Rwanda: umwe mu rubyiruko rwo mu karere ka Gasabo yarabajije ati : « Uwahagaritse jenoside yakorewe abahutu we ni nde? »

Ni kamwe mu dushya twaranze icyumweru cyo kuwa 07-13/04/2018 mu kwibuka Jenoside yakorewe abanyarwanda ku nshuro ya 24 aho insanganyamatsiko yayo yagiraga iti : « Kwibuka twiyubaka ».

Muli ibyo biganiro byabereye mu murenge wa Gatsata kuwa 09/04/2018 ho mu Karere ka Gasabo umugi wa Kigali ubwo abaturage b’imidugudu itatu ariyo Busasamana, Muremera na Kamamana bari bateraniye hamwe mu gukurikirana ibiganiro mu kwibuka Jenoside yakorewe abatutsi umwe mu rubyiruko utarivuze amazina ye nyuma yo guhaguruka yabajije agira ati « Ese ko mutubwira ko habaye Jenoside y’abatutsi yonyine yahagaritswe n’ingabo za APR zari ziyobowe na Nyakubahwa Kagame Paul kandi tukaba twumva ko hari niyakorewe ubwoko bw’abahutu yo yaba yarahagaritswe na nde ? »

Bwana NGOGA (uyu akaba na murumuna wa Ngarambe François SG wa FPR) wari uyoboye ibiganiro yasubije ko abavuga Jenoside ebyili ari bamwe bakirangwa n’ingengabitekerezo ya Jenoside ko nta Jenoside yakorewe abahutu yabayeho, ati ariyo mpamvu mu gucyura impunzi zirenga miliyoni eshatu z’abahutu zari zarahungiye mucyitwaga Zaire zitozaga kugaruka gukomeza gukora Jenoside mu Rwanda ntitwari tubuze amasasu miliyoni eshatu buri wese irye aliko kubera politike nziza ya RPF ntiyabikoze kandi yaranatsinze urugamba ahubwo igahitamo no kuvanga zimwe mu ngabo zatsinzwe niza APR bamwe mubo barwanaga. Yakomeje avuga ko abo batarava ku izima ngo bamanike amaboko bumve ko batsinzwe yabagira inama yo kwemera kunywa umuti nubwo ushalira kuko hari na bagenzi babo bawunyoye bakaba baganje ! ati ikindi abo nibo batwitaga inyenzi zifite imirizo n’ibindi ati aliko ndabamenyesha ko inyenzi batwitaga atari twa dusimba tugendagenda hasi twihisha nkuko babivuga ahubwo bisobanura bitya mu magambo arambuye : i : ingabo, nye : nyemeramihigo, nzi : z’ingenzi, naho ngo Inkotanyi zikaba zari ingabo z’umwami Ruganzu akaba aribyo bisobanura inyenzi-nkotanyi.

Bwana NGOGA yakomeje agereranya amacakubiri bazaniwe n’abazungu b’abakoloni abashyira mu byiciro bitatu bigizwe n’inyuguti za M eshatu arizo:
M1 : Mission (misiyoni )
M2 : Militaire (imbunda)
M3 : Marchand (umucuruzi)

Ati iyo niyo ntwaro abo bakoloni bitwaje batubeshya mu kutuvangura ngaho ngo batuzaniye amajyambere n’ijambo ry’Imana aho umwe yatwumvishaga ko hari indi Mana itari Lyangombe tukakira ibyo adutamitse tugakunda tukemera , umucuruzi nawe ati mukore mutya mukunde muhabwe imyenda yo kwambara kandi buri wese agashyirwa mu kiciro runaka yaba umuhutu cyangwa umututsi kandi bose bakaba baherekejwe n’imbunda ….nguko!

Banyarwanda ibi biganiro byavugiwemo byinshi bitaganisha ku bwiyunge bw’abanyarwanda ahubwo nta kindi kitari ugukomeza kubiba amateka acuritse hagati y’abahutu n’abatutsi bikorwa n’agatsiko kari ku butegetsi kugirango gakomeze kigarulire imitima yabo. Tubibutse ko CNLG ariyo yitangiye mu guhugura abari babikuriye bagera ku bihumbi 20 ku midugudu yo mu gihugu hose.

Bwana NGOGA yakomeje avuga ko abagenda bitiranya indege na Jenoside yakorewe abatutsi ko ntaho bihuriye kuko yo yateguwe n’abaparmehutu kuva 1959 barimo ku ikubitiro Bwana Habyarimana Joseph Gitera wari warashyizeho amategeko icumi y’abahutu harimo iryavugaga ko umututsi ari nk’igisebe cy’umufunzo ! ati naho kwitiranya indege keretse niba Prezida Habyarimana yari Prezida w’abahutu gusa !

