Archives par étiquette : Diane Rwigara

Rwanda : Ubucamanza buhanganye n’igitutu cy’Abanyamerika kuri dosiye ya Diane Rwigara

Johnston-Busingye, ministri w'ubucamanza

Johnston-Busingye, ministri w’ubucamanza

Ni  muli  urwo  rwego  kubera  induru  yo  gutabariza  abanyepolitiki  batavugarumwe  na  Leta  ya  FPR  amahanga  akomeje  gusaba  abagifungiye  mu  bihome  byayo  cyangwa  abacyagirizwa  n’inkiko  bose  kurekurwa  vuba  na  bwangu  nkuko  byakorewe  Mme  Victoire  INGABIRE  UMUHOZA  nyuma  y’imyaka  8  yose  y’akamama.

Ni  kuri  uyu  2/12/2018  aho  Ministri  w’ubutabera  akaba  n’intumwa  nkuru  ya  Leta  Bwana  BUSINGYE  ubwo  yikomaga  bamwe  mu  basénateurs  b’amerika   abagiriza  kuba  bamaze  iminsi  basaba  leta  y’u  Rwanda  kurekura  Diane  RWIGARA  n’umubyeyi  we  Adeline  kuko  basanga  ibyaha  bashinjwa  bidasobanutse.  Uyu  mu  Ministri  akaba  nta  kindi  gisobanuro  atanga  uretse  mu  kunga  mu  rya  shebuja  Pahulo  Kagame  avuga  ko  yamaganye  ubusabe  bw’abo  ba  Sénateurs  b’abanyamerika  ati  bamenye  ko  ubutabera  bw’u  Rwanda  bufite  amategeko  abugenga  ku  buryo  butandukanye  n’ubwabo   ati  bagomba  kureka  bugakora  akazi  kabwo  mu  bwisanzure !  nguko.

Abo  basénateurs  b’amerika  barimo  Mr.  Dick  Durbin  wa  Leta  ya  Illinois,  Ann  Louise  wo  muri  Missouri, Patrick Leahy  na  Barbara  Jean  Lee  hamwe  na  commission  y’umutwe  w’abadepite  ishinzwe  uburenganzira  bwa  muntu  muli   Leta  zunze  ubumwe  z’amerika  bakaba  bari  baherutse  gutabariza  umunyepolitiki  Diane  RWIGARA   n’umubyeyi  we  Adeline  basaba  ko  Leta  y’u  Rwanda  yabarekura   kubera  ko  politiki  iyo  ikorwa  mu  mahoro  atari  icyaha ,  bakongeraho  kandi  ko  gutinyuka  kuba  Diane  yaragerageje  kwiyamamariza  umwanya  w’umukuru  w’igihugu   no  kuvuga  kuri  ruswa  n’igitugu  biri  mu  Rwanda  bitamuviramo  kubizira  nk’umwenegihugu  cyangwa  yaba  umunyamahanga  bahohoterwa  n’ubutegetsi  buriho,  bityo  bakaba  bahamya  ko  bahangayikishijwe  n’imikirize  y’urwo  rubanza  basanga  ari  urwitwazo,  barasaba  ko  bagirwa  abere  nyuma  yuko  umushinjacyaha  wa  republika  abasabiye  igifungo  cy’imyaka  22  buri  wese.

Banyarwanda  rero  birabe  ibyuya  !  kubera  icyo  gitutu  mwiyumvira  ndasanga  nubwo  ubu  busabe  budakozwa  Ministri  BUSINGYE  akaba  ari  n’intumwa  ya  Leta  y’agatsiko ,  yabuze  ayo  acira  n’ayo  amira  aliko  amaherezo  y’inzira  ni  mu nzu !  ko  ntakabuza  iyi  leta  igiye  kwongera   igasa  nirekurira  igitonyanga  mu  Nyanja  iva  ku  izima  rya  buriya  busabe. Tubiteze  amaso ,butinze  gucya  ngo  urubanza  rusomwe  nubwo  ibibazo  by’umutungo  wuriya  muryango   wasahuwe  bikiri  byinshi .

Mugire  amahoro.

 Byanditswe  ku  03/12/2018, na:
A.BEN  NTUYENABO,  KIGALI-RWANDA.

Rwanda: Urubanza rw’abo kwa Rwigara rukomeje kuba amayobera

diane et sa mèreSelon  l’opinion  publique  buri  wese  akomeje  kwibaza  icyaha  nyirizina  abo  kwa  Rwigara  bagirizwa !  kuko  impamvu  atari  uko  gusa   Diane  RWIGARA   yashatse  kwiyamamariza  umwanya  w’umukuru   w’igihugu  abangikanye  na  Pahulo  Kagame  ahubwo  bigaragara  ko  hakomeje  kumvikana  impamvu  za  politiki  zidafite  aho  zishingiye  nkuko  Leta  y’agatsiko  yamye  ibikorera  n’abandi  banyarwanda  batari  bake  barimo  Mme  Victoire  Ingabire  UMUHOZA.

Ubushinjacyaha  rero  bukaba  nta  bimenyetso  bifatika  byajyana  aba  bombi  mu  Rukiko  Diane  Rwigara  na  Nyina  Adeline  Rwigara  cyane  cyane  ko  bukomeje  kwivuguruza  mu  nyito  shya.  Kuri  uyu  wa  24/07  urukiko  rukaba  rwanzuye  ko  urubanza  rutangira  kuburanishwa  mu  mizi  hatitawe  kubo  rwari  rwahamagaje  babafatanyacyaha  barimo  J.Paul  Turayishimiye  n’abandi….nguko.

Twizere  ko  igihe  kizagera  imanza  nk’izi  zarenze  amategeko  aho  n’ibitambambuga  byazirangiza  zizavaho  abanyarwanda  bagahumeka.

Banyarwanda  ngo  uyu  mwari  Diane  Rwigara  yigeze  kuvuga  ko  barimo  kwica  abatutsi  kandi  abahutu  bahari !  aliko  se  ayo  magambo  cyangwa  amarangamutima  ataniyehe  nuwavugiye  mu  masengesho  ko  niba  Karegeya  yishwe  ko  n’abandi  nkawe  byagombye  kuba  ukwo ?   undi  nanone  ati  FPR  ni  agatsiko  k’amabandi  kafashe  igihugu  ku  ngufu !  undi  ati  tuzajya  tubarasa  ku manywa  y’ihangu !  cg  ngo  muzankuraho  mu  yihe  nzira…..ya  demokrasi  se  ?…hakoreshejwe  imbunda  se ?…  byongeye  ati  ndaribwaribwa  iyaba  mwankundiraga  mukaza  vuba !  n’ibindi  bipfuye  nabi  byose  umuntu  atarondora…. Ayo  magambo  yose  ntawe  utayagereranya  n’ubwishongozi  burimo  n’ubugome  uretse  ko akarenze  umunwa  karushya  ihamagara !  ni  ukutamenya  ko  na  nyina  wundi  abyara  umuhungu !  tubitege  amaso .

