Archives par étiquette : Nyagatare

Mu Bubiligi bizihije imyaka 75 Musenyeri Servilien Nzakamwita amaze avutse

rubwejanga

Kuwa gatandatu taliki 3/11/2018 muri kiliziya iherereye Gijzegem mu gice kivuga igifurama habereye misa yo kwizihiza imyaka 75 Musenyeri Servilien Nzakamwita amaze avutse.

Iyo misa yari yateguwe n’abandimwe ba Musenyeri Nzakamwita batuye mu Bubiligi bafatanije n’inshuti n’abavandimwe.

Missa yasomwe na Musenyeri Nzakamwita ubwe akikijwe na Musenyeri Frédéric Rubwejanga uri mu kiruhuko cy’izabukuru akaba aba muri abbaye ya Scourmont mu Bubiligi na Musenyeri Vénuste Linguyeneza uba Waterloo naho ni mu Bubiligi. Hari n’abapadiri batandatu harimo abavuye mu Budage.

Musenyeri Linguyeneza niwe wavuze ubuzima n’imibereho ya Musenyeri Nzakamwita. Yavuze ko yamusanze mw’iseminari nkuru ya Nyakibanda amukuriye. Yashumangiye ko ari umugabo w’ukuri, utica umugambi ngo akaba yubahiriza isaha cyane. Ibyo byagaragaye aho yabaye hose.

Mw’ijambo rye Musenyeri Nzakamwita yavuze ko ashimira imana kuba yaramuhaye imbaraga zo gusohoza inshingano ze mu myaka 47 amaze mu busasardoti. Yavuze ko ananiwe akaba yarandikiye Papa ko yamuha uruhushya rwo kujya mu kiruhuko agashaka undi umusimbura.

Musenyeri Rubwejanga nawe yashimye Nzakamwita uburyo yitangiye imirimo imana yamushinze avuga ko baziranye cyane kuko ari we wamusezeranije aba Musenyeri.

Missa yari yitabiriwe n’abakristu baturutse imihanda yose : abakomoka muri paruwasi ya Rushaki aho Musenyeri avuka, abo muri

paruwasi ya Janja aho Mgr Nzakamwita yabaye imyaka 12, avuye mu Ruhengeri aho yari amaze imyaka 5, abize mw’iseminari nto yo ku Rwesero nayo yategetse imyaka myinshi, abize mw’iseminari nkuru ya Rutongo aho yigishije, abo muri diyosezi ya Byumba abereye umushumba imyaka 22 n’abandi bakristu benshi.

Twibutse ko Musenyeri Nzakamwita yavukiye muri Komini Kiyombe ya kera, Perefegitura ya Byumba ubu iri mu karere ka Nyagatare, tariki 20 Mata 1943.

Yize amashuri abanza kuva muri 1952 kugeza 1957, akomereza mw’iseminari nto ya Rwesero yinjira mw’iseminari nkuru ya Nyakibanda mu mwaka wa 1965, ahabwa ubupadiri tariki 11 nyakanga 1971.

Yabaye muri paruwasi zitandukanye : Ruhengeri (imyaka 5), Janja (imyaka 12). Muri 1989 yagiye kwiga mu Bubiligi muri Lumen Vitae agaruka mu 1991 ajya kwigisha mw’iseminari nkuru ya Rutongo. Yahawe ubwepiskopi tariki 25 werurwe 1996, aba umushumba wa Diyosezi ya Byumba kugeza ubu.

Gaspard Musabyimana

Mu Rwanda akarengane k’abahinzi : baratemerwa amasaka ateze bakamburwa amasambu ngo abe urwuri rw’inka

Aha ni mu ntara y’iburasirazuba mu karere ka Kirehe mu kagali ka Rubirizi.

Nkuko muri bubyumve muri iyi audio, mu Rwanda hari icyorezo cyo gutema amasaka ateze andi akaragirwa inka bitwaje ngo ni mu mafamu (farm) agenewe aborozi.