Ibindi byiyumviro ni ukuntu aba bayobozi b’imidugudu bari bafite breafing kuburyo nabo bagiye bunganira aliko ugasanga badasobanukiwe batazi ibyo barimo urugero hari umwe uyobora umudugudu wa Buremera muli imwe twavuze haruguru wagize ati : » baturage ! muli twese ntawe iyi ntambara itakozeho ati aliko urwishigishiye ararusoma ! ati ntimubona bariya bahutu bamaze gukora jenoside bagahungira muli Zaire ukuntu hafi ya bose bishwe na Macinya na Choléra ! ati nta gushidikanya ko baruta umubare w’abatutsi bazize Jenoside ! iyumvire nawe ! mugenzi we nawe ati rwose igihugu cyarahahombeye cyane pe! iyo usubije amaso inyuma ugatekereza ku basore b’intarumikwa z’interahamwe ukuntu bagendaga ku mapine y’imodoka ati muli ibihe bya none igihugu kiba gifite abakomando bakomeye ! » nimwiyumvire!

Bwana NGOGA wari uyoboye ibiganiro mu gusoza yanze kurangiza adashimagije ingoma yamukamiye cyane cyane umukuru wayo Pahulo Kagame avuga ko kuva acikishije amashuri ubwo yigaga muli Amerika atari yanze kuyakomeza aho yari buzabe n’imwe mu ngabo zikomeye z’Amerika aliko akagaruka igitaraganya mu ntambara yo kubohora igihugu asize umwana w’uruhinja yaramaze kwibaruka aho benshi mu ngabo zatangije urugamba zari zimaze gushirira ku rugamba akanarwitangira kugeza ahagaritse Jenoside yakorerwaga abatutsi ! ati rwose ntawabona icyo amushimira ati jyewe ndi umukatolika aliko mufata nk’umukiza Imana yatwoherereje ! ati kuba muvuga ntya si uko yarwaniraga abatutsi bonyine kuko mubo bari bafatanije urugamba murazi ko harimo n’abahutu nka Col. Kanyarengwe, capt. Muvunanyambo, Col. Biseruka, Col. Lizinde n’abandi…. nguko!

Banyarwanda ntawarondora byose, gusa abafite ibyo bavugiraho muli iki gihe ntawababuza kuduhira! uretse abo bahutu avuga bafatanije urugamba na Pahulo Kagame se abatutsi bo barufatanije barihe ? bose ntihasigaye ngerere abandi barakwiye imishwaro ! ngayo amateka ya FPR-INKOTANYI umunyarwanda wese ushyira mu gaciro yagombye gufata nk’amahano masa atazuyaje.

Byanditswe ku wa 15/04/2018, na:
A.BEN NTUYENABO, KIGALI-RWANDA.

Rwanda : Muri Gatsibo, abahinzi bakomeje kwamburwa amasambu mu buriganya

Nkuko bisanzwe bizwi ko mu Rwanda umuntu utabyumva kimwe na FPR agomba kunyagwa ibye ku ngufu, noneho ni agahomamunwa.

Mu ntara y’iburasirazuba, mu karere ka Gatsibo, mu murenge wa Rwimbogo, mu tugari twa Nyamatete na Rwikiniro.abaturage bararira ayo kwarika, kuko banyanzwe amasambu n’amazu byabo ku ngufu bitwaje ngo baguze mu mafamu (farm) ahantu hagenewe ubworozi.

Abo baturage baguze n’umugabo witwa NDIRIMA James na SESONGA (ntitwabashije kumenya irindi zina) abenshi muri abo baturage bamazemo imyaka irenga 10, none ubu FPR irimo kubirukana ngo nibave mu mafamu (farm) y’aborozi kandi banyiraho aribo bahabagurishije.

Ikibazo ni iki: ese abahabagurishije nibo bazahasubirana cyangwa ni abandi bazahaha? Nkuko bisanzwe bizwi aya ni amwe mu manyanga FPR ikoresha iyo ishaka kunyaga umuntu. Ibintu nkibi bikunda kuba mu turere twa Gatsibo na Nyagatare, ndetse mu myaka ishize i Nyagatare bimuye imiryango 110 yose irangara, ariko ikibabaje aho babimuye bavuga ko ari mu mafamu y’inka, bari bafitemo intoki n’amazu n’indi mirima byose na nubu birimo ahubwo babikoze neza cyane. Mu by’ukuri rero ni ubujura gusa buba bugamijwe nta kindi.

Aba baturage b’i Gatsibo rero baratabaza nubwo badafite uwo batakira kuko uwo batakira ariwe ubarenganya. Barashaka kubasubiza udufaranga tw’intica ntikize ariko abo baturage barayanze, ubu inzego zibanze na polisi zirimo kubatera ubwoba ngo bazabafunga nibindi.

Kuko nk’umuntu wahaguze mu myaka 10 ishize hegitari yayiguraga amafaranga atarenze 800.000 RF none ubu hegitari iragura 3.000.000 RF y’u Rwanda, ubwo rero umuntu arareba icyo ari bumaze 800.000 RF kikamuyobera.

Ngayo nguko.

J-Jules Rugero
Gatsibo-Rwanda

Rwanda:Leta ya FPR igiye gushyiraho umusoro mushyashya w’ubukode ku nzu zo guturamo, iz’ubucuruzi niz’inganda.