 Byanditswe  ku  wa  26/07/2018, na :
A.BEN  NTUYENABO, KIGALI-RWANDA. 

Rwanda: ishyaka   PS-Imberakuri,  igice  cya  Mukabunani,  naryo  ngo  rigiye  gutanga  ikirego  gishinja Diane Rwigara

Christine  Mukabunani/http://www.impamo.net

Christine Mukabunani/http://www.impamo.net

Mu  gihe  akiburana  ifungwa  n’ifungurwa  no  kunganirwa  mu  by’amatageko  n’umwunganizi  we  Me  Buhuru  Célestin   nkuko  rwasubukuwe  ku wa gatatu  taliki  ya  18/10/2017  mu  rukiko  rwisumbuye  rwa  Nyarugenge;  umwari  Diane  Rwigara  akomeje  kugerwa  amajanja  n’abambari  b’agatsiko  ka  FPR-INKOTANYI.

Kuri 17/10/2017  nibwo  mu kiganiro  kigufi  yahaye kimwe  mu  binyamakuru  bya  hano  mu  Rwanda  umuyobozi  wa  rimwe  mu  mashyaka  akorera  hano  mu  Rwanda  yashyigikiye  Pahulo  Kagame  mu matora  aherutse  ya  mandat  ya  3  ariryo  PS  IMBERAKURI  igice  kiyomoye  kuri  Me  NTAGANDA  Bernard  kikaba  kiyobowe  na  Mukabunani  Christine;  yatangaje  ko  ishyaka  rye  rigiye  gushyikiriza  ubushinjacyaha  ikirego  riregamo  Umwari  Diane  Rwigara  kuba  yaribye  inyandiko  y’abayoboke  ba  PS  Imberakuri  akayikoresha  mu  gushaka  kwiyamamariza  gutegeka  u  Rwanda.

Banyarwanda  ibi  byubuye  mu  gihe  ubushinjacyaha  burimo  buhuzagurika  ku  byaha  bushinja  abo  kwa  Rwigara  kandi  icyo  kirego  kikaba  kitari  mubyo  bumushinja  ku  ikubitiro,  bikaba  bitumvikana  ukuntu  uyu  Mukabunani  abyukije  icyo  kirego !  aho  se  ntibyaba  ari  rya  technical  rya  FPR  n’abambari  bayo  tumenyereye ? nta  gushidikanya.

Gusa  hambere  ubwo  Diane  Rwigara  yiyamamarizaga  kuyobora  u  Rwanda  yigeze  kuvuga  ko  iyo  liste  y’abayoboke  ba  PS  Imberakuri  yashinjwaga  na  NEC (Commission  y’igihugu   y’amatora)  atazi  aho  yavuye  yongeraho  kandi  ko  icyo  atari  ikibazo  kuko  hari  nabo  muli  FPR-INKOTANYI  bamusinyiye.

Ababikurikiranira  hafi  barasanga  byanze  bikunze  uyu  Mukabunani  ari  undi  mutangabuhamya  wiyongereye  ku  bashinja  Diane  Rwigara. Ni  akumiro  rwose ! uwapfuye  yarihuse.

Banyarwanda,  tubibutse  ko  ubusanzwe  aya  malisti  avugwa  y’abayoboke  b’amashyaka  abikwa  ahantu  hatatu  muli  rusange  ariho  mu  bunyamabanga  bw’ishyaka  nyirizina, copies  zikoherezwa   muli  Ministѐre   y’ubutegetsi  bw’igihugu  mu  nshingano  zayo  no muli  commission  y’igihugu  y’amatora (NEC);  bikaba  bigaragara  ko   gushaka  guhimbira  umuntu  ibinyoma  wifashishije  hamwe  muli  izi  nzego  za  Leta  y’agatsiko   cyangwa  ku  buryo  bwumvikanyweho  n’aba  bose  byoroshye  cyane.

Mukabunani  akaba  akomeza avuga  ko  agiye   guteranya  inama  rusange  y’abarwanashyaka  ba  PS  IMBERAKURI  bakemeza  niba  Diane  Rwigara  agomba  kuregerwa  icyo  cyaha  n’ishyaka  rye  ariko  byose  ndasanga  ari  nk’urwiyerurutso. Mureke  tubitege  amaso.

Byanditswe  ku wa  18/10/2017,  na :
A.BEN  NTUYENABO,  KIGALI-RWANDA.

 

 

Rwanda : amalira yabo kwa Rwigara yashenguye imitima ya benshi imbere y’abacamanza

famille-rwigaraKuri  wa  mbere  taliki  ya  16/10/2017  nibwo  abo  kwa  Rwigara  bongeye  kujyanwa  imbere  y’urukiko  rwisumbuye  rwa  Nyarugenge  mu  rubanza  rwamaze  amasaha  arenga  icyenda  hamenyeshwa  ibyaha  abaregwa  bashinjwa  nabo  bisobanura  hamwe  n’abunganizi  babo  Me  Gatera  Gashabana  wa  Adeline  Rwigara  na  Me  Buhuru  Célestin  wunganira  Diane  na  Anne  Rwigara.

 Imyitwarire  y’abacamanza  bagaragaye  nk’abadafite  ubwisanzure  batifuza  icyo  aricyo  cyose  cyatuma  hakomwa  rutenderi  ngo  ubushinjacyaha  butahatera  ibaba  ahubwo  hibandwaga  cyane  mu  kuzibira  imyiregurire  yaba  ba  Rwigaras  yakomeje  kumvikana  mu  gushinja  igipolisi  cya  Leta  y’agatsiko  urupfu  rw’umubyeyi  wabo  Nyakwigendera  Assinapol  Rwigara  basa  nabifuza  ko habanza  kugaragazwa  ukuri  ku  bugambanyi  yakorewe  nyuma  yaho  akoreshejwe  accident  babona  agihumeka  bakihutira  kumusonga  ari   nako  bamuzingira  mu  isachet  bamaze  kumujombagura  ibyuma  mu  mutwe.

