Archives mensuelles : juillet 2016

Rwanda/Nyagatare : uretse inzara yabamaze banavoma amazi y’ibirohwa arimo amase y’inka n’indi myanda

photo igihe.com

Aho ntahandi ni mu ntara y’iburasirazuba bw’u Rwanda, mu karere ka Nyagatare aho kuva igihe kirekire abaturage bamenyereye gusangira amazi y’ibirohwa n’amatungo yiganjemo cyane cyane inka. Muli aka karere rero, by’umwihariko mu Murenge rwa Rwimiyaga, abaturage baturiye uwo murenge byababereye ihame ko bagomba gusangira ku mbehe imwe cyangwa kunywera ku nkongoro imwe n’inka. Nkaba mbona aho bigeze aba baturage ari abo gutabarizwa imiryango mpuzamahanga ikaba yagira icyo ibamalira kuko dusanga. Leta ya FPR itabitayeho kandi yarahurujwe hashize imyaka myinshi iki kibazo kivugwa ari nako kinyura mu bitangazamakuru, ku maradiyo mpuzamahanga nka VOA n’ahandi…aliko Leta y’agatsiko mu nshingano zayo ntacyo ibikoraho ahubwo igahora ishyira imbere amadiscours meza ayitaka aho Ministri w’intebe Bwana Anastase Murekezi ahoza ijambo kuli radio y’igihugu abeshya abanyarwanda ko kugeza muli 2017 « nta munyarwanda numwe uzasigara atagejejweho amazi meza kugeza ku kugereranyo cya 99% !!! » Ni agahomamunwa pe!

Banyarwanda, Banyarwandakazi, mu buzima bwabo bwa buri munsi, aba baturage b’umurenge wa Rwimiyaga ho mu karere ka Nyagatare bahamyako banywa kandi bagakoresha amazi inka zatayemo umwanda zikanayagangamo, bavoma mu gishanga cy’uruzi rw’akagera ahateganye na mont Karyuwimba wo muli Tanzaniya, ayo mazi akaba yariyoboye mu gishanga yiyomoye ku ruzi rw’Akagera. Ayo mazi ni nayo bashoramo inka n’andi matungo magufi byongeye kandi bajya kuyavoma barinze gukora urugendo rurerure plus de 10 km bagera yo si ukuyavoma gusa kuko baba babyigana n’abitsiritana imbyiro ari nako bahigika amase y’inka n’indi myanda yose kugira ngo bashobore kuyavoma. Ayo mazi nta bara agira, si urwererane, umukara cyangwa ubururu ahubwo arangwa n’umwanda w’ubwoko bwose. Kuvoma ayo mazi kandi ntibyoroshye nanone kubera ingona ziyabamo! Avomwa n’umugabo hagasiba undi!

Bitewe n’urugendo rurerure bakora bajya kuyavoma, umwe mu baturage witwa Kuradusenge Edouard utuye muli uyu murenge wa Rwimiyaga yadutangarijeko nubwo bwose babona ko ari umwanda bitababuza kubanza kuyagotomeraho bakiyageraho kubera inyota!

Umuyobozi w’ikigo cy’amashuri abanza cya Gatebe ho muri uwo murenge wa Rwimiyaga, Bwana Bumbakare Faustin yadutangarije ko ingaruka z’aya mazi ari nyinshi; ati hari abanyeshuri bajya kwiga badaheruka gukaraba, abandi badaheruka kumesa abandi bagasiba ishuri kubera ko bagiye kuvoma bagataha bakerewe, ibyo byose bigatuma hari n’abikoza ku ishuri inshuro zitarenga ibyili mu cyumweru, akomeza agira ati nanjye ubwanjye hari ubwo ntaha mvuye kwigisha ngafata igare nkazirikaho amajerikani abiri nkajya kuyavoma!! Ati ntakundi twabigenza twabuze gitabarwa kandi indwara z’inzoka zo mu nda tuyakomoraho nazo ntizitworoheye!ati ngubwo ubuzima tubayemo!

