Archives de l’auteur : Amakuru ki ?

Rwanda: Abaturage  bararira  ayo  kwarika  kubera  imisanzu  bakwa na FPR  muri  ibi  bihe  bya  campain.

KwiyamamzaKubera  ikimwaro  n’isoni  byateye  Leta  y’agatsiko  ka  FPR  kandi  yari  yarijeje  abanyarwanda  ko  gahunda  zose  zijyanye  n’amatora  y’umukuru  w’igihugu  zarangije  gutunganywa  none  abenshi  mu  bayobozi  b’inzego  zibanze  bakaba  baraboneyeho  icyuho  cyo  gusakabaka  abaturage  utwabo  bitwaje  ngo  barashaka  inkunga  yo  gushyigikira  umukandida  wa  RPF-INKOTANYI  Paul  Kagame;  ni  muli  urwo  rwego  Bwana  Francis  Kaboneka  Ministri  w’ubutegetsi  bw’igihugu  mu  kiganiro  yagiranye  na  ba  gouverneurs  b’intara,  uturere  n’umujyi  wa  Kigali  yavuze  ko  abayobozi  bose  batse  amafranga  abaturage  bababeshya  ko  ari  ayo  gutera  inkunga  amatora  y’umukandida  wa  RPF  ku mwanya  w’umukuru  w’igihugu  bagiye  kubibazwa.

Banyarwanda  banyarwandakazi,  ubu  se  tuvuge  yuko  Ministri  Kaboneka  uretse  kwirengagiza  hari  umunyarwanda  numwe  uyobewe  ko  ayo  mabwiriza  yo  kwaka  imisanzu  yacuriwe  muli  cabinet  yiwe   n’abandi  bafatanije  barimo  NEC(Commission  y’igihugu  y’amatora) !  none  abonye  abaturage  bavugije  induru  ati  abayobozi  babigizemo  uruhare  ni bakurikiranywe ! ubonye  iyo  avuga  ati  mwamennye  ibanga  mwishyira  ku  karubanda !  gusa   nyiri  umutwe  munini  ntarengwa   n’imijugujugu !

Banyarwanda  banyarwandakazi,  uku  kunyunyuza  imitsi  ya  benengofero  batagira  kivugira  ni  imwe  mu  ngeso  zadukanywe  na  Leta  y’agatsiko  ka  FPR  kuva  kafata  ubutegetsi  hashize  imyaka  23 !  ku  buryo  abanyarwanda  ni  kwa  kundi  kwabo  bapfira  muli  Nyagasani  bagatangira  guhwihwisa   ibibazo  byageze   iwa Ndabaga !  ariyo  mpamvu  kuva  kera  na  kare  bemye  bazi  kwikiriza  neza  intero  y’abayobozi.  Ubu  se  iyo  uyu  mwambari  Kaboneka  atabikomozaho  ko  nta  numwe  wari  waratatse  n’igihe  twabivugiye ? ahubwo  ko  wasangaga  inyikirizo  ari  ya  yindi  ngo   ‘’niwe…..niwe….niwe….’’!   ahaaaa…  ni  ukuvuga  ko  bari  bukomeze  kubishegesherezwa  mu  mitima  yabo  aribyo  akenshi  igihugu  cyacu  cyakunze  kuzira  uretse  nubundi  ko  ari  hahandi !!  aliko  abaturage  babika  umubabaro  mu  mitima  bagashinjagira  bashira  nyuma  babona  umwanya  ibibarimo  bigaturika  nk’igisasu.

Banyarwanda  banyarwandakazi,  ubu  se  Ministri  Kaboneka  arabikoraho  iki  ko  kugeza  kuri  uyu  munota  nandika  bikomeje  gukorwa  aho  abambari  b’agatsiko  babyukana  uturumbeti  buri  gitondo  bahamagalira  abaturage  kugera  bwangu  aho  za  Bus  ziba  zitegereje  kujya  kwamamaza  umukandida  wa  RPF  kandi  ubwo  baba  baraye  banyuze  mu  ngo  zose  baka  iyo  misanzu   ku  buryo  mu  karere  ka  Gasabo  abaturage  batagihumeka.

Bamwe  mu  baturage  bashoboye  kutugezaho  ubuhamya  bwabo  bibaza  impamvu  bakwa  amafranga  buri  kwezi  y’umuryango  wa  RPF  bakongeraho  nayo  gushyigikira  umukandida  wa  RPF  ntibabone  nibura  naga  T-SHIRT  ka  5000frw  mu  gihe  cya  campain !  bakomeje  bansaba  gutambutsa  ubu  butumwa  basaba  RPF  kudakomeza  kubiba  umunabi  mu  banyarwanda,  nguko  nguko.

Si  ibyo  gusa  kuko  nakomeje  kubona  n’ubundi  butumwa  buturutse  impande  zose;  hari  NDIMUBANDI  Emmanuel  wo  mu  Karere  ka  Gatsibo  uhamya  ko  buri  rugo  bagiye  barwaka  ibihumbi  bibili  byo  gushyigikira  RPF-INKOTANYI.

NYIRANDIKUMANA   Thérésie  ukora  mu  bitaro  bya  Murunda  akarere  ka  Rutsiro   nawe  yantangarije  ko  we  n’abandi  bakozi  bose  bo mu  bigo  by’ubuvuzi  bagiye  bacibwa  ibihumbi  30.000frw  abandi  20.000frw  abandi  10.000frw  kuri  buri  wese  ati  aliko  icyadushegeshe  kikadutera  n’urujijo  ni  ukuntu  nyuma  yuko  Ministri  Kaboneka  avuze  ko  gucibwa  amafranga  yo  gushyigikira  umukandida  wa  RPF  bitemewe  aribwo  twazindukiye  mu  nama  ku  bitaro  bya  Murunda  iyobowe  na  Dr.  NIRINGIYIMANA  Eugène (Médecin  directeur  w’akarere  k’ubuvuzi)  atumenyesha  ko  yatumwe   n’abayobozi  bakuru  ba  RPF  ko  twatanze  amafranga  makeya  ko  ahubwo  dusabwa   byihutirwa  gutanga  andi   1/3   cy’umushahara   duhembwa !  ibyo  byose  twarabyubahirije  kuko  ntawe  uburana  n’umuhamba !  ati  ayo  mafranga  yose  yashyizwe  kuri  compte  ya  BPR/AMATORA /RPF-RUTSIRO  № 515421727110168.  Uwo  mubyeyi  yakomeje  agira  ati  mudufashe  rwose  umuryango  wa  RPF    udusize  iheruheru  twitwa  ngo  turakora,  amadeni  aratwishe  nta  handi  twakura  !