Iyo  witegereje  iby’uru  rubanza usanga  ntakabuza  rwarashumurijwe  na  Pahulo  Kagame  akaba  ari  nawe  wakagombye  kuza  kuburana  na  bene  Rwigara  bityo  ntakomeze  kuroha  bariya  baryamanza  be  mu  bufatanyacyaha  abategeka  ibyo bagomba  gushyira  mu  bikorwa. Ndasanga  rero  nta  mpamvu  yuko  umukuru  w’igihugu  yajya yitwaza  ubugome  bwe  kubera  ubudahangarwa  afite  ngo  abyitirire  igihugu  cyangwa  abana  b’u  Rwanda.  Nkaba  namucira  umugani  ugira  uti  ‘Utaranigwa  agaramye  agira  ngo  ijuru  riri  hafi’.

Urubanza    rwakomeje  aho  ba  Rwigaras   bisobanuraga  bageraho  bagaturika  bakalira ! aliko  se  baririraga  nde ?  keretse  uwo  batazi !  kuko  atari  ubwa  mbere  akinira  abanyarwanda  umukino  nk’uyu !  ndabagira  inama  rero  yo  kuzakira  ibizavamo  nkuko  byagenwe  na  Nyakubahwa  Kagame,  ibya  ma  sentiments  mube   mubiteye  ku  ruhande  ahubwo  ni  mukomeze  guhagarara  ku  kuri  kwanyu  nta  bwoba  kugeza  urubanza  rurangiye  byongeye  ntimuyobewe  uko  igihugu  kiyobowe kuko  hari  benshi  bagerageje  kurira  aliko  nabo  bageze  aho  barayihanagura  asigaye  agatemba  ajya  mu nda.  Ikindi  mwiringire  Imana  kugira ngo  ibatere  imbaraga  mu  gutsinda  icyago.  YEZU  NI  MUZIMA !  ALLELUA.

Ba  Rwigara  mubyo  bashinjwa  harimo  kuba  baraganiriye  n’abavandimwe  babo  cyangwa  inshuti  zo  hanze  y’igihugu !  banyarwanda  icyiza  kiruta  kuganira  n’umuvandimwe  cyaba  ikibi  cg  icyiza  ni  ikihe?  Uretse  ko  nsanga  nta  kibi  cyarimo  kuko  babaga  bivugira  ibyakababaro  kabo  nuko  kakemuka  kandi  ibyo  ni  ibya  buri  kiremwa  muntu  cyose,  naho  ubundi  biramutse  bigenze  bityo  ndasanga  abanyarwanda  benshi  bajya  bambikwa  amapingu  uko  bwije  uko  bukeye.

Mu  Rwanda  nta  liberté  d’expréssion  ahubwo  hari  frustration  aho  umuntu  ahora  acecetse  yakwinyagambura  gato  ageze  aho  yizeye  akavuga  byinshi  bihindukamo  ibibazo.

Adeline  RWIGARA  ati  amagambo  yose  nabwiraga  igipolisi  iyo  cyazaga  kudufata  nabiterwaga  n’ihahamuka  nagize  ry’urupfu  rw’umugabo  wanjye !  ati  bamaze  kumwica  banga  nuko  ngera  naho  impanuka  yabereye ! ati  bikubitiraho  no  kudusenyera  Hôtel  none  natwe  turi  mu  mapingu  kuva  twafatwa  arijye  ari  abana  banjye  ntawamenya  aho  umwe  umwe  afungiye  n’iyicarubozo  turimo  gukorerwa !  ati  kugeza  ubwo  bandindisha  insoresore  z’abapolisi  nambaye  robe  de  nuit  gusa    mureba  uko  ngana  ntya !  nimwiyumvire  namwe !  akabaye  icwende  ntikoga.

Muri  uru  rubanza  havuzwe  byinshi  aliko  nubwo  ubushinjacyaha  bwifuzaga  ko  urubanza  rubandanya  ntibyashobotse  kubera  amasaha  yabageranye  kandi  buri  wese  bigaragara  ko  ananiwe  byabaye  ngombwa  ko  umucamanza  ategeka  ko  rusubikwa  rukazasubukurwa  ku  wa  gatatu  taliki  ya  18/10/2017  hakomeza  kumvwa  za  Audio.

Byanditswe  ku  wa  17/10/2017, na:
A.BEN  NTUYENABO,  KIGALI-RWANDA.

Rwanda : Isubikwa rya hato na hato ry’urubanza rwabo kwa Rwigara rihatse iki?

 ????????????????????

Urubanza rwabo kwa Rwigara rwasubukuwe bwa kabiri kuri 11/10/2017. Bose  bamaze  gusomerwa  ibyaha  baregwa  birimo gukoresha  impapuro  mpimbano  icyaha  kiregwamo  Diane  Shima  Rwigara,  no  guteza  imvururu  n’amacakubiri  muli  rubanda  icyaha bahuriyeho  uko  ari  batatu;  abaregwa  bahakanye  ibyaha  byose.

 Diane  Shima  Rwigara  yahise  agaragaza  ko  batiteguye  kuburana  bitewe  nuko  dossier  ariho  akiyishyikirizwa  mu  Rukiko  byongeye  kandi  ko  yari  yanasabye  umwunganizi  ku  ya  28/08  akaba  aribwo  akimubona  bityo  ko  nta  mwanya  uhagije  yabonye  wo  kwiga  dossier  mu  gihe  ubushinjacyaha  bwo  bumaze  ukwezi  kwose  bwiga  dossier  ye. Ikindi  akomeza  avuga  ni  amafranga  yasabye  muyo  police  yatwaye  igihe  babasakaga  kugirango  ayashakemo  abunganizi  batatu  nayo  ntiyayahabwa  kugeza  magingo  aya.

  Adeline  Rwigara  we  akifuza  ko  umwunganizi  we  yaba  Me  GATERA  Gashabana  kuko  ngo  yumva  ubu  nta  mwunganizi  afite, mu  gihe  Me  BUHURU  Céléstin  we  yari  yemereye  urukiko  ko  yiteguye  kuburanira  Diane  Shima  na  Anne  RWIGARA.

