Rwanda: Leta ya FPR irashakisha uburyo bwose yatsimbura mu ibanga inyeshyamba za FLN muli Nyungwe

FLN Nyungwe Ni muli iki cyumweru amakuru yizewe yatugezeho tuyakesha umwe mu bagize umutwe wa gisirikare ushinzwe gutabara byihuta aho rukomeye (forces spéciales) utarashatse kuvuga amazina ye kubera impamvu z’umutekano akaba akambitse hamwe na bagenzi be mu nkengero z’ishyamba rya Nyungwe yadutangarije ko ibintu bitaboroheye bitewe nuko bataramenya neza uruhande umwanzi aherereyemo muli iryo shyamba !

ati kandi akaba akomeje kutugabaho ibitero adutunguye kuburyo turimo gutekereza amayeri yose yashoboka. Yakomeje ambwira ko bamaze kwohereza bwihishwa abasirikare ba forces spéciales ibihumbi 2000 mu gihugu cy’u Burundi aho umwanzi bakeka ko yaba ariho afite indiri . Abarundi rero murabe maso !

Ati : hamwe n’abandi bazakomeza kujya boherezwayo urusorongo ,abo basirikare ngo bakazaba bashinzwe kugenzura no kugota amayira izo nyeshyamba za FLN zinyuramo ziza mu Rwanda cyangwa zisubirayo mu gihe hashobora kuvuka imirwano ikaze. Ubu ngo zikaba ziri ku butaka bw’u Burundi aho ziyoberanya mu ba civil.

Uyu musirikare yanakomeje ampamiriza ko abaturage baturiye Nyungwe cyane cyane mu Murenge wa Nyabimata bamaze guhabwa imyitozo yo kurashisha imbunda ndetse n’imyenda ya gisirikare ku buryo bagomba guhora biteguye urugamba no kudatanga amakuru yose arebana niyo zone mu gihe cyose hagishakwa amayeri yo gutsimbura izo nyeshyamba.

Hagati aho abacikacumu ba Jenoside bakaba bafitiye ubwoba Leta ya FPR ukuntu ishaka kubatoteza yitwaje ko baba bakorana n’inyeshyamba dore ko uwo musirikare yakomoje no kuri bamwe baba bandikirana nazo ndetse ko hari n’abazisanga, kuburyo bamwe batangiye gukurikiranwa n’inzego ziperereza.

Banyarwanda bacikacumu rero muriyumvira ko ishyamba atari ryeru ngirango mumaze iminsi mwibonera n’ukuntu FPR-INKOTANYI isigaye ikoresha amanama mw’ibanga ikabarura imiryango y’abaturage idatanga imisanzu muli FPR kandi nta kuntu abaturage baba batakoze ngo bubahirize gahunda zayo zose. Ngayo !

Byanditswe ku wa 16/08/2018, na :
A.BEN NTUYENABO, KIGALI-RWANDA.

Muri Gatsibo, abasilikari b’Inkotanyi barashe mu baturage, 8 muri bo bahasiga ubuzima

Mu karere ka Gatsibo, umurenge wa Rwimbogo. ku gice giherereye mu ishyamba ryikigo cya gisirikare cya gabiro, ku itariki 2 na 3/08/2018 harasiwe abaturage barenga 8, bane barashwe kuwa 2/08/2018 abandi bane baraswa bukeye bwaho kuwa 3/08/2018.

Kubera inzara nyinshi iri mu Rwanda (nzaramba ) aba baturage basanzwe bajya gucukura amabuye yagaciro yitwa corta muri iryo shyamba mu rwego rwo gushaka amaramuko. aha rero ngo abasirikare ntibashaka ko hagira ujyamuri iryo shyamba yaba umushumba uragiye, umuntu utashya inkwi, nucukura Korta (coltan).

Aha ariko abaturage baribaza impamvu batabafata bagahanwa namategeko aho kurasa mu kico. abo twaganiriye nabo batubwiyeko hashobora kuba harapfuye benshi barenze abo, abandi bagakomereka,cyane ko ari mwishyamba abenshi batanaboneka baribwa nimpyisi. kandi namwe murumva kugirango urase mu kivunge cyabantu hapfemo 8 haba hakomeretse benshi cyane.

Abapfuye bose nabo bafashe ari bazima kuri ayo matariki burijwe imodoka za gisirikare barajyanwa, ariko hari amakuru twabonye ko abapfuye bahawe ba nyirabo bakabahamba. mbese muri uwo murenge nukwirwa bahamba abantu barashwe nabasirikare.

Ikindi nuko ubu abasirikare baza kurara baraririye abantu mu byaro bakeka ko ngo bacukura amabuye, ubu twandika iyi nkuru abenshi barahunze abandi barafatwa. mbese abaturage bafite ubwoba bukabije kuburyo babona nta mutekano uhari.

Abaturage basanga ibi ari ubwicanyi bugambiriwe kuko abo bantu nta ntwaro baba bafite bakabaye bafatwa bagahanwa bagahanwa niba koko gucukura ayo mabuye ari icyaha. ariko kubica si ibintu byirwanda.