Abandi  ni  abarimu  bo  mu  Karere  ka  Ngororero  barangije  mu  itorero  ry’igihugu  riyobowe  na wa  mumotsi  Rucagu  Boniface ,  ibyabo  bikaba  bisa  n’ikinamico!  Bavuga  ko  bakimara  gusinyishwa  ibyo  barangije  gukora  bavuye  mu  itorero  buri  mwarimu  wese  avanwaho  1/30  cy’umushahara  kuzageza  igihe  kitazwi  guhera  mu  kwezi  kwa  1/2017,  bati  none  no  guhera  mu  kwa  3/2017  abayobozi  b’ibigo  bazana  listes  tugasinyira  andi  1/30  nanone  yo  bakaba  bayakira  mu  ntoki  batubwira  ko  ari  umusanzu  wo  gushyigikira  amatora  y’umukuru  w’igihugu;  abo  barimu  bakaba  batakambira  Bwana  Kagame  ngo  nagerayo  azibuke  mwarimu !  bati  bayobozi  ko namwe  mugeze  aho  mugeze  kubera  kunyura  imbere  ya  mwarimu,  kubera  iki  mworoherwa  aho  kwibuka  mwarimu  ahubwo  mukamwambura  nutwo  afite ?  twasaba  ko  muduhemba  muti  abarimu  muri  benshi  !!!  ubu  koko  tuzabigenze  dute ?

Ahandi  twashoboye  kugera  naho  ni  mu  Murenge  wa  Cyumba  i  Gatuna  ku  mupaka  uduhuza  na  Ouganda  aho  chairman  wa  RPF  yaka  buri  muntu  ibihumbi  20.000frw  akongeraho  ko  utazayatanza  azahura  n’ingaruka  nyuma !  nguko  nguko  kimwe  n’i  Rutare   ho  mu  Karere  ka  Gicumbi  bakurikiza  ibyiciro  by’ubudehe  aliko  bo  bagasanga  ngo  ari  igisebo  ku  muryango  wa  RPF!  bati  mudukize  ba  rusahuliramunduru  naho  ubundi  turashize!

Banyarwanda  banyarwandakazi   rero  ntawarondora  akababaro  k’abaturage   ngo  akamareyo  aliko   mpamya  ko  iyi  ari  isura  y’akababaro  n’intimba  byuzuye  imitima  y’abanyarwanda!  umuntu  akaba  yakwibaza  ati  amaherezo  azaba  ayahe  kandi  uwo  utakira  ariwe  ugusahura ?  aliko  haba  kwihangana  kuko  nta  gahora  gahanze .

Mugire  amahoro   y’Imana.

Byanditswe  ku wa  24/07/2017,  na:
A.BEN  NTUYENABO,  KIGALI-RWANDA.

Rwanda : Ibihe by’impinduka  biraca  amarenga

Kagame2017Buri  munyarwanda  wese  umaze  iminsi  akurikirana  igikorwa  cyo  kwiyamamariza  umwanya  w’umukuru  w’igihugu  cyacu  abona  ko  ishyamba  atari  ryeru  muli  politiki  y’u  Rwanda  aho  bigaragara  ko  abakandida  dufite  uretse  no  kuba  ari  ba  baringa  nta  na  programme  politique  ihamye  bagaragariza  abanyarwanda   mu  ikinamico  rya  mandat  ya  3  y’imyaka  7  iri  imbere;  ugasanga  Semuhanuka  ariwe  Prezida  Kagame  yakuye  mu  gusaza  imigeri  ategekera  mu  kwaha  kwe    amashyaka  n’abakandida  bigenga  kuzamushyigikira  mu  matora  yo  muli  Kanama   bamwamamaza  cyangwa  biyamamariza   hamwe.

Ni  muli  urwo  rwego  nkurikije  amakuru  nahawe   n’umuntu  bya  hafi  wa  Ministri  w’ubutegetsi  bw’igihugu  Bwana  Kaboneka  Francis  akanansaba  kudatangaza  amazina  kubera  umutekano  we  yampamirije  ko  yamuhishuriye  ko  mbere  gato  yuko  processus  yo  kwemeza  abakandida  ku  mwanya  w’umukuru  w’igihugu  mu  mitwe  ya  politiki  Prezida  Kagame  ubwe  yagiye  ahamagara  abayobozi  b’imitwe  ya  politiki  mu  Rwanda  buri  wese  umwe  umwe  amutegeka  uburyo  ishyaka  ayobora  rigomba   kuzamushyigikira  mu matora,  akaba  ari  nako  byagendekeye  PSD  na  PL  aho     abakuru  b’ayo  mashyaka   M.Biruta  Vincent   wa  Psd  na  Hon.  Présidente  wa  assemblée   akaba  na  Prezida   wa  PL,  Mukabarisa  Donatille  bafashe  iya  mbere   mu  kubimbulira  indi  mitwe  ya  politiki.

Uyu  mutangabuhamya  yakomeje  ambwira  ko  ari  nako  byagenze  ku  ishyaka  PS  Imberakuri  igice  kiyomoye  kuri  Me  Ntaganda  Bernard  kiyobowe  na  Mme  Mukabunani  Christine, uyu  we  ngo  Prezida  Kagame  mu  gihe  aherutse  mu  ruzinduko  mu gihugu  cy’ububirigi  akaba  yaramwihamagariye   kuli  phone  amutegeka  gukoresha  congrès  y’ishyaka  rye  igitaraganya  ayumvisha  ko  itagomba  kugira  umukandida  itanga  mu  matora  y’umukuru  w’igihugu  kandi  ko  bakomeza  guhagarara  kuri  position  yo  kuba  bitwa  nk’ishyaka  rya  opposition  mu  gihugu.

Mukabunani  Christine  bikaba  ngo  byaramuteye  impungenge  aliko  kandi  akikirigita  kubona  ahamagarwa  n’umukuru  w’igihugu  mu  bihe  nka  biriya!   ngo  yahise  ajya  kugisha  inama  Ministri  w’ubutegetsi  bw’igihugu  Francis   Kaboneka  asanga nawe  inkuru  yamugezeho  kare  ahubwo  amusubiza  ko akwiye  guhita  atumiza congrès  agaconvainca  abayoboke  b’ishyaka  rye  mu  rwego  rwo  kubahiriza  ibyifuzo  bya  Nyakubahwa  Prezida  Kagame.  Nibwo  nyuma  yaho  Christine  yatumije congrès  y’ishyaka  rye   67%  batorera  kutazatanga  candidature   mu  matora  y’umukuru  w’igihugu  bityo  itechnika  rye  na  Shebuja  Kagame  riba  riciyemo.

Prezida  Kagame  rero   muri  rusange  akaba  agenda  ashimira  by’umwihariko  abayobozi  b’imitwe  ya  politiki  ikorera  mu  Rwanda  kuko  bemeye  kumushyigikira  no kumugaragira    muli  uru  rugendo  rwo  kwiyamamaza  hirya  no  hino  mu  gihugu,  yongeraho  ko  anategetse  kujya  bahabwa  ijambo  aho  agiye  kwiyamamariza  hose.

Abamaze  guhabwa  ijambo  hakaba  harimo  Hon.  Mukabarisa  Donatille  Prezida  w’umutwe  w’abadepite  akaba  na  Prezida  w’ishyaka  PL, akaba  aherutse  gutangariza  abaturage  ba  Bugesera  ko  Prezida  Kagame  yabavanye  mu  rwobo  by’umwihariko  abanyabugesera,  ati  Kagame  uretse  kuba  yararokoye  igihugu  ni n’umuntu  udasanzwe  ariyo  mpamvu  nta wundi  ukwiye  kuyobora  u  Rwanda!  nimwiyumvire  namwe !

