Wapfa !

Nta ngoma itica !

Ingoma idahora aba ari igicuma !

Icyo ingoma yimanye wimana icyo !

Induru ntirwana n’ingoma !

Uko zivuze ni ko zitambwa !

Uko zivuze Nyamahembe !

Ingoma uyirira inkuna igakiza nkunzi !

Umwami arica agakiza !

Umututsi umuvura amaso akayagukanulira !

Ni hahandi !

Nta muhutu ukira ubuheri !

Umuhutu arakira ariko ntakira nsigariza !

Akabaye icwende ntikoga !

Iyaseseye ntiyugururirwa !

Inzira yanyereye ntiyuma !

Iyabaye inja ntiba ingore !

Umututsi musangira amaraso ntimusangira amata

Ziba !

Ntacyo mvuze ntiteranya !

Nyirakarimi karenga arirega !

Uwihoreye ahonga bike !

Kwa Bwoba havuze impundu kwa Bugabo havuga induru !

Nzajya iyo umwami agiye !

Irivuze umwami !

Imbwa yarashyutswe irapfa !

Nujya ubona Nyirijana ujye uzilikana icyalimuhaye !

Wikanira umugisha w’undi ukannya ibuye !

Bwenge

Umugabo ni urya utwe akarya n’utw’abandi !

Abagira inka bagira Imana barasaba bagahabwa !

Namuteranyije n’imfura ye iyanjye irandengera !

Bampamagaliye gukina ndakindura !

Nyilinkota nuyifashe akarumyo !

Umuhanguramahano

Bantu bo kwa Muntu ari we Kamezamilyango k’ Abanyarwanda nje kubashoza! Ndagira ngo mwulire uyu Muturirwa ijuru mulikamate maze mumanukane umurego utareguka mukogote iyi migani y’Imiganamahano. Muzihanukira muyikogote muyikongore na nkongwa ibitse mu nda bundi buhe yongera gukongeza amahano mu Rwanda ! Nimuyirobe muri iyi nyanja y’inkaba rurembamo kuva rwaremwa none rukaba rumaze kuremba.

Si amakabyankuru kuko nzirikana buri munsi Uduhenge twa henga henga rwihengetsemo ariko kwonkereza akaraga bikanga bikaruranga!

Rusigaye rwizihira Abatemyi n’Abatemaguzi, Abavungavunzi bavunga impabe n’indembe, imbabare n’imburuburu zihonyorwa, zihondobera ariko zihonda agatoki ku kandi kuko ari cyo zishoboye. Ni aka ya mvugo y’Inshinzi n’Inkwakuzi zikaraga zikobora Rubanda rusigaye rubandabanda rwabuze epfo na ruguru.

Kwa Ntababo ni aha, kwa Mwanzimwabo ho ni hariya naho kwa Mbuzamamenero ni hepfo yo kwa Mbuliragihugu. Ngo iliyasumba ni Ntarwanda ko mwana w’Umunyarwanda!

Impigamahano

Umugani ugana Amahano nuhararukwe aho guhabwa akahari uhabwe  agahini; nuhilimburwe uhekeshwe inyonjo; uhenebere uhekenya amenyo ! Nuhenebere nka ya mahembe y’imbwa, ariko  kugenda nka nyombere !

Nimuhaguruke nimuhagarare mwadukire imigani yose igana amahano; mujye mu mashyamba mushyashyane maze mushake ibihondesho. Hazaza gutora ya matyazo aya y’isugi nuko mwicare muyihonde muhondagure isigare ari umuyonga w’inyongobera.

Umwe, umwe muzawuhadika mu ihembe ry’inka y’ingumba, yavutse ifite ubukunguzi bukugiyemo cya cyishi cyogogoje uru Rwanda!

Mumaze guhadika muzihute no mu masenga intare zitaha ndetse n’ingunzu zizaryenda ziryigimbe wa Muco Wica uhite udwingwa utajwigira, ujombwe imikaka ushire ubukaka ucibwe ucike ubutazubura umutwe i Rwanda.

Imigani uganamo yo izigunga, igongere ihanure amahano iyahambire ihambare ihite ihonongera mu masenga bundi buhe icibwe i Rwanda!

Ndabona rweze ni rwa Rwanda umwanda ntawo ariko uranuka n’aho wabaye kuhava wose bizagora.

