Archives mensuelles : mai 2018

Rwanda: prezida Kagame yabeshye abari mu nama i Geneve ko u Rwanda rwagejeje gahunda z’ubuzima kuri bose .

Mu gihe bamwe mu banyarwanda bagiheka abarwayi mu ngobyi gakondo nibwo Pahulo Kagame avuga ko u Rwanda ari intangarugero mu kuba rwaragejeje gahunda z’ubuzima kuri bose nyuma ya Jenoside yo muli Mata 1994. Prezida Kagame nk’umuyobozi w’Afrika yunze ubumwe 2018 yakomeje abwira abari muli iyo nama ko buri gihugu cyose n’ubushobozi cyaba gifite bishoboka ko cyageza gahunda z’ubuzima ku baturage nkuko u Rwanda rwabikoze.

Prezida Kagame akaba yaratangaje ibi mu gihe rapport y’isi (global monitoring report ) yemeza mu cyegeranyo cyayo 2017-2018 mu bijyanye no kugeza gahunda z’ubuzima kuri bose (universal health coverage) ko umugabane w’Afrika harimo n’u Rwanda, ugifite ibibazo by’ingutu mu bijyanye n’abakozi n’ibikorwaremezo bigikenewe.

Prezida Kagame kandi yanashimangiye twa tudege dutoya bita drones tutagira abapilotes hano mu Rwanda turimo kugeragezwa mu kugeza amaraso n’ibikoresho ku bitaro byo mu bice by’icyaro akirengagiza ko rimwe na rimwe dusambukira ahatateganijwe kugwa kubera ikoranabuhanga.

Prezida Kagame akarangiza ijambo rye nawe yemeza ko urwego rw’ubuzima rwugarijwe muli Afrika anashimira by’umwihariko OMS n’abakozi bayo badahwema gutabara byihuse uko bikwiye

Aliko se banyarwanda, uretse kudukina ku mubyimba no kutwiraliriraho hejuru kubera kutagira kivugira twasanga koko twaragejejweho gahunda z’ubuzima kuri twese nkuko uyu muyobozi Pahulo Kagame yihaye kubituvugira ? abanyarwanda twaratengamaye ku buryo abanyaburayi baza kutwigiraho ! kuki se hakiri abana bakirwara bwaki abandi bakagwingira reka sinakubwira n’amavunja rugeretse? Ababyeyi se bari kunda n’indembe bagihekwa muli za ngobyi gakondo bajya kwivuriza iyo bigwa ! yewe ndi umuyobozi ukunda abaturage mbereye Prezida nabashakira nabo za drones mu mwanya w’izo ngobyi!

Si amakabyankuru rero banyarwanda, ubwo mperutse mu majyaruguru y’u Rwanda mu Karere ka Nyabihu narabyiboneye mu cyahoze cyitwa Komini Karago, prefegitura ya Gisenyi bantekerereje uburyo kubera kurambirwa Leta ihora ibabeshya kubagezaho ibikorwaremezo by’umwihariko mu rwego rw’ubuzima biremyemo amatsinda y’abaheka abarwayi mu ngobyi gakondo basimbuza imodoka za Ambulance, bishyiriraho n’amategeko abagenga n’agenga imikorere y’amatsinda yabo y’abahetsi mu midugudu 43 yose igize Karago, utayakurikije akabihanirwa kuko buri tsinda ryitoramo Prezida w’abahetsi uhorana telefone bamushakiraho igihe cyose ahamagariwe kugirango batware umurwayi ku kigo nderabuzima cyaba hafi ye.

Nkuko yakomeje abintangariza umwe mu bayoboye itsinda, Bwana NSHIMIYIMANA Emmanuel yagize ati : abahetsi si ababonetse bose ahubwo ni abantu babakoranabushake bakaba n’inyangamugayo batoranywa mu mudugudu bafite Prezida ubayobora ari nawe ushinzwe kubika ingobyi n’ibindi bikoresho. Ati ibyo bikoresho harimo ibigurwa amafranga nk’imigano n’ibiti bakoresha ku ngobyi , kugura imbaho zibazwamo amasanduku yo gushyinguramo abapfuye, kugura amatorches, amatara ya petrol na petrol ubwayo byifashishwa abahetsi igihe bajyanye umurwayi ari nijoro. Ati ayo mafranga yose akaba aturuka ku bwumvikane bw’abatuye buri mudugudu hatangwa hagati ya 500frw na 1000rwf buri kwezi. Ati ikibabaje nuko dukomeza gusabwa no gutanga amwe ya mutuelle de Santé buri mwaka !

