Archives annuelles : 2017

Rwanda : Aho kureka guhonyora abantu, prezida Kagame yikomye bikomeye umuryango mpuzamahanga HRW n’umuyobozi wayo.

Abijuse babonana bwije koko ! kuri 27/10/2017 hashojwe inama y’ihuriro ‘Unity Club ry’abahoze muli gouvernement n’abayirimo ubu’, ikaba yari yatangijwe na First lady Jeannette Kagame Nyiramongi akaba n’umuyobozi wayo . Ni nyuma y’iminsi ibiri ubwo umushyitsi mukuru Pahulo Kagame nawe yari yitabiriye uyu muhango w’isoza mu isangira no kwizihiza isabukuru y’imyaka 21 uyu muryango umaze ushinzwe.

Mu ijambo rye Prezida Kagame yikomye bikomeye umuryango HRW n’umuyobozi wawo Bwana Kenneth Roth avuga ko bakabije gusebya u Rwanda.

Prezida Kagame warangwaga n’umujinya mwinshi nkaho rapport ya HRW yamwangije mu bwonko ku buryo atabitekerezaga yaboneyeho kwiyama Bwana Kenneth Roth mu guhora amusebya, asebya u Rwanda; amumenyesha agira ati ‘ndi mu mwanya mwiza wo guharanira uburenganzira bwa muntu kurusha uko wowe ubikora ati twashyize ubuzima bwacu mu kaga tubikorera abanyarwanda mu gihe ingabo zanyu (MINUAR) zacyurwaga abantu bicwa ! ati ese uburenganzira bwa muntu uvuga ni ubuhe ?

Kagame akomeza avuga ko ababaye abayobozi b’ibyamamare ku isi nk’intangarugero barimo ba Mandela, Gandhi n’abandi… baharaniye uburenganzira bwabo ku buryo butandukanye n’ubwacu kuko twe twararwanye kugeza ubwo dushobora no kuba twaraswa biruta guharanira uburenganzira bwawe wicaye muli gereza ! ati imyaka itanu yose narwanye muli Ouganda n’ine n’igice mu Rwanda umunsi ku wundi ntazi ko ndi buramuke nari kuba nanjye nicaye muli gereza hano nizeye kuzayivanwamo bishingiye ku mpuhwe z’abantu…….HRW n’abandi…. bahora bakoresha amagambo gusa ku munwa bansebya !!! muriyumvira ubwishongozi bw’uyu mugabo ! (umugabo mbwa aseka imbohe). Prezida Kagame yongeyeho ko ntawamukora mu jisho ngo ntanuwamutinyuka kuko noneho ubu afite igihugu, urugo. Ati ubu mfite u Rwanda narwaniye, mfite uburenganzira bwo gutunga agatoki uwariwe wese kuko narezwe mu buryo politic, ibitekerezo n’ibindi….

Kagame yanenze abanyaburayi bamuhatira demokrasi bakorera mu bihugu byabo ati aliko nuko bibagirwa kumbwira ikintu kimwe cy’ingenzi kuyo abanyarwanda bashaka, mu yandi magambo ntibatekereza ku banyarwanda, ku baturage, ahubwo batekereza ku bayobozi kugirango babone uko baturyanisha, yakomeje avuga ko akenshi abanyarwanda n’banyafrika muli rusange babura ubwisanzure kubera kwigira abacakara ba ba mpatsibihugu bityo imitekerereze ya gikoloni igakomeza kuyobora imibereho yacu mu ndorerwamo yuko bashaka uko tubaho. Nguko !

Banyarwanda , aha Prezida Kagame arirengagiza nkana urugendo rw’ubucakara yahereyeho kugirango azashobore guhunguka n’agatsiko ke aho yabanje gukora ubucakara mu nyeshyamba za Museveni NRA mu kumurwanirira aho yari yiyemeje gupfa cg akarokoka agamije kuzataha umunsi umwe mu Rwanda amwifashishije! ubucakara se buruta ubwo ni ubuhe ? ari Museveni wabanje kumukoresha ubucakara nkubwo aho yashoboraga kuzima burundu ari n’umunyaburayi wifuza kumutamika ntacyo abanje kumwaka urusha undi impuhwe ni nde ? ndasanga Pahulo Kagame atarakwiye gukomeza kubeshya abanyarwanda nkaho ariwe mukiza wabo ko ahubwo ibyo yakoraga byose byari mu nyungu ze n’agatsiko ke gusa, none abonye ko bamaze gutahura ibinyoma bye no kunyunyuza bene ngofero ati narwanaga ari mwe nkorera yewe baba weee…. ahora muli rutemikirere agana muli amerika cyangwa i Burayi se atagiye gupfukamira abo bampatsibihugu ngo arebe ko hari icyo bamujugunyira ! ibyo se byo bitaniye hehe n’ubucakara ? niyiririre…..

Byanditswe ku wa 29/10/2017, na :
A.BEN NTUYENABO, KIGALI-RWANDA.