Mu gihe abanyarwanda batari bake binubira imisoro y’urudaca igamije kubacuza utwabo yinjizwa mu mifuka y’abagize Leta y’agatsiko ka FPR-INKOTANYI, kwambura ubutaka abaturage ari nako ibarandulira imyaka abandi nabo ngo ntibakwiye guhinga ibyo bishakiye mu mirima yabo bitajyanye na gahunda ya gouvernement ubundi ngo hagenewe ibikorwa-remezo ; ni muli urwo rwego kuwa 06/04/2018 mu mpera z’icyumweru gishize mu nteko nshingamategeko y’u Rwanda habereye impaka mu badepite bagize commission ya politike n’ubukungu ubwo bahabwaga ibisobanuro n’intumwa za gouvernement ku byerekeranye n’uwo mushinga zikaba zari zigizwe na Ministri Gatete w’igenamigambi atarahindurirwa imirimo, Richard Tumusabe w’ikigo k’igihugu gishinzwe imisoro n’amahöro bakaba barasobanuriye abadepite ko uwo mushinga mushya w’ubukode ku nzu zo guturamo, iz’ubucuruzi niz’inganda atari umwihariko w’u Rwanda ko ahubwo no mu bindi bihugu by’amahanga ubarizwayo kandi ko u Rwanda nk’igihugu gito ku isi ugereranije n’ibindi nta wundi mutungo w’ibanze rufite uretse ubutaka n’ibiwubarizwaho. Nguko!

Mu gusobanurirwa abadepite byagaragaye ko babigizeho impungenge ubwo babazaga Ministri Gatete niba bitazabera abaturage umugogo bikaba byabyara amakimbirane bati dore ko abaturage bananiwe no gutanga umusoro usanzwe w’ubutaka ? Ministri Gatete yasubije ko nubwo haba hari abaturage bigometse ku misoro isanzwe cyangwa bayibuze bitavanaho kuba hashyirwaho indi misoro hakurikijwe amategeko ! ati nta gihugu kidaca imisoro kandi nta n’ibyubusa bihari twese tugomba gosora ! ngaho rero !

Ministri Gatete yakomeje avuga ko uwo musoro mushya uzafata imugongo iterambere ry’igihugu harebwa cyane cyane umusoro ku mazu y’ubucuruzi afite agaciro kari hejuru ya Miliyoni 30 kuko azajya asoreshwa hafi 110/100% bivuga ko zizasoreshwa agaciro kayo havanywemo izo miliyoni 30. Ati naho inzu ziri munsi ya miliyoni 30 zikazajya zisoreshwa hakurikijwe agaciro k’inzu mu ibarura rizakorwa n’ikigo cy’igihugu gishinzwe ibarurishamibare.

Uwo mubonano ukaba warasubitswe mu gihe abadepite n’abahagaraliye guvernement bumvikanyeko umusoro ku nzu zo guturamo by’umwihariko uzabanza gushyirwa ku 0.5% ukazajya kuri 1% nyuma y’imyaka 4.

Banyarwanda rero muribonera ko ntacyo tutabwirwa ! jye ndabona ya mavuta y’inka Pahulo Kagame aherutse gucaho umugani avuga ko utayakandira mu kiganza ngo uyaherane abure aho anyura ari twebwe abanyarwanda yashakaga kwigirizaho nkana nubwo tutumvaga ibyo atubwira ahubwo tukamukomera amashyi twishimye ko twakiriye impanuro z’umubyeyi ! mbega akaga ! ngaho rero niduhaguruke dushake aho dupfumurira ha hagati y’intoke ze naho ubundi araduheranye, aratunize impande zose haba amajyaruguru amajyepfo iburasirazuba cg iburengerazuba.

Byanditswe ku wa 10/04/2018, na :
A.BEN NTUYENABO, KIGALI-RWANDA.

Rwanda: Prezida Pahulo Kagame yiyambaje abayobozi b’inzego z’ibanze mu guhangana n’abashaka gukomanyiriza u Rwanda

Mu mwiherero w’abayobozi bose b’inzego z’ibanze mu gihugu hose wabaye kuri 28 kugeza kuri 30 werurwe 2018 mu nsanganyamatsiko igira iti « Imiyoborere mpinduramatwara ishingiye ku muturage » ukaba warafunguwe na Prezida Kagame, mw’ ijambo rye yabagejejeho nkuko akunze kuryita impanuro yakomoje uko igihugu kibanye n’amahanga ! ati iyo umuntu atakwifuriza kubaho aramutse agufungiye amazi kabe naho yayubakira urukuta rukomeye rute ntiwabura aho utoborera ngo ugere kuri ya mazi ati aliko inzira nziza akaba ari ugutekereza cyane uburyo wahanga ayawe wacukura umwobo ukayakura ikuzimu cyangwa urëka ayo ku nzu uzifashisha kugeza ikindi gihe cy’imvura n’ibindi……bitavuga ko umuntu yaguhima ukaba wakwiyahura ahubwo bigomba kuguha imbaraga no gutekereza cyane ushaka igisubizo.