Nkuko mwagiye mu bibona mu nkuru zabanje, ikibazo giteye gutya: mu Rwanda aborozi bahawe amafamu( inzuri z’inka) ndetse banahabwa n’ibyangombwa byayo ni ukuvuga ko mu rwego rw’amategeko bari bayafiteho uburenganzira nk’ayabo. Ubwo butaka bwanganaga na hegitari 25 kuzamura kuri buri mworozi. Noneho kubera ubukungu bwifashe nabi mu Rwanda, abo borozi nabo bagenda bagurishaho buhoro buhoro abahinzi bakeneye kwihingira, aha buri muhinzi waguze n’umworozi nawe yagendaga yandikisha ubutaka aguze agahabwa icyangombwa cyabwo mu buryo bwemewe n’amategeko kandi ibi byakorwaga n’inzego bwite za Leta.

Amakuru twahawe n’umuntu uri hafi y’ingoma , yatubwiye ko mu minsi ishize prezida Kagame yakoranye inama n’aborozi (imwe mu manama y’ibanga bagira) noneho ababaza ibibazo bikurikira:

1. Amafamu mwahawe muracyayafite yose? Aborozi bati yego.
2. Ese muyabyaza umusaruro? Bati yego.

Kubera ko yari afite raporo, ati twabahaye amafamu ngo abahutu mubahake babakorere, none ndabona ahubwo arimwe mugiye guhinduka abagaragu babo, nuko ati nubwo muvuga ko bariya bantu nta bwenge bagira ahubwo babarusha ubwenge cyane, kuko baciye bugufi bakoresha amaboko yabo none bageze naho bigarurira n’amafamu y’aborozi, ati iki kibazo ndashaka ko gikemuka vuba cyane.

Niyo mpamvu mu ntara y’iburasirazuba mu turere twa Nyagatare, Gatsibo, Kayonza na Kirehe ibintu byacitse , nizo mbaraga z’umurengera mubona muri ibi bintu, amarira ni yose amaganya ni yose nkuko muri bubyumve muri iyi audio.

Aba baturage hafi ya bose bamazemo imyaka irenga 10 bafitemo amazu imirima, intoki, n’indi myaka, ubu byose byataye agaciro nk’amazu barimo kuyasenya ntakundi baraza bakakwaka icyangombwa cyawe cy’ubutaka noneho bakagusubiza udufaranga twintica ntikize urugero nk’umuntu waguze mu myaka 5 ishize hegitari yaguraga amafaranga 800000 rf none ubu irimo kugura million 4 (4000000 rf), ubwo arasubizwa 800000 rf. adashobora kugira icyo amumarira, imanza zirimo aha kandi ni agatereranzamba kuko hari nkuwaguraga n’umworozi nawe akagurishaho abandi bahinzi, ubwo we arasabwa kubasubiza agurishije imitungo ye niba ayifite, mbese ni amarira masa. Iki gikorwa aborozi bo barakishimiye cyane kuko batanze ubutaka bugura make cyane none babugaruriwe bugura menshi. Ariko aha naho harimo ubusambo bukabije kuko umworozi utabashije gusubiza abo yagurishije leta izana undi muntu utamenya aho aturutse akishyura bwa butaka bukaba bubaye ubwe.

Tubibutse ko mu Rwanda nubwo hari abantu bake bitwa ko ari aborozi batunze ubutaka hafi ya bwose bw’u Rwanda, kuko umwe aba afite hegitari 25 kuzamura, hari umubare munini w’abanyarwanda batagira naho bashinga akazu gato k’amabati 5 hitwa ahabo. Nibura 80% by’ubutaka bw’u Rwanda butunzwe n’abantu bita ko ari aborozi batanageze no ku 10%. Birababaje noneho naho umuntu abiriye ibyuya bahamwake ku ngufu.

Ngayo nguko iby’iwacu.