Rwanda : Leta y’agatsiko ka FPR-inkotanyi irimo gusaza imigeri

foto kigalitoday.com

Hari uwavuze ngo « l’Afrique c’est très simple, je vais vous expliquer : c’est noir et ça grouille » (Général de Gaule 1890-1970) abanyarwanda umenya uwabaroze atarakarabye !

Mu gihe abashingamategeko b’u Rwanda basigaye birirwa batukana ku mugaragaro nk’abashumba;

Mu bucamanza naho bene Rwigara bakaba barateje impagarara mu baturage kubera urubanza baburana n’ingona mu kuba bagerekwaho ibyaha bihimbano kandi intandaro ari ihotorwa ry’umubyeyi wabo assinapol Rwigara, rukaba rwarabuze gicibwa nkurwayoberanye ;

Marie Ingabire Immaculée wa Transparency Internatinal nawe ati abaturage basigaye baraciye amazi ubucamanza bw’u Rwanda aho umuntu asigaye ahagarara imbere y’ubucamanza akabubwiza inani na rimwe ntacyo yikanga habe no kugira icyo akorwaho kandi twari tuzi ko abacamanza ari ndahangarwa Bwana Rugege Sam chairman wa supreme court abirebera ;

Abagabo bamwe nabo bakaba batakigira ijambo kubera gushumurizwa abagore babo na Leta y’agatsiko ngo ni uburinganire aho usanga uretse guhimbira ku bagabo babo gusa ntacyo bamariye na bagenzi babo banyuruzwa cyangwa bari mu bihome bahohoterwa na Leta y’agatsiko ku mugaragaro ! ngo umugabo ni umwe ni Pahulo Kagame ! mbega akaga !

Abandi banyarwanda nabo bakaba barigiswa cyangwa bakicwa umusubirizo bwana Busingye, ministry w’ubutabera n’igipolisi bakanuye amaso gusa kuko baba babigizemo uruhare wabaza ngo iperereza riracyakorwa, mu gihe ushinzwe kuvugurura amategeko Me Uwizeyimana Evode we amagambo yamaze kumushira imutwe ngo aratechnika amategeko atazigera yubahirizwa ;

Ministri Mushikiwabo na Dr. Bizimana wa CNLG nabo bati ko twari tuzi ko ibirego abafransa baturega kw’ihanurwa ry’indege ya Habyarimana byarangiye bigarutse bite ? bati turambiwe ibirego bitarangira bigamije gushaka kwegekaho u Rwanda icyaha n’abayobozi barwo cyo guhanura indege ya Habyarimana na Ntaryamira kugirango bivaneho Jenoside kandi tuzi ko yateguwe na mbere yuko iyo ndege ihanurwa ! none Jenerali wacu Kabarebe ngo niyitabe ubutabera bw’ubufransa abazwe imbonankubone hamwe n’abafatanyacyaha ! ibyo ntibishoboka kuko byaba bigamije guhirika ubutegetsi bw’u Rwanda;

Ngizo imanza z’abarwanashyaka ba FDU-INKINGI ishyaka rya Victoire Ingabire Umuhoza ritavugarumwe na Leta y’agatsiko bafungiye hirya no hino mu Rwanda ku buryo bw’iyicarubozo bakomeje kujujubwa bazira ubusa dont 1er v/c président Boniface Twagirimana, Fabien Twagirayezu, n’abandi baburiwe irengero voir Tuyisenge Jeanine et autres….;

Ngaho kwivana mu rukiko nyafrika ruharanira uburenganzira bwa muntu kubera Victoire Ingabire;

Nguko gushaka gusinyura amasezerano yo kutongera gukorana n’umuryango mpuzamahanga uharanira uburenganzira bwa muntu (HRW) kubera ubuhotozi n’iyicarubozo u Rwanda rushinjwa n’uyu muryango;

Nguko kubangamira akanama k’umuryango w’abibumbye (UN) gashinzwe igenzura ry’iyicarubozo mu magereza na za cachots z’u Rwanda bikakaviramo kwitahira katarangije mission yako;

Ngaho mu karere u Rwanda ruherereyemo, kurebana nabi n’igihugu cya Ouganda cyarubereye igicumbi kugeza inkotanyi zirutashyemo! ngo kubera umunyemari w’umunyarwanda Ayabatwa Rujugiro utavugarumwe na Leta y’agatsiko ugiye gushora akayabo mu kubaka inganda zitunganya itabi muli icyo gihugu; Ngiyo imitungo y’uyu Rujugiro yafatiriwe indi ikaba iri mu gutezwa cyamunara na Leta y’agatsiko (voir union trade center etc…) ku buryo hagize uzanira Pahulo Kagame agahanga ke yabigororerwa bikomeye;

Nguko kurebana ay’ingwe hagati ya Nkurunziza w’u Burundi na Kagame aliko uyu we asa naho yubikiriye kandi yarahatsindiwe icy’umutwe.

