo.

Muri iyo nzira rero yo gushaka kumenya abo turi bo, iyo tuva ari byo bizaduha kumenya iyo tujya, ndashingira ku gitabo cya Padiri Muzungu Bernardin cyitwa : »Histoire du Rwanda pré-colonial », ugenekereje mu kinyarwanda ukaba wavuga » Amateka y’u Rwanda mbere y’umwaduko w’abazungu ». Muri icyo gitabo cyasohotse mu mwaka wi 2003 (édition L’Harmattan), umwanditsi agaragaza imiterere yarangaga Ibihugu by’icyo gihe n’ibisanira abantu bafitanye ashingiye cyane cyane ku moko, akivugwa na n’ubu.

Amoko

Abenengwe, Abasinga, Ababanda, Abongera,Abungura,Abazigaba, Abagesera, Abagara.

Uretse rero Padiri Muzungu Bernardin reka turebe ko hari n’abandi bashakashatsi banyuze inzira nk’iya Padiri Muzungu ariko ku buryo bwabo.

Padiri Kagame Alexis mu gitabo cye yise »Les organisations socio-familiales de l’ancien Rwanda » cyasohokeye i Bruxelles muri 1954) dusangamo amoko 15 ari yo aya:

Abega, Abasindi, Abakono, Abaha, Abagesera, Abazigaba, Abasinga, Abashambo, Abahondogo, Abacyaba, Ababanda, Abenengwe, Abongera, Abungura, Abasita.

Umwanditsi witwa d’Hertefelt we mu gitabo cye cyitwa : »Les clans du Rwanda ancien.Eléments d’ethnosociologie et d’ethnohistoire, Musée de Tervuren, 1971. » aragenda akagera ku moko cumi n’umunani ari yo : Ababanda, Abacyaba, Abega, Abenengwe, Abagesera, Abaha, Abakono, Abanyakarama, Abanyiginya, Abongera, Abashambo, Abashingo, Abasindi, Abasinga, Abasita, Abatsobe, Abungura, Abungura.

Reka rero turebe Amoko y’Abasangwabutaka ari nabo Bakonde aba banditsi uko ari batatu bahurizaho.

Amoko arindwi bahurizaho ni aya :

Abenengwe, Abasinga, Ababanda, Abongera, Abazigaba, Abagesera, Abacyaba.

Ndabona rero Amoko arindwi ariko Abagara Muzungu yita ubwoko nkaba numva ari inyito bakomora kuri Gakondo kabo ari yo Bugara, bakaba rero ari Abacyaba b’Abagara.

Mbaye mpagarariye kuri aya moko arindwi kugira ngo ndebe niba aza kugusha ku Bihugu Gakondo byayo.

Evariste Nsabimana

Musome inyandiko yose hano (impapuro 10) : Gakondo ndende

Rwanda : ministri Louise Mushikiwabo yariye iminwa

Banyarwanda, kuki Leta y’agatsiko ka FPR niba ifite ibimenyetso bifatika itajyana ubufransa mu nkiko aho guhora ibwejagura ngo nibwemere uruhare rwabwo muli Jenoside ?

Ngarutse ku kiganiro aherutse kugirana n’icyitwa ‘Internationales ’; Ministri w’ububanyi n’amahanga w’u Rwanda Mme Louise Mushikiwabo yariye iminwa aka ya ndirimbo ngo igifransa kirakamye !, akaba akomeje guhesha isura mbi igihugu cyacu akoreshejwe ibinyoma aho yumvikanishaga ibisobanuro non-values mubyo yabazwaga naba Internationales.

Uretse amagambo ye y’ubwibone no kwishongora nkuko abisanganywe atangaza ko ubufransa buyobowe na Emmanuel MACRON avuga ko atazi neza amateka yabaye mu Rwanda atanagizemo uruhare mu gihe cya Jenoside yo muli Mata 1994 akwiye kwemera kwikorera umutwaro w’iyo Jenoside kubera uruhare igihugu cye cyayigizemo.