Ngayo nguko !

Jean-Charles Murego
Gatsibo, Rwanda

Prezida Kagame yashishikarije urubyiruko rw’itorero kwinjira mu gisilikare

Mu rwego rwo gusoza ikiciro cya 11 cy’itorero Indangamirwa ry’abanyeshuri barenga 560 biga mu mahanga no mu Rwanda kuva 29/05-05/08/2018; ni kuri iki cyumweru taliki ya 05/08/2018 i Gatsibo mu ishuri rikuru rya gisirikare habereye umuhango w’isoza ry’icyo kiciro ubwo Pahulo Kagame mu kurembuza urwo rubyiruko yarwingingiye kutagira impungenge zo kwinjira igisirikare cy’u Rwanda ngo kuko naho bahabonera ubumenyi butandukanye bihwanye n’ibyo bajya kwiga mu mahanga n’ibindi….

Yabeshye abo bana ko u Rwanda rwagize abasirikare batize mu gihe cyashize kubera imiyoborere mibi aliko ko ubu igisirikare cy’u Rwanda cyubakitse mu nzego zose ariyo mpamvu bahawe ikaze muli RDF ! mu kubayobya yakomeje anabemeza ko nta mwanzi wakandira ku Rwanda ko ndetse n’uwazana ibibazo yagira ibyago ! nguko !

Jenerali James Kabarebe nawe yunzemo avuga ko izo ndangamirwa za 11 zatojwe mu buryo bwihariye bwo gutegura no gutanga amabwiriza ku rugamba n’indi myitozo ya gisirikare !

None se banyarwanda rubyiruko, twemere dupfuke amaso , amatwi n’amabinga twemeze ko uwize ari uwafashe igihugu yarasanzwe yituriye mu mwobo wo ku Mulindi wa Byumba nk’ifuku…hejuru y’ubwicanyi bwahitanye inzirakarengane zitabarika z’abanyarwanda ? tubyibazeho !

Pahulo Kagame ni umubisha udatinya gukaraba amaraso yaba ay’abanyamahanga dore ko abo bonse rimwe bo abigirizaho nkana nkaho ariwe baremewe utemeye kuba imbata ye amwikiza uko ashatse kwose. Yumva ko yahora agaragiwe nabo ashora mu bikorwa by’intambara ku bw’inyungu ze abyita ko ari ukurengera ubusugire bw’igihugu kandi ahubwo ashaka uburyo bwo kurindira umutekano agatsiko bafatanyije ka FPR, ariyo mpamvu nyamukuru yo kureshya urubyiruko kwinjira mu gisirikare ikindi akaba abona ko agenda yinjira mu bihe bimukomereye umunsi ku wundi ko na nyina wundi ashobora kubyara umuhungu!

urwo rubyiruko abeshya se yibwira ko rudakurikirana iyamaganwa ry’ingabo ze na police kubera iraswa ry’abaturage rya buri munsi ku manywa y’ihangu nkuko yazibihayemo amabwiriza nduzi ko amategeko yo ntayo !

Banyarwanda rubyiruko, iyo Bwana Kagame ahamagalira rubanda kwinjira igisirikare yungikanya dore ko hari nabasigaye bayorwa ku mihanda ku ngufu ukazongera kumubona yambaye uniform ya gisirikare babyiganira ku mihanda n’abapolisi, ngizo inkeragutabara, ngayo amarondo n’ibindi…….harya umutekano uba urihe ? reka tubitege amaso.

Byanditswe ku wa 06/08/2018, na :
A.BEN NTUYENABO, KIGALI-RWANDA.

Rwanda: Urubanza rw’abo kwa Rwigara rukomeje kuba amayobera

Selon l’opinion publique buri wese akomeje kwibaza icyaha nyirizina abo kwa Rwigara bagirizwa ! kuko impamvu atari uko gusa Diane RWIGARA yashatse kwiyamamariza umwanya w’umukuru w’igihugu abangikanye na Pahulo Kagame ahubwo bigaragara ko hakomeje kumvikana impamvu za politiki zidafite aho zishingiye nkuko Leta y’agatsiko yamye ibikorera n’abandi banyarwanda batari bake barimo Mme Victoire Ingabire UMUHOZA.

Ubushinjacyaha rero bukaba nta bimenyetso bifatika byajyana aba bombi mu Rukiko Diane Rwigara na Nyina Adeline Rwigara cyane cyane ko bukomeje kwivuguruza mu nyito shya. Kuri uyu wa 24/07 urukiko rukaba rwanzuye ko urubanza rutangira kuburanishwa mu mizi hatitawe kubo rwari rwahamagaje babafatanyacyaha barimo J.Paul Turayishimiye n’abandi….nguko.

Twizere ko igihe kizagera imanza nk’izi zarenze amategeko aho n’ibitambambuga byazirangiza zizavaho abanyarwanda bagahumeka.