Prezida Kagame yakomeje avuga ko mu minsi ishize hari umuntu wamubwiye ko bagiye gukumira igihugu cy’u Rwanda ku buryo bakizenguruka haba amajyepfo, amajyaruguru, uburasirazuba ndetse n’uburengarazuba hakavuka inzara tukaryana ntaho dusohokera mbese bakatuniga ati aliko ibyo ntibishoboka ati urugero uzafate amavuta y’inka mu kiganza uyakande uzabona ko havamo amazi anyuze hagati y’intoki ati natwe rero nuko tugomba kubigenza kuko muri mwese ntawe utabona ibibazo igihugu gifite ati niyo mpamvu buri wese asabwa kuzuza inshingano ze ubutaruhuka yirinda ruswa n’ibiyikomokaho kugirango tudatanga icyuho kuri wa wundi ugambiriye kudukanda ngo tutinyagambura maze dupfe.

Prezida Kagame yasabye abo bayobozi kujya bakemura ibibazo bashoboye ku buryo bwihuse bitaraba byinshi cyangwa ngo bibande ku bibatwara amezi n’imyaka nta gisubizo bitari no mu nyungu z’igihugu kandi hari ibyo bakabanje gukemura vuba biboroheye ati ariyo mpamvu hari ibihora bigaruka mu manama menshi nkaya. Yakomeje abahanulira ko kubaho kwabo ari iki gihe ko bagomba kwima amatwi abababwira ko umunezero wabo uri imbere hazaza ati kuko abo bajya mu matwi y’abandi babashuka ko bagomba kwihutisha ibintu hari ubwo bashaka ubajya imbere bakabura n’umwe ! nguko.

Banyarwanda rero akaba nta gushidikanya kugihari muriyumvira uyu mugabo Pahulo ko akenshi impanuro ze ari impungenge aterwa nabo batavuga- rumwe mu miyoborere y’igihugu cyacu ariyo mpamvu yibanda ku iterambere ryihuse ategekesha igitugu gikabije nkaho aricyo kibazo nyamukuru abanyarwanda dufite ! ntidukeneye kubaho nka kimwe abanyaburayi bise ‘’ la culture du micro-onde ‘’ kuko nta musaruro urambye twabyungukiramo kdi iyihuse yabyaye ikiboze.

Byanditswe ku wa 02/04/2018, na :
A.BEN NTUYENABO, KIGALI-RWANDA.

Rwanda: Birabe ibyuya! Muri Minijust hashyizweho urwego rw’iperereza ruzajya rukoresha intwaro aho bibaye ngombwa.

Kuri 22/02/2018, Polisi y’u Rwanda yarashe impunzi za Kiziba

Uretse inzego z’iperereza DMI na CID zari zimenyerewe mu gukulikirana inzirakarengane no kuzinyoroza; Ministri w’ubutabera Bwana Busingye John abifashijwemo n’umunyamabanga wa Leta ushinzwe itegeko nshinga n’andi mategeko ya Leta ya FPR Me Evode Uwizeyimana; kuri 27/03/2018 basobanuriye inteko ya Sénat y’u Rwanda iby’ishyirwaho by’urwego rushya rw’igihugu rushinzwe iperereza no kugenza ibyaha hifashishijwe ikoranabuhanga arirwo Rwanda Investigation Bureau (RIB), rukazatangira gukora mu minsi ya vuba. Me Evode akaba yemeza ko urwo rwego RIP rushya ruzajya rukora nka FBI yo muli USA ati nubwo ubushobozi buzaba butandukanye.

Ministri Busingye we akaba yabwiye inteko ya Sénat ko hamaze kugezwa kuli za stations de police zose mu gihugu ikoranabuhanga IECMS (Integrated electronic case management system ) rizatuma inzego zose z’ubutabera zisangira amakuru n’ibikorwa mu kugenza ibyaha hamwe na ruliya rwego RIB/RWANDA. Yakomeje asobanura ko ruliya rwego rushya rurimo kwiyubaka ku buryo bwihuta cyane mu gihe akazi karwo kazaba ahanini ari ubugenzacyaha, ruzaba rufite kandi ububasha bwo gukora iperereza rigamije kuburizamo ibyaha biriho bikorwa n’abantu bagamije guhungabanya umudendezo w’igihugu yaba kumwenegihugu cg umunyamahanga ku buryo ukekwaho icyaha wese azajya afatwa. Akaba yaboneyeho no gutangariza inteko ya Sénat ko hagiye kujya hakoreshwa n’akuma kazwi nka ‘’ Ankle monitor/surveillance éléctronique, gakunze gukoreshwa n’inzego z’ubutabera mu bihugu byateye imbere kakazajya kifashishwa mukwambika umuntu ukekwaho icyaha cg cyamuhamye kugirango adashobora kurenga zone runaka abujijwe kuko kazajya gasakuza cyane bityo agashobora gufatwa, nguko!

Ministri Busingye yakomeje asobanulira inteko ya Sénat ko urwo rwego rushya RIP rufite ububasha bwo gufunga ahantu runaka (Zone ) mu gihe harimo gukorwaho iperereza no kubuza abantu kuhinjira; gushyira bariyeri mu muhanda hagamijwe kurinda umutekano no gukoresha intwaro bibaye ngombwa.

