Archives par étiquette : Kalisa Mbanda

Mu Rwanda, Facebook na Whatsapp bigiye gufungwa kubera amatora ya perezida wa Republika

Kagame

Ni  kuri  uyu  kane  taliki  ya  25/05/2017,  mu  kiganiro  n’abanyamakuru  ubwo  ubuyobozi bwa  Komisiyo  y’igihugu  y’amatora  aho  Prof.  Kalisa  Mbanda  na  Munyaneza  Charles  batangarije  abanyamakuru  ko  imbuga  nka  Facebook  na  Watsapp  zizafungwa  biramutse  bishimangiwe  ko  zirimo  kubangamira  imigendekere  iciye  ukubiri  n’amategeko  ya  Komisiyo  mu matora  ya  Prezida  wa  republika  muli  kanama  2017.

 

Aba  bayobozi  ba  Komisiyo  y’amatora  bakomeje  batangaza  ko  uretse  no  mu  gihe  cy’amatora  nyirizina  imbuga  nkoranya-mbaga  zikoreshwa  mu  buryo  butemewe  harimo  kuba  zamamaza  abakandida  igihe  kitaragera  zigiye  gufungwa  kugirango  bitabangamira  amatora,  kandi  zimwe  zirazwi  bigaragara  ko  zatangiye   kubikora  igihe  kitaragera   kimwe  n’abakandida  biyamamaza  bataremererwa  abo  bose  bazafatirwa  ibihano.

 

Muli  icyo  kiganiro  kandi  hagarutswe  ku  kayabo  k’amafranga  azakoreshwa  muli  iyo  ngirwa-matora  angana  na  6.600.000.000 F  y’amafranga  y’u  Rwanda  mu  gihe  mbere  hari  hakozwe  budget  ya  Miliyari  eshanu  gusa!  Komisiyo  ikaba  isobanura  ko  ako  kayabo  k’amafranga  yiyongereye  bitewe  ahanini  no  kuzakoreshwa  mu  bikorwa  birimo  gukurikirana  ukwiyamamaza  kw’abakandida,  guhugura  abazatoresha  no  kwigisha  abanyarwanda  ibijyanye  n’uburere  mboneragihugu.

 

Banyarwanda  banyarwandakazi   biragaragara  ko  iyo  budget  ikomoka  mu  mitsi  y’abaturage    nta  mpamvu  nimwe  ituma  yiyongera  uko  bwije  uko  bukeye  uretse  kuba  azinjira  mu  mifuka  ya  bamwe  muli  ba  Rusahuliramunduru  bitwaje  iyo  ngirwa-matora  mu  gihe  ubukene  n’inzara  binuma  hirya  hino  mu  gihugu  cyacu!

 

Banyarwanda  banyarwandakazi,  aya  mafranga  aho  kugirango  apfushwe  ubusa  akoreshwa  muli riliya  kinamico  ry’amatora  tuzi  twese  ko  yemejwe  bidasubirwaho  n’ihindurwa  ry’itegeko  nshinga  ryadodewe   Giti  mu  jisho  Paul  Kagame  aho  yifuza  kuzayobora  u  Rwanda  ubuziraherezo ; jye  nsanga  yakagombye  kuba  igisubizo  kimwe  ku  banyarwanda  bose  hakorwa  umushinga  waguye  mu  kubagezaho  amazi  meza   bityo  bakaba  birinze  indwara  zinyuranye  zabayogoje  dore  ko  kugerageza  demokrasi  kwa  Leta  y’agatsiko  ka  FPR    byo  biri  kure  nk’ukwezi. Murakoze.

 

 
Byanditswe  ku wa  25/05/2017, na:
 A.BEN  NTUYENABO,  KIGALI-RWANDA. 