Tubibutse ko Commune Karago ariyo yakomokagamo uwari Prezida w’u Rwanda Nyakwigendera Juvenali HABYARIMANA na bamwe mu bayobozi bakuru b’ingabo za EX-FAR, ikaba yarashegeshwe ahanini n’intambara y’abacengezi ubwo ingabo z’inkotanyi yaharwaniraga nabo zidasiga icyatsi n’ururo inyuma, abantu, amatungo hataretswe n’ibikorwaremezo birimo ibigo nderabuzima, amateme n’imihanda… nguko !

Gitifu w’umurenge wa Karago Bwana KABALISA Salomon yadutangarije ko nta kundi abaturage bari bubigenze ko ahasigaye kwari ukwirwanaho bishakira ibisubizo ati dore ko n’igihe ari kirekire kuva intambara y’abacengezi irangiye.

Banyarwanda rero muriyumvira gahunda z’ubuzima kuri bose Pahulo Kagame agenda aratira amahanga ko yagejeje ku banyarwanda ! ni agahomamunwa !

Byanditswe ku wa 23/05/2018, na:
A.BEN NTUYENABO, KIGALI-RWANDA.

Rwanda: Leta ya FPR igiye kugura cameras 124 zo gukaza umutekano mu mugi wa Kigali

photo www.bankinfosecurity.com

Ibi bikaba byaremejwe mu nama y’igihe gisanzwe ya commission y’inteko ishinga amategeko y’u Rwanda ishinzwe gusuzuma ingengo y’imari , yabaye mu cyumweru gishize mu rwego rwo kwemeza ingengo y’imari y’ikigo gishinzwe ikoranabuhanga mu Rwanda mu mwaka 2018-2019 (RISA) mu magambo avunaguye.

Nkuko abisobanura CIP Theos BADEGE, umuvugizi wa police y’u Rwanda yagize ati hifashishijwe ikoranabuhanga izo cameras (ni izo mu bwoko bwa CCTV : closed-circuit television) ziteganijwe gushyirwa ahantu hahulira cyangwa hateranira abantu benshi mu mugi wa Kigali bikazatuma police n’izindi nzego zifafatanije umutekano zigera ku ntego zazo hadakoreshejwe amafranga menshi. Ati izi cameras zikazafasha mu gukumira no gutahura ibyaha zinerekana uburyo bworoshye bwo gukora amaperereza.

Uku kwikanga abahungabanya umutekano kwa Leta y’agatsiko ka FPR kukaba kwagarutsweho kuri uyu wa 16/05/2018 na Commissaire Général wa police y’u Rwanda CIGP Emmanuel GASANA ubwo yakiraga intumwa z’igihugu cya Angola zishinzwe iby’umutekano n’ubutabera baganira no kuwa karere muli rusange aho yagaragaje ko mu Karere nta mutekano ushoboka kubera cyane cyane imitwe yitwaje intwaro ihakorera ati ni ugukomeza gufatira hamwe ingamba zo kuzitira iyo mitwe, agakomeza atunga agatoki FDLR na RNC avuga ko yishyize hamwe ikaba ibangamiye umutekano w’u Rwanda by’umwihariko ! nguko !

Député Théobald MPORANYI umwe mu bakunze kumvikanisha ijwi mu nteko y’u Rwanda akaba yemeza iyo gahunda ya za cameras ikenewe kandi ko nta kabuza abadepide bagomba kuyishyigikira uko byakabaye kuko ngo ari intambwe ikomeye mu iterambere ry’igihugu ko bagomba kuryamira amajanja !