Banyarwanda ntawabirondora ngo abimareyo twazakomeza ubutaha gusa ntawashidikanya avuze ko aba bayobozi biyicaje ku ntebe indi myaka 7 ntakabuza ari nko gusaza imigeri kuko burya umujinya w’imbwa ushirira mu kuzunguza umurizo .

Byanditswe ku wa 25/10/2017, na :
A.BEN NTUYENABO, KIGALI-RWANDA.

Rwanda : abadepite n’abasenateri b’u Rwanda bageze aho bakoresha ibitutsi nyandangazi mu nteko

Mu rwego rwo kwikoma umuryango mpuzamahanga uharanira uburenganzira bw’ikiremwa-muntu (HRW), kuya 19/10/2017 mu nteko ishinga amategeko hateraniye inama nyunguranabitekerezo ihuje imitwe yombi yigaga ku ma rapports asohorwa na HRW itunga agatoki u Rwanda ku iyicwa cyangwa irigiswa ry’abantu by’umwihariko muli rapport yayo iherutse gusohoka muli Nyakanga 2017 ishinja u Rwanda mu guhonyora cyane (tortures physiques et mentales) abatavugarumwe nayo aho abenshi bishwe ntawurabutswe bikozwe na bamwe mu bayobozi b’inzego zitandukanye bafatanije n’ingabo n’igipolisi cy’u Rwanda.

Bamwe mu badepite n’abasenateri ba Leta y’agatsiko bakaba basaba gouvernement ko uwo muryango mpuzamahanga uharanira uburenganzira bw’ikiremwa muntu (HRW) uyobowe na KENNETH Roth imbwa y’intizo, imbwa y’interahamwe yabaye umuvugizi wa Diane Rwigara n’ibindi…. Nkuko bamwise mu bitutsi nyandagazi bitabereye intumwa za rubanda; ko wakwirukanwa mu Rwanda nkuko BBC yirukanywe byongeye ukanashyikirizwa inkiko.

Aba bayobozi bakaba bemeza ko muri ayo malisti y’abantu Leta y’u Rwanda ishinjwa muli kiriya cyegeranyo harimo n’abitabye Imana bazize urw’ikirago kandi ko n’abandi bahari ahubwo ko ari ibinyoma byambaye ubusa by’uriya muryango. Aba badepite n’abasenateri barasaba inzego zose zagezweho n’ayo makuru kudaha agaciro ibikubiye muli iyo rapport. Ministri Businge w’ubutabera kimwe na Depite Mukama Abbas akaba na V/P w’umutwe w’abadepite bo bagasaba gouvernement ko ONG/HRW yirukanwa mu Rwanda aho kugirango ikomeze gutesha igihe Leta kandi ko ntawa bakora mu jisho dore ko ngo na BBC bayirukanye kandi bakaba bihagije. Nguko !

Banyarwanda, nkuko twabinoshewe akara n’umwe mu bambari ba FPR ati nubwo aba bayobozi birebesha i nyanza ntawe uyobewe ko Leta y’agatsiko aho imariye kubona kiriya cyegeranyo yabaye nkitaye umutwe aka wa mugani wa depite Abbas, nayo yahise ikora uko ishoboye kwose ikora ikintu gisa nk’ikinamico ibinyujije muli ya commission nyarwanda y’uburenganzira bwa muntu ikorera mu kwaha kwayo mu gushakisha abantu volonteers bayifasha kwambara uruhu rwa bariya ishinjwa kwica kugirango igaragaze ko bakiriho nkuko bimaze iminsi byerekanwa ku ma télévisions ya hano mu Rwanda cyane cyane mu kinyamakuru cya Leta RBA . Muriyumvira rwose !

Banyarwanda, ntawe bitababaza kubona igihugu cyacu kigenda kitandukanya n’amajwi avugira rubanda, abanyantege nke, aho gushakwa ubundi buryo bw’imikoranire hatabayeho iseswa ryamwe mu masezerano mpuzamahanga afitiye abaturage akamaro dore ko ari twe tubihomberamo ! none se banyarwanda ngaho twanze gukorana n’urukiko nyafrika rw’uburenganzira bwa muntu ngo kubera Victoire Ingabire Umuhoza, twirukanye umuryango mpuzamahanga uharanira ikiremwa-muntu, twirukanye igitangazamakuru BBC ngo kirakurura amacakubiri mu banyarwanda, urukiko mpana-byaha rwo ICC ntitururimo, murumva tugana he ? ejo tuzaba twirukanye ONG zose ku butaka bw’u Rwanda kubera ubutegetsi bubi butareba kure.

Byanditswe ku wa 20/10/2017, na :
A.BEN NTUYENABO, KIGALI-RWANDA.

Rwanda: ishyaka PS-Imberakuri, igice cya Mukabunani, naryo ngo rigiye gutanga ikirego gishinja Diane Rwigara

Christine Mukabunani/http://www.impamo.net

Mu gihe akiburana ifungwa n’ifungurwa no kunganirwa mu by’amatageko n’umwunganizi we Me Buhuru Célestin nkuko rwasubukuwe ku wa gatatu taliki ya 18/10/2017 mu rukiko rwisumbuye rwa Nyarugenge; umwari Diane Rwigara akomeje kugerwa amajanja n’abambari b’agatsiko ka FPR-INKOTANYI.

