Archives annuelles : 2017

Rwanda: General James Kabarebe arabiba ingengabitekerezo y’ubugome mu rubyiruko

Nyuma yo gutinya kwitaba convocation y’abacamanza b’abafransa ku ihanurwa ry’indege ya prezida Habyarimana Jenerali KABAREBE arimo guta ibitabapfu kubera ubwoba butagereranywa afite muli iki gihe aho uyu mujenerali w’ingabo za RDF ahora mu ndoto z’urugamba rwa 1994 we na Shebuja Giti mu jisho Pahulo Kagame nawe wibera mu kirere ashakisha aho asaza imigeri atareka akarenge karuhuka ngo arashakira imibereho abanyarwanda; bakaba bibwira ko techniques stratégiques bakoresheje mu kuvanaho ubutegetsi mu ntambara ya 1990 zikiri actives ndetse ko zarushijeho kunozwa kandi inka yarariwe kera hasigaye uruhu !

Mu biganiro yari amaze iminsi agirana n’urubyiruko rutandukanye rero, Jenerali Kabarebe yaruhamirizaga ko nta mubano namba bagifitanye n’igihugu cy’ubufransa ko ari umwanzi w’u Rwanda guhera cyane cyane mu mwaka wa 2006 ubwo umucamanza w’umufransa Jean Louis Bruguiѐre yashinjaga abayobozi b’u Rwanda nawe ku isonga mu kuba baragize uruhare mu ihanurwa ry’indege yari iya Prezida Habyarimana. Jenerali Kabarebe akomeza yemeza ko u Rwanda rutazigera rwiyunga n’ubufransa mu gihe Leta y’agatsiko avuga ko yahagaritse Jenoside ikiriho.

Banyarwanda kubera icyo gikorwa cy’ubwiyahuzi nanubu kikimukomanga, uyu mujenerali akaba yaratangarije rumwe muli izo ngaga z’urubyiruko rwari mu itorero ‘Urunana rw’urungano ‘ ko bidashoboka ngo u Rwanda ruzumvikane n’ubufransa kuko iteka buhora bushaka guhirika Leta y’u Rwanda ati rero ku bw’ibyo ntituzigera dukiranuka nabwo ! ati ibyo mubyibagirwe !

Banyarwanda rubyiruko rwacu, murabe maso iyi ngangabitekerezo y’ubugome mucengezwamo itazabaviramo kugera aho muzamarira ku icumu inshuti n’abavandimwe banyu nkuko Hitler yacengeje ingengabitekerezo y’ubugome mu rubyiruko abyita Patriotisme kugera aho batsembeye abayahudi batabarika.

Général Kabarebe yaniraririye kuri urwo rubyiruko ko abo bacamanza b’ubufransa ntacyo bakora ku Rwanda ko ari abantu basanzwe nk’abandi bose uretse gushaka gusa gukomeza gutesha u Rwanda umutwe. Ati umufransa twakubitiye i Byumba tukamutsimbura ku rutare rwa Ndaba tumwambura n’imbunda yari afite murumva iryo pfunwe yarishira kandi nta wundi numwe uramunesha muli Afrika ! ati twamunesheje tukiri mu ishyamba ubu rero ntaho yakora, ntiyaza ngo arwane aho yaba aturutse hose.

Banyarwanda burya akagabo gahimba akandi kataraza ! uyu mujenerali yabaye umugabo ntiyahagaze imbere ya bariya bacamanza aho guhitamo gukomeza kumokera mu gikari nk’imbwa ishaje? niyemere rero ashikame kuko urwishigishiye arusoma! kugeza igihe uru rubanza hagati ya Leta y’agatsiko ka FPR n’ubufransa ruzaciribwa uretse ko ari uruca-bana kandi byange bitinde amaherezo y’inzira ni munzu.

Byanditswe ku wa 21/12/2017, na :
A.BEN NTUYENABO, KIGALI-RWANDA.

Inkono ihira ikibatsi ntihira ikibariro

Padiri Athanase Mutarambirwa

Banyarwandakazi, Banyarwanda namwe nshuti z’u Rwanda namwe mwese abakurikirana iby’iwacu mbaramukije mbifuriza amahoro y’Imana, muzagire Noheli nziza n’umwaka mushya muhire.

Nyuma y’iminsi mike ntaheruka kubaganiriza mu bintu binyuranye biba binshishikaje binanteye inkeke nabashije kumva benshi muri mwe bantashya bambwirako dusangiye uburyo bwo kubona ibintu n’abandi bambaza gusa impamvu ntaheruka kugira icyo mbatangariza.

Muri make nagize gahunda zimfatira sinakunda kubona igihe ariko harimo n’uburyo bwo kwiha igihe gihagije nzirikana, ngo ntazagwa muri wa mutego ntakunda aho abantu bazavuga ngo tuzi gusa kuvuga amagambo meza ugasanga ntabikorwa bifatika tugeraho.

Ubu rero niba ngarutse nuko maze kubona nibura inzira zirenze ebyiri twashoramo ubushake maze tukagera kubikorwa nyabyo bihamya intego yo guhemuza Paul Kagame na fpr maze igihugu cyacu kikava ibuzimu, hamwe abanyarwanda bahora baboroga baririra ababo bapfuye n’abandi bapfa buri kanya, abandi bafungwa, abandi bahunga ; maze kikagaruka ibuntu mu mahoro uko twayabyinaga kera mu busabane nubwo wenda nabwo bitari shyashya kuko ntabyera ngo de !

Ntihagire unyumva nabi ngo yibwire ko nje guhinyura cyangwa gusuzugura ibyo abandi barimo gukora ahubwo ndashaka ko tubyongera tukanabisozera. Ari nayo mpamvu iki kiganiro nagihaye umutwe ugira uti : « Inkono ihira ikibatsi ntihira ikibariro ».

Mbere yo gukomeza ariko reka ngaruke inyuma gato ; gusa sinshaka gutinda cyane mu byahise kuko ari ikintu akenshi kidukereza kuko kumenya amateka burya atari uguhora uyasubiramo bikageza naho ubura umwanya wo gutunganya ibihe by’ubu ndetse no guhangana n’ibyejo hazaza ; ahubwo ndifuza kubwira bamwe bavuga ngo kuberako kera habayeho ibintu bibi ngo nubu byabaho maze bakemera ibyo aribyo byose bakarengera Kagame mu kinyoma cye ndetse bakamushyigikira mu bugome bwe igihe cyose batabwamagana ngo baharanire ko mu Rwanda haba ubutegetsi buhamye bwubahiriza uburenganzira bwose bwa muntu.