Banyarwanda muriyumvira ! none se wa mutekano bavuga bafite ni uwuhe mu gihe bakiryamiye amajanja no gushyira mu majwi amashyaka y’impunzi z’abanyarwanda bashaka kwitahira mu mahoro mu rwababyaye ? jye rero nsanga umuti atari uko wakabaye uhora wikanga abo mwonse rimwe ubafata nk’inyangarwanda abandi urunda mu bihome ngo uriho urashaka umutekano w’agatsiko gato kagizwe na FPR ! ahubwo wafungura amarembo ya politiki bikakugeza iyo byakakujugunye inzira zigipfa kugendwa aho gukomeza kubiba amacakubiri y’amoko n’urwango mu banyarwanda kandi tuzi aho bamwe byatugejeje na nubu bikidukurikiranye, ababyeyi n’abavandimwe bacu tutazi iyo baroshywe kubera Jenoside yo muli 1994 mu gihe abandi bashyingurwa mu cyubahiro! ni akaga !

Banyarwanda rero nkuko bavuga ko muli politiki nta nshuti ihoraho akaba nta n’umwanzi uhoraho ni nako abanyarwanda twari dukwiye nibura kwitwara naho ubundi ntaho igihugu kiva ntaho kigana !

Byanditswe ku wa 18/05/2018, na :
A.BEN NTUYENABO, KIGALI-RWANDA.

« Ukuri niyo nkingi y’ubumwe bw’abanyarwanda » : André Sebatware arasubiza Aphonse Munyandamutsa

Kayuku-Kayibanda-Mbonyumutwa-Bicamumpaka au Congrès de Gitarama du 28 janvier 1961.

Uzangaye guhera, ntuzangaye gutinda (André Sebatware)

Ku nyandiko yasohowe n’uwitwa Alphonse Munyandamutsa, ngo yasesenguraga ibyo Madeleine Bicamumhaka yibazaga ku biganiro Ndahayo yagiranye na Ngarambe kuri Radiyo Ishakwe, ku byerekeye ubukonde mu “Majyararuguru y’Uburengerazuba” (Ruhengeri na Gisenyi).
Ibiramambu nasanze ahanini ari iharabika, isebanya no kucyatsa aka Semuhanuka.
Mu bisubizo byanjye ndibanda ku bimvugwaho n’ibindi nsanga ari ibinyioma ndengakamere ntakwihanganira.
Muri iyi nyandiko, ndandukura ibyo ntemeranyaho nawe Aphonse Munyandamutsa (AM), hanyuma ntange ikiyumviro cyanjye, njyewe André Seabatware (AS).
Inyandiko yose ya Alphonse Munyandamutsa, yometse hasi y’iki gisubizo cyanjye.

Alfonsi Munyandamutsa (AM):- Guhera tariki 15.02 kugera muri mata 1973, mu Rwanda habayeho Muyaga ihera ku Batutsi, igera no ku Bahutu batakomokaga mu Majyaruguru y’ Uburengerazuba bw’ i Gihugu. Twibutse ko nk’uko byanditswe na Ministre André Sebatware, kuva muri 1968 ba Officiers bakomokaga mu Majyaruguru y’ Uburengerazuba bw’u Rwanda, bari bashyigikiye kwiha mu ibanga ububasha bwo guhindura Itegeko-Nshinga.

André Sebatware (AS).-Maze rero Alphonse Munyandalmutsa, ibyo nanditse mu gitabo cyanjye n’ibiganiro nagiranye na radio Inkingi y’amahoro, ku mvururu za 73 muri Republika ya mbere, ntahuriro n’ibyo wanyanditseho. Navuze ko nyuma y, imvururu zaturutse ku marisite y’abakozi, nizatewe n, abanyeshuri, nabwiye Prezida wa Republika ko ngiye gukoresha inama y’abaprefe kugira ngo dufate ingamba zatuma bitagera no mu baturage. Umunsi inama iba, Préfet w,i GITARAMA ntiyashoboye kuyizamo, inama irangiye naje kumenya ko imvururu zari zatangiye i Gitarama. Nahise njyayo ngiye nokubwira Prezida ibyavugiwe mu nama. Ibyemezo byagombaga gufatirwa abo banyeshuri n’abandi bagizi banabi, biranditse ku buryo bwumvikana. Uzashaka kumenya ukuri kwabyo kuburyo burambuye, azabisanga mu gitabo nanditse, ku buryo bw’incamake, biboneka kuri Radio Inkingi.