Agashya  kabaye  muri  uru  rubanza  akaba  ari  ugusaka  bikomeye  kw’abapolisi  buri  wese  winjiye  mu  cyumba  cy’iburanisha  nanone  cyari  cyakubise  cyuzuye  abandi  hanze   nk’uko  bisanzwe  ari  nako  umutekano  wari  wakajijwe  mu  mpande  zose  z’urukiko,  ikindi  ni  uko  umucamanza  yabanje  kwihanangiriza  abanyamakuru  kutongera  gufata  amajwi  y’ababurana  nkuko  byagenze  ubushize.

Nyuma   yo   kwiherera   k’urukiko  umucamanza  yavuze  ko  ikifuzo  cya  Adeline  RWIGARA  cyo  kunganirwa  nuwo  yifuza  gishingiye  ku  ngingo  ya  18  y’itegeko  nshinga  ivuga  ko  uburenganzira  bwo  kunganirwa  mu  rukiko  ari  ntavogerwa  bityo  ko  uregwa  ahawe  indi  minsi  ibiri  urubanza  rukaba  rwimuriwe  ku  wa  13/10/2017.

Banyarwanda,  burya  koko  iyo  « inkoko  ivuye  mu  magi  yayo  arabora »,   « umutima  wuzuye  ishavu  nawo   ntushobora  gusobanura  amagambo  neza »  ariyo  mpamvu   mbona  aba  ba  Rwigara  nabo  ari  ko  byabagendekeye  nyuma  yo  gukomwa  mu  nkokora   n’abagizi  ba  nabi  babura  umubyeyi  wabo  kubw’amaherere   ariyo   mpamvu  bagombye  guhabwa  ubutabera  bushishojwe  kandi  bucukumbuwe  mbere  y’uko  bahabwa  ibihano  cyangwa  barekuwe,  dore  ko  na Giti  mu jisho  Pawulo  Kagame  byamwanze  mu nda  yabera  abavaniraho  icyaha  cyo kunyereza  umutungo  w’abaturage  yari  yabanje  kubegekaho.  Gusa  nubwo  baca  umugani  ngo   « umugayo  uvuna  uwugaya,  uwugawa  yigaramiye »  ntawabura   gufata   Pawulo  Kagame  na none  nka  Gashozarubanza  kuri  uyu  muryango  wa  Rwigara.

Byanditswe   ku wa  11/10/2017, na :
A.BEN  NTUYENABO,  KIGALI-RWANDA.

Rwanda :Urubanza rw’abo kwa Rwigara rwasubitse. Bafungiye iki niba iperereza ritararangira nkuko ubushinjacyaha bubivuga?

rwigara3Ku ya  9/10/2017  niho  abo  kwa Rwigara  bari  bongeye  kwitaba  urukiko  rwisumbuye  rwa  Nyarugenge  aliko  noneho  bari  baherekejwe   n’umwunganizi  wabo  Me  Buhuru  Céléstin  wasaga  nuherekeje  izo  mfungwa  zari  mu  mapingu  buri  wese   n’abapolisi  babili  bafashe  mu  maboko  kugera  binjiye  mu  cyumba   cy’urukiko  cyari  cyakubise  cyuzuye  abantu  abandi hanze  yacyo  bategereje  gukurikiranira  urubanza  kuri  za  microphones  installés  à  l’extérieur   ku  buryo   n’abahisi  n’abagenzi  bari  barambirije  aho.

 Bikaba  byagenze  nk’ubushize  bamwe  muli  buri  ruhande  bumvikanisha  imbogamizi  zituma  urubanza    rwasubikwa,  nko ku  ruhande  rw’umwunganizi  Me  Buhuru  Céléstin  yasabaga  igihe  kingana   n’icyumweru  ngo  abashe  kwiga  dossier  neza   yabo  yunganira  kandi  anahabwe  n’ibiyikubiyemo  byose  harimo  ibimenyetso  mu  kubashinja  ndetse  na  copie  yabyo.

Ku  ruhande  rwa  ba  Rwigara  nabo  bakavuga  ko  batigeze  babona  dossiers  zabo  mbere  yuko  bajyanwa  mu  rukiko  ku  buryo  batarashobora  kumenya  ibyo  baregwa !  aha  umuntu  akaba  yakwibaza  impamvu  ubushinjacyaha  butwara  abantu  mu  bucamanza   butarabamenyesha  ibyo  baregwa !

Ku  ruhande  rw’ubushinjacyaha  nabwo  buti  ntitwarekurira  dossier  Me  Buhuru   umwunganizi  wabo  ngo  ayicukumbure  neza  kandi  tukiri mu  iperereza.

Izo mpaka   zose  zikaba  zugariwe   n’inteko  y’abacamanza   hafatwa   umwanzuro   usubika  urubanza  rukazasubukurwa  ku wa  gatatu  taliki  ya  11/10/2017  haburanishwa  niba  abaregwa  bakomeza  gukurikiranwa   bafunze  cyangwa  bari  hanze,  bityo  Me  Buhuru  akaba  yahawe  iminsi  itatu  yo  kureba  dossier  y’abo  yunganira  aho  kuba  icyumweru  nkuko  yari  yabisabye.

Hagati  aho  opinion  publique  iribaza  byinshi  kuri  uru  rubanza,  nyirabayazana  akaba  ari  ya  Ngona  y’inkazi  Pahulo   Kagame  igihe  yarahiriraga  kwongera  kuyobora   u  Rwanda  mandat  ya  3  ubwo  yatungaga  agatoki  abanyereza  umutungo   w’abaturage  avuga  ko  bidegembya  uko  bashatse  ko  bagomba  kubiryozwa  kabaye  niyo  baba  barashatse  kwiyamamariza  umwanya  w’umukuru  w’igihugu  bikabananira !  yavugaga  Mlle  Diane  Rwigara.

None se  Banyarwanda,  aba  benedata   baba  bafungiwe  iki  mu  gihe bataramenyeshwa  ibyo  baregwa  byose ?   Ko  atari  urwumwe!   Byumvikana   bite  ukuntu  urubanza  rugiye  gutangira  hakiri  ibigikorwaho  iperereza  nkuko  ubushinjacyaha  bubivuga ?  Ese  amategeko  y’u  Rwanda  yaba  avuga ko  iperereza  rikorwa  nyuma  yo gufatwa  cyangwa  mbere ?