Banyarwanda, Banyarwandakazi, imibereho yabo baturage iteye agahinda aliko ntakundi babigenza kuko ugize icyo akopfora yisanga muli bya Bihome byashyiriweho abakene nkuko itohoza riherutse ryakozwe na HRW ribihamya nubwo bwose Leta y’agatsiko idahwema kubeshyuza izo rapports ku Rwanda.

Banyarwanda, Banyarwandakazi, iri niryo terambere twari dutegereje kuli Leta ya FPR koko? Dusabwe kwibaza bwangu kandi tugashyira akadomo imbere y’imyanzuro twafashe buri wese, bityo tukava kuri wa mugani ngo « akabi kakirwa nk’akeza », kuko ntawe utarambiwe. Murakoze.

Byanditswe kuwa 26/07/2016 na:
A.BEN NTUYENABO,KIGALI-RWANDA.

Rwanda : amabandi yitwaje imbunda n’intwaro za gakondo arimo kurikoroza mu rwa Gasabo.

source : http://www.dafont.com/fr/bandits.font

Uretse ubusahuzi bumaze kumenyerwa mu butegetsi bwite bwa Leta no mu bigo byabwo,kuri ubu haravugwa amabandi yitwaje imbunda n’intwaro za gakondo ari mu kuyogoza tumwe mu duce dutandukanye tw’igihugu,ayo mabandi akaba agenda yiba abaturage ari nako abavutsa ubuzima.

Ni muli urwo rwego mu ijoro ryo kuwa 19/07/2016 amabandi yigabije koperative Umurenge SACCO yo muli secteur ya Kigali ku kazina ka »KIGALI SOLIDARITY VISION » atemagura abazamu babili abanje kubazilika à la FPR ku buryo umwe ariwe Nsengiyumva Kassim yahise ahasiga ubuzima, undi witwa Uwimana Jean Claude aramukomeretsa cyane bikabije ku buryo yahise ajyanwa ku bitaro bya CHUK aliko bikaba ibyubusa kuko nawe yaje kwitaba Imana.

Nkuko twabitangarijwe n’umupolisi mukuru uhagaraliye akarere ka Nyarugenge, Bwana SPT Emmanuel Hitayezu avuga ko ayo mabandi yibye ibintu byinshi na nubu hakibarurwa ibyabuze, ati aliko ubwo ayo mabandi yageragezaga kwinjira aho amafranga yari abitse yananiwe kuhasenya kubera urukuta rwa Sima rukomeye ruhubakishijwe.Police ikaba ivuga ko kugeza ubu ntawukekwa gusa ngo iracyakora iperereza ngo hamenyekane abari inyuma y’ubu buhotozi bufite indi ntera.

Ahandi havugwa amabandi ni mu Karere ka Rubavu, Intara y’uburengerazuba, umugi wa Gisenyi aho harimo kurangwa n’udutsikio tw’abantu bitwaje imihoro n’amacumu, utwo dutsiko tukaba tumaze kujujubya abaturage tubasanga mu ngo zabo cyangwa aho bakorera tukabatemagura tukanabasahura ibyo batunze.

Ni kuri uyu wa 07/07/2016, mu Kagali ka Mbugangari, aho kamwe muli utwo dutsiko katemaguye abantu batatu gashaka kubambura amafranga. Umwe mubambuwe akanatemagurwa, MUTAGUMA Anthère ubusanzwe wicurulizaga mu kabari yategewe mu nzira atashye bamukekaho amafranga yaratemaguwe ku buryo bukabije ajyanwa mubitaro bya Gisenyi bibonye akomerewe cyane byahise bimutransfera mu bitaro bikuru bya Kaminuza (CHUK) i Kigali ari naho kugeza ubu arwariye.