Banyarwanda ngo uyu mwari Diane Rwigara yigeze kuvuga ko barimo kwica abatutsi kandi abahutu bahari ! aliko se ayo magambo cyangwa amarangamutima ataniyehe nuwavugiye mu masengesho ko niba Karegeya yishwe ko n’abandi nkawe byagombye kuba ukwo ? undi nanone ati FPR ni agatsiko k’amabandi kafashe igihugu ku ngufu ! undi ati tuzajya tubarasa ku manywa y’ihangu ! cg ngo muzankuraho mu yihe nzira…..ya demokrasi se ?…hakoreshejwe imbunda se ?… byongeye ati ndaribwaribwa iyaba mwankundiraga mukaza vuba ! n’ibindi bipfuye nabi byose umuntu atarondora…. Ayo magambo yose ntawe utayagereranya n’ubwishongozi burimo n’ubugome uretse ko akarenze umunwa karushya ihamagara ! ni ukutamenya ko na nyina wundi abyara umuhungu ! tubitege amaso .

Byanditswe ku wa 26/07/2018, na :
A.BEN NTUYENABO, KIGALI-RWANDA.

Mu turere twa Nyagatare, Gatsibo na Kayonza bategetswe guhinga ibigori none byabuze isoko

Kuva muri season B 2017 kugeza uyu munsi abaturage bo mu turere twa Nyagatare, Gatsibo na Kayonza inzara nubukene bibamereye nabi kubera kubura isoko ryibigori. nkuko mubizi mu rwanda FPR yategetse guhinga igihingwa kimwe ni muri urwo rwego muri turiya turere ho bategetswe guhinga ibigori nibishyimbo. tubibutse ko ibi bikorwa muri gahunda ndende ya FPR yo kwicisha abaturage inzara nubukene, maze yo ikarushaho kwigwizaho imitungo.

bamwe mu baturage twaganiriye bo mu karere ka Gatsibo batubwiyeko bategetswe guhinga ibigori babwirwa ko bazajya babona amasoko none amaso yaheze mu kirere. bati ibigori byeze ari byinshi kuko aribyo abantu bose bategetswe guhinga ku buryo birimo kugura 80 RF . ni mugihe kandi ibishyimbo byo bigura 400. bati kugirango ugure udushyimbo two kurya mu rugo ugurisha imifuka 5 yibigori ukagura ibiro 100 byibishimbo. bati kandi abenshi muri twe tuba twarejeje nibitageze ku mifuka 3 bitewe nuko ntaho guhinga tuba dufite kuko abeshi dukodesha.

aha buri muntu wese yakwibaza niba ibigori bigura 80 bizavamo ibyo umuntu akeneye byose mu rugo, aha turavuga: ibishyimbo, ibijumba, imbayumbati, ibirayi, ibitoki umunyu, isabune, amavuta,mituel ikarita ya telephone nibindi… ukongeraho kwishyura amafumbire baba baguhaye, ukishyura imisanzu nimisoro . batubwiye kandi ko nushoboye kubigura atabibona hafi kuko biva kure nko mu ruhengeri havayo ibirayi. bati kandi biba bihenze cyane.

aba baturage kandi batubwiye ko iyo ugize ikindi uhinga urugero nkimyumbati barayirimbura bakaguca namafaranga arengeje agaciro ibyo wahinzemo. batubwiye kohari nabakwa imirima yabo kubera ko bateyemo imyumbati.cyane ko muri utwo turere twera imyumbati cyane. ibyo bituma

muri utwo turere hahora inzara idashira (NZARAMBA) ku buryo bamwe birwa bazenguruka bafunguza urugero nkabo mu karere ka kayonza.

aba baturage rero bakaba basaba leta kubakuriraho icyorezo kitwa GUHUZA UBUTAKA BAGAHINGA IGIHINGWA KIMWE. barasaba kandi koko leta yabasubiza uburenganzira ku butaka bwabo yabambuye, kandi bakemererwa guhinga ibyo bashaka bakarwanya inzara bati na bya bigori byabo bashaka nibwo bizabona isoko kuko bizaba ari bike.

ngayo nguko ibyiwacu.

Jean-Michel Manirafasha
Kayonza-Rwanda

Muhanga : Abantu basaga 80 bamaze gutabwa muri yombi baregwa guhungabanya umutekano

Ni mu minsi ishize aho mu Karere ka Muhanga mu majyepfo y’igihugu haherutse kumvikana abantu batamenyekanye bari bitwaje intwaro za gakondo batemaguye abanyerondo bane ariko ku bw’amahirwe ntihagira uwitaba Imana.

Umuyobozi w’akarere ka Muhanga , Uwamariya Béatrice yadutangarije kuri tél. ngendanwa ye ko abo baturage batawe muri yombi mu rwego rwo guhumuriza abaturage babagaragariza ko umutekano wabo uhari, ati ntitwari buceceke ngo tubyihorere ku buryo bamwe muri bo bagera kuri 19 batangiye no kubyemera bakaba bari gukorerwa amadossiers ngo bashyikirizwe ubutabera.