Jean-Michel Manirafasha

Rwanda : Ikibazo cy’amazi ni ingorabahizi

Hirya no hino mu Rwanda ikibazo cy’amazi gikomeje kuba ingorabahizi bitewe n’impamvu nyinshi zinyuranye zirimo kuba ari uko Leta y’agatsiko ikomeje mu gushaka kwikubira inyungu mu gutuza abaturage mu midugudu iherereye ahanini mu mpinga z’imisozi ngo iriho irarondereza ubutaka bwo guhingamo kandi izi neza ko nta gikorwa –remezo namba nk’amazi, umuliro, ivuliro, amashuri y’abana n’ibindi…… irageza aho yimuriye abaturage yewe abenshi bataranahabwa n’ingurane z’ubutaka bwabo bimuwemo ariyo impamvu muzanasanga ko abayobozi benshi bayobora bene utwo turere bavugisha indimi ebyili ngo bariho baratechnika abaturage ahubwo bikagaragara ko barimo bavuguruzanya ubwabo kubera kubura ukuri basobanulira abaturage byongeye bakaba batavuga nabi Leta yabo y’agatsiko bahagaraliye.

Ni muli urwo rwego nyuma yuko batuzwa mu mudugudu, abaturage batuye mu Kagari ka Cyumba, Umurenge wa Muganza, Akarere ka Gisagara ho mu ntara y’iburengerazuba amaso yaheze mu kirere bategereje amazi bemerewe na Leta hashize imyaka irenga itatu nta n’igitonyanga ariyo mpamvu bahisemo kugana iy’ibishanga kuko nta kundi babigenza.

Abo baturage kuva batuzwa muli uwo mudugudu bakora urugendo rugera ku bilometero bine buri munsi bagiye gushaka amazi mu bishanga bibegereye.

Nzakamwita Pawulini, umwe mu baturage bimuwe mu masambu ye agatuzwa mu mudugudu avuga ko abana babo bibasaba kuzinduka saa kumi z’igicuku bajya gushaka amazi y’ibishanga kugirango babone uko bajya ku ishuri nabwo kandi bagakora urundi rugendo rutaboroheye bikanabaviramo akenshi gukererwa amasomo! Akomeza avuga ko nk’ababyeyi babo bana ntacyo bakora kuko ntahandi babona amazi ahubwo ko batewe impungenge n’indwara ziterwa no gukoresha ayo mazi mabi kubera umwanda, ati abana bacu bazakomeza guhura n’ingaruka zirimo kugwingira n’ibindi…..

Umuyobozi w’akarere ka Gisagara wungirije ushinzwe ubukungu n’iterambere, Bwana Hanganimana J.Paul, kuri telephone ngendanwa yadutangarijeko impamvu abo baturage batinze kugezwaho amazi nkuko bari babisezeranijwe ari uko batujwe mu mpinga z’imisozi kandi kugezayo amazi bitoroshye! ati bityo bagomba kwihangana kugeza ubwo hazaboneka uburyo bushoboka. Noneho mu kuvuguruzanya kw’aba bayobozi aribyo navugaga ntangira kwandika iyi nkuru ni uko umuyobozi w’akarere wungirije ushinzwe imibereho myiza y’abaturage yivugira ko ikibazo cyatewe nuko nta ngengo y’imari yigeze iteganywa mu kugeza amazi kuri ako gasozi!

Banyarwanda banyarwandakazi, nimwiyumvire namwe ukuntu abaturage bagowe! kubashushubikana ubimulira mu midugudu kandi ubona neza ko ubuzima bwabo bushobora kubacika ubabeshya ngo ni uburyo bwiza bwo kubagezaho ibikorwa-remezo mu gihe nta na kimwe uhateganyiriza bya vuba! biteye agahinda pe! nka Leta yirirwa ikwiza ikinyoma mu mahanga ngo yazaniye u Rwanda iterambere !

Banyarwanda banyarwandakazi, iterambere ryiyambitse uruhu rw’intama ninde urikeneye? aahaaa……Mugire amahoro !

Byanditswe kuwa 12/03/2017, na :
A.BEN NTUYENABO, KIGALI-RWANDA.

