Archives par étiquette : Francis Kaboneka

Rwanda: ministri Francis Kaboneka yashyize iterabwoba ku baturage b’intara y’iburasirazuba.

Francis Kaboneka/photo http://rwandaupdates.com

Ni kuri uyu wa 05/05/2017 hamwe n’abayobozi mu nzego za Leta zitandukanye kuva ku rwego rw’igihugu kugera k’umudugudu mu Ntara y’iburasirazuba harimo n’abayobozi ba Komisiyo y’amatora; Mu ruzinduko yakoreye muli iyo ntara Bwana Francis Kaboneka Ministri w’ubutegetsi bw’igihugu muli Leta y’agatsiko yunguranye ibitekerezo n’abaturage ku nsanganyamatsiko yagiraga iti : ‘’Twimike imiyoborere myiza , dusigasira ibyagezweho, dutanga service nziza’’.

Mu magambo asa n’iterabwoba Ministri Kaboneka yasabye abaturage kureba kure bagahitamo ikibabereye muli ibi bihe by’amatora, ati hari abakandida bazaza babagana babasaba signatures, nabashishikariza ko muzazibaha aliko ntihazagire ubasinyisha ababeshya ko agiye kubashakira indonke ejo mutazisanga babasinyishije mu nyungu za politiki mutabizi ! ati mujye mubanza musobanuze neza umukandida runaka mugiye gusinyira uwariwe kugirango mutazavaho mwicuza nyuma ibyo bazaba babakoresheje bindi.

Banyarwanda banyarwandakazi, birumvikana ko Ministri Kaboneka ari nkaho yaburiye abanyentara y’iburasirazuba ko uzaramuka atanze signature ye ku mukandida atabahitiyemo yazahura n’ibibazo nyuma kandi bene iyo miyoborere ariyo abanyarwanda barambiwe!

Tubibutse ko iyo ngirwa-matora isigaje amezi atarenga atatu ngo Leta y’agatsiko ibe irangije umuhango wo kwimika ubuziraherezo Prezida Paul Kagame ku butegetsi.

Hakurikijwe rero itegeko rya commission y’igihugu y’amatora mu Rwanda (NEC) buri mukandida wigenga asabwa gutanga liste y’abantu 600 biyandikishije kuri liste y’itora bagomba kumushyigikira akanagaragaza nibura abantu 12 babarurirwa muli buri district. Urwo rutonde rw’abo bantu 600 basinyiye umukandida bagomba kugaragaza aho batuye, amazina yabo yose, nimero y’ikarita y’irangamuntu naho yayifatiye na nimero y’ikarita y’itora naho yayifatiye.

Abo bakandida bigenga bakazatangira gusinyisha abaturage babashyigikiye kuva kuya 12 kamena 2017 nkuko Umunyamabanga nshingabikorwa wa komisiyo y’amatora Bwana Munyaneza Charles yakomeje abisobanulira abaturage batuye iyo ntara, ati biteganijwe kandi ko itangazwa rya za candidatures zemewe by’agateganyo ari ku wa 22/06/2017 naho kuwa 27/06/2017 hagatangazwa liste ntakuka y’abakandida.

Nkuko yakomeje abivuga ukwiyamamaza kw’abakandida kukazaba guhera ku ya 14/o7 kugeza ku ya 03/08/2017. Ku italiki ya 09/08/2017 nibwo hazatangazwa by’agateganyo ibyavuye mu matora, naho ku ya 16/08/2017 hatangazwe burundu Prezida wa republika uzayobora u Rwanda mu myaka 7 iri imbere.

Banyarwanda banyarwandakazi, mbibutse ko iyi ngirwa-matora igiye gutwara akayabo kangana na Miliyari 5.4 Frw ku ngengo y’imari y’igihugu nubwo komisiyo y’amatora yo ivuga ko ari makeya ugereranije na Miliyari 7.3 yakoreshejwe muli 2010. Abazitabira amatora y’uyu mwaka bakaba basaga muliyoni 6.8 bavuye kuri miliyoni 5.7 bitabiriye muli 2010 nkuko komisiyo y’amatora (NEC) ikomeza ibitangaza.

Banyarwanda banyarwandakazi, ikinamico riragwira ! abenshi baribaza iyi demokrasi iyariyo ! Du jamais vu !!! aliko nta gahora gahanze!
Les dictatures, comme le supplice du pal, commencent bien et finissent mal (Clemenceau (1841-1929).