Banyarwanda , ibi bintu ntawe utabibonamo urujijo ruturutse kuri iyi Leta y’agatsiko ka FPR-INKOTANYI, none se ntibyumvikana ukuntu abaturage bangana batyo baba barishoye mu bikorwa nkibyo nta mpamvu ihari ! ni ukubitega amaso.

Ibi bikaba bije bikulikira nanone iby’ifatwa ry’uwitwa SHYAKA Hassan wo mu Karere ka Kamonyi umurenge wa Musambira uregwa kuba yararabuye ko hari abantu bitwaje intwaro za gakondo baherutse kugaba ibitero mu baturage ba Kamonyi bakanabatemagura.

Umuyobozi w’akarere ka Kamonyi KAYITESI Alice we akaba yarasabaga abaturage kwirinda no kutita kuri ibyo bikorwa kuko ngo bishobora guteza imidugararo mu gihugu hose.

CIP Emmanuel KAYIGI akaba avuga ko uriya mugabo Hassan SHYAKA agiye gukurikiranwa icyatumye avugira ku karubanda ikibyo bikorwa by’ubugizi bwa nabi. Akomeza kandi yemeza abaturage ko ibyo bikorwa birimo guterwa n’abajura bamaze kuba benshi mu ntara y’amajyepfo.

Banyarwanda, aliko se uretse kutubeshya no kutuyobya ko mbona byose byibasiye Intara y’amajyepfo nibirimo kubera Nyaruguru mu ishyamba rya Nyungwe harimo kumvikana amasasu umunsi ku wundi nabyo ni abajura ? ubwo se umutekano waba urihe niba igihugu cyacu gisigaye giterwa n’abajura bishwe n’amavunja baba bitwaje intwaro za gakondo ndetse n’imbunda zirimo amasasu kugeza ubwo ingabo zacu zibakubita amaso amaguru zikayabangira ingata ! birababaje rwose !

Banyarwanda rero ntibakababeshye ikigaragara gusa ni uko bariya baturage batawe muri yombi abenshi muribo baba bahawe breefing yibyo bagomba gutsimbararaho kugirango badakomeretsa Leta y’agatsiko ibintu bikadogera. Nguko!

Byanditswe ku wa 24/07/2018, na :
A.BEN NTUYENABO, KIGALI-RWANDA.

Umwenegihugu ni iki? Umwenegihugu ni nde?

UMWENEGIHUGU

Umwenegihugu ni Umunyagihugu ari we Nyirigihugu.

IGIHUGU

Igihugu ni IMPANO Y’IMANA, yaracyiguhaye ngo kibe icyawe, ugituremo, ugitegeke, uteke, utekanye, ukibemo UMWAMI niyo waba ukiri umwana ; ukiranduremo GATANYA ugiteremo AGAHUZA gahuza ABENEGIHUGU.

Cyarazwe Abakurambere b’ibikubitiro, bagenda bagisimburanamo uko iminsi itashye, kugeze kuri wowe wa none. Gituze mu mutima wawe; uko ugituyemo kigutambemo kabone n’ubwo waba utuye i Shyanga, ba iwanyu ntugasibe kuvuga IWACU. IWACU nibe mu ndyo no mu ndyamo ya buri munsi, no binyobwa ujye ucyigotomera

Uko bwije n’uko bukeye, mu buriri ntimukarare ukubiri ; cyikube mu mutwe, mu mutima, mu maboko no mu maguru ; uko uteye intamwe mube muri kumwe. Igihugu cyawe ni icyawe, wowe na cyo muri MAHWANE. Ni umurage Kamezamiryango, ni Imbata itetse ku mutima w’UMWENEGIHUGU aho ava akagera, ntakivura, ntakivutswa, kuko agitahamo kikamuturamo; ni MAGARANTUSIGE, ni KA KARA GACIKA KU KANDI ; kandi gashoye muri GAKONDO, ujye ubirebera ku MUKONDO. URAGENA NTUGENERWA.

Igihugu cyawe gisigiye n’UMUBYEYI UKUBYARA, uragituka UGATUNGURWA; urakigambanira UKAZAGAMBURUZWA n’iminsi; URAGITANGA rukazagutanga imbere; URAGITERA ukazasigara utera imigeri imigina.

GAKONDO

GAKONDO ni UMUGANDA igihugu kigandiyeho, ni INGARIKABIGANZA, aho u Rwanda rutamba ineza, igasa n’URUTAMBABARENZI rutondagira kugira ngo ari ho rushinga imizi. Gakondo ni aho ; ni hariya Sokuru na Sogokuruza kuzageza kuri Kazi ka MUNTU yakonze, akahagira UBUKONDE bwe, akoresheje INKONZO, hakaza kuba GAKONDO, ari yo warazwe n’ABAKURAMBERE kuva kuri MUNTU kugeza kuri wowe kandi bikazaba uruhererekane UBUZIRAHEREZO.

