Archives mensuelles : décembre 2015

Rwanda : Kamarampaka 2015 – Ubwami  muri  Republika.

photo http://www.umwezi.net/

photo http://www.umwezi.net/

Nkulikije  ibimaze kuvugwa byose muli  iyi minsi  ishize  kw’itekinika  ry’itegekonshinga rya Republika  y’u Rwanda  bikozwe  n’inteko  imitwe  yombi  mu kwaha kwa  FPR; iryo  tekinika  rikaba  rishorejwe  kuli  Kamarampaka  yahatiwe  abanyarwanda  ngo  bayemeze  banga  bakunze  kugira ngo  bitange  uburenganzira  ndakuka  kuli  Prezida  Paul  Kagame  bwo  kuzakomeza  kuyobora  u  Rwanda  nyuma  ya  mandat  ye  muli  2017, aho  azaba  ayobora  nk’umwami  kugeza  ashizemo  umwuka;  nk’abanyarwanda  tuzi  amabi  yose  yaranze   igihugu  cyacu,  uko  ubutegetsi  bwagiye  busimburana  ntidushobora  kwihanganira  gukomeza  kujya  twibaruka  dushyingura  imburagihe!!

Ni  muli  urwo  rwego  duhagurutse  twivuye  inyuma  mu  kwamagana  iyi  turufu  yindi yadutse  dukomeje  gukururirwa  na  FPR, tukaba  dutakambira  amahanga  n’inshuti  z’u Rwanda  mu  kudufasha  kwamaganira  kure  iyi Kamarampaka  imaze  gutorwa  kubudoderwe  bw’ umuntu  umwe  Paul  Kagame  mu  rwego  rwo  gukomeza  kuboha abatavugarumwe  nawe  aho  kuba  indorerwamo  ya buri  munyarwanda  wese!

Banyarwanda, Banyarwandakazi , nkuko  byagaragaye  mu  ijoro  ryo   ku  wa  18/12/2015, iyi  Kamarampaka  yaranzwe   n’ uburiganya  bukabije  nkuko  byari  byapanzwe  na  commission  y’igihugu  y’amatora, iyobowe  na  Prof.  Kalisa  Mbanda,  yifashishije  abakoranabubingwa  bakomoka  muli  ya  mashyaka  ari mu kwaha  kwa  FPR uko  ari 10  baraye  inkera  muli Stade  Amahoro  bagerageza  kubarura  no  kujonjora  impapuro  zose  zatoye  OYA   no  guhita  bazirigisa  kugira ngo  hatagira  uzica  iryera!

Kuburyo  nta  munyamakuru  wari  wemerewe  kuhagera  muli  ayo  masaha  y’ijoro  igikorwa  nyamukuru  cy’uburiganya  kitararangira;  hari  umunyamakuru  wa  Radio 10  yigenga  wabinjiranye  agerageza  gufata  amafoto  na  caméra  aliko  bamumenye  yerekejwe  iya  Gereza  nyuma  Patron  we ari nawe  washinze  Radio10  akaba  ari na musaza  wa  Mme  Jeannette  Kagame  aza  kumugombora  aliko  ntibyari  bimworoheye , muriyumvira  namwe  iyaza  kuba  ari mwene ngofero!

Banyarwanda,  Banyarwandakazi, cyane  cyane  abatuye  mu  Rwanda, baca  umugani  ngo ‘’Uwiringiye  ijosi  rimubyalira  umwingo’’, murarye  muri  menge!  ibi  bihe  turimo  ntibyoroshye! Aho  kugira ngo  tuzabyicuze  ko twahemukiranye  tugambanirana  ndumva  twahitamo  kudakulikira  ibibi  tubibona  inzira  zikigendwa!  Kuko  bavuga  nanone  bati :’’Nyamwanga  kumva  ntiyanze  no  kubona’’! Muragowe  rero! Uwo  bizabazwa  ntaziririre,  mu gihe  bikomeje  kugaragara ko  Prezida  Paul  Kagame  atagifite  imbaraga  n’ubushobozi  bwo  guhangana  n’ibibazo  by’igihugu  kubera  ko  byamaze  kumubana  uruhulirane  kubera  kutagirwa  inama  n’abandi , bikaba  bimaze  kugaragara ko  ari  hafi  kwambarira  incocero  aho  yambariye  inkindi.

Jye  numva  inama  namugira  ari  ukurekura  ubutegetsi  nyuma  ya  mandat  ye  ya  nyuma  muli  2017  akanabitangariza  abanyarwanda  n’abanyamahanga  hakiri  kare  kugira ngo  yirinde  kandi  arengere  n’umuryango  we  by’umwihariko, ninaho  azaba  asigasiye  ku buryo  burambye  ibyo  yagezeho  mu  iterambere  ry’igihugu  muli  rusange  naho  ubundi  yaba  agiye  gusiga  abanyarwanda  mu kaga  gakomeye!!  Erega  ntawakwirengagiza  ko  kugeza ubu  Prezida  Paul  Kagame  ariwe  kibazo  k’ingutu  kiremereye  igihugu  cyacu!  Umugabo  utagira  impuhwe  byongeye  ntagirwe  n’inama!

