Archives mensuelles : novembre 2016

Muri Gereza ya Muhanga, haje ikipe yo kwica abagororwa. Igizwe nande?

Gereza ya Muhanga

Gereza ya Muhanga

Leta y’uRwanda yahinduye amayeri yo kwica abantu batandukanye badashakwa n’ubutegetsi yifashishije bamwe mu bagororwa isanzwe yaratoje ikanabaha akazi ko gutanga ubuhamya ku rwego mpuzamahanga. Abagororwa n’abafungwa bafungiye muri gereza ya Muhanga ubu icyoba ni cyose nyuma yaho ubu barimo kwicwa umusubizo ku bisa n’umugambi muremure wo kurimbura benshi muribo.

Icyi cyoba gishingiye ko mu ijoro ryo kuwa 23 rishyira kuya24 Ugushyingo 2016 hishwe umufungwa witwa Higiro Prosper mwene Nkundukozera Ibrahim na Nishyirembere ukomoka mu kagali ka Cyimirama, umurenge Busoro, akarere ka Nyanza . Iyi nzirakarengane yishwe ikubiswe kugeza ashizemo umwuka ku mabwiriza ya Bwana Ruzigana Emmanuel afatanyije na Komiseri wungirije witwa Murenzi .Uyu nyakwigendera akaba yari akiri umwere kuko yari atarahamwa n’icyaha .

Umuvugizi wa RCS, Sengabo Hillary

Umuvugizi wa RCS, Sengabo Hillary

Umutwe w’insoresore ukoreshwa mu kwica abafungiye muri gereza ya Muhanga ngo washyizweho n’aba banyabubasha bakingiwe ikibaba n’aba DMI bakorera muri iyo gereza ngo basa n’abashinzwe gahunda y’iyicarubozo aribo I.O Hodari alias Gisiga na security officer AIP Mugwiza . Aba ba DMI ngo nibo batanga amabwiriza y’abagomba gupfa bifashishije ba batangabuhamya ngo babigize umwuga ku rwego mpuzamahanga, uyu mutwe kandi ninawo aba bagome bifashisha ngo mu kwirindira umutekano bamwe bita « les gardes corps ».

Uyu mutwe usibye kurinda Ruzigana Emmanuel ngo unashinzwe no gukumira abanenga ubutegetsi bwe. Dore ko atajya akurwa mu buyobozi yitwaje ko ari umutangabuhamya mpuzamahanga .Uyu Ruzigana Emmanuel ngo mu kumushyigikira, ubuyobozi bwa Gereza ya Muhanga ngo bwabwiye abagororwa n’imfungwa ko aba bicanyi bagomba kuyobora gereza ubuziraherezo ku buryo ibi aribyo biteye ubwoba abafungiye muri iyi gereza kuko uyu mwicanyi ngo yababwiye ko ntaho bazamuhungira kuko ashyigikiwe na gereza ya Muhanga.

Uko FPR yishe urubozo imfungwa muri gereza ya Gitarama (Muhanga) ikimara gufata ubutegetsi muri 1994

Uko FPR yishe urubozo imfungwa muri gereza ya Gitarama (Muhanga) ikimara gufata ubutegetsi muri 1994

Mubyo uyu nyakwigendera yazize ngo yanengaga uburyo abafungiye muri iyi gereza bafatwa nabi. Gusa ngo nyuma yaho ubuyobozi bwa gereza ya Muhanga buhaye amabwiriza aba bicanyi ko uwo muntu unenga imikorere ya gereza ngo atunganywa (yicwa) ngo bakimara kumwica ubuyobozi bw’iyi gereza bwavuze ko ngo Nyakwigendera yishwe n’igicuri.

Izi nkoni kandi ngo mu minsi ishize zakubiswe uwitwa Munyanshongore Alexandre aba bicanyi ngo bibwiye ko yanogonotse ariko kubera umunsi we wari utaragera ngo yaje kuzanzamuka ajyanywa kwa muganga i Kabgayi ku buryo n’ubundi ngo asa n’umupfu kuko ntacyo ashobora kuzimarira kuko yahindutse igisenzegeri nabwo nagira amahirwe aba bicanyi ntibazamunogonore mu minsi iri imbere.

