Archives par étiquette : Paul Kagame

Rwanda : amalira yabo kwa Rwigara yashenguye imitima ya benshi imbere y’abacamanza

Kuri wa mbere taliki ya 16/10/2017 nibwo abo kwa Rwigara bongeye kujyanwa imbere y’urukiko rwisumbuye rwa Nyarugenge mu rubanza rwamaze amasaha arenga icyenda hamenyeshwa ibyaha abaregwa bashinjwa nabo bisobanura hamwe n’abunganizi babo Me Gatera Gashabana wa Adeline Rwigara na Me Buhuru Célestin wunganira Diane na Anne Rwigara.

Imyitwarire y’abacamanza bagaragaye nk’abadafite ubwisanzure batifuza icyo aricyo cyose cyatuma hakomwa rutenderi ngo ubushinjacyaha butahatera ibaba ahubwo hibandwaga cyane mu kuzibira imyiregurire yaba ba Rwigaras yakomeje kumvikana mu gushinja igipolisi cya Leta y’agatsiko urupfu rw’umubyeyi wabo Nyakwigendera Assinapol Rwigara basa nabifuza ko habanza kugaragazwa ukuri ku bugambanyi yakorewe nyuma yaho akoreshejwe accident babona agihumeka bakihutira kumusonga ari nako bamuzingira mu isachet bamaze kumujombagura ibyuma mu mutwe.

Iyo witegereje iby’uru rubanza usanga ntakabuza rwarashumurijwe na Pahulo Kagame akaba ari nawe wakagombye kuza kuburana na bene Rwigara bityo ntakomeze kuroha bariya baryamanza be mu bufatanyacyaha abategeka ibyo bagomba gushyira mu bikorwa. Ndasanga rero nta mpamvu yuko umukuru w’igihugu yajya yitwaza ubugome bwe kubera ubudahangarwa afite ngo abyitirire igihugu cyangwa abana b’u Rwanda. Nkaba namucira umugani ugira uti ‘Utaranigwa agaramye agira ngo ijuru riri hafi’.

Urubanza rwakomeje aho ba Rwigaras bisobanuraga bageraho bagaturika bakalira ! aliko se baririraga nde ? keretse uwo batazi ! kuko atari ubwa mbere akinira abanyarwanda umukino nk’uyu ! ndabagira inama rero yo kuzakira ibizavamo nkuko byagenwe na Nyakubahwa Kagame, ibya ma sentiments mube mubiteye ku ruhande ahubwo ni mukomeze guhagarara ku kuri kwanyu nta bwoba kugeza urubanza rurangiye byongeye ntimuyobewe uko igihugu kiyobowe kuko hari benshi bagerageje kurira aliko nabo bageze aho barayihanagura asigaye agatemba ajya mu nda. Ikindi mwiringire Imana kugira ngo ibatere imbaraga mu gutsinda icyago. YEZU NI MUZIMA ! ALLELUA.

Ba Rwigara mubyo bashinjwa harimo kuba baraganiriye n’abavandimwe babo cyangwa inshuti zo hanze y’igihugu ! banyarwanda icyiza kiruta kuganira n’umuvandimwe cyaba ikibi cg icyiza ni ikihe? Uretse ko nsanga nta kibi cyarimo kuko babaga bivugira ibyakababaro kabo nuko kakemuka kandi ibyo ni ibya buri kiremwa muntu cyose, naho ubundi biramutse bigenze bityo ndasanga abanyarwanda benshi bajya bambikwa amapingu uko bwije uko bukeye.

Mu Rwanda nta liberté d’expréssion ahubwo hari frustration aho umuntu ahora acecetse yakwinyagambura gato ageze aho yizeye akavuga byinshi bihindukamo ibibazo.

Adeline RWIGARA ati amagambo yose nabwiraga igipolisi iyo cyazaga kudufata nabiterwaga n’ihahamuka nagize ry’urupfu rw’umugabo wanjye ! ati bamaze kumwica banga nuko ngera naho impanuka yabereye ! ati bikubitiraho no kudusenyera Hôtel none natwe turi mu mapingu kuva twafatwa arijye ari abana banjye ntawamenya aho umwe umwe afungiye n’iyicarubozo turimo gukorerwa ! ati kugeza ubwo bandindisha insoresore z’abapolisi nambaye robe de nuit gusa mureba uko ngana ntya ! nimwiyumvire namwe ! akabaye icwende ntikoga.

Muri uru rubanza havuzwe byinshi aliko nubwo ubushinjacyaha bwifuzaga ko urubanza rubandanya ntibyashobotse kubera amasaha yabageranye kandi buri wese bigaragara ko ananiwe byabaye ngombwa ko umucamanza ategeka ko rusubikwa rukazasubukurwa ku wa gatatu taliki ya 18/10/2017 hakomeza kumvwa za Audio.

Byanditswe ku wa 17/10/2017, na:
A.BEN NTUYENABO, KIGALI-RWANDA.

Rwanda :Urubanza rw’abo kwa Rwigara rwasubitse. Bafungiye iki niba iperereza ritararangira nkuko ubushinjacyaha bubivuga?

Ku ya 9/10/2017 niho abo kwa Rwigara bari bongeye kwitaba urukiko rwisumbuye rwa Nyarugenge aliko noneho bari baherekejwe n’umwunganizi wabo Me Buhuru Céléstin wasaga nuherekeje izo mfungwa zari mu mapingu buri wese n’abapolisi babili bafashe mu maboko kugera binjiye mu cyumba cy’urukiko cyari cyakubise cyuzuye abantu abandi hanze yacyo bategereje gukurikiranira urubanza kuri za microphones installés à l’extérieur ku buryo n’abahisi n’abagenzi bari barambirije aho.

Bikaba byagenze nk’ubushize bamwe muli buri ruhande bumvikanisha imbogamizi zituma urubanza rwasubikwa, nko ku ruhande rw’umwunganizi Me Buhuru Céléstin yasabaga igihe kingana n’icyumweru ngo abashe kwiga dossier neza yabo yunganira kandi anahabwe n’ibiyikubiyemo byose harimo ibimenyetso mu kubashinja ndetse na copie yabyo.

Ku ruhande rwa ba Rwigara nabo bakavuga ko batigeze babona dossiers zabo mbere yuko bajyanwa mu rukiko ku buryo batarashobora kumenya ibyo baregwa ! aha umuntu akaba yakwibaza impamvu ubushinjacyaha butwara abantu mu bucamanza butarabamenyesha ibyo baregwa !

Ku ruhande rw’ubushinjacyaha nabwo buti ntitwarekurira dossier Me Buhuru umwunganizi wabo ngo ayicukumbure neza kandi tukiri mu iperereza.