Uyu mugani ndawucira Kagame kuko niwe mberenambere mu munaniro n’ubwoba afite uhora yibaza uko azarangiza, igihe n’uburyo azava ku butegetsi n’abazamukuraho doreko adateze kuzaburekura ku bwende bwe. Ariko ndaboneraho mbwire abihuta cyane ko ntacyo bimaze, nuko mbwire n’abazarira ndetse n’abiranze ko mu gihe gikwiye igikorwa kizasohora ; erega ntagahora gahanze. Gusau ko byagenda kose amateka tugomba kuyagena kugirango ibihuru bitazongera kutubyarira ibihunyira cyangwa ngo amahanga yongere kudupfunyikira amazi akazana undi muntu nka Kagame.

Umunaniro n’ubwoba bya Kagame

Nshuti bavandimwe mu kinyarwanda baravuga ngo : « ukuri ntikwica umutumirano » kandi ngo : « uvuzeko nyirurugo yapfuye siwe uba umwishe ». Mu gihe hari Abanyarwanda benshi batemerako Kagame Paul yakomeza kuba perezida w’u Rwanda, hari n’abandi bake ariko bafite ubukana burenze bamushyigikiye cyane ndetse bakamwogeza bikabije kuburyo bamugize nk’ikimana cyabo aho ndetse mu buyobe n’ubujiji badatinya kumugereranya n’Imana nyayo ngo na Yezu Kristu, umuhanzi wa byose.

Abo bamutaka ngo bahera kubyo yabashije kugeraho ku buryo butangaje doreko yavuye kure, maze bakibeshyako ngo ntakintu cyamunanira. Nyamara ahubwo iyo ninayo mpamvu nemeza kimwe n’abandi tubyumva kimwe ko Kagame ananiwe. Urebye aho yavuye hariya kuri Rubaga road, akagera ku buperezida ntugirengo buriya ntiyarangiye.Sinshaka kumera nkawe ngo nsuzugure umurimo yakoraga nk’uko aherutse gusebya ngo abantu baterura amakarito. Ariko ndagirango mbonereho mumenyeshe, kuko nziko atabizi, ko « ntamwuga ugoryamye ubaho, ahubwo ko gusuzugura umwuga uyu n’uyu aribyo kuba ikigoryi ».

Nigeze kwishimira politike ya FPR igihe bashyiraga mu mashuli ishami ry’ubumenyamuntu (sciences humaines) nibwiragako bizajya bituma hari ibyo abantu bumvikanaho kuburyo bworoshye maze yamvugo ngo « N’utagera ntagereranya » igacika mu kinyarwanda kuko twese twari kumenya gushyira mugaciro. Buriya se koko muri FPR n’abababyinira bandi, ntanumwe uribaza impamvu muri demukarasi bahisemo manda y’imyaka ine ishobora gusa kwikuba kabiri buzira ubwa gatatu ! Buriya koko ntibiyumvisha n’impamvu umuperezida yagombye kuba ajijutse bihagije !

Nonese niba n’abize bazi ibyo bakora, bagakorera munzego zisanzwe kandi zikomeye baba bananiwe mu myaka cumi n’ine gusa, kuki Kagame, simvuzeko ari injiji, kuko hari n’uwo nigeze kubibwira inyibutsako ngo yahawe za doctorat nyinshi, kuki nka we umeze utyo, avuye mu ntambara, agategeka ahuzagurika igihugu kidafite inzego kandi kugeza na nubu, n’ibindi bibazo kuki ataba ananiwe nyuma y’imyaka irenga cumi n’itanu mvuze mike ? Si ikibazo nibaza ahubwo ndahamya ko ananiwe keretse niba muri iyo myaka yose ntacyo yigeze akora. Gusa biranigaragaza n’iyo wumvise amagambo aba avuga. Si amagambo y’umuperezida ufite gahunda n’icyerekezo ahubwo ni ay’umuntu unaniwe. Asigaye avuga utugambo nk’utw’umwana w’umunebwe uta igihe, ahunga imirimo.

Kandi uretse no kunanirwa ageze aho ananiza n’abandi. Kandi iyo niyo mvano y’ubwoba busigaye bumuranga kuko yishisha buri wese akikanga igikomye cyose. Nanone aho kuvuga bya bipindi by’inkotanyi n’imishinga myinshi itazaza ya za Singapuru, amaze igihe adatuza kwikanga abazamutera cyangwa ngo bamukombore ku butegetsi baba ab’inyuma cyangwa se imbere mu gihugu.

Aho gukora imishinga izamura igihugu asigaye yirirwa agura ibitwaro ari nako ahora yiruka amahanga ngo ashinga za ambasade zigamije gusa kuneka abo batavugarumwe no gucyeza ibihugu ngo igihe byamukomeranye azabone abacira akari urutega. Nubwo yafunze benshi mubanyapolitiki batavugarumwe, uheruka akaba Diyane Rwigara, ubwoba ntibushira kuko byumvikanako ahora iteka abikanga. Kandi ni mu gihe bose ntibarya indimi kandi bigaragara ko bafite abantu benshi babari inyuma nubwo ntako aba atagize ngo abantu babacikeho.

Ibimenyetso by’ibihe

Burya ngo ibijya gushya birashyuha kandi koko ngo ingoma yibyayemo amahari iba igiye guhirima. Ariko nanone burya iyo umugabo atangiye gusaba uwo yimye ake kaba kashobotse, hari aho Kagame nubwo yishongora yasigaye acungira kubo hambere yasuzuguraga ngo Jupiler izabashobora.

Ikimenyetso cyambere kandi gikomeye nuko abagabo bukuri bageze aho bakanga gukomeza mu kinyoma n’ubugome bwa FPR bakemera gusubira mubuhungiro kandi biyemeje nubundi kongera kurwanira ukuri n’ubumwe bw’Abanyarwanda baharaniye kuva na kera. Hano ndavuga abo bose bari kurugamba nyarwo batagamije inyungu zindi.

Ubukene buri mu Rwanda n’ikinyoma cyo kubuhishira nabyo ni ikimenyesto kiboneka gihamya ko ubutegetsi bwa Kagame budahagaze neza kuko politike nyayo ubundi, ari imibereho myiza y’abaturage n’iterambere rizira ubusumbane n’ivangura.

Uretse n’ibyo kandi Kagame yihaye guhindura itegekonshinga afata ubutegetsi kuri manda ya gatatu none iyo urebye neza ubutegetsi bwe ntiburemerwa nyabyo ari nayo mpamvu nyine agihanganye no guhiga no gutoteza abo batavugarumwe kuko bo bagishishikajwe no kwerekanako batemera ibyakozwe ngoafate iriya manda.

Impagarara hagati y’u Rwanda n’abaturanyi ni ikindi kimenyetso kiboneka ko ubutegetsi bwa Kagame bugeze aharenga. Gukomeza gusonzera no gusahura iby’abandi, aka Maheru doreko ngo ariwe wafataga iby’abandi akibyita ibyiwabo, nkuko abigira muri Congo,ni impamvu ihagije no kurwego mpuzamahanga ko wagira gutya ukabona agiye aka Amini cyangwa se kubera ubwicanyi ahakorera akisanga mukagozi nka Charles Tayrol.