Undi  mwikorezi  w’ibibindi  uhora  mu  mahomvu  ni  Shehi  Mussa  Fazili  Harelimana , akaba  na  Prezida  wa  PDI  nawe  mu  inama  yo  kwamamaza  Kagame  aherutse  gutangariza  abaturage  ba  Nyarugenge  na  Nyamirambo  ko  batahwemye  kwita  umukandida  wa  RPF  Prezida  Kagame  ‘’BABA  WA  TAIFA ‘’  kubera  ibikorwa  bye  by’indashyikirwa  birimo  imihanda,  amashanyarazi, amazi   n’ibindi    yabagejejeho …….akongeraho  ko  Kagame  ariwe  wakuye  abayisilamu  ku  nkeke  z’ubutegetsi  bubi…..ati  Baba  wa  Taifa  Kagame  oye…oye… nimunyumvire  rwose ! inkomamashyi  ziragwira !  nyamara  uwareba  ivumbi  rigiye  kumara  abaturiye  aho  avuga  Nyamirambo  kubera  amanegeka  n’uduhanda  tubi!  Amazi  yo  bahebeye  urwaje ! ku buryo umuntu  atakifuza  kuhatura !  none  abayisilamu  nibo  bahamerewe  neza ! ikindi  uyu  muswa  yirengagiza  ni uko  ashaka  guhamya  ko  kariya  Karere  kaba  gatuwe  n’abayisilamu  gusa  avugira ! birababaje !

Undi  mumotsi  ni  Ministri  Dr. Biruta  Vincent  akaba  na Prezida  w’umutwe   wa  poilitiki  PSD  umaze  kwigera  Ministères  zitari  nkeya  muli  gouvernement  wongeyeho  Sénat  aliko  akaba  atanyurwa,  uyu mu  Ministri  rero  ageze  aho  asenya  ishyaka  ry’abanyabutare   b’umwimerere   aryegulira  amabandi-rusahuzi  ngo  arashyigikira  Semuhanuka wamugabiye, nawe  nk’abandi  bose  yavugiye  ijambo  i  Rulindo  kuri  uyu  wa  20/07/2017  ahateraniye  abambari  ba  RPF  dore  ko  abenshi  baba  baturutse  i Kigali  ukaba  wagirango  biyamamarije   mu  Karere  gafite  abaturage  hafi  icya kabili  cy’intara  kandi  ari  ikinamico!  yagize  ati  abavuga  ko ishyaka  PSD  mbereye  umuyobozi  ryabaye  ikigwari  ryiyomeka  ku  mukandida  wa  RPF   Bwana  Kagame  ati  ni  uko  batazi  umubano  PSD  isanzwe  ifitanye  na  RPF  uhereye  mu  myaka  15-20ans  byongeye  bakaba  bataniyumvisha  uburyo  ishyaka  PSD  ryafatanije  na  RPF  mu  kubohora  igihugu  no  kwongera  kucyubaka !  nimwiyumvire   namwe  biteye  agahinda!

Banyarwanda  banyarwandakazi, jye  nsanga  ibi  byo  muli  PSD  bisa  naya  mahano  yakorewe  Me  Ntaganda  Bernard  wagambaniwe  akamburwa  ishyaka  yishingiye  ndetse  akanabizira  none  Dr.  Biruta  nawe  ati  PSD  nyobora  twifatanije  na  RPF  uzabirengaho  si  uwacu!

Banyarwanda  banyarwandakazi,  iyo  ugereranije  ingirwamashyaka  akorera  mu  gihugu  cyacu  muli  iki  gihe  ntawashidikanya  ko  yaba  yarutwa  n’ishyaka rimwe  rukumbi  MRND  ryahozeho  mbere  ya  jenoside  kuko  aho  aganisha  abanyarwanda  ntawe  uzarokoka.

Mugire  Amahoro.

 Byanditswe  ku  wa  21/07/2017, na:
A.BEN  NTUYENABO,  KIGALI-RWANDA.    

Rwanda:  Prezida   Paul  Kagame  yabeshye  abaturage  ba  Nyabihu ku ya 04/07/2017

Kagame nyabihu 2017Ni  kuri  uyu  wa  04/07/2017  aho  mu  karere  ka  Nyabihu  ahahoze  ari  amakomini  ya  Giciye  na  Karago  bitaga  mu  kazu  ku  ngoma  ya  Habyarimana , hari  hateraniye  abayobozi  batandukanye  barimo  abakuru  b’ikirenga  b’ingabo  barimo  Ministri  w’ingabo  Général  James  Kabarebe,  chef  d’état-major  Lt  général   Nyamvumba,  Commissaire  général   wa  police  Emmanuel  Gasana  hari  kandi na  ba  Ministri  barimo  uw’ubutegetsi  bw’igihugu  Bwana   Francis  Kaboneka, First  lady  Jeannette  Kagame    n’abandi…..  Prezida  Kagame  akaba  yaritwaje  kuhizihiriza  isabukuru  yo  kwibohora  mu  rwego  rw’igihugu  ku  nshuro  ya  23   abeshya  abaturage   b’ako  karere  ko  yabavanye  mu manegeka  kubera  ibikorwa  birimo  ibitaro  byo  ku  rwego  rwo  hejuru  n’umudugudu  byubatswe    n’ingabo  za  RPF  bikaba  byatashywe  mbere  y’ibiroli  nyamukuru. Muri  uwo  muhango  witabiriwe  n’abayobozi  b’ingabo  hafi  ya bose  by’umwihariko  ukaba  wari  nko  kwereka  P.Kagame  uko  ibirindiro  bihagaze  nkuko  Ministri  w’ingabo  J.Kabarebe  abivuga  ati  aka  gace  karaturuhije  cyane  mu  gihe  cy’intambara  y’abacengezi  ku  buryo  agasozi  ka  Shyira  niho  hari  ESM( ishuri  rikuru  rya  gisilikare  rya  Ex-far)  ati  nyuma  tumaze  kubatsimbura  niho  hantu  haduteye  gusubiza  umutima  mu  gitereko!

Banyarwanda  banyarwandakazi,  tubibutse  ko  aka  karere  kasubiye  inyuma  birenze  urugero  kubera  ibikorwa  by’iyica-rubozo  by’ingabo  z’inkotanyi  zagakoreyemo   aho  ubu  abagatuye  biganjemo  urubyiruko  gusa  ahanini  rwavutse  nyuma  y’imyaka  ya  1989  kuko  zari  zarahagize  amatongo  ngo  zirahiga  abacengezi  n’abandi  bose  bari  bafitanye  isano  n’ubuyobozi  bwavuyeho,   none  hatangiye  kwibukwa  nyuma  y’imyaka  23  yose  ishize   ari  uko  igihe  k’ingirwamatora  y’umukuru  w’igihugu  yegereje!

Nkuko  akunze  kwishongora,  mu  ijambo  rye  Prezida  Kagame  akaba  yarabwiye  abaturage  b’akarere  ka  Nyabihu  ko  kwibohora  ari  ibikorwa  no  guhindura  imyumvire,  ati   uko  nabasize  igihe  mperuka  kubasura  nsanze  mwarahindutse   ati  nabitegereje  ku  maso  ntera  akajisho  na  hariya  inyuma  mbona  mwishimye,  museka  kuruta  ubwo  mperuka  hano  aho  mwabaga  murakaye,  mufite  umujinya  mwinshi,  mugaragaza  ko  mutari  bubone  bukeye !  aha  Prezida  Kagame  arirengagiza  ko  abo  avuga  bari  bafite  umujinya  bose  ingabo  ze  zabanyujije  iy’ibusamo  ko  arimo  aganira  n’amasura  mashya  yiganjemo  urubyiruko  rwavutse   ayo  mahindu  arangiye ! birababaje !

