Archives par étiquette : amatora

Rwanda : Mandat ya 3 ikomeje kuvugisha Paul Kagame amangambure

Paul Kagame/photo france24.com

Nibyo koko rero abakulikiranira hafi politiki y’u Rwanda barabona ko ibyo Paul Kagame arimo apanga nta kabuza bigiye kuzamupfira ubusa inama ya kigabo akaba ari ukwegura cyangwa akiyahura .

Kubera ibihe bidasanzwe igihugu cyacu kinjiyemo bitewe n’uyu mugabo Kagame nyuma yo gutechnika ingirwamatora biragaragara ko impungenge ari zose we n’abambari be ko bitazabahira mu gihe nta munsi w’ubusa ushira batisobanuye kuri mandat ya 3 nkaho hari uwigeze ayibahatira.

Akaba ari muli urwo rwego kuri uyu 13/08/2017 muli village Urugwiro ubwo uyu Prezida Kagame yagiranaga ibiganiro byihariye n’ikinyamakuru DAILY TELEGRAPH , Umunyamakuru yamubajije icyo atekereza ku bivugwa ko yashatse kugundira ubutegetsi ndetse nicyo yaba apanga kwemeza umuryango mpuzamahanga ko ari gufungura ikibuga cya demokrasi mu gihugu. Paul Kagame yamusubije ko ibyo bitamureba kandi ko atagomba kubaho nk’uko abategetsi b’ibihugu bikomeye Barack Obama, Trump cyangwa abo mu bihugu by’iburayi babayeho.

Muli icyo kiganiro, Prezida Kagame yakomeje yerekana ko ibyo bamusaba ari uburyo bari gukoresha bwo kumugamburuza bati : « Reka dukomeze tumwotse igitutu kugeza aho bizamuremerera ! ». Kuri Prezida Kagame ariko we ati ibyo ntacyo bivuze kuri jye kuko nta buzima nk’ubwabo nkeneye kubaho, yakomeje avuga ko adakeneye kubaho nk’Abongereza, Abanyamerika cyangwa Abafransa, ati ibyo ni imibereho yabo aho batuye niho batuye, nanjye ntuye mu Rwanda nkeneye kubaho nk’umunyarwanda, nk’umunyafrika ! Ati sinkeneye guhinduka uwo ntari we ! Prezida Kagame yunze mu rya Minister Mushikiwabo asa nuwemeza ko abazungu ari abarwayi bo mu mutwe aho yagize ati hashize imyaka 20 yose ibyo banenga u Rwanda ari nako bagenda babisubiramo uko imyaka itashye na nubu bakibivuga ati nkaba ntekereza ko hari ikitagenda kuri bo aho kuba ku Rwanda n’Abanyarwanda.

Prezida Kagame akaba yongeye gushimangira ko ibyavuye mu ngirwamatora yatsinze ari urugero rwiza rw’amahitamo y’Abanyarwanda, ati naho abo banyamahanga mbere ya byose bamenye yuko ntagomba kubaho nkabo, ati ibyo bikaba bisobanuye ko ndi hano kubera ko nubahirije ibyo nasabwe n’Abanyarwanda byongeye baranabyemeje babitorera muli referendum ati rero bahisemo icyo gukora kibabereye , nguko nimwiyumvire namwe !

Ntawakwifuza aka wa mugani ngo « akaje karemerwa! ». Ahubwo nsanga mu gutsimbarara ku butegetsi k’uyu munyagitugu ari ukudashakira igihugu cyacu amahoro bitewe no kuba yarasuzuguye itegeko-nshinga ry’igihugu cyacu arivuyanga uko yishakiye ngaho ngo araha amasomo ya politiki Abanyarwanda yagize imbohe mu gihugu cyabo abandi ishyanga ! Iyo demokrasi y’ubudasa yazaniye Abanyarwanda yakweruye akavuga ko ari ubwoko bwa kane bw’Abanyarwanda ! Abatwa, Abatutsi , Abahutu hiyongereyeho n’agatsiko ka FPR aho kugira ngo akomeze kurindagiza Abanyarwanda !

Byanditswe ku wa 14/08/2017, na :
A.BEN NTUYENABO, KIGALI-RWANDA.

Rwanda: nyuma y’amatora, Dr. Frank Habineza na Philippe Mpayimana bararirira mu myotsi

Mu gihe UE yagaragaje amanyanga ya Komisiyo y’igihugu y’amatora mu Rwanda (NEC) mu guheza bamwe mu bashakaga kwiyamamariza umwanya w’umukuru w’igihugu n’andi matati menshi yaranzwe nayo; abaciriwe isiri na RPF-INKOTANYI bakemererwa na NEC aribo Dr. FRANK HABINEZA na Mr. PHILIPPE MPAYIMANA bagaragaje ko bishimiye uko igikorwa cy’ingirwamatora cyateguwe na Leta y’agatsiko, aliko kandi ukaba wakwibaza impamvu aba bakandida bongeraho ko babangamiwe cyane n’inzego z’ibanze z’ubutegetsi bwa RPF-INKOTANYI aho Dr. Frank Habineza we amaze gutangarizwa amajwi y’agateganyo yabaye nkunyagiwe n’imvura ku buryo yari yiheje no kuba yagira icyo atangariza abanyamakuru muli ako kanya avuga ko ananiwe !

Aliko amaze gusanga ko bishobora kumuviramo inkurikizi, ni kuri uyu wa 6/08 yisubiyeho ikiniga kimaze gushira abwira itangazamakuru ko amajwi aherutse kubona mu matora ya Prezida ari intsinzi ikomeye nk’ishyaka ryahanganaga n’andi icyenda yose yakoze coalition yiyomeka ku mukandida wa RPF-INKOTANYI Kagame Paul ! yakomeje avuga ko amajwi o.47% babonye bayemera aliko ko batabyishimiye nkuko bari babitekereje ! ati aho twiyamamarije hose abanyarwanda bakunze ibitekerezo byacu ari nako bifuza impinduka mu gihugu cyacu ati kandi abenshi bari babitwijeje.

Dr. FRANK Habineza udashobora kwerura ngo avuge ashize amanga yakomeje atangaza ko hari aho bagiye kwiyamamaza mu ntara y’iburasirazuba bakamuhitiramo mu irimbi hatari hateganijwe ! Dr. Frank yagerageje guca amarenga yerekana ko ishyaka rye ryabangamiwe bikomeye n’abayobozi b’inzego z’ibanze guhera mu Karere ka Rusizi, Nyamasheke, Nyagatare n’ahandi… ati bamwe badutera amabuye abandi batwitambika mu mayira abandi nabo batwohereza mu marimbi nkuko nabivuze haruguru .