Kuri 17/10/2017 nibwo mu kiganiro kigufi yahaye kimwe mu binyamakuru bya hano mu Rwanda umuyobozi wa rimwe mu mashyaka akorera hano mu Rwanda yashyigikiye Pahulo Kagame mu matora aherutse ya mandat ya 3 ariryo PS IMBERAKURI igice kiyomoye kuri Me NTAGANDA Bernard kikaba kiyobowe na Mukabunani Christine; yatangaje ko ishyaka rye rigiye gushyikiriza ubushinjacyaha ikirego riregamo Umwari Diane Rwigara kuba yaribye inyandiko y’abayoboke ba PS Imberakuri akayikoresha mu gushaka kwiyamamariza gutegeka u Rwanda.

Banyarwanda ibi byubuye mu gihe ubushinjacyaha burimo buhuzagurika ku byaha bushinja abo kwa Rwigara kandi icyo kirego kikaba kitari mubyo bumushinja ku ikubitiro, bikaba bitumvikana ukuntu uyu Mukabunani abyukije icyo kirego ! aho se ntibyaba ari rya technical rya FPR n’abambari bayo tumenyereye ? nta gushidikanya.

Gusa hambere ubwo Diane Rwigara yiyamamarizaga kuyobora u Rwanda yigeze kuvuga ko iyo liste y’abayoboke ba PS Imberakuri yashinjwaga na NEC (Commission y’igihugu y’amatora) atazi aho yavuye yongeraho kandi ko icyo atari ikibazo kuko hari nabo muli FPR-INKOTANYI bamusinyiye.

Ababikurikiranira hafi barasanga byanze bikunze uyu Mukabunani ari undi mutangabuhamya wiyongereye ku bashinja Diane Rwigara. Ni akumiro rwose ! uwapfuye yarihuse.

Banyarwanda, tubibutse ko ubusanzwe aya malisti avugwa y’abayoboke b’amashyaka abikwa ahantu hatatu muli rusange ariho mu bunyamabanga bw’ishyaka nyirizina, copies zikoherezwa muli Ministѐre y’ubutegetsi bw’igihugu mu nshingano zayo no muli commission y’igihugu y’amatora (NEC); bikaba bigaragara ko gushaka guhimbira umuntu ibinyoma wifashishije hamwe muli izi nzego za Leta y’agatsiko cyangwa ku buryo bwumvikanyweho n’aba bose byoroshye cyane.

Mukabunani akaba akomeza avuga ko agiye guteranya inama rusange y’abarwanashyaka ba PS IMBERAKURI bakemeza niba Diane Rwigara agomba kuregerwa icyo cyaha n’ishyaka rye ariko byose ndasanga ari nk’urwiyerurutso. Mureke tubitege amaso.

Byanditswe ku wa 18/10/2017, na :
A.BEN NTUYENABO, KIGALI-RWANDA.

Rwanda : amalira yabo kwa Rwigara yashenguye imitima ya benshi imbere y’abacamanza

Kuri wa mbere taliki ya 16/10/2017 nibwo abo kwa Rwigara bongeye kujyanwa imbere y’urukiko rwisumbuye rwa Nyarugenge mu rubanza rwamaze amasaha arenga icyenda hamenyeshwa ibyaha abaregwa bashinjwa nabo bisobanura hamwe n’abunganizi babo Me Gatera Gashabana wa Adeline Rwigara na Me Buhuru Célestin wunganira Diane na Anne Rwigara.

Imyitwarire y’abacamanza bagaragaye nk’abadafite ubwisanzure batifuza icyo aricyo cyose cyatuma hakomwa rutenderi ngo ubushinjacyaha butahatera ibaba ahubwo hibandwaga cyane mu kuzibira imyiregurire yaba ba Rwigaras yakomeje kumvikana mu gushinja igipolisi cya Leta y’agatsiko urupfu rw’umubyeyi wabo Nyakwigendera Assinapol Rwigara basa nabifuza ko habanza kugaragazwa ukuri ku bugambanyi yakorewe nyuma yaho akoreshejwe accident babona agihumeka bakihutira kumusonga ari nako bamuzingira mu isachet bamaze kumujombagura ibyuma mu mutwe.

Iyo witegereje iby’uru rubanza usanga ntakabuza rwarashumurijwe na Pahulo Kagame akaba ari nawe wakagombye kuza kuburana na bene Rwigara bityo ntakomeze kuroha bariya baryamanza be mu bufatanyacyaha abategeka ibyo bagomba gushyira mu bikorwa. Ndasanga rero nta mpamvu yuko umukuru w’igihugu yajya yitwaza ubugome bwe kubera ubudahangarwa afite ngo abyitirire igihugu cyangwa abana b’u Rwanda. Nkaba namucira umugani ugira uti ‘Utaranigwa agaramye agira ngo ijuru riri hafi’.