Nanone mu ijoro ryo kuwa 17/17/2016, akandi gatsiko kateye station ya essence (OM) mu mugi wa Gisenyi kambura umumpompiste wari waraye izamu amafranga yose yari yacuruje, aliko we agira amahirwe kuko bamaze kumucuza ayo mafranga bahise baburirwa irengero, hakaba n’abandi benshi tutarondora bamaze kwiba bene ako kageni.

Bwana Mugisha Honoré, umunyamabanga-nshingwa bikorwa w’umurenge wa Gisenyi nawe yemeza ko utwo dutsiko turiho kandi dukomeje kujujubya abaturage aliko bataramenya imva n’imvano yatwo.

Banyarwanda banyarwandakazi, nguwo umutekano n’iterambere mu gihugu cyacu duhora twizezwa n’abayobozi bacu by’umwihariko Prezida Paul Kagame w’u Rwanda n’agatsiko ayoboye. Birababaje kubona aho Leta yahisemo kwirindira umutekano n’abambari bayo gusa ikibagirwa abaturage.

Byanditswe kuwa 21/07/2016 na:
A. BEN NTUYENABO, KIGALI-RWANDA.

Rwanda:Tom Ndahiro akomeje guhakishwa ingengabitekerezo ya jenoside

Mu minsi ishize ubwo twandikaga ku ngengabitekerezo y’urwango Bwana TOM Ndahiro arimo atwerera Kiliziya Gatolika, anabikomeje aho asigaye ashira isoni yerura akemeza ko n’isakramentu ry’ubusaserdoti rishobora kwamburwa uwariwe wese akanacibwa muli Kiliziya!mbega ubuswa bwo kutamenya amategeko ya Kiliziya kandi ayirimo! Tom Ndahiro akwiye kumenya uwavuze interuro igira iti:’’NDI UMUSASERDOTI ITEKA’’.Banyarwanda banyarwandakazi, bakristu bavandimwe, mu kiganiro na City Radio i Kigali cyo kuri iki Cyumweru taliki ya 10/07/2016,Tom Ndahiro akomeje gukurura amatiku n’ubutiriganya muli Kiliziya Gatolika imwe kandi itunganye, aho yatangaje anasaba ko igihe kigeze kugirango amategeko yerekeranye na Jenoside mu Rwanda abe yashyirwa mu mategeko agenga Kiliziya Gatolika ku isi yose (voir Droit Canon Vatican).

Ibi nkaba nsanga ari agahomamunwa pe! uyu Tom Ndahiro, ingirwa mushakashatsi kuli Jenoside n’ibyaha by’inyoko muntu mu Rwanda yakomeje nanone yikoma Kiliziya Gatolika mu Rwanda, by’umwihariko Diocèse ya Kabgayi kuba ihishira umupadiri wayo wakoze liste y’abapadiri bateganijwe kwizihiza Jubile y’imyaka 25 ku ya 16/07/2016 bamaze bahawe ubusaserdoti, harimo na babili bahamijwe ibyaha bya Jenoside aribo Abbé Rukundo Emmanuel na Ndagijimana Joseph, Tom Ndahiro akaba asaba ko uwo mupadiri yashyikirizwa inkiko kubera ko yagaragaje ingengabitekerezo ya Jenoside no kuyipfobya cyangwa mo kimwe bikabazwa Nyilicyubahiro Mgr Smaragde kuko ariwe umukuriye. Tubibutse ko uyu Mgr MBONYINTEGE Smaragde nawe ari umwe mu bacikacumu ba Jenoside yo mu Rwanda.