Dr. Frank yakomeje avuga ko no kumunsi w’itora nyirizina ari ko byabagendekeye aho indorerezi 500 bari bohereje ahantu hatandukanye zangiwe kwinjira mu byumba by’itora izindi zigakumirwa kwinjira ahabarurirwaga amajwi ati niyo mpamvu nk’ishyaka rya politiki tutakwirirwa tuvuga ko hari icyatubayeho kandi nta kimenyetso dufite ! ati ni ukuvuga ko ibyavuye mu matora byose tubyakira uko bimeze ! ati kubona tutabonye na 1% n’ukuntu twamaze imyaka 4 yose dutegura aya matora ari nako tuhatakariza imitungo yacu !birababaje!

Banyarwanda banyarwandakazi niba atari ukwirengagiza se tuvuge ko Dr. Frank yajyanywe mu kibuga na RPF atazi ikinyoma akina nacyo icyo aricyo ? niyihangane ! urwishigishiye ararusoma ! kuko n’ubutaha avuga kwinjira mu matora y’inteko ishinga amategeko niko bizamugendekera , nkaba namugira inama yo kwirinda gukomeza kugendera mu kigare cya RPF kuko igeze aharindimuka.

Byongeye kandi akaba ari no kuri uyu wa 08/08/2017 aho uyu mukandida usa nuwihebye amaze gutangariza ikinyamakuru Umuseke cyandikira hano mu Rwanda ko bitewe no gutsindwa kuri iyi ngirwamatora ya Prezida wa republika y’u Rwanda yumva ashobora no guhita yegura ku mwanya w’ubuyobozi bw’ishyaka Green Party ! muriyumvira namwe ! umunyarwanda yise umwana we ngo ‘’BAJYAGAHE …

Naho Ku majwi 0.73, umukandida Philippe Mpayimana we ugira icyo apfana n’abamenyerewe nk’abikorezi b’ibibindi byagaragaye ko bitamubabaje na busa ko yaba yarinjijwe mu gikorwa azi impamvu n’uburyo kizarangira ariyo mpamvu yatangaje ko yishimiye uko ingirwamatora yagenze akaba anashimira Paul Kagama n’ishyaka RPF kuba batsinze amatora by’umwihariko ! Mpayimana akomeza avuga ko nubwo atabashije gutsinda amatora aliko ko aramutse ahawe umwanya muli gouvernement shya ntakabuza yawemera ati ikingenzi upfa kuba ari umwanya abaturage bankeneyemo ati kandi nanone bikaba bishingiye ku bushake n’ubwitonzi nagaragaje muli aya matora ! nguko nguko!

Banyarwanda banyarwandakazi, nimwiyumvire namwe ! ngiyo demokrasi abambari ba FPR-KAGAME bifuriza abanyarwanda bose . Tubiteze amaso !

Byanditswe ku ya 08/08/2017, na:
A.BEN NTUYENABO, KIGALI-RWANDA.

Rwanda :ukwishongora kwa ministri Louise Mushikiwabo kwamutesheje agaciro.

Ni kuri uyu wa 28/07/2017, Ministri Louise Mushikiwabo w’ububanyi n’amahanga abinyujije ku rukuta rwe rwa twitter yatambukije ubutumwa bwuzuye agasuzuguro n’ubwishongozi kubera inyandiko yasohowe na Mr. KLASS Brian muli ‘’ The Washington post’’, iyo nyandiko ikaba inenga ingirwamatora yo mu Rwanda no mu bihugu bimwe na bimwe by’afrika aho abayobozi b’ibyo bihugu bagerageje guhindura itegeko-nshinga ry’ibihugu byabo kugirango bagundire ubutegetsi.

Uyu Mr. KLASS Brian akaba yarakomeje atera mu rya Semuhanuka Paul Kagame yemeza ko ingirwamatora yo mu Rwanda yarangiye aho hahinduwe itegeko-nshinga kugira ngo Kagame akomeze kuyobora u Rwanda; ati ibyo bikaba bituma akomeza kubangamira bikabije abatavugarumwe nawe.

Ministri Mushikiwabo rero akabiheraho avuga ko arambiwe cyaneeeeee… ….utuzungu n’utundi duke tutari utuzungu… ( nkuko abyivugira) tumaze iminsi twandika amateshwa kuri Africa by’umwihariko k’u Rwanda ! ati ni nde wabashinze afrika? Aha umuntu akaba yakwibaza impamvu Louise Mushikiwabo yiha gusubiriza Afrika muli rusange !uwamushinze gusubiriza Afrika we se ninde ? yego ntibitangaje kuko umweru uturutse ibukuru ukwira hose !

Aliko jye ngasanga kwaba ari ukwibeshya no kurindagiza abanyarwanda kuko Ministri Mushikiwabo asa nushaka kumvikanisha ko ibibazo by’u Rwanda byaba bihuriweho na Afrika yose muli rusange bityo abadukamira aribo bazungu kimwe na Shebuja Prezida Kagame bakatwumvisha ko ba Rutuku ari abagome kuva na kera mu bihe by’abakoloni kandi wareba ugasanga uretse muri iki gihe cy’ingirwamatora bahugiyemo nta cyumweru na kimwe cyashiraga ari Semuhanuka uwo tuvuga cyangwa Louise Mushikiwabo badafashe Rutemikirere berekeza iyo Amerika, europe, asie n’ahandi……….ese baba bagiye mu masengesho cyangwa baba bagiye gucinya inkoro imbere ya twa tuzungu ngo hadakomwa retenderi ! bagaruka ngo twa tuzungu n’utundi duke tutari utuzungu ni nde wadushinze afrika ? birababaje !

Banyarwanda banyarwandakazi rero niboye gukomeza kutubeshyeshya ingirwapolitiki yo kwigira irimo kuganisha abaturage mu Rwabayanga ahubwo bafungure ibiganiro bitazimije kubatavugarumwe nabo bose, by’umwihariko wowe Louise Mushikiwabo nakugira inama yo gusaza utanduranije ngo uriho urakeza Shobuja w’umuhemu Paul Kagame aho asigaye arembaremba hejuru y’amazi! Sigaho rero kuko iyo siyo demokrasi abanyarwanda twifuza. Mugire amahoro.