Rwanda: Prezida Kagame yapfunyikiye amazi abaturage b’akarere ka Nyagatare

photo Izuba rirashe.rw

Ni kuri uyu wa mbere taliki ya 13/02/2017 ubwo prezida Kagame yasuraga abaturage barimo n’abayobozi batandukanye mu karere ka Nyagatare, intara y’iburasirazuba, aho prezida Kagame yakirijwe ibibazo by’uruhuri byazonze abaturage kubera ubuyobozi bubi yabahaye. Mu nduru z’abaturage bitotomberaga abayobozi babo kuba batarashoboye gukemura ibibazo byabo bivugira ko wari umunsi wo kugeza kuli prezida Kagame ibibazo byabo imbonankubone akarengane bagiriwe aliko siko byabagendekeye!

Ubwo yaramaze kubagezaho ijambo rye ahanini ryabaye nk’indirimbo ’’umutekano, umutekano ku ngufu’’ abo baturage bifuzaga kubaza umwe ku giti cye batiriwe babanza kujonjorwa n’izo ngirwa-bayobozi babo bityo ntibyabakundira kuko uwo bashakaga imbonankubone bimunyuzeho ntawundi yari prezida Kagame, nubwo yashyizeho itsinda rigizwe na Ministri Kaboneka n’abandi kubanza kuyungurura ibibazo by’abo baturage aliko nabwo ntibanyuzwe.

Tubibutse ko ubwo Prezida Kagame yaherukaga gusura aka Karere ka Nyagatare hari ku wa 13/11/2014 aho yari yasezeranije aba baturage ibikorwa byinshi birimo centre de santé ya GATUNDA yagombaga guhindurwamo ibitaro, gukwirakwiza amazi mu Mirenge ya Musheri, Rwimiyaga, Karangazi, Rwempasha, Matimba, hari kandi kubaka stade ya football n’uruganda rw’ibiryo by’amatungo, ibyo byose hamwe n’ibindi tutarondoye bikaba byaragiye nka nyomberi, abaturage amaso yaraheze mu kirere! Nta kizere gihari niba hari n’ibiteganywa gutangizwa nibura! cyangwa ngo ibyashoboye gutangizwa byuzuzwe abaturage bo guheranwa n’ikizere kiraza amasinde!Banyarwanda banyarwandakazi, aba baturage ba Nyagatare usanga ahanini bugarijwe n’ibibazo by’amasambu yabo yanyazwe n’abambari ba Fpr imaze kwigarulira u Rwanda, abenshi bakaba barabanje guhunga intambara ya 1994 berekeza Ouganda bakaza guhindukira nyuma aribwo basangaga amasambu yabo yaratujwemo n’impunzi za 1959 bityo imanza zikabura gicibwa kugeza na nubu.

Ni muli urwo rwego muli uwo mubonano n’abaturage hari umukecuru witwa Musabyimana utuye mu Murenge wa Matimba aliko akaba ntaho afite ahengeka umusaya kubera ko ari umwe mu bahuye n’icyo kibazo akaba yari yarahunze intambara ya 1994 yerekeza muli ouganda, mu gihe ahungukiye 2009 asanga isambu yaratuyemo barayigabije! ati Nyakubahwa prezida rwose ndasaba ko mwandenganura kuko inzego zose nazigejejeho icyo kibazo ati aliko kugeza nanubu ntibarayinsubiza! ati none rwose mbure n’akadugudu?

Prezida Kagame wari wabanje kumutega amatwi neza aho amariye kumva ko yari impunzi ya 1994 ikibazo yagishinze Ministri Kaboneka nawe wahise asisibiranya ajya kumwihererana kugira ngo bidakomeza gusakuza bikaba byatuma n’abandi bafite bene ibyo bibazo buririraho! ku buryo bamwe mu baturage batangiye kwibaza icyari kizanye Prezida Kagame kubasura niba adashoboye gusubiza ibibazo byabo kandi bari bamwiteze nk’umukiza! nawe akaba yibazaga impamvu abaturage bahora bategereje ko azabasura kugira ngo bamugezeho ibibazo byabo kandi hari abandi bayobozi bamuhagaraliye! ati aliko abayobozi banyu bakora iki? ati ntibyumvikana! Amaze gusubiza ibirenga bine yabwiye abaturage ko ibibazo byabo ari byinshi ko bitakemurirwa aho byose, ati nizeye ko byandikwa kandi byose bikazabonerwa umuti mu gihe cya vuba, ati Murakoze.