Kubw’umushumba wa Kiliziya Gatolika ya Kabgayi Nyiricyubahiro Mgr Smaragde Mbonyintege abinyujije ku murongo wa telephone n’umunyamakuru Oswald Mutuyeyezu wa City Radio yakomeje ashimangira ko gukorerwa Yubile muli Kiliziya Gatolika kw’abapadiri bayo atari ibya none kuko ari uburyo bwo gushimira Imana no gusaba imbabazi kuri bamwe mu bana bayo batatiye igihango kuko Kiliziya nta Jenoside yakoze aliko hari bamwe mu bana bayo bayihemukiye, akomeza agira ati icyaha ni gatozi, gisabirwa imbabazi n’uwagikoze.

Banyarwanda banyarwandakazi, bakristu bavandimwe,tukaba dushima ayo magambo ya Nyiricyubahiro Mgr Smaragde kuko agaragaza ukuntu ntacyo Kiliziya idakora kugira ngo habeho ubumwe n’ubwiyunge nyakuri mu gihugu cyacu aliko ingirwa bashakashatsi b’agatsiko nka Tom Ndahiro umuntu atatinya kuvuga ko nawe yaba yarahahamutse, atagira isoni ngo abe yava ku izima ry’ikinyoma.

Banyarwanda banyarwandakazi, bakristu bavandimwe, ubumwe n’ubwiyunge Leta ya FPR ihora iririmba ku kigereranyo cya 80% bwahamirizwa nande! mu gihe tugifite abambari ba FPR nka TOM Ndahiro ugifite ingengabitekerezo yo kwangisha abanyarwanda abandi agamije guca inzira y’ubusamo imuhesha umugati kwa Shebuja Giti mu Jisho Prezida Pahulo Kagame! Ararye ari menge kuko abakristu turi maso!

Amahoro y’Imana.

Byanditswe kuwa 10/07/2016, na :

A.BEN NTUYENABO, KIGALI-RWANDA.

Rwanda :Tom Ndahiro nawe arangwa n’ingengabitekerezo y’urwango.

Tom Ndahiro

Nkuko abanyarwanda batari bake, by’umwihariko abayoboke ba Kiliziya gatolika tumaze imyaka itari mike kuva Fpr yafata ubutegetsi hano mu Rwanda, dukulikirana amagambo y’ubuhezanguni bw’uwiyita umushakashatsi mu bijyanye n’ibyaha bya Jenoside n’inyoko-muntu ariwe Bwana TOM Ndahiro mu kwaha kwa FPR, aho muli iyi minsi yongeye kwibasira Kiliziya Gatolika ayishinja ingengabitekerezo no gupfobya Jenoside.

Aherutse kwifashisha itangazamakuru ritandukanye yewe akanandikira Nyirubutungane Papa FRANCIS nkaho amusaba ibisobanuro, akoresheje amafoto n’inyandiko mpimbano adafitiye gihamya na busa mu rwego rwo gushinja Kiliziya gatolika ingengabitekerezo mu kuba hari abapadiri bayo bazizihiza Yubile y’imyaka 25 ku ya 16/07/2016 bamaze bahawe ubusaserdoti muli Diocèse ya Kabgayi, ngo harimo na babili aribo Abbé aumônier RUKUNDO Emmanuel na Abbé NDAGIJIMANA Joseph, hakaba kandi n’undi musaserdoti ufungiye muli Gereza ya Gisenyi wagaragajwe ari kuli Altari hamwe na Mgr Anaclet MWUMVANEZA wa Nyundo muli ayo mafoto mpimbano yambaye ikanzu y’ubusaserdoti, abo bose bakaba barahamijwe ibyaha bya Jenoside à la FPR.

Tubibutseko uyu Mgr Anaclet MWUMVANEZA wa Diocèse ya Nyundo nawe ari umucikacumu warokokeye kuli paroisse ya Ste Famille, akaba aribwo yaraherutse kugirirwa icyizere na Nyirubutungane Papa FRANCIS mu kumwegurira Diocèse ya Nyundo.