Ibintu byaracitse ingoma zikiremwa zirema u Rwanda ruba nk’ikirema, ishyano lilimikwa maze kwica, kwica umuntu biba ubutwari, uko gutwarana biba umurage kugeza n’ubu!

Nimuce kwica, kwica umuntu, imigani nk’iyi ari yo mwica mureke kuyica! Mwese muzicare muyicoge, muzayicoce icike amaguru, amagufwa yayo ba Bahekenyi bihekenyere bave mu mahano ahekenya umuntu.

Ndabona ntawe uzabaveba ahubwo izina ryabo rizakwira u Rwanda rwose ruryamamaze ngo bazi guhekenya n’amagufwa y’imigani igana amahano, bakayica igacika bakayitsemba!

Abahekenyi nk’aba ni bo Bagugunnyi  nibayigugune bigugunire urupfu ipfunyitse na rwo bahekenye bagire ishingwe barukubure rwikubure ubutazagaruka mu Rwanda !

Nibazibukire nta guhekenya umuntu azira guhekenywa hano mu Rwanda. Kirazira rwose no kuva rwaremwa ntabwo umuntu ahekenywa ahubwo uwagoberewe ahekenya amenyo kandi ni aye ahekenya kuko kubona ayundi ngo ari yo uhekenya ni ah’Imana ikoze umurayi.

Inama nziza ni uguheka aho guhekenya niyo waba uhekenya amenyo. Ariko iriya migani igana mu rupfu  uwayihekenya n’iyo yapfa yaba apfanye n’icyo cyishi, akipfira.

Imigani nk’iyi urupfu rukunda mucyo tuyange tuyangize ntibe inyange ntibe icyanga icyishi ibitse tucyonone kizarengane n’irirenze!

Mureke mbisabire umusanzu mukusanye ifitanye isano n’uyu n’indi, tuyisusure no mu busuna hase no hasi iyo haba icyavu ngo izajye icibwa n’abandavuye.

Uciye ibintu ugacura inkumbi, ugarika intumbi ukaba intumva ugahora utumbye unatumburutse ni uyu nguyu.

Nta ngoma itica !

 

Nti ego ko mwana w’Umunyarwanda n’ubwo numva ipfunwe lipfura umusatsi wose !

Ingoma y’ingome, ari yo ngome y’ingoma akayiri mu nda ni kakandi kamenywa n’umwiru na nyirayo !

Ngo ihatse inkota ikeba  ikavusha ikaba ingongo ivuza icyuma ! Akayiri mu nda ni ka kaga k’akandare karuma umuntu kakamuhwanya! Yaramvuwe yica ibiti n’amabuye ntibyatinze yenda abantu irabesura ihita ibahindura umuryo wayo.

Ingoma y’i Rwanda ni iyi ngiyi, Nyamuryabantu niko yavutse ntivuguruzwa ivuga iryo ishatse!

Igira umugambi utagamburuzwa, ikamenya kwica, kwica umuntu, iyo yaburaye bucya ica ibintu.

Kumena amaraso ni nkawo mwuga ikazira umwuma ireba umuntu!

Nta Gihanga, nta gihango mu Banyarwanda ahubwo buzuyemo ibihanga ariko byiharaze ibigembe.

Ngo ingoma itica iba yapfuye igapfapfana kuko iba itisasiye imirambo!

Imvano yo kwica ndetse no kwicwa iyo uyirebye ukitegereza se wayibyaye ni wawundi witwa Ubuhangange!

Akagira Abagaragu bitwa Ubwenge n’undi witwa Umucurabwenge nuko Kwica akaba uwa gatatu.

Ngiyi ya Nyabutatu ya Gihanga yaje guhangwa nta Gihango ahubwo igahangirwamo Isumbwe lifite Isunzu lisuzugura!

Umuco nk’uyu uhaze ico wacuze Umuvumo uvumwa u Rwanda rurandura, rurandavura, rurandagara, rurenderanya; rukabura icumu ruraryesa ni bwo rubyaye Amacumu Acanye.

Si ugucana aracanira umuvumo uranga uravuvumanga uravogera uvugana ivogonyo, ubwagura urupfu ruhabwa intebe mu mu ngoma si ukugonga ruragogomera, rugotomera inkaba ruyikaraba.

Kwica umuntu aho kuba umwaku ngo bibe umwanda biba ikirato barabirata, ingoma y’i Rwanda ibiha ibanze uvuze ko yishe agahabwa impundu n’ababyeyi babyaye ndetse n’ingumba rutavumera zikazidodora.