gitarama-incendie

Gereza ya Muhanga yaratwitswe muri 6/2014

Twakwibutsa ko gereza ya Muhanga (Gitarama) imaze gupfiramo abantu batagira uko bangana kuva FPR Inkotanyi yafata ubutegetsi mu Rwanda muri 1994. Za rapport za MSF iyo uzisomye umera urumeza. Ndetse n’amafoto yafashwe muri gereza arenze ukwemera. Muribuka kandi ko mu kwezi kwa gatandatu muri 2014, iyo gereza yatwitswe, abatikiriyemo ntawe uzi umubare wabo. None dore iyo gahunda yo kumaraho izo mfungwa irabandanije.
Gaston Mukimbiri
Kigali, Rwanda, 28/11/2016

Rwanda : Prezida Kagame nawe niyumvikane n’abatavugarumwe na leta ye nkuko Prezida Kabila yabigenje

Paul Kagame en 2014 _wikipedia

Paul Kagame en 2014 _wikipedia

RWANDA:PREZIDA KAGAME  NAWE NAHITEMO GUTERA IKIRENGE MU CYA MUGENZI WE JOSEPH KABILA  YUMVIKANA N’ABATAVUGARUMWE NA LETA YE AHO GUKOMEZA GUSHAKIRA AMATA MU MATAKO Y’INJANGWE.

Nibyo koko rero dutekereje uko igihugu cyacu kirimo kuyoborwa ntibyari bikwiye ko Prezida Paul Kagame  n’agatsiko ayoboye kari ku butegetsi mu Rwanda bakomeza gusahulira mu nduru kuko u Rwanda n’abanyarwanda batagikeneye ihangana rya hato na hato ry’abatavugarumwe na Leta ya FPR,nkaba mbona igihe kigeze ngo Prezida Kagame yumve ko yaba agomba ibiganiro bitaziguye n’abatavugarumwe na Leta ye ari nako atanga urubuga rwisanzuye ku mashyaka yose ya politiki atavugarumwe na Leta ya Kigali akorera hanze y’igihugu mu rwego rwo gushaka amahoro arambye  no kubakira hamwe igihugu, bityo irangizwa burundu ry’ikibazo cy’impunzi z’abanyarwanda baba mu mahanga kikaba amateka mu gihugu cyacu.

Banyarwanda banyarwandakazi nkurikije itungurana Prezida Joseph Kabila wa RDC amaze kugaragaza ashyiraho Ministri w’intebe mushya Bwana Samy Badibanga wari usanzwe ahagaraliye amashyaka atavugarumwe na Leta ya Kinshasa nyuma y’ibiganiro n’abatavugarumwe nawe,biragaragara ko uyu mugabo Kabila yaba yifuriza igihugu cye amahoro atarimo umwiryane n’intambara z’urudaca mu benegihugu bityo rya Hame ryo kugabana ubutegetsi mu mahoro rikunze kubangamirwa na bamwe mu bayobozi ba afrika (murebe u Rwanda rwacu) nsanga yaba intangiriro n’urugero rwiza byatanga isomo n’ikizere ku bihugu bituriye ibiyaga bigari by’umwihariko Prezida Kabila mu gihugu cye.

Banyarwanda banyarwandakazi,nk’abanyarwanda natwe dushatse nta mpamvu yo kudatera ikirenge mu cy’abaturanyi bacu ba RDC kuko nsanga igihe kigeze ngo natwe dufatirane twinjira mu mpinduka nk’iyo bityo bizadufasha kurenga imipaka yose ituzitiye muri ibi bihe twegereje amatora y’umukuru w’igihugu  »BARARUSHYWANUBUSA » ariwe  Paul Kagame! kuko ayo matora ntaho yemejwe mu itegeko-nshinga mwitoreye ahubwo handitsemo inzibacyuho y’imyaka 7 yidodeyeho wenyine kugirango akomeze ayobore!kimwe nuko nta nizindi candidatures z’amashyaka cyangwa abiyamamaza ku giti cyabo zemewe gutangwa muli iyo processus  y’imyaka 7 ya Prezida Paul Kagame  (soma neza itegeko-nshinga rivuguruye nkuko ryanyuze muli réferendum), Banyarwanda banyarwandakazi ese tuzaba turi mu bihe bihe bidasanzwe ku buryo habaho inzibacyuho?jye ndasanga ya commission ya Me Evode ishinzwe kurengera itegeko-nshinga yagombye gutahiriza kimwe ivuga ko ari mandat ya gatatu aho kwirirwa ipakira uburiganya mu mitima y’abanyarwanda bagowe.