Uyu mu ministri wacanganyikiwe kubera ibibazo by’uruhuri u Rwanda rufite muli iki gihe akomeza avuga ko kuva Prezida MACRON yatangira kuyobora ubufransa nta kimenyetso aragaragaza ko igihugu cye gishobora kuzemera uruhare cyagize muli Jenoside yabaye mu Rwanda 1994 nkuko SARKOZY yasimbuye yari yagerageje kwemera uburangare n’ubuhumyi bya Leta y’ubufransa muli icyo gihe akanabisabira imbabazi nubwo uyu Mushikiwabo avuga ko zidahagije.

Ministri Mushikiwabo akomeza yemeza ko abona inzira y’umubano w’ubufransa n’u Rwanda ikiri ndende ati nubwo muli gouvernement ya Macron cyangwa mu nkoramutima ze ntawurimo wagize uruhare muli Jenoside aliko ntibivanaho kuba afite mu buyobozi bwe umugaba mukuru François LECOINTRE wari umwe mu bakingiye ikibaba interahamwe mu gutuma zihungira mu cyahoze ari Zaïre (voir Opération Turquoise).

Banyarwanda, muriyumvira namwe ! tuzakomeza muri ibi kugeza ryari koko ? ko ibyabaye byabaye…. kwemera kw’abafransa k’uruhare rwabo muli Jenoside y’abanyarwanda bizatumalira iki nubwo bwose bigaragara ko budashobora kubyemera ? ndabona ahubwo ari Mushikiwabo na Leta avugira bakomeza kuturangaza ngo tudakomeza gutera ijisho ku ma rapports ashinja iyi Leta iyicarubozo ku banyarwanda batavugarumwe nayo n’abandi bose baharanira démocratie y’igihugu cyacu banyuruzwa umunsi n’ijoro, kwigabiza iby’abandi, kugira abenegihugu impunzi, kurundira abantu muli za Gereza reba abayobozi b’amashyaka dont celle du FDU-INKINGI Mme Victoire Ingabire Umuhoza n’abarwanashyaka be batari bake, Déo Mushayidi wa PDP IMANZI n’abandi banyepolitiki bazira ibitekerezo byabo.

MUSHIKIWABO rero va ku giti dore ku muntu, ureke gukomeza guhishira intandaro y’ibyago byose iki gihugu cyacu cyaroshywemo na Leta y’agatsiko uvugira igihe ya ndege yahanurwaga. Kuvuga indimi ebyiri byawe rero ntibivanaho kuzana démocratie ibereye abanyarwanda bose.

Byanditswe kuwa 01/11/2017, na :
A.BEN NTUYENABO, KIGALI-RWANDA.

Rwanda: Padiri Obald Rugirangoga ni intagondwa arangwa n’ingengabitekerezo

Ni muli iyi minsi ishize aho uyu mupadiri ubusanzwe ubarizwa muli Diocese ya Cyangugu aherutse gutanga ubutumwa bugira buti ‘’haracyari abahutu benshi barimo n’abapadiri bagihumeka Parmehutu !’’. Abakristu bumvise ayo magambo bahise bagwa mu kantu ! bati ese ko padiri adusubije irudubi ashaka kuzura akaboze !

Padiri Obald Rugirangoga wari umaze kwamamara mu rwa Gasabo no hanze yarwo kubera amasengesho ye agera mu mitima ya bamwe mu bakristu bagashobora kumva bakijijwe indwara cyangwa ubumuga bwababayeho akarande atangiye gutandukira agaragaza ibitekerezo nkibya Jean NDORIMANA wahoze ari umupadiri muli kiliziya gatolika akaza kugirana ibibazo nayo akaba yaraherutse gutangariza Jeune afrique ko hari abihayimana bagize uruhare muli Jenoside yakorewe abatutsi kugeza na nubu bitasigiye isomo ko na nyuma yayo bakomeje kugaragaza ingengabitekerezo yayo aliko ntibahanwe kubera bamwe mu bepiskopi n’abapadiri bakibakingira ikibaba bitewe n’inyandiko bigeze gusinya mu mwaka wa 1998 bahamya ko mu Rwanda habayeho isubiranamo ry’amoko bise double Génocide ! Ndorimana Jean akaba yarasabaga ubuyobozi bwa kiliziya gatolika mu Rwanda by’umwihariko gusaba imbabazi butitaye kuri Vatican. Nguko !