Muri univerisite,  campus  Huye (Ruhande),  ku banyeshuri 11.000, abitabiriye  amatora  ni 250 gusa, naho abarimu babo batoye ntibarenga batatu

ruhandeMu gihe  commission  y’igihugu  y’amatora  mu  Rwanda (NEC)  yishimira  uko  igikorwa  cy’amatora  y’abajyanama  rusange  nay’abakandida  b’abagore  bavuyemo  30%  by’abagize  inama  njyanama  z’uturere  yabaye  kuwa  22/02/2016  cyagenze; bamwe  mu  banyarwanda  ntibishimiye  na busa  uko  yateguwe  nuko  yashyizwe  mu bikorwa, bakaba  bavuga  ko  yaranzwe  n’iteknica  risanzwe  rikorwa  na  FPR-KAGAME. Urugero  rwa  hafi  ni  abanyeshuri  bo  muli  UNR  Campus  y’ I RUHANDE  mu  karere  ka  HUYE  barenga  ibihumbi  cumi  na kimwe (11.000)  bivugira  ko  batatoye  mu  bwisanzure  cyangwa  bamwe  bagahitamo  kubireka  kubera  ko  basabwaga  gutora  abakandida  batigeze  babona, ku buryo  ku  munsi  w’amatora , mu  marembo  ya  Kaminuza  hari  indangururamajwi  n’abashyushyarugamba  bahamagalira  abanyeshuri  kujya  gutora  ku  ngufu.

Abanyeshuri  ba  kaminuza  y’I  RUHANDE  bakaba  barinubiraga  kutamenya  neza  imyirondoro  n’ibigwi  by’  abakandida  bagombaga  gutorwa  uwo  munsi, bakomeza  bahamya  ko  batahawe  agaciro  kandi  bagize  umubare  munini (ugera  ku  bihumbi 11), bagatunga  agatoki  commission  y’igihugu  y’amatora (NEC)  ko  mugihe  abakandida  bazengurukaga  utugari  biyamamaza  batigeze  bazirikana  no  kuza  kwiyamamariza  muli  kaminuza. Mu batarashatse  kwivuga  amazina; umunyeshuri  umwe  yagize  ati ‘’birababaje  kuba  dutora  abantu  batadusabye  amajwi  ngo  twumve  n’ibigwi  byabo  kandi  aritwe  bayobozi  b’ejo!!’’. Undi  nawe  akomeza  agira  ati ‘’ kubera  gutora  abo  tutazi   wageraga  mu  cyumba  cy’itora  amarangamutima  akaba  ariyo  akuyobora  ukaba  ushobora  gutora  utarusha  abandi  ibigwi  nta  nicyo  yazamalira  abanyarwanda’’. Undi  nawe  ubarizwa  muli  kaminuza  y’iburasirazuba  yagize  ati ’’ndabura  umwaka  umwe  ngo  ndangize, niba  jyewe  na bagenzi  banjye  twaratoye  umuntu  udashoboye  ni  ukuvuga  ko  twahemukiye  abanyarwanda  azasigara  ahagaraliye  twaratashye!  Akomeza  avuga  ko  kaminuza  atari  maternelle  kuko  iyo habaye  kwerekana  abakandida  natwe  tuboneraho  kubagira  inama  kubyo  twifuza  bazadukorera’’.

Mu nama  yagiranye  n’abagombaga  kuba  indorerezi  z’ayo  matora, bajonjowe  mu bagize  imitwe  ya  politiki  mu kwaha  kwa  FPR  na bamwe  mu nkoramutima  za  FPR  zikorera  mu  bigo  bya  Leta (dore  ko  nta  ndorerezi  nimwe ituruka  mu  mahanga  yari  ihari); Bwana  Prof. KALISA  MBANDA, Umuyobozi  wa  commission  y’igihugu  y’amatora  yabahaye  amabwiriza  yo  kutagira  icyo  batangariza  ibinyamakuru  byaba  ibyo hanze  cyangwa mu  gihugu  mu gihe  cy’amatora  nyirizina  yo  kuwa  22/02/2016, yakomeje  abasaba  kuzabera  Leta  yabo  inyangamugayo  zayo  matora  birinda  ikintu  cyose  cyatuma  amatora  avugwa  nabi.