Byanditswe ku wa 08/05/2017, na:

A.BEN NTUYENABO, KIGALI-RWANDA.

Rwanda : Ese prezida Kagame azagira ubutwari bwo kunamura icumu muri 2017?

Iyo ntero iribazwa hano mu rwa Gasabo mu gihe bamwe mu bayobozi b’agatsiko aho kugirango bahangire rubanda udushya ahubwo usanga indirimbo yabo ari uguhora barepeta (répétition) kuri Génocide rwandais, bameze nka wa mukambwe uhora akuganirira kuli sujet imwe, buri gihe ati habayeho! ntamenye ko igihe cye cyarangiye! urugero nka ba Muzehe Sénateur Tite RUTAREMARA, Hon. François NGARAMBE Ségeral wa FPR-Inkotanyi n’abandi…ntibyumvikana ukuntu abantu nk’aba baba bagifite uruhare mu gutekerereza abanyarwanda uretse kubanyunyuza gusa! boshye iyaba ari nkabo beguzwaga? nabo bararambiranye!Iyeguzwa rero rirakomeje hafi mu turere twose tw’igihugu cyane cyane ba gitifu b’imirenge, utugari na bamwe mu bakozi mu yindi mirimo. Iyo nkubiri yo kubanyuzamo umweyo ahanini kubera kudakurikiza amabwiriza bahabwa yo kwaka abaturage ibyo badashoboye ; ikaba iherutse gushyirwa ahagaragara na Ministri KABONEKA Francis w’ubutegetsi bw’igihugu aho yagaye cyane imikorere cyane cyane ku bayobozi b’inzego z’ibanze, yavuze ko izo mpinduka zigomba no gukomeza muli 2017 kandi ko nuwagirizwa ibyaha muri bo azajya abikurikiranwaho. Nyuma rero y’iyeguzwa rya ba Gitifu b’imirenge n’utugari mu turere twa Nyamasheke, Rubavu, Rusizi, Gatsibo, Kirehe n’ahandi ntarondora…kuri ubu haravugwa ba gitifu b’utugari n’ababungirije, abakozi baba social, abavuzi b’amatungo bose hamwe 58 bamaze kweguzwa mu Karere ka Bugesera kandi bivugwa ko uwo mubare ushobora kwiyongera nkuko umuyobozi w’akarere ka Bugesera Bwana Nsanzumuhire Emmanuel abitangaza aliko akaba ahakana yivuye inyuma ko bategujwe ahubwo babikoze ku bushake bwabo!

Banyarwanda banyarwandakazi, ikinyoma kiragwira! uyu mayor mu kwijandika mu binyoma nka biriya agomba kuba atibuka ko hari umugani w’ikinyarwanda uvuga ko « Inkoni ikubise mukeba bayirenza urugo! »….arabona ko kuvuga ko beguye ku bushake bwabo ari mvugo ibereye, ko kwiyemeza kuba umushomeri mu gihugu cyacu bisigaye ari umurimbo!byabaye ibidukikije!

Kimwe rero na Giti mu Jisho ariwe Prezida Paul Kagame uhora akangisha intambara mu gihugu cyacu nkaho abanyarwanda twaremewe guhora mu ntambara,mu ndimi ebyiri zivuguruzanya ahorana;ku ruhande rumwe akaba avuga ko intambara y’amasasu yarangiye ko hasigaye gushaka iterambere,ku rundi ruhande ati ndasaba ingabo n’abashinzwe umutekano kutirara, kuba maso hatazagira utwinjirana! kubw’ibyo tugasanga abamuzi ukwo guhora yikanga baringa kwe ari iturufu y’ikinamico akunze gukoresha mu rwego rwo guhora yikiza abo yita abanzi kandi akaba abona adashira amakenga ku matora yo muli 2017 yidodeyeho.Biragaragara kandi ko akomeje gushaka uburyo bwose bwo kwigarulira urubyiruko bitazamworohera kubera ubushomeri rwiberamo uretse kuba yarushora muli za ntambara ze zihoraho gusa;ariyo mpamvu ku wa 24/12/2016 mu rwego rwo kwifuriza ingabo, abashinzwe umutekano, noheri nziza n’umwaka mushya wa 2017 yagize ati : »ndabasaba kuba maso kuko mushobora kwitabazwa isaha iyariyo yose mu gihe umwaka wa 2017 wegereje harebwa ibyakozwe n’ibikwiye gushyirwamo imbaraga, ati mugomba gukomeza gushyira umutima mu kazi no kuba maso, ati cyane cyane duhereye kubyo tubona mu karere no ku rwego mpuzamahanga! ati mugomba kuba mwiteguye kugira icyo mukora mu gihugu cyangwa hanze yacyo ku ineza y’umutekano! prezida Kagame yakomeje ababwira ko abafitiye icyizere nk’abantu biyemeje kukirwanirira! »