Banyarwanda rero nsanga ntako Leta ya FPR idakora ngo ibuze amahwemo abanyarwanda aliko bikanga bikananirana kuko ntiyabamara bityo bikagaragara ko nubundi abo izajya ishyira muli iyo informatic system IECMS/RIP ari abo izajya iba yagambiriye uretse ko hari nabatazayinjizwamo tutazajya tumenya irengero ryabo nkuko bimenyerewe. Tubitege amaso!

Byanditswe ku wa 02/04/2018, na :
A.BEN NTUYENABO, KIGALI-RWANDA.

Rwanda: ibihe by’icyunamo biregereje none indi mirambo yatangiye kuboneka

photo wikipédia

Mu gihe umwaka ushize ubuyobozi bw’umurenge wa Gatsata mu Karere ka Gasabo bwavugaga ko hakurikijwe amakuru yagiye atangwa n’abacitse ku icumu rya Jenoside muli uwo murenge nta murambo n’umwe usigaye utarashyingurwa mu cyubahiro; ni mu ntangiriro z’uku kwezi kwa Werurwe 2018 mu Murenge wa Gatsata , akagari ka Karuruma , umudugudu wa Kizigenza hafi y’ibigega bya Essence hamaze kuvumburwa icyobo basanzemo imibiri y’abantu bagera kuri 25 nanubu bataramenyekana bivugwa ko ari abatutsi bishwe n’interahamwe muli Jenoside yo muli Mata 1994, kikaba cyararatahuwe n’umupagasi wari wahawe ikiraka cyo gucukura W.C aho hantu, iyo mibiri ikaba yarasanganywe indangamuntu mu byangombwa byayo zari zigifunitse mu dusachets nkuko byemezwa n’ubuyobozi na police ku buryo twashatse kumenya ba nyirazo neza ngo turebe abo bantu abaribo neza aliko ubuyobozi ntibushake kuzerekana.

Andi makuru y’abaturanyi baturiye icyo cyobo bativuze kubera umutekano wabo bo baremeza ko iyo mibiri atari iy’abatutsi bazize Jenoside ahubwo ko ari abaturage bananiwe guhunga rugikubita ubwo ingabo za APR zari zimaze gufata Gatsata akaba arizo zabasogose dore ko kuva taliki ya 12/04/1994 abatuye mu Gatsata benshi bari bamaze guhunga berekeza iya Nyabugogo bakomeza Gitarama n’ahandi uko izo ngabo z’inkotanyi zagendaga zihigarulira aliko nako zihacukura ibyobo zarundagamo abo zisanze bose bagihumeka.

Abo baturanyi bakomeza bemeza ko mbere yuko bahunga Gatsata ku mataliki ya 10 na 11/04/1994 bari basize bashyinguye imirambo y’abatutsi bose bari bishwe mu gihe cy’umunsi umwe hifashishijwe ubuyobozi bwariho icyo gihe kandi ko ntabashyinguwe mu mva imwe barenga babili dore ko batari na benshi kubera ko ubwicanyi mu Gatsata ahanini bwakozwe nabari abajeppe mu gihe cy’iminsi ibili gusa mbere yuko APR ihafata nkuko bivugwa.

Kuri uyu wa kabili rero taliki ya 13/03/2018 akaba aribwo iyo mibiri yatunganijwe (kwozwa) itegereje kuzashyingurwa mu gihe cy’icyunamo, hagati aho nkuko nabivugaga ko hatajya habura inzirakarengane zibyitirirwa bamwe mu baturage naganiriye nabo abitwa Ntaganda, Kalisa n’abandi… bari barafungiwe Jenoside aliko bakaza kurekurwa bakaba bari mu mazi abira bateganyirizwa gusubira mu bihome, bashinjwa ko batigeze batanga amakuru yose kugeza ubwo hatahuwe indi mibiri, ubuyobozi bw’umurenge n’ubushinjacyaha bwa police bukaba bubarindishije ijisho kugeza igihe iyo mibiri izashyingurirwa mu minsi yagenewe icyunamo no kuzitabira uwo muhango bose. Baturage rero musenge cyane birabe ibyuya ntibibe amaraso !

Byanditswe ku wa 26/03/2018, na :
A.BEN NTUYENABO, KIGALI-RWANDA.

Rwanda: Padiri Wellars Uwamungu nahitemo, amese kamwe

Banyarwanda bakristu bavandimwe , nubwo tuvuga ngo umukobwa aba umwe agatukisha bose aliko ntibyari bisanzwe cyangwa bikwiye ko kwiyandarika k’umupadiri wa Kiliziya gatolika imwe kandi itunganye yagwiririrwa n’amahano mu muryango mugari w’Imana twemera twese nk’abayoboke !