Byanditswe ku wa 29/07/2017, na :
A.BEN NTUYENABO, KIGALI-RWANDA.

Rwanda: Abaturage bararira ayo kwarika kubera imisanzu bakwa na FPR muri ibi bihe bya campain.

Kubera ikimwaro n’isoni byateye Leta y’agatsiko ka FPR kandi yari yarijeje abanyarwanda ko gahunda zose zijyanye n’amatora y’umukuru w’igihugu zarangije gutunganywa none abenshi mu bayobozi b’inzego zibanze bakaba baraboneyeho icyuho cyo gusakabaka abaturage utwabo bitwaje ngo barashaka inkunga yo gushyigikira umukandida wa RPF-INKOTANYI Paul Kagame; ni muli urwo rwego Bwana Francis Kaboneka Ministri w’ubutegetsi bw’igihugu mu kiganiro yagiranye na ba gouverneurs b’intara, uturere n’umujyi wa Kigali yavuze ko abayobozi bose batse amafranga abaturage bababeshya ko ari ayo gutera inkunga amatora y’umukandida wa RPF ku mwanya w’umukuru w’igihugu bagiye kubibazwa.

Banyarwanda banyarwandakazi, ubu se tuvuge yuko Ministri Kaboneka uretse kwirengagiza hari umunyarwanda numwe uyobewe ko ayo mabwiriza yo kwaka imisanzu yacuriwe muli cabinet yiwe n’abandi bafatanije barimo NEC(Commission y’igihugu y’amatora) ! none abonye abaturage bavugije induru ati abayobozi babigizemo uruhare ni bakurikiranywe ! ubonye iyo avuga ati mwamennye ibanga mwishyira ku karubanda ! gusa nyiri umutwe munini ntarengwa n’imijugujugu !

Banyarwanda banyarwandakazi, uku kunyunyuza imitsi ya benengofero batagira kivugira ni imwe mu ngeso zadukanywe na Leta y’agatsiko ka FPR kuva kafata ubutegetsi hashize imyaka 23 ! ku buryo abanyarwanda ni kwa kundi kwabo bapfira muli Nyagasani bagatangira guhwihwisa ibibazo byageze iwa Ndabaga ! ariyo mpamvu kuva kera na kare bemye bazi kwikiriza neza intero y’abayobozi. Ubu se iyo uyu mwambari Kaboneka atabikomozaho ko nta numwe wari waratatse n’igihe twabivugiye ? ahubwo ko wasangaga inyikirizo ari ya yindi ngo ‘’niwe…..niwe….niwe….’’! ahaaaa… ni ukuvuga ko bari bukomeze kubishegesherezwa mu mitima yabo aribyo akenshi igihugu cyacu cyakunze kuzira uretse nubundi ko ari hahandi !! aliko abaturage babika umubabaro mu mitima bagashinjagira bashira nyuma babona umwanya ibibarimo bigaturika nk’igisasu.

Banyarwanda banyarwandakazi, ubu se Ministri Kaboneka arabikoraho iki ko kugeza kuri uyu munota nandika bikomeje gukorwa aho abambari b’agatsiko babyukana uturumbeti buri gitondo bahamagalira abaturage kugera bwangu aho za Bus ziba zitegereje kujya kwamamaza umukandida wa RPF kandi ubwo baba baraye banyuze mu ngo zose baka iyo misanzu ku buryo mu karere ka Gasabo abaturage batagihumeka.

Bamwe mu baturage bashoboye kutugezaho ubuhamya bwabo bibaza impamvu bakwa amafranga buri kwezi y’umuryango wa RPF bakongeraho nayo gushyigikira umukandida wa RPF ntibabone nibura naga T-SHIRT ka 5000frw mu gihe cya campain ! bakomeje bansaba gutambutsa ubu butumwa basaba RPF kudakomeza kubiba umunabi mu banyarwanda, nguko nguko.

Si ibyo gusa kuko nakomeje kubona n’ubundi butumwa buturutse impande zose; hari NDIMUBANDI Emmanuel wo mu Karere ka Gatsibo uhamya ko buri rugo bagiye barwaka ibihumbi bibili byo gushyigikira RPF-INKOTANYI.

NYIRANDIKUMANA Thérésie ukora mu bitaro bya Murunda akarere ka Rutsiro nawe yantangarije ko we n’abandi bakozi bose bo mu bigo by’ubuvuzi bagiye bacibwa ibihumbi 30.000frw abandi 20.000frw abandi 10.000frw kuri buri wese ati aliko icyadushegeshe kikadutera n’urujijo ni ukuntu nyuma yuko Ministri Kaboneka avuze ko gucibwa amafranga yo gushyigikira umukandida wa RPF bitemewe aribwo twazindukiye mu nama ku bitaro bya Murunda iyobowe na Dr. NIRINGIYIMANA Eugène (Médecin directeur w’akarere k’ubuvuzi) atumenyesha ko yatumwe n’abayobozi bakuru ba RPF ko twatanze amafranga makeya ko ahubwo dusabwa byihutirwa gutanga andi 1/3 cy’umushahara duhembwa ! ibyo byose twarabyubahirije kuko ntawe uburana n’umuhamba ! ati ayo mafranga yose yashyizwe kuri compte ya BPR/AMATORA /RPF-RUTSIRO № 515421727110168. Uwo mubyeyi yakomeje agira ati mudufashe rwose umuryango wa RPF udusize iheruheru twitwa ngo turakora, amadeni aratwishe nta handi twakura !

Abandi ni abarimu bo mu Karere ka Ngororero barangije mu itorero ry’igihugu riyobowe na wa mumotsi Rucagu Boniface , ibyabo bikaba bisa n’ikinamico! Bavuga ko bakimara gusinyishwa ibyo barangije gukora bavuye mu itorero buri mwarimu wese avanwaho 1/30 cy’umushahara kuzageza igihe kitazwi guhera mu kwezi kwa 1/2017, bati none no guhera mu kwa 3/2017 abayobozi b’ibigo bazana listes tugasinyira andi 1/30 nanone yo bakaba bayakira mu ntoki batubwira ko ari umusanzu wo gushyigikira amatora y’umukuru w’igihugu; abo barimu bakaba batakambira Bwana Kagame ngo nagerayo azibuke mwarimu ! bati bayobozi ko namwe mugeze aho mugeze kubera kunyura imbere ya mwarimu, kubera iki mworoherwa aho kwibuka mwarimu ahubwo mukamwambura nutwo afite ? twasaba ko muduhemba muti abarimu muri benshi !!! ubu koko tuzabigenze dute ?