Banyarwanda banyarwandakazi, muriyumvira namwe! aliko se tuzahora ku nkenke z’intambara kugeza ryari? aho gushaka ibisubizo by’ibibazo bya ngombwa byugarije abanyarwanda, prezida Kagame n’agatsiko ayoboye baritekerereza gushora intambara mu bana b’u Rwanda! nguko nguko imigabo n’imigambi ya Giti mu jisho Prezida Paul Kagame muli 2017 no gusezerera uwariwe wese udashyira mu bikorwa inyungu z’agatsiko . Tubiteze amaso.

Mugire amahoro.

Byanditswe kuwa 28/12/2016 na:

A.BEN NTUYENABO,KIGALI-RWANDA.

Rwanda : aho bamwe mu bayobozi ba Leta ya FPR ntibarangwa n’ingengabitekerezo y’ubwicanyi ?

Brig Gen Eric Murokore aganira na Maj Gen Mubaraka Muganga/umuseke.rw

Nibyo koko rero iyo usesenguye imvugo z’abayobozi b’igihugu cyacu muli iki gihe aho kuvuga amahoro bashakira abanyarwanda ahubwo usanga imvugo zabo haba mu madiscours cyangwa mbwirwaruhame ziganisha ku gutanga gasopo bijyanye n’amagambo y’ubwicanyi gusa,bakangisha kurasa ku manywa y’ihangu nta na za investigations zabaye ngo babanze bamenye neza Gitera mbere yo kumusukaho amasasu n’ibindi…

Ni muli urwo rwego mu mugi wa Kigali hamaze iminsi habera amanama y’abaturage yerekeye umutekano basabwa kuwicungira,buri wese agombe amenye umuturanyi we neza cyane cyane abadafite icyo bakora kizwi,abirirwa murugo bose batagira akazi yewe ngo barebe cyane ibipangu byirirwa bifunze kuko ngo haba hakorerwamo ubugambanyi butazwi.Aliko igitangaje ni zimwe mumvugo z’abayobozi baremesha ayo manama zitarangwamo ikinyabupfura na busa nkaho abo babwira atari ibiremwamuntu babagaragariza ko babafiteho ububasha bwose bwo kuba babarimbura igihe icyo aricyo cyose batahuweho kutavugarumwe na Leta cyangwa kuyigambanira.

Bamwe muli abo bayobozi ni aho kuwa 29/08/2016 Ministri Kaboneka Francis yabwiye abari bateraniye mu nama y’inteko y’umujyi wa Kigali n’ubuyobozi kuva ku mudugudu ngo ‘’uwumva ashaka kujya mu ijuru namubwira iki,niyirukanke ariko aduhe amahoro’’ ati u Rwanda ntiruzigera rwihanganira uwo ariwe wese uzashaka guhungabanya umutekano warwo,ati nimugende murebe ibipangu bidafungurwa byirirwa bifunze mumenye ibikorerwamo mugaruke muturye akara!

Bukeye mu nama yo kuwa 30/08/2016 nabwo, Bwana ACP Rangira Bosco ukuriye ishami rya police mu mugi wa Kigali nawe ati :’’ ubu koko murashaka ko dukoresha inyundo ku rushishi?ati hari inzira nyishi dushoboramo kwicisha inyundo tudatakaje amasasu haba gusyonyora gahoro gahoro n’ubundi buryo bwinshi kuko tutarageza aho dutangira gukoresha amasasu byongeye aranahenda, gusa azajya akoreshwa aho biri ngombwa atari ugupfa kuyatumura ku nshishi.Aliko uyu mupolisi yirengagije amasasu aherutse gukoreshwa mu iraswa ry’abantu batatu I Rusizi nundi umwe ku Kimironko I Kigali bazira ko bari mu mutwe w’iterabwoba!