Nkuko biherutse gutangazwa n’ibinyamakuru bimwe na bimwe byo mu Rwanda, Padiri Wellars UWAMUNGU wari usanzwe yungirije Abbé Gallican NDAYISABA Econome Général wa Archidiocѐse ya Kigali yaherutse gufatirwa ibyemezo yoherezwa muli Paroisse ya Ruli mu buryo butunguranye imwe muli za Paroisse zigize Diocѐse ya Kigali aho yashinzwe ubuyobozi , amategeko n’umutungo w’ishuri rikuru ry’abaforomokazi rya Ruli rigengwa na Kiliziya Gatolika biturutse ku myitwatire ye idahwitse yo kwanduza isura ya Archidiocѐse ya Kigali na Kiliziya muli rusange.

Ubwo uyu yarakimara kuvanwa muli Paroisse Shyorongi mu mwaka wa 2008 akazanwa ku cyicaro gikuru cya Diocѐse ya Kigali muli St. Paul yahise agirirwa ikizere n’umushumba w’Imana Wera Nyiricyubahiro Mgr Thaddée NTIHINYURWA amugira Econome Général wungirije aliko ibyo yashinzwe sibyo yakoze ahubwo yabaye nka ya hene ica ikiziriko ikiroha mu myaka y’abandi n’ibindi sinakubwira…..

Kubera ingeso zo hanze aha zidasanzwe zigaragara ku bihayimana ba Kiliziya Gatolika uretse abambari ba Leta y’agatsiko gusa, uyu mupadiri mu gushaka indamu n’irari ry’abagore yarabanje afunga iduka Kimenyabose ku izina rya Magasin d’alimentation de l’économat général de Kigali , yirukana abakozi bose nta nteguza, ntiyatinye no gusezerera abahasaziye nibura ngo bagere kuri Pension, nk’umupadiri ngo abe yakwibaza ko ari ukabarangiriza ubuzima nabi ahubwo yihutiye kuyikodesha n’umuntu ku giti cye wagombaga kumuha indonke zitubutse kugirango atunganirwe bityo iyo miryango yose itaha amara masa mu buryo butunguranye dore ko iyo alimentation yari isigaye yifitiye na Boulangerie yayo ku buryo uwashakaga umugati mwiza pain français, coupé, sanduich n’ibindi… nta handi yabarizaga .

Nyuma y’ibyo Padiri Wellars UWAMUNGU yarongeye agira atya aba asezeranije umusore witwa NDAGIJE n’umukobwa witwa JEANNE yakoreshaga muli St.Paul naho ubwo uwo mukobwa akaba yari asanzwe aryamana nawe ndetse afite n’inda ye aliko nyamusore ntabimenye, igihe gito bamaze gusezerana ya nda iba itamaje nyamukobwa umusore arabikeka aliko agerageza kubyihanganira, igihe cyo kubyara kigeze umusore aherekeza umukobwa kwa muganga bagezeyo umukobwa niko kumubwira ati noneho ube usubiye imuhira nimara kubyara ndaguhamagara umusore asubira imuhira ategereza ko umugore yamuhamagara araheba, niko kwigirayo asanga igitanda yamusizeho ntawuhari agerageza kumwihamagalira undi yanga kumwitaba ! nyuma bigeze ku mugoroba nyamugore aramuhamagara ati erega nabyaye aliko singaruka iwawe ! naho nyamukobwa yamaze kubyara ataha mu nzu shya ya Padiri Wellars yujuje ku Gisozi bigaragara ko iyo mipango yose yakozwe na Padiri Wellars UWAMUNGU yiba umugore w’abandi kugeza naho amushyira mu nzu ye yiyibagije ko yari yarabakoreyeho imihango y’isezerano ryo gushyingirwa. Ngayo ! umusore yaguye mu kantu biramuyobera na nubu yabuze icyo yongeraho dore ko yari n’umwe mu bakozi b’abashoferi be.

Ikindi ni uko kubera ayo marorerwa yose yiroshyemo nkuko tubikesha umwe mu bakontabure ba Archidiiocѐse uyu mupadiri akaba yaragiye yakira n’amafranga ya Archidiocѐse ku mitungo y’ubukode akishyirira mu mufuka ari nayo yubakishagamo ayo mazu no gukoresha muli izo ngeso mbi zose zidakwiriye umupadiri wa Kiliziya Gatolika.

Banyarwanda , bashumba b’Imana muturagiriye abakristu murabe maso bya birura hanze aha bidakomeza kutwihishamo dore ko ntawamenya ikiba kibyihishe inyuma nkuko ahandi byabaye icyorezo.

Byanditswe ku wa 02/02/2018, na :

A.BEN NTUYENABO, KIGALI-RWANDA.

Rwanda : Gahunda yo kurasa abagororwa irakomeje

Bamusohoye yambaye imyambaro ye ngo bavuge ko yari yuriye igipangu agiye gutoroka bakamurasa. Iteknika riragwira!

Inkuru y’akababaro n’iraswa ry’umugorogwa muri gereza ya nyanza, witwa Jotham Nsengiyumva. Hari saa moya na 20′ mw’ijoro ryo kuwa 28-29/01/2018 ubwo humvikanye urufaya rw’amasasu ahagana mu kibuga cy’umupira inyuma y’inyubako cyangwa igipangu cya Romeo wing na Delta wing (ibamo imfungwa z’abavuye Sierra Leone, Arusha boherejwe na lonu, abayisiramu 38 bafunzwe 2016, na Nsengiyumva Jotham (wishwe) na col Gaheza.