Banyarwanda,  umanika  agati  wicaye  kukamanura  bikakubera  ingorabahizi,  uru  rubanza  rushobora  kuzasiga  umugani  kuko  nkeka  ko  mu  kurusubika  haba  hagikorwa  itechnika  ryumvikanyweho  n’ubushinjacyaha   n’abacamanza  dore  ko  bitaboroheye  kuko  n’ibyaha  bimwe  batangiye  kubikuraho   nk’icyaha  cyo  kunyereza  umusoro  kitagikurikiranywe  n’ubushinjacyaha !  Aho  amaherezo  ntiwabona  ibirego  byose  biregwa  aba  bene  Rwigara  bihindutse  baringa ?  Birabe  ibyuya  ntibibe  amaraso. Tubitege  amaso.

Byanditswe   ku wa  09/10/2017, na :
A.BEN  NTUYENABO,  KIGALI-RWANDA.

Ivanjili si umugani n’ukwemera si inzozi : ni ubuzima

Padiri Athanase Mutarambirwa

Padiri Athanase Mutarambirwa

Banyarwanda mwese ndabaramukije. Ubundi kera mu Rwanda indamukanyo zacu zari : « Gira impagarike, gira ubugingo, gira umugabo, mashyo, murakoma, muraho, murakomeye ? Ariko igihe cyarageze haza ubukirisitu buduha indi ndamukanyo kuko nibwirako twari twahinduye uburyo bwo kubona ibintu n’ubwo kubaho ; none kenshi dusigaye turamukanya tuti : Yezu akuzwe, Yesu ashimwe, Gira Yezu na Mariya. Izo zikaba indamukanyo zerekanako Abanyarwanda bemera Imana kuburyo bwa gikristu kuko bagaruka cyane kuri Yezu ariwe Kristu umwana w’Imana. Indamukanyo imwe ya kera yavugaga Imana ntiyakoreshwaga hose, kuko  tuyisanga gusa mu mihango yo guterekera aho bagiraga ngo : « Gahorane Imana Ryangombe » cyangwa bakeza umwami bati : « Kagire Imana Nyagasani ».Reka mbaramutse noneho ngira nti : « Muraho, Yezu akuzwe, mugire Yezu na Mariya ».

Ndisobanura : Mu ndamukanyo yange ndagirango mbibutse ko tugomba gukomera yego ku muco wacu ariko ko tutanareka kwakira n’ibyiza by’ahandi bitatubujije kwamaganira kure imico y’ahandi yatsemba uwacu.

Hashize imyaka irenga makumyabiri u Rwanda rubayemo intambara na jenoside byatsembye abantu batagira ingano. None muri ibi bihe usanga umunyarwanda yibera mu bwoba, yarabaye undi doreko byo n’amahanga twayagenze. Ubundi ikibazo cyo kongera kwegeranya Abanyarwanda cyakabaye icya Leta ariko mwese muziko Leta yacu ahubwo ariyo ituma turushaho gutatana no kunyanyagira mu mahanga y’irya n’ino. None rero ndumva buri wese akwiye gushyiraho ake by’umwihariko kugirango u Rwanda rugire ihumure kandi twongere tubane twunze ubumwe.

Ibi rero mwambaza ngo byanjemo bite ? Ejo bundi nitegereje ifoto ya muka Rwigara madamu Adeline Rwigara ariko atari ukubahuka munyemerere muvuge mu mazina ye bwite madamu Adeline naramwitegereje rero muri ibi bihe umuryango wabo umerewe nabi mbona agenda yikingiye cyangwa yitwaje Bibiliya.

Ngarutse kuri zandamukanyo zacu rero, iza kera usanga ziganisha ku buzima, ubuzima bwiza, gukomera no kudamarara naho izavuba zibanda ku Mana nk’uko nabivuzeho gato hejuru. Gukira ugasenga akenshi ntibyoroha. Ariko uriya mudamu bakunze kuvuga ko asenga, ku buryo kumubona mu bihe nka biriya yitwaje Bibiliya ntawakeka ko hari indi mpamvu itari ukwemera yifitemo, gupima uko kwemera nabyo ntitwabishobora. Turebe gusa ikimenyetso yitwaje turebe niba kuruhande rwacu hari icyo kitubwira.

Ntagoranye rero njye yatumye nongera kwibaza kubukristu bwanjye no kubukristu muri rusange. Nibajije ku matotezwa  y’Abakristu yagiye aba ntekerezako nubwo abakristu badakunze gutabara bahangana n’umwanzi nsanga nibura nk’uko byanabaye kuri Yezu ubwe abantu bagerageza kwifatanya n’utotezwa kabone naho hari abagomba kubigwamo kuko Abakristu bigora bagakora uko bashoboye kose kugirango ikibi kiranduke cyanecyane ikibangamira ubuzimaby’umwihariko. Ubwo rero narakomeje ndatekereza  nibuka Amaabonekerwa ya Kibeho n’ubutumwa Bikiramariya yahaduhereye. Abenshi ntibakimuvuga  gutyo bivugira gusa ngo « Umubyeyi ».

Ibyo byose byanteye nanone kwibaza  ku mpamvu uwo mubyeyi yaje iwacu no kuburyo twakiriye ubutumwa bwe ari nabyo rero biduha kumenya uko dutwara ukwemera kwacu.Reka twibuke ubutumwa yaduhaye.

UBUTUMWA BWA BIKIRA MARIYA I KIBEHO

1-Abantu nibisubireho bidatinze, bagarukire Imana: “Nimwicuze nimwicuze, nimwicuze! Nimuhinduke inzira zikigendwa”.

2-Isi imeze nabi, igiye kugwa mu rwobo: ari byo kuvuga guhora mu byago byinshi kandi bidashira”. Isi yarigometse, nta rukundo n’amahoro yifitemo.

3-Agahinda ka Bikira Mariya : Afite ishavu ryinshi kubera abantu b’iki gihe barangwa n’ukwemera guke n’ukutihana.

4-Ukwemera n’ubuhakanyi bizaza mu mayeri.

5-Agaciro k’ububabare mu mibereho y’abantu no mu buzima bwa gikristu.

6-“Nimusenge ubutitsa kandi nta buryarya” Bikra Mariya arasaba gusenga tubikuye ku mutima kandi nta buryarya.

7-Kubaha no kwiyambaza Umubyeyi Bikira Mariya: Bikira Mariya aratugira inama yo kuvuga Rozari kenshi tubikuye ku mutima.

8-Ishapule y’ububabare burindwi bwa Bikira Mariya.

9-Kubaka shapeli yibutsa Bikira Mariya i Kibeho.

10-Gusenga ubutitsa dusabira Kiliziya kuko amakuba akomeye ayitegereje.