A.M. Kuri Repubulika: Abarwanashyaka bumvikanye ko ubutegetsi bushyikirizwa Rubanda, bose bibaturutsemo, bakunga ubumwe bya kivandimwe. Mu gice kimwe cy’ u Rwanda bushyirwa koko mu maboko ya Rubanda, mu kindi busubira mu y’Abakuru b’ imiryango yari yarabwambuwe muri za1920. Imibanire ikaba umutware (n’ibyegera bye) n’’abagaragu » be. (Relation : chef et son obligé). Ubwo“bumwe” nabwo bwarasandaye.

A.S. Maze rero, Muyandamutsa mu nyandiko yawe wibanda kenshi ku bice bibiri by’u Rwanda, uvuga ko icytitabiriye demokrasi ari icyari kigizwe n’amaprefegitura 8, naho icya gumye mu bucakara, ari icyo ngo mu majyaruguru y’Uburengerazuba. (Ruhengeri na Gisenyi.) Niba uvugisha ukuri watubwira nibura umwe muri iyo miryago waba warasubiranye ubutegetsi Gakondo n’agace wategekaga utitaye ku mategeko y’igihugu ? Ese haba harabaye abahezwaga mu matora muri ako gace cyangwa ababuzwaga kwiyamamariza imyanya yari iteganijwe, kandi bujuje ibya ngombwa bisabwa n’amategeko ?

Niba wemera ko igihugu cyose cyagiraga Prezida, ba Ministres n’Abadepite, iyi rubanda yaje kwicwa rubozo, aka kageni, aba bose bakoraga iki ? None se Révolution ya 59 yabayabamariye iki ? Niko Munyandamutsa, ibi bibintu wabyanditse ushaka kugera kuki ?

A.M. Prefecture Ruhengeri yari irimo ibibazo by’ ingutu. Kimwe muri byo akaba ari kuba umuryango umwe munini waho (14% w’ abaturage bose) wari ufite ubutegetsi bwose ndetse n’ubucamanza.

A.S. Ibi wanditse n’ibinyoma bishingiye ku matiku. Wari kugira neza utubwiye, niba atari ubwiru, ibyo bibazo by’ingutu Ruhengeri yari yihariye n’uwo muryango umwe wategekaga Prefegitura yose uko wishakiye, nkaho igihugu kitagiraga abagitegeka.

A.M. Ubucamanza bwari bwaragugariwe kubera imanza nyinshi zakomokaga ku butegetsi gakondo. Aminadab Kanani yari mu bacamanza batari barenze batanu bari barabyigiye. Abandi bakaba baragiye bakora cours accélérés, stages, etc. Ubucamanza yari yarabwigiye mu Ishuli ry’ Ubucamanza i Strasbourg ho muri France.

By’ umwihariko Kayibanda yamusabye kutazatinya kubahiriza amategeko ya Repubulika kubera gutinya uburemere bw’ uwo muco. Muri make Aminadab Kanani yibukijwe guca imanza akurikije amategeko ya Repubulika aho kubahiriza ay’umuco yari aremereye Abagererwa, batagiraga ubutaka, abatari bashoboye kwirwanaho (démunis, faibles et incapables de se défendre eux-mêmes). Ari Kayibanda, ari na Kanani buri wese yari mu kazi ke. Nta toteza iryo ariryo ryose iyo mirimo yemera.

A.S. Umugani ugana akariho, kandi ngo ujya kubeshya arumiriza. Ibi bintu vuga kuri Kanani, amaherezo bishobora kukubera urukozasoni. Ibyerekeye Aminadabu Kanani, yabaye umwe mu bacamanza batari bafite impamya bumenyi mu bucamanza, kubera iyo mpamvu, bakoze formation i Nyanza muri Centre National de Formation Judiciaire (CNFJ), bigaga umwaka umwe, bagasubira ku kazi kabo, bagasimburwa n’abandi, umwaka washira bakajya kwiga uwa kabiri, abari babasimbuye nabo bagasubira kukazi kabo, kugeza barangije imyaka ine (4). Umwaka wa kane, aha nini wari uw’ibizamini. Kanani Aminadabu ni umwe mubahatangiriye bakanaharangiriza.

