Rwanda : Kuki umunyamakuru Niyonambaza  Assoumani  yibasiwe na Leta y’u Rwanda ?

Assoumani Niyonambaza/photo imirasire.com

Assoumani Niyonambaza/photo imirasire.com

Leta  y’u Rwanda  itangiye  kwibasira  bamwe  mu  banyamakuru  bavugisha  ukuri mbere  yuko  amatora  y’umukuru  w’igihugu  yo muli  kanama  2017  ashyika.

Ni muli  urwo  rwego  kuri  uyu  1/03/2017 hakurikijwe ubujurire bwa Bwana Assoumani Niyonambaza, umuyobozi mukuru w’ikinyamakuru RUGALI akaba  n’umusesenguzi uzwiho kumenya gutohoza inkuru adashyizemo amarangamutima cyangwa ngo anyure mu kwaha kwa Runaka.

Yaraye amenyeshejwe ko ikibazo  yagiranye na UTAB (University of technology and arts of Byumba) ubwo yajuriraga yagifatiweho  ibihano (nubwo bwose atari yitabiriye iyo mikirize) na Komite ndangamyitwarire  y’urwego  rw’abanyamakuru bigenzura   mu Rwanda (RMC)  birimo guhagarikwa igihe  cy’amezi atatu  agahita  yamburwa  n’ikarita  y’itangazamakuru kandi  bigatangazwa.

RMC  kandi ikaba yanategetse uyu Niyonambaza  Assoumani  gusaba  imbabazi  mu  nyandiko  Kaminuza  ya  UTAB  n’abayobozi bayo  cyane  cyane  Prof.Dr. Nyombayire  Faustin  na  Mme  Justine  Mbabazi  we  uvuga  ko  yishimiye  iyi mikirize  aliko  ati:  iyaba  n’ikinyamakuru  cye  Rugali  cyabaye  gifunzwe burundu  aho  guhana  umuyobozi  mukuru  wacyo  gusa  nta  na  amande  bamuciye! ati  byongeye  kandi  twagombye  guhabwa  n’indishyi!  ngaho  rero, nimwiyumvire  namwe! None  se  Komite ndangamyitwarire  y’urwego  rw’abanyamakuru  bigenzura yabaye  urukiko kuva ryari?

Banyarwanda banyarwandakazi, tubibutse  ko  impamvu  nyamukuru  y’iki  kibazo  ari  uko  iyi  Kaminuza  UTAB  ivuga  ko  yaregaga  ikinyamakuru  Rugali  cy’uyu  Niyonambaza  Assoumani  abereye  umuyobozi   kuyandikaho  inkuru  zisebanya, gutera  ubwoba, kwaka  ruswa,imicungire  mibi  ya  Kaminuza  harimo  gutanga  amasoko  mu  gusesagura  n’ibindi….byose  binyuze  muri  icyo  Kinyamakuru.

Mu  kwanzura  iyi  Komite  ndangamyitwarire  ya  RMC  yanategetse  ko  ikinyamakuru  Rugali  kigomba  guhita  gitangaza inyandiko  inyomoza  izatangajwe  mbere. Nguko  nguko  itangazamakuru  ryo  mu rwa  Gasabo!

Ni  agahomamunwa!

Banyarwanda  banyarwandakazi, uyu  munyamakuru  Niyonambaza  Assoumani  yari  umwe  mu  banyamakuru  n’umusesenguzi  utatinyaga gushyira  ku  karubanda  amafuti  ya  bamwe  mu  bayobozi b’iki  gihugu  ku  buryo  yagiye  anabifungirwa  akwongera  akarekurwa, urugero  mwibuka  mwese  hambere  aha  hashize  kuba yarigeze  gufungwa  azize  gutohoza  no gushaka  gutangaza  ugucana  inyuma  kwa  bamwe mu bayobozi  l’actuel  procureur général  de  la  république  et Mme Dr. Diane gashumba, Ministre  w’ubuzima!

Banyarwanda, Banyarwandakazi  rero, banyamakuru, basesenguzi, murarye  muri  menge  kuko  urukubise  mukeba  rutwara  na  nyoko!

Mugire  amahoro.

 

Byanditswe  ku wa 02/03/2017, na:
A.BEN  NTUYENABO, KIGALI-RWANDA.