Amakuru dufite ni uko uwo mugororwa yasohowe aho yabaga akajyanwa ku kibuga cy’ umupira. Mbere yuko araswa habanje kuza imodoka ya director wa gereza sp John Mukono n’iy’ umukuru wa polisi mu karere ka Nyanza abona kuraswa.

Uyu warashwe Nsengiyumva Jotham, ni mwene Ntahontuye André na Nyirabagarura Rahab yavutse mu 1992 wabarizwaga mu mudugudu wa Rugeshi , akagari ka Rukinanyana umurenge wa Cyuve , akarere ka Musanze , intara y’amajyaruguru, akaba yaruvukiye mu mudugudu wa Rusarabuye, akagari ka Raba, umurenge wa Minazi, akarere ka Gakenge, intara y’amajyaruguru. Yafunzwe le 19/03/2014 akatirwa burundu. Yari muri dosiye na wa mugitifi wa Cyuve nawe barashe.

Yaregwaga icyaha cy’ubugambanyi, guhungabanya umundendezo w’igihugu , ubugambanyi no kwinjiza intwaro mu gihugu , ibyaha biteganywa kandi bihanishwa ingingo za 446, 461, 471 z’ itegeko ngenga no 01/2012 ol ryo kuwa 02/05/2012 rishyiraho igitabo cy’amategeko ahana ibyaha mu Rwanda.

Uyu nyakwigendera niwe warezwe ibisasu byarashwe mu karere ka musanze bigahitana IP Mucyurabuhoro Clement , yanaregwaga gutera ibisasu byarashwe ku uwahoze ari maire wa musanze Mme Bonifride Mpembyemungu.

Uburyo uyu nyakwigendera yarashwemo ni kimwe nubwo Nsengimana Alfred wari executive w’umurenge wa Cyuve yarashwemo, kuko uyu nawe nkuko

Umugororwa Jotham Nsengiyumva (uriya w’inzobe). Imana imuhe iruhuka ridashira

twabivuze haruguru yabanje gusorwa muri gereza araraswa. Kandi ukurikije aho yarafungiye ntiwakwemeza ko yari agiye gutoroka kuko igipangu cyarindwaga bikomeye kandi icyumba yabagamo cyafungwaga imfunguzo zikabikwa na gereza. Uko niko yabayeho kuva yafatwa kuko na gereza ya pck 1930 yabayemo naho yabaga mu cyumba cya wenyine kirimo na douche na toilet nkuko byari bimeze aho yari afungiye muri gereza ya Nyanza. Uyu mugororwa nta hantu na hamwe yajyaga atarinzwe bikomeye , haba gusenga gusurwa n’abandi hose yabaga agiye . Ntiyari yemerewe kwidagaduru nk’abandi ndetse n’ uburinzi ijoro n’amanywa bwari bupanzwe inyuma neza neza y’icyumba yari afungiwemo. Kandi nawe yari abizi kuburyo atapima akinisha gutoroka.

Amakuru yandi dufite nuko nyuma yitoroka ry’umunyamakuru Ntamuhanga Cassien , ushinzwe operation ku rwego rushinzwe imfungwa n’abagororwa RCS kuwa 02/12/2018 yagiye gukoresha inama muri gereza ya Nyanza ahagarika imbere uyu nyakwigendera Nsengiyumva Jotham , col Michel Habimana na Brigadier general Bizimungu Mahoro Selaphin ababwira ko bagomba kwitonda kuko ngo bazaraswa nibapima gutoroka yanababwiye ko ubutaha yifuza gukora inama byibuze areba imirambo iryamye imbere ye, aho kuhahagarika abantu nkuko yabikoze.

Iraswa ry’uyu mugororwa rije risanga inkuru zitandukanye zavugaga ko imfungwa za politiki zifungiye muri gereza ya nyanza zizaraswa. Iraswa ry’uyu mugororwa ntagushidikanya ryapanzwe na leta kandi rikozwe nayo. Mwitege rero iraswa ry’abandi benshi kuko n’umugambi wateguwe na leta nkuko tutahwemye kubigaragaza.

Uretse uriya waguye muri gerezan kwicana mu Rwanda byahawe intebe. Mw’ijoro ryo kuri wa kabili rishyira ku wa 25/01/2018 ahagana mu masaha ya saa sita na saa saba z’ijoro muli centre y’ubucuruzi ya Nkoto mu mudugudu wa Karehe akagari ka Shiri umurenge wa Rugarika ho mu Karere ka Kamonyi mu cyahoze ari prefegitura ya Gitarama abasore babili Nsengumuremyi Peter na mugenzi we utaramenyekana amazina ye bari bitwaje ibyuma bica uwitwa Twagirimana Straton babimuteraguye mu mutwe no mu muhogo undi Eric Nteziryayo nawe baramukomeretsa bikomeye.