Rwiagara Diane na Nyina azamuye Bibiliya igihe Polisi yari ibashoreye

Rwigara Diane na Nyina azamuye Bibiliya igihe Polisi yari ibashoreye

Iyo usesenguye neza ubu butumwa, usanga koko twari dukwiye kuburirwa: Twari twaribagiwe ibyiza by’umuco wacu nko gufashanya tugamije kuzahura abato n’abakene,gutumirana ngo twese turyoherwe dore ko ngo biryoha bisangiwe, gutabarana umuntu agize ingorane,erega ntibatabara gusa iyo umuntu yavuyemo umwuka, n’iyo akaruru kavuze buri wese akora kuri nangagasaku, nkundamahoro cyangwa ikibamfasha maze akajya guhashya inyangabirama.

Ubu rero ikibabaje ni uko tutigeze duhinduka. N’ubwo usanga benshi bahimbaza uko kuza kwa Bikira Mariya nk’umunsi w’ibyishimo, twari dukwiye kuzirikanako cyane cyane yazanywe n’impuruza no kutuburira: Nimwicuze, nimwicuze ni ukuvuga ngo nimuhinduke muhindure imikorere.

Gusenga ntiyigeze abitindaho ahubwo yongeyeho ati nimusenge mubikuye kumutima. Ati muvuge Rozari n’Ishapule y’ububabare kandi musabire Kiliziya yugarijwe n’amakuba. Aha narazirikanye numva ko tugomba kuzirikana cyane ubuzima bwa Yezu tukabucengera; nonese iyo tuvuga ishapule si imibereho ye tuba dutondagura haba mu ishavu cyangwa mu byishimo kukamukuza, tukamusaba n’urumuli? Nonese kuri buri yibukiro ntidusaba n’inema arizo mbaraga zidushoboza ubundi ibigora mwenemuntu?

Nibyo koko, nk’uko Elizabeti mutagatifu yabivuze ati: “mbikesha iki kkugirango nyina w’umutegetsi wange angenderere?” natwe tugomba gushimishwa n’uko Umubyeyi Bikiramariya Nyina wa Jambo yaje iwacu ariko tujye tunibukako yatubwiye no kumenya guha agaciro ububabare buba mu buzima bwacu,tukirinda uburyarya kugirango twubake Isi irimo urukundo n’amahoro.

Ubwo rero nitegereje madamu  Adeline Rwigara ukuntu yitwaje Bibiliya numva tugomba kumwitaho nk’uwacu rwose abemera Kristu. Hari uwabaza ati ese dukore iki? Nabonye amatangazo agira ati twifatanye dusabire umuryango wa Rwigara ni byiza, ariko nge iriya Bibiliya Adeline atwaye, yatumye nibukako inatubwira intwaro tugomba kugira,nk’uko Pahulo izitubwira mu banyefezi umutwe wa gatandatu, kuva ku murongo wa cumi kugera kuwa cumi n’umunani.(Eph 6,10-18)

Aragira ati:”ahasigaye rero, nimugire ubutwali muri Nyagasani, mugire imbaraga zibashoboza byose. Nimwambare intwaro zikomoka ku Mana, kugirango mubashe guhangara imitego ya Sekibi.Erega abanzi turwana si abantu, ahubwo abo turwana ni Ibikomangoma, n’Ibihangange, n’Abagenga b’iyi si y’umwijima, n’izindi Roho mbi zo mu kirere. Nuko rero nimwitwaze intwaro z’Imana, kugirango muzashobore gukomera ku munsi mubi, muzatsinde mudacogoye. Ngaho rero, nimuhagarare gitwari! UKURI  mukugire nk’umukandara mukenyeje, UBUTUNGANE mubwambare nk’ikoti ry ‘icyuma, UMWETE WO KOGEZA INKURU NZIZA Y’AMAHORO ubabere nk’inkweto mu birenge. Ariko cyanecyane muhorane UKWEMERA, kubabere nk’ingabo izazimya imyambi igurumana ya Nyakibi. Nimwakire ingofero y’Umukiro, n’inkota muhawe na Roho, ariyo JAMBO RY’IMANA. Igihe cyose muhore musenga kandi mwambaza kuburyo bwose mubwirijwe na Roho, mubyitondere kandi musabire ubutitsa abatagatifujwe bose “.

Nge numva aya amagambo rero ari ay’ukuri, atera n’ubugabo kandi ko yageza ku mugambi w’ubuzima. Ninayo mpamvu natangiye mvuga mumutwe w’iri jambo nti:” ivanjili si umugani n’ukwemera si inzozi : ni ubuzima

Ngaho rero nk’uko byahoze, kuva kuri Yezu igihe uwanyu afashwe ntimukamutererane, mujye mumuba hafi mwitwaje ziriya ntwaro. Nimwongera kumva mu Rwanda hari uwo baje gufata mukarengane, mwikore mumushyigikire,  mumwome munyuma n’iyonka , ababeshyerwa mubavugire, abafunze mubasure maze murebe ngo ikibazo kirakemuka.Ubutwari nibusimbure ubwoba maze ukuri guhemure ikinyoma.

Bakristu bavandimwe, bino, byatumye nibukako nka Kizito tutamweretse urukundo, mu bihe bikomeye kandi ngo inshuti uyibona mu byago, muribuka ubwinshi bw’abantu babaga bari mubitaramo bye, afunzwe se nakoze iki, wakoze iki? Twoye gukora amakosa kabiri, dutangire ubu twibohore. Muribuka aririmba Inuma y’amahoro, muribuka atwibutsa ubukristu na bwa bubabare Bikiramariya atubwira agira ati urupfu nicyo kibi kiruta ibindi ariko rutubera inzira igana ikiza kiruta ibindi? Ariko ntiyavugaga gupfa uhagaze mu mwiryane,ubusambo,ishyari, ubugome n’andi mabi nkayo. Yavugaga kuba imfura ikunda ukuri n’ubutabera ntiyanduranye byaba ngombwa ikabizira.

Mugusoza ndagirango mbibutseko Pahulo atubwirako tugomba guhagurukira ibinyabubasha ko tutagomba guhangana n’abantu, ari nayo mpamvu natwe ntawe ufite uburenganzira bwo kudukumira igihe cyose dukereye ukuri dutabara inzira karengane cyangwa tugiye kurengera ubutabera. Dushirike ubwoba, dukore ibitureba, twibohore maze nanone nk’uko dukunda kubibyina kanyobwe kanyobwe abafitanye ibibazo babikemure.