Padiri Obald we akomeza avuga ko abatutsi benshi bahahamuwe na Parmehutu ku buryo batinya kugira icyo bavuga ku kibazo cy’amoko mu gihe abahutu bamwe bakiyibonamo bityo bigatera ubwoba budashira abatutsi noneho ugasanga bivangavanze kandi hagombye kubaho abantu bari free imbere y’Imana. iyumvire nawe !

Niyo mpamvu nsanga Padiri Obald nawe mu kwijandika muli politiki bishobora kuba byarivanze mu mutwe bitewe n’amateka yakuriyemo akagira nayo atozwa na FPR ifite ibyo ikurikiye kuko mpamya ko uretse bamwe mu bacurabwenge ba FPR bo hambere barimo ba Sénateurs Tite Rutaremara, Mugesera Antoine nta rungano muli iki gihe rwagusobanulira icyo aricyo iyo parmehutu yigisha !

Banyarwanda, none se umupadiri uvuga ko akorera Imana n’abakristu kuki yagombye kwita bagenzi be abaparmehutu ? nsanga agomba kumenya mbere ya byose ko yaba abahutu cyangwa abatutsi harimo intagondwa, umenya atanazi ko naba Lunari bagihari babandi bagifataho umuhutu nk’inzigo kandi ari ikidashoboka. None se Obald arabona aho ibintu bigana bamwe bavumira Kagame ku gahera kubera ubwicanyi amaze gukorera abanyarwanda , abandi nabo bati interahamwe z’abahutu zatumazeho abantu………wabifata ute ?

Padi ! ubumwe n’ubwiyunge ni ku munwa! biracyari kure nk’ukwezi ku ngoma y’umwicanyi Kagame! nakugira inama yo gukomeza umurimo mwiza w’Imana wo gusengera abaremerewe kugirango ahari umwijima hahinduke umucyo.

Byanditswe ku 16/09/2017, na :
A.BEN NTUYENABO, KIGALI-RWANDA.

Kigali/Rwanda : Amatora ararangiye, n’agahenge karangiye, none P. Kagame ati : mukure umwanda w’abazunguzayi mu mugi

Ni kuri uyu wa gatatu taliki ya 23/08/2017 habaye ikiganiro n’itangazamakuru gihuje abayobozi 300 bo mu nzego zinyuranye harimo abayobozi bashinzwe umutekano urwego rwa police n’ingabo, abo mu buyobozi bw’ibanze n’umujyi wa Kigali aho biyemeje gukora ibisa n’ihohotera rivanze n’ivangura baca burundu abazunguzajyi mu mugi wa Kigali.

Bwana Nyamurinda Pascal umuyobozi w’umugi wa Kigali akaba yaratangaje ko kudakoresha ingufu ku bazunguzajyi n’ababagulira bituma batubahiriza amategeko yashyizweho kuva 2015 bikagaragazwa n’imyitwarire idahwitse yabo bityo umujyi wacu ubusanzwe uzwiho kurangwa n’isuku n’umutekano ukahononokera bitewe nabo.

Bwana Nyamurinda akaba yakomeje yemeza ko kimwe mu byaranze iyi minsi hagaragaye akajagari gakabije kugeza aho abo bazunguzajyi bari basigaye batumva ibyo tubabwira bagahitamo guhangana n’inzego z’ubuyobozi niz’umutekano, ibyo ntitugomba kubirebera ariyo mpamvu bigomba guhagarara burundu. Ati iyo akajagari nka kariya kagenda gakura turamutse tubijenjekeye kazavamo ibindi bibazo by’umutekano amazi yararenze inkombe.

Umuyobozi w’umugi wa Kigali yakomeje atangaza ko izo ngamba zigiye guhita zishyirwa mu bikorwa guhera uyu munsi aho abazunguzajyi bose bagiye gufatwa bagasubizwa kw’ivuko ryabo ati ntitwishingiye abica amategeko kubera ko bahisemo nabi baza kuzerera mu mujyi kandi ntacyo bafite bahakorera.