Izo mpaka zose zikaba zugariwe n’inteko y’abacamanza hafatwa umwanzuro usubika urubanza rukazasubukurwa ku wa gatatu taliki ya 11/10/2017 haburanishwa niba abaregwa bakomeza gukurikiranwa bafunze cyangwa bari hanze, bityo Me Buhuru akaba yahawe iminsi itatu yo kureba dossier y’abo yunganira aho kuba icyumweru nkuko yari yabisabye.

Hagati aho opinion publique iribaza byinshi kuri uru rubanza, nyirabayazana akaba ari ya Ngona y’inkazi Pahulo Kagame igihe yarahiriraga kwongera kuyobora u Rwanda mandat ya 3 ubwo yatungaga agatoki abanyereza umutungo w’abaturage avuga ko bidegembya uko bashatse ko bagomba kubiryozwa kabaye niyo baba barashatse kwiyamamariza umwanya w’umukuru w’igihugu bikabananira ! yavugaga Mlle Diane Rwigara.

None se Banyarwanda, aba benedata baba bafungiwe iki mu gihe bataramenyeshwa ibyo baregwa byose ? Ko atari urwumwe! Byumvikana bite ukuntu urubanza rugiye gutangira hakiri ibigikorwaho iperereza nkuko ubushinjacyaha bubivuga ? Ese amategeko y’u Rwanda yaba avuga ko iperereza rikorwa nyuma yo gufatwa cyangwa mbere ?

Banyarwanda, umanika agati wicaye kukamanura bikakubera ingorabahizi, uru rubanza rushobora kuzasiga umugani kuko nkeka ko mu kurusubika haba hagikorwa itechnika ryumvikanyweho n’ubushinjacyaha n’abacamanza dore ko bitaboroheye kuko n’ibyaha bimwe batangiye kubikuraho nk’icyaha cyo kunyereza umusoro kitagikurikiranywe n’ubushinjacyaha ! Aho amaherezo ntiwabona ibirego byose biregwa aba bene Rwigara bihindutse baringa ? Birabe ibyuya ntibibe amaraso. Tubitege amaso.

Byanditswe ku wa 09/10/2017, na :
A.BEN NTUYENABO, KIGALI-RWANDA.

MU RWANDA UBUCAMANZA BWAHINDUTSE AGATOBERO

Muri iyi minsi ishize ubwo urukiko rwisumbuye rwa Nyarugenge rwakiraga ikirego cy’umuntu witwa Herman MANIRAREBA twavuga ko ari umurwayi wo mu mutwe cyangwa gatumwa aho arega Mgr Thaddée NTIHINYURWA umushumba wa Arkiyepiskopi ya Kigali kuba yaratesheje agaciro umuco nyarwanda awuhinduramo uwaba hebreyo b’ i Roma.

Bwana Herman akavuga ko kuba kuwa 29/06/2001 ari kumwe na Nyakwigendera Mgr MISAGO Augustin wayoboraga arkidiocѐse ya Gikongoro baremeje kandi bakanasakariza isi yose ko uwabonekeye i Kibeho kuva taliki ya 28 ugushyingo 1981 kugeza ku ya 28 ugushyingo 1989 ari Bikiramariya Nyina wa Jambo kandi ahubwo yari NYIRARUMEZA wabyaye Ruganzu ΙΙ Ndori mu buryo bw’umwuka wari waje kumenyesha abanyarwanda ko hagiye kubaho Jenoside no kugirango bayirinde;

Abanyarwanda benshi bahise bumva ko ari rya technika ry’abacurabwenge ba FPR bongeye kubura riba rigamije gushaka uburyo bwo gusahura kiliziya gatolika bitwaje ibirego by’ibinyoma mu gushaka indishyi z’abarokotse Jenoside, hakaba hibazwa ukuntu urukiko rwisumbuye rwa Nyarugenge rufata icyemezo cyo kwakira no gushaka kuburanisha ikirego nkicyo k’ibinyoma byuzuye amaco y’inda mugusiga ibyaha bidafatika bariya basenyeri ba kiliziya gatolika ! kuki ibya kibeho byemejwe na Kiliziya y’isi yose particularily Vatican atariyo bibazwa ?

Mu kirego cye uyu Herman avuga ko asabira indishyi abatutsi bagera kuri 1.074.017 bishwe muli Jenoside, buri umwe akamusabira ibihumbi 400.000 by’amadollars y’amerika yabikuba kugeza muli 2017 bikangana na 866.516.915.600.000 by’amadollars y’amerika ; agakomeza asabira n’indishyi abanyarwanda miliyoni 12 kubwibikomere batewe na Jenoside buri wese nawe amubarira ibihumbi 400.000 by’amadollars y’amerika yakuba na 2017 bikabyara 9.681.600.000.000.000 by’amadollars y’amerika.

SOMA N’IYI NKURU : Mgr Ntihinyurwa Thaddée yatumijwe mu rubanza aregwamo ‘gutesha agaciro Abanyarwanda’

Bakristu bavandimwe uretse aka wa mugani ngo abagabo bararya imbwa zikishyura ntawe utazi nyirabayazana w’amahano yagwiriye u Rwanda ko ari Pawulo Kagame washoye igihugu mu ntambara ngo arashaka uburenganzira bwe yicisha Roho z’inzirakarengane bene kariya kageni ! nibareke rero kubigereka kuri bariya bashumba b’Imana babashora mu manza zidafatika.

Uyu Manirareba Herman akomeza yanzura asaba urukiko gutesha agaciro icyemezo cyayo mabonekerwa yabereye i Kibeho hakemezwa ko uwahagaragaye ari NYIRARUMAZA aho kuba BIKIRAMARIYA NYINA WA JAMBO ! asaba urukiko kandi ko Kiliziya gatolika n’andi matorero ari mu Rwanda yaseswa, byongeye rugategeka ko Kirazira ariyo Gakondo y’abanyarwanda byasobanuraga kubandwa, kuraguza no guterekera abakurambere, umuganura wo muli Nyakanga n’ibindi byasubizwa intebe yabyo mu Rwanda.

Ubwo rero kuri uyu wa 20/09/2017 twageraga ku rukiko rwisumbuye rwa Nyarugenge ahagombaga kwitaba Mgr NTIHINYURWA Thaddée mu nama yagombaga gusuzumirwamo niba ibyangombwa ku mpande zombi byuzuye ngo urubanza rutangire kuburanishwa twasanze Mgr NTIHINYURWA atitabye urukiko ndetse nta n’umwunganizi mu mategeko yohereje. Nyuma urukiko rwafashe umwanzuro wo kuzatangira kuruburanisha ku wa 13 ugushyingo 2017.nguko !