Banyarwanda  banyarwandakazi,  nubwo  avuga  ko  ari  ibikorwa  by’indashyikirwa  agejeje  ku  baturage  yewe  na  bamwe  muribo  kubera  kutabyumva  bakaba  babyishimira,  aliko  ababisesengulira  hafi  basanga  Prezida  Kagame  mu  kubanza  kubaka  ibitaro  n’amazu  y’umudugudu  muli  ako  karere  byongeye  bikaba  byarubatswe   n’ingabo  ari  uburyo  stratégique   bw’ibirindiro  bya  gisirikare  ateganya  mu  gihe  umwanzi  yaba  yongeye  kubyutsa  umugara  noneho  ibyo  bitaro  n’ayo  mazu  avuga  ko  yeguriye  abo  baturage  ababeshya  ko  ari  impuhwe  abagiriye  zo  kubavana  mu  manegeka  bikaba  bishobora  kuzamubera  ubwihugiko  bw’ingabo  ze  dore  ko  kugeza  na  nubu  atarashira  amakenga  ya  kariya  Karere.

Prezida  Kagame  umuntu  atashidikanya ko  atakigoheka  kubera  guhora  yirukira  mu manama  hirya no  hino  ku  isi  atagikozwa  mu  gihugu  cye  yarangije  ikirori  cy’isabukuru  yo  kwibohora  ajya  guhura    n’itangazamakuru  (RBA)   aho  umunyamakuru  Anangwe  Eugène  ukorera  RBA  yamubazaga  niba  yemeranya  na  komisiyo  y’amatora  kuba  yarahiswemo   nk’umukandida  ku  mwanya  w’umukuru  w’igihugu  hakurikijwe  ihinduka  ry’itegeko-nshinga  ry’u  Rwanda  ati  ese ntibyaba  bibangamiye  demokrasi ?  Prezida  Kagame  akaba  yasubije  ko  atigeze  ashaka  gukomeza  kuyobora  u  Rwanda  ko  ahubwo  ari  abaturage  babyisabiye  noneho  nawe  agahitamo  kutabatererana  atanga  umusanzu  we  mu  kubibemerera,  ati  n’ikimenyimenyi  muli  kongre  ya  RPF  ishyaka  ryanjye,  hari  ijwi  rimwe  ryabaye  impfabusa  mu kunyemeza  nk’umukandida  mu  bantu  bageraga  ku  1930  aliko  ndabamenyesha  ko  iyo  mpfabusa  yari  iyanjye !  Prezida  Kagame  akomeza  avuga  ko  nta  demokrasi  iruta  iy’abaturage  bihitiyemo , prezida  Kagame  yaboneyeho  no  kwamagana   abahagaraliye  ibihugu  byabo  mu  Rwanda  (abambassadeurs)  kudakomeza  kwivanga  mu  mikorere  ya  commission  y’igihugu   y’amatora (NEC)  ngo  kuko  ibyo  atari  akazi  kabo  ati  sinemeranya  nabo  ku  myifatire  yabo  muli iki gihe  cy’amatora  aho  bakomeje   kunenga  imikorere  ya  commission  y’igihugu  y’amatora (NEC).

Banyarwanda  banyarwandakazi   rero   uretse  n’ibyerekeye  amatora,  amayeri  n’itechnica  by’umwanzi  birakomeje  aho  atangiye  no  kubaka  ibirindiro  abigereranya  no  gukura  abaturage  mu  manegeka  nkaho  u  Rwanda  rwose  rutari  amanegeka !  twabanje  se  tukayakiza  abaturiye  umurwa  mukuru  bose !

Murabe  maso !

Byanditswe  ku wa  05/07/2017, na:

A.BEN  NTUYENABO,  KIGALI-RWANDA.

Rwanda. Umunyamakuru Andrew Mwenda yahishuye uburyo P. Kagame yapanze bwo kugundira ubutegetsi

 

Andrew Mwenda/foto http://www.monitor.co.ug

Andrew Mwenda/foto http://www.monitor.co.ug

Muri Ouganda umunyamakuru akaba n’umuyobozi mukuru w’ikinyamakuru  ‘The Independent’ Andrew Mwenda  yahishuye  uruhare runini prezida  Kagame yagize mu gushaka kwizirika ku  butegetsi.

 

Kuri  27  kamena  2017,  uyu  mugabo  Andrew  MWENDA   ubarizwa  mu  kanama  ngishwanama  ka  prezida  Kagame  yasohoye  inyandiko  yita  ko  igaragaza  urukurikirane  rw’ibiganiro  byatumye  P.  Kagame  yemera  gukomeza  kuyobora  u  Rwanda  akaba  aribyo  byabaye  intandaro  yo  gukoresha  itechnica  ryose  rishoboka  kugirango  hahindurwe  itegeko-nshinga.

Yakomeje  avuga  ko  atari  itechnica  ryagombaga  gutanga  umusaruro  umunsi  umwe  ko  habayeho  ibiganiro  binyuranye  ati  nkaba  nanjye  narabaga  nitabiriye  izo  nama  zikomeye  zari  zifite  inshingano  mu  gushaka  byanze  bikunze  igisubizo  gifatika  kandi  kigomba  kubahirizwa  hakurikijwe  ikinamico  ry’ubusabe  bw’abaturage   yewe  ku  buryo  nakunze  no  kubigaragaza  mu nkuru  z’ikinyamakuru  The  Independent  ‘’  mbereye  umuyobozi.

Banyarwanda  banyarwandakazi,  birumvikana  ko  mu  gihe  Prezida  Kagame  yabaga  arimo  guhirikira  ikibuye  umuryango  mpuzamahanga  ko  mandat  ye  nirangira  atazongera  kwiyamamariza  umwanya  w’umukuru   w’igihugu  kubera   ko  ngo  muli  Africa  abayobozi  benshi  bahindura  itegeko-nshinga  bitari  ku  neza   y’igihugu  ahubwo  ari  ku  nyungu  zabo; we  yararaririye  amagi  ategereje   ikizava  mu  mu  mutego  mutindi  yari  ateze  kuri  izo  ngishwanama  nka  Andrew  Mwenda.

Mr.  Mwenda  avuga  ko  nyuma  yo  kubonako  umubare  wa  za  mandats   z’abakuru   b’ibihugu  umaze  kuba  akarande  muli  Africa   n’ahandi  byongeye  bakaba  bagishaka  umunyagitugu  Kagame  ati  hatekerejwe  uburyo  yava  ku  butegetsi  aliko  akagumana  ububasha  bumwe  na  bumwe   mu  buyobozi  bw’igihugu,  ati  ni  muli  urwo  rwego  twakomeje  kubiganiraho  n’inkotanyi  zikomeye  muli  FPR   hamwe  n’abanyepolitiki   b’amashyaka  akomeye  Rwanda  kugirango  hagire  igikorwa.

