Archives par étiquette : Christine Mukabunani

Rwanda : Mukabunani Christine yashyikirije komosiyo y’igihugu y’amatora urutonde rw’abakandida batari abayoboke b’ishyaka.

Christine Mukabunani

Ni muli iyi nkubiri ya bucece y’ingirwamatora y’abadepite mu Rwanda aho ishyaka P.S Imberakuri rya Mukabunani Christine, igice kiyomoye kuri Me Bernard NTAGANDA , ubwo cyashyiraga ahagaragara urutonde rw’abo kifuza ko bazagihagaralira mu nteko ishinga amategeko y’u Rwanda mu matora azaba ku wa 03/09/2018 hagaragaye urutonde rw’abantu 65 aliko haza kwemerwa 45 nkuko byatangajwe na Komisiyo y’igihugu y’amatora.

Aliko nkuko byarabuwe n’umwe muli abo bakandida Bwana Louis NZABAKENGA usanzwe n’ubundi abarizwa muli iryo shyaka kuva ryashingwa muli 2009 akaba ari numwe mu bahagaraliye iryo shyaka muli forum y’amashyaka mu Rwanda yadutangarije ko Ishyaka PS Imberakuri ryabeshye Komisiyo y’igihugu y’amatora riyishyikiriza amazina y’abakandida benshi muribo batabarizwa mu ishyaka PS Imberakuri yewe batigeze banarikozamo ikirenge ! ati uretse jyewe n’abandi batanu dusanzwe turi abayoboke b’ishyaka abandi bose n’urubyiruko rw’abashomeri b’insoresore n’inkumi MUKABUNANI yagiye atoragura hirya no hino mu mugi wa Kigali no mu ntara y’iburasirazuba aho akomoka nyuma yuko yisanze wenyine abarwanashyaka bamaze kumushiraho akabura abo ashyira ku rutonde nibwo yatangiye gukoresha ku mafranga yari yahawe na NFPO mu rwego rwa campain nkuko biri mu nshingano za Leta y’agatsiko ngo hatazagira ishyaka rijya gusabiriza hanze rikazatuzanira kabutindi! ati si ibyo gusa kuko uyu Mukabunani yaniguriyemo amasambu abili mu Karere ka Bugesera , inzu itaruzura neza mu Karere ka Kicukiro n’ivatiri Toyota Corolla yo kuryohamo. Abo basore n’inkumi bakaba barijejwe gusezera ku bushomeri n’ubukene mu gihe ishyaka PS imberakuri rizaba ribonye intebe mu nteko ishinga amategeko ,nguko reka tubitege amaso !

Twari dusanzwe tuzi ko kwiyitirira abantu batari abayoboke bawe mu nyungu z’umutwe wa politiki ari icyaha ndetse kinahanirwa none ubwo zavuyeho ndumva bafungura na Diane Shimwa Rwigara wigeze kuregwa n’uyu Mukabunani ko yamutwariye abayoboke mu matora aherutse y’umukuru w’igihugu cg bakamuhanaguraho icyo cyaha cy’uburiganya ! byongeye aba bakandida ba Mukabunani nubwo yabanje kubaha kuri izo ndonke yahawe na NFPO mu kumufasha mu bikorwa by’amatora na Campain kuri ubu baramushinja kuba ntacyo abamariye mu kwiyamamaza kuko abagenera intica ntikize y’ibihumbi bibili gusa umunsi wose biriwe babyina nta n’amazi bahawe mu gihe indi mitwe ya politiki buri wese yandikirwa bitanu ku munsi amazi yo kunywa atabariwemo.

Kandida Nzabakenga Louis akomeza yemeza ko ishyaka PS IMBERAKURI risa niriyoborwa na FPR uretse guhora rijijisha ko ritavugarumwe nayo.

Muriyumvira rero iby’iyo demokrasi bita ngo ni ubudasa bw’u Rwanda kandi ahubwo ari agahomamunwa ! ubu se uyu Mukabunani usambira ibyinshi n’udukeya twose aramutse ashyizwe mu nteko dore ko amatora mu mucyo yo ari nk’inzozi mu gihugu cyacu, yazamalira iki abaturage koko ? Gusa nta gahora gahanze ! ibi byose bigombe bihinduke, tubiteze amaso !