Banyarwanda bakristu bavandimwe ntawashidikanya ko hagomba kuba hari ikibyihishe inyuma kuko uyu MANIRAREBA Herman akomeje kwemeza ko naramuka atsinze Musenyeri Thaddée indishyi yasabye zose zizajya mu isanduku ya Leta yo ikazazigabanya abarokotse Jenoside yakorewe abatutsi muli 1994 ngo kubera ibibi byinshi byakozwe na Kiliziya gatolika kuva yinjiye mu Rwanda ‘’ ica abanyarwanda bamwe abandi ikabica’’. Ngaho rero ! umuntu akaba yakwibaza aho kwica umuco nyarwanda uyu Herman arega Mgr Thaddée bihuriye n’indishyi za Jenoside ? nta wabura guhamya ko rero ubucamanza busigaye bugerageza gutesha abantu agaciro harimo n’abihayimana mu guca imanza z’uburiganya kugirango bukunde butumikire Leta y’agatsiko ifite politike mbi yo gukomeza kunyunyuza rubanda.

Ese kuki bataregera Papa ko ariwe uhagaraliye Kiliziya gatolika ku isi ? cyangwa bakarega abakristu b’abagatolika muli rusange? Yewe ba barafinda baba benshi ! nawe se aho abacamanza basigaye bakira n’ibirego byakagombye guteshwa agaciro ! ikindi mvuga nuko ibyamabonekerwa bitagombye kurebwa n’ubucamanza uretse urukiko rw’ikirenga nirwo rwonyine rushobora kugira icyo ruvuga ku myemerere y’abantu. Aya matati akaba aje muri ibi bihe Mgr NTIHINYURWA Thaddée arimo yizihiza yubile ye y’imyaka 75 amaze avutse n’ijana y’ubusaserdoti muri Diocѐse ya Kigali.

Banyarwanda, bakristu bavandimwe muriyumvira ! ni ahamasengesho menshi , nta washidikanya umuntu avuze ko Imana irimo kurwana na Shitani aliko gutsindwa kwayo kukaba kugeze ku ndunduro .

Byanditswe ku wa 23/09/2017, na :
A.BEN NTUYENABO, KIGALI-RWANDA.

Rwanda. Paul Kagame yagiye gusenga. Ese amasengesho ye imana ishobora kuyakira?

Nibyo koko rero niyo yaba ari mu masengesho yo guhimbaza cyangwa gushimira Imana uyu muyobozi Kagame Paul ahora yifuza kuza imbere ya byose ntamenye ko umuyobozi mwiza ari ubera umugaragu wabo ayobora.

Ni kuri iki cyumweru taliki ya 10/09/2017 muli Kigali Convention Center habaye igiterane cy’amasengesho yo gushimira Imana nako Kagame ! (Imana imbabarire !) cyateguwe n’ihuliro ry’amadini mu Rwanda ngo kuba ibihe bishize by’amatora ye byararanzwe n’umutekano, kikaba cyari gihuje benshi bo mu nzego za Leta, harimo abayobozi bakuru b’igihugu, abagize gouvernement nshya, abayisezerewemo n’abahagaraliye amadini aho yayandi y’inzaduka yari yabukereye mu kuramya no gukeza umwami Kagame usigaye utakiha confidence aho asigaye yitabira ibije byose nk’inkundarubyino bitabereye umukuru w’igihugu.

Nkuko byagarutsweho na Pasteur Eric mu ijambo ry’ikaze yasobanuye ko igikorwa barimo atari kimwe gisanzwe cy’amasengesho ngaruka-mwaka y’abayobozi b’igihugu ahubwo ko ari igiterane cyo gushimira Imana kuba yarongeye kubaha umuyobozi ubabereye nka Kagame bityo bakaba basabwa kumusengera cyane muli iyi mandat y’imyaka 7 iri imbere, ati Imana imushoboze imwongerera imbaraga zo kurinda no gusigasira ibyagezweho.

Umuyobozi w’ishuri ry’abakobwa i Kansi ho muli Butare Soeur Immaculée Uwamariya niwe wabimburiye abanyamadini mu gusengera icyo gikorwa dore ko ariwe wari uhagaraliye Kiliziya gatolika nta musenyeri gatolika cyangwa umupadiri wari uhari bikaba byibajijweho na benshi mu gihe Prezida Kagame we yitabiriye ubutumire !

Sr Uwamariya rero mu isengesho rye ingingo nyamukuru akaba yasabaga Nyagasani Imana n’umubyeyi Bikiramariya Nyina wa Jambo wa Kibeho kwoherereza umwuka muziranenge abari aho bose n’abari buhavugire amagambo gufashwa n’impuhwe z’Imana kugirango batayoba ahubwo batange ubutumwa bwiza akaba yirinze kugira uwo akeza cyangwa uwo ashimagiza nkuko bikomeje kurangwa na bamwe mu banyamadini y’inzaduka.

Bwana Lambert Bariho umuyobozi ushinzwe iyogezabutumwa muri ihuliro ry’amadini ya gikristo akaba mu isengesho rye yagaciye avuga imyato n’ibigwi by’umwami Kagame agira ati: duteraniye aha tuje gusengera abayobozi bacu by’umwihariko Prezida Kagame Imana yongeye kuduha ngo akomeze atuyobore, ati murazi ko yahaye abanyarwanda kwiyunga, yabarindiye ubuzima bituma ibirwara by’ibyorezo nka Ebola bitagera hano iwacu, atuzanira mutuelle de santé, ati ubu dufite na VUP, GIRINKA bitanga ikizere ku burambe bw’abageze mu za bukuru, yatuzaniye umutekano n’amahoro aturinda urwobo, tukaba dushimira u Rwanda ko ari igihugu kigendera ku mategeko, Imana ibinyujije mu bayobozi bacu beza ikaba yaratugejejeho inkiko gacaca none abanyarwanda tukaba turi umwe mu bumwe n’ubwiyunge ati ibyo byose akaba ari faveur Imana yahaye u Rwanda n’abayobozi barwo. Bwana Lambert Bariho yakomeje akeza Kagame amusabira ku Mana ngo ijye imuhora hafi imutabare, imuhe gusohoza imigambi ye, imuhe ibyo asaba byose, imuhe kumushoboza gutsinda muli iyi mandat y’imyaka 7 n’ibindi….