Guhungabanya ubusugire n’umutekano w’ibindi bihugu ndavuga u Burundi na Uganda birimo umuziro ushobora kumuviramo umuvumo utuma bamukomanyiriza, agashyirwa mu kato ibisumizi bye bikamutera imirwi we wahoze abeshya ngo aharanira amahoro y’afrika yose.

Ibyo kandi bitumwe tuzirikanako ariwe wirirwa akora amaserzerano yo kugurisha no kwangaza abana ba Afrika. Uretse se bamwe acuruza na Isiraheli na za mpunzi za Libiya ashaka kuvutsa nibura n’uburenganzira bwo gusubira iwabo, umunsi Abakongomani n’Abarundi bari mu Rwanda bavumbuyeko batwawe bunyago ngo umuhungu yirire agafaranga k’abazungu, hazacura iki?

Ahandinaho Kagame wirirwanaga na Bill Clinton na Tony Blair asigaye, nk’uko nigeze kubivuga yangara ashakisha uwa murahurira ngo abone urumuri rw’iyo yaba arimo kugana kuko imishinga ye yugarijwe n’umwijima.

Noneho kandi hari ikindi kimenyetso kigaragazwa n’ibinyamakuru byo mu Rwanda ko aho Kagame yibwiraga ko yashinze ibirindiro ubu asigaye ahishisha n’indiri za banetsi be zikaba zisigaye zijagajagwa mu bwisanzure. Ibyitso bye byaravumbuwe n’intore zigiye kurwibonera kuko zaramenyekanye.

Magingo aya nk’uko bivugwa na benshi itekinika ryose kagame yakoreshaga, doreko ari nk’umunyeshuri ukopera, ryaravumbuwe kuburyo na babaterankunga yajyaga akangisha ubu batangiye kumutera utwatsi kuburyo nareba nabi kaserumu bazagafunga.

Intambwe yizihiye

Mu Kinyarwanda iyo abantu bari mukugenda hamwe berekeza hamwe bavugako bajyana. None kandi natwe niko tumeze ninako tuvuga, twemeza rwose ko turimo tujya kwimika umuco mwiza iwacu, tugastimbura ikinyoma n’ubwikanyize bya Kagame. Niba rero imvugo ari iyo, n’ingiro nibe imwe, maze tugendane koko.

Abihuta cyane ndabumva rwose kuko nubundi hagomba kugira abiyemeza bagahaguruka naho ubundi ntawategereza umusaruro gusa atazindutse ngo ajye kubiba. Kandi nanone burya iyo abantu bari ku rugendo ni byizako abihuta aribo batanga intambwe kugirango urugendo rutazaba rurerure cyane hakagira abahera mu nzira. Ariko ni na byiza ko bagerageza kunyuzamo bagakebuka, bakareba abandi ndetse byanarimba bagatuza, bakicara, bakabarinda, naho ubundi ntitwakoresha rya jambo kujyana.

Mu Kinyarwanda banavugako “iyihuse yabyaye ibihumye”. Bityo rero ndashima ibakwe n’ijabo ry’abasore banyaruka, ariko ndanabibutsa ko kugenda usize abawe, ntacyo uba ujyanye. Mboneyeho gusaba rero, ntawe ntunze urutoki, abantu bose byabaye ngombwako baba batakigendana n’abandi, kuko bumva bagomba kwihuta, kunyemerera ntibajye kure y’abandi, batazaza bakayoberwa aho barengeye maze bahura n’umwanzi ku itabaro, bakazabura ubatera ingabo mu bitugu.

Mwibuke mu gitekerezo cya Rwabugiri na Rwanyonga; nubwo bahigaga Rwanyonga iyo adatabara, aba yarasanze umushi cyangwa umubisha Kabego, naringiye kuvugango umubisha Kagame, yarigusanga Kabego yivuganye Rwabugiri.

Mu rugendo ndetse no kurugamba, hari ubwo abihuta baza inyuma kugirango babashe no kuyamba abagenda biguru ntege.

Hano rwose ndagirango nsabe abo bose bihuta ko bagomba kwibukako aribo bafite uruhare runini mu rugendo turimo ndetse no mu rugamba turwana. Ndabasabye kandi ngo bareke kwiyemeza bonyine kuko byakwitwa kwiyemera igihe cyose byatera gutatana no kutavuga rumwe kuko byaba byishe igisobanuro cyo kujyana.

Kimwe n’abandi banyarwanda mu ngeri zose ntibabujijwe kugira amashyirahamwe bihariye kubera ibitekerezo bahuriyeho ariko nanone birinde rwose kwihugika ukwabo ahubwo nibaze begerane n’abandi cyane cyane abo bigeze kugenda by’umwihariko kuko basanzwe babazi intambuko maze ahubwo babe umusemburo utuma amashyirahamwe yose atutumbamo ingufu zo kwihutisha ibintu.

Abagenda buke nabo nk’uko bivugwa, ntibikange igitutu n’isibo by’abandi.Nziko wenda kuribo babyita gushishoza ariko nabibutsako mubaromani bavugaga ngo: “Ikintu wibajije watekereje washunguye neza haba hasigaye kugikora unyaruka”.

Gushishoza ni ingenzi mu bintu byose.Ushishoza agomba gufata igihe,agasoma amateka, akagisha inama, agasaba umuganda, ariko ni byiza kwibuka ko aba afite n’inshingano agomba kugeraho. Mumbabarire munyumve neza, ariko usanze umuntu yicaye aho atekereza, akahatinda ntacyo agambiriye, ngira ngo wamwibazaho! Nkaba rero numva, impaka ziza hagati y’abihuta n’abagenda buke, zaba zifite ishingiro.

Gusa nanjye ndibaza:nta nshingano abagawa kugenda buke bafite, mu guhumuriza abihuta, babinjiza muri ubwo bushishozi bwabo? Ariko nano ndibaza, uwo mujyana yihuse, ari wowe ufite ubushishozi,muri ubwo bushishozi bwawe,ntaburyo wamurinda impirita, ugakoresha izo mbaraga ze mu buryo buboneye?

Padiri Athanase MUTARAMBIRWA

Soma umwandiko wose : Inkono ihira ikibatsi ntihira ikibariro

Rwanda: Pahulo Kagame nacecekeshe n’abayobozi bahora bamuramya ngo « kuri Paul Kagame imvugo niyo ngiro ».

Uretse guha gasopo abayobozi be kutazongera gukoresha imvugo ngo barishimira ko amahanga akomeje kugira ibyo yigira ku Rwanda ; Pahulo Kagame yarakwiriye no kubategeka kutongera gukoresha imvugo ngo ˂˂ Kuri Paul Kagame imvugo niyo ngiro !˃˃, kuko azi neza ko ataribyo ahubwo ari ukubeshya abanyarwanda.