Byanditswe ku wa 31/08/2018, na :
A.BEN NTUYENABO, KIGALI-RWANDA.

Rwanda: ishyaka PS-Imberakuri, igice cya Mukabunani, naryo ngo rigiye gutanga ikirego gishinja Diane Rwigara

Christine Mukabunani/http://www.impamo.net

Mu gihe akiburana ifungwa n’ifungurwa no kunganirwa mu by’amatageko n’umwunganizi we Me Buhuru Célestin nkuko rwasubukuwe ku wa gatatu taliki ya 18/10/2017 mu rukiko rwisumbuye rwa Nyarugenge; umwari Diane Rwigara akomeje kugerwa amajanja n’abambari b’agatsiko ka FPR-INKOTANYI.

Kuri 17/10/2017 nibwo mu kiganiro kigufi yahaye kimwe mu binyamakuru bya hano mu Rwanda umuyobozi wa rimwe mu mashyaka akorera hano mu Rwanda yashyigikiye Pahulo Kagame mu matora aherutse ya mandat ya 3 ariryo PS IMBERAKURI igice kiyomoye kuri Me NTAGANDA Bernard kikaba kiyobowe na Mukabunani Christine; yatangaje ko ishyaka rye rigiye gushyikiriza ubushinjacyaha ikirego riregamo Umwari Diane Rwigara kuba yaribye inyandiko y’abayoboke ba PS Imberakuri akayikoresha mu gushaka kwiyamamariza gutegeka u Rwanda.

Banyarwanda ibi byubuye mu gihe ubushinjacyaha burimo buhuzagurika ku byaha bushinja abo kwa Rwigara kandi icyo kirego kikaba kitari mubyo bumushinja ku ikubitiro, bikaba bitumvikana ukuntu uyu Mukabunani abyukije icyo kirego ! aho se ntibyaba ari rya technical rya FPR n’abambari bayo tumenyereye ? nta gushidikanya.

Gusa hambere ubwo Diane Rwigara yiyamamarizaga kuyobora u Rwanda yigeze kuvuga ko iyo liste y’abayoboke ba PS Imberakuri yashinjwaga na NEC (Commission y’igihugu y’amatora) atazi aho yavuye yongeraho kandi ko icyo atari ikibazo kuko hari nabo muli FPR-INKOTANYI bamusinyiye.

Ababikurikiranira hafi barasanga byanze bikunze uyu Mukabunani ari undi mutangabuhamya wiyongereye ku bashinja Diane Rwigara. Ni akumiro rwose ! uwapfuye yarihuse.

Banyarwanda, tubibutse ko ubusanzwe aya malisti avugwa y’abayoboke b’amashyaka abikwa ahantu hatatu muli rusange ariho mu bunyamabanga bw’ishyaka nyirizina, copies zikoherezwa muli Ministѐre y’ubutegetsi bw’igihugu mu nshingano zayo no muli commission y’igihugu y’amatora (NEC); bikaba bigaragara ko gushaka guhimbira umuntu ibinyoma wifashishije hamwe muli izi nzego za Leta y’agatsiko cyangwa ku buryo bwumvikanyweho n’aba bose byoroshye cyane.

Mukabunani akaba akomeza avuga ko agiye guteranya inama rusange y’abarwanashyaka ba PS IMBERAKURI bakemeza niba Diane Rwigara agomba kuregerwa icyo cyaha n’ishyaka rye ariko byose ndasanga ari nk’urwiyerurutso. Mureke tubitege amaso.

Byanditswe ku wa 18/10/2017, na :
A.BEN NTUYENABO, KIGALI-RWANDA.

Amashyaka ari mu Rwanda mu kigare cyo gushyigikira Kagame mu matora yo kuya 3-4/08/2017

Ni nyuma yuko bamwe mu batumirwa bahagaraliye amashyirahamwe yiswe amashyaka muli congrès ya FPR-inkotanyi akorera mu Rwanda kandi ntawe uyobewe ko yose ari ibikoresho bya Leta y’agatsiko ka FPR-Inkotanyi noneho bamwe muribo bakomereje mu madini babarizwamo bakwirakwiza ingengabitekerezo yo gushyigikira Paul Kagame mu matora yo ku ya 3 niya 4 Kanama 2017.