ACP BADEGE Theos umuvugizi wa police y’igihugu wari witabiriye icyo kiganiro yatangaje ko guhera ubu police y’igihugu igiye gushyira mu bikorwa icyo cyemezo ihashya burundu umuco mubi wari utangiye kwaduka wo gusuzugura inzego z’umutekano ati tugiye kwongera ingufu mu muhanda kuko dufite ibikoresho n’abapolisi bahagije kuruta DASSO.

Kubona Leta y’u Rwanda guhita ikoresha imbaraga za gisirikare cyangwa za police ngo irereka amahanga ko byose ari Smart nsanga atari igisubizo kirambye hagombye kubanza kubaho ubwenge n’ubushishozi hamenyekana impamvu nyayo abo bantu bahunga kw’ivuko ryabo bakaza kwirunda mu mugi noneho hagafatwa umwanzuro nyawo hatirengagijwe imibereho mibi bashobora kuba babayeho iyo kw’ivuko naho ubundi bitagenze bityo hazabaho ibisikana ry’imodoka zibacyura from Kigali nizindi zibatunda zibakuye mu cyaro basubira kuwuzunguzamo nubwo bwose Nyamurinda atekereza ko uzajya agaruka bazajya bamusubizayo kugeza ubwo arambiwe kuwugarukamo.

Tubibutse ko muli abo bazunguzajyi bavugwa higanjemo cyane n’abana b’abakobwa bahetse impinja birirwa basabiriza mu mugi.

Bamwe mu basesenguzi barabona ari ubundi buryo bwo guhohotera ikiremwa-muntu mu rwego rw’ivangura no gutera abaturage ubwoba aho kubutera umwanzi ! bityo uwavuze ati ‘‘ubwo amatora ya Kagame arangiye n’agahenge kararangiye’’ ntiyabeshye pe!

Byanditswe kuwa 24/08/2017, na:
A.BEN NTUYENABO, KIGALI-RWANDA.

Rwanda : Umuryango wa Cpt J.C. Ntirugiribambe urasaba LONI ibisobanuro kw’ishimutwa ry’uyu musilikari

Ni nyuma y’imyaka ibili yose uhereye muli 2015 uyu musilikare Cpt Ntirugiribambe aburiwe irengero aho yari atuye I Nairobi muli Kenya abana n’uwitwa Sgt Emile Gafirita nawe washimuswe n’abantu bataramenyekana mu gihe yiteguraga kujya gutanga ubuhamya ku bacamanza b’abafransa ku byerekeye umuntu wahanuye indege yarimo Prezida Habyarimana na Ntaryamira w’u Burundi.

Uyu sgt Emile Gafirita bikaba byaravuzwe kenshi ko yaba yarashimuswe akanicwa na DMI ya Kagame aliko kugenza magingo aya nta kanunu kiyo dossier.

Kimwe rero n’uyu Cpt Ntirugiribambe, uyu musilikare wahoze muli EX-FAR akaba yari azwiho ubuhanga dore ko yari yaragiriwe ikizere n’umuryango w’abibumbye (ONU) mu gihe abandi bakoranye nawe muli EX-FAR barimo bahigishwa uruhindu, uyu musirikare w’umupentecosti akaba yaranafite ubunararibonye mu byerekeye Military analyst intelligence n’impamyabushobozi mu bya gisirikare -United States Army Commander- yari yarakuye muli USA (Arkansas).

Byongeye uyu musirikare akaba yaranagaragaye cyane mu kwita ku mpunzi z’abanyarwanda bari barahungiye muli Congo aho yageragezaga kuzikiza mu gihe ingabo z’inkotanyi zazihigishaga uruhindu, bikaba byaratumye zimwe zirokoka amasasu ya APR-Kagame mu mashyamba ya Congo nubwo bwose zananiwe gutaha kubera umutekano wazo.