Igitekerezo  kimwe  kikaba  kwari  ugutuma  Prezida  Kagame  agera  ikirenge  mu  cya  Nyakwigendera   Mwarimu  Yulius  Nyerere   aho  Kagame  yari  kurekura  ubutegetsi  agakomeza  kuba  umuyobozi  mukuru  wa  FPR-INKOTANYI  ati  icyo  gitekerezo  nawe  ubwe  yaragishyigikiye  aliko  ntitwari  bumukundire  kugirango  ijambo  rye  ridahungabanywa,  ahubwo  twamuhitiyemo  ko agomba  kuguma  ku  butegetsi  hahindurwa  itegeko-nshinga  hisunzwe  ubusabe  bw’abaturage,  nanone  bitewe  n’impungenge  twari  buterwe  nuko  aramutse  abaye  umukuru  wa  FPR  byari  butume  Prezida  mushya  atagira  ubwisanzure  bikaba  byateza  umutekano  muke  mu  gihugu  cyangwa  mu  gihe  Prezida  mushya  agoranye  akaba  yashobora  gukurwaho  n’ishyaka  rye  nkuko  byabaye  muli  South  Africa  kuri  Thabo  MBEKI.

Mr.  Mwenda  Andrew  yarongeye  ati  ku bundi  buryo  twatekerejeho  ni  ubusa  n’imiyoborere  yo  kwa  VLADIMIRI  Putin   muli  Russia  ati  aliko nyuma  y’ibiganiro  byinshi  twakoze  hamwe  na  Prezida  Kagame  twanzuye  ko  agomba  kuguma  ku  butegetsi  nka  Prezida  wa  republika !

Banyarwanda  banyarwandakazi,  ntawe  bitagaragariye  kenshi  ko  Prezida  Kagame  n’agatsiko  ke  kibumbiye  muli  RPF  bafatanije  n’amashyaka  ari  mu  gihugu , bagize  uruhare  rukomeye  mu  guhindura  itegeko-nshinga  ngo  hashobore  kuvanwaho  mandats   z’umukuru  w’igihugu  nkuko  uyu  Andrew  Mwenda  abivuga.

Mr. Mwenda  yakomeje  avuga  ko  hari  nubwo  Prezida  Kagame  yabonanye  n’umuryango  we  urimo  umudamu  we  n’abana  kugirango  amenye  icyo  babitekerezaho  bose  bakaba  barahurije  kumusaba  kuba  akwiye  kuruhuka  akava  ku  butegetsi !  ati  icyo  gihe  nanjye  yarampamagaye  ngo  nze  i  Kigali  tuganire  kuri  ubwo  busabe  bw’umuryango  we  aliko  icyufuzo  cy’umuryango  nticyubahirijwe.

Mr. Mwenda  ati  byatumye  njya  kureba  Mme  we  Jeannette  nyuma  aza  kwemera  ko  yaguma ku  butegetsi  ati  aliko  imyaka itatu  yonyine  kugeza  muli  2020  kugirango  ibitarujujwe  bihabwe  umwanya  wo  kurangizwa. Mr  Andrew  ati  aliko  ibyo  nabyo  ntibyagombaga  gushoboka  kuko  Prezida  Kagame  yari  yemejwe  kuguma  ku  butegetsi  kandi  ko  ngo  FPR  yari  yarabyitwararitsemo.

Mu  gusoza  inyandiko  ye  Mr.  Mwenda,  avuga  ko  uko  byari  bugende  kwose  igitekerezo  cya  Kagame  aricyo  cyari  gifite  umwanzuro  ukomeye  muli  ibyo  biganiro  byose  byabaye.

Banyarwanda  banyarwandakazi   rero  muriyumvira !  ntihakagire  ukomeza  kubeshya  abanyarwanda  ngo  ngaho  ni ubusabe  bw’abaturage!  nkaho  Giti  mu  Jisho  yavutse  ari  ikinege, nkaba  mboneyeho  no  kubahanura  ko  uzaramuka  atoye  Prezida   Kagame  azaba  ashaka  gusenya  igihugu  ku  buryo  ingaruka  azazirengera!  Murabe  maso  kandi  mugire  amahoro.

Byanditswe  ku wa  30/06/2017, na:
A.BEN  NTUYENABO, KIGALI-RWANDA.

Rwanda: prof. Kalisa Mbanda yihanangirije abakandida batangiye gusinyisha ababashyigikiye binyuranije n’amategeko.

Dine

Abo  ni  mu bantu  batatu  Philippe  MPAYIMANA,  Mme  Diane  Shima  RWIGARA  na  Mwenedata  Gilbert batangiye  igikorwa  cyo  gusinyisha  ababashyigikiye  bagera  kuri  600  hirya  no  hino  mu  gihugu,  baherutse  gutangaza  kuzahatanira  umwanya  w’umukuru  w’igihugu  mu  ngirwa-matora  yo  muli  2017.

Icyo  gikorwa  kikaba  giherutse  gutangira  ku  ya  13  Gicurasi,  iminsi  30  mbere  yuko  candidatures  zitangira  gushyikirizwa  Komisiyo  y’amatora  (NEC).  Kugeza  magingo  aya  hakaba  haragaragaye  abantu  batatu  ku  giti  cyabo  barimo  guharanira  kuba  abakandida  bigenga  muli  iryo  kinamico  ryo  ku wa  3  na  4/08/2017  aribo  Philippe  MPAYIMANA  waturutse  mu  gihugu  cy’ubufransa,  Mme  Diane  Shima  RWIGARA  na  Mwenedata  Gilbert  wongeye  gushaka  kugerageza  amahirwe  ye  dore  ko  ku  nshuro  ya  mbere  muli  2010  bitamuhiriye.

Itegeko   rya  Komisiyo  y’igihugu  y’amatora  rero  rikaba  rivuga  ko  umukandida  usinyisha  yemerewe  kubikora  ku  giti  cye  cyangwa  agashaka  abantu  bemerewe  na  Komisiyo  y’amatora  babimufashamo  byongeye  bakabikora  babanje  kubimenyesha  ubuyobozi  bw’akarere  bagiye  kubikoreramo  n’ahantu  hagomba  kuba  hazwi  bagiye  gukorera.

Ni  muli  urwo  rwego  kuri  uyu  wa  22/05/2017  mu  nama  yahuje  inzego  zinyuranye  ku  rwego  rw’intara  y’amajyaruguru;  Prezida  wa  Komisiyo  y’igihugu  y’amatora  yatunze  agatoki  yihanangiriza  bamwe  mu  bakandida  bigenga  barimo  Mme  Diane  Shima  Rwigara  na  Bwana Mpayimana  Philippe  kuba  barimo  gushaka  ababasinyira  mu  buryo  butemewe  n’amategeko  byongeye  bakabikorera  ahantu  hatemewe   nkuko  bishimangirwa  nanone  n’umukuru  wiyo  Ntara  y’amajyaruguru  Bwana  J.Claude  MUSABYIMANA  wemeza  ko  banabikorera  mu  tubari  bashaka  kubitangamo  na  Ruswa  banyuze  mu  nzira  zitemewe  ngo  babasinyire.