Undi muyobozi w’icyumweru akaba we yari umujenerali,bwana Mubaraka Muganga uyobora ingabo mu mugi wa Kigali werura kumugaragaro rwose ko afitiye impamba ikomeye uwariwese ushaka gusenya amajyambere ati hari n’ababa bashaka kurwanya cyangwa gutoroka inzego z’umutekano ati impamba yabo barayimenyereye!nta kindi yavugaga uretse kuraswa izuba riva!

Banyarwanda banyarwandakazi muriyumvira ko izi ngenga bitekerezo z’aba bayobozi maze kuvugaho ntaho zitaniye kuko zose zihuriza mu guhonyora uburenganzira bwa muntu! gusa ni akumiro pe!umwe ati ntiturageza igihe cyo gukoresha amasasu kuko dufite uburyo bwinshi bwo kwica! undi ati jye narangije kubategulira impamba ikomeye! Ministri Kaboneka we araburira abanyarwanda agira ati uwumva ashaka kujya mu ijuru bwangu niyirukanke hakiri kare, aduhe amahoro!banyarwanda banyarwandakazi ngirango uwumva niyumve cyangwa niba atirukanse bwangu wa mugani wa Kaboneka ahagarare apfe kigabo.Murakoze.

Byanditswe kuwa 03/08/2016, na:
A.BEN NTUYENABO, KIGALI-RWANDA.

Ibijya gucika bica amarenga. Ubuhanuzi bw’intambara mu Rwanda bwatumye bamwe bahunga

Muli iyi minsi hano mu Rwanda, mu turere dutandukanye n’umugi wa Kigali; haravugwa abantu bavuga ko ari abahanuzi b’Imana bakwirakwiza amakuru bavuga ko hagiye kuba intambara ikomeye mu Rwanda, ibyo bigatuma bamwe baratangiye gukuka imitima ariko bafata n’icyemezo cyo guhunga igihugu, abandi umugoroba washyika ndavuga hano mu mugi wa Kigali ugasanga buri wese arwana no kugera aho ataha bwangu; ari abagendesha amaguru cyangwa abifite bagendesha amamodoka yabo usanga bose basa nabatanguranwa mu gutaha, dore ko naho ibiciro ku modoka zitwara abagenzi byiyongereye bamwe basigaye bagerageza gutaha n’amaguru; urugero hano mu mugi wa Kigali umuhanda uturuka Gare (ville) – Nyabugogo-Gatsata-Karuruma.

Ahandi Quartier commercial – Mosquée Biryogo-Nyamirambo, aho hose usanga ari urujya n’uruza rw’imidoka n’abanyamaguru hakiyongeraho noneho n’abazunguzajyi babandi bacuruza imbuto, imyenda n’ibindi…baba bagendagenda ahantu hose, ku tubari, mu ingo etc….ibyo byose bakabikorana impungenge nubwo bwose hirya no hino kuli iyo mihanda haba harangwa abasilikare n’abapolisi ndetse na Dasso.

Ngarutse rero kuli abo bahanuzi, mu kagali ka Gahunga, mu Karere ka Gasabo, abaturage bamwe bamaze guhungira mu gihugu cya Ouganda kubera abapentenkote b’abarokore ngo bababwira ko ibintu hano mu Rwanda bigiye gucika, ko imbere aha hari chorale ikosora akaba ari intambara ikomeye igiye kuba mu Rwanda. Ubu haravugwa kandi abandi bagenzi babo bagera ku 9 bamaze gutabwa muli yombi mu Karere ka RUTSIRO, nabo kubera gukwirakwiza bene ayo makuru bemeza ko mu Rwanda hagiye kuba intambara ikomeye; abo bantu 9 bakaba barafashwe muli iki cyumweru gishize bazenguruka urugo ku rundi mu Mirenge itandukanye yo muli ako Karere ka RUTSIRO irimo RUHANGO, GIHINGA, NYABIRASI ubu bakaba bafungiye i Karongi.

Cpt. Geofrey Kagame ukuriye ingabo muli ako karere ka Rutsiro, kuli telefoni yagize ati :’’U Rwanda rufite Imana nta mpamvu yo kugenda bavuga ko batumwe nayo; akomeza avuga ko nta ntambara ihari kandi ko nta nizabaho kuko u Rwanda rufite umutekano usesuye byongeye kandi ingabo ziri maso, ati utifuriza u Rwanda amahoro ni Inyangabirama’’. Akaba asaba abaturage kuba maso no kwima amatwi abo bantu bashaka kubashora mu buhunzi.