Ahandi twashoboye kugera naho ni mu Murenge wa Cyumba i Gatuna ku mupaka uduhuza na Ouganda aho chairman wa RPF yaka buri muntu ibihumbi 20.000frw akongeraho ko utazayatanza azahura n’ingaruka nyuma ! nguko nguko kimwe n’i Rutare ho mu Karere ka Gicumbi bakurikiza ibyiciro by’ubudehe aliko bo bagasanga ngo ari igisebo ku muryango wa RPF! bati mudukize ba rusahuliramunduru naho ubundi turashize!

Banyarwanda banyarwandakazi rero ntawarondora akababaro k’abaturage ngo akamareyo aliko mpamya ko iyi ari isura y’akababaro n’intimba byuzuye imitima y’abanyarwanda! umuntu akaba yakwibaza ati amaherezo azaba ayahe kandi uwo utakira ariwe ugusahura ? aliko haba kwihangana kuko nta gahora gahanze .

Mugire amahoro y’Imana.

Byanditswe ku wa 24/07/2017, na:
A.BEN NTUYENABO, KIGALI-RWANDA.

Rwanda : Ibihe by’impinduka biraca amarenga

Buri munyarwanda wese umaze iminsi akurikirana igikorwa cyo kwiyamamariza umwanya w’umukuru w’igihugu cyacu abona ko ishyamba atari ryeru muli politiki y’u Rwanda aho bigaragara ko abakandida dufite uretse no kuba ari ba baringa nta na programme politique ihamye bagaragariza abanyarwanda mu ikinamico rya mandat ya 3 y’imyaka 7 iri imbere; ugasanga Semuhanuka ariwe Prezida Kagame yakuye mu gusaza imigeri ategekera mu kwaha kwe amashyaka n’abakandida bigenga kuzamushyigikira mu matora yo muli Kanama bamwamamaza cyangwa biyamamariza hamwe.

Ni muli urwo rwego nkurikije amakuru nahawe n’umuntu bya hafi wa Ministri w’ubutegetsi bw’igihugu Bwana Kaboneka Francis akanansaba kudatangaza amazina kubera umutekano we yampamirije ko yamuhishuriye ko mbere gato yuko processus yo kwemeza abakandida ku mwanya w’umukuru w’igihugu mu mitwe ya politiki Prezida Kagame ubwe yagiye ahamagara abayobozi b’imitwe ya politiki mu Rwanda buri wese umwe umwe amutegeka uburyo ishyaka ayobora rigomba kuzamushyigikira mu matora, akaba ari nako byagendekeye PSD na PL aho abakuru b’ayo mashyaka M.Biruta Vincent wa Psd na Hon. Présidente wa assemblée akaba na Prezida wa PL, Mukabarisa Donatille bafashe iya mbere mu kubimbulira indi mitwe ya politiki.

Uyu mutangabuhamya yakomeje ambwira ko ari nako byagenze ku ishyaka PS Imberakuri igice kiyomoye kuri Me Ntaganda Bernard kiyobowe na Mme Mukabunani Christine, uyu we ngo Prezida Kagame mu gihe aherutse mu ruzinduko mu gihugu cy’ububirigi akaba yaramwihamagariye kuli phone amutegeka gukoresha congrès y’ishyaka rye igitaraganya ayumvisha ko itagomba kugira umukandida itanga mu matora y’umukuru w’igihugu kandi ko bakomeza guhagarara kuri position yo kuba bitwa nk’ishyaka rya opposition mu gihugu.

Mukabunani Christine bikaba ngo byaramuteye impungenge aliko kandi akikirigita kubona ahamagarwa n’umukuru w’igihugu mu bihe nka biriya! ngo yahise ajya kugisha inama Ministri w’ubutegetsi bw’igihugu Francis Kaboneka asanga nawe inkuru yamugezeho kare ahubwo amusubiza ko akwiye guhita atumiza congrès agaconvainca abayoboke b’ishyaka rye mu rwego rwo kubahiriza ibyifuzo bya Nyakubahwa Prezida Kagame. Nibwo nyuma yaho Christine yatumije congrès y’ishyaka rye 67% batorera kutazatanga candidature mu matora y’umukuru w’igihugu bityo itechnika rye na Shebuja Kagame riba riciyemo.

Prezida Kagame rero muri rusange akaba agenda ashimira by’umwihariko abayobozi b’imitwe ya politiki ikorera mu Rwanda kuko bemeye kumushyigikira no kumugaragira muli uru rugendo rwo kwiyamamaza hirya no hino mu gihugu, yongeraho ko anategetse kujya bahabwa ijambo aho agiye kwiyamamariza hose.

Abamaze guhabwa ijambo hakaba harimo Hon. Mukabarisa Donatille Prezida w’umutwe w’abadepite akaba na Prezida w’ishyaka PL, akaba aherutse gutangariza abaturage ba Bugesera ko Prezida Kagame yabavanye mu rwobo by’umwihariko abanyabugesera, ati Kagame uretse kuba yararokoye igihugu ni n’umuntu udasanzwe ariyo mpamvu nta wundi ukwiye kuyobora u Rwanda! nimwiyumvire namwe !

Undi mwikorezi w’ibibindi uhora mu mahomvu ni Shehi Mussa Fazili Harelimana , akaba na Prezida wa PDI nawe mu inama yo kwamamaza Kagame aherutse gutangariza abaturage ba Nyarugenge na Nyamirambo ko batahwemye kwita umukandida wa RPF Prezida Kagame ‘’BABA WA TAIFA ‘’ kubera ibikorwa bye by’indashyikirwa birimo imihanda, amashanyarazi, amazi n’ibindi yabagejejeho …….akongeraho ko Kagame ariwe wakuye abayisilamu ku nkeke z’ubutegetsi bubi…..ati Baba wa Taifa Kagame oye…oye… nimunyumvire rwose ! inkomamashyi ziragwira ! nyamara uwareba ivumbi rigiye kumara abaturiye aho avuga Nyamirambo kubera amanegeka n’uduhanda tubi! Amazi yo bahebeye urwaje ! ku buryo umuntu atakifuza kuhatura ! none abayisilamu nibo bahamerewe neza ! ikindi uyu muswa yirengagiza ni uko ashaka guhamya ko kariya Karere kaba gatuwe n’abayisilamu gusa avugira ! birababaje !