Banyarwanda banyarwandakazi, bakristu bavandimwe, isakramentu ry’ubusaserdoti muli kiliziya gatolika nta mupaka rigira keretse nyiri ukurihabwa wenyine abyishakiye agasezera niyo mpamvu hakurikijwe amategeko ya Kiliziya nta musaserdoti uvutswa iyo ntera nuwariwe wese igihe yaba agihumeka, ibyo bikaba bishimangirwa na Nyilicyubahiro Mgr Smaragde MBONYINTEGE wa Basilika ya Kabgayi aho agira ati : umupadiri nawe ni umuntu nk’abandi kuko iyo ahamijwe ibyaha afatirwa ibihano nk’abandi byaba ngombwa akanabyicuza bityo akaba yasubira mu milimo ye nkuko kiliziya itanga imbabazi ku muntu wese wicujije imbere y’Imana, ati gusa ndakeka ko umupadiri uri muri gereza kubera ibyaha runaka nta burenganzira afite bwo kuyisohokamo ajya gukora ibyerekeranye n’imihango ya Kiliziya ubuyobozi butabizi, ati byongeye kandi byaba binyuranije n’amategeko agenga Kiliziya ati uretse ko gufungwa kw’umusaserdoti bitavanaho isakramentu yahawe.Mgr Smaragde akomeza agira ati: abandika ibyo ni abantu bashaka gutesha imitwe abandi bagamije guharabika Kiliziya gatolika(nta bandi yavugaga uretse Tom Ndahiro, Dr.Dusingizemungu wa Ibuka n’abandi….).

Banyarwanda banyarwandakazi, bakristu bavandimwe, turasaba Mgr Smaragde Mbonyintege kutajya atakaza igihe cye aterana amagambo n’abahezanguni bihaye kurwanya Kiliziya ku mugaragaro, Tom Ndahiro ntacyo ashinzwe, gukurikiza amategeko ya Kiliziya nta marangamutima byonyine birahagije Nyakubahwa Monseigneur nkuko mwabitorewe!

Banyarwanda banyarwandakazi, bakristu bavandimwe,TOM Ndahiro nagarure ubwenge amenye uwamupfiriye kumusaraba w’ukuri, areke ingengabitekerezo y’urwango, kiliziya gatolika ni urutare rutavunguka na busa kuko agati kahagaritswe n’Imana kadahungabanywa n’umuyaga,nagerageze ashakire amaramuko ahandi hatari muli kiliziya gatolika. Amahoro y’Imana.

Byanditswe kuwa 06/07/2016, na:
A. BEN NTUYENABO, KIGALI-RWANDA.

Niba ntagikozwe, u Rwanda ntiruzabona aho rutuza abaturage barwo mu gihe kizaza

Source : Banque mondiale, mise à jour : 2 juin 2016

Mu gihe Leta y’agatsiko ka FPR ifite ibibazo by’uruhuri yananiwe gukemura haba mu rwego rwa politiki ihamye yo kuvana abaturage mu bukene, haba mu biganiro by’abatavugarumwe nayo batuye hirya no hino ku isi tutaretse n’abarimbere mu gihugu bahisemo kwemera akaje bakicecekera; ubu haragaragara ukwiyongera bw’abaturage bukabije umunsi ku wundi nubwo benshi barimo guhitanwa n’inzara irimo iyogoza igihugu cyose bikaba bigeze naho abashyitsi batugenderera batumiwe mu manama mpuzamahanga atandukanye hano iwacu, bataha bivovota kubera kubura amafunguro ahagije; aliko Leta y’agatsiko ka FPR ikaba ntacyo yitayeho ahubwo yarahisemo kugendana n’abambari bayo bijuse gusa. Ni muli urwo rwego rero dusanga hatabayeho ubukangurambaga bwimbitse kugirango ubwiyongere bw’abaturage bugabanuke abanyarwanda bazabura aho gutura mu gihe kiri imbere, kuko kugeza ubu imibare imaze gukorwa n’ikigo cy’igihugu cy’ibarurishamibare (NISR) kigaragaza ko abanyarwanda biyongeraho 2.6% mu basaga miliyoni 11, tukaba dusanga ubwo bwiyongere bw’abaturage mu Rwanda buhwanye n’ubwiyongere bw’abaturage bungana n’abatuye akarere kwose.