Mu ijambo rye Kagame we akaba yashimiye ubutumire bwo kuba yifatanije nabo agira ati gushimira Imana gusa sicyo cya mbere ahubwo gushoboza abemera gukora ibyiza. Banyarwanda Kagame se yaba yemera gukora ibyiza ariko ntibimushobokere ? yagakoze ibyiza ntiyari kwitabira kiriya giterane azi neza ko muli iyi minsi arimo guhigisha uruhindu abatavugarumwe nawe bose aho amaze guta mu kagozi abatari bake barimo abayobozi ba FDU-INKINGI dont le 1er vice-président Mr. Boniface Twagirimana n’abafasha be, JMV. Kayumba Umuvugizi w’ishyaka PDP IMANZI ndetse n’umuryango wa Nyakwigendera Assinapol Rwigara atoroheye nabusa. Kagame akaba atekereza ko kurinda cyangwa gusigasira ibyagezweho ari ukumarira ku icumu abatavugarumwe nawe ! birababaje nk’umukuru w’igihugu ! yakomeje yongera gushishikariza urubyiruko kwiga kuyobora ati aliko kuyobora mvuga ntibipfa kwizana birakorerwa bivuga ko kuyobora ari ugukora. Ati gushaka ubumenyi nabyo ni ngombwa aliko ati iyo umaze kubigeraho ugomba no kumenya guhitamo ! ni nkaho yavuze ko hari injiji zize nkuko akunze kubinenga abaminuje, akaba asobanura ko ubuyobozi bubi bwahinduye amateka y’igihugu cyacu aho u Rwanda rwari rwarahinduwe igihugu kitarabwamo mu bihe bya za 1994 kubera ko ya Mana yirirwaga ahandi igataha i Rwanda itari igihari ! ntiyahararaga ! ati aliko ubu yaragarutse isigaye itaha mu Rwanda . Kagame yasoje ijambo rye asaba Leadership gukomeza gukurikiza inshingano zayo ati niho Imana izakomeza kujya itaha mu Rwanda rwacu.

Byanditswe ku wa 10/09/2017, na :
A.BEN NTUYENABO, KIGALI-RWANDA.

Rwanda : nta Ngirente , nta Kagame!

Ni kuri uyu wa 30-31/08/2017 ubwo prezida Kagame yakiraga indahiro z’abakozi be bagize gouvernement shya aho mu ijambo rye yabasabye gukorera hamwe buzuzanya mu milimo mishya barahiriye, ati iyo nta mikoranire bizana igihombo ku gihugu kuko iyo ibintu bitinze gukorwa birushaho guhenda ati kandi mugasabwa kutirara kuko iyo wiraye ibyo wakoze biribagirana.

Paul Kagame akaba yabibukije ko hari akazi gakomeye kabategereje ngo kuko u Rwanda rufite ubudasa ku mikorere, ku bibazo n’ibisubizo byarwo ku buryo bw’umwihariko. Yakomeje kandi yihanangiriza abayobozi badakorera hamwe aho usanga muli Ministère runaka abayobozi bamwe batavugana kandi basangiye ubuyobozi ! ati ese ubwo wavugako ibyo bashinzwe babyuzuza bate ? ati niyo mpamvu mbisubiyemo mu ruhame kandi ko ntagihe tutabivuze ko ubutaha abayobozi bakuru batuzuza inshingano zabo bagiye kujya bavugwa amazina bakanengwa mu ruhame !! nguko rero !

Paul Kagame yakomeje atunga agatoki abayobozi ba za Ministères uburezi n’ubuzima abasaba gukora impinduka zigaragara ati ariko nyuma yuko mudushakira umuti mubanze ubwanyu mwihereho mumire ibinini ! yavuze no ku buhinzi n’ubworozi ko yifuza naho impinduka, akomeza asaba na Ministri w’ibikorwa-remezo kujya bakulikirana ibikorwa byose kuva bitangijwe kugera birangiye, ati naho ubundi ntibyumvikana ukuntu mukoresha umuhanda mu gihe gito ugahinduka inzira y’ibirenge , icyakagombye kuba metero esheshatu, indwi kigahinduka metero eshatu ! niba ubaye utabikulikirana ukora iki ? Naho Ministri w’ubutabera we akaba yasabwe kubirwanya hakurikijwe amategeko ati bigakorwa nkuko yabyongeyeho. Prezida Kagame ati ntabwo abanyereza umutungo w’igihugu babigira akamenyero uko bishakiye kugeza nubwo babyigamba bumva ko hari ibyo igihugu kibagomba kurusha ibyo bakigomba.

Prezida Kagame akaba yakomoje kubo avuga ko babikora nkana banyereza imitungo y’abaturage barangiza bagasa n’ababyigamba ati naho baba barabaye cyangwa barashatse kuba prezida w’igihugu bikabananira ntabwo bibaha ubudahangarwa, akaba nta wundi yavugaga uretse Mme Diane Shima Rwigara nyuma yuko inzego z’umutekano ze zimushyiriyemo amapingu n’umuryango we ngo bari kubakoraho iperereza ry’imisoro ya Leta baba baranyereje ! aliko ntibyaba bitangaje kuko Prezida Kagame ari urugomo yisanganiwe rwo kugereka icyasha kuwo abona utavugarumwe nawe wese byongeye uyu DIANE Shima RWiGARA akaba atarahwemye gushyira ku mugaragaro ihohotera Leta ya FPR ikorera abanyarwanda no kuba yarashatse kumuhangara mu matora y’umukuru w’igihugu ibyo byose rero akaba ari imbogamizi n’impungenge bikomereye Kagame, bityo nkuko yabikoze no ku bandi benshi barimo Mme Victoire Ingabire Umuhoza, Mushayidi, Dr. Niyitegeka n’abandi…, akaba atasinzira akimubona iruhande rwe ariyo mpamvu ashaka uburyo bwihutirwa ubwo aribwo bwose bwo kwikiza Mme Diane Shima Rwigara n’umuryango we muli rusange ! uyu muryango rero akaba ari uwo gutabariza nyabuneka umwicanyi atarawivugana ! Ubu se umuryango wa Nyakwigendera Rwigara Assinapol niba ari ukuri niwo waba urimo imisoro ihanitse wonyine muli iki gihugu ? bihuriyehe se nuko FPR-INKOTANYI ya Kagame yikubiye ubutunzi bwose bw’iki gihugu ntawe uvuga ?

Kagame Paul akomeza avuga ko hashize imyaka myinshi ibyaha nkibyo bikorwa byashyikirizwa inkiko abacamanza bakitana ba mwana, ati hari nubwo twasabye ko hajyaho urukiko rwihariye rwajya rukurikirana ibyaha bya ruswa no kunyereza umutungo aliko umwe mu bacamanza yaritambitse asaba ko ubucamanza bwahabwa ubwisanzure ! nimwiyumvire namwe ! ati niyo mpamvu hakomeje kugaragara abantu babereyemo imyenda za banki batishyura ! ati ese bazakurikiranwa na nde? Mbaza nkubaze!

Naho igisahiranda Me Uwizeyimana Evode, umunyamabanga wa Leta y’agatsiko ushinzwe itegeko nshinga n’andi mategeko muli Ministère y’ubucamanza we avuga ko ibyo byose bizirikanwa bikaba bigiye gusuzumwa neza ahasigaye amategeko akubahirizwa nkuko byasabwe na Prezida Kagame. Nguko !

Byanditswe ku wa 02/09/2017, na:
A.BEN NTUYENABO, KIGALI – RWANDA.

Rwanda : Mandat ya 3 ikomeje kuvugisha Paul Kagame amangambure

Paul Kagame/photo france24.com

Nibyo koko rero abakulikiranira hafi politiki y’u Rwanda barabona ko ibyo Paul Kagame arimo apanga nta kabuza bigiye kuzamupfira ubusa inama ya kigabo akaba ari ukwegura cyangwa akiyahura .