Undi mumotsi ni Ministri Dr. Biruta Vincent akaba na Prezida w’umutwe wa poilitiki PSD umaze kwigera Ministères zitari nkeya muli gouvernement wongeyeho Sénat aliko akaba atanyurwa, uyu mu Ministri rero ageze aho asenya ishyaka ry’abanyabutare b’umwimerere aryegulira amabandi-rusahuzi ngo arashyigikira Semuhanuka wamugabiye, nawe nk’abandi bose yavugiye ijambo i Rulindo kuri uyu wa 20/07/2017 ahateraniye abambari ba RPF dore ko abenshi baba baturutse i Kigali ukaba wagirango biyamamarije mu Karere gafite abaturage hafi icya kabili cy’intara kandi ari ikinamico! yagize ati abavuga ko ishyaka PSD mbereye umuyobozi ryabaye ikigwari ryiyomeka ku mukandida wa RPF Bwana Kagame ati ni uko batazi umubano PSD isanzwe ifitanye na RPF uhereye mu myaka 15-20ans byongeye bakaba bataniyumvisha uburyo ishyaka PSD ryafatanije na RPF mu kubohora igihugu no kwongera kucyubaka ! nimwiyumvire namwe biteye agahinda!

Banyarwanda banyarwandakazi, jye nsanga ibi byo muli PSD bisa naya mahano yakorewe Me Ntaganda Bernard wagambaniwe akamburwa ishyaka yishingiye ndetse akanabizira none Dr. Biruta nawe ati PSD nyobora twifatanije na RPF uzabirengaho si uwacu!

Banyarwanda banyarwandakazi, iyo ugereranije ingirwamashyaka akorera mu gihugu cyacu muli iki gihe ntawashidikanya ko yaba yarutwa n’ishyaka rimwe rukumbi MRND ryahozeho mbere ya jenoside kuko aho aganisha abanyarwanda ntawe uzarokoka.

Mugire Amahoro.

Byanditswe ku wa 21/07/2017, na:
A.BEN NTUYENABO, KIGALI-RWANDA.

Rwanda. Umunyamakuru Andrew Mwenda yahishuye uburyo P. Kagame yapanze bwo kugundira ubutegetsi

Andrew Mwenda/foto http://www.monitor.co.ug

Muri Ouganda umunyamakuru akaba n’umuyobozi mukuru w’ikinyamakuru ‘The Independent’ Andrew Mwenda yahishuye uruhare runini prezida Kagame yagize mu gushaka kwizirika ku butegetsi.

Kuri 27 kamena 2017, uyu mugabo Andrew MWENDA ubarizwa mu kanama ngishwanama ka prezida Kagame yasohoye inyandiko yita ko igaragaza urukurikirane rw’ibiganiro byatumye P. Kagame yemera gukomeza kuyobora u Rwanda akaba aribyo byabaye intandaro yo gukoresha itechnica ryose rishoboka kugirango hahindurwe itegeko-nshinga.

Yakomeje avuga ko atari itechnica ryagombaga gutanga umusaruro umunsi umwe ko habayeho ibiganiro binyuranye ati nkaba nanjye narabaga nitabiriye izo nama zikomeye zari zifite inshingano mu gushaka byanze bikunze igisubizo gifatika kandi kigomba kubahirizwa hakurikijwe ikinamico ry’ubusabe bw’abaturage yewe ku buryo nakunze no kubigaragaza mu nkuru z’ikinyamakuru The Independent ‘’ mbereye umuyobozi.

Banyarwanda banyarwandakazi, birumvikana ko mu gihe Prezida Kagame yabaga arimo guhirikira ikibuye umuryango mpuzamahanga ko mandat ye nirangira atazongera kwiyamamariza umwanya w’umukuru w’igihugu kubera ko ngo muli Africa abayobozi benshi bahindura itegeko-nshinga bitari ku neza y’igihugu ahubwo ari ku nyungu zabo; we yararaririye amagi ategereje ikizava mu mu mutego mutindi yari ateze kuri izo ngishwanama nka Andrew Mwenda.

Mr. Mwenda avuga ko nyuma yo kubonako umubare wa za mandats z’abakuru b’ibihugu umaze kuba akarande muli Africa n’ahandi byongeye bakaba bagishaka umunyagitugu Kagame ati hatekerejwe uburyo yava ku butegetsi aliko akagumana ububasha bumwe na bumwe mu buyobozi bw’igihugu, ati ni muli urwo rwego twakomeje kubiganiraho n’inkotanyi zikomeye muli FPR hamwe n’abanyepolitiki b’amashyaka akomeye Rwanda kugirango hagire igikorwa.

Igitekerezo kimwe kikaba kwari ugutuma Prezida Kagame agera ikirenge mu cya Nyakwigendera Mwarimu Yulius Nyerere aho Kagame yari kurekura ubutegetsi agakomeza kuba umuyobozi mukuru wa FPR-INKOTANYI ati icyo gitekerezo nawe ubwe yaragishyigikiye aliko ntitwari bumukundire kugirango ijambo rye ridahungabanywa, ahubwo twamuhitiyemo ko agomba kuguma ku butegetsi hahindurwa itegeko-nshinga hisunzwe ubusabe bw’abaturage, nanone bitewe n’impungenge twari buterwe nuko aramutse abaye umukuru wa FPR byari butume Prezida mushya atagira ubwisanzure bikaba byateza umutekano muke mu gihugu cyangwa mu gihe Prezida mushya agoranye akaba yashobora gukurwaho n’ishyaka rye nkuko byabaye muli South Africa kuri Thabo MBEKI.

Mr. Mwenda Andrew yarongeye ati ku bundi buryo twatekerejeho ni ubusa n’imiyoborere yo kwa VLADIMIRI Putin muli Russia ati aliko nyuma y’ibiganiro byinshi twakoze hamwe na Prezida Kagame twanzuye ko agomba kuguma ku butegetsi nka Prezida wa republika !

Banyarwanda banyarwandakazi, ntawe bitagaragariye kenshi ko Prezida Kagame n’agatsiko ke kibumbiye muli RPF bafatanije n’amashyaka ari mu gihugu , bagize uruhare rukomeye mu guhindura itegeko-nshinga ngo hashobore kuvanwaho mandats z’umukuru w’igihugu nkuko uyu Andrew Mwenda abivuga.