Urubanza rwakomeje aho ba Rwigaras bisobanuraga bageraho bagaturika bakalira ! aliko se baririraga nde ? keretse uwo batazi ! kuko atari ubwa mbere akinira abanyarwanda umukino nk’uyu ! ndabagira inama rero yo kuzakira ibizavamo nkuko byagenwe na Nyakubahwa Kagame, ibya ma sentiments mube mubiteye ku ruhande ahubwo ni mukomeze guhagarara ku kuri kwanyu nta bwoba kugeza urubanza rurangiye byongeye ntimuyobewe uko igihugu kiyobowe kuko hari benshi bagerageje kurira aliko nabo bageze aho barayihanagura asigaye agatemba ajya mu nda. Ikindi mwiringire Imana kugira ngo ibatere imbaraga mu gutsinda icyago. YEZU NI MUZIMA ! ALLELUA.

Ba Rwigara mubyo bashinjwa harimo kuba baraganiriye n’abavandimwe babo cyangwa inshuti zo hanze y’igihugu ! banyarwanda icyiza kiruta kuganira n’umuvandimwe cyaba ikibi cg icyiza ni ikihe? Uretse ko nsanga nta kibi cyarimo kuko babaga bivugira ibyakababaro kabo nuko kakemuka kandi ibyo ni ibya buri kiremwa muntu cyose, naho ubundi biramutse bigenze bityo ndasanga abanyarwanda benshi bajya bambikwa amapingu uko bwije uko bukeye.

Mu Rwanda nta liberté d’expréssion ahubwo hari frustration aho umuntu ahora acecetse yakwinyagambura gato ageze aho yizeye akavuga byinshi bihindukamo ibibazo.

Adeline RWIGARA ati amagambo yose nabwiraga igipolisi iyo cyazaga kudufata nabiterwaga n’ihahamuka nagize ry’urupfu rw’umugabo wanjye ! ati bamaze kumwica banga nuko ngera naho impanuka yabereye ! ati bikubitiraho no kudusenyera Hôtel none natwe turi mu mapingu kuva twafatwa arijye ari abana banjye ntawamenya aho umwe umwe afungiye n’iyicarubozo turimo gukorerwa ! ati kugeza ubwo bandindisha insoresore z’abapolisi nambaye robe de nuit gusa mureba uko ngana ntya ! nimwiyumvire namwe ! akabaye icwende ntikoga.

Muri uru rubanza havuzwe byinshi aliko nubwo ubushinjacyaha bwifuzaga ko urubanza rubandanya ntibyashobotse kubera amasaha yabageranye kandi buri wese bigaragara ko ananiwe byabaye ngombwa ko umucamanza ategeka ko rusubikwa rukazasubukurwa ku wa gatatu taliki ya 18/10/2017 hakomeza kumvwa za Audio.

Byanditswe ku wa 17/10/2017, na:
A.BEN NTUYENABO, KIGALI-RWANDA.

14/10/2017 Ingabire Day. Mu Rwanda nabo bazirikanye kandi banasengera imfungwa za politiki

Muri iki gitondo cyo kuwa 14/10/2017 abakristu ba Kiliziya gatolika bari bazindukiye hirya no hino kuri za paroisse zabo aho bagombaga kubanza kwakira umugisha no gusengera urugendo mbere yuko berekeza I Kibeho kwa Nyina wa Jambo Bikiramariya.

Bamaze kwinjira muli za Minibus bikodeshereje bamwe mu bakristu bagize paroisse ste famille bagendaga banyuzamo bakaririmba ari nako bavuga ishapure z’ububabare niy’impuhwe z’Imana basaba Umwamikazi wa Rozali umubyeyi Bikiramariya guca inkoni izamba agasubiza mu buzima busanzwe abagizwe imbohe n’abagizi ba nabi biyambitse imyuka mibi no kuyibakiza, abatuye Isi bose bakwongera kubana mu mahoro, bati abababaye, abarwayi n’abandi bose bahohoterwa cyangwa bahezwa nabiy’Isi turabatakambira mubyeyi ngo ubahe ihumure !

Padiri utashatse kuntangariza amazina ye wari uherekeje aba bakristu yagize ati iki gikorwa dushyigikiramo abakristu ni icya buri wese muri twe ati ni uburyo bwo kuzirikana no gusengera abababaye bose harimo bien sûr n’imfungwa , ati ubworoherane n’umutima uzirikana iyo biherekejwe n’isengesho ubudatezuka mu gushengerera umwamikazi wa Rozali umubyeyi Bikiramariya Nyina wa Jambo wa Kibeho, tubiherwamo ingabire zidasanzwe uko ibihe bihora bisimburana iteka. AMEN.