Biri n’amahire ariwowe ubyivugiye, ko amategeko yari ahari anazitira abakonde gukandamiza abagererwa.

Kandi nibyo koko, ayo mategeko, yashyizweho n’Inteko Ishinga Amategeko, akaba yaremejwe mw’itegeko bise Edit de1961 ryerekeye ubukonde bwo mu Ruhengeri na Gisenyi, batirengagije ikibazo cy’ibikingi n’inkungu mu Rwanda hose.

Bikavuga ko iryo tegeko ryavanyeho kugendera ku muco karande, akaba ariryo rikurikizwa. Ntabwo rero ari Kanani ryarebaga gusa, n’a bandi bacamanza bose bagombaga kurikurikiza. Uhereye mu nkiko z’ibanze zitwaga Kanto.

Iyo itegeko abaturage babonaga ko ribabangamiye, babigezaga kubayobozi babo no ku badepite bitoreye, itegeko rikongera kwigwa n’Intekjo Ishinga Amategeko, yasanga ari ngombwa ikarihindura. Naho ubundi iyo batangiye guca imanza zivuguruza itegeko, ubwo ubutegetsi buhinduka akajagari (anarchie).

A.M. Muri 1968, tariki 04.07 ni ukuvuga nyuma y’ imyaka makumyabili, Nyakubahwa Balthazar Bicamumpaka yiyemeje kurengera rubanda, hanashize n’imyaka icumi ari mu bushorishori bwa Repubulika yubahirije umwanzuro w’ Inteko Ishinga Amategeko yashyiraga ho akanama ko kureba uko igihugu cyari kimeze. Kageze mu majyaruguru y’ Uburengerazuba, kahasanze ibyo Kise gihake gasaba ko ikwiye gukurwaho. Rubanda yakomokaga muri ako karere idashoboye kwihanganira ubusumbane bukabije mu bukungu no mumategeko byaturukaga ku kutagira ubutaka kandi rimwe na rimwe ibumazeho imyaka amagana ibutuyeho, yahitaga mo kubuhungira muri za paysannat nko muri za Mugina ho muri Gitarama, ndetse no mu Bugesera.

A.S. Uravuga ko Bicamumpaka yubahirije umwanzuro w’Inteko Ishinga Amategeko… None se Munyandamutsa, niba uvuga ibyo wemera ko byabayeho, watubwira uwabangamiye Inteko gufata ibyemezo byo kurenganura abo baturage (86%) bari barakandamijwe na 14%. ? Cyose Munyandamutsa, uvuze ko Bicamumpaka yari amaze kugera mu bushorishori bwa Republika. Icyo gihe se mama Prezida Kayibanda we yari ageze he ? Kuko hejuru y’ubushorishori, ntakindi kiba gisigaye.

Ushobora gusobanura iyo 86% (uvuga ko yari ikandamijwe) yo mu Ruhengeri yimukiye muri Mugina i Gitarama na Bugesera, mu Ruhengeri hagasigara yo gusa 14% (uvuga ko ariyo yari yihariye ubutegetsi, ubucamanza n’ubutaka) !

Ndumva uzobereye mu ijanisha, watubwira % y’abanyaruhengeri yimukiye i Gitarama ?

Ubusanzwe umubare w’abaturage bagize za prefegitura niryo fatizo mu kugena umubare w’abadepite. Wasobanura ute ko umubare w’abadepite ba za prefegitura za Gitarama na Ruhengeri wakomeje kugenda ungana ?

Abavuga ko abaturage bo mu majyarugu y’u Rwanda (Ruhengeri na Gisenyi), bimukiye mu tundi turere tw’igihugu, kubera ko bajujubijwe n’abakonde, ibi nabyo byerekana ubumenyi buke bw’imiterere y’ikibazo.