Mr. Mwenda yakomeje avuga ko hari nubwo Prezida Kagame yabonanye n’umuryango we urimo umudamu we n’abana kugirango amenye icyo babitekerezaho bose bakaba barahurije kumusaba kuba akwiye kuruhuka akava ku butegetsi ! ati icyo gihe nanjye yarampamagaye ngo nze i Kigali tuganire kuri ubwo busabe bw’umuryango we aliko icyufuzo cy’umuryango nticyubahirijwe.

Mr. Mwenda ati byatumye njya kureba Mme we Jeannette nyuma aza kwemera ko yaguma ku butegetsi ati aliko imyaka itatu yonyine kugeza muli 2020 kugirango ibitarujujwe bihabwe umwanya wo kurangizwa. Mr Andrew ati aliko ibyo nabyo ntibyagombaga gushoboka kuko Prezida Kagame yari yemejwe kuguma ku butegetsi kandi ko ngo FPR yari yarabyitwararitsemo.

Mu gusoza inyandiko ye Mr. Mwenda, avuga ko uko byari bugende kwose igitekerezo cya Kagame aricyo cyari gifite umwanzuro ukomeye muli ibyo biganiro byose byabaye.

Banyarwanda banyarwandakazi rero muriyumvira ! ntihakagire ukomeza kubeshya abanyarwanda ngo ngaho ni ubusabe bw’abaturage! nkaho Giti mu Jisho yavutse ari ikinege, nkaba mboneyeho no kubahanura ko uzaramuka atoye Prezida Kagame azaba ashaka gusenya igihugu ku buryo ingaruka azazirengera! Murabe maso kandi mugire amahoro.

Byanditswe ku wa 30/06/2017, na:
A.BEN NTUYENABO, KIGALI-RWANDA.

Mu Rwanda, Facebook na Whatsapp bigiye gufungwa kubera amatora ya perezida wa Republika

Ni kuri uyu kane taliki ya 25/05/2017, mu kiganiro n’abanyamakuru ubwo ubuyobozi bwa Komisiyo y’igihugu y’amatora aho Prof. Kalisa Mbanda na Munyaneza Charles batangarije abanyamakuru ko imbuga nka Facebook na Watsapp zizafungwa biramutse bishimangiwe ko zirimo kubangamira imigendekere iciye ukubiri n’amategeko ya Komisiyo mu matora ya Prezida wa republika muli kanama 2017.

Aba bayobozi ba Komisiyo y’amatora bakomeje batangaza ko uretse no mu gihe cy’amatora nyirizina imbuga nkoranya-mbaga zikoreshwa mu buryo butemewe harimo kuba zamamaza abakandida igihe kitaragera zigiye gufungwa kugirango bitabangamira amatora, kandi zimwe zirazwi bigaragara ko zatangiye kubikora igihe kitaragera kimwe n’abakandida biyamamaza bataremererwa abo bose bazafatirwa ibihano.

Muli icyo kiganiro kandi hagarutswe ku kayabo k’amafranga azakoreshwa muli iyo ngirwa-matora angana na 6.600.000.000 F y’amafranga y’u Rwanda mu gihe mbere hari hakozwe budget ya Miliyari eshanu gusa! Komisiyo ikaba isobanura ko ako kayabo k’amafranga yiyongereye bitewe ahanini no kuzakoreshwa mu bikorwa birimo gukurikirana ukwiyamamaza kw’abakandida, guhugura abazatoresha no kwigisha abanyarwanda ibijyanye n’uburere mboneragihugu.

Banyarwanda banyarwandakazi biragaragara ko iyo budget ikomoka mu mitsi y’abaturage nta mpamvu nimwe ituma yiyongera uko bwije uko bukeye uretse kuba azinjira mu mifuka ya bamwe muli ba Rusahuliramunduru bitwaje iyo ngirwa-matora mu gihe ubukene n’inzara binuma hirya hino mu gihugu cyacu!

Banyarwanda banyarwandakazi, aya mafranga aho kugirango apfushwe ubusa akoreshwa muli riliya kinamico ry’amatora tuzi twese ko yemejwe bidasubirwaho n’ihindurwa ry’itegeko nshinga ryadodewe Giti mu jisho Paul Kagame aho yifuza kuzayobora u Rwanda ubuziraherezo ; jye nsanga yakagombye kuba igisubizo kimwe ku banyarwanda bose hakorwa umushinga waguye mu kubagezaho amazi meza bityo bakaba birinze indwara zinyuranye zabayogoje dore ko kugerageza demokrasi kwa Leta y’agatsiko ka FPR byo biri kure nk’ukwezi. Murakoze.

Byanditswe ku wa 25/05/2017, na:

A.BEN NTUYENABO, KIGALI-RWANDA.

Rwanda: Komisiyo y’igihugu y’amatora (NEC) mw’ ikinamico ry’amatora ya prezida wa republika – 8/2017

Ni mu na

Kagame-at-Umuganda-with-residents-of-Nduba-in-Gasabo-District-Kigali-26-November-2011

ma ngaruka-kwezi yo ku wa 30/03/2017 ya bamwe mu bayobozi b’imitwe ya politiki bibumbiye mu cyo bise forum des partis politiques y compris le FPR aho Bwana Kalisa MBANDA, Prezida wa komisiyo y’igihugu y’amatora yatanze ikiganiro ku mushinga w’amabwiriza ya komisiyo y’igihugu y’amatora agenga itora rya prezida wa republika muli 2017.

Bwana Kalisa MBANDA akaba yarashishikarizaga abo bayobozi gukurikirana ibijyanye n’amatora ya prezida wa republika abasaba kugeza kubo bayobora amabwiriza n’ibisobanuro bishoboka byose kugirango igikorwa cy’amatora ya prezida Kagame azarusheho kugenda neza mu 2017. Yakomeje avuga ko nk’abafatanyabikorwa b’imena basabwe gufasha nkuko babisanganywe.

Muri icyo kiganiro kandi Bwana MBANDA yagarutse no ku bwitabire buteye isoni ku rubyiruko mu gihe cy’amatora aho yagize ati : urubyiruko rwaratunaniye aho ujya kubona igihe cy’amatora batonda umurongo inyuma y’umudozi w’inkweto kuko azibadodera cyangwa inyuma y’umutetsi w’ibiryo byabo akaba aribo bahundagazaho amajwi ! ati birababaje ! Bwana Mbanda yeruriye abari muli iyo nama ko urubyiruko rw’u Rwanda rw’iki gihe ariko rumeze ati ntiwamenya imirerere yarwo ati byongeye kandi ni uko nururangije kaminuza ari uko ! yakomeje asaba abafatanyabikorwa b’amashyaka mu gukomeza kubafasha gushishikariza urubyiruko ibyiza by’amatora ya prezida wa republika bagiye kwinjiramo.