Padiri yakomeje akomoza no kuba abarenganywa harimo ibyiciro byinshi kandi biyongera ubutitsa hirya no hino ku isi, ati hari abazira guharanira demokrasi n’uburenganzira bwa Muntu, abatavugarumwe kandi bava inda imwe (le cas de Victoire Ingabire UMUHOZA et autres), abacuranwa n’izindi ngero zitandukanye ati ibyo byose tukaba tugomba kubitura umubyeyi wa twese kugirango adusukurire iyo mitima tuve ibuzimu tugana ibuntu. I Kibeho rero nyirizina hari huzuye abavuye imihanda yose nkuko bisanzwe bigenda ku buryo hari abazamarayo iyi weekend yose. Nguko.

Byanditswe ku wa 14/10/2017, na:
A.BEN NTUYENABO, KIGALI-RWANDA.

Rwanda : Isubikwa rya hato na hato ry’urubanza rwabo kwa Rwigara rihatse iki?

Urubanza rwabo kwa Rwigara rwasubukuwe bwa kabiri kuri 11/10/2017. Bose bamaze gusomerwa ibyaha baregwa birimo gukoresha impapuro mpimbano icyaha kiregwamo Diane Shima Rwigara, no guteza imvururu n’amacakubiri muli rubanda icyaha bahuriyeho uko ari batatu; abaregwa bahakanye ibyaha byose.

Diane Shima Rwigara yahise agaragaza ko batiteguye kuburana bitewe nuko dossier ariho akiyishyikirizwa mu Rukiko byongeye kandi ko yari yanasabye umwunganizi ku ya 28/08 akaba aribwo akimubona bityo ko nta mwanya uhagije yabonye wo kwiga dossier mu gihe ubushinjacyaha bwo bumaze ukwezi kwose bwiga dossier ye. Ikindi akomeza avuga ni amafranga yasabye muyo police yatwaye igihe babasakaga kugirango ayashakemo abunganizi batatu nayo ntiyayahabwa kugeza magingo aya.

Adeline Rwigara we akifuza ko umwunganizi we yaba Me GATERA Gashabana kuko ngo yumva ubu nta mwunganizi afite, mu gihe Me BUHURU Céléstin we yari yemereye urukiko ko yiteguye kuburanira Diane Shima na Anne RWIGARA.

Agashya kabaye muri uru rubanza akaba ari ugusaka bikomeye kw’abapolisi buri wese winjiye mu cyumba cy’iburanisha nanone cyari cyakubise cyuzuye abandi hanze nk’uko bisanzwe ari nako umutekano wari wakajijwe mu mpande zose z’urukiko, ikindi ni uko umucamanza yabanje kwihanangiriza abanyamakuru kutongera gufata amajwi y’ababurana nkuko byagenze ubushize.

Nyuma yo kwiherera k’urukiko umucamanza yavuze ko ikifuzo cya Adeline RWIGARA cyo kunganirwa nuwo yifuza gishingiye ku ngingo ya 18 y’itegeko nshinga ivuga ko uburenganzira bwo kunganirwa mu rukiko ari ntavogerwa bityo ko uregwa ahawe indi minsi ibiri urubanza rukaba rwimuriwe ku wa 13/10/2017.

Banyarwanda, burya koko iyo « inkoko ivuye mu magi yayo arabora », « umutima wuzuye ishavu nawo ntushobora gusobanura amagambo neza » ariyo mpamvu mbona aba ba Rwigara nabo ari ko byabagendekeye nyuma yo gukomwa mu nkokora n’abagizi ba nabi babura umubyeyi wabo kubw’amaherere ariyo mpamvu bagombye guhabwa ubutabera bushishojwe kandi bucukumbuwe mbere y’uko bahabwa ibihano cyangwa barekuwe, dore ko na Giti mu jisho Pawulo Kagame byamwanze mu nda yabera abavaniraho icyaha cyo kunyereza umutungo w’abaturage yari yabanje kubegekaho. Gusa nubwo baca umugani ngo « umugayo uvuna uwugaya, uwugawa yigaramiye » ntawabura gufata Pawulo Kagame na none nka Gashozarubanza kuri uyu muryango wa Rwigara.

Byanditswe ku wa 11/10/2017, na :
A.BEN NTUYENABO, KIGALI-RWANDA.

Rwanda :Urubanza rw’abo kwa Rwigara rwasubitse. Bafungiye iki niba iperereza ritararangira nkuko ubushinjacyaha bubivuga?

Ku ya 9/10/2017 niho abo kwa Rwigara bari bongeye kwitaba urukiko rwisumbuye rwa Nyarugenge aliko noneho bari baherekejwe n’umwunganizi wabo Me Buhuru Céléstin wasaga nuherekeje izo mfungwa zari mu mapingu buri wese n’abapolisi babili bafashe mu maboko kugera binjiye mu cyumba cy’urukiko cyari cyakubise cyuzuye abantu abandi hanze yacyo bategereje gukurikiranira urubanza kuri za microphones installés à l’extérieur ku buryo n’abahisi n’abagenzi bari barambirije aho.