Prof. MBANDA  yakomeje  abaganilira  ukuntu  abanyeshuri  bakunze  kuvuyanga amatora  muli  rusange  ati  nko  mu matora  ashize  y’inzego  z’ibanze  twatangajwe  n’ukuntu  muli  campus  y’I  RUHANDE  habarizwa  abanyeshuri  ibihumbi  birenga  11  ati  aliko  abitabiriye  iryo  tora  bakaba  batararenze  250  byongeye  kandi  abarimu  babo  nabo  abatoye  ntibarengaga 3  gusa  muli  campus  yose!  Ati  ni  akumiro  pe! akomeza  agira  ati ‘’abo  banyeshuri  250  tuvuga  ko  batoye  nabo  batonze  umurongo  muremure  cyane  inyuma  y’umwe  mu  bakandida wari  usanzwe  abadodera  inkweto (cordonnier)  indi  mirongo  isa  nisigayeho  ubusa ! twe  n’abaturage  bakeya  basigaye  twarumiwe  pe!!  akomeza  avuga  ko  ntakundi  babigenza  ko  ari  ugukomeza  kujya  babakangulira  iby’amatora.

Banyarwanda  banyarwandakazi, nguko  uko  amatora  yo  mu  Rwanda  asigaye  ategurwa  ku buryo  utarenganya  abo  banyeshuri  kuko  babibonamo  iteknica  rikorerwa  muli  NEC-FPR  aho  amalistes  y’abakandida  asohoka  hazwi  n’abazinjizwa  muli  iyo  myanya,  bityo  abanyeshuri  bakihitiramo    gutonda  umurongo  inyuma  y’ubafitiye  akamaro  nk’uriya  mu  cordonnier, nuko  gusa  iyo  hagize  ubaca  murihumye  agatorwa  atyo  hari  ubwo  ahita  ategekwa  kwiyandikira  ibarwa  yegura  ku mpamvu  ze  nkuko  byagenze  mu  karere  ka  Bumbogo ho  muli Kigali  aho  abaturage  bitoreye  umukuru  w’umudugudu  bikaza  kumuviramo  kweguzwa  kuko  atari  kuli  liste   y’iteknica. Mugire  amahoro.

 

Byanditswe  kuwa  01/03/2016, na:

A.BEN NTUYENABO, KIGALI-RWANDA.

Rwanda : Kamarampaka 2015 – Ubwami  muri  Republika.

photo http://www.umwezi.net/

photo http://www.umwezi.net/

Nkulikije  ibimaze kuvugwa byose muli  iyi minsi  ishize  kw’itekinika  ry’itegekonshinga rya Republika  y’u Rwanda  bikozwe  n’inteko  imitwe  yombi  mu kwaha kwa  FPR; iryo  tekinika  rikaba  rishorejwe  kuli  Kamarampaka  yahatiwe  abanyarwanda  ngo  bayemeze  banga  bakunze  kugira ngo  bitange  uburenganzira  ndakuka  kuli  Prezida  Paul  Kagame  bwo  kuzakomeza  kuyobora  u  Rwanda  nyuma  ya  mandat  ye  muli  2017, aho  azaba  ayobora  nk’umwami  kugeza  ashizemo  umwuka;  nk’abanyarwanda  tuzi  amabi  yose  yaranze   igihugu  cyacu,  uko  ubutegetsi  bwagiye  busimburana  ntidushobora  kwihanganira  gukomeza  kujya  twibaruka  dushyingura  imburagihe!!