Ni muli urwo rwego Shehi Mussa Fazili Harelimana Prezida w’ishyaka PDI nyuma yuko atangarije abagize congrès ya Fpr-Inkotanyi ko ishyaka rye PDI risyhigikiye kandidatire ya Paul Kagame nkuko ryabyiyemeje kuva 2013 kandi ko nta wundi mukandida bifuza ko abayobora nyuma ya 2017, akanongeraho ko Prezida Kagame akwiye kwitwa ‘’BABA WA TAIFA’’ kuko ngo arenze kuba intwari bityo ahubwo ngo akazubakirwa n’ingoro ivuga ku mateka y’ubuzima bwe by’umwihariko ! nimwiyumvire namwe ! abinyujije mu nama nkuru y’umuryango w’abayisilamu mu Rwanda rero akaba amaze gusaba abayoboke bose b’idini ya Islam kuzashyigikira candidature ya Prezida Paul Kagame mu ngirwamatora yo muli Kanama 2017. Hakaba kandi hanategerejwe n’andi madini nka ADEPR nandi y’inzaduka yose akunze kwigaragaza mu kwaha kwa FPR.

Banyarwanda banyarwandakazi, uyu mugabo Mussa Fazili ntiyaherukaga kuvuga nyuma yaho ashyiriwe ku gatebe ntahabwe undi mwanya muli gouvernement y’agatsiko akaba abyukije umutwe yongera gucinya inkoro ngo arebe ko bwacya kabili ! aliko aribeshya Leta y’agatsiko siko ikora! Yagombye kubanza kugarura umuhungu we bivugwa ko yoherejwe mu myitozo y’intagondwa z’abayisilamu ahantu hatazwi kugeza ubu! (Islamic state). ngibyo ngibyo !

Naho MUKABUNANI uhagaraliye ishyaka PS Imberakuri igice kiyomoye kuli Me ati ishyaka ryacu nta mukandida tuzatanga mu matora ateganijwe kubera inzitizi zirimo kuba bakitugereranya na FDLR bitewe n’abayobozi bamwe na bamwe mu gihugu batuvangira kandi turi ishyaka ryemewe na republika y’u Rwanda byongeye tukaba turi no mu ihuliro ry’amashyaka nyunguranabitekerezo yemewe mu gihugu cyacu. Ati ishyaka PS Imberakuri rizakomeza gushyigikira ibitekerezo binenga ibitagenda neza no kubishakira ibisubizo binyuze mu nzira y’amahoro nta muvundo.

Mukabunani agakomeza asaba abayoboke be kuzitabira ayo matora y’umukuru w’igihugu bahitamo ingirakamaro.

Banyarwanda banyarwandakazi, nimwiyumvire namwe iby’amashyaka mu Rwanda! Ese ishyaka ribaho rinenga gusa ku buryo ridaharanira kugera ku butegetsi kandi ubusanzwe tuzi ko ariyo ntego nyamukuru y’ishyaka iryariryo ryose ? keretse niba atari imitwe ya politiki akaba ari amashyirahamwe ya société civile? uretse ko nayo agira amategeko anonosoye ayagenga ! nkaba nsanga rero bene iyi mitwe ya politiki cyangwa amadini amwe namwe yagombye kwiyambura amakoti y’inyito yayo bagahitamo kimwe bakaba FPR-INKOTANYI ku mugaragaro kuko ikinyoma kiri ku musoto ! c’est trop bête ! uwisenyera inzu umutiza umuhoro.

Tubibutse ko muli iyo congrès ya FPR-Inkotanyi yateranye ku ya 17/06/2017 aribwo hemejwe ko Prezida Kagame atorewe kuba umukandida ndakuka ku mwanya w’umukuru w’igihugu mungirwamatora yidodeyeho ateganijwe muli Kanama 2017.