Bikaba byagenze nk’ubushize bamwe muli buri ruhande bumvikanisha imbogamizi zituma urubanza rwasubikwa, nko ku ruhande rw’umwunganizi Me Buhuru Céléstin yasabaga igihe kingana n’icyumweru ngo abashe kwiga dossier neza yabo yunganira kandi anahabwe n’ibiyikubiyemo byose harimo ibimenyetso mu kubashinja ndetse na copie yabyo.

Ku ruhande rwa ba Rwigara nabo bakavuga ko batigeze babona dossiers zabo mbere yuko bajyanwa mu rukiko ku buryo batarashobora kumenya ibyo baregwa ! aha umuntu akaba yakwibaza impamvu ubushinjacyaha butwara abantu mu bucamanza butarabamenyesha ibyo baregwa !

Ku ruhande rw’ubushinjacyaha nabwo buti ntitwarekurira dossier Me Buhuru umwunganizi wabo ngo ayicukumbure neza kandi tukiri mu iperereza.

Izo mpaka zose zikaba zugariwe n’inteko y’abacamanza hafatwa umwanzuro usubika urubanza rukazasubukurwa ku wa gatatu taliki ya 11/10/2017 haburanishwa niba abaregwa bakomeza gukurikiranwa bafunze cyangwa bari hanze, bityo Me Buhuru akaba yahawe iminsi itatu yo kureba dossier y’abo yunganira aho kuba icyumweru nkuko yari yabisabye.

Hagati aho opinion publique iribaza byinshi kuri uru rubanza, nyirabayazana akaba ari ya Ngona y’inkazi Pahulo Kagame igihe yarahiriraga kwongera kuyobora u Rwanda mandat ya 3 ubwo yatungaga agatoki abanyereza umutungo w’abaturage avuga ko bidegembya uko bashatse ko bagomba kubiryozwa kabaye niyo baba barashatse kwiyamamariza umwanya w’umukuru w’igihugu bikabananira ! yavugaga Mlle Diane Rwigara.

None se Banyarwanda, aba benedata baba bafungiwe iki mu gihe bataramenyeshwa ibyo baregwa byose ? Ko atari urwumwe! Byumvikana bite ukuntu urubanza rugiye gutangira hakiri ibigikorwaho iperereza nkuko ubushinjacyaha bubivuga ? Ese amategeko y’u Rwanda yaba avuga ko iperereza rikorwa nyuma yo gufatwa cyangwa mbere ?

Banyarwanda, umanika agati wicaye kukamanura bikakubera ingorabahizi, uru rubanza rushobora kuzasiga umugani kuko nkeka ko mu kurusubika haba hagikorwa itechnika ryumvikanyweho n’ubushinjacyaha n’abacamanza dore ko bitaboroheye kuko n’ibyaha bimwe batangiye kubikuraho nk’icyaha cyo kunyereza umusoro kitagikurikiranywe n’ubushinjacyaha ! Aho amaherezo ntiwabona ibirego byose biregwa aba bene Rwigara bihindutse baringa ? Birabe ibyuya ntibibe amaraso. Tubitege amaso.

Byanditswe ku wa 09/10/2017, na :
A.BEN NTUYENABO, KIGALI-RWANDA.

Mu Rwanda imihigo ntishoboka kubera itechnika

Ni ku munsi w’ejo hashize taliki ya 6/10/2017 mu nteko ishinga amategeko y’u Rwanda imbere y’abayobozi batandukanye barimo abayobozi b’uturere 30 tugize igihugu bamweretse igihandure ubwo hakurikijwe amanota yahawe uturere mu rwego rwo kwesa imihigo 2016-2017 akarere kaje ku isonga ari Rwamagana kamwe mu turere tw’intara y’iburasirazuba kazahajwe n’inzara n’uruzuba rudashira aho abaturage baho bakomeje gusuhukira mu gihugu cya Ouganda. Ibiramambo ahubwo akarere ka Rubavu kakaba karashyizwe ku mwanya wa nyuma n’amanota 72.86 % kandi tuzi ko gasanzwe kagwa mu ntege umugi wa Kigali haba mu bikorwa by’amajyambere, ubukerarugendo n’ubucuruzi byongeye kakaba gafite n’ubuhahirane bukomeye na Republika iharanira demokrasi ya Congo hakurya, nubwo bwose kakunze kuvutswa umudendezo na Kagame agahindulira ubuyobozi buri gihe kubera kwikanga baringa.

Ni agahomamunwa ! aliko ntibitangaje kuri Leta yokamwe n’itechnika ryuzuye ikinyoma n’igitugu, Kagame nawe bikaba byaramubereye urujijo ubwo hatangazwaga amanota yiyo mihigo y’uturere harimo 82% y’akarere ka Rwamagana kabaye aka mbere, hamwe hakibarizwa bene ba baturage bibera mu nzuri z’inka badakora na busa batunzwe n’amata y’inka no kwinywera za Kanyanga ku buryo uhura na bamwe mu gitondo bareba nk’amakanya! Birababaje ! akaba yaragize ati: ntibyumvikana mugomba kujya musubiza amaso inyuma mukareba niba koko ayo manota akwiye ! ati imihigo si ukurangiza umuhango gusa hagomba no kugaragazwa ibimenyetso n’imibare ifatika, akaba yakomeje asaba ikigo cy’igihugu cy’ibarurishamibare kujya gisuzuma uko imihigo yushijwe mbere yuko hagenwa amanota.