Banyarwanda banyarwandakazi, prezida Kagame siwe wabonye abava mu maso, yakomeje ajya kwisurira umupaka wa Kagitumba uhuza u Rwanda na Ouganda, bityo abaturage bataha batanyuzwe bimyiza imoso n’imbere nukuntu bari bakereye kwakira Mesiya wabo. Umuturage umwe utashatse kwivuga izina kubera impamvu z’umutekano we yambwiye ati uzi ukuntu tutashatse kugira icyo twikorera uyu munsi dore ko amapfa atatworoheye kugeza magingo aya ngo ngaho twaje kureba umukiza! ati none aducitse nk’umugesera pe!

Banyarwanda banyarwandakazi, abaturage bakeneye umucunguzi byihutirwa batitaye kuli Leta y’agatsiko Fpr-baringa ikomeje gushaka kubahuma amaso babona.

Biragaragara ko abenshi mu banyarwanda bamaze gusobanukirwa neza n’ikinyoma cya FPR-KAGAME aho ibizeza ibikorwa bikagenda bigakubita imyaka n’imyaka ntagikozwe ari nako bamwe bimurwa mu byabo nta ngurane bikavamo no kuhatakariza ubuzima. Nkaba nsanga igihe cyo kwirukana ingoma y’agatsiko kiri bugufi, ahasigaye akaba ari ugushyira mu bikorwa gusa. Murakoze.

Byanditswe ku 13/02/2017,na:
A.BEN NTUYENABO, KIGALI-RWANDA.

Rwanda/Nyagatare : uretse inzara yabamaze banavoma amazi y’ibirohwa arimo amase y’inka n’indi myanda

photo igihe.com

Aho ntahandi ni mu ntara y’iburasirazuba bw’u Rwanda, mu karere ka Nyagatare aho kuva igihe kirekire abaturage bamenyereye gusangira amazi y’ibirohwa n’amatungo yiganjemo cyane cyane inka. Muli aka karere rero, by’umwihariko mu Murenge rwa Rwimiyaga, abaturage baturiye uwo murenge byababereye ihame ko bagomba gusangira ku mbehe imwe cyangwa kunywera ku nkongoro imwe n’inka. Nkaba mbona aho bigeze aba baturage ari abo gutabarizwa imiryango mpuzamahanga ikaba yagira icyo ibamalira kuko dusanga. Leta ya FPR itabitayeho kandi yarahurujwe hashize imyaka myinshi iki kibazo kivugwa ari nako kinyura mu bitangazamakuru, ku maradiyo mpuzamahanga nka VOA n’ahandi…aliko Leta y’agatsiko mu nshingano zayo ntacyo ibikoraho ahubwo igahora ishyira imbere amadiscours meza ayitaka aho Ministri w’intebe Bwana Anastase Murekezi ahoza ijambo kuli radio y’igihugu abeshya abanyarwanda ko kugeza muli 2017 « nta munyarwanda numwe uzasigara atagejejweho amazi meza kugeza ku kugereranyo cya 99% !!! » Ni agahomamunwa pe!

Banyarwanda, Banyarwandakazi, mu buzima bwabo bwa buri munsi, aba baturage b’umurenge wa Rwimiyaga ho mu karere ka Nyagatare bahamyako banywa kandi bagakoresha amazi inka zatayemo umwanda zikanayagangamo, bavoma mu gishanga cy’uruzi rw’akagera ahateganye na mont Karyuwimba wo muli Tanzaniya, ayo mazi akaba yariyoboye mu gishanga yiyomoye ku ruzi rw’Akagera. Ayo mazi ni nayo bashoramo inka n’andi matungo magufi byongeye kandi bajya kuyavoma barinze gukora urugendo rurerure plus de 10 km bagera yo si ukuyavoma gusa kuko baba babyigana n’abitsiritana imbyiro ari nako bahigika amase y’inka n’indi myanda yose kugira ngo bashobore kuyavoma. Ayo mazi nta bara agira, si urwererane, umukara cyangwa ubururu ahubwo arangwa n’umwanda w’ubwoko bwose. Kuvoma ayo mazi kandi ntibyoroshye nanone kubera ingona ziyabamo! Avomwa n’umugabo hagasiba undi!