Umuyobozi w’akarere ka Rutsiro, Bwana Gaspard BYUKUSENGE yadutangarije ko abo bantu biyita ko batumwe n’Imana bafashwe koko bakaba bari mu maboko ya police, ati bageze muli aka Karere ka Rutsiro baturutse mu mujyi wa Kigali, bagera i Rubavu na Nyaruguru, aliko ntibajya bagera mu nsengero cyangwa muli za paroisses hari abantu bajijutse ahubwo biyegerezaga abaciriritse bakabakusanya bagahita batanga ubwo buhanuzi bwabo.

Banyarwanda banyarwandakazi, aba bahanuzi barimo kugaragara cyane cyane mu matorero y’abapentekote (abarokore); ibi kandi bikaba byaragarutsweho n’uhagaraliye itorero ADEPR mu Rwanda ku munsi wo kwizihiza isabukuru y’imyaka 75 ya Yubile iryo Torero rimaze rishinzwe , aho Rev. Pasteur SIBOMANA Jean, imbere y’umushyitsi mukuru Ministri w’ubutegetsi bw’igihugu Bwana KABONEKA Francis nk’intumwa ya Leta muri uwo muhango; yahamagariye abakristo ba ADEPR kwirinda abahanuzi b’ibinyoma babagana akaba yaragaragaje ko ari abashaka kubavangira, yakomeje agira ati : ‘’Nk’umufatanyabikorwa wa Leta; abayoboke b’itorero mpagarariye basabye Prezida Kagame Paul gukomeza kuyobora u Rwanda’’, akomeza agira ati :’’Nyakubahwa Mushyitsi Mukuru ndagira ngo mbahe ubutumwa bw’abakristo bari hano n’abandi batari aha bifuza gukomeza kuyoborwa na Prezida wa republika dufite ubu Kagame Paul’’.

Nk’abakristo b’Itorero rya Pentekote mu Rwanda, twifatanije n’abandi banyarwanda gukomeza gushyigikira ibikorwa byose by’ubuyobozi bwiza dufite.

Ministri KABONEKA nk’uhagaraliye gouvernement nawe ati : ’’Itorero ADEPR ni umufatanyabikorwa mwiza wa Leta, igihugu kizakomeza gufatanya nawe mu bikorwa byose yiyemeje haba mu iterambere ry’abakristo n’abanyarwanda muli rusange, akomeza agira ati : ‘’Hamaze kugerwaho byinshi k’ubufatanye bwa Leta, amadini n’amatolero nyuma ya génocide yakorewe abatutsi 1994 igikenewe ubu ni ukubisigasira’’.

Banyarwanda banyarwandakazi, mwiyumviye ayo magambo y’abo bayobozi, by’umwihariko aya rév.pasteur SIBOMANA Jean! Ni ubutumwa butajyanye na gato n’umunsi nyamukuru w’abakristo!, ese koko nk’abakristo ba ADEPR twemere tujye dufatanya iyogezabutumwa na politiki? Jye nsanga twahitamo umwami umwe aho gukeza babili. Cyangwa ku mubare w’amadini n’amatolero dufite mu Rwanda bishoboka twakwongeraho Itorero ry’Imana rishya tukaryita FPR aho kuba umutwe wa politiki! tutarinze kujya tubinyuza mu yandi matechnika! Ibyo byose rero banyarwanda banyarwandakazi, iyo ubisesenguye usanga ari uburyo bwo gucinya inkoro ku uwariwe wese wiyemeje kuba inkomamashyi.

Byanditswe ku cyumweru taliki ya 22/11/2015, na:
A.BEN NTUYENABO, KIGALI-RWANDA.

Amakuru ki ?

Amakuru

Archives par étiquette : Francis Kaboneka

Rwanda: ministri Francis Kaboneka yashyize iterabwoba ku baturage b’intara y’iburasirazuba.

Rwanda : Ese prezida Kagame azagira ubutwari bwo kunamura icumu muri 2017?

Rwanda : aho bamwe mu bayobozi ba Leta ya FPR ntibarangwa n’ingengabitekerezo y’ubwicanyi ?

Ibijya gucika bica amarenga. Ubuhanuzi bw’intambara mu Rwanda bwatumye bamwe bahunga