Banyarwanda banyarwandakazi ndabasaba kwongera kugira amatsiko mwisomera ririya tegeko-nshinga rivuguruye mwageretsweho urusyo mwitorera muli referendum ko ntaho byanditse ko inzibacyuho y’imyaka 7 ya Prezida Paul Kagame igomba gutorerwa!kwari ukubasogongeza dore ko mwaraye amajoro mwikoreye amakarito n’ibiseke mujyanye ibukuru mutazi ko mwikoreye impyisi!

Mugire amahoro.
Byanditswe kuwa 18/11/2016,na:
A.BEN NTUYENABO,
KIGALI-RWANDA.

Rwanda : i Gatsibo habaye imyigaragambyo kubera inzara

img_20161031_092036Nkuko mwabibonye mu nkuru yanyuze kuri « The rwandan » ivuga uburyo abaturage bo muri Gatsibo mu murenge wa Rwimbogo bakoze imyigaragambyo bakajya ku murenge gusaba ibyo kurya kuko inzara yari ibarembeje, kugeza naho bavudukanye umutegetsi wuwo murenge Munyaburanga Joseph, kuva icyo gihe kugeza uyu munsi abaturage birirwa bicaye kumurenge abandi baharyamye mbese wagira ngo niho habaye mu rugo nkuko mubibona ku mafoto aherekeje iyi nkuru.

Ariko ibyo nubwo byashakuje  kandi bikavugwa cyane mw’itangazamakuru abaturage nanuyu munsi baracyiyicira isazi mu maso kugeza ubwo abaturage bahira amababi y’imyumbati y’imitamisi ( yica ) bagasekura bagateka bakarya, hari imiryango 6 izwi yabikoze irapfa hafi gushiramo umwuka. Nyuma hatanzwe ibishyimbo n’ibigori abaturage bavuga ko byari bike cyane ugereranije n’umubare w’abaturage bishwe n’inzara, urebye ababibonye ntibarenze 1/50 by’abaturage batuye umurenge wa Rwimbogo kandi mu byukuri abaturage bose bameze nabi kuko nawawundi wari wifashije muri iyiminsi arya rimwe k’umunsi kandi nabwo bimugoye cyane.

Abaturage bavuga ko nabatoranijwe habayemo ikimenyane ndetse n’ubujura bukabije ku buryo ibyinshi ari ibyatwawe n’abategetsi bo muri uwo murenge. Nimg_20161031_092551yuma yuko iyo myigaragambyo y’abaturage iba uwategekaga uwo murenge wa Rwimbogo ariwe Munyaburanga Joseph yaregujwe ibyo biryo byatanzwe adahari, bikekwa ko yaba yarazize ko yananiwe guhosha imyigaragambyo y’abaturage nubwo yarasanzwe avugwaho imyitwarire itari myiza mu baturage. Gusa ngo ibyo byo kurya ntibyabujije kwibwa n’ubwo byari bihagarariwe n’abasirikari, abapolice ndetse na daso. Ibyo byatumye nuwo munsi wo kubitanga abaturage barenga ijana bakoze imyigaragambyo bava ku murenge bagera ku karere ka Gatsibo ( urugendo rwibirometero bitari munsi ya 40 ) ari nako abari aho basunikana n’abasirikari n’abapolice.

Twaganiriye nabaturage bo muri uwo murenge batubwira ko bifuza ibintu bibiri (2) gusa.

* Icya mbere, bifuza ko leta yabasubiza  uburenganzira bwabo batswe ku butaka bwabo, aho babategeka guhuza ubutaka bagahingamo igihingwa kimwe leta yifuza mu gihe yifuza, kuko ibi aribyo bikurura inzara. Batanze ingero nyinshi berekana ko ataribwo bwa mbere izuba ricana ko ariko batigeze basonza gutya ko babaga bafite imyumbati, ibijumba, ubugari, ubunyobwa nibindi, bityo ngo bakabasha guhangana n’izuba. Ubu nibwo abo baturage bishwe n’inzara kugera ku rwego rwo gusaba infashanyo.