Bwana  Prof.  Mbanda  akomeza  agira  ati:  « nka  Bwana  Mpayimana  twamubwiye  ko  mbere  yuko  agiye  gushaka  abamusinyira  agomba  kujya  abanza  kwiyerekana  ku  buyobozi  bwaho  agiye,  ko  mu  Rwanda  atariko  bimeze  ko  hari  ubutegetsi  agomba  kumenyesha  icyo  agamije  bukabanza  kumwemerera!  aliko  ntabikozwa  ahubwo  ashimangira  ko  ari  uburenganzira  bwe  atagomba   kubikora ! »

Kuri  Diane  Rwigara  we ,  Prof. Mbanda  amurega  ko  akenshi  atanga  amafranga !  ati  twamubujije  kutongera  gutanga  amafranga  kuko  bishobora  kubangamira  umutekano !  aliko  uyu mukobwa  Diane  we  akisobanura  avuga  ko  abantu  bakunze  kumusinyira  iyo  abona  ko  bafite  ubukene  bituma  ashaka  kubafasha  abubakuramo  bityo  ngo  akabaha  amafranga.

Banyarwanda  banyarwandakazi,  ngibyo  ibyo  Prezida  wa  Komisiyo  y’amatora  mu  Rwanda, Bwana  Kalisa  Mbanda  yatangiye  kunenga  atunga  agatoki  bamwe  mu  bakandida  yita  ko  badakora  mu  mutekano.  None  se  demokrasi  bavuga  yaba  ari  iyihe  batareka  ngo  umukandida  yishakire  abamushyigikiye  yisanzuye? Tubitege  amaso!

Byanditswe  ku  wa  24/05/2017, na:
A.BEN  NTUYENABO,  KIGALI-RWANDA.

 

 

 

Rwanda/Gatsibo : Ruswa n’ikimenyane mw’itangwa ry’akazi k’ubwarimu

gatsiboBanyarwanda, Banyarwandakazi, nkuko musanzwe mubizi imitangire y’akazi mu Rwanda ni agahomamunwa aho akazi gatangwa hagendewe ku cyenewabo, inkomoko ndetse na ruswa nkuko byagiye bigaragara mu turere dutandukanye tw’u Rwanda uko ari 30.Urugero twatanga n’urwo mu karere ka Gatsibo nkuko mugiye kubikurikirana mu nkuru ikurikira.

Kuwa 09/02/2017 i Gatsibo abantu basaga 3000 bakoze ikizamini ku myanya y,uburezi yo kwigisha mu mashuri yisumbuye (mu cyiciro rusange ndetse no hejuru.) kandi abantu basaga 1000 baratsinze (babonye hejuru ya 70%). Ubusanzwe iyi myanya mu Rwanda yemerewe abantu bize uburezi bafite diplome ya A1 mu kiciro rusange na A0 hejuru. Abo bose rero bakoze ikizamini muri uko kwezi kwa 2 bapiganirwa imyanya igera ku 105. Nkuko bisanzwe mu kizamini bamwe baratsinze abandi baratsindwa, ariko icyatangaje abantu bakoze iki kizamini nuko mu myanya 105 yapiganirwaga abahawe akazi batarenze 40 bakibaza aho indi myanya isaga 60 yagiye bikabashobera.

Icyaje kubabera agahomamunwa nuko kuwa 12/04/2017 hasohotse irindi tangazo rihamagarira abantu bafite diplome ya A2 batize uburezi kandi batanabyemerewe n’itegeko kujya gukora ibizamini cyo kwigisha mu mashuri yisumbuye. Ubusanzwe mu Rwanda abantu bemerewe kwigisha mu mashuri yisumbuye ni abafite diplome ya A1 mu kiciro rusange na A0 hejuru, nta mwarimu ufite A2 wemerewe kwigisha mu mashuri yisumbuye keretse mu mashuri abanza kandi nabwo yarize uburezi.

Tubibutse ko mu kwezi kwa kabiri REB (Rwanda Education Board ) yasohoye itangazo isaba uturere twose kugenzura niba nta mwarimu wumu A2 wigisha mumashuri yisumbuye yaba ahari akamanurwa agashyirwa mu mashuri abanza ku bize uburezi, yaba atarize uburezi akirukanwa mu kazi. Kandi ibyo byarakozwe mu turere twose na Gatsibo irimo.

ikizaminiAbantu bakoze ikizamini cyo kuwa 09/02/2017 bavuga ko ibi ari akarengane gakabije kuko bimwe uburenganzira bemererwa n’itegeko. kuko iyo utsinze ikizamini cy’akazi igisigaye aba ari kuguha ibaruwa ukajya mu kazi, ariko aha siko byagenze kuko imyanya yabo yashubijwe kw’isoko hashakwa abantu batize uburezi kandi batanabifitiye ubushobozi.

Nta bisobanuro abategetsi b’akarere bigeze batanga kuri iki kibazo mu buryo bweruye ariko bamwe mu bakoze ibizamini bagerageje kubaza bamwe mu babishizwe rwihishwa babwiwe ko akarere kadafite ingengo yimari yo guhemba abarimu baba A0 naba A1 ngo kuko bahembwa akayabo. Ahangaha abantu bibaza impamvu niba igihugu gikennye kidatangaza kwizirika umukanda nibura abantu bakabimenya. Ubusanzwe umwarimu wumu A0 ahembwa 135000 frw, umu A1 agahembwa 97000frw naho umu A2 agahembwa 40000frw.

Ababikurikiranira hafi basanga aya ari amwe mu manyanga uturere dusanzwe dukoresha kugira ngo babone uko bashyira mu kazi abantu  babo bishakiye Etangazo_Education_14-04-2017hatagendewe kubabifitiye ubushobozi kandi babikwiriye. Aha hagenderwa ku cyene wabo, inkomoko y’umuntu,ndetse na ruswa. Uretse ko iyo utazwi ntana mwene wanyu ufite mu nzego z’ubutegetsi na ruswa hari igihe uyitanga igahiramo ntibaguhe akazi ugahomba.

Abantu bakoze iki kizamini barasaba ko aka karengane gahagarara bakarenganurwa bagahabwa imyanya yabo batsindiye kandi bemererwa n’amategeko.

Kumugereka wiyi nkuru murabona copi y’ikizamini cyakozwe kuwa 09/02/2017 niy’irindi tangazo rihamagarira ikindi kizamini ryo kuwa 12/04/2017.Namwe mugenzure mumbwire ukuntu mu mezi 2 gusa haba hakozwe ibizamini 2 ku mwanya umwe !!

N.B.: Musome neza itangazo ryo kuwa 12/04/2017 murabonamo amanyanga, kuko bisa nkaho bari babuze uko babyandika, mu mbonerahamwe ihari murabona ahanditse UMWANYA, munsi yaho handitse ABARIMU BO MU MASHURI ABANZA munsi yaho ahakagiye ABARIMU BO MUMASHURI YISUMBUYE reba ibyo banditseko ni akumiro

Gatari Joram
Gatsibo

 

Ubushinjacyaha byabugoye gusobanura icyaha burega Mlle Gasengayire Leonile

Léonille Gasengayire, Trésorière-adjointe du parti FDU-Inkingi

Léonille Gasengayire, Trésorière-adjointe du parti FDU-Inkingi

Uyu munsi tariki ya 23 Gashyantare 2017 nibwo urubanza mu mizi ubushinjacyaha bwa leta y’uRwanda buregamo umubitsi wungirije w’ishyaka FDU Inkingi Mlle Gasengayire Leonile rwaburanishijwe mu mizi n’urukiko rukuru rwa Karongi urugereko rwa Rusizi.

