Ni mu ibanga rikomeye aho kuri uyu 09/01/2017 ubwo indege y’ikompanyi Ethiopian airways yari isesekaye ku kibuga cy’indege i kanombe irimo umugogo w’umwami  KIGERI wa 5 NDAHINDURWA  akaba yakiriwe n’abantu bakeya cyane nkaho umuryango we utari ubizi,yewe nta na bamwe mu bajyanama be ba hafi bapfuye agasoni ko kuba baje baherekeje umugogo we!

Ku buryo ukuza k’uwo mugogo  byakozwe mu bwiru n’ibanga rikomeye hagati ya gouvernement ya FPR na bamwe mu bahindiro bavuga ko bari bahagaraliye uwo mugogo kugeza impaka zari zibashyamiranyije zikemuriwe muli USA  n’urukiko rwo muli Virginie.

Byagaragaye rero ko niba hari nabagombaga kumwakira ku kibuga cy’indege i Kanombe batamenye igihe wahagereye yewe  nashoboye kubaza umwe mubakozi bo ku kibuga i Kanombe nawe ambwira ko batari bazi ugutahana umugogo kw’umwami uyu munsi!

Aliko ku ruhande rwa Leta ya FPR hagaragaye Mme Ministri w’umuco na sport Uwacu Julienne,  uwari ahagaraliye abahindiro  Dr.Vuningoma  umuyobozi w’inteko nyarwanda y’ururimi n’umuco ari nawe washimiye Leta ya FPR kuba yarabafashije kuba bageze mu gutabariza umugogo w’umwami i Rwanda!hari na Bwana Fransisko NGARAMBE  Segeral wa FPR-inkotanyi wasaga  nutigaragaza cyane mu ifatwa ry’amafoto ya za cameras za TVR (inkuru yanyuzeho inshuro imwe kuli TVR) kandi byumvikanaga ko uyu yari indungurutsi ya Shebuja Prezida Paul Kagame! Hakaba hamenyerewe ko iyo hagaragaye ihulizo ry’ikibazo runaka  uyu shebuja Kagame ahita  akora uko ashoboye kwose akaba agihunze afata rutemikirere yitwaje kujya gutanga ibiganiro runaka ku iterambere ry’isi  hirya no hino ku isi!tutarava kuri iyo ngingo.

Ese prezida Kagame yaba yarabaye umukozi wa l’ONU ryari? mu guhora asesagura umutungo w’igihugu ngo agiye gutanga ibiganiro aho impuguke zabuze!gusa akwiye kwerulira abanyarwanda abasobanulira iryo kinamico ahoramo!aho gukomeza kubabangamira.

Tugarutse ku mugogo w’umwami Kigeri wa 5 Ndahindurwa,abanyarwanda benshi bakomeje kwibaza impamvu batamenyeshejwe ukuzanwa mu Rwanda kwawo ngo bajye kumwakira?

Bamwe bati wasanga atari umugogo w’umwami ahubwo ari ibindi bafungiye muli iriya sanduku!abandi bati Leta ya FPR irashaka kubanza kuwukoreraho imigenzo!bakanakomeza kwibaza impamvu bamwe bagize umuryango we w’abahindiro bemeye ko azanwa mu Rwanda?

Cyrille Mugabushaka ukomoka mu karere ka Nyanza yadutangarije ko kugeza ubu bafite impungenge ko bakurikije ukuntu batamenyeshejwe  gahunda y’itahuka ry’umugogo w’umwami wabo ari nako wabona bahejwe no mu itabariza rye i Mwima!

Ati kuko hagomba kuba hari akagambane hagati ya Leta ya FPR  na bamwe mu bahindiro bari muri gahunda zo kubanza kuwukoreraho imihango ya gipagani kandi tuziko umwami wacu yari yarabatijwe ku izina rya YOHANI BATISTA! Cyrille yakomeje ambwira ati ukurikije n’impaka zagiriwe kuri uriya mugogo w’Umwami wacu  ntibyaba bitangaje wumvise ko yanashyinguwe mu ibanga ariko se byahe birakajya  ahubwo byakwitwa ko washyinguwe kandi warajugunjwe mu Nyanja nk’iya ba Kaddafi  cyangwa Bin Laden! yakomeje agira ati Leta itubabarire tuzi ko bitayoroheye ntizatume tulira ngo twihanagure ko byose byarangiye, izatumenyeshe tumuherekeze ntabwo yatubaniye nabi!

Banyarwanda, Banyarwandakazi, benshi  barakomeza gutanga ibyiyumviro! KABAYIZA Ephrem nawe ukomoka mu karere ka Nyanza  aragira ati : Kuki abarwanyi babili ba FDLR iyo batahutse bivugwaho cyane n’ibitangazamakuru byose hano mu Rwanda uhereye ku bya Leta  aliko gutaha k’umugogo w’umwami  bikaba ubwiru ngo abanyarwanda batabimenya, kubona umugogo we usanganirwa n’abantu batarenze batanu nkaho ashinjwa ibyaha?

Ati kandi ahubwo iyi Leta yagombye kuba yatangije icyunamo nibura cy’iminsi 7 ikulikiranye!akomeza agira ati biragaragara ko umwami atari yishimiwe na Leta FPR! ati:umwami yagorwa rwose!ati ajya kuva mu Rwanda yaciye mu cyanzu none n’umugogo we ucishijwe mu cyanzu ugaruka!

Banyarwanda banyarwandakazi,haribazwa byinshi  kubizakulikira  umwami Kigeri wa 5 dore ko mugihe yari akiri muzima yari yarahakanye kugaruka mu gihugu cye atari umwami kuko ngo yarakomeye cyane ku muco, ko itahuka rye ryari kuzakurulira u Rwanda ishyano bitewe nawe none hagarutse umugogo we!ese  aho umugogo we nta muvumo waba utuzaniye?

Ese none umusimbuye  YUHI WA VI BUSHAYIJA Emmanuel azemera kuba nka rubanda cyangwa azahitamo gutura mu mahanga ubuziraherezo nka Kigeri wa 5? Ni ukubitega amaso!

Byanditswe kuwa 10/01/2017, na:
A.BEN NTUYENABO,KIGALI-RWANDA.