Mu gusanganya IGIHUGU ari ko kugisaranganya no kugisangira, UMWENEGIHUGU ashingira kuri GAKONDO ka KAMEZAMIRYANGO ; hariya hari icyororo cya MUNTU.
GAKONDO k’igihugu kamaze imyaka ingoma bihumbi kakondeye abakonde ubutaka buratahwa, buraturwa, burahingwa, buba imbata itabaturwa ; buba GAKONDO kabo.
UMWENEGIHUGU ni UMWENEBUTAKA. Ubwo butaka bwe bukamubyarira kuba NYIRUBUTAKA.
Muri GAKONDO unahasanga Isangano risangiwe n’ABAKONDE, baba bakomoka ku Mukurambere umwe, bazi kandi bavuga buri gihe mu MUTEREKERO wabo.

Ngiyo GAKONDO, kunda uyumve, uyiteho, uyituze mu gituza maze na yo igutuze mu Rwanda. GAKONDO yawe ngiyi reba:

– Bungwe bw’Abenengwe ;
– Bugoyi bw’Abasinga ;
– Burwi y’Abasinga ;
– Nduga y’Ababanda ;
– Buriza bw’Abongera ;
– Mubari y’Abazigaba ;
– Gisaka cy’Abagesera ;
– Bugara y’Abacyaba;
– Kinyaga cy’Abasinga.

GAKONDO ni igihugu mu RWANDA, UBWATSI ni igihugu muri GAKNDO ; igihugu mu gihugu na cyo mu gihugu ; ngurwo urusobe rw’IBIHUGU BISOBETSE mu NYABUTATU budatenguha ntibutane bukaba bwambariye kuyihanguramo IGIHUNGA maze urwo rusobe rukaba INSANGIRABIHUGU y’ABADAHUNGA.

UBWATSI

Ubwatsi butuye muri Gakondo kandi Gakondo izira ubucike ni na yo mpamvu itazacika, KIRAZIRA. Ngicyo cya gihugu mu kindi ; UMWENEGIHUGU agomba kwumva ; akarambanya ya nyabutatu ariko ayitaka ka GAHUZA ngo itazigera itagarana.

Mu nzira y’uko kurambanya ikaba isigiye n’urunana aho umuntu aba mu bandi ndetse bakamwita nk’uko hitwa ; akahaba imbata akaba uw’aho ariko abisangiye n’abahavuka.

Kugira ngo uwumva yumve neza, muze twigabe kwa Mashira muri Gakondo ya Nduga, ndavuga Nduga Ngari ya Gisari na Kibanda muzi. Ibihugu bigize Nduga ari bwo BWATSI:

Busanza bw’Amajyaruguru : Abanyabusanza ;
Nduga : Abanyanduga ;
Amayaga : Abanyamayaga ;
Rukoma : Abanyarukoma ;
Ndiza : Abanyandiza ;
Marangara : Abanyamarangara ;
Kabagari : Abanyakabagari ;

Aho hose tuvuga ABENEGIHUGU ari bo BENUBWATSI ; izina ryacyo rigatura abagituye ; rikabataha mu myifatire, no mu mimerere rikahatura, rikababera no mu ngendo ; bakanaryumva batumvirana, rikbabera INDANGAMUNTU.

UMUSOZI

Ngiyo INDANGAGACIRO itagira igiciro kuko irasanya igana i musozi ngo ibone gusingira UMUSOZI. Unawurebye ni umusozi w’UBWATSI, uri mu BWATSI, ukagira impinga nyina w’Impungiramirara ibyara amahumbezi BENUMUSOZI bakagarura ubuyanja.Uvubura n’Inkangabagisha bene inka bakazabona umukamo utubutse.

Ugira Imibande igiye kubanda icyago, igahashya ubugome n’urugomo, ukabyohera mu masenga atagwa imvura ntave izuba.

Ugira ibibaya n’bisiza bisizana bisanga imigezi Abanyarwanda bagiye kuziyuhagiriramo amahano y’ibirumbo by’ibihararumbu byarumbije Umusozi Benewo bagamije kurumbura.

Ngaho aho ugera ukumva utashye iwanyu, ariko ugenda uvuga uti iwacu ; iwacu iwacu incuro ibihumbi ; iwacu ntihapfa ntihapfusha n’uwahapfuye amoya ntabwo azapfa ahubwo azicara ari Kabunga.

Hano UMWENEGIHUGU abaye NYIRUMUSOZI, umusozi ni uwe uko wakabaye ; none rero se Nyirumusozi, gira uwugende umuzamuko, no mu mumanuko ugire uko ugenza, ugira ngo uwumve UMUHUMEKO. Umusozi wawe witegereze maze uwurebe uko wakabaye, inkiko zawo n’indi misozi, imigezi utemba n’idatemba n’uko uzagere ku MURENGE aho uzicara ukarambya.

UMURENGE

Ngiki IGICUMBI cy’Igihugu cyawe, ari na cyo cya Gakondo yawe, cyikaba ni icy’UBWATSI bwawe ; gomera gungira uri iwanyu, uri mu bawe, uri mu wawe, ntuvegetwa ntuvogerwa, vugana ivogonyo wivovote, ukore iyo bwabaga uhambadike, ugira ngo UMURENGE urengere abawutuwe.