Ni muli congrѐs y’iminsi itatu y’umuryango FPR-INKOTANYI yari iteraniye ku cyicaro cy’umuryango i Rusororo mu Karere ka Gasabo, imbere y’abakada bagera ku bihumbi 2000 barimo abayobozi bakuru b’igihugu bose, abahagaraliye amwe mu mashyaka ya politiki y’ibihugu duturanye na bamwe mu bayobozi b’imitwe ya politiki mu gihugu cyacu yaherekeje Pahulo Kagame mu matora yo muli Kanama 2017; aho Pahulo Kagame yongeye gutorerwa CHAIRMAN w‘agatsiko kagizwe n’umuryango wa FPR-INKOTANYI mu gihe kiri imbere.

Muli iyo Kongre Pahulo Kagame akaba yararanzwe no gukemura abambari be abihanangiriza kutazongera gukoresha imvugo igira iti : ‘abanyamahanga bashishikajwe no kuza kwigira ku Rwanda imiyoborere n’iterambere byarwo’ nubwo bwose yigira nyoni nyinshi kandi ariwe wari warayibabibyemo none akaba abataye mu nama. Yakomeje yibaza nawe ubwe ati ese ubu dufite iki turatira abanyamahanga ku buryo baza kutwigiraho ? Ati hari byinshi byo gukemura bihari.

Muri kwa kwihagararaho no kwishongora asanganywe, Pahulo Kagame yavuze no ku basebya u Rwanda barimo abayobozi batahurwa bariye ibya rubanda bagatangira gusebanya bavuga ko mu Rwanda nta bwinyagambuliro buhari bakagera naho bamwe batangira kwikorera amakarto hanze iyo abandi nabo bikabaviramo gucumbikirwa muli za prisons hano. Yakomoje no kubyo avuga ko bituruka hanze bigamije guhungabanya umutekano w’igihugu ati ndabamenyesha ko ‘nda ndambara yandera ubwoba iturutse hanze’ ! akomeza ashimangira ko gutera u Rwanda uturutse hanze bidashoboka ati ntaho bamenera turamutse dushyize hamwe kandi tukubahana ati keretse iturutse mu gihugu imbere muli mwebwe byo ndemeza ko bishoboka ! nimwiyumvire namwe !

Pahulo Kagame akaba avuga ko aho bizaba ngombwa gufata ibyemezo bikomeye azabifata no guhangana n’ingaruka zabyo nkuko atabitinye na mbere hose !

Banyarwanda ngaho rero murarye muri menge ! Ko ihanurwa ry’indege ya Habyarimana yatumye horekwa imbaga y’abanyarwanda ibindi byemezo uyu mugabo aduteganiriza ni ibiki ? murabe maso nyabuneka ! aliko Imana irebera imbwa ntihumbya ! ntawe bitagaragalira ko uyu mugabo akomeje gusaza imigeri aho atabona neza ibihe yinjiyemo uko bimeze ntazi ko na nyina wundi abyara umuhungu! arakomeza gufungira abanyarwanda ubusa, kubica, kubaheza ishyanga n’ibindi ….. ngo kuri Paul Kagame na FPR imvugo niyo ngiro ! u Rwanda ngo ni ubudasa, akataraboneka kuko ngo bose bumva ibintu kimwe ! ko u Rwanda rutabagaho RPF itaraza! Banyarwanda nta gahora gahanze.

Byanditswe ku wa 17/12/2017, na :
A.BEN NTUYENABO, KIGALI-RWANDA.

Gakondo k’Iwacu

Iriburiro

Ikibazo cyashegeshe Igihugu cyacu n’Abagituye ni ukutamenya iwabo n’ababo. Uko umuco wa Kinyarwanda wagiye usobekerana n’indi mico, Abenegihugu bagiye bamira bunguri iby’imahanga bakirengagiza iby’iwabo, kumenya iwabo n’ababo ndetse no kumenyana ; ngo basangire basabane, byabaye ibango ryo gutatira igihango cya Gakondo ; biteye agahinda kamwe k’Umukubabibero !

Muri iyi nyandiko twise »Gakondo k’Iwacu tuzajya twibanda cyane ku Ndangagaciro z’Inkomoko ya buri bwoko zigenda zikendera ; zigateshwa agaciro cyangwa zigasimbuzwa nkana iz’ahandi aka ka gahararo gaca imbata

Tugiye kwibanda cyane cyane kuli Gakondo y’ahantu dutuye n’uko hahoze ari ibihugu byigenga. Muhawe rero ikaze ngo mutange ibitekerezo by’uko twasigasira Indagagaciro z’umuco wacu n’uko twakwagura amarembo tukakira n’iby’ahandi ariko byiza, atari ibibonetse byose.

Indangamuntu yacu nyayo ihera ku isoko, hariya kure cyane « Ibuvamuntu », ni ko kumenya neza uwo uri we, iyo uva ari byo biguha iyo ujya n’abo ubana nabo n’ibyo utunze ku mutima bifite isoko yabyo mu nkomoko y’Inyabutatu yateshejwe Ubusugi itaratera kabiri, umukokwe ibyaye ukaza kwokama abumva ko bakora Politike ; batabanje gucengera iremo ryayo, ngo bayitamire, bayishyire mu ijigo bayumve amajya n’amaza, ahubwo bagashimikira bashaka ishema ryabo bwite aho gushaka iry’Abanyarwanda muri rusange, ngo u Rwanda rube ruzima.

Abazima n’abazimu basabane mu Muterekero w’Indengakamere.

None wowe uzi gusoma niyo waba utabizi usomeshe ; Sesengura, maze imyumvire mizima igiye kugutaha ku mutima nawe uyituze mu mitima y’abo muturanye n’abo mu mpugu zindi kugira ngo ibe Gisaga ; isage u Rwanda rwose, ruzuke, ruzure umugara rufite Umugambi wo KUNGANA kw’Abanyarwanda, mu Rwanda ruzima rutamba IBITAMBAMBUGA, Ibikwerere n’Abakambwe bakdandagira ; u Rwanda rwimika MUNTUNKUNDI ndetse rugashyiraho n’akarusho ka MUNTUNDUNDI.

Gakondo

Iyo wumvise ijambo Gakondo, uhita utekereza Gukonda, igikoresho kikaba Inkonzo kuko umuntu yumva ko nyirumurimo ari mu ishyamba ry’inzitane. Nyirugukonda akaba Umukonde naho aho akonze hakaba Gakondo, bivuga ko aho hantu ari ahe ; akazaharaga abamukomokaho uko iminsi igenda iha indi.

Abakonde rero ni Abahinzi akaba ari nayo mpamvu bimitse Isuka yaje kwimura Inkonzo, Ubucuzi bumaze kuvumburwa n’Abahinzi.

Buri muntu yaba afite Gakondo ke kuko ari umuntu akagakomora ku Bukonde bw’abo akomokaho aribo Bakurambere be.