Bitewe n’urugendo rurerure bakora bajya kuyavoma, umwe mu baturage witwa Kuradusenge Edouard utuye muli uyu murenge wa Rwimiyaga yadutangarijeko nubwo bwose babona ko ari umwanda bitababuza kubanza kuyagotomeraho bakiyageraho kubera inyota!

Umuyobozi w’ikigo cy’amashuri abanza cya Gatebe ho muri uwo murenge wa Rwimiyaga, Bwana Bumbakare Faustin yadutangarije ko ingaruka z’aya mazi ari nyinshi; ati hari abanyeshuri bajya kwiga badaheruka gukaraba, abandi badaheruka kumesa abandi bagasiba ishuri kubera ko bagiye kuvoma bagataha bakerewe, ibyo byose bigatuma hari n’abikoza ku ishuri inshuro zitarenga ibyili mu cyumweru, akomeza agira ati nanjye ubwanjye hari ubwo ntaha mvuye kwigisha ngafata igare nkazirikaho amajerikani abiri nkajya kuyavoma!! Ati ntakundi twabigenza twabuze gitabarwa kandi indwara z’inzoka zo mu nda tuyakomoraho nazo ntizitworoheye!ati ngubwo ubuzima tubayemo!

Banyarwanda, Banyarwandakazi, imibereho yabo baturage iteye agahinda aliko ntakundi babigenza kuko ugize icyo akopfora yisanga muli bya Bihome byashyiriweho abakene nkuko itohoza riherutse ryakozwe na HRW ribihamya nubwo bwose Leta y’agatsiko idahwema kubeshyuza izo rapports ku Rwanda.

Banyarwanda, Banyarwandakazi, iri niryo terambere twari dutegereje kuli Leta ya FPR koko? Dusabwe kwibaza bwangu kandi tugashyira akadomo imbere y’imyanzuro twafashe buri wese, bityo tukava kuri wa mugani ngo « akabi kakirwa nk’akeza », kuko ntawe utarambiwe. Murakoze.

Byanditswe kuwa 26/07/2016 na:
A.BEN NTUYENABO,KIGALI-RWANDA.

Rwanda: i Nyagatare, umwicanyi F. Ibingira niwe watanze amasomo yo kwirinda ingabitekerezo!

L-R: Lt. Gen. Fred Ibingira, Brig. Gen. Richard Rutatina, Brig. Gen. Wilson Gumisiriza, Col. Dan Munyuza.

Abicanyi ruharwa : Gen. Fred Ibingira, Brig. Gen. Richard Rutatina, Brig. Gen. Wilson Gumisiriza, Col. Dan Munyuza

Mu kwibuka Génocide nyarwanda yo muli 1994; muli iki cyumweru gishize ntabwo abanyarwanda bahumetse! Bamwe bari batunzwe nuko barya ari uko bagiye mu isoko, abatwara amamodoka, abacuruza ku dutaro n’ubusanzwe batorohewe n’inzego z’umutekano, n’abandi, … Abo bose bamaze iminsi benshi muri bo ntacyo bashyira mu gifu kubera ibiganiro byerekeye jenoside yakorewe abatutsi gusa, mu nsanganyamatsiko yayo ngo ‘’dukumire ingengabitekerezo ya Génocide aho iva ikagera’’. Aliko se dusubiye inyuma gato mbere ya za 1959 tukibuka icyateje intambara yo ku Rucunshu aho ntitwasanga iyo ngengabitekerezo yarahereye mu moko y’abanyiginya n’abega! Kuri uyu munsi tukaba twikoreza abahutu uwo musaraba ! tubyibazeho kugirango tutaba twitana ba mwana tugasamira ibije twirengagije isoko nyayo!