Wugire Umurengera w’ikirenga, ube Umuremure uruta iyindi n’uko uhicare uhace iteka ko MUNTU agomba IKUZO rya MUNTU ; kuko ari IREMO rya byose Imana yamuraze kubitunga ngo bimutunganire ATEKANYE UBUZIRAHEREZO.

Aho ku Nteko nta gutinya, shimikira ushire amanga, ucinye amakaraza iyo amanywa akambye, ucinye igikaka ujye mu gikari, ugaruke mu nzu wihe icyo ushaka ; uri IWANYU, vuga ngo iwacu, vuga utavanga unavuvumange ; ntukavangirwemo uri iwanyu.

Uri UMUTURAGE ku MURENGE aho uhora uhata inzira ibirenge ; wenda ukomoka no mu Barenge aba bo kwa Jeni ya Rurenge ndetse no kwa Kimezamiryango nawe ukomoka kwa Rurenge ukaba witwa NYIRUMURENGE.

Shinga rero unashinyirize, ukanure amaso ushinyike amenyo nka ya mandwa isenga Imana ; unihure ijambo mbaturamuntu ; uraribwira abawe bose, cyane cyane abakubyaye, ba so wanyu na nyoko wanyu, ba nyogusenge n’ababyara ; reba abaturanyi mu gahinga, abo mu kabande ubabandure, abo mu bisiza no mu misizi, ubahe injyana ijyana iwanyu ; muri ahanyu, muri iwanyu Imana Rurema yarahabaremeye.

Haguruka wigabe ku ndengo nuko urebe Imihana yose, Inzu zaho uzizi zose ari mu Bahanga warahagenze, no mu Baheka warahanywanye, iyo rituruka ni mu Bacumbi, rikaza kurengera mu Bakusi.

Hagarara rero urinde ibyuma kuko ibyomoro biri hafi, uwo MURENGE uri mu birenge UBUTAKA wambaye ni ubwaye ; ni wa MURAGE w’IMANA uva mu BASOKURUZA ibihumbi ; ntukawutatire KIRAZIRA.

Ngaho aho ukura kuba UMWENEGIHUGU, ugahita witwa n’uwa GAKONDO, uri NYIRUBWATSI butononwa ; ukaza kwitwa NYIRUMURENGE urengera abawo ngo babe iwabo ari yo mvano y’UMWENEGIHUGU.

Nsabimana Evariste

Rwanda: gen. James Kabarebe nawe yigeze guhunahuna

Ubwo aherutse gucunaguza urubyiruko rw’intore ziswe imbaturabukungu zarimo zitorezwa i Nyagatare du 17-23/06/2018; uyu mu Ministri James Kabarebe yihanangirije urwo rubyiruko ko rugomba kureka kujya mu bihugu by’ibituranyi guhunahunayo cyane cyane muli Ouganda kuko mu Rwanda ntakihabuze ko umutekano n’iterambere ari ntamakemwa aliko akaba yarirengagije ko abanyarwanda tuziko nawe yigeze guhunahuna ubwo yari akiri impunzi muli icyo gihugu aho mu gihe babaga bitegura kugaba ibitero ku Rwanda mbere y’intambara Kabarebe n’agatsiko babaga bafatanije bakunze kujya biyorosa ijoro bakinjira ku butaka bw’u Rwanda cyane cyane ahitwa Nyagatare mu Mutara bagashimuta amatungo y’abaturage bagasubira hakurya muli Ouganda, si rimwe si kabili ku buryo ingabo za Habyarimana zahoraga zibirukankana bwacya nazo zigatangaza ko ari abajura bari baje kwiba amatungo kubera politiki ya Habyarimana yo gutinya kuvuga ko ari amabandi aturutse kuwo yitaga inshuti ye Museveni.

Banyarwanda rero koko »utabusya abwita ubumera » bivuga ngo ushize impumu yiyibagiza amagorwa azahutsemo ahubwo agatsikamiza agahato abo bahoze bayasangiye n’abo asanze, nguko uko Ministri Kabarebe abayeho, araburira abaturage bajya kwishakishiriza iyo bweze ko ashobora kubafatira ibyemezo ! none se ko ari ba Ngirente babigenze bate ? aragenda abiba mu rubyiruko ingengabitekerezo y’urwango aruteranya n’abaturage bagenzi babo b’ibihugu duturanye birimo u Burundi, DRC, na Ouganda avuga ko bitifuriza abanyarwanda amahoro kubera icyo yita ishyari ry’iterambere n’umutekano u Rwanda rufite! aliko se agatsiko kayoboye u Rwanda kazagirana ibibazo n’ibihugu by’ibituranyi byitirirwe abaturage basanzwe bahahirana, basangira byose ! ntibyumvikana !

