Archives par étiquette : umuvugo

Muhabura

NGIRWA N’ ABAGABO

Burya uko undeba ngirwa n’abagabo

Dore ko kwiyemera ntabigana

Nk’ingirwabagabo ziha amazina

Yuje ubwema ari ibigwari

5     Ariko isi ikazikubita umunyafu

Zigaca bugufi nk’imbwa yibye

Bakayihemba imigiti y’inkoni

Zigatabarwa n’andi maboko

Maze ibyo kwigira ziririmba

10   Bikaba indoto zitagira ireme.

Ni nde wigira se rubanda

Nkaho ari ikinege aha ku isi

Utarabyawe maze ngo anarerwe

Wageze ku bikorwa bihebuje

15   Nta mugenzi we asabye inkunga?

Abagabo bangira mvuga ibizima

Si abakize ku bwoya bwinshi

Ku matama ndetse no mu gituza

Na nyirahuku mbona ibitunze

20   Kandi inyiyambaza ngo nyigire.

Abanjye ni imbaga impora hafi

Ikantabaza ipfukire ikwiye

Ibona nyigomba ntayitabaje

Ikampa ihumure igihe cyose

25   Iri n’abakungu badashyikira.

Ni abo bonyine mpa agaciro

Ubwenge bandahurira nkonje

Ni na ryo funguro mpora nshonje

Rituma ntera intambwe ndende

30  Nsanga abangira mu burenzi.

© KURAZIKUBONE Stanislas
Vienne, 9 Kanama 2022

Igitabo kindi cyanditswe na Stanislas Kurazikubone kuri www.editions-scribe.com
Cyusa cya Rusango