Mukomere mugire Yezu na Mariya.

Padiri Athanase MUTARAMBIRWA

 

 

 

 

 

 

 

 

 

 

 

Amanyanga yo kwangira Diane Rwigara na Gilbert Mwenedata kwiyamamaza ku mwanya wa perezida w’u Rwanda

mwenedataAbo  ni  bamwe  mu  bakandida  bigenga  barimo   Mme  Diane  Nshimiyimana  RWIGARA,  Bwana  Gilbert  Mwenedata  na  Bwana  Fred   Segikubo  Barafinda .  Hakaba  hararokotsemo  Bwana  Mpayimana  Philippe  wenyine  utarahabwaga  amahirwe  na  busa.

Ni  ku  wa  07/07/2017  nyuma  y’igihe  cy’amasaha  abiri  arenga  aho  abanyamakuru  benshi  bari  bategereje  mu  cyumba  cy’inama;  nibwo  Bwana  prof.  Kalisa  MBANDA ,  Prezida  wa  komisiyo  y’igihugu  y’amatora  akaba   n’umumamyi  mukuru  wa  Leta  y’agatsiko  yahasesekaye  dore  ko  yari  yakereje  Press  conference  kandi  ariwe  wayitumirije  yewe  habe  na  excuse!  yahise  afata  ijambo  ati  mwiriweho  !  ati  nkuko  amategeko  abisaba  tunejejwe  no  kubatangariza  liste  ndakuka  y’abakandida  bemerewe  na komissiyo  y’igihugu  y’amatora  kuzitoza  mu  kibuga  cy’umukuru  w’igihugu  ku ya  3-4/08/2017   akaba  ari:

1. MPAYIMANA  Philippe (umukandida  wigenga).
2. Dr.  Frank   HABINEZA (of  Green  Party ).
3. Nyakubahwa  Paul  KAGAME  ( of  RPF-INKOTANYI).

Prof.  Mbanda  yakomeje  atangaza   n’abangiwe  candidatures  zabo  ahanini  kubera  kutuzuza  urutonde  rw’abantu  600  bagombaga  kubasinyira  nubwo  bwose  hari  abatanze  abarenze  uwo  mubare  ariko  bikarangira  batemerewe!

Ikindi  ngo  no kuba  hari  abakoresheje  impapuro  ziriho  liste  y’abayoboke  b’indi  mitwe  ya  politiki  aho  Rwigara  Diane  Nshimiyimana  ngo  yaba  yarashimuse  urupapuro  ruliho  urutonde   rw’abayoboke   bashinze  ishyaka  P.S  Imberakuri   igice  kiyomoye  kuli  Me  Ntaganda  Bernard,  akarukoresha  mu  kwifashisha  kuzuza  umubare  w’imikono  600  yasabwaga !

Byongeye  kandi  ngo  akaba  yaranatanze  imyirondoro  y’abantu  babili  bamusinyiye  kandi  baritabye  Imana.  Ibyo  bikaba  byaragaragaye  no  ku  mukandida   Gilbert  Mwenedata   nawe  ngo  waba  yaratanze  identifications  z’abantu  babili  bikaza  gutahurwa  na  komisiyo  ko  abo  bantu  batakiriho,  naho  Fred  Segikubo  Barafinda  we  ngo  ntiyujuje  ibyangombwa  byose  asabwa  harimo  n’icyemezo  k’inkomoko  ye  itazwi.  Komisiyo   ikavuga  ko  ibyo  byose  aribyo  yahereyeho  kudashyirwa  kuli  liste  ndakuka  y’abo  bakandida.

Itangazamakuru  ryashatse  kumenya  ukuri  kuri  iyo  liste   ndakuka  aliko  prof.  Mbanda  ntiyabakundira  abasubiza  ko  ufite  ikibazo  areba  igisubizo  muli  Doc.  ya  NEC!   Nguko  nguko  batashye  bimyiza  imoso   imbere  bicuza  igihe  batakaje  aho  ngaho.

Banyarwanda  banyarwandakazi  rero,  Leta  y’agatsiko  ka  FPR  ikaba  itarahwemye  kubangamira  bariya  bakandida  cyane  cyane  RWIGARA  Diane  Nshimiyimana  na  Bwana  MWENEDATA  Gilbert  mu  rwego  rwo  gukomeza  kuniga  demokrasi  kuko  ngo  bashoboraga  kuyibangamira  ahubwo  ikaza  guhitamo  guha  amahirwe  ku  munota  wa  nyuma  Bwana  MPAYIMANA   Philippe  we  wakunze  gutangaza  ko  afata  prezida  Kagame  nk’ikitegererezo  kuri  we!  nubwo  bwose  yatangiye  bamurwanya  dore  ko  yasaga  nk’uwiranze !  naho  Bwana  BARAFINDA  Segikubo  Fred  we  ngo  ni  comédien !  muriyumvira  namwe !

Banyarwanda  banyarwandakazi,  selon  l’opinion ,  uko  bivugwa  na  bamwe  mu  banyarwanda  babona  ko  iyi  ngirwamatora  yari  kuzapfa  kuryoshywa  na  bariya  bakandida  Diane  Rwigara  na  Gilbert  Mwenedata   bangiwe  kujya  ku  rutonde  ndakuka,  kubera  ko  ngo  baganishaga  nibura  ku  mpinduka  batariye  iminwa,  bikaba  byarababaje  abanyarwanda  batari  bake ! bigaragara  ko  bakeneye  impinduka  koko  muli  iki  gihugu  cyacu. Byongeye  uyu  Diane  Rwigara  akaba  yarafite  benshi  mu  rubyiruko  rumuli  inyuma  bikaba  byari  bugire  na  influence  muli  Diaspora  nyarwanda  kuko  yari  afite  igitekerezo  cyo  kuzahita  agirana  ibiganiro  n’abatavugarumwe  na  Leta  bose  baba  hanze  cg    imbere  mu  gihugu  aramutse  atorewe  intebe yo  mu  Rugwiro.