Reka tube duhujwe n’uru rurimi, ndaba ndetse kuruvuga izina kuko muri icyo gihe izina ryarwo rishobora kuba atari iryo rufite ubu.

Gakondo rero yagiye yaguka ndetse n’Abakonde bagenda biyongera. Uko bagenda bororoka baje guhuza Izina ni uko baritwa. Rigashobora gukomoka ku Mukurambere wabo cyangwa ku yindi sano bumva ko bahuje.

Uko bagenda bagura Ubwatsi bwabo baza kubugira Igihugu, barema Imihango ibaha Umwami uvuka mu Bwoko bwabo.

Muri iyo nzira rero yo gushaka kumenya abo turi bo, iyo tuva ari byo bizaduha kumenya iyo tujya, ndashingira ku gitabo cya Padiri Muzungu Bernardin cyitwa : »Histoire du Rwanda pré-colonial », ugenekereje mu kinyarwanda ukaba wavuga » Amateka y’u Rwanda mbere y’umwaduko w’abazungu ». Muri icyo gitabo cyasohotse mu mwaka wi 2003 (édition L’Harmattan), umwanditsi agaragaza imiterere yarangaga Ibihugu by’icyo gihe n’ibisanira abantu bafitanye ashingiye cyane cyane ku moko, akivugwa na n’ubu.

Amoko

Abenengwe, Abasinga, Ababanda, Abongera,Abungura,Abazigaba, Abagesera, Abagara.

Uretse rero Padiri Muzungu Bernardin reka turebe ko hari n’abandi bashakashatsi banyuze inzira nk’iya Padiri Muzungu ariko ku buryo bwabo.

Padiri Kagame Alexis mu gitabo cye yise »Les organisations socio-familiales de l’ancien Rwanda » cyasohokeye i Bruxelles muri 1954) dusangamo amoko 15 ari yo aya:

Abega, Abasindi, Abakono, Abaha, Abagesera, Abazigaba, Abasinga, Abashambo, Abahondogo, Abacyaba, Ababanda, Abenengwe, Abongera, Abungura, Abasita.

Umwanditsi witwa d’Hertefelt we mu gitabo cye cyitwa : »Les clans du Rwanda ancien.Eléments d’ethnosociologie et d’ethnohistoire, Musée de Tervuren, 1971. » aragenda akagera ku moko cumi n’umunani ari yo : Ababanda, Abacyaba, Abega, Abenengwe, Abagesera, Abaha, Abakono, Abanyakarama, Abanyiginya, Abongera, Abashambo, Abashingo, Abasindi, Abasinga, Abasita, Abatsobe, Abungura, Abungura.

Reka rero turebe Amoko y’Abasangwabutaka ari nabo Bakonde aba banditsi uko ari batatu bahurizaho.

Amoko arindwi bahurizaho ni aya :

Abenengwe, Abasinga, Ababanda, Abongera, Abazigaba, Abagesera, Abacyaba.

Ndabona rero Amoko arindwi ariko Abagara Muzungu yita ubwoko nkaba numva ari inyito bakomora kuri Gakondo kabo ari yo Bugara, bakaba rero ari Abacyaba b’Abagara.

Mbaye mpagarariye kuri aya moko arindwi kugira ngo ndebe niba aza kugusha ku Bihugu Gakondo byayo.

Evariste Nsabimana

Musome inyandiko yose hano (impapuro 10) : Gakondo ndende

Rwanda: Leta ya FPR irishimira gukomeza kugira umubare munini w’imfungwa mu magereza.

Byatangajwe na CGP RWIGAMBA Georges mu kiganiro n’abanyamakuru kuri uyu wa 06/12/2017 aho uyu muyobozi mukuru w’urwego rw’igihugu rushinzwe imfungwa n’abagororwa (RCS) yatangaje ko kubufatanye na police y’igihugu byatumye abantu bajyanywa mu magereza biyongera cyane ugereranije n’abafungurwa; akaba yemeza ko mu gihe benshi bahamwe n’ibyaha bya Jenoside batabarika wasangaga aribo benshi muli ayo magerereza mu gihe gishize; ati ubu ni imvange ku buryo usanga umubare munini wabayajyanywamo uruta kure uwabayasohokamo, akomeza yemeza ko ibyo babikesha ahanini imikorere myiza ya police y’u Rwanda ifite ububasha bwo kugenzura ibyaha bito n’ibinini aho ariho hose mu gihugu ati dore ko umuntu yiba ihene bakamuzana, yakubita undi bakamuzana, yakwiba igitoki bakamuzana abo bose tukaba tubakira. Nguko !

Banyarwanda, ntawashidikanya ko iri hohotera riterwa n’inyungu cyangwa iturufu bya Leta y’agatsiko idashaka gukemurana ubushake ibyo bibazo by’ubucucike muri ayo magereza anafungiyemo uretse abakoze ibyaha bya Jenoside n’ibiciriritse ahubwo harimo nkuko mubizi n’abanyepolitiki batabarika bakomeje kwibasirwa na Leta ya FPR bazira akarengane ko kutavugarumwe nayo dont Mme Victoire Ingabire UMUHOZA, Diane RWIGARA etc…

Brig Ben George Rwigamba, Komiseri Mukuru wa RCS

CGP Georges RWIGAMBA akomeza avuga ko umubare w’abantu bafungiye mu magereza yo mu Rwanda kugeza muli uyu mwaka wa 2017 ungana n’ibihumbi 64.757 bose hamwe , harimo 28.806 bafungiye ibyaha bya Jenoside, abasigaye ibihumbi 35.951 bakaba bafungiye ibindi byaha.

RWIGAMBA ati iyo hinjira benshi hagasohoka bake ni ibiba bigaragaza ko inzego z’umutekano zikora neza, banyarwanda muriyumvira ! byabaye se guhonyora agateka ka muntu w’umunyarwanda nkana witwaje ngo ni ukubungabunga umutekano n’ubusugire bw’igihugu !

Nsanga nta mpamvu yo gukomeza kurunda abanyarwanda mu magereza nubwo bwose hatabura ibyaha bitandukanye bikorwa n’abishakira amaramuko yaba abanywa cyangwa bacuruza ibiyobyabwenge, abakora inyandiko-mpimbano, abanyereza cyangwa abacunga nabi ibya rubanda; ahubwo hakaba hashakwa ubundi buryo bw’amategeko ajyanye no kujya bumvikanisha abantu bikarangira cyangwa bakajya bahabwa ibindi bihano bitari igifungo ku byaha byose bitoya mbere yo kujyanywa mu magereza hisunzwe inyungu za Leta y’agatsiko.