Uyu muco wica ingoma iwugomororera ruhoga inkaba irahoga mu gihugu gisa n’gihuru cyahorobwemo n’ibihunyira bireremba ku nkaba.

Ntibyatinze inzigo ziba urusobe zirasobekerana; u Rwanda n’uko rwaremwe kuva ku ngoma ya Ruganzu Bwimba na Robwa mushiki we baragurijwe bakerezwa kujya kugwa i Gisaka cya’Abazirankende ngo u Rwanda ruzakendere ruherekeza ruva i Gasabo k’Abongera batazongera kulirevura.

Ingoma yica, yica abayo iba ibaye Ruzirampuhwe, Ntambabazi kuko yimika kwica yimika no guhora.Undi mugani ugana amahano urihanukira utaha mu ngoma nta ngorane uhaba ingongo.

 

Ingoma idahora iba ari igicuma

 

Amaboko yombi y’ingoma abaye ingogo kumwe kurica ukundi  kugakumbanya !

Ukw’iburyo kurica ukw’ibumoso kugahora kandi ntiguhora guhoze nk’Imana y’i Rwanda ahubwo kurahuranya. Itanga umwe ngo nagende agwe ku gasi maze mu guhora ikazaharamba umusozi wose ikawuhuga ariko kuwuhindura ya mpinga ya ntagahinguka !

Uko guhora bizira guhora ni nk’umugambi w’inkoranyabibi, aho abicanyi bicuza badacakiranye, bica abantu ari uko bahereye ku masano.

Wishe abanjye ndica abawe kuva rukiremwa kugeza none Rwanda rwica ari na ko rwicwa, rwica abantu !

Umunsi ruzicwa ruzapfakara rupfe cyane ariko n’ubundi rwarapfuye kuzazuka n’ah’Imana ikoze umurayi.

Uhoze adahoye ari Umunyarwanda yitwa umwanda akagawa cyane kuko atishe umwanzi !

Abanyarwanda utwegereye umuco wacu uhorana abanzi, utagira abanzi ubanza yapfa!

Muze twibaze Banyarwanda ! Umwanzi wawe ni uwo wanga? Umwanzi wawe se ni ukwanga?

Niba wangana uri umwanzi kuko wanga! Uwanga abandi aba ari umwanzi kandi iyo wangana  uba ubizi!

Ushobora kwangwa ntubimenye kuko ukwanga atabiguhishuliye! Anga kwangana ahasigaye wigaramire. N’ubundi ngo hagoka Uwanga nawe uwangwa yigaramiye! Nk’uko hagoka ugaya nawe ugawa yigaramiye!

Umwanzi w’Igihugu ni uliya ukamata Umwenegihugu akamuvutsa Ubumuntu agira ngo amugire Ntamuntu nka we,kuko we bwamugumiye agasa n’umwe wagumiwe n’amenyo uhagamwa n’amazi. Ntamuntu uyu si umwanzi w’igihugu gusa ahubwo ni umwanzi we ubwe kuko aba yaranzwe n’iminsi maze nawe akiyanga!

Ni uliya Rwararikamirambo wirambura agatema intoki, uhora ajiginwa ajwigilirwamo n’umujinyaw’Umuranduranzuzi, ni we Nyangabirama na Rwangamigondoro! Ni uyu mupfu wapfuye ahagaze kuko iyo yica aba akurura abantu ngo bamusange mu rupfu rubapfukirane base nawe ariko

bo bo bahwanye!

Igicuma

Nsanze Igicuma kidacumura! Ntigicukura, ntikicuragura, ntigicuraganya, ntigicubangana, ntigiculikwa kuko kitamize umiculi. Ahubwo ni mugenzi w’igicuba ari we Kimaranzara cya Nzongera ngire icyenda cyenda inka n’abana.

Nsanze gisigiye n’Igisabo ngo iwabo kwa Nzuzi zeze,zeze ineza, zikazazira inzara n’iyo yaba ihetse inzaratsi; zikazayeza ari inzuzi naho yari ituye igaturura. Igicuma mu gucumbika ntigihezwa ndetse n’i Gasabo ya Nkuba ya Nyabakonjo iyo bakirabutswe ngo ntibakonja!