* Icya kabiri bifuza ko leta yareka gutekenika ibeshya ku maradiyo ko habaye amapfa ariko ko abaturage nta kibazo bafite. Ahubwo ni babafashe bahereye ruhande kuko abaturage bose bameze nabi cyane, ari abacuruzi, abahinzi, aborozi, abubatsi , abanyabukorikori, abadozi, abamotari, abanyonzi, abarimu, nabandi bose bibasiwe n’inzara ku buryo ukiri umugabo arya rimwe ku munsi nabwo bimugoye cyane. Ibi byose kandi byiyongera ku misoro yikubye kabiri, imisanzu ya hato na hato, kandi abaturage banaburaye.

Mu gusoza ariko sinakwibagirwa umuturage twaganiriye nubwo atashatse ko amazina ye ajya ahagaragara kubera impamvu z’umutekano we wambwiye ati : nizo mfashanyo zabo nibazireke baturekere uburenganzira ku masambu yacu  leta yigaruriye kandi twarayiguriye amafaranga yacu, abandi bakayahabwa n’ababyeyi babo ho imigabane n’umurage. Ati leta nitureke duhinge ibihingwa byose nkuko twabikoraga mbere, ati nta nzara twari twarigeze kuvaFPR yafata ubutegetsi muri 1994. Ati mu myaka irenga 20 ubu nibwo dushonje nyuma yuko leta y’urwanda yigarurira imitungo yacu.

Natwe nk’itangazamakuru turasaba leta ya kigali kubahiriza ibyifuzo by’abaturage ikareka kubicisha inzara ku bushake. Nubwo twibanze mu murenge wa Rwimbogo muri Gatsibo siho gusa hari ikibazo kuko mu gihugu hose hari inzara. Mwunvishe ikiganiro cya BBC gahuzamiryango cy’imvo n’invano cyo kuwa 12/11/2016 cyavugaga ku nzara mu karere ka Kayonza. Aba baturage rero nibadatabarwa barashira.

J. Jules Rugero

 

Rwanda : Kuki Louise Mushikiwabo na Dr. J. Damascene Bizimana bibasiye Ubufransa ?

mushikiwabo

Louise Mushikiwabo na Jean Damascène Bizimana

 

 

 

 

 

 

 

 

Ni mu magambo y’ubwishongozi, Ministri w’ububanyi n’amahanga Mme MUSHIKIWABO Louise aherutse gutangaza, ubwo kuri uyu wa 10/11/2016 hamwe n’itangazamakuru  uyu mukecuru w’imyaka 55 wavukiye I Jabana muli 1961 icyitwaga komini Rutongo bahimbye akazina ka first lady Hillary Clinton nyuma gato y’amatora yo muli USA; yagize  ati « ukuticuza n’ubushotoranyi bw’abafransa ntabwo bucyihanganirwa, ati u Rwanda rurambiwe kwihanganira ubushotoranyi bw’ubufransa ndetse ko rugiye no kugaragaza uruhare rwabwo muri jenoside yakorewe abatutsi muli 1994″.

Mushikiwabo urebera ahanini mu mboni za shebuja Prezida Paul Kagame yakomeje atangaza ko u Rwanda rugiye gushaka inzira yo gusohora impapuro zita muri yombi abasirikare bakuru 22 b’abafransa bagaragaye ku rutonde ruherutse gushyirwa ahagaragara  na Dr. Bizimana J. Damascene umunyamabanga nshingwa-bikorwa wa CNLG  ku ruhare rw’abafransa  muli jenoside yo mu Rwanda 1994. Mushikiwabo  yongeraho kandi ko uretse abo hari n’urundi rutonde rw’abanyapolitiki b’abafransa rugikusanyirizwa ibimenyetso abo bose ngo bakagomba kuzashyikirizwa ubutabera.

Banyarwanda, Banyarwandakazi, aho ntitwaba dukora intonde z’abafransa tuvuga ko bagomba gushyikirizwa ubutabera tugira ngo dusibanganye izitwagiriza?

Ese nyuma y’imyaka 22 jenoside ibaye nibwo Mushikiwabo na Dr. Bizimana bibutse ko n’abafransa bagize uruhare muli jenoside akaba aribwo bagomba kubashyira ku rutonde no kubashakira impapuro zibata muri yombi?

Urwego CNLG  ruyobowe na Dr. Bizimana  rwigize urukiko se rwo rufite ubuhe bubasha n’ubushobozi ku buryo uwo rushyize ku rutonde ahita akorerwa impapuro zimuta muri yombi?