Mbanze mbakurire inzira ku murima, abanyagisenyi n’abanyaruhengeri, ntibagiye ari ikivunge gushaka amasambu ku Mayaga ya Gitarama. Gitarama ntiyari kuba itihagije ngo abahandi baze gufata amasambu abaho babarebera. Icyo ntahakana nuko umuntu ku giti cye kubera umubano, ubucuti cyangwa se akazi (cas isole’) yashoboraga guhabwa cyangwa kuhagura isambu.

Nongeye kumenyesha abasomyi, ko iyimuka ry’abaturage, ryatewe no kubura amasambu, kubera ubwiyongere bw’abantu, kandi amasambu yo atiyongera. Reka mbahe urugero ko atari ikibazo cy’ubukonde; Komini Ngenda mu Bugesera, kuva muri 1965 -1967, yarimaze guturwa na bitatu bya kane by’abimukira; cyane cyane abavuye Gikongoro na Kibuye na bake ba Butare na Gitarama. Abandi baturutse mu turere twose tw’u Rwanda, batuye muri Komini Kanzenze na Gashora, Abanyaruhengeri benshi batuye muri paysanat ya Masaka Kanombe na Bicumbi, kimwe n’abavuye mu Bumbogo no mu Buriza. Abandi bagiye gutura mu Mutara. Muri Komini Rusumo hafi segiteri nzima, hari abantu baturutse i Butare, bavuze ko bajyanywe na Hitayezu Emmanuel wari umunyamabanga wa Leta muri ministère ya Plan.

A.M. Uko abo barwanashyaka batatu bagiye batora uko icyo kibazo cyagiye kigaruka mu nteko ntabwo nigeze ncukumbura ngo ndebe. Rapport yasomye, yasanze baratoraga bashyigikiye ubutegetsi bwa gakondo, aho gutora Émancipation ya Rubanda.

A.S.Noneho uranyumije, igihe cy’ubwigenge bucagase(autonomie interne,) itora ryo muri za Komini ryabaye muri Kamena na Nyakanga 1960, ryari rishingiye ku itegeko rigenga itora mu makomini, kandi rikubahirizwa n’Ababiligi na Gouvernement y’agateganyo. Amatora yabaye kuri Kamarampaka, yubahirizwaga n’Ababiligi na l’ONU, kandi yarebaga igihugu cyose. Ayo yawe yaje kubaho ryari ? None se abo bantu baribafite agahugu kabo bigengagaho (Principauté). ? Maze rero Munyandamutsa, haba ku ngoma ya Republika ya mbere n’iya kabiri, cyangwa se iya Cyami na Gikoloni, ayo magomerane ntiyigeze aba muri Ruhengeri na Gisenyi nk’uko ubivuga, aho wita Mu majyaruguru y’iburengerazuba.

Akanama k’igenzura k’Inteko ishinga amategeko, kagombaga kugenzura imikorere ya Gouvernement mu gihugu cyose. Ikindi ni uko ako kanama kabayeho ubugira kabiri, ubwambere ni igihe Anastase Makuza yari Prezida w’Inteko ishinga amategeko, ako kanama karakomeje Bartazar Bicamumpaka asimbuye Makuza.

Ville de Ruhengeri/photo wikipedia

Akanama kari kagize commission y’igenzura kayobowe na Isidore Nzeyimana, umubare w’abakagize ntiwigeze uhinduka, Bicamumpaka abaye Prezida w’inteko, ibyo bagenzuraga nabyo ntibyigeze bihinduka, abari bagize akanama kari gashinzwe kugenzura Leta, uwo mu majyaruguru wari muri ako kanama, yari umwe nawe w’i Byumba, Anaclet Ubarijoro.

Iyo ushaka kwandika ibintu bifite ireme, ntiwari gukutangaza uru rukozasoni, wari kubisoma mu gitabo cyanjye,n’ ahandi byaba biri cyangwa se ukabaza ababizi.

Umuntu wese yari afuite uburenganzira bwo gutora uko ashaka, yapfaga kutanyuranya n’amategeko yagengaga itora.

Inteko yemeje ko ubukonde bwemewe mu Ruhengeri na Gisenyi. Mu turere tw’igihugu hose, bize n’ikibazo cy’ibikingi n’inkungu. Icyo gihe nibwo bemeje ko ibikingi bitemewe mu gihugu hose.