Ni muli iyo congrès kandi Prezida Kagame mu ijambo rye yavuze nk’umuntu wamaze gutorwa yigijije nkana nk’ufitiye impungenge nyinshi icyo cyemezo dore ko atagira n’isoni zo gufata discours mu rurimi rw’amahanga (icyongerereza) kandi azi ko arimo abwira abanyarwanda muli rusange akaba ahanini abiterwa nuko abo abwira ari ka gatsiko kibumbiye cyane cyane muli RPF-INKOTANYI katurutse muli Ouganda mu gihe abandi banyarwanda baba bakulikira buhumyi nk’abayobowe bunyago !

Prezida Kagame rero akaba yaratangiye abashimira cyane icyo kizere ari nako abizeza ko azakora ibishoboka byose kugirango haboneke uzamusimbura nyuma y’imyaka 7, ati nari nzi ko nagombaga guhererekanya inkoni y’ubushumba nugomba kunsimbura none si ko bigenze! Prezida Kagame akaba yaririnze kugira icyo avuga niba gushaka uzamusimbura bihita bitangira gukorwa mu gihe cya vuba cyangwa ku musozo wiriya mandat y’imyaka 7 ! bikaba bibaye ubugira kabili prezida kagame aha abarwanashyaka ba RPF umukoro abasaba gutekereza uko bizagenda nyuma ye ! aho asa nuwemeza ko hari umurimo ukomeye wo gutegura ihererekanya-butegetsi ku musozo w’iyi myaka 7 iri imbere ! akaba yihamiriza kuba ariwe ukenewe gukomeza kuyobora u Rwanda ngo kuko abona nta wundi wo kumusimbura uhari muli iki gihe! ibi ni agahomamunwa pe ! imyumvire iragwira!

Prezida Kagame akaba yaraboneyeho n’umwanya wo kwongera guhamagalira cyane cyane urubyiruko akomeje gushaka gushora mu bikorwa bya politiki y’amacakubiri aho arusaba kwitabira politiki ati muli mwe abavutse mbere gato ya jenoside na nyuma yayo mumaze gukura hafi imyaka 38 na 41 hashobora rero kuvamo uba Prezida wa republika ! ati mukareka kuba ba ntibindeba ngo ntimwajya muli politiki ! nimukomeza kuyirengagiza muzagira ingaruka zo kuyoborwa n’abantu batababereye mu minsi izakulikira !

Banyarwanda banyarwandakazi rero, biragaragara kandi ntibinatangaje umuntu yibukije ko Prezida Kagame yabereye abanyarwanda umuyobozi mubi kuko umuyobozi mwiza nutegura hakiri kare uzamusimbura kugirango ibyo yubatse bitazasenyuka aliko kugeza magingo aya ngo Kagame atariho ntacyakorwa u Rwanda rwakwongera kuba icuraburindi ! ibi ni akumiro pe ! birababaje ! banyarwanda banyarwandakazi, ese namwe muremeranya nawe kuri iyo turufu y’ikinyoma ? tubiteze amaso !

Byanditswe ku wa 21/06/2017, na :
A.BEN NTUYENABO, KIGALI-RWANDA.

Rwanda: Christine Mukabunani n’agatsiko ke ngo nabo bazashyigikira Paul Kagame mu matora ya Prezida

Christine Mukabunani/photo igihe.com

Ni kuri iki cyumweru gishize taliki ya 11/06/2017 mu rwego rwo gufata icyemezo ku matora ya prezida wa republika yo muli Kanama 2017 aho Mme Mukabunani Christine umuyobozi w’ishyaka PS Imberakuri igice kiyomoye kuri Me Ntaganda Bernard , yatangarije abanyamakuru imbere y’imbaga y’abanyamuryango bagize inama nkuru y’igihugu b’ishyaka PS imberakuri ko ishyaka ayoboye ritazatanga umukandida mu matora ya prezida wa republika ateganijwe muli uyu mwaka 2017 bitewe n’inzitizi iryo shyaka ryakunze guhura nazo mu matora yaherutse bigaragara ko zitaravaho. Izo nzitizi akaba atari ukutiyamamaza mu bwisanzure harimo kubangamirwa bikabije n’inzego z’ibanze zo mu gihugu.