Banyarwanda banyarwandakazi,dusanga ntagikozwe ngo iyo mibare igabanuke u Rwanda rutazabona aho rutuza abaturage barwo mu gihe kizaza kubera ubwinshi bwabo, keretse ubuso bw’igihugu nabwo bwiyongera naho ubundi bizateza ikibazo kinini cyane.

Banyarwanda banyarwandakazi,iterambere Leta ya FPR yigamba ko yagezeho nsanga nta cyerekezo rifite kuko nta gihugu gishobora gutera imbere abaturage biyongera bikabije.Hakaba hari impamvu zitandukanye zitera ubwo bwiyongere bw’abaturage..! mu Rwanda bikaba biterwa ahanini n’uburaya bwahindutse umuco haba mu bato arirwo rubyiruko,mu bakuze,abashakanye bakunze gucana inyuma yewe no mu bayobozi ubwabo byabaye nk’icyorezo,muzi ingero zimwe nazimwe twagiye twandika ku buryo na Prezida wa republika y’u Rwanda Nyakubahwa Paul Kagame atagira isoni zo gushyira bamwe barangwaho nizo ngeso muli gouvernement nkaho nawe ubwe ashyigikiye izo ngeso yahinduyemo indangagaciro.Izo ngaruka mbi zose nizo zituma habaho inda zitateganijwe aliko by’umwihariko bikaba bigaragara cyane cyane mu rubyiruko rukora imibonano mpuzabitsina idakingiye kubera ubukangurambaga bukwiye butarugeraho, bityo rero bikerekana ko mu gihe kingana n’umwaka ku baturage hiyongeraho abangana n’abatuye akarere kwose.

Banyarwanda banyarwandakazi,nsanga hasabwa gushishikariza no gushyiraho gahunda zo kuringaniza urubyaro mu buryo bukwiye hakoreshejwe ubukangurambaga aho ariho hose, hirindwa cyane cyane ingengabitekerezo ya bamwe ishingiye ku muco, amadini n’ibindi…abanyarwanda bakumvishwa kubyara abo bashoboye kurera,yewe na ya manegeka cyangwa Nyakatsi Leta y’agatsiko ka FPR-KAGAME itifuza twaba tubitsinsimuye mu bwenge naho ubundi ntaho twaba tugana. Murakoze.

Byanditswe kuwa 02/07/2016, na:
A.BEN NTUYENABO, KIGALI-RWANDA.

Tariki ya mbere Nyakanga, Ubwigenge mu Rwanda

U Rwanda rumaze imyaka mirongo itanu n’ine rwingenga. Nta muntu ugomba kuruvogera yaba ava i mahanga cyangwa se umwenegihugu wakwibeshya ko yakwigarurira byose ngo arutegeke nk’aho rutagira banyirarwo.

Ubundi ubwigenge bw’igihugu ni ukwibohora kikava ku ngoyi n’agacinyizo k’umunyamahanga cyangwa agatsiko kaba kagikandamije, maze abenegihugu bakabona bakisanzura iwabo.

Ni ukugira ubusugire n’ubwigenge busesuye, maze igihugu kikayoborwa na benecyo kandi atari bamwe bakandamiza abaturage bagasigara batunzwe no kurya imitsi ya rubanda ; si ukureba ibyiza n’ubukungu bukirimo ngo wirengagize abagituye, amateka yabo, umuco wabo n’imibereho yabo.

Muri uyu mwaka by’umwihariko, Banyarwanda, ndabasaba guhuguka mukibuka ko hari ubutegetsi bumaze guhindura inkingi z’igihugu mu guhindura itegekonshinga mu buryo bufifitse no munyungu zitari iz’Abanyarwanda muri rusange. Ibyo ntitugomba gutuma bigerwaho na mba.