Mbonye Gasabo mbona Ibisabo aho ku ruhimbi iwayo bihimbaje ukayiha impundu; ya Gasabo yo kagira Ibisabo bikuru byabyo bikaba Ibicuma! Igicuma nk’icyi ko kidacumura, mucyo tucyegereze Igisabo n’uko bisabanire i Gasabo.

Nyina w’ibisabo ni wowe Gasabo, Ibicuma byawe na byo ni nk’ibyo; reka guhagamwa n’urwo Rwanda reba Kamuhagama  uyihandagilire muri cya Gicuma kizunganirwa n’Igisabo isabe Ubumuntu.

Nguko kwiyuburura ukanaga u Rwanda mu ijuri n’ijoro maze ukazahora uri Gasabo, ugasabanya Abanyagasabo, kuba Imfura kwawe ni uko nguko ni kwa kwanga guhera mu Mfuruka!

Uzira guhora, guhororomba ntubikangwe, kwica umuntu ba ari byo wica, biragatsindwa, nguko kwimika cya Gicuma ari cyo cyibarutse Igisabo aho i Gasabo.

U Rwanda rwimure aho i Gasabo, ujye ku Ruhimbi uhimbagizwe dore Abahire baragushagaye; hirwa cyane ndabona Imana igana iyo ngiyo igira ngo Imane. Urayihe icyubahiro gikwiye, Abanyagasabo bagire Imana bareke u Rwanda. Rusa n’urutazi iyo rwaturutse n’iyo rureba ntiruharabukwa ruri mu mwijima utangaje.

Ingoma idahora uyihatse mu nda wowe Gasabo Nyilibisabo! Ngo ingoma idahora aba ari Igicuma.

Ibaye Igicumbi Nyirubumuntu, itashye i Gasabo ngo izashengerwe n’Ibisabo na byo bisabye Ubusabane.

Nize mu ngoro y’i Gisabo ihatekanye ihagire inteko. Izira Gucumura ikazira amacumu ! Habe na limwe ntizahora kuko mu bayo nta Muhozi, igira Gisabo ikitwa Igicuma !

Dore gira bwangu rwo rwarenze, abaruhagaritse barahagaze none rwongeye kwokera ariko Kwanda rwitwa Rwanda ! Kuri uyu wa none rurandara kuko rwaratonetswe cyane, abarutoneshaga baratukuzwa nka rya Tukura rya Nyabikenke na Lyangombe. Rwaratukuye ruratukulira, rwaratikuwe, rwarahiye ruratokombera, rurayonga ni umuyonga. Rugize Imana ikaruruhura rukaruhukira mu Mayobera azarukuramo wa muvumo, rugatuza iyo mu mutuzo ntawongeye kurutoneka n’Ingoma zica !

Gasabo

Gasabo raguza zere weze Imana y’Impanamahano, izayahosha ikayohera ubutazubura umutwe i Gasabo. Ndumva utamilije Imitsindo itsinda Amahano ikeza Amahoro, uzire Abanzi ugire Abakunzi.

Kundwa ukundirwe utumburuke, uganze ugarura uzira kugabanya, cinya amakamba amannywa arakambye, kanura amaso ushikinyike amenyo ; uli Gasabo saba Ibihugu, igihu cyikubuditseho ugihuhe cyinjire mu ijuru kiliture nilibishaka liziture.

Uli Gasabo ya Nkuba wa muhungu wa Nyabakonjo kandi wimakaje Ibisabo aho i Gasabo, Ibicuma byawe bitsilika inzara bikesa inzigo, ni nayo mpamvu uzira Guhora cyo gira Uganze mu bo wabyaye nta Muhozi !

Gasabo shinjira uri iwawe, ufite Ibisabo inkiko zose, bifitanye isano na cya Gicuma, Cuma Urugendo si kure cyane, inteko yawe ni aho ituye. Ingoma idahora ni yo igukwiye yime rero ni cya Gicuma, u Rwanda rwawe rucyuye igihe nta gihembo rwarihembye, rwarahambye imbaga rutwaye irenze imbaririo zarwo.

Ni urwawe ni rwa Rwanda rwa Gasabo, kuva ruvuka ruvuza icyuma ngo ni icyugura mu kurwana none rusezereho rutahe inzira irujyana ni rwo ruyizi !

Se ubundi upfana iki n’urwo Rwanda ? Aho se mama wararubyaye cyangwa n’Ingurukira yituye uyihaye inturo yigire intozo yenda intorezo imara abawe ? Dore urabizi ngo inyana y’intsindirano ironka  ntijya itsimba ! Ni ko gutsimbana kuyiranga none ibaye wa murangara urangaye !