Uretse ibinyoma byo kurangaza itangazamakuru ryo mu Rwanda naryo risanzwe rikora biguruntege, Mushikiwabo na Dr. Bizimana nsanga  birengagiza ko ibyo bavuga bisa n’inzozi kuri bo ndetse n’igihugu muri rusange kuko tubona nta narimwe u RWANDA rushobora guhabwa uburenganzira bwo kujya gukorera iperereza ku butaka bw’ubufransa byongeye ku baturage b’abafransa!

Ahubwo ibiramambo Ministri Mushikiwabo na Dr. Bizimana bagombye gusobanulira abanyarwanda impamvu nyakuri bahishiriye abo banyabyaha b’abafransa hakaba hashize imyaka 22 yose! Muli ibi bihe batagicana uwaka akaba aribwo bibutse gushaka inzira zose mu kubata muri yombi!

Tubiteze amaso!
Mugire amahoro.

Byanditswe  kuwa 12/11/2016, na:
A.BEN NTUYENABO,KIGALI-RWANDA.

Rwanda : Christine Mukabunani na Frank Habineza barimo gusarurira mu rucaca

Christine Mukabunani na Frank Habineza

Christine Mukabunani na Frank Habineza

Nkuko bigaragalira buri wese amashyaka PS Imberakuri igice kiyobowe na Mukabunani Christine ari nacyo cyemewe na Leta ya FPR na Green  Party iyobowe na Frank Habineza nubwo birengagiza ko babarirwa mu kwaha kwa FPR byanga bikunde barifuza imyanya mu nzego zifata ibyemezo mu butegetsi bwayo. Ese  Leta y’agatsiko hari icyo ishobora kubamalira muli ibi bihe igezemo uretse kubigizaho nkana igirango ibagire ibikoresho byayo gusa?

Ni mugihe gishize mu kiganiro n’abanyamakuru aho Madame Mukabunani Christine umuyobozi w’ishyaka PS IMBERAKURI igice kiyomoye kuli Prezida fondateur waryo Me Ntaganda Bernard,amaze kubona ko ibyo bagororeye umuryango FPR ishyaka riri ku butegetsi bawufasha mukwirukana mu ishyaka Prezida fondateur waryo Me Ntaganda n’abandi bari bashyigikiye ibitekerezo bye,ni mu minsi ishize kuwa 11/09/2016 aho uyu Mukabunani yabaye nkuwerurira umunyamakuru ashaka kumwumvisha ko nta musaruro babyungukiyemo ko ahubwo FPR yabafashe nk’ibikoresho bidafite umumaro n’ubwenge.

Mukabunani Christine umaze kuyobora inshuro ebyiri zose ihuliro ry’amashyaka yemewe mu Rwanda yatangarije umunyamakuru Emma Marie Umurerwa ko igihe kigeze ngo bahabwe imyanya mu nzego z’ubutegetsi zifata ibyemezo kuko ngo kuba bicaye mu ihuliro ryitwa ko ari nyungurana-bitekerezo gusa bidahagije!ati uretse ihuliro dukeneye ahandi hagutse dutambukirizamo ibitekerezo byacu dore ko ari na byinshi!yakomeje atangariza umunyamakuru Emma Marie Umurerwa  ati niba dukorera hamwe mukungurana ibitekerezo byubaka igihugu twagombye kubona aho tubitambukiriza bityo ijambo ryacu rikarushaho kumvikana.

Umunyamakuru yakomeje amubaza niba hari gahunda n’ubushobozi ishyaka rye rifite ryo guhatanira umwanya mumatora ya Prezida wa Republika ateganijwe muli 2017, Mukabunani yasubije ko bafite abantu babifitiye ubushobozi ati kuki se tutakiyobora? ati aliko bizemezwa na Congrès  y’ishyaka.