Hagati  aho  ku  rundi  ruhande  nanone  nubwo  hatarasobanuka  neza  ikibyihishe  inyuma  kubera  amagambo  yatangajwe  na  Komisiyo  y’amatora  ashinja  Diane  Rwigara  ko  yakoresheje  impapuro  mpimbano  mu  gushaka  imikono  600;   Prezida  w’umutwe  wa  politiki  P.S  Imberakuri  igice  kiyomoye  kuli  Me  Ntaganda  Bernard,   Mme  Mukabunani  Christine  nawe  yakoranije  itangazamakuru  kuri  uyu  wa  8/07/2017  avuga  ko  ishyaka  rye  ribeshyuza  amakuru   avuga  ko  ryaba  ryaratanze  urutonde  rw’abayoboke  baryo  mu  kunganira  ibyangombwa  by’uwashakaga  kwemererwa  kuba  umukandida  ku  mwanya  w’umukuru   w’igihugu  ariwe  Mme  Diane  Nshimiyimana  Rwigara;  Mukabunani   akomeza  atangaza  ko  ishyaka  rye  ryamaganye  kandi   Rwigara  Diane  Nshimiyimana  kuba  yarashimuse  impapuro  ziriho  urutonde  rw’abayoboke  b’ishyaka  P.S  Imberakuri  arwifashisha  mu  gukusanya  abamusinyira !  ati  turacyakora  iperereza  ryuzuye  ku  buryo  ibizavamo  tuzabijyana  mu  nkiko. Nimwiyumvire namwe!

Banyarwanda  banyarwandakazi  ngiyo  demokrasi  ishakwa  mu  Rwanda ! biteye  agahinda !  aliko  nsanga  ntawe  ugishidikanya  umuntu  avuze  ko  igihugu  cyacu  ndetse  na  bimwe  bigize  akarere  kirimo  hokamwe  n’ingoma  z’ibitugu  arizo  zigiye  kumalira  abaturage  ku  icumu,  ariyo  makimbirane  duhoramo  ashingiye  ku  macakubiri,  kwikubira,  gushaka  ubutegetsi  kungufu  no  kubugundira  aliko  Imana  niyonkuru !  tubitege  amaso !

Byanditswe ku  wa  09/07/2017,  na :
A.BEN  NTUYENABO,  KIGALI-RWANDA. 

 

Rwanda: prof. Kalisa Mbanda yihanangirije abakandida batangiye gusinyisha ababashyigikiye binyuranije n’amategeko.

Dine

Abo  ni  mu bantu  batatu  Philippe  MPAYIMANA,  Mme  Diane  Shima  RWIGARA  na  Mwenedata  Gilbert batangiye  igikorwa  cyo  gusinyisha  ababashyigikiye  bagera  kuri  600  hirya  no  hino  mu  gihugu,  baherutse  gutangaza  kuzahatanira  umwanya  w’umukuru  w’igihugu  mu  ngirwa-matora  yo  muli  2017.

Icyo  gikorwa  kikaba  giherutse  gutangira  ku  ya  13  Gicurasi,  iminsi  30  mbere  yuko  candidatures  zitangira  gushyikirizwa  Komisiyo  y’amatora  (NEC).  Kugeza  magingo  aya  hakaba  haragaragaye  abantu  batatu  ku  giti  cyabo  barimo  guharanira  kuba  abakandida  bigenga  muli  iryo  kinamico  ryo  ku wa  3  na  4/08/2017  aribo  Philippe  MPAYIMANA  waturutse  mu  gihugu  cy’ubufransa,  Mme  Diane  Shima  RWIGARA  na  Mwenedata  Gilbert  wongeye  gushaka  kugerageza  amahirwe  ye  dore  ko  ku  nshuro  ya  mbere  muli  2010  bitamuhiriye.

Itegeko   rya  Komisiyo  y’igihugu  y’amatora  rero  rikaba  rivuga  ko  umukandida  usinyisha  yemerewe  kubikora  ku  giti  cye  cyangwa  agashaka  abantu  bemerewe  na  Komisiyo  y’amatora  babimufashamo  byongeye  bakabikora  babanje  kubimenyesha  ubuyobozi  bw’akarere  bagiye  kubikoreramo  n’ahantu  hagomba  kuba  hazwi  bagiye  gukorera.

Ni  muli  urwo  rwego  kuri  uyu  wa  22/05/2017  mu  nama  yahuje  inzego  zinyuranye  ku  rwego  rw’intara  y’amajyaruguru;  Prezida  wa  Komisiyo  y’igihugu  y’amatora  yatunze  agatoki  yihanangiriza  bamwe  mu  bakandida  bigenga  barimo  Mme  Diane  Shima  Rwigara  na  Bwana Mpayimana  Philippe  kuba  barimo  gushaka  ababasinyira  mu  buryo  butemewe  n’amategeko  byongeye  bakabikorera  ahantu  hatemewe   nkuko  bishimangirwa  nanone  n’umukuru  wiyo  Ntara  y’amajyaruguru  Bwana  J.Claude  MUSABYIMANA  wemeza  ko  banabikorera  mu  tubari  bashaka  kubitangamo  na  Ruswa  banyuze  mu  nzira  zitemewe  ngo  babasinyire.

Bwana  Prof.  Mbanda  akomeza  agira  ati:  « nka  Bwana  Mpayimana  twamubwiye  ko  mbere  yuko  agiye  gushaka  abamusinyira  agomba  kujya  abanza  kwiyerekana  ku  buyobozi  bwaho  agiye,  ko  mu  Rwanda  atariko  bimeze  ko  hari  ubutegetsi  agomba  kumenyesha  icyo  agamije  bukabanza  kumwemerera!  aliko  ntabikozwa  ahubwo  ashimangira  ko  ari  uburenganzira  bwe  atagomba   kubikora ! »

Kuri  Diane  Rwigara  we ,  Prof. Mbanda  amurega  ko  akenshi  atanga  amafranga !  ati  twamubujije  kutongera  gutanga  amafranga  kuko  bishobora  kubangamira  umutekano !  aliko  uyu mukobwa  Diane  we  akisobanura  avuga  ko  abantu  bakunze  kumusinyira  iyo  abona  ko  bafite  ubukene  bituma  ashaka  kubafasha  abubakuramo  bityo  ngo  akabaha  amafranga.

Banyarwanda  banyarwandakazi,  ngibyo  ibyo  Prezida  wa  Komisiyo  y’amatora  mu  Rwanda, Bwana  Kalisa  Mbanda  yatangiye  kunenga  atunga  agatoki  bamwe  mu  bakandida  yita  ko  badakora  mu  mutekano.  None  se  demokrasi  bavuga  yaba  ari  iyihe  batareka  ngo  umukandida  yishakire  abamushyigikiye  yisanzuye? Tubitege  amaso!

Byanditswe  ku  wa  24/05/2017, na:
A.BEN  NTUYENABO,  KIGALI-RWANDA.