Mbe Gisabo, gira uhaguruke ushinge uri Intameneka, usa n’Agasabo ukaba Gakondo, iyi y’Abakonde bagukonze, bagukungze. Aho mu Bakonde uri ku Mukondo Inteko ni aho utetse ni i Gasbo. Ufite Ibisabo impande zose no ku nkiko birahajishe, ni ukuremereza Urihimbi ugahimbazwa ugahora usanganizwa Ibisabo;  bizira Kumenwa ni aho ukura kuba Umutamenwa!

Harya urwo Rwanda rwa Gasabo, wararubyaye rurakuganza ruba Ikigagara? Cyangwa ni umugaragu wawe waje kukwinjirana akwiba umugono agarama ku ngoma imara abantu kandi iyawe isa n’Igisabo kuko itica ntinahore? Cyenyera rero ubu bwacyeye kuko u Rwanda rwarapfuye, rwarapfutse niruve ku ngoma maze uyime, uri Gasabo.

Rwaratanze nta mutungo nta mutuzo, gira uhaguruke wime iyo ngoma wibwe kandi iyawe izira guhora ikazira guhora. Izira no kumenwa kuko igendana n’Igisabo bijya i Gasabo. U Rwanda rero rureke kwanda no kwenderanya no kwanduranya. Ruhindure imfura rwikinge aho mu mfuruka uzarufurebe, urarufubike, uzarworose rusinzire iteka ryose!

Igicuma cyawe gihe Imitsindo kizatsinde kizira ibamba nta kubamba, ndetse ugisanga muri Rubanda dore rugiye kubandanya rwekereza i Gasabo, ingoma yawe itahe mu Ngoro Ngali y’i Gasabo!

Rubanda

Rubanda rwa Ruyango nje kubashoza ngo mubandanye mujye i Gasabo, mujye kuyisanganiza Ibisabo bizayamururaho u Rwanda rwandagaye aliko rutemba Itukura iteka; Gasabo iyi ngiyi muyihe Ibanze ali yo Ibanza.

Ibi Bisabo bisa na Muntu kuko ntawe umena Igisabo, n’umuntu wa Muntu ni uko nguko Umunyagasabo ni Umutamenwa!

Dore mubaye Abanyagasabo, igihugu cyanyu ubu ni Gasabo, u Rwanda rwose rwarashaje, rurashanguka ruba ishingwe na ba Bayobozi ubu bayobewe ntabwo bazi aho bayobeye!

Muhe Gasabo ibyo Bisabo ariko kuyegulira Gakondo ngo izakunde ijye ku Mukundo ikure u Rwanda yende Igicumbi cy’uru Rwanda ibyo kurucumbikira bihoshe!

Dore mubaye Benijambo, Abenegihugu ubu ni mwebwe, Abanyagihugu ubu nta babandi, ni mwe  Rubanda mujye Mubanda  mu ngo zanyu have Ibibanda Mboneragihugu bizabyalira icyi gihugu cya Gasabo! Kirazira nta kuniganwa Ijambo, Abanyagasabo bazira injamba, nimuhaguruke nimuhagarare

mwivovote ubu bwakeye, muvugane ivogonyo muli iwanyu, mu cya Gasabo ntawe uhezwa!

Gasabo ntiyanga ikazira kwangwa kuko yitwa Nyilibisabo bisanganya za Gakondo!

Ubu ndabareba imitara yose muhangaje mujya i Gasabo n’abatagenda bababwiye uko mubigenza, ubu muragenda mujya i Gasabo.

Mwese mwese bya Bisabo bijya i Gasabo mwabikozeho; injishi zabyo ntizibatonda kuko mugendana ubwitonzi, mukaba mwerekeza Uruhimbi rwa Gasabo.

Mbasabe mwese guhimbaza muhimbawe urwo Ruhimbi rwa  Gasabo kuko igiye gutuma u Rwanda rwikubura ngo igihe cyarwo rwagicyuye!

Uli Gasabo Nyilibisabo, Sebisabo, ndabona usigiye n’Imana ari yo yakuraze kuba uw’Abantu! Kirazira ntawe umena Igisabo kandi urebye gisa n’Umuntu, Umunyagasabo nabe Umuzirakumenwa.Kwica Umuntu ubu biraciwe hano i Gasabo, Abanyagasabo bazira kwica, bazira kwicwa nk’uko ntawe umena Igisabo; Kirazira rwose kwica Umuntu muri Gasabo!