Kubera ibihe bidasanzwe igihugu cyacu kinjiyemo bitewe n’uyu mugabo Kagame nyuma yo gutechnika ingirwamatora biragaragara ko impungenge ari zose we n’abambari be ko bitazabahira mu gihe nta munsi w’ubusa ushira batisobanuye kuri mandat ya 3 nkaho hari uwigeze ayibahatira.

Akaba ari muli urwo rwego kuri uyu 13/08/2017 muli village Urugwiro ubwo uyu Prezida Kagame yagiranaga ibiganiro byihariye n’ikinyamakuru DAILY TELEGRAPH , Umunyamakuru yamubajije icyo atekereza ku bivugwa ko yashatse kugundira ubutegetsi ndetse nicyo yaba apanga kwemeza umuryango mpuzamahanga ko ari gufungura ikibuga cya demokrasi mu gihugu. Paul Kagame yamusubije ko ibyo bitamureba kandi ko atagomba kubaho nk’uko abategetsi b’ibihugu bikomeye Barack Obama, Trump cyangwa abo mu bihugu by’iburayi babayeho.

Muli icyo kiganiro, Prezida Kagame yakomeje yerekana ko ibyo bamusaba ari uburyo bari gukoresha bwo kumugamburuza bati : « Reka dukomeze tumwotse igitutu kugeza aho bizamuremerera ! ». Kuri Prezida Kagame ariko we ati ibyo ntacyo bivuze kuri jye kuko nta buzima nk’ubwabo nkeneye kubaho, yakomeje avuga ko adakeneye kubaho nk’Abongereza, Abanyamerika cyangwa Abafransa, ati ibyo ni imibereho yabo aho batuye niho batuye, nanjye ntuye mu Rwanda nkeneye kubaho nk’umunyarwanda, nk’umunyafrika ! Ati sinkeneye guhinduka uwo ntari we ! Prezida Kagame yunze mu rya Minister Mushikiwabo asa nuwemeza ko abazungu ari abarwayi bo mu mutwe aho yagize ati hashize imyaka 20 yose ibyo banenga u Rwanda ari nako bagenda babisubiramo uko imyaka itashye na nubu bakibivuga ati nkaba ntekereza ko hari ikitagenda kuri bo aho kuba ku Rwanda n’Abanyarwanda.

Prezida Kagame akaba yongeye gushimangira ko ibyavuye mu ngirwamatora yatsinze ari urugero rwiza rw’amahitamo y’Abanyarwanda, ati naho abo banyamahanga mbere ya byose bamenye yuko ntagomba kubaho nkabo, ati ibyo bikaba bisobanuye ko ndi hano kubera ko nubahirije ibyo nasabwe n’Abanyarwanda byongeye baranabyemeje babitorera muli referendum ati rero bahisemo icyo gukora kibabereye , nguko nimwiyumvire namwe !

Ntawakwifuza aka wa mugani ngo « akaje karemerwa! ». Ahubwo nsanga mu gutsimbarara ku butegetsi k’uyu munyagitugu ari ukudashakira igihugu cyacu amahoro bitewe no kuba yarasuzuguye itegeko-nshinga ry’igihugu cyacu arivuyanga uko yishakiye ngaho ngo araha amasomo ya politiki Abanyarwanda yagize imbohe mu gihugu cyabo abandi ishyanga ! Iyo demokrasi y’ubudasa yazaniye Abanyarwanda yakweruye akavuga ko ari ubwoko bwa kane bw’Abanyarwanda ! Abatwa, Abatutsi , Abahutu hiyongereyeho n’agatsiko ka FPR aho kugira ngo akomeze kurindagiza Abanyarwanda !

Byanditswe ku wa 14/08/2017, na :
A.BEN NTUYENABO, KIGALI-RWANDA.

Rwanda: nyuma y’amatora, Dr. Frank Habineza na Philippe Mpayimana bararirira mu myotsi

Mu gihe UE yagaragaje amanyanga ya Komisiyo y’igihugu y’amatora mu Rwanda (NEC) mu guheza bamwe mu bashakaga kwiyamamariza umwanya w’umukuru w’igihugu n’andi matati menshi yaranzwe nayo; abaciriwe isiri na RPF-INKOTANYI bakemererwa na NEC aribo Dr. FRANK HABINEZA na Mr. PHILIPPE MPAYIMANA bagaragaje ko bishimiye uko igikorwa cy’ingirwamatora cyateguwe na Leta y’agatsiko, aliko kandi ukaba wakwibaza impamvu aba bakandida bongeraho ko babangamiwe cyane n’inzego z’ibanze z’ubutegetsi bwa RPF-INKOTANYI aho Dr. Frank Habineza we amaze gutangarizwa amajwi y’agateganyo yabaye nkunyagiwe n’imvura ku buryo yari yiheje no kuba yagira icyo atangariza abanyamakuru muli ako kanya avuga ko ananiwe !

Aliko amaze gusanga ko bishobora kumuviramo inkurikizi, ni kuri uyu wa 6/08 yisubiyeho ikiniga kimaze gushira abwira itangazamakuru ko amajwi aherutse kubona mu matora ya Prezida ari intsinzi ikomeye nk’ishyaka ryahanganaga n’andi icyenda yose yakoze coalition yiyomeka ku mukandida wa RPF-INKOTANYI Kagame Paul ! yakomeje avuga ko amajwi o.47% babonye bayemera aliko ko batabyishimiye nkuko bari babitekereje ! ati aho twiyamamarije hose abanyarwanda bakunze ibitekerezo byacu ari nako bifuza impinduka mu gihugu cyacu ati kandi abenshi bari babitwijeje.

Dr. FRANK Habineza udashobora kwerura ngo avuge ashize amanga yakomeje atangaza ko hari aho bagiye kwiyamamaza mu ntara y’iburasirazuba bakamuhitiramo mu irimbi hatari hateganijwe ! Dr. Frank yagerageje guca amarenga yerekana ko ishyaka rye ryabangamiwe bikomeye n’abayobozi b’inzego z’ibanze guhera mu Karere ka Rusizi, Nyamasheke, Nyagatare n’ahandi… ati bamwe badutera amabuye abandi batwitambika mu mayira abandi nabo batwohereza mu marimbi nkuko nabivuze haruguru .

Dr. Frank yakomeje avuga ko no kumunsi w’itora nyirizina ari ko byabagendekeye aho indorerezi 500 bari bohereje ahantu hatandukanye zangiwe kwinjira mu byumba by’itora izindi zigakumirwa kwinjira ahabarurirwaga amajwi ati niyo mpamvu nk’ishyaka rya politiki tutakwirirwa tuvuga ko hari icyatubayeho kandi nta kimenyetso dufite ! ati ni ukuvuga ko ibyavuye mu matora byose tubyakira uko bimeze ! ati kubona tutabonye na 1% n’ukuntu twamaze imyaka 4 yose dutegura aya matora ari nako tuhatakariza imitungo yacu !birababaje!