Ubushinjacyaha bukaba bushinja Mlle Gasengayire icyaha cyo guteza imvururu cyangwa imidugararo muri rubanda no kurwangisha ubuyobozi buriho giteganywa kandi gihanwa n’ingingo ya 463 yo mu gitabo cy’amategeko ahana cy’uRwanda.

Ubushinjacyaha bw’uRwanda bukaba bushinja Leonile icyi cyaha buvuga ko ngo yaba yarakanguriye abaturage bo mu kagali ka Bunyunju umurenge wa Kivumu akarere ka Rutsiro ngo gukomeza kwihingira mu masambu yabo ahateganyijwe kuzubakwa umudugudu w’icyitegererezo.

Leonile akaba yaburanye ahakana icyaha aregwa akavuga ko yagiye iwabo agiye kwisurira umuryango we dore ko aribwo yari agiye mu kiruhuko kuko asanzwe ari umunyeshuri muri kaminuza ko atari ajyanweyo no kugumura rubanda nkuko ubushinjacyaha bubivuga.

Ubushicyaha buvuga ko aho hantu ubuyobozi bw’akarere ka Rutsiro bwari bufite gahunda yo kubakamo umudugudu w’icyitegererezo ndetse bukaba bwari bwaramaze gutanga itegeko ko nta muturage wemerewe kongera guhingamo. Ubushinjacyaha kandi bwemerako nubwo iyi gahunda yari ihari nta kintu na kimwe ubuyobozi bw’akarere bwari bwaratangiye gukora kijyanye n’ibiteganwa n’itegeko ryo kwimura abantu dore ko Gasengayire afatwa nta gikorwa na kimwe cyari cyagakozwe haba kubara imitungo y’abaturage cyangwa se kubaha ingurane ikwiye. Ibi nibyo byatumye mu kwisobanura Mlle Gasengayire n’umwunganira mu mategeko Me Mukamusoni Antoinette berekanye ko Gasengayire akurikiranwe ku bintu bitagize icyaha kuko akarere ka Rutsiro kadafite uburebganzira bwo kubuza umuturage gukomeza gukora imirimo ye isanzwe mu isambu ye kandi kataramuha ibiteganywa n’amategeko nkuko bisobanurwa neza mu itegeko ryo kwimura abantu mu byabo ku bw’inyungu rusange. Ibi bikaba binashimangirwa n’ibivugwa muri iri tegeko ko na nyuma yo kubarura no kubara umutungo w’uzimuka ku bw’inyungu rusange itegeko ryemeza ko nyuma y’iminsi 120 umuturage abariwe iyo atishyuwe ayo masezerano aba ataye agaciro umuturage agasubirana umutungo we kuburyo iyo hatekerejwe gukomeza kumwimura bisaba ko yongera kubarirwa cyangwa agahabwa amafaranga yinyongera. Nyamara kuri iki kibazo cyafungishije Leonile ho bikaba ari agahomamunwa kuko usibye no kwishyura nta nuwari wabaze imitungo yabo.

Kuba kandi umutungo w’umuntu ari ntavogerwa ndetse bikaba binanditse no mu itegekonshinga ry’uRwanda ibi binashimangira ko nta tegeko umuturage yaba yishe mu gihe ari guhinga isambu ye kandi nta tegeko na rimwe yishe muyo igihugu kigenderaho. Kuba akarere karategetse ko abaturage batahinga amasambu yabo kirengagije ibiteganywa n’itegeko ahubwo bikaba byagakwiye gufatwa nko guhohotera abaturage ahubwo akarere akaba ariko kagakwiye kubazwa ibyo kwangisha abaturage ubuyobozi kuko kakoze ibinyuranyije nicyo itegeko ryemerera umuturage. Ikindi cyagarutsweho ni uko mu byukuri niyo usonye inyandiko mvugo z’abashinja Leomile bamwe usanga bemeza ko nubundi bari basanzwe bahinga ko ndetse nubu abatagira ubwoba ko bafungwa nubu bagihinga, hakibazwa uburyo Leonile yashinjwa gushishikariza abaturage guhinga kandi nubundi bahingaga?

Impungenge z’icyi cyaha zanatumye umucamanza abaza ubushinjacyaha ati « nonese Leonile afatwa agafungwa n’iki cyari cyakozwe kijyanye n’ibisabwa mu kwimura abantu? Akarere se kari karabaze imitungo y’abaturage?Kari se karabahaye ingurane? Aha ubushinjacyaha bwavuze ko imitungo yabo yari itarabarwa ndetse n’ingurane zari zitaratagwa ariko akarere kari karabujije abaturage guhinga kugirango ibizishyurwa bizabe bike.

Muri uru rubanza kandi humviswe abatangabuhamya bashinjura uregwa nkuko byari byasabwe ubushize ubwo uru rubanza rwasubikwaga ngo batumizwe n’urukiko kuko haba mu bugenzacyaha haba no mu bushinjacyaha iyi ngingo yo kumva abavuga ko Leonile arengana yari yabangamiwe bidasubirwaho. Aba batangabuhamya bakaba bose uko ari batanu bemeje ko nta numwe wigeze yumva cyangwa abona Leonile akangurira abaturage kwigomeka kuri iyi gahunda yo kubaka umudugudu kuburyo ndetse no mu nama yahamagawe shishi itabona tariki ya 24 Kanama 2016 itumijwe n’umurenge ufatanyije n’ingabo z’igihugu na polisi abaturage babwiwe ko abafite icyo bashinja Leonile bahaguruka mu nama bakamushinja ariko hakabura numwe umushinja aribwo nyuma bagiye batumiza umwe umwe ku murenge bakabazwa kuburyo mu babajijwe harimo umwe wanabwiye urukiko ko we yanabujijwe uburenganzira bwo gusoma ibyanditse n’uwamubazaga akamutegeka gusinya cyangwa ngo yakwanga agakoresha igiti bityo ngo agahitamo gusinya aho gukubitwa nkuko yari amaze kubisezeranywa.Uyu wavuze ko yahatiwe gusinya atabanje gusoma ibyanditswe akaba anemeza ko kuba yarangiwe gusoma bisobanuye ko uwamubujije yari yanditse ibyo atavuze bityo akanga ko abisomye yasaba ko ibyo atavuze bikurwamo.

Ibi kandi byuko hari habuze abashinja Leonile ku mugaragaro nkuko byari byasabwe mu nama nibyo Leonile n’umwunganizi mu mategeko we bambwiye umucamanza ko abatangabuhamya bose bamushinja ngo kuba yarababwiye ngo nibihingire niba batarahabwa ingurane ni abantu bo mu muryango umwe nubundi basanganwe amakimbirane kuburyo bagiranye n’imanza aho uyu muryango umushinja washakaga gufungisha abo mu muryango wa Leonile kuburyo hari n’uwahimbiwe dosiye yo gufata ku ngufu ariko urukiko rukamurenganura rukamugira umwere kuko rwari rwasanze ibyo bintu ari ibicurano. Ibi rero ngo bikaba bikwiye kwitonderwa kuko iyo ubisesenguye neza usanga ahubwo ubushinjacyaha n’ubugenzacyaha nyuma yo kubona ko abaturage muri rusange batashinje Leonile nkuko bari babisabwe mu nama ngo bwahisemo gukoresha abasanzwe bafitanye urwango n’umuryango wa Leonile maze nabo babisamira hejuru nk’uhuryo babonye bwo kumugerekaho inkono ishyushye mu buryo bworoshye.

