Archives par étiquette : Charles Karamba

Rwanda : impinduka  zirakomeje  mu  butegetsi  bw’igitugu  bwa  Leta  ya  FPR-Kagame.

Brig. Gen. Nzabamwita Joseph/foto www.igihe.com

Brig. Gen. Nzabamwita Joseph/foto www.igihe.com

Nkuko  bisanzwe  bigendekera  Prezida  Paul  Kagame, akaba  amaze  kubigira  ihame  rye, asigaye  arota  avanaho  umuyobozi  runaka  bugacya  yavanyweho  ikizere, babandi  bagize  gouvernement  afata  nkabakozi  be  bo  mu  rugo  bagatungurwa  n’inama  yihutirwa  ibamenyesha  ibyemezo  byafashwe  n’umwami  w’u  Rwanda  ariwe  Paul  Kagame  muli  iki  gihe.

Ni  kuli  uyu  wa  29  Werurwe  2016  mu  inama  idasanzwe  y’abaministri,  ubwo  yarahizaga  bamwe  mu  basirikare  bakuru  amaze  iminsi  agaraguza  agati  abahinduranya  uko  yishakiye  abandi  asa  naho  abicaza  ku  gatebe  ngo  arabagabira  imyanya  ikomeye (reba  Lt.gén.  Karenzi  Karake); ubwo  rero  yatangizaga  iyo  nama  yabanje  guha  ikaze  Ministri  mushya  w’iterambere  ry’umuryango  Dr. Diane  Gashumba  akurikizaho  abo  basirikare  bakuru  barimo  Brgd. Général  Joseph  Nzabamwita  wahawe  kuyobora  ibiro  bikuru  by’iperereza  n’umutekano  akaba  asimbuye  kuri  uwo  mwanya  Lt. Général  Karake  Karenzi  utanagaragaye  aho; abandi  ni  Major  Général  Jacques  Musemakweri   washinzwe  ingabo  zirwanira  ku  butaka  na  Bgdr général  Charles  Karamba  washinzwe  ingabo  zirwanira  mu  kirere, abo  bose  akaba  yabibukije  akamaro  k’inshingano  shya  bahawe  ko  bagomba  kuzubahiriza  nkuko  bamaze  kuzirahirira, byongeye  kandi  ati  umutekano  urakenewe  cyane  muli  ibi  bihe  Isi  igenda  ihinduka  uko  bukeye  uko  bwije.

Muli  iyo  nama  idasanzwe  y’abaministri   kandi  akaba  yirukanye  Général  Major  Rwarakabije  wari  umuyobozi  mukuru  wa  RCS (Ikigo  k’igihugu  gishinzwe  imfungwa  n’abagororwa) n’uwari  amwungirije  Commissaire  Gahonzire  Mary.  Abagizwe  abayobozi  bashya  bakaba  ari  Brgd . général  George  RWIGAMBA  n’ umwungirije  Lt.  col. UJENEZA  Chantal.

Banyarwanda banyarwandakazi, tubibutse  ko  Général  Rwarakabije  akimara  gutahuka  mu  Rwanda  avuye  mu  mashyamba  ya  Congo  ku  bwumvikane  na  Leta  ya  FPR  yabaye  umwe  mubakomeje  kujya  bagambanira  impunzi  ziba  muli  congo  aho  yazishishikarizaga  gutaha  mu  Rwanda  azumvisha ko  mu  Rwanda  ari  amahoro , nkuwari  umuyobozi  wazo  zaramwumviye  pe  aliko  inyinshi  mu zatashye  zarishwe, izindi  zirahunga, izindi  ziburirwa  irengero  ku  buryo  izo  twavuga  zarokotse  arizo  zashyizwe  mu  bihome  byari  byaragabiwe  uyu   Général  Rwarakabije  kuzicungiramo  hirya no hino  mu gihugu , 1930  n’ahandi…  ni  agahomamunwa  pe!  byongeye  kandi  hakaba  hari  harashyizweho  na  Gahunda  yo kujya  babarasa  ku  manywa  y’ihangu  bavuga  ko  bashakaga  gutoroka!  Banyarwanda   bishoboka  bite  ko  watoroka  umurinzi  ufite  imbunda  wowe  wambaye  amapingu? Ibyo  byose  byarabaye  bibura  kirengerwa  ingero  ni  nyinshi  ntawazirondora  mwagiye  mubikulikirana  mu  binyamakuru  bitandukamye, ubu se ko mbona akimbwa  kashobotse  Général  Major  Rwarakabije  baramwerekeza  hehe?  gusa  tujye  duhora twibuka  ayo  mabi  dore ko  abenshi  twahuye  nayo.

Banyarwanda  banyarwandakazi, inama  idasanzwe  y’abaministri  yemeje  kandi  burundu  Mme  NIRERE  Madeleine  nka  Prezida  wa  commission  y’igihugu  y’uburenganzira  bwa  muntu,tukaba  tuboneyeho  kubibutsa  nanone  ko  muli  rapport  y’iyo  commission  yo muli  2015  y’iyubahiriza  ry’uburenganzira  bwa  muntu  nta   na  hamwe  ubona  imyanzuro   y’amatohoza  ku  bibazo  bikomeye  byihonyora  ry’uburenganzira  bwa  muntu  mu  gihugu  cyacu  kandi  byaragaragaye  ku  buryo  bukabije  aho  bamwe  ba  nyirimiryango   y’abanyarwanda  imirambo  irenga  40  yagaragaye  mu  kiyaga  cya  RWERU  babuze  aho  babariza  kugeza  magingo  aya  kandi  nta  gihe  batifuje  gusaba  iriya  commission  kubagaragaliza  nibura  itohoza  yabikozeho! ni  akumiro  pe!

Banyarwanda banyarwandakazi, birababaje  birenze  urugero, kubona  bamwe  mu  bana  b’u  Rwanda  bapfa  kariya  kageni  ntihagire  uvuga  bitewe  ahanini  n’ubutabera  bukorera  mu  kwaha  k’umuntu  umwe  ariwe  Paul  Kagame! Aliko  nitwihangane  kuko  ubutabera  nyabwo  bw’Imana  buri  hafi  kandi  buzagera  kuri  buri  wese. Mugire  amahoro.

Byanditswe   ku  wa  30/03/2016, na:

A.BEN  NTUYENABO, KIGALI-RWANDA.