Gén. Kabarebe yakomeje abwira urwo rubyiruko kudasubira muli Ouganda ngo kuko babakubita, bakabafunga, bakanabacunaguza aliko ntibumve ! ati ubu amabassade yacu i Kampala nta kandi kazi igikora uretse kwirirwa ishakisha abanyarwanda bafashwe, bakubiswe, bafunzwe, bishwe…… ati mujya guhunahuna Ouganda mushakayo iki ? ko twavuyeyo tukaba twarabonye igihugu cyacu ! ngayo !

Banyarwanda, kuki Gén. Kabarebe adakomoza ku banyarwanda yohereza muli Ouganda mu rwego rw’ubutasi no gukorerayo ubugizi bwa nabi ko bashobora kuba aribo bafatwa n’inzego z’iperereza noneho mu gusisibiranya amayira Kabarebe akavuga ko ari abaturage b’inzirakarengane ? rubyiruko rero nimukanguke ntimukajijishwe n’inkozi z’ibibi mubona! Kabarebe se ayobewe uko agenzereza intasi iyo ifatiwe ku butaka bw’u Rwanda ? ‘ akebo rero kajya iwamugarura’. Muramenye ntakabashyire mu gatebo kamwe n’abo yohereza muli ubwo bugizi bwa nabi ! Muraburiwe .

Ikindi Banyarwanda rero nsanga Ministri Kabarebe yagombye kujya abanza kwiga ku mvugo akoresha kuko intore z’imbaturabukungu zihunahuna keretse ari imbwa kuko arizo tuziho guhunahuna bityo zikaba zitashobora no kubaka igihugu.

Byanditswe ku wa 26/06/2018, na:
A.BEN NTUYENABO, KIGALI-RWANDA.

Rwanda : Uruganda rw’inkweto rwa Rujugiro Tribert rwaratwitswe rumaze gusahurwa

inkweto bodaboda/ukwezi.com

Uruganda rwari urw’inkweto bita BODABODA zikoze muli plastique aliko rutigeze rukora igihe kirekire nyuma yuko rwahagaritswe na Leta ya FPR kuba rwari urw’umunyemari RUJUGIRO Ayabatwa Tribert utavugarumwe nayo kuri ubu wibera mu buhungiro; ni kuri uyu wa 06/06/2018 rwakongejwe umuliro n’abagizi ba nabi rurashya rurakwongoka guhera mu ijoro kugeza bukeye nta mutabazi ubonetse nkuko bisanzwe bigenda aho police yihutiraga gutabara. Aba bakaba barahageze bitinze nko kwiyumanganya ngo baje kuzimya aliko hose hamaze gukongoka.

Inyubako y’uru ruganda rw’umuherwe RUJUGIRO rukaba rwari ruherereye mu Kagari ka Karuruma, umurenge wa Gatsata, akarere ka Gasabo mu mugi wa Kigali hafi yahahoze ibagiro ry’amatungo ryabanje ku bw’abadage mu mugi wa Kigali bwa mbere bitaga kwa ‘‘deborogaravu’’ ahahoze muli Komini Rutongo wambutse ikiraro cya Nyabugogo ugana i Byumba. Ahongaho uyu Muherwe Rujugiro akaba yarahafite n’ifamu y’amatungo y’inka aliko ntawamenya iyo yarengeye ku buryo kuri ubu Leta y’agatsiko igiye kuhuzuza ikigo nderabuzima cya Rwinyana.

Ikwongoka ry’uru ruganda rikaba ryarabereye bamwe urujijo rwo kutamenya ikibyihishe inyuma, ubwo twabazaga Gitifu w’umurenge wa Gatsata Bwana Faustin NTARYAMIRA yagize impungenge yirinda kugira ukuri na busa abitangazaho kandi bamwe mu baturage batavuze amazina yabo ngo batavaho babizira batubwiye ko iyo nkongi yagizwemo uruhare n’umwe mu bashinzwe kurinda umutekano w’abantu n’ibyabo byongeye bati nta n’ibikoresho by’uruganda nk’amamashini byari bikirurimo kuko byagiye bitwarwa ku minsi itandukanye n’abantu basaga n’abapolisi biyoberanyije mu myenda ya gisivili mbere yuko iyi nkongi iba.

Hamwe n’abaturage benshi bari baje gushungera twashatse kumenya uwaba yarahagaraliye ubuyobozi bw’uru ruganda ngo agire icyo abivugaho n’ingano y’ibyaba byangiritse aliko bibanza kudakunda mu gihe yari agishakishwa nyuma yaho yaje kugaragara ku mazina ya Samuel MAINA nka commissionaire wa Leta y’agatsiko nkuko ikunze kubigenza nibwo yahise atangaza ko hahiye 90t z’ibikoresho bya plastique byari bifite agaciro gasaga miliyoni 197, avuga ku cyateye inkongi ati ni uwaharindaga. Nguko !