Byanditswe  ku wa  21/12/2015, na:
A. BEN  NTUYENABO, KIGALI-RWANDA.

NCHR Rwanda : Commission y’uburenganzira bwa muntu mu kwaha kwa FPR-Inkotanyi

Nirere Madeleine utegeka Komisiyo y'uburenganzira bwa muntu

Nirere Madeleine utegeka Komisiyo y’uburenganzira bwa muntu

Mu gihe  commission  nyarwanda ishinzwe  uburenganzira bwa  muntu  yakomeje gushyirwa  mu majwi bivugwa ko ishingiye gusa  mu kwaha kwa Leta  ya  FPR  aho  gukurikiza  inshingano nyamukuru zayo  mu kugenzura  no  gushyira  mu bikorwa amahame  mpuzamahanga  arebana n’uburenganzira  bwa muntu muli  rusange; ubu iratangaza  ko  isaba  abanyarwanda ibitekerezo  mu  rwego  rwo kuyifasha gushyiraho  urwego ruzajya rukulikirana Iyicarubozo  kugeza ubu rutari  rwagashyizweho mu gihugu  cyacu  hakurikijwe amasezerano  mpuzamahanga  yashyizweho umukono n’u  Rwanda.

Umuyobozi  wa  commission nyarwanda  y’uburenganzira  bwa muntu, Mme NIRERE  Madeleine yagize  ati : « Uru  rwego ruzaba  rushinzwe  gukulikirana umunsi ku wundi  ahantu  hafungiye  abantu  niba nta yicarubozo  rihakorerwa  ndetse  niba n’amategeko  yo  kurirwanya yubahirizwa ».

Banyarwanda,  Banyarwandakazi, iyi commission  nyarwanda y’uburenganzira  bwa muntu  nta gihe  itanenzwe  ku bibazo  byinshi  byo  kutagira  icyo  ikora  ku iyicarubozo mu gihugu  cyacu. Urugero  Andereya  Kagwa  Rwisereka (former green  party’s  leader)  wishwe  aciwe umutwe hashize  igihe  kirekire  aliko  dossier  yabaye classé  sans  suite, cyangwa  n’andi marigiswa  y’abantu  atandukanye  akunze  kuburirwa irengero! None  se  ubu nibwo iyi  commission  yibutse  ko haba  hari  iyicarubozo  rikorerwa  mu ma cachots, kwa Kabuga, Kami  n’ahandi hatazwi….? Ibi  byaba  ari  ukwirengagiza  kubabaje  kuvanze  n’ubushinyaguzi!

Icyo  nisabira  Mme  NIRERE  Madeleine, nk’umuyobozi w’inararibonye ku byerekeye uburenganzira  bwa  muntu  azabanze  acukumbure  atumenyeshe ibyavuye muli investigations zakozwe  na commission  ayobora kuli  dossiers  z’abanyarwanda bakorewe  iyicarubozo rirengeje ukwiheba mbere  yuko bajugunywa  mu kiyaga cya RWERU?  Inshuti  n’imiryango  yabo  iratakamba  nyabuneka!

Biteye  agahinda  rero  iyo wumvise  abantu  nka  Cyrus  Munyaburanga Nkusi  uvugako ahagaraliye  umuryango  « Governance  for  africa » wita  ku miyoborere myiza  yemeza ko  iyicarubozo mu  Rwanda  nta bukana  rifite! None se  rizakulikiranwa ari uko  ribanje  kuba akarande?

Ubuyobozi  bwa  commission  y’uburenganzira bwa  muntu, Mme Nirere  we  avuga  ko  mu mwaka ushize  wa 2014  bakiriye ibibazo 2  gusa  by’iyicarubozo, naho  muli 2015  nta kibazo  na kimwe  bari  bakira. Banyarwanda,  Banyarwandakazi, « akaje  karemerwa  koko! ». Aka  ni  agahomamunwa! Iyicarubozo  riruta  gushora mu manza  abatavugarumwe  na Leta ya FPR ukanababika mu bihome ubahimbiye ibyaha, witwaje ko amategeko  yose  ashingiye  kuli  wowe ni  irihe? Keretse  niba nabyo byanditse  mu itegeko nshinga ko utavugarumwe n’ubutegetsi  wese  akwiye gukanirwa urumukwiye? Voir Mme Ingabire Victoire Umuhoza, Mr Mushayidi, Me Ntaganda Bernard  n’abandi………

Banyarwanda, Banyarwandakazi,  tumenye  ko  aka  kaga  turimo  kazarangira  tubigizemo uruhare twese  ariyo mpamvu tudakwiye  kwicara  gusa  kuko « n’Imana  ifasha  uwifashije ». Mugire  amahoro.

Byanditswe  kuwa  03/12/2015, na:
A.BEN  NTUYENABO, KIGALI-RWANDA.

Soma n’iyinkuru : Komisiyo y’Uburenganzira bwa Muntu yahaswe ibibazo n’abadepite bayigaya kutuzuza inshingano