Mukabunani akaba yaravuze aya magambo kubera ibyari bimaze kubashyikira ako kanya aho we n’abayoboke be bari bamaze gusohorwa mu cyumba bari bateguye gukoreramo inama bashinjwa ko ishyaka ryabo ritemewe aliko ku bwamahirwe bashobora kugobokwa na Mayor w’akarere ka Gasabo Bwana Rwamurangwa Steven ategeka ko inama ikomeza nkuko byari byasabwe mbere yaho, nibwo abayoboke basubiye mu myanya yabo inama irakomeza.

Hakurikiyeho igikorwa cyo gutanga ibitekerezo no gufata icyemezo binyujijwe mu matora aho 69% bemeje ko ishyaka PS imberakuri ritazatanga candidature, 30% bo bakifuza gutanga umukandida naho 1% ntaho babogamiye.

Mukabunani yakomeje asaba abanyamuryango ba PS Imberakuri kuzitabira bisanzwe amatora ya prezida wa republika ati aliko muzashishoze mu gutora ingirakamaro mukurikije umutimanama wa buri wese uko abyumva. Ati twahitamo gutangira gutegura neza amatora y’abadepite azaba muli 2018 aho kugirango twinjire mu matora tuzi neza ko tutazatsinda, kwaba ari ugupfusha ubusa kandi nizo nzitizi tuvuga zitaravaho.

Mukabunani ntiyariye iminwa aho yanatunze agatoki Ministeri y’ubutegetsi bw’igihugu aho ayishinja kuba itigisha abayobozi b’inzego z’ibanze mu kubashishikariza ko hariho n’indi mitwe ya politiki yemewe mu gihugu cyacu uretse FPR, PSD na PL gusa, ati aho usanga bamwe mu barwanashyaka biyo mitwe mvuze haruguru ari nabo bonyine biganje mu butegetsi bwite bwa Leta cyane cyane mu nzego z’ibanze bityo ntibabe batuma hari undi mutwe wa politiki uhakorera ibikorwa byawo mu buryo bworoshye kandi byitwa ngo dusangiye ibitekerezo mu kubaka igihugu nk’abagize forum y’imitwe ya politiki yemewe mu Rwanda, ati noneho byakubitiraho no mu gihe cy’amatora nkaya bikatubera ingorabahizi. Mukabunani ati ibyo ni bimwe byatumye tudashobora gutanga umukandida mu matora y’umukuru w’igihugu muli Kanama 2017.

Mukabunani yakomeje avuga ko kugirango haboneke ubwisanzure bw’ibikorwa by’imitwe ya poilitiki ku buryo bungana abayobozi b’uturere babarizwa mu mitwe ya politiki runaka bagombye gusimbuzwa abadafite aho babogamiye nkuko bigenda mu bindi bihugu, cyangwa hakabaho isaranganya ry’ubutegetsi rikwiye bityo inzitizi imitwe imwe n’imwe ya politiki igira zikavaho dore ko ari na bimwe bikunze gukurura amakimbirane ya politiki.

Ikindi Mukabunani yakomojeho ni ibyerekeranye n’amajwi ya 5% akurikizwa kugirango umutwe wa politiki ushobore guhabwa intebe mu nteko ishinga amategeko, ati ku bwacu ayo majwi ya 5% yagombye kuvaho kuko atuma hatsikamirwa imitwe imwe n’imwe ya politiki bavuga ko itatsinze mumatora kandi iba yaratanze Manifeste igaragaza ibitekerezo byubaka igihugu ndetse bimwe na bimwe gouvernement ikabishyira mu bikorwa hatazirikanywe umutwe wa politiki wabitanze ugasanga rero nabyo bisa nk’akarengane!

Banyarwanda banyarwandakazi , ahangaha Mukabunani ndabona yarashakaga kugaragaza ko hashobora kuba hari ibitekerezo ishyaka abereye umuyobozi ryaba ryaratanze muli manifeste yaryo byagendeweho muli programme ya gouvernement aliko rikaba ntacyo riragororerwa!