Leta y’agatsiko ikaba yaragiye imutumaho kenshi ngo agaruke mu gihugu bakorane aliko ayibera ibamba arayihakanira . Ntibyarangiriye aho kuko umuryango mpuzamahanga ONU umaze kubona ukuntu yagerageje kwitangira impunzi wahise umugirira ikizere umwohereza kuwuhagaralira mu Rukiko mpanabyaha ku Rwanda rukorera I Arusha nk’umushakashatsi ku ruhande rw’abashinjwaga ibyaha bya Jenoside ku buryo yabaye mu manza zitandukanye atanga n’ubuhamya ku basirikare batari bake baburanijwe n’urwo Rukiko ari nako agira uruhare mu gutuma bamwe muri bo bakurikiranwagaho ibyaha bya Jenoside barekurwa abandi bagahabwa ibihano kubera ibyaha bashinjwaga.

Nyuma y’imyaka 2 rero uwo muryango we uri kumwe n’umwunganizi wawo mu mategeko ukaba usaba ibisobanuro TPIR n’umuryango mpuzamahanga ONU ku irigiswa ry’uyu muvandimwe wabo kuko aribo yari abereye umukozi.

Hakurikijwe ubusabe bw’uyu muryango Icyumba cy’urukiko MICT cyasigiwe ububasha na TPIR yacyuye igihe gitangaza ko ikifuzo cy’umuryango wa Cpt Ntirugiribambe cyakiriwe kandi ko hari amategeko y’urukiko agenderwaho mu gukingira abantu nkaba. Cpt Ntirugiribambe yaburiwe irengero mu gihe nanone umuryango mpuzamahanga wa ONU wari umaze kumuhindulira imirimo ugiye kumwohereza kuwuhagaralira mu gihugu cy’u Burundi.

Hagati aho umushinjacyaha John Philpot wahoze aburanira bamwe mu bashinjwa ibyaha bya Jenoside muli TPIR akaba avuga ko amakuru afite kuri Cpt Ntirugiribambe ashobora kuba akiriho ariko akaba yarakorewe iyicarubozo yaranavunaguwe amagufwa. !Nguko Tubitege amaso!

Banyarwanda banyarwandakazi biragaragara ko ntawe uyoberwa umwiciye, uhereye kuri ubu buhamya bw’uyu mushinjacyaha John Philpot wemeza ko akiriho aliko akaba ngo yarakorewe iyicarubozo byongeye akaba yarabanaga nuriya witwa Sgt Emile Gafirita washimutiwe iwe agahita anicwa mu gihe yagombaga gutanga ubuhamya ku bacamanza b’abafransa ku byerekeye umuntu wahanuye indege ya Prezida Habyarimana ntawashidikanya ko izo cases zose zari manipulated by RPF-INKOTANYI kimwe n’abandi benshi bagiye bashimutwa cyangwa bakicwa muli ubwo buryo! Twabibutsa nka Minister Seth Sendashonga wishwe kuya 16/05/1998 ! icyo gihe Kenya yacanye umubano n’u Rwanda; hari kandi Col. Patrick Karegeya wishwe kuya 12/01/2014 aho umwicanyi we ariwe Paul Kagame yabyigambye mu giterane cy’amasengesho asoza umwaka muli Serena Hôtel ya Kigali ahari hateraniye abayobozi bakuru b’igihugu , aho muri icyo giterane Prezida Kagame abajijwe impamvu ibitangazamakuru byo hanze bikomeje gushinja ubuyobozi bw’u Rwanda ubwo bwicanyi, yasubije ubwe ko nundi nkawe adakwiye kureberwa ! nguko ! ni ishyano pe !…….ngabo ba Col. Lizinde Théoneste, CEO Turatsinze wayoboraga BRD tutibagiwe na Général Kayumba Nyamwasa wageragejwe kwicwa inshuro 3 zose muli South Africa aliko Imana igakinga akaboko. Yewe ntawabarondora!

Banyarwanda banyarwandakazi rero , mbona ari ngombwa cyane kujya duhora twibukiranya amabi yose yakozwe kandi agikomeza gukorwa n’iyi ngoma-mpotozi ya FPR-KAGAME kugeza magingo aya nkuko nayo iba iticaye ubusa muguhora ishaka amayeri yose yo gusibanganya ibimenyetso. Mugire amahoro.

Byanditswe ku wa 11/08/2017, na:
A.BEN NTUYENABO, KIGALI-RWANDA.