Bwana MBANDA yakomeje abagezaho bimwe muri ibi bikurikira bikubiye mu mushinga w’amabwiriza agenga itora rya prezida wa republika by’umwihariko:

1.GUSINYISHA ABASHYIGIKIYE UMUKANDIDA.

-Gusinyisha abashyigikiye umukandida wigenga bitangira iminsi cumi n’itanu (15) mbere y’umunsi wo gutangira kwakira candidature.

-Umukandida wigenga asinyishiriza abamushyigikiye ahantu hatarenze hamwe mu Karere yamenyesheje ubuyobozi bw’akarere mu nyandiko, akagenera copie Umuhuzabikorwa w’amatora ku rwego rwa Zone y’amatora Akarere gaherereyemo, byongeye kandi format y’urupapuro asinyishirizaho abamushyigikiye ayihabwa na Komisiyo y’igihugu y’amatora iriho na cachet yayo. Ikindi ni uko urutonde rw’abamufasha muri icyo gikorwa rushyikirizwa Komisiyo y’igihugu y’amatora ku rwego rw’igihugu mu minsi cumi n’itanu (15) mbere yo gutangira gusinyisha abamushyigikiye.

2. AHAMANIKWA IBYAMAMAZA ABAKANDIDA.

-Birabujijwe kumanika ibyamamaza umukandida mu isoko, ku mavuriro, ku mashuri, ku nsengero, ku nkingi z’amashanyarazi n’aho abagenzi bategera imodoka, gusa bishobora kumanikwa ku nyubako no ku binyabiziga igihe umukandida abyumvikanyeho na ba nyirabyo.

3. KWIYAMAMAZA HAKORESHEJWE IKORANABUHANGA.

– Birabujijwe gukoresha imbuga nkoranyambaga za Leta n’iz’ibindi bigo bigamije inyungu rusange mu gikorwa cyo kwiyamamaza, izemewe n’amategeko mu gikorwa cyo kwiyamamaza hubahirizwa amategeko ya Komisiyo y’igihugu y’amatora akaba harimo Facebook, Twitter, Website, WhatsApp, na SMS.

-Umutwe wa politiki cyangwa umukandida wifuza kwiyamamaza akoresheje ikoranabuhanga abimenyesha mu nyandiko Komisiyo y’igihugu y’amatora hasigaye nibura amasaha mirongo ine n’umunani (48) ngo atangire kwiyamamaza kandi akanagaragaza mu nyandiko uburyo bw’ikoranabuhanga azakoresha. Mu gihe umwe muri aba hari abo ateganya bazamwamamaza, agomba gushyikiriza Komisiyo y’igihugu y’amatora urutonde ruriho amazina, numero ya phone, numero ya carte d’identité rw’abo yifuza ko bamwamamaza hakoreshejwe ikoranabuhanga, n’aho bakirira cyangwa boherereza ubutumwa bwabo (email address).

-Umukandida wese wifuza kwiyamamaza akoresheje ikoranabuhanga ashyikiriza mu nyandiko Komisiyo y’igihugu y’amatora ubutumwa bwose, amafoto n’ibindi byose ateganya kuzifashisha mu gikorwa cyo kwiyamamaza hasigaye nibura amasaha mirongo ine n’umunani (48) ngo atangire kwiyamamaza kugirango Komisiyo ikore isuzuma mu kwemeza cyangwa igasaba ko bihinduka.

Igihe cyose bibaye ngombwa Komisiyo y’igihugu y’amatora ishobora kwiyambaza izindi nzego zibifite mu nshingano zazo kugirango ishobore gukurikirana imigendekere y’igikorwa cyo kwiyamamaza hakoreshejwe ikoranabuhanga, ni muli urwo rwego umukandida wese cyangwa abamwamamaza baryozwa ibyaha bakoze mu gikorwa cyo kwiyamamaza no kwamamaza hakoreshejwe ikoranabuhanga, nko gukoresha by’umwihariko amazina y’undi muntu igihe hoherezwa ubutumwa hagamijwe kwiyoberanya.

4. GUHAGARIKA IBIKORWA BYO KWIYAMAMAZA.

-Hakoreshejwe uburyo ubwo aribwo bwose, ibikorwa byo kwiyamamaza bigomba guhagarikwa hasigaye amasaha 24 mbere y’umunsi w’itora kandi ibyamamaza bikaba byakuwe aho byamanitswe kumunsi ubanziriza itora, byongeye kandi nta nuwemerewe kwambara imyenda cyangwa ibindi byose byamamaza kuri uwo munsi no ku munsi w’itora.

5. GUHAGARARIRWA K’UMUKANDIDA.

-Urutonde rw’abazahagaralira abakandida rushyikirizwa ishami rya Komosiyo y’igihugu y’amatora mu Karere hasigaye nibura amasaha mirongo irindwi n’abiri (72) mbere y’umunsi w’itora.

Banyarwanda banyarwandakazi ngayo amwe mu mabwiriza agomba gukurikizwa mu gihe cy’amatora y’umukuru w’igihugu 2017, mwiyumviye ko hari n’ibihano bishobora kuba biteganijwe ku munyarwanda uziyamamaza cyangwa uzamamaza binyuranije nayo. Ikindi ni uko mu gusoza iki kiganiro Bwana Mbanda yamenyesheje ko batekereje no ku banyarwanda bafite ubumuga bwo kutabona aliko bazi gukoresha inyandiko ya ‘’ Braille ‘’ ko bazayifashisha mu gutora.

Iyi nama rusange ya bamwe mu bayobozi bahagaraliye imitwe ya politiki n’abadepite yarimo na Bwana NSENGIYUMVA Fulgence(hutu de service) akaba na Sekereteri wa Leta ushinzwe agriculture wari waje gutanga ikiganiro kijyanye nuko umusaruro w’ubuhinzi wifashe muli iki gihe. Ikaba yarashojwe n’umuhango wo gushyiraho abagize bureau shya y’ihuliro ry’amashyaka yemewe na FPR igizwe na Hon. Deputé MUKAKARANGWA Clotilde ukomoka mu ishyaka PDC (nk’umuvugizi w’ihuliro) na Mme NDANGIZA Madina ukomoka mu ishyaka PDI ( nk’umuvugizi wungirije w’ihuliro).

Murakoze.

Byanditswe ku wa 07/04/2017, na :

A.BEN NTUYENABO, KIGALI-RWANDA.