Kugira ngo itegeko ryemerwe, baratora, icyo abenshi bemeje, akaba ari cyo gishyirwa mu bikorwa, niba nibuka neza, Abadepite bose bari 47, Ruhengeri yari ifite icyo gihe abadepite 5, Gisenyi ifite 4, bose hamwe bari 9, itegeko ryashyizweho n’abahagarariye Rubanda bari bagize inteko ishinga amategeko. Aha ndagirango mbibutse ko Abagogwe cg Abacocori (Abatutsi), kimwe n’Abanyago (Abatutsi), nabo ya Edit 1961, yemeje ko ari abakonde.

A.M. Sebatware yiyandikiye, anivugira kuri youtube ko President Kayibanda wari uzwiho ubushishozi n’ ubwitonzi bwinshi yamutumije saa cyenda z’ ijoro, imvururu za 1973 zirimbanyije, akamwita umugambanyi. Undi ibyo bintu byabayeho ni uwasomye Yezu ku wa kane mutagatifu.

Na none muri icyo gihe, mu nama Président Kayibanda abajije abari bashinzwe umutekano icyaburaga ngo umutekano ugaruke, Sebatware yashubije ko MDR-Parmehutu (saranganya mbonezamubano rya Gikirisitu ) ivuyeho byakunda.

Kayibanda avanywe ku Butegetsi, ajyanwa gufungirwa kwa Sebatware. (24 Dr Nkiko kuri Radio Ishakwe.)

Mbere yo kuba Ministre, Sebatware yabonye bourse muzari zahawe Leta, ajya gukarishya ubwenge i Burayi ajyanye na Félicien Kwigira, ukomoka i Gitarama. Kwigira yashinzwe kuyobora Prefecture, undi agirwa Ministre na President Kayibanda, ngo waba, yararondaga agatoteza abo mu Majyaruguru y’ Uburengerazuba.

A.S.-Alfonsi Munyandamutsa, biriya uvuga ko byavuzwe na NKiko, sinarinzi ko Nkiko yavuga amahomvu kariya kageni. Niba utamubeshyeye, uzamubwire ko yagucuritse. Ikindi kinyoma cy’urukoza soni, nukuvuga ngo Kayibanda yafungiwe iwanjye. Ibyo navuze kandi nkabyandika, nuko inkambi Prezida Kayibanda yabagamo muri ISAR Rwerere, Prezida Habyalimana akiri Ministre, yigeze kuharuhukira muri week end, rero yamwohereje aho yarazi, ntiyamwohereje iwanjye. Ikindi kimwe na benshi muri ba ministre ntitwari i Kigali, kuko twari twagiye muri Komini za cu gutegura amatora ya candidats dépites.

Biriya byo kubwira Prezida Kayibanda ngo kugira ng’umutekano ubeho ngo nukuvanaho MDR Parmehutu… Iyo nama yabereye he kandi ryari, yarimwo bande, ubusanzwe umuntu wavuga amagambure nkariya, abari aho nibo bamukanira urumukwiye. Kandi birumvikana ko atakomeza kuba muri Gouvernement. Nizere ko nabyo atari ibya Nkiko, byaba bibaye agahomamunwa, bene kiriya kinyoma bacyita icya Semuhanuka. Kiragayitse cyane, ku buryo n’umwana utangiye guca akenge adashobora kubyemera.

paysage du Buberuka

Ibi bya bourse ya njye na Félécien Kwigira, ni byo warose, niba atari inzozi, wabwira abazasoma iyi nyandiko, igihugu twagiye mo n’igihe twagendeye ?, none se wasobanura ibyo twagiye kwiga ? Njye ku giti cyanjye iyi bourse sinayigeze, biri n’amahire Kwigira aracyariho, nibawe yarayibonye, yagiyeyo wenyine cyangwa se n’abandi ntabarimo. Mu nyandiko yawe, hari aho wanditse ngo (KIRANYAGISHA.)

Mu by’ukuri, byavuzwe na Semuhanuka abibwira umuhungu we Muhanuka muri aya magambo : Ati mwana wanjye jyubeshya, kubeshya birakiza.