Banyarwanda banyarwandakazi niba atari ukwirengagiza se tuvuge ko Dr. Frank yajyanywe mu kibuga na RPF atazi ikinyoma akina nacyo icyo aricyo ? niyihangane ! urwishigishiye ararusoma ! kuko n’ubutaha avuga kwinjira mu matora y’inteko ishinga amategeko niko bizamugendekera , nkaba namugira inama yo kwirinda gukomeza kugendera mu kigare cya RPF kuko igeze aharindimuka.

Byongeye kandi akaba ari no kuri uyu wa 08/08/2017 aho uyu mukandida usa nuwihebye amaze gutangariza ikinyamakuru Umuseke cyandikira hano mu Rwanda ko bitewe no gutsindwa kuri iyi ngirwamatora ya Prezida wa republika y’u Rwanda yumva ashobora no guhita yegura ku mwanya w’ubuyobozi bw’ishyaka Green Party ! muriyumvira namwe ! umunyarwanda yise umwana we ngo ‘’BAJYAGAHE …

Naho Ku majwi 0.73, umukandida Philippe Mpayimana we ugira icyo apfana n’abamenyerewe nk’abikorezi b’ibibindi byagaragaye ko bitamubabaje na busa ko yaba yarinjijwe mu gikorwa azi impamvu n’uburyo kizarangira ariyo mpamvu yatangaje ko yishimiye uko ingirwamatora yagenze akaba anashimira Paul Kagama n’ishyaka RPF kuba batsinze amatora by’umwihariko ! Mpayimana akomeza avuga ko nubwo atabashije gutsinda amatora aliko ko aramutse ahawe umwanya muli gouvernement shya ntakabuza yawemera ati ikingenzi upfa kuba ari umwanya abaturage bankeneyemo ati kandi nanone bikaba bishingiye ku bushake n’ubwitonzi nagaragaje muli aya matora ! nguko nguko!

Banyarwanda banyarwandakazi, nimwiyumvire namwe ! ngiyo demokrasi abambari ba FPR-KAGAME bifuriza abanyarwanda bose . Tubiteze amaso !

Byanditswe ku ya 08/08/2017, na:
A.BEN NTUYENABO, KIGALI-RWANDA.

Rwanda :ukwishongora kwa ministri Louise Mushikiwabo kwamutesheje agaciro.

Ni kuri uyu wa 28/07/2017, Ministri Louise Mushikiwabo w’ububanyi n’amahanga abinyujije ku rukuta rwe rwa twitter yatambukije ubutumwa bwuzuye agasuzuguro n’ubwishongozi kubera inyandiko yasohowe na Mr. KLASS Brian muli ‘’ The Washington post’’, iyo nyandiko ikaba inenga ingirwamatora yo mu Rwanda no mu bihugu bimwe na bimwe by’afrika aho abayobozi b’ibyo bihugu bagerageje guhindura itegeko-nshinga ry’ibihugu byabo kugirango bagundire ubutegetsi.

Uyu Mr. KLASS Brian akaba yarakomeje atera mu rya Semuhanuka Paul Kagame yemeza ko ingirwamatora yo mu Rwanda yarangiye aho hahinduwe itegeko-nshinga kugira ngo Kagame akomeze kuyobora u Rwanda; ati ibyo bikaba bituma akomeza kubangamira bikabije abatavugarumwe nawe.

Ministri Mushikiwabo rero akabiheraho avuga ko arambiwe cyaneeeeee… ….utuzungu n’utundi duke tutari utuzungu… ( nkuko abyivugira) tumaze iminsi twandika amateshwa kuri Africa by’umwihariko k’u Rwanda ! ati ni nde wabashinze afrika? Aha umuntu akaba yakwibaza impamvu Louise Mushikiwabo yiha gusubiriza Afrika muli rusange !uwamushinze gusubiriza Afrika we se ninde ? yego ntibitangaje kuko umweru uturutse ibukuru ukwira hose !

Aliko jye ngasanga kwaba ari ukwibeshya no kurindagiza abanyarwanda kuko Ministri Mushikiwabo asa nushaka kumvikanisha ko ibibazo by’u Rwanda byaba bihuriweho na Afrika yose muli rusange bityo abadukamira aribo bazungu kimwe na Shebuja Prezida Kagame bakatwumvisha ko ba Rutuku ari abagome kuva na kera mu bihe by’abakoloni kandi wareba ugasanga uretse muri iki gihe cy’ingirwamatora bahugiyemo nta cyumweru na kimwe cyashiraga ari Semuhanuka uwo tuvuga cyangwa Louise Mushikiwabo badafashe Rutemikirere berekeza iyo Amerika, europe, asie n’ahandi……….ese baba bagiye mu masengesho cyangwa baba bagiye gucinya inkoro imbere ya twa tuzungu ngo hadakomwa retenderi ! bagaruka ngo twa tuzungu n’utundi duke tutari utuzungu ni nde wadushinze afrika ? birababaje !

Banyarwanda banyarwandakazi rero niboye gukomeza kutubeshyeshya ingirwapolitiki yo kwigira irimo kuganisha abaturage mu Rwabayanga ahubwo bafungure ibiganiro bitazimije kubatavugarumwe nabo bose, by’umwihariko wowe Louise Mushikiwabo nakugira inama yo gusaza utanduranije ngo uriho urakeza Shobuja w’umuhemu Paul Kagame aho asigaye arembaremba hejuru y’amazi! Sigaho rero kuko iyo siyo demokrasi abanyarwanda twifuza. Mugire amahoro.

Byanditswe ku wa 29/07/2017, na :
A.BEN NTUYENABO, KIGALI-RWANDA.

Rwanda: Abaturage bararira ayo kwarika kubera imisanzu bakwa na FPR muri ibi bihe bya campain.

Kubera ikimwaro n’isoni byateye Leta y’agatsiko ka FPR kandi yari yarijeje abanyarwanda ko gahunda zose zijyanye n’amatora y’umukuru w’igihugu zarangije gutunganywa none abenshi mu bayobozi b’inzego zibanze bakaba baraboneyeho icyuho cyo gusakabaka abaturage utwabo bitwaje ngo barashaka inkunga yo gushyigikira umukandida wa RPF-INKOTANYI Paul Kagame; ni muli urwo rwego Bwana Francis Kaboneka Ministri w’ubutegetsi bw’igihugu mu kiganiro yagiranye na ba gouverneurs b’intara, uturere n’umujyi wa Kigali yavuze ko abayobozi bose batse amafranga abaturage bababeshya ko ari ayo gutera inkunga amatora y’umukandida wa RPF ku mwanya w’umukuru w’igihugu bagiye kubibazwa.