Rwanda. Gatsata sector: Itechnica mu matora ya FPR-NEC (National Electoral Commission) atumye benshi beguzwa.

Itechnica rya FPR-NEC (national electoral commission) ryabaye mu matora aherutse mu nzego z’ibanze n’izihariye za Leta mu Rwanda ritumye abenshi mu bayobozi beguzwa ku gitutu ,akaba abenshi ari abari basanzweho mbere bakaba bari bongeye kugirirwa ikizere n’abaturage aliko bikaba byari bibangamiye umurongo w’amalisti yakozwe mu itechnica rya FPR-NEC hagamijwe impinduka mubari basanzweho. Ibyo bikaba byaratangiye ahanini mu mwaka ushize wa 2015 aho abatari bake begujwe ndetse bamwe muribo bakanafungwa by’urwiyerurutso nk’uwari umuyobozi w’akarere ka Rubavu Bwana CHEIH Bahame Hassan n’umunyamabanga nshingwa-bikorwa ndetse bagasabirwa no gufungwa igihe cy’umwaka kugirango bihabwe umugisha; kimwe n’ahandi henshi byarabaye mu cyahoze ari prefegitura ya Cyangugu ubu hitwa Rusizi aho Team yose y’abayobozi bagera kuri 15 na njyanama yabo begujwe muli ubwo buryo mu mpera z’umwaka wa 2015.

Banyarwanda banyarwandakazi, ibyo byose byateguraga itechnica ridasanzwe muli aya matora y’ibanze nay’inzego zihariye za Leta yabanjirijwe na referendum; ayo maco y’inda nini, kwikubira cyangwa kugabira uwo ushaka gukorwa na Leta ya FPR akaba ariyo ntandaro y’izo ngaruka ku bayobozi.

Ubu haravugwa iyeguzwa ry’abayobozi b’imidugudu itanu mu karere ka Gasabo, umurenge wa Gatsata aho abo bayobozi bari basanzweho mbere bari bongeye kugirirwa ikizere muli aya matora aliko kubera ko mbere yuko aba bari basabwe kutongera kwiyamamariza mandat shya byabaviriyemo kweguzwa! Birababaje ! demokrasi ziragwira!

Abo bayobozi akaba ari abo mu tugari twa Nyamabuye, Nyamugari na Karuruma ho mu Murenge wa Gatsata bakaba begujwe kuli uyu wa 3/03/2016 mu gihe kitarenze ukwezi kumwe bari bongeye kugirirwa ikizere n’abaturage hari taliki ya 8/02/2016 babahundagazaho amajwi. Abo ni KAYIRANGA Muzamira wari umukuru w’umudugudu w’Akamwunguzi, KAMUZINZI wari umukuru w’umudugudu w’Amarembo, NIYOMUGABO Viateur wa Ndengo, BAMURANGE Césarie wa Rwesero na MUNYANEZA wa Nyagasozi mu kagari ka Karuruma. Abo bose bari basanzwe muli mandat yacyuye igihe aliko ubuyobozi bw’umurenge wa Gatsata bukaba bwari bwababujije kwongera kwiyamamaza muli iyi mandat.

Mu kuyobya uburari, UWINKINDI Angélique umukozi ushinzwe irangamimerere mu murenge wa Gatsata usanzwe asimbura umuyobozi w’umurenge yadutangarijeko ibivugwa ko abo bayobozi begujwe atari ukuri ko ntawabashyizeho igitutu ngo begure kandi ko ubwegure bwabo butarasuzumwa ngo bwemezwe, akongeraho ko gusa abo bayobozi bajyaga bahwiturwa kenshi kubera imikorere yabo.

Mayor RWAMURANGWA Steven w’akarere ka Gasabo avuga ko icyo kibazo atakizi aliko ngo agiye kugikulikirana ngo arebe niba hari ukundi byagenze noneho habe hafatwa icyemezo cyo kubasubiza.

Banyarwanda banyarwandakazi, ngizo ingaruka z’amatora atechnitswe à la FPR-NEC, by’umwihariko udushya turimo tubera mu Murenge wa Gatsata, akarere ka Gasabo ho mu mujyi wa Kigali.Murakoze.

Byanditswe ku wa 07/03/2016, na:
A.BEN NTUYENABO, KIGALI-RWANDA.

Muri Kongo, Kabila na Tshisekedi barashiditse

Kabila-Tshisekedi/Photo sunucontinent.net

Amatora ya prezida yabaye muri Congo kuwa 28/11/2011 yaranzwemo ubujura bwo kwiba amajwi byatumye Yozefu Kabila yongera gotorwa. Komisiyo ishinzwe amatora yamuhaye amajwi arenga 48 kw’ijana naho Tshisekedi afite 33. Nubwo hemejwe ko Kabila ariwe watowe, Tshisekedi nawe yavuze ko ari we perezida kubera ko azi ko ariwe wagize amajwi menshi.

Icyo kibazi cy’ingutu cyatangiye gukurura amahane ku buryo hari n’abapfuye mu mvuru zakurikiyeho. Ku wa mbera ku ya 12/12/2011, ikibazo cyabaye agateranzamba ubwo Musenyeri Monsengwo wa Kinshasa yemeza ko Yozefu Kabila atatowe, ko amajwi menshi ari aya Tshisekedi. Kiliziya gatolika yari yohereje abagenzuzi b’amatora muri Kongo hose. Iryo jambo ryaje rikurikra raporo ya Centre Carter yameje nako amatora atagenze neza, ko habayeho kwiba majwi bayaha Kabila.

Ababikulikilira hafi, bavuga ko uko byagenda kwose, Kabila azategeka. Impamvu ntayindi ni uko afite akanga na ba Mpabatsibihugu bashyigikiye abandi ba perezida bo mu gaco kamwe aribo Kagame na Museveni. Ntabwo rero ari Kabila uzaburizwamo kandi abo bakuru b’ibihugi uko batatu baziranye kuri byinshi. Hari ukwica impunzi muri Congo muri 1996-1998, kwiba ubukungu bwa Kongo, n’ibindi.

Amahanga arimo arebera ariko ku bakurikira, babona Kabila azategekana na Tshisekedi. Nkuko byagenze muri Kenya nyuma y’amatora yabayemo imvuru nyinshi, Kabila azaba perezida, Tshisekedi abe ministri w’intebe. Azabyemera? Cyangwa azashoza intambara? Dutegereze turebe.

Amakuru ki ?

Amakuru