Aya mashyaka PS Imberakuri ya Mukabunani na Green Party yitwa ko ari muli opposition mu Rwanda imbere mu gihugu si ukuvuga ko yabuze aho asohorera ibitekerezo byayo ahubwo nsanga mu kugabana imyanya y’ubuyobozi yarategereje guhabwa na FPR amaso yaraheze mu kirere none akaba aribwo yibutse ko yaruhiye ubusa kandi amazi akaba yararangije kurenga inkombe.Aya mashyaka yombi akaba yifuza imyanya yihariye itavangiye,bivuga ko mu gihe andi akomeza kwifubika mu mababa ya FPR no gushyirwa ku rutonde rw’abakandida ba FPR mu gihe cyose cy’amatora kugirango agabane imyanya, aya yo  ntajya abikozwa bityo bigatuma nta nuwo kugirwa gitifu bashobora kuronka ibyo bikanatuma bahozwaho ijisho na Leta ya FPR kugirango hatagira ubihishamo waba akorana n’abarwanya ubutegetsi imbere mu gihugu aliko cyane cyane abari hanze y’u Rwanda.

Tubibutse ko muli manifeste politique yakozwe niri shyaka PS Imberakuri igice cyemewe na leta ya FPR, mu matora y’abadepite 2013 harimo igitekerezo cyo kugarura isomo ry’igifransa ryari ryaraciwe mu mashuri yo mu Rwanda icyakora cyatekerejweho gihabwa umugisha na Leta ya FPR bityo gouvernement yemeza ko urwo rurimi rugomba gusubizwa mu mashuri yo mu Rwanda ku buryo iyo gahunda izatangirana n’umwaka w’amashuri 2016-2017.

Nkurikije ibyiyumviro by’aya mashyaka PS Imberakuri ya Mukabunani na Green Party nayagira inama yo kuyoboka opposition nyakuri aho gukomeza kugaraguzwa agati na Leta ya FPR irimo kwishakira abayoboke bo kuzisasira igihe cyayo kirangiye burundu. Keretse niba yemeye aka wa mugani ngo ‘’Akabaye icwende ntikwoga’’!
Mugire amahoro.
 
Byanditswe kuwa 09/11/2016,na:
A.BEN NTUYENABO,KIGALI-RWANDA.

Rwanda/Gasabo District : ngo kudatanga umusanzu w’umutekano bihwanye no kwigomeka kuri Leta.

Steven RWAMURANGWA

Steven RWAMURANGWA

Ni muli urwo rwego  mu karere ka Gasabo aho umuyobozi Steven RWAMURANGWA ayobora harimo kurangwa ikibazo cy’abaturage  bo mu murenge wa Gatsata  ubuyobozi bwe burimo gufatira ibihano buvuga ko ari ukwigomeka kuli Leta ahanini bitewe n’ibirarane by’amahôro  y’umutekano babereyemo utugari kubera ubukene.

Icyo kibazo kikaba kimaze igihe gito kituye ku baturage batagira shinge na rugero aliko Leta ya FPR ikaba idakozwa impamvu y’ubukene bitwaza.

Bwana MUHIRE Mashami Roger umwe mu banyamabanga Nshingabikorwa bo muli district ya Gasabo akaba ashinzwe akagari ka Karuruma ho mu murenge wa Gatsata avuga ko nta kabuza umuturage uwariwe wese urimo ikirarane cy’amahôro y’umutekano agomba kuba yacyishyuye bitarenze iminsi itatu  cyangwa agafatirwa ibihano bihwanye n’uwigometse kuri Leta. Umwe mu bakozi b’akarere  wansabye kutavuga amazina ye kubera umutekano yampamirije ko icyemezo  cyafashwe kigomba kuzanyuza umukubuzo mu Tugari twose tugize imirenge y’akarere ka Gasabo mpaka bishyuje ku ngufu ayo mahôro.

KANANI J.Bosco, umwe mu basaza bashinjwa kwigomeka kubera ko yabuze ubwishyu hakaba hashize amezi atanu yadutangarije ko nta kundi yabigenza ati ubukene si ingeso bazakore icyo bashaka ati ese igihe nahereye nta kazi  mfite  yewe dore nuko ngana! Nabo najyaga nguza bamaze kundambirwa nta kuzukuru ngira iruhande rwanjye, ati rero « urukwavu rushaje bararurya », ati ni nacyo gisubizo nahawe na MUHIRE Mashami Roger ari nawe Munyamabanga Nshingwabikorwa w’akagari kacu ka Karuruma mu gihe nari mwitabye ngira ngo anyongerere igihe mbone uko mbona ubwishyu bw’amezi atanu  buhwanye n’ibihumbi 7.500Frw nari ngezemo!Umusaza Kalisa yakomeje ambwira ati wa mugabo we naremeye ndazipfukamira (yavugaga ingoma) ati niyo mpamvu naringeze muri iyi myaka aliko ndananiwe! Ati ni ugusenga cyane kuko iyi yo ni gahotozi keruye!