Ibyo Mme Mukabunani akaba yongeye kubishimangira kuri uyu wa kane taliki ya 15/06/2017 mu kiganiro yagiranye n’imwe mu maradiyo ya hano mu Rwanda yitwa Flash-FM aho akomeje kugaragaza ko nubwo ishyaka rye ribarizwa muli opposition aliko rifatanyije n’andi yose yishyize hamwe muli forum nyunguranabitekerezo hakurikijwe itegeko-nshinga ry’u Rwanda bityo iyo concensus ikaba yakagombye kugeza ishyaka rye mu ruhando rw’isaranganya ry’ubutegetsi nkuko biteganijwe mu mategeko n’amabwiriza ashyiraho iryo huliro ry’imitwe ya politiki.

Mukabunani yakomeje avuga ko bagiye gukomeza gukora ubuvugizi kugirango amatora y’inteko ishinga amategeko muli 2018 bagiye gutangira kwitegura azagere izo nzitizi zose zaravanyweho, ati aliko birasaba imbaraga nyinshi!

Banyarwanda banyarwandakazi, nkurikije izi nenge za Mukabunani yaba se aribwo atangiye kumenya abo akina nabo abo aribo ? uretse ko nabo Ntahobari ni umwana w’umunyarwanda ! cyangwa hari ikibyihishe inyuma! kandi niba ari ko bimeze niyihangane kuko urwikururiye arusoma!

Hagati aho hari amakuru atugeraho kandi yizewe aduhamiriza ubutumire bw’ishyaka Fpr-inkotanyi, ishyaka riri ku butegetsi, bugenewe uyu Mukabunani Christine kuzitabira kongre ya FPR-INKOTANYI mu rwego rw’igihugu izaterana kuri uyu wa gatandatu taliki ya 17/06/2017 mu rwego rwo kurangiza umuhango wo kwemeza prezida Kagame nk’umukandida rukumbi w’umuryango wa FPR-INKOTANYI mu matora ya prezida wa republika 2017! reka tubitege amaso !

Byanditswe ku wa 15/06/2017, na :

A.BEN NTUYENABO, KIGALI-RWANDA.

Rwanda : Christine Mukabunani na Frank Habineza barimo gusarurira mu rucaca

Christine Mukabunani na Frank Habineza

Nkuko bigaragalira buri wese amashyaka PS Imberakuri igice kiyobowe na Mukabunani Christine ari nacyo cyemewe na Leta ya FPR na Green Party iyobowe na Frank Habineza nubwo birengagiza ko babarirwa mu kwaha kwa FPR byanga bikunde barifuza imyanya mu nzego zifata ibyemezo mu butegetsi bwayo. Ese Leta y’agatsiko hari icyo ishobora kubamalira muli ibi bihe igezemo uretse kubigizaho nkana igirango ibagire ibikoresho byayo gusa?

Ni mugihe gishize mu kiganiro n’abanyamakuru aho Madame Mukabunani Christine umuyobozi w’ishyaka PS IMBERAKURI igice kiyomoye kuli Prezida fondateur waryo Me Ntaganda Bernard,amaze kubona ko ibyo bagororeye umuryango FPR ishyaka riri ku butegetsi bawufasha mukwirukana mu ishyaka Prezida fondateur waryo Me Ntaganda n’abandi bari bashyigikiye ibitekerezo bye,ni mu minsi ishize kuwa 11/09/2016 aho uyu Mukabunani yabaye nkuwerurira umunyamakuru ashaka kumwumvisha ko nta musaruro babyungukiyemo ko ahubwo FPR yabafashe nk’ibikoresho bidafite umumaro n’ubwenge.

Mukabunani Christine umaze kuyobora inshuro ebyiri zose ihuliro ry’amashyaka yemewe mu Rwanda yatangarije umunyamakuru Emma Marie Umurerwa ko igihe kigeze ngo bahabwe imyanya mu nzego z’ubutegetsi zifata ibyemezo kuko ngo kuba bicaye mu ihuliro ryitwa ko ari nyungurana-bitekerezo gusa bidahagije!ati uretse ihuliro dukeneye ahandi hagutse dutambukirizamo ibitekerezo byacu dore ko ari na byinshi!yakomeje atangariza umunyamakuru Emma Marie Umurerwa ati niba dukorera hamwe mukungurana ibitekerezo byubaka igihugu twagombye kubona aho tubitambukiriza bityo ijambo ryacu rikarushaho kumvikana.