Banyarwanda, dukurikije aya magambo ya Kagame ukareba n’urutonde rw’uturere twahawe amanota y’imbere n’ukuntu tudasiba gutumirwa mu nteko aho abayobozi batwo bahora bisobanura mu gukoresha nabi umutungo wa Leta no kuwunyereza ntiwabura guhamya ko iyi mihigo ari itechnika ryambaye ubusa, nkaba nsanga Kagame baramuhinduye injiji yize nkuko nawe yakunze kubibacyulira.

Iyo mihigo yagendeweho ikaba yari igabanijemo inkingi enye za gouvernement arizo imibereho myiza, ubutabera n’ubukungu.

Byanditswe kuwa 07/10/2017, na :
A.BEN NTUYENABO, KIGALI-RWANDA.

Rwanda : amagufwa y’imibiri yavumbuwe i Kanombe muri « champ de tir » ni aya ba ex-FAR

YEZU Kristu niwe wagiraga ati ‘Nimureke abapfu bahambe abapfu babo’. Kubera Jenoside yo muli Mata 1994 nk’iturufu y’ingoma y’agatsiko ka FPR, hashize imyaka 23 yose kagerageza gutoragura amagufwa aho aboneka hose yaba ay’inyamaswa cyangwa amatungo kayitirira imibiri y’abazize Jenoside nubwo ntawakwihandagaza ngo ahamye ko nta bantu bapfuye cyangwa bahekuwe nariya mahano aliko birababaje cyane aho Leta y’agatsiko igira itya bya nyirarureshywa ikivumburisha ahantu yari yaracukuye indake zayo ariho nyuma y’intambara yajugunyagamo abo ihotoye bose none ikaba igenda iherekana mu cyayenge nkaho abanyarwanda tutabizi !

Ni muli urwo rwego kuri uyu wa 5/10/2017 hashyinguwe mu Rwibutso rwa Nyanza ya Kicukiro amagufwa y’imibiri y’abantu agera kuri 547 yataburuwe mu kigo cya gisirikare i Kanome bavuga ko ari abatutsi bazize Jenoside kandi ari abahoze mu ngabo za Habyarimana bari barakomerekeye ku rugamba babura uburyo bahungana n’abandi baza guhotorwa n’ingabo za APR nyuma yo kwigarulira icyo kigo cya Kanombe.

Abafashe ijambo muli uyu muhango yaba umuyobozi w’akarere ka Kicukiro cyangwa umuyobozi wungirije wa Ibuka wasangaga bahuriza hamwe kubera ko basaga nabatunguwe nibyayo magufwa kubona nta makuru yigeze ayatangwaho kugeza ubwo avumbuwe n’imashini yakoraga umuhanda muli icyo kigo. Naho umunyamabanga nshingwabikorwa wa CNLG we nta nicyo yabitangajeho ahubwo yashishikajwe no gusaba inzego z’ibanze kurangiza imanza z’abangije imitungo y’abarokotse Jenoside no kuyishyuza vuba; aho yunzemo ati umunsi nk’uyu wo gushyingura ni umwanya mwiza wo kwamagana abanyamahanga n’abandi bose bapfobya Jenoside, nimwiyumvire namwe !

Banyarwanda, aba bayobozi batunguwe nuko batamenye amakuru yariya magufwa mbere! Aliko se bo bayobewe ko ari ikinamico rya politiki ! nibajye batobora bavuge kuko igihe nikigera nta ruvugiro bazaba bagifite kuko bucyanayandi! Umuturage umwe uturiye Nyarugunga aho i Kanombe akaba atarashatse kuvuga amazina ye ati bamenye sinara kuri iyi si ya Rurema! twihereye niwe wampamirije ko ariya magufwa yataburuwe mu kigo cya Kanombe amenshi ari ayabasirikare ba EX-FAR bari barakomerekeye ku rugamba bamwe baracitse amaguru abandi bararashwe mu mitwe babuze uburyo bahungana n’abandi mu gihe APR yari imaze kwigarulira ikigo cya Kanombe kuburyo iyo myobo bagenda batabururwamo yari indake z’ingabo zinkotanyi zagendaga zicukura aho zifashe hose noneho nyuma zikagenda zirohamo abo zishe bose nabo zihuhuye nkabo ba EX-FAR ! Muriyumvira ! ntawashidikanya ko rero nahandi hose hazageraho hagashyirwa ahagaragara n’iyi Leta y’agatsiko ikomeje kugenda yivamo buhoro buhoro kubera indonke ivoma mu iturufu ya Jenoside.

Byanditswe ku wa 06/10/2017, na :
A.BEN NTUYENABO, KIGALI-RWANDA.

Amakuru ki ?

Amakuru