Dore Umutongo Banyagasabo! KUBAHO mubyambare mu nkindi no mu biheko nimubiheke, ijoro n’umunsi ni wo mutongo utongerwa abo mubyara, ukaba umutungo uzabatunga iteka ryose!

Uri Gasabo gira Ibisabo ukagira Isumbwe ukarusumba, basa n’Ibisabo Abanyagasabo, barasa bose.

Bagira inkomoko muri Gakondo ntuzikonda uri ku Mukondo zaguhaye inda ya Bukuru ngo urazikuliye twara Inganji, Uganze.

Jya mu Nganzo dore uraganje uri i Gasabo, uri iwawe mu Bwanacyambwe, icyo Gisabo gisabana; Rukaryi iraje ni Igisabo, mbonye Ubuliza ari Igisabo, hataho Ubumbogo bw’Igisabo, Rukiga ikaza ari Igisabo; uku ni ko kwitwa Nyilibisabo ukaba usanzwe uri Uruhimbi ruhimbazwa ijoro n’umunsi.

Kabuza wigabe ku Nkiko, Umutara wose ube Igisabo, Ndorwa uyigende no ku Bukamba bucye wagenze Ubugoyi bwose ariko uramvura ibyo Bisabo, uzaba waciye na Cyibisabo.

Ubushiru ubwinjiranye urugwiro, Akanage kaza kukwakira, ureba Ubwishaza imbere yawe ngo uzagende no mu Rusenyi utaha Kinyaga, ubona Ibisabo bisabana!

Wa muhango wawuhanitse, winjiye Nyungwe ugana i Bufundu, Bunyambiriri nayo ikureba ariko kwerekeza iya Bungwe, Burwi ikubwira ngo gira Imana kuko ukundirwa n’Ibisabo, ya Nduga Ngali ngo ni Nyirabyo.

Tera intambwe ugere i Bugesera uhite utimbira ugana i Gisaka, Umubali uzaza uvuga Ubuganza maze uhagarare urora Gasabo, ibyo Bisabo ubu ni ibyawe.

Ntabwo uzoga Muhazi uzayitimbira ugere iwawe muri Gasabo; uri Gasabo umubiri wose!

Kora mu Nganzo Ganza utware Inganji, wambaye Isumbwe uri Rudasumbwa uri ku Isonga; uri Gasabo Nyilibisabo, ngibi Ibisabo biragusanga, byisukiranya Igihugu cyose ari cyo Gasabo Nyiribisabo.

Ucyikuye igihugu cyose, dore ku Nkiko urahakubutse, Hagati Hagati Hagatira Ingoma muri Gakondo zose, kandi zije ari Ibisabo bikacyira ibyo ku Nkiko, birasukiranya birasabirana bisabana aho i Gasabo.

Ngizi Gakondo zagukundiye zigukunze uri  Igicumbi ndetse ubu ubaye Mukuru wazo ziragusanganiza Ibisabo. Dore umutongo uzazitonga ngo ube umutungo zizatunga iteka.

Kirazira ntawe umena Igisabo ni Umutamennwa! Abanyagasabo, Abanyagihugu bazira amahugu, Abenegihugu b’ Abadahumbya, Abanyagihugu b’Abadahunga, bari iwabo aho i Gasabo.

Ntibavegetwa, ntibavogerwa, ntibavugirwamo, ntawe ubamena ntibamenwa ntibameneka kuko basigiye n’Ibisabo, Abanyagasabo ni Abasabo bazira kwicwa! Uwica umuntu aba yarapfuye ni umupfu wigenza cyangwa ugenzwa; wapfuye ahagaze nako ahwitagira mu Rwamba! Umwambaro yambara ni Urwamba arusha Umunuko icyitwa umwanda, yari mu rwanda ubu rwarenze.

Ingoma wimanye uri Gasabo izira guhora n’iyo bibaye igahora ihoze kuko usigiye n’Imana cyo gira Imana wowe Gasabo Abanyagasabo, Benimana bakaba bitwa Abazirakwica, bazira kwicwa muri Gasabo. KIRAZIRA ngiyi izazilizwe iteka itekanye muri Gasabo!

Ntuzice

Evariste Nsabimana