Byanditswe ku wa 08/12/2017, na :
A.BEN NTUYENABO, KIGALI-RWANDA

Me Evode Uwizeyimana yagaragaje ikinyabupfura gike imbere y’inteko nshinga-mategeko y’u Rwanda

Evode Uwizeyimana.
« Itabi ry’i Bugoyi ni kaburabuza »

Ni muri urwo rwego kuri iki gicamunsi cyo kuwa 28/11/2017 ubwo yasobanuriraga inteko umushinga w’itegeko rishya rizagenderwaho mu guhana abakora ibyaha byo gusebanya aho uyu munyamategeko yise abanyamakuru imihirimbiri ngo akurikije inyandiko bakunze gusohora mu binyamakuru zisebanya aliko banyirugusebwa bagahitamo kutirirwa babakulikirana mu nkiko kubera ko baba babona ari ba rubebe nta ndishyi babakuraho bityo bakicecekera byongeye kandi nibinyamakuru bakorera ngo ugasanga nta mikoro bigira. Me Evode akaba ariho ahera abagereranya n’imihirimbiri.Nguko.

Banyarwanda , ntibyumvikana ukuntu inteko nshinga-mategeko y’u Rwanda nayo itari miseke igoroye ku bijyanye n’ikinyabupfura idashobora gufatira uyu munyamategeko ibihano ku mvugo nyandagazi nkizo akunze gukoresha imbere yayo?

Ijambo ‘Imihirimbiri ni iki ? ni umuntu utagira shinge na rugero, inkweto zashiriyeho, imyenda yacikaguritse yahindutse umwanda, imisatsi yamwereyeho, amavunja sinakubwira ! wibera mu mikoki nk’imbwa n’amahuku. Izo mvugo nyandagazi zikaba zidakwiriye umukozi wo ku rwego nka Evode ! nsanga ari uwo kwoherezwa mu itorero rya Bamporiki nkuko Leta y’agatsiko isanzwe ibikorera abandi uretse ko nayo ntacyo yari yabikoraho kugeza ubu, ntibibaye rimwe si kabili, muribuka ubwo uyu munyamategeko hari ubwo yigeze kuvuga ko iyi ngoma ari agatsiko k’amabandi ya FPR kafashe igihugu ku ngufu bukeye imugira umwambari wayo, byongeye ati Mgr Nzakamwita ntiyamenya igitera amakimbirane yo mu miryango kuko atagira urugo none nabwo akaba yise abanyamakuru Imihirimbiri. Yewe ni akumiro !

Banyarwanda banyamakuru nsanga iryo tegeko ryo gusebanya arimo kudoda ryagombye kumuheraho kuko nta gusebanya kutari uko kandi muhaguruke muharanire uburenganzira bwanyu nta mpamvu yo kutisanzura mu gihugu cyanyu.

Byanditswe ku wa 29/11/2017, na :
A.BEN NTUYENABO, KIGALI-RWANDA.

Rwanda: Ministri w’ingabo Kabarebe na Ngarambe bakanguriye urubyiruko rushamikiye kuri FPR-inkotanyi guhora rwiteguye urugamba.

Mu gihe harimo kurangwa umwuka mubi hagati y’u Rwanda n’igihugu cy’igituranyi cya Ouganda; ni kuri iki cyumweru ku wa 26/11/2017 ku kicaro cy’umuryango FPR-INKOTANYI i Rusororo ho mu Karere ka Gasabo ubwo uyu mujenerali yagezaga ijambo ku nama rusange y’urugaga rw’urubyiruko rusaga 1500 rwaturutse impande zose z’igihugu, rushamikiye k’umuryango wa FPR-INKOTANYI yarukanguriye kudacibwa intege n’abakomeje guharabika u Rwanda bakoresheje ingengabitekerezo ya Jenoside no gukomeza guhangana nabo aho bari hose ku isi.

Yasabye urubyiruko kurangwa n’ibitekerezo bidahinduka nkuko bakuru babo bo mu muryango babigenje ku rugamba rwo kubohoza igihugu kuva ku munsi wa mbere kugeza bagifashe kandi uwo bari bahanganye yari ashyigikiwe n’amahanga ndetse harimo n’ibihugu by’ibihangange.

Général Kabarebe yakomeje abwira urubyiruko ko imbogamizi ikomeye afitiye impungenge ari uko imiyoborere ya Pawulo Kagame itazafatwaho nk’umurage igihe azaba yararetse inshingano ze ageze mu za bukuru noneho akazicuza yifuza gusubira mu bihe byose byashize kugirango yongere kuyobora u Rwanda abona ko abo yarusigiye byabananiye !

Banyarwanda nimwiyumvire namwe ! ntawe ugishidikanya ubwikubire bwa leta y’agatsiko ka FPR aho igihugu cyacu gikomeje kuba akarima k’umuntu umwe bahora baramya, yica agakiza ntamenye ko kamara ari Imana yo mu ijuru yonyine!

Tubamenyeshe ko iyi nama yari yitabiriwe na bamwe mu bayobozi bakuru b’igihugu harimo abayobozi b’ingabo na Police n’abacurabwenge ba FPR-INKOTANYI notamment Tite Rutaremara, Wellars Gasamagera n’abandi bakomeje kwibanda gusa mu gukangulira urubyiruko kutazatererana igihugu mu bihe by’amahina.

Umunyamabanga mukuru wa FPR Bwana NGARAMBE Fransisko ari nawe wafunguye iyo nama dore ko Pahulo Kagame we atahageze ngo kubera izindi mpamvu (arimo kwirukanka amahanga ! ) uyu rero mu ijambo rye yasabye urubyiruko kutirara, kwirinda umurengwe no kuba inyangamugayo, ati mugomba gutera ikirenge mucy’urubyiruko rw’ababanjirije aho rwagize uruhare runini mu ntambara yo kubohoza igihugu ubwo abana bamwe bataga amashuri bakitabira urwo rugamba kugeza naho bamwe muribo bahasiga ubuzima, yakomeje abibutsa kutajya bibagirwa bakuru babo aho birirwa hose mu gihugu barinze umutakano aho kwishora mu bikorwa bigayitse by’ubusinzi, uburaya n’ibindi… nko kumenagura ibirahuri by’amashuri, kumena umuceri ngo urimo amabuye, mukikora mukajya mu mihanda kwigaragambya kuko mutabonye ibibagenewe kandi muziko bishakwa bikanakorerwa. Ati turifuza ko ibyaranze inkotanyi byahora bibaranga kuko nimwe dufite nka Diamant, iyo idatunganijwe ni nk’ikibuye aliko iyo ifashwe neza ikugeza ku gaciro gakomeye urubyiruko namwe rero ni uko imbaraga mufite zigomba kubungabungwa kugirango zitajya mu bandi. Nguko !