Muhanuka ajya hanze akoma akaruru cyane ataka, ise ahubuka vuba na bwangu, ati ubayiki mwana wanjye, komera ndaje. Ati dawe ndinanuye cyane nkubita umutwe ku ijuru, none urasandaye. Se ati mwana wanjye, uzabeshye ikindi, icyo kiranyagisha.

Nawe rero niba wahurutuye inyandiko ifite impapuro zirenga 30, wibwira ko uzabona inyungu zo gutesha abandi agaciro ubaharabika, utarebye neza, bishobora kuzakubera nka wa mutego mutindi wica nyirawo.

Ibyuhamya ko navuze ko Prezida Kayibanda yanga abaturage bo mu majyaruguru, ushobora kumbwira igihe nabivugiye n’aho nabivugiye ? Cyangwa se ukerekana aho nabyanditse.

Ibyo nanditse kandi nanubu nemera, ni ivanwa rya bamwe mu basilikare bakuru bakomokaga mu majyaruguru ku milimo yabo, bakimurirwa mu mashuli, mu byayi n’ahandi.

Munyandamutsa, hari ijambo wakunze kwisihingaho : Isaraganya mbonzeza mubano ya Gikristu, None se kwirukana abapadri bazize ubusa, kwambura Diyosezi Seminari yayo, ukayiha Abasirikare ngo aribo bayiyobora, nibyo wita imboneza mubano wa Gikristu.

A.M.- Nk’ uko Kayibanda yareberaga Rubanda, Déjemeppe yareberaga Kiliziya Gatolika. Kuri Sebatware, iyi miterere y’ ikibazo ntiyari ihagije ngo Kayibanda yumvikane na Dejemeppe bisanzwe ariko mu nyungu za Rubanda n’u Rwanda, abe yashishoreza Rubanda. Iyi myitegerereze igaragazwa na Sebatware yari imwe mu byo Kayibanda yitaga ibisigisigi bya Gihake na Gikolonize.

A.S.- Dore aha naho ubeshyeye Prezida Kayibanda, ibyo nanditse mu gitabo cyanjye, navuze ko nabonye liste iriho abantu benshi, b’abacuruzi, abahinde, abapakistani, abazungu cyane abapadiri nka les chanoines bo muri collège Christ-Roi i Nyanza, wari uziko ba bahutu cumi (10) bagiye gusobanura akarengane k’abahutu, bari babuze aho bacumbika, Chanoine Directeur wa Collège du Christ roi, akabagoboka, akabacumbikira muri Collège, naho se Padri Fraipont Ndagjimana, n’ibyiza yakoreye u Rwanda nka Gatagara yamamaye hose mu gihugu, ndetse no mu mahanga. Na Padiri Artur Déjemeppe washinze Caritas na école artisanale yaje kuvamo ETO. Sinavuze cyangwa ngo nandike ko yajyanye Kayibanda i Burayi, ahubwo ko yamuzamuye amujyana i Kabgayi, amushinga ibinyamakuru, Kurerera Imana, iki cyari ikinyamakuru cy’abarimu, Ami mu Gifaransa, cyane cyari kigenewe abize mu i seminari n’ishuri ry’indatwa rya Butare, Kinyamateka yabereye rédacteur en chef, kandi ubusanzwe cyarayoborwaga n’abapadiri b’abazungu n’ababatutsi.

Nagiraga ngo nkwibutse ko Kayibanda aho agereye i Kabgayi Kinyamateka yagize abasomyi benshi itari yarigeze igira narimwe, wibuke nanone ko ahanini ariyo yakinguriye rubanda kwibuka kurengera inyungu zayo. Kuri Dejemeppe, mu magambo make navuze ko yagiriye u Rwanda akamaro. Icyo nasabye Prezida ko byaruta ho kuba byiza yumvikanye n’abasenyeri, bakabwira abapadiri babo, bakajya muri konji, ariko ntibagaruke. Kuri Dejemeppe Kayibanda yarabikoze, Imana ishimwe.. Ushaka kumenya neza azasome uko nabyanditse mu gitabo cyanjye.

A.M