Banyarwanda banyarwandakazi, ibyo biganiro birangwa ahanini n’iterabwoba ry’indangururamajwi zihamagalira abaturage kutongera kugira icyo bakora mu ma saha y’igicamunsi bikunze kuberaho byongeye kandi buri muturage wabyitabiriye akaba agomba gushyirwa kuli liste yabigenewe akanabisinyira imbere y’amazina ye, akaba agomba no kwiyandikisha ku yindi liste y’abatanga umusanzu w’abacitse ku icumu (exemple muli secteur gatsata sector ho muli GASABO District), bikaba bituma abenshi bifungirana mu mago yabo ntihagire ubarabukwa kandi bigaragara ko bashobora kuzagira ingaruka cyangwa ibihano bafatirwa nyuma y’icyunamo! None se banyarwanda banyarwandakazi, icyunamo ko ari nk’itabaro ku bushake bwa buri wese ayo malistes ni ayiki?

Nagerageje kubaza zimwe mu nzego z’ubuyobozi zishinzwe umutekano muli FPR ntibagira icyo bansubiza gifatika nkaho bambwiye ko icyo bategetse kigomba gukurikizwa nka ‘’Karame mwidishyi!! ‘’, atari ibyo ukahasiga ubuzima! Ingero ni nyinshi: Nko kuri iki cyumweru ku wa 10/04/2016 ho mu karere ka Nyagatare, intara y’iburasirazuba (ex-Kibungo) habereye ibiganiro kuli Génocide, aho Général Fred IBINGIRA na Ministri w’ubutegetsi bw’igihugu Kaboneka Francis , imbere y’abaturage n’abanyeshuri ba za Kaminuza y’u Rwanda ishami rya Nyagatare na Est African university basabye iyo mbaga kureka ingenga-bitekerezo ya Génocide kuko ngo ariyo yasenye igihugu, Général IBINGIRA akomeza asaba uwaba wumva ikimurimo kuyihanagura mu bwonko bwe cyangwa agakora ibishoboka byose akava mu bantu.

Banyarwanda banyarwandakazi, kwibuka Génocide 1994 mu Rwanda bizajya bitwibutsa byinshi bibi byakozwe na Leta ya FPR-KAGAME abenshi baba batangiye kwibagirwa, tubibutse ko uyu Général Fred IBINGIRA urangwa n’ubuswa bukabije, benshi baziho kuba atarigeze intebe y’ishuri aliko akaba yarahawe Diplôme ya ULK kubw’igitugu; ariwe warimbuye impunzi zirenga ibihumbi bitatu mu nkambi y’I Kibeho, azimishaho urusasu afatanije n’ingabo yari ayoboye mu mpera za 1994 mu gihe igihugu cyari mu maboko ya APR, avuga ko ari interahamwe zamushotoye! None niwe urimo atanga ibiganiro bikumira Génocide asobanura ko agenekereje asanga ijambo jenoside mu Kinyarwanda bisobanura birenze kubyita ishyano! yakomeje yerulira iyo mbaga ayibwira ati: uwumva afite ikibazo cy’ingengabitekerezo akaba atuye muli aka karere ka Nyagatare yagombye kurira imwe mu magorofa amaze kubakwa hano muri aka karere hanyuma akirangiza hakiri kare!

Hakurikijwe igenzura ryakozwe na Ministeri y’ubutegetsi bw’igihug, muli rapport yayo ngo yasanze Intara y’iburasirazuba ari imwe mu zagaragayeho ingengabitekerezo kurusha izindi mu gihugu cyacu.

Banyarwanda banyarwandakazi, muriyumvira imiyoborere y’iki gihugu cyacu! ntaho tuva ntaho tugana! Dushatse twakwicara ku meza amwe abasaba imbabazi tukazisabana aho kwirirwa mu magambo ya ndigabo, ngo mutinze kuza mbereke! Ndaribwaribwa murantindiye! Ntimuzamenya icyabakubise! n’ibindi….(Prezida Paul Kagame mu ijambo ryo gutangiza icyunamo) , ibyo byose ni ukwihagararaho! Imana ikomeze kutuba hafi naho ubundi haragowe!

Byanditswe kuwa 13/04/2016,na:

A.BEN NTUYENABO, KIGALI-RWANDA.