Banyarwanda banyarwandakazi, ubu se tuvuge yuko Ministri Kaboneka uretse kwirengagiza hari umunyarwanda numwe uyobewe ko ayo mabwiriza yo kwaka imisanzu yacuriwe muli cabinet yiwe n’abandi bafatanije barimo NEC(Commission y’igihugu y’amatora) ! none abonye abaturage bavugije induru ati abayobozi babigizemo uruhare ni bakurikiranywe ! ubonye iyo avuga ati mwamennye ibanga mwishyira ku karubanda ! gusa nyiri umutwe munini ntarengwa n’imijugujugu !

Banyarwanda banyarwandakazi, uku kunyunyuza imitsi ya benengofero batagira kivugira ni imwe mu ngeso zadukanywe na Leta y’agatsiko ka FPR kuva kafata ubutegetsi hashize imyaka 23 ! ku buryo abanyarwanda ni kwa kundi kwabo bapfira muli Nyagasani bagatangira guhwihwisa ibibazo byageze iwa Ndabaga ! ariyo mpamvu kuva kera na kare bemye bazi kwikiriza neza intero y’abayobozi. Ubu se iyo uyu mwambari Kaboneka atabikomozaho ko nta numwe wari waratatse n’igihe twabivugiye ? ahubwo ko wasangaga inyikirizo ari ya yindi ngo ‘’niwe…..niwe….niwe….’’! ahaaaa… ni ukuvuga ko bari bukomeze kubishegesherezwa mu mitima yabo aribyo akenshi igihugu cyacu cyakunze kuzira uretse nubundi ko ari hahandi !! aliko abaturage babika umubabaro mu mitima bagashinjagira bashira nyuma babona umwanya ibibarimo bigaturika nk’igisasu.

Banyarwanda banyarwandakazi, ubu se Ministri Kaboneka arabikoraho iki ko kugeza kuri uyu munota nandika bikomeje gukorwa aho abambari b’agatsiko babyukana uturumbeti buri gitondo bahamagalira abaturage kugera bwangu aho za Bus ziba zitegereje kujya kwamamaza umukandida wa RPF kandi ubwo baba baraye banyuze mu ngo zose baka iyo misanzu ku buryo mu karere ka Gasabo abaturage batagihumeka.

Bamwe mu baturage bashoboye kutugezaho ubuhamya bwabo bibaza impamvu bakwa amafranga buri kwezi y’umuryango wa RPF bakongeraho nayo gushyigikira umukandida wa RPF ntibabone nibura naga T-SHIRT ka 5000frw mu gihe cya campain ! bakomeje bansaba gutambutsa ubu butumwa basaba RPF kudakomeza kubiba umunabi mu banyarwanda, nguko nguko.

Si ibyo gusa kuko nakomeje kubona n’ubundi butumwa buturutse impande zose; hari NDIMUBANDI Emmanuel wo mu Karere ka Gatsibo uhamya ko buri rugo bagiye barwaka ibihumbi bibili byo gushyigikira RPF-INKOTANYI.

NYIRANDIKUMANA Thérésie ukora mu bitaro bya Murunda akarere ka Rutsiro nawe yantangarije ko we n’abandi bakozi bose bo mu bigo by’ubuvuzi bagiye bacibwa ibihumbi 30.000frw abandi 20.000frw abandi 10.000frw kuri buri wese ati aliko icyadushegeshe kikadutera n’urujijo ni ukuntu nyuma yuko Ministri Kaboneka avuze ko gucibwa amafranga yo gushyigikira umukandida wa RPF bitemewe aribwo twazindukiye mu nama ku bitaro bya Murunda iyobowe na Dr. NIRINGIYIMANA Eugène (Médecin directeur w’akarere k’ubuvuzi) atumenyesha ko yatumwe n’abayobozi bakuru ba RPF ko twatanze amafranga makeya ko ahubwo dusabwa byihutirwa gutanga andi 1/3 cy’umushahara duhembwa ! ibyo byose twarabyubahirije kuko ntawe uburana n’umuhamba ! ati ayo mafranga yose yashyizwe kuri compte ya BPR/AMATORA /RPF-RUTSIRO № 515421727110168. Uwo mubyeyi yakomeje agira ati mudufashe rwose umuryango wa RPF udusize iheruheru twitwa ngo turakora, amadeni aratwishe nta handi twakura !

Abandi ni abarimu bo mu Karere ka Ngororero barangije mu itorero ry’igihugu riyobowe na wa mumotsi Rucagu Boniface , ibyabo bikaba bisa n’ikinamico! Bavuga ko bakimara gusinyishwa ibyo barangije gukora bavuye mu itorero buri mwarimu wese avanwaho 1/30 cy’umushahara kuzageza igihe kitazwi guhera mu kwezi kwa 1/2017, bati none no guhera mu kwa 3/2017 abayobozi b’ibigo bazana listes tugasinyira andi 1/30 nanone yo bakaba bayakira mu ntoki batubwira ko ari umusanzu wo gushyigikira amatora y’umukuru w’igihugu; abo barimu bakaba batakambira Bwana Kagame ngo nagerayo azibuke mwarimu ! bati bayobozi ko namwe mugeze aho mugeze kubera kunyura imbere ya mwarimu, kubera iki mworoherwa aho kwibuka mwarimu ahubwo mukamwambura nutwo afite ? twasaba ko muduhemba muti abarimu muri benshi !!! ubu koko tuzabigenze dute ?

Ahandi twashoboye kugera naho ni mu Murenge wa Cyumba i Gatuna ku mupaka uduhuza na Ouganda aho chairman wa RPF yaka buri muntu ibihumbi 20.000frw akongeraho ko utazayatanza azahura n’ingaruka nyuma ! nguko nguko kimwe n’i Rutare ho mu Karere ka Gicumbi bakurikiza ibyiciro by’ubudehe aliko bo bagasanga ngo ari igisebo ku muryango wa RPF! bati mudukize ba rusahuliramunduru naho ubundi turashize!

Banyarwanda banyarwandakazi rero ntawarondora akababaro k’abaturage ngo akamareyo aliko mpamya ko iyi ari isura y’akababaro n’intimba byuzuye imitima y’abanyarwanda! umuntu akaba yakwibaza ati amaherezo azaba ayahe kandi uwo utakira ariwe ugusahura ? aliko haba kwihangana kuko nta gahora gahanze .

Mugire amahoro y’Imana.

Byanditswe ku wa 24/07/2017, na:
A.BEN NTUYENABO, KIGALI-RWANDA.

Rwanda : Ibihe by’impinduka biraca amarenga

Buri munyarwanda wese umaze iminsi akurikirana igikorwa cyo kwiyamamariza umwanya w’umukuru w’igihugu cyacu abona ko ishyamba atari ryeru muli politiki y’u Rwanda aho bigaragara ko abakandida dufite uretse no kuba ari ba baringa nta na programme politique ihamye bagaragariza abanyarwanda mu ikinamico rya mandat ya 3 y’imyaka 7 iri imbere; ugasanga Semuhanuka ariwe Prezida Kagame yakuye mu gusaza imigeri ategekera mu kwaha kwe amashyaka n’abakandida bigenga kuzamushyigikira mu matora yo muli Kanama bamwamamaza cyangwa biyamamariza hamwe.