Muzirikane indirimbo yubahiriza igihugu : iriho ubu usanga itaka igihugu n’ukuntu gikwiye kumera neza maze abonka bakonka ; ni byiza…gusa ivuga buke uruhare rw’umunyarwanda mubigomba gukorwa. Naho iya kera, usanga yibutsa umunyarwanda uwo ariwe, amateka n’ingorane igihugu kigobotoye kandi igashishikariza buri wese kwita ku byabaye, kubikomeza no guteganya ejo heza. Igaruka cyane ku bwigenge n’ubwumvikane.

Aho u Rwanda rugeze ubu, usanga hari byinshi bishobora kubangamira ubwigenge bwabo.

Nibyo koko ngo ntabyera ngo de, ariko nanone ibyiza birarutana !

Kwibagirwa ubwigenge bw’u Rwanda nkuko bikorwa ubu, numva ari inenge ikomeye y’ubutegetsi buriho, kuburyo umuntu yanavuga ko ariyo mvano y’ibibazo byinshi biriho muri iki gihe kuko usanga bivamo no guta indangagaciro z’Umunyarwanda zihuye n’ubwigenge nk’uko tuzisanga mu ndilimbo y’igihugu ya kera. Iyo urebye neza usanga indirimbo y’ubu igenda igenekereza iya kera ariko nk’igiterocya nyuma kikabura rwose :

-Ibendera ntacyubahiro rishobora guhabwa mu gihe dusa n’aho tugenda tugana mu gihe cya Kalinga aho ubutegetsi buriho bwigaragariza mu bisiganzwa by’abanyarwanda, abazize GENOCIDE cyangwa abo bugenda bwikindagurira ubwabwo.

-Ihame ryo kubaha Perezida n’Abategetsi muri rusange ryo ryagiye rugikubita igihe Kagame ahanuye indege ya Perezida Habyarimana, we ngo ni igikomangoma gusa ngo kiganje iteka.

-Abaturage b’igihugu bo ngo baragashira umugenda aho usanga ingabo zagombye kubarinda zisigaye zibereyeho kubarasa amanywa y’ihangu.

-Intego yo kwishyira ukizana ntawe wayibwira, umususu n’ubwoba bireze mu Rwanda.

-Iterambere nubwo rikivugwa, naryo ni baringa nta terambere inzara igutema amara.

Nyamara Banyarwanda bavandimwe, ntitwibagirwe, turigenga ntituzananirwa igitugu cy’agatsiko ka bene wacu.

Mboneyeho kubibutsa ko ubwo bukoloni twabutsinze twese kuburyo mu ntwali turirimba harimo Abatwa, Abahutu n’Abatutsi; Abakiga n’Abanyanduga nubwo tutarumvikana ku buryo bwo gutwara igihugu cyacu.

Iyo rero si impamvu akazu, nkuko byabaye mu bihe bishize cyangwa se agatsiko nkuko bimeze ubu, katajya aho ngo kibeshyeko tuzakunamira iteka. None se abadukolonije ko tubanye neza ni iki kitubuza kubana hagati yacu nk’Abanyarwanda. Erega ubwigenge no kugira ijambo mu bandi si ukwishongora, kwirata, kwica cyangwa gusahura abandi; ari nayo mpamvu mu rwego rwo guhamya ubwigenge bwacu no kwamagana ingoma mbi mu Rwanda, ngirango ngaruke ku ibango ry’indilimbo ya kera ritinyitse ku ngoma y’ubu itugoye, tugomba kwibohora ikavaho: Bavandimwe b’uru Rwanda rwacu twese nimuhaguruke turubumbatire mu mahoro n’ubumwe, mu bwigenge no mu bwumvikane .

Padiri Athanase MUTARAMBIRWA

Amakuru ki ?

Amakuru