Me .Antoinette yifashishije amatangazo y’ishyaka FDU Inkingi ndetse n’ibaruwa yandikiwe polisi isaba gufashwa gushakisha irengero rya Leonile akaba yanavuze ko uku gushaka gufungisha Leonile byanareberwa ku ku gisa n’itotezwa ryagiye rikorerwa Leonile rishobora kuba rishingiye ku bitekerezo bye bya politiki ndetse n’ishyaka abamo rya FDU Inkingi aha akaba yanibukije iby’ishimutwa ryigeze kumukorerwa ubwo yari agemuriye Ingabire Victoire agatwarwa n’abantu batamenyekanye umwirondoro wabo bamukuye mu mbago za gereza nkuru ya Kigali(1930) nyuma akaza kurekurwa kuburyo urukiko rukwiye kureba niba aba bantu bagendagenda aho Leonile akandagije ikirenge atari nabo baba bari inyuma y’iki gikorwa cyo kumukurikira naho yagiye kwisurira ababyeyi hanyuma byahurirana nuko aho atuye hari imwuka mubi wo kuvogera uburenganzira ku mitungo y’abaturage bikaba umwanya mwiza wo kuvuga ko yagumuye rubanda? Aha akaba yasabye urukiko mu bushishozi bwarwo naho kuhasuzuma.

Nyuma yo kwiregura ubushinjacyaha bwahawe ijambo ngo busabire uwo burega ibihano maze busaba ko Leonile yazakatirwa gufungwa imyaka 15.

Leonile we n’umwunganizi we babwira urukiko ko rwamurenganura rukamugira umwere kuko nta cyaha yigeze akora maze rugategeka ko afungurwa.

Nyuma yo kumva ibyavuzwe n’impande zombi urukiko narwo rwavuze ko uru rubanza ruzasomwa tariki ya 23 Werurwe 2017 saa cyenda z’amanywa.

Boniface Twagirimana,
Kigali-Rwanda

 

Rwanda : Ese prezida Kagame azagira ubutwari bwo kunamura icumu muri 2017?

Muri Gereza ya Muhanga, haje ikipe yo kwica abagororwa. Igizwe nande?

Gereza ya Muhanga

Gereza ya Muhanga

Leta y’uRwanda yahinduye amayeri yo kwica abantu batandukanye badashakwa n’ubutegetsi yifashishije bamwe mu bagororwa isanzwe yaratoje ikanabaha akazi ko gutanga ubuhamya ku rwego mpuzamahanga. Abagororwa n’abafungwa bafungiye muri gereza ya Muhanga ubu icyoba ni cyose nyuma yaho ubu barimo kwicwa umusubizo ku bisa n’umugambi muremure wo kurimbura benshi muribo.

Icyi cyoba gishingiye ko mu ijoro ryo kuwa 23 rishyira kuya24 Ugushyingo 2016 hishwe umufungwa witwa Higiro Prosper mwene Nkundukozera Ibrahim na Nishyirembere ukomoka mu kagali ka Cyimirama, umurenge Busoro, akarere ka Nyanza . Iyi nzirakarengane yishwe ikubiswe kugeza ashizemo umwuka ku mabwiriza ya Bwana Ruzigana Emmanuel afatanyije na Komiseri wungirije witwa Murenzi .Uyu nyakwigendera akaba yari akiri umwere kuko yari atarahamwa n’icyaha .

Umuvugizi wa RCS, Sengabo Hillary

Umuvugizi wa RCS, Sengabo Hillary

Umutwe w’insoresore ukoreshwa mu kwica abafungiye muri gereza ya Muhanga ngo washyizweho n’aba banyabubasha bakingiwe ikibaba n’aba DMI bakorera muri iyo gereza ngo basa n’abashinzwe gahunda y’iyicarubozo aribo I.O Hodari alias Gisiga na security officer AIP Mugwiza . Aba ba DMI ngo nibo batanga amabwiriza y’abagomba gupfa bifashishije ba batangabuhamya ngo babigize umwuga ku rwego mpuzamahanga, uyu mutwe kandi ninawo aba bagome bifashisha ngo mu kwirindira umutekano bamwe bita « les gardes corps ».

Uyu mutwe usibye kurinda Ruzigana Emmanuel ngo unashinzwe no gukumira abanenga ubutegetsi bwe. Dore ko atajya akurwa mu buyobozi yitwaje ko ari umutangabuhamya mpuzamahanga .Uyu Ruzigana Emmanuel ngo mu kumushyigikira, ubuyobozi bwa Gereza ya Muhanga ngo bwabwiye abagororwa n’imfungwa ko aba bicanyi bagomba kuyobora gereza ubuziraherezo ku buryo ibi aribyo biteye ubwoba abafungiye muri iyi gereza kuko uyu mwicanyi ngo yababwiye ko ntaho bazamuhungira kuko ashyigikiwe na gereza ya Muhanga.

Uko FPR yishe urubozo imfungwa muri gereza ya Gitarama (Muhanga) ikimara gufata ubutegetsi muri 1994

Uko FPR yishe urubozo imfungwa muri gereza ya Gitarama (Muhanga) ikimara gufata ubutegetsi muri 1994

Mubyo uyu nyakwigendera yazize ngo yanengaga uburyo abafungiye muri iyi gereza bafatwa nabi. Gusa ngo nyuma yaho ubuyobozi bwa gereza ya Muhanga buhaye amabwiriza aba bicanyi ko uwo muntu unenga imikorere ya gereza ngo atunganywa (yicwa) ngo bakimara kumwica ubuyobozi bw’iyi gereza bwavuze ko ngo Nyakwigendera yishwe n’igicuri.

Izi nkoni kandi ngo mu minsi ishize zakubiswe uwitwa Munyanshongore Alexandre aba bicanyi ngo bibwiye ko yanogonotse ariko kubera umunsi we wari utaragera ngo yaje kuzanzamuka ajyanywa kwa muganga i Kabgayi ku buryo n’ubundi ngo asa n’umupfu kuko ntacyo ashobora kuzimarira kuko yahindutse igisenzegeri nabwo nagira amahirwe aba bicanyi ntibazamunogonore mu minsi iri imbere.

gitarama-incendie

Gereza ya Muhanga yaratwitswe muri 6/2014

Twakwibutsa ko gereza ya Muhanga (Gitarama) imaze gupfiramo abantu batagira uko bangana kuva FPR Inkotanyi yafata ubutegetsi mu Rwanda muri 1994. Za rapport za MSF iyo uzisomye umera urumeza. Ndetse n’amafoto yafashwe muri gereza arenze ukwemera. Muribuka kandi ko mu kwezi kwa gatandatu muri 2014, iyo gereza yatwitswe, abatikiriyemo ntawe uzi umubare wabo. None dore iyo gahunda yo kumaraho izo mfungwa irabandanije.
Gaston Mukimbiri
Kigali, Rwanda, 28/11/2016

Kigeri akimara kwima mu nshingano yahawe harimo gushyiraho Minisitri w’Intebe ahawe n’amashyaka