Ni muli urwo rwego nkurikije amakuru nahawe n’umuntu bya hafi wa Ministri w’ubutegetsi bw’igihugu Bwana Kaboneka Francis akanansaba kudatangaza amazina kubera umutekano we yampamirije ko yamuhishuriye ko mbere gato yuko processus yo kwemeza abakandida ku mwanya w’umukuru w’igihugu mu mitwe ya politiki Prezida Kagame ubwe yagiye ahamagara abayobozi b’imitwe ya politiki mu Rwanda buri wese umwe umwe amutegeka uburyo ishyaka ayobora rigomba kuzamushyigikira mu matora, akaba ari nako byagendekeye PSD na PL aho abakuru b’ayo mashyaka M.Biruta Vincent wa Psd na Hon. Présidente wa assemblée akaba na Prezida wa PL, Mukabarisa Donatille bafashe iya mbere mu kubimbulira indi mitwe ya politiki.

Uyu mutangabuhamya yakomeje ambwira ko ari nako byagenze ku ishyaka PS Imberakuri igice kiyomoye kuri Me Ntaganda Bernard kiyobowe na Mme Mukabunani Christine, uyu we ngo Prezida Kagame mu gihe aherutse mu ruzinduko mu gihugu cy’ububirigi akaba yaramwihamagariye kuli phone amutegeka gukoresha congrès y’ishyaka rye igitaraganya ayumvisha ko itagomba kugira umukandida itanga mu matora y’umukuru w’igihugu kandi ko bakomeza guhagarara kuri position yo kuba bitwa nk’ishyaka rya opposition mu gihugu.

Mukabunani Christine bikaba ngo byaramuteye impungenge aliko kandi akikirigita kubona ahamagarwa n’umukuru w’igihugu mu bihe nka biriya! ngo yahise ajya kugisha inama Ministri w’ubutegetsi bw’igihugu Francis Kaboneka asanga nawe inkuru yamugezeho kare ahubwo amusubiza ko akwiye guhita atumiza congrès agaconvainca abayoboke b’ishyaka rye mu rwego rwo kubahiriza ibyifuzo bya Nyakubahwa Prezida Kagame. Nibwo nyuma yaho Christine yatumije congrès y’ishyaka rye 67% batorera kutazatanga candidature mu matora y’umukuru w’igihugu bityo itechnika rye na Shebuja Kagame riba riciyemo.

Prezida Kagame rero muri rusange akaba agenda ashimira by’umwihariko abayobozi b’imitwe ya politiki ikorera mu Rwanda kuko bemeye kumushyigikira no kumugaragira muli uru rugendo rwo kwiyamamaza hirya no hino mu gihugu, yongeraho ko anategetse kujya bahabwa ijambo aho agiye kwiyamamariza hose.

Abamaze guhabwa ijambo hakaba harimo Hon. Mukabarisa Donatille Prezida w’umutwe w’abadepite akaba na Prezida w’ishyaka PL, akaba aherutse gutangariza abaturage ba Bugesera ko Prezida Kagame yabavanye mu rwobo by’umwihariko abanyabugesera, ati Kagame uretse kuba yararokoye igihugu ni n’umuntu udasanzwe ariyo mpamvu nta wundi ukwiye kuyobora u Rwanda! nimwiyumvire namwe !

Undi mwikorezi w’ibibindi uhora mu mahomvu ni Shehi Mussa Fazili Harelimana , akaba na Prezida wa PDI nawe mu inama yo kwamamaza Kagame aherutse gutangariza abaturage ba Nyarugenge na Nyamirambo ko batahwemye kwita umukandida wa RPF Prezida Kagame ‘’BABA WA TAIFA ‘’ kubera ibikorwa bye by’indashyikirwa birimo imihanda, amashanyarazi, amazi n’ibindi yabagejejeho …….akongeraho ko Kagame ariwe wakuye abayisilamu ku nkeke z’ubutegetsi bubi…..ati Baba wa Taifa Kagame oye…oye… nimunyumvire rwose ! inkomamashyi ziragwira ! nyamara uwareba ivumbi rigiye kumara abaturiye aho avuga Nyamirambo kubera amanegeka n’uduhanda tubi! Amazi yo bahebeye urwaje ! ku buryo umuntu atakifuza kuhatura ! none abayisilamu nibo bahamerewe neza ! ikindi uyu muswa yirengagiza ni uko ashaka guhamya ko kariya Karere kaba gatuwe n’abayisilamu gusa avugira ! birababaje !

Undi mumotsi ni Ministri Dr. Biruta Vincent akaba na Prezida w’umutwe wa poilitiki PSD umaze kwigera Ministères zitari nkeya muli gouvernement wongeyeho Sénat aliko akaba atanyurwa, uyu mu Ministri rero ageze aho asenya ishyaka ry’abanyabutare b’umwimerere aryegulira amabandi-rusahuzi ngo arashyigikira Semuhanuka wamugabiye, nawe nk’abandi bose yavugiye ijambo i Rulindo kuri uyu wa 20/07/2017 ahateraniye abambari ba RPF dore ko abenshi baba baturutse i Kigali ukaba wagirango biyamamarije mu Karere gafite abaturage hafi icya kabili cy’intara kandi ari ikinamico! yagize ati abavuga ko ishyaka PSD mbereye umuyobozi ryabaye ikigwari ryiyomeka ku mukandida wa RPF Bwana Kagame ati ni uko batazi umubano PSD isanzwe ifitanye na RPF uhereye mu myaka 15-20ans byongeye bakaba bataniyumvisha uburyo ishyaka PSD ryafatanije na RPF mu kubohora igihugu no kwongera kucyubaka ! nimwiyumvire namwe biteye agahinda!

Banyarwanda banyarwandakazi, jye nsanga ibi byo muli PSD bisa naya mahano yakorewe Me Ntaganda Bernard wagambaniwe akamburwa ishyaka yishingiye ndetse akanabizira none Dr. Biruta nawe ati PSD nyobora twifatanije na RPF uzabirengaho si uwacu!

Banyarwanda banyarwandakazi, iyo ugereranije ingirwamashyaka akorera mu gihugu cyacu muli iki gihe ntawashidikanya ko yaba yarutwa n’ishyaka rimwe rukumbi MRND ryahozeho mbere ya jenoside kuko aho aganisha abanyarwanda ntawe uzarokoka.

Mugire Amahoro.

Byanditswe ku wa 21/07/2017, na:
A.BEN NTUYENABO, KIGALI-RWANDA.

Amakuru ki ?

Amakuru