Ni  muli  urwo  rwego  duhagurutse  twivuye  inyuma  mu  kwamagana  iyi  turufu  yindi yadutse  dukomeje  gukururirwa  na  FPR, tukaba  dutakambira  amahanga  n’inshuti  z’u Rwanda  mu  kudufasha  kwamaganira  kure  iyi Kamarampaka  imaze  gutorwa  kubudoderwe  bw’ umuntu  umwe  Paul  Kagame  mu  rwego  rwo  gukomeza  kuboha abatavugarumwe  nawe  aho  kuba  indorerwamo  ya buri  munyarwanda  wese!

Banyarwanda, Banyarwandakazi , nkuko  byagaragaye  mu  ijoro  ryo   ku  wa  18/12/2015, iyi  Kamarampaka  yaranzwe   n’ uburiganya  bukabije  nkuko  byari  byapanzwe  na  commission  y’igihugu  y’amatora, iyobowe  na  Prof.  Kalisa  Mbanda,  yifashishije  abakoranabubingwa  bakomoka  muli  ya  mashyaka  ari mu kwaha  kwa  FPR uko  ari 10  baraye  inkera  muli Stade  Amahoro  bagerageza  kubarura  no  kujonjora  impapuro  zose  zatoye  OYA   no  guhita  bazirigisa  kugira ngo  hatagira  uzica  iryera!

Kuburyo  nta  munyamakuru  wari  wemerewe  kuhagera  muli  ayo  masaha  y’ijoro  igikorwa  nyamukuru  cy’uburiganya  kitararangira;  hari  umunyamakuru  wa  Radio 10  yigenga  wabinjiranye  agerageza  gufata  amafoto  na  caméra  aliko  bamumenye  yerekejwe  iya  Gereza  nyuma  Patron  we ari nawe  washinze  Radio10  akaba  ari na musaza  wa  Mme  Jeannette  Kagame  aza  kumugombora  aliko  ntibyari  bimworoheye , muriyumvira  namwe  iyaza  kuba  ari mwene ngofero!

Banyarwanda,  Banyarwandakazi, cyane  cyane  abatuye  mu  Rwanda, baca  umugani  ngo ‘’Uwiringiye  ijosi  rimubyalira  umwingo’’, murarye  muri  menge!  ibi  bihe  turimo  ntibyoroshye! Aho  kugira ngo  tuzabyicuze  ko twahemukiranye  tugambanirana  ndumva  twahitamo  kudakulikira  ibibi  tubibona  inzira  zikigendwa!  Kuko  bavuga  nanone  bati :’’Nyamwanga  kumva  ntiyanze  no  kubona’’! Muragowe  rero! Uwo  bizabazwa  ntaziririre,  mu gihe  bikomeje  kugaragara ko  Prezida  Paul  Kagame  atagifite  imbaraga  n’ubushobozi  bwo  guhangana  n’ibibazo  by’igihugu  kubera  ko  byamaze  kumubana  uruhulirane  kubera  kutagirwa  inama  n’abandi , bikaba  bimaze  kugaragara ko  ari  hafi  kwambarira  incocero  aho  yambariye  inkindi.

Jye  numva  inama  namugira  ari  ukurekura  ubutegetsi  nyuma  ya  mandat  ye  ya  nyuma  muli  2017  akanabitangariza  abanyarwanda  n’abanyamahanga  hakiri  kare  kugira ngo  yirinde  kandi  arengere  n’umuryango  we  by’umwihariko, ninaho  azaba  asigasiye  ku buryo  burambye  ibyo  yagezeho  mu  iterambere  ry’igihugu  muli  rusange  naho  ubundi  yaba  agiye  gusiga  abanyarwanda  mu kaga  gakomeye!!  Erega  ntawakwirengagiza  ko  kugeza ubu  Prezida  Paul  Kagame  ariwe  kibazo  k’ingutu  kiremereye  igihugu  cyacu!  Umugabo  utagira  impuhwe  byongeye  ntagirwe  n’inama!

Byanditswe  ku wa  21/12/2015, na:
A. BEN  NTUYENABO, KIGALI-RWANDA.