Muriyumvira ko nawe yemeza ko hangirikiyemo ibikoresho bya plastique gusa ! Amamashini se yo yatwawe na nde ? iryo ni ibanga à la FPR ! Nibyo navugaga rero ko ari umukino umwe nk’uw’umuryango wo kwa ba Rwigara babuze uko bashimuta bya bimashini byakoraga itabi none uburyo basigaranye nubwo kubisahura bakoresheje cyamunara ! mbega Leta !

Banyarwanda rero amayeri ya FPR ni menshi ni ugukomeza kuba maso kugeza ku ndunduro naho ubundi aya masiha-rusahuzi agambiriye kutumaraho abantu n’ibintu.

Byanditswe ku wa 10/06/2018, na :
A.BEN NTUYENABO, KIGALI-RWANDA.

Rwanda : leta ya FPR inkotanyi igiye kugura intwaro zo kurinda ibitero byo mu kirere.

Sergei Lavlov

Kubera kwikanga baringa u Rwanda rwatangiye ibiganiro n’igihugu cy’uburusiya mu nzira yo gusaba icyo gihugu kuba cyarugurisha intwaro zarufasha kurinda ikirere cyarwo. Ibyo bikaba bije bikulikira ibyemezo by’inteko ishinga amategeko y’u Rwanda ubwo iherutse kwemeza umushinga w’itegeko riha uburenganzira abanyagihugu bwo kujya batunga imbunda mu gihe babisabye no kwemerera uwazicuruza ku butaka bw’u Rwanda aramutse yujuje ibyangombwa byose bisabwa n’inzego zibifitiye ububasha. Irindi tegeko naryo riheruka ryashyizweho umukono rikaba ari iryemezaga gushora akayabo ka Miliyari 5 y’amanyarwanda mu kugura cameras 124 (CCTV) zo gukaza umutekano ahantu hateranira abantu benshi mu mugi wa Kigali, wa mutekano baririmba 100% se urihe ?

Ni muli urwo rwego ubwo yari mu ruzinduko mu Rwanda kuri iki cyumweru , Ministri w’ububanyi n’amahanga w’uburusiya Bwana SERGEI Lavlov nawe yagize ati : uretse ubufatanye bw’ikoranabuhanga rya gisirikare dufitanye n’u Rwanda, za Hélicoptères , ibimodoka n’intwaro ntoya byaguzwe mu gihugu cyanjye ubu turi mu biganiro mu rwego rwo kurebera hamwe uburyo twabagurisha intwaro zo kurinda ikirere (AIR DEFENSE SYSTEMS ) , akaba ngo ari uburyo bugezweho bw’intwaro zo kwifashisha za missiles mu gukingira igihugu.

Ministri w’ububanyi n’amahanga w’u Rwanda , Mme Louise MUSHIKIWABO we akaba atangaza ko u Rwanda rwiteguye gufatanya n’uburusiya mu bikorwa byose byo kugarura amahoro n’umutekano muli Afrika aho anemeza ko u Rwanda rushobora kuzaba umuyoboro uzahuza Uburusiya n’ibihugu bigize umuryango w’Afrika y’uburasirazuba (EAC).

Banyarwanda muriyumvira se ! aho babampatsibihugu b’abanyamerika n’abongereza ntibaba batangiye kutuvanaho amaboko tukaba dutangiye gutarataza tugana mu Burusiya, mu Bufaransa twahekuye n’ahandi…. hirya no hino, twabuze icyo dufata nicyo tureka ?

Aho ntibyaba ari icyoba duterwa no kuba muri iyi minsi ishize harabayeho amasezerano y’ubufatanye mu bya gisirikare uburusiya bwashimangiranye n’igihugu kigituranyi cya republika iharanira demokrasi ya Congo ndetse n’u BURUNDI kandi ibyo bihugu bidacana uwaka na Kagame ?

Aho ntibyaba ari uko Kagame nk’umukozi waba mpatsibihugu b’abanyamerika abona ko ubufatanye bw’uburusiya mu bya gisirikare n’ibihugu bimukikije byaba bimuteye impungenge mu gihe umubano hagati ya amerika n’uburusiya harangwa urunturuntu muli iki gihe ?

Ese u Rwanda niruramuka rutanze akayabo rugura ibyo bitwaro ugereranije agaciro kazaba kangana na budget y’igihugu y’umwaka wose, ruzashobora maintenance yabyo mu gihe ruhangayikishijwe n’induru zirimo kuvugiriza mu nteko ishinga amategeko no mu bagenzuzi bakuru b’imari ya Leta ku barigisa imari y’igihugu hiyongereyeho n’abaryi ba ruswa yayogoje igihugu aliko Leta ya FPR ikaba yarananiwe kubashyikiriza ubutabera kubera kubakingira ikibaba ? Ibyo byose n’ibindi bibazo byugarije igihugu ntarondoye ni ukubitega amaso ! gusa nk’uburusiya igihugu kiza kumwanya wa gatatu nyuma y’ubufaransa na U.S mu kugurisha intwaro nyinshi ku isi ntacyo bigitwaye buramutse buriye no ku gafaranga ka nyakujya nk’u Rwanda ! birababaje !