Umunyamakuru yakomeje amubaza niba hari gahunda n’ubushobozi ishyaka rye rifite ryo guhatanira umwanya mumatora ya Prezida wa Republika ateganijwe muli 2017, Mukabunani yasubije ko bafite abantu babifitiye ubushobozi ati kuki se tutakiyobora? ati aliko bizemezwa na Congrès y’ishyaka.

Aya mashyaka PS Imberakuri ya Mukabunani na Green Party yitwa ko ari muli opposition mu Rwanda imbere mu gihugu si ukuvuga ko yabuze aho asohorera ibitekerezo byayo ahubwo nsanga mu kugabana imyanya y’ubuyobozi yarategereje guhabwa na FPR amaso yaraheze mu kirere none akaba aribwo yibutse ko yaruhiye ubusa kandi amazi akaba yararangije kurenga inkombe.Aya mashyaka yombi akaba yifuza imyanya yihariye itavangiye,bivuga ko mu gihe andi akomeza kwifubika mu mababa ya FPR no gushyirwa ku rutonde rw’abakandida ba FPR mu gihe cyose cy’amatora kugirango agabane imyanya, aya yo ntajya abikozwa bityo bigatuma nta nuwo kugirwa gitifu bashobora kuronka ibyo bikanatuma bahozwaho ijisho na Leta ya FPR kugirango hatagira ubihishamo waba akorana n’abarwanya ubutegetsi imbere mu gihugu aliko cyane cyane abari hanze y’u Rwanda.

Tubibutse ko muli manifeste politique yakozwe niri shyaka PS Imberakuri igice cyemewe na leta ya FPR, mu matora y’abadepite 2013 harimo igitekerezo cyo kugarura isomo ry’igifransa ryari ryaraciwe mu mashuri yo mu Rwanda icyakora cyatekerejweho gihabwa umugisha na Leta ya FPR bityo gouvernement yemeza ko urwo rurimi rugomba gusubizwa mu mashuri yo mu Rwanda ku buryo iyo gahunda izatangirana n’umwaka w’amashuri 2016-2017.

Nkurikije ibyiyumviro by’aya mashyaka PS Imberakuri ya Mukabunani na Green Party nayagira inama yo kuyoboka opposition nyakuri aho gukomeza kugaraguzwa agati na Leta ya FPR irimo kwishakira abayoboke bo kuzisasira igihe cyayo kirangiye burundu. Keretse niba yemeye aka wa mugani ngo ‘’Akabaye icwende ntikwoga’’!

Mugire amahoro.

Byanditswe kuwa 09/11/2016,na:

A.BEN NTUYENABO,KIGALI-RWANDA.

Demukarasi mu Rwanda ni agahomamunwa!

Christine Mukabunani

Hari ku cyumweru taliki ya 3/05/2015 mu ma saa tatu ya mugitondo, ninjiye mukigo kimwe cy’Abihayimana ahitwa Kicukiro ya Kigali (Soeurs de Saint François d’Assise) ku buryo butunguranye nsanga hagiye kuberamo inama y’ishyaka P.S Imberakuri ryiyita ko riri muli opposition igice cya Mukabunani Christine uyu wasimbuye Me Ntaganda Bernard prezida-fondateur waryo amaze kugambanirwa agafungwa; aliko mu by’ukuri rigendera mu kwaha kwa FPR dore ko riri no muli forum y’amashyaka yemewe na FPR.

Nagize amatsiko rero ninjira muli icyo cyumba gitoya kicayemo abantu batarenga 30 ngo b’abayoboke baturutse mu gihugu hose. Ibyari binjyanye aho nabaye mbyihoreye dore ko nta nuwambajije uwo ndiwe.