Banyarwanda, aya mangambure y’amadiscours y’aba bayobozi nsanga ari nko guta inyuma ya Huye kuko umurengwe ari uwabo gusa bagombye kubanza kwiheraho bakabona ububisaba urubyiruko ! nawe se kubona bamwe muri bo barabaye intumva, intabona, indahumurirwa kugera naho bahinduka nk’abapfu bahagaze ! none ngo urubyiruko nirugabanye umurengwe……rwo rutagira akazi ahubwo rwirirwa ruhigwa bukware ngo rujyanwe IWAWA no mu bindi bigo by’inzererezi ! abana b’abakobwa bari mu guterwa amada na bamwe muli abo bagabo bataye ingo impinja zikajugunywa muli za toilettes ! urwo se rwaba arirwo rubyiruko dutegerejeho u Rwanda rw’ejo ?

Banyarwanda rero mbona nta kuntu urubyiruko rwacu rushobora kuzavamo u Rwanda rw’ejo hazaza mu gihe rukiyobowe n’aka gatsiko ka FPR kayoboye igihugu cyacu nkuko bavuga ko ‘Umwera uturutse ibukuru bucya wakwiriye hose’.

Byanditswe ku 27/11/2017, na :
A.BEN NTUYENABO, KIGALI-RWANDA.

Rwanda : ingendo za Pahulo Kagame mu mahanga zikomeje kumunga umutungo w’Abanyarwanda

Nibyo koko rero mu gihe uyu muyobozi yaherukaga kwikoma mugenzi we Prezida Petero Nkurunziza amwagiriza ko yananiwe kuyobora igihugu aho ngo yirirwa yihishe ahantu hatazwi nyuma y’umugambi mubisha wari wamupangiwe n’uyu awurimo ukaza gupfuba hari mu mwaka wa 2015 ; Pawulo Kagame kuri we siko bimeze aho kwikingiranira mu gihugu cye muli ibi bihe agezemo bitamworoheye yahisemo kwiturira mu kirere nk’inyoni aho atakimara umwanya munini mu gihugu, niba atari ubwoba! agahora abungera mu mahanga yewe naho atatumiwe nguwo mu bihugu by’abarabu, amerika wagirango afiteyo business, ubwongereza bityo agahindukira agaruka muli afrika ngaho ngo arashakira umubano u Rwanda! umuntu akaba yakwibaza impamvu uyu mugabo akomeje kunyunyuza imitsi y’abanyarwanda barebera ! ngiyo Benzine itwara indege agendamo, ikiguzi cy’amahoteli ahenze yakira uyu mugabo n’ibindi ….biteye agahinda pe !

Nkuko bigaragarira amaso rero impamvu ikaba ari ukubera impungenge z’ibihe arimo aho asigaye abona ko kwicarana akanya na bamwe mu bayobozi be hano mu gihugu atabishira amakenga ko byazamuviramo ibyo imbwa yaboneye ku mugezi ! Ntawuruhunga ni umwana w’umunyarwanda byongeye kandi bavuze ko ‘ imburagihana yabuze gihambwa.’

Bwana Kagame siwe asigaye abona ahari bukeye kubera kwikanga baringa, kuri we kwirirwa azerera amahanga bishobora kuba bimuha agahenge nkaho yakwibwiye ati nzapfa nzakira simbizi wenda nzagwe ahandi, nguko !

Banyarwanda, kubera ingaruka z’ikibi zuzuye umutima unangiye by’uyu mugabo Kagame ageze aho agaragaza ibimenyetso yikanga baringa ntamenye yuko ariwe wahindutse yo ! mbega ibyago !

Bwana Kagame ntabona ko ibikombe arimo kujugunyirwa na ba Rutuku bamushimagiza ngo ni indashyikirwa mu cyerekezo cy’iterambere ari ukumuhema! ahubwo agakomeza gupfusha ubusa utuvuye mu mitsi y’abaturage yibereye mu ngendo zidafite icyo zibamariye. Bityo nawe nkaba nsanga yarakwiye gushakirwa kimwe muli bya bigo yishyiriyeho byakirirwamo inzererezi cyangwa ababyeyi bataye ingo.

Ese izo nshuti n’iterambere ajya kudushakira mu mahanga ya kure iyo bigwa zaba ziturutira umuturanyi nka RDC, OUGANDA, BURUNDI, TANZANIE ? bashobora kudutabara byihuse turamutse dutewe uretse ko nabo batakiducira akari urutega !

Byanditswe kuwa 08/11/2017, na :
A.BEN NTUYENABO, KIGALI-RWANDA.

Rwanda: FPR irimo gutegura imyigaragambyo yo kwamagana Abafransa

Ibinyujije ku muvugizi wa Forum y’amashyaka mu Rwanda akaba anakuriye ishyaka rivuga ko riharanira ubumwe bw’abanyarwanda na Demokrasi (UDPR) Bwana Nizeyimana Pie afatanije na Hon. Rucibigango Jean Baptiste ukuriye ishyaka rirengera abakozi (PSR) ; Ni kuri uyu wa 06/11/2017 batangarije itangazamakuru ko nk’imitwe ya poliriki yemewe mu Rwanda batewe impungenge n’ukuntu ubufransa burimo kwitwara ku Rwanda , bityo bakaba bahamagalira imitwe ya politiki bari muli Forum imwe gufatanyiriza hamwe bagakoresha imyigaragambyo mu mahoro yo kwamagana icyo bise ubukoloni bushya bw’abafransa ku Rwanda bugamije kwongera gutangiza iperereza ry’uwahanuye indege ya Habyarimana mu rwego rwo kwegekaho u Rwanda n’abayobozi bakuru barwo icyo gikorwa cy’iterabwoba.

Aba bamotsi b’agatsiko bakomeza bavuga ko uretse imitwe ya politiki abanyarwanda bose basabwa guhagurukira rimwe bakamagana ubufransa nkuko byakozwe ubushize kuli Major Rose Kabuye mu Budage n’abandi…..bati uyu munsi nitwe twabimburiye indi mitwe ya politiki kugirango igire icyo ibivugaho.

Bwana Nizeyimana akomeza avuga ko batangajwe no kumva ko habura amezi atatu gusa ngo dossier y’iperereza ry’uwahanuye indege ifungwe burundu hakurikijwe rapport y’impuguke yizewe yari yakozwe na MARK Trévidic aribwo hahise havumbuka undi mutangabuhamya witwa James Munyandinda wasubije ibintu irudubi akaba yari umusilikare mu ngabo za APR, ubwo yoherezwaga mu mahugurwa mu gihugu cy’ubwongereza ntiyagarutse ati hakaba hibazwa ukuntu umuntu nkuwo ahabwa agaciro n’ubutabera bw’ubufransa mu gutanga ubuhamya kandi ari umunyabyaha!

Banyarwanda, tubibutse ko uyu mutangabuhamya mushya James Munyandinda yari aherutse gutangariza ubutabera bw’ubufransa ko kuva 1992-2008 mbere yuko yoherezwa mu mahugurwa yakoranaga bya hafi na Général KABAREBE James Ministri w’ingabo muli iki gihe, akavuga kandi ko yari umwe mu basirikare bari bagize itsinda ryarindaga missiles SAM-16 zari ku birindiro by’ingabo za APR ku Mulindi wa Byumba arizo zakoreshejwe mu guhanura indege ya Prezida Habyarimana ku ya 6 mata 1994.