Ngibyo ibyo muli Gasabo, kutabonera igihe amafranga y’umutekano ni ukwigomeka kuli Leta  ya FPR, aliko twihangane kandi dushake ibisubizo kuko  ntagahora gahanze kandi nta joro ridacya.

Byanditswe ku wa 08/11/2016, na:
 A.BEN  NTUYENABO, KIGALI-RWANDA.

Steven Rwamurangwa yahishuye ko hagiye gushyirwaho mitiweli ya « Girinka »

Steven Rwamurangwa

Steven Rwamurangwa

RWANDA:URETSE ABATURAGE BAHEZE MU GIHIRAHIRO CYA MUTUELLE DE SANTE HAGIYE NO GUSHYIRWAHO MUTUELLE DE SANTE Y’AMATUNGO MAREMARE N’AMAGUFI.

Ni kuwa 05/11/2016 mu mpera z’icyumweru gishize aho umuyobozi w’akarere ka Gasabo kamwe mu tugize umugi wa Kigali  Bwana Steven RWAMURANGWA akaba n’umwe mu bayobozi bafitanye amasano ya hafi na Prezida Paul Kagame yatangarije abanyamuryango ba RPF-Inkotanyi bo mu Karere ayobora ko kimwe mu byiyumviro bazashyira muli programme politique y’imyaka irindwi irimo itegurwa kandi ishingiye ku mirongo migari ya FPR-Inkotanyi izatangirana na mandat ya gatatu hazashyirwaho mutuelle de santé  y’amatungo maremare n’amagufi nkuko ku bantu bimeze.

Bwana RWAMURANGWA akomeza avuga ko gushyiraho ubwisungane bw’amatungo bizafasha gahunda ya Girinka ishoboka kuko ngo amaze gukora ibarura ry’inka mu Karere ayobora yasanze  mu nka ibihumbi bitatu harapfuyemo Magana atatu zose. Akomeza ahamya ko gushyiraho ubwisungane ku matungo bitazananirana bitewe nuko no ku bantu byakunze, ati ibi bikaba bizagenwa n’iteka rya Ministri ufite ubwisungane mu kwivuza mu nshingano ze bagendeye ku byiciro by’ubudehe nkuko bimeze ku bantu,byongeye ati iyi gahunda izanafasha bamwe mu bagenerwabikorwa ba Girinka badafite ubushobozi bwo kubungabunga ubuzima bw’ayo matungo no kwirinda inyerezwa ryayo ndetse n’imyitwarire mibi y’abashinzwe kuyavura no kuyitaho.

Banyarwanda banyarwandakazi,abayobozi baragwira kubona aho basigaye bagereranya abantu n’amatungo!uyu muyobozi yiyibagije ko no mu bantu uretse amatungo ikibazo cy’ubwisungane mu gihugu hose cyananiranye kugeza ubu! Hari abaturage bamaze amezi atandatu baratanze amafranga yabo mu karere ayobora kugeza ubu batarabona amakarita y’ubwisungane! Kuki atabanza ngo akemure icyo kibazo?keretse niba asanga Gahunda ya Girinka idashoboka nkuko abyivugira noneho akaba yifuza ko yasimburwa n’amahôro yazaturuka ku bwisungane bw’amatungo?

Banyarwanda banyarwandakazi,imikorere y’aba bayobozi yo kumaranira kuzuza imihigo kugirango  bashimishe Shebuja turabona ikomeje guhutaza abaturage  ku buryo bukabije batitaye mu gukemura ikibazo cy’inzara n’ubukene bibugarije! iki  rero nkabona cyari igihe cya buri munyarwanda  wese  ko  ahagaruka  akarwana  ku  burenganzira  bwe atitaye ku nzozi z’agatsiko  kayoboye u Rwanda.

MUGIRE AMAHORO.
Byanditswe ku wa 07/11/2016, na:
 A.BEN  NTUYENABO,KIGALI-RWANDA

Kigeri akimara kwima mu nshingano yahawe harimo gushyiraho Minisitri w’Intebe ahawe n’amashyaka