Tumaze kwicara, nk’umuntu utari uzi Gahunda kandi ngamije kumva no gukurikirana iby’iyo nama, narategereje nk’abandi, Prezidante w’ishyaka ariwe Mukabunani aba arahagurutse arasuhuza ati dore uko Gahunda y’uyu munsi iteye:
1. Kwugurana ku byerekeye Iterambere ry’Igihugu
2. Kwugurana ku byerekeye Imbuga nkoranya-mbaga
3. Mugusoza turashyikiriza Certificats k’Urubyiruko rurangije mu ishuri rya Politiki n’Imiyoborere myiza.

– Ubwo twatangiye twinjira muli za débats, hazamo ibyerekeye uburezi, kwishakira imilimo n’ibindi byinshi ntarondogora nduzi ko kwari ukurangiza umuhango hagamijwe gutangariza abanyarwanda kuli televiziyo Umwanzuro uvuga ku byerekeye Art.101 y’Itegeko-nshinga, no kugabana udufaranga FPR ibajugunyira ngo bakunde bavuge ko mu Rwanda hari démocratie isesuye kandi ishingiye ku mashyaka menshi.

– Icyantangaje nshaka kubabwira rero, banyarwanda,banyarwandakazi, ni uko Umwanzuro nyamukuru w’iyo nama wabaye kwemeza ko ishyaka P.S Imberakuri riri muli opposition, igice cyemewe na Leta ya FPR ryemeje ko Itegeko-nshinga ryahinduka Prezida Paul Kagame akongera kwiyamamariza umwanya wa Prezida wa Republika muli 2017.

– Icyababaje bamwe muli abo bayoboke rero ni uko iyo ngingo itari ku rutonde rwa gahunda y’uwo munsi byongeye kandi ntigaragare no mu tuntu n’utundi….yewe nta nuwigeze ayijujuraho!!

Nyuma y’isaha imwe televiziyo nyarwanda yari imaze gutangaza uwo mwanzuro navuze haruguru, dore ko nta n’ikindi gitangazamakuru kiba kemerewe kugera aho ayo manama ateranira ; aliko ibyo byose kubera igitugu cya FPR n’abakuru b’amashyaka ari mu kwaha kwayo byitwa ko bakorera abanyarwanda (abayoboke) n’abandi bose muli rusange, babashukisha udufaranga babaha nyuma ya buri nama kugira ngo bakunde bemeze ko art.101 y’itegeko-nshinga ihindurwa. N’ikimenyimenyi, hari umugabo witwa Jackson urebye wo muri fpr wagendaga agorora aho batavuze uko bishakwa kandi ingirwa Mukabunane iri aho ikanuye amaso.‏

Inama irangiye bagiye mu matsinda yaho baturutse kugira ngo bagabane udufaranga baba bagenewe na rpf aho buri mu partisan wa Mukabunane witabiriye inama yahabwaga 5000frw. Abatari batumiwe baje ari abavumba bahise basohoka barigendera.‏

Ibyo FPR ikabikora nanone izenguruka igihugu cyose isinyisha impapuro ku ngufu abaturage, amashyirahamwe anyuranye ngo bemere bandikire Inteko Ishinga Amategeko bayisaba ko igomba kwemeza Ihinduka ry’Itegeko-nshinga kugira ngo Prezida Paul Kagame azongere yiyamamarize umwanya wa Prezida wa Republika muli 2017. Amakarito n’amakarito yuzuye izo mpapuro bakikorera bakajyana I Kigali mu nteko nshinga- mategeko ngo ni ibyifuzo by’abaturage, Yewe Inteko iragowe ! yo izemera kwikorera umusaraba itazageza aho ijya! Tubitege amaso!
Banyarwanda,banyarwandakazi, twoye kwiroha mu rwobo turureba, umuntu umwe siwe kamara! Igihe kirageze kandi Ibihe bihora bisimburana iteka, Kagame nawe rero namugira Inama yo kumenya ko ntawe ugenda asize ibitenga byuzuye,ni igihe cyo gusigasira isimburanwa k’ubutegetsi binyuze mu mucyo.

Mugire Amahoro.

Byanditswe na: A. Ben NTUYENABO
KIGALI-RWANDA.‏

Amakuru ki ?

Amakuru