Nizeyimana yakomeje atangaza ko buri gihe iyo u Rwanda rushatse gutunga urutoki ku ruhare rw’ubufransa muli Jenoside yakorewe abatutsi buhita butanguranwa mu gukoresha iturufu y’ihanurwa ry’indege mu rwego rwo kwirengera no gupfobya abanyarwanda. Ati ntibyumvikana ukuntu ubutabera bw’ubufransa bwoherereza convocation Ministri wacu James Kabarebe ngo azajyeyo kwisobanura ibyo ni agasuzuguro gakabije ! ati iyi nkubiri y’indege yubuye mu gihe u Rwanda rurimo kunoza indi liste y’abanyepolitiki b’abafransa biyongera ku rutonde rw’abasilikare 22 nayo ikazashyirwa ku ka rubanda mu minsi iri imbere.

Naho Depite Rucibigango Jean Baptiste wa PSR mu magambo y’ibitutsi intumwa za rubanda y’agatsiko zikunze gukoresha avuga ko uriya mutangabuhamya ari igisambo cyatorotse u Rwanda kimaze gusoza amahugurwa cyoherejwemo nticyagaruka ahubwo kikagirwa igikoresho cy’abafransa kugirango Jenerali KABAREBE azitabe ubutabera bw’ubufransa ati ibyo akaba ari ugushaka gutesha umutwe no gusebya u Rwanda n’abayobozi bakuru mu gihe umwaka utaha Prezida Kagame ariwe uzaba ayoboye umuryango wa Afrika yunze ubumwe. Nguko!

Banyarwanda, muriyumvira ! ngaho abanyarwanda bamenyereye gukurikira buhumyi izi nkoramaraso za FPR muzajye inyuma ya ba Nizeyimana na Rucibigango n’abandi bitezwe muri icyo gikorwa cy’imyigaragambyo ! ngabo bamwe mu banyepolitiki b’agatsiko bitwa ko barangaje imbere abaturage ! batazi iyo biva niyo bigana ! bataramenya imvo n’imvano ya Jenoside yabakorewe,…..bataramenya ko igihe icyo aricyo cyose abafransa bazamenya ukuri nyako uko benewabo bapfuye ndetse nuwabishe, nkaba mbona rero gukoresha imyigaragambyo naho igihugu cyose cyajya mu muhanda ntacyo bimaze ni uguta igihe kuko iby’iriya ndege bizasobanuka tôt ou tard kubera ihohotera ry’ikiremwa-muntu cyayiguyemo !

Nizeyimana nawe Rucibigango rero nabagira inama yo kuba musubije amerwe mu isaho, amangambure mukayarekera abarimo kubaroha ahubwo mwegere inararibonye z’ukuri zibanze zibacire ku mayange !

Byanditswe kuwa 08/11/2017, na :
A.BEN NTUYENABO, KIGALI-RWANDA.

Rwanda : ministri Louise Mushikiwabo yariye iminwa

Banyarwanda, kuki Leta y’agatsiko ka FPR niba ifite ibimenyetso bifatika itajyana ubufransa mu nkiko aho guhora ibwejagura ngo nibwemere uruhare rwabwo muli Jenoside ?

Ngarutse ku kiganiro aherutse kugirana n’icyitwa ‘Internationales ’; Ministri w’ububanyi n’amahanga w’u Rwanda Mme Louise Mushikiwabo yariye iminwa aka ya ndirimbo ngo igifransa kirakamye !, akaba akomeje guhesha isura mbi igihugu cyacu akoreshejwe ibinyoma aho yumvikanishaga ibisobanuro non-values mubyo yabazwaga naba Internationales.

Uretse amagambo ye y’ubwibone no kwishongora nkuko abisanganywe atangaza ko ubufransa buyobowe na Emmanuel MACRON avuga ko atazi neza amateka yabaye mu Rwanda atanagizemo uruhare mu gihe cya Jenoside yo muli Mata 1994 akwiye kwemera kwikorera umutwaro w’iyo Jenoside kubera uruhare igihugu cye cyayigizemo.

Uyu mu ministri wacanganyikiwe kubera ibibazo by’uruhuri u Rwanda rufite muli iki gihe akomeza avuga ko kuva Prezida MACRON yatangira kuyobora ubufransa nta kimenyetso aragaragaza ko igihugu cye gishobora kuzemera uruhare cyagize muli Jenoside yabaye mu Rwanda 1994 nkuko SARKOZY yasimbuye yari yagerageje kwemera uburangare n’ubuhumyi bya Leta y’ubufransa muli icyo gihe akanabisabira imbabazi nubwo uyu Mushikiwabo avuga ko zidahagije.

Ministri Mushikiwabo akomeza yemeza ko abona inzira y’umubano w’ubufransa n’u Rwanda ikiri ndende ati nubwo muli gouvernement ya Macron cyangwa mu nkoramutima ze ntawurimo wagize uruhare muli Jenoside aliko ntibivanaho kuba afite mu buyobozi bwe umugaba mukuru François LECOINTRE wari umwe mu bakingiye ikibaba interahamwe mu gutuma zihungira mu cyahoze ari Zaïre (voir Opération Turquoise).

Banyarwanda, muriyumvira namwe ! tuzakomeza muri ibi kugeza ryari koko ? ko ibyabaye byabaye…. kwemera kw’abafransa k’uruhare rwabo muli Jenoside y’abanyarwanda bizatumalira iki nubwo bwose bigaragara ko budashobora kubyemera ? ndabona ahubwo ari Mushikiwabo na Leta avugira bakomeza kuturangaza ngo tudakomeza gutera ijisho ku ma rapports ashinja iyi Leta iyicarubozo ku banyarwanda batavugarumwe nayo n’abandi bose baharanira démocratie y’igihugu cyacu banyuruzwa umunsi n’ijoro, kwigabiza iby’abandi, kugira abenegihugu impunzi, kurundira abantu muli za Gereza reba abayobozi b’amashyaka dont celle du FDU-INKINGI Mme Victoire Ingabire Umuhoza n’abarwanashyaka be batari bake, Déo Mushayidi wa PDP IMANZI n’abandi banyepolitiki bazira ibitekerezo byabo.

MUSHIKIWABO rero va ku giti dore ku muntu, ureke gukomeza guhishira intandaro y’ibyago byose iki gihugu cyacu cyaroshywemo na Leta y’agatsiko uvugira igihe ya ndege yahanurwaga. Kuvuga indimi ebyiri byawe rero ntibivanaho kuzana démocratie ibereye abanyarwanda bose.

Byanditswe kuwa 01/11/2017, na :
A.BEN NTUYENABO, KIGALI-RWANDA.

Amakuru ki ?

Amakuru