Umuvugizi wa Police mu ntara y’amajyepfo Bwana CIP Kayigi Emmanuel yatangaje ko bafatanyije n’abaturage na nubu bagishakisha abo bicanyi.

Ubwicanyi bwose burimo kubera mu gihugu cyacu no hanze buri guterwa n’imiyoborere mibi y’abayobozi ba Leta ya FPR dore ko umwera uturutse ibukuru bucya wakwiriye hose.

Jean-Michel Manirafasha
Kigali, Rwanda

Rwanda: senateri Jim Inhofe yaguye mu mutego wa politiki y’iteknika rya FPR

Mu Rwanda haravugwa kuri Discours y’umusenateur JIM Inhofe muli congrѐs y’amerika inama yateranye ku wa 23/01/2018, aherutse gufata igihe cy’iminota 40 yose asobanura ibigwi bya Prezida Pahulo Kagame nkaho bari bamushyizemo urushiko dore ko bitanabura mu rugo rwa Leta y’agatsiko.

Banyarwanda, niba atari ukwirengagiza aho Sénateur JIM Inhofe wa Oklahama ntiyaba yarihishe inyuma y’amahano yagwiriye u Rwanda kuva 1994, mu gihe ahisha amaso amabi yose na nubu agikorwa na Leta y’agatsiko ka FPR ? Ngicyo kimwe mu byiyumviro bya opinion publique hano mu Rwanda.

Barongera bati igihe ni iki ko abihishe inyuma y’akaga kagushije ishyano ku Rwanda bagenda bivamo buhoro buhoro kandi ko wa mugani inkono ihira ikibatsi.

Sénateur JIM Inhofe avuga ko Prezida Kagame afatwa nk’umuntu udasanzwe wahagaritse Jenoside yari yananiye ibihugu bikomeye byongeye akaba atarashatse no kwihorera ku batutsi basaga ibihumbi 800 byari bimaze kwicwa n’intagondwa z’abahutu b’interahamwe ko ahubwo akurikije amahitamo ye yasakaje ubumwe n’ubwiyunge atitaye ku bwoko ubu n’ubu, yakomeje abwira abari muli congrѐs ko iterambere u Rwanda rugezeho ari nk’igitangaza nyuma ya Jenoside uhereye ku bikorwa-remezo, ikoranabuhanga, guca amasachets ya plastique, abaturage bakora cyane, ubukungu buzamuka ,umutekano n’ibindi…. Ati niyo mpamvu mufataho nk’inshuti y’Amerika.

Uyu musenateri ufitanye ubucuti bw’ubwiru na Prezida Kagame yageze aho akabiriza indoto ze dore ko akunze kuza mu Rwanda cyane ati hari aho nageze mu Rwanda nkeka ko ndi muli Leta z’unze ubumwe z’Amerika henshi hataboneka muli Afrika ! muriyumira !

Banyarwanda, Sénateur JIM Inhofe arirengagiza ibihumbi n’ibihumbagiza by’abantu baguye i Byumba, Nyacyonga, Gakurazo, Kibeho , mapping report/ONU, reports HRW, Amnesty international abajugunywe muli Rweru bo ntawamenye irengero ryabo none ati Prezida Kagame ntiyigeze yihorera! Iyavuga ati niko kazi yakoze gusa kugeza na nubu !

Sénateur Inhofe ntiyubahiriza amatwara ya demokrasi kuko yemera démocratie Kagamiѐnne widodeyeho itegeko-nshinga kugira ngo akomeze ahonyore abanyarwanda.

Banyarwanda, nkurikije ubusesenguzi buriho uyu musenateri asa nuca amarenga ko yaba yifuza Prezida Pahulo Kagame gukomeza kubabera icyambu mu karere k’ibiyaga bigari na Afrika muli rusange dore ko ari nawe ugiye kuyobora AU/2018. Aliko uyu nibitamuhitana mission azayigeraho yiyushye akuya yibwira ngo ashyigikiwe n’intare.

Byanditswe ku 27/01/2018, na :
A.BEN NTUYENABO, KIGALI-RWANDA.

Rwanda : Gahunda yo kuryoza abana b’abahutu ibyaha ba se bakoze irarimbanije

Prison Nyanza/photo twitter

Uhagarariye MAJ (maison d’aide à la justice) mu karere ka Nyanza witwa Dukundane Jean Frederic, kuwa gatatu yabwiye imfungwa za genocide zo muri gereza ya Nyanza ko abazitaba Imana batarishyura indishyi ko abana babo aribo bazishyuzwa, basanga ari nta mitungo basigiwe na ba nyakwigendera ngo bari guteganyirizwa uko abo bana babo bazajya bakora TIG (Travaux d’Intéret Géneraux) mu rwego rwo kwishyurira ababyeyi babo indishyi basize batishyuye.

Ibi yabivuze bitari mu byukuri muri gahunda ya muzanye kuko yari muri gahunda yiswe icyumweru cy’ubufasha mu by’amategeko (legal aid week) aho yari yazinduwe no gusobanura uko bafashwa gutangirwa ibirego Ku babifite binyuranye.

Jean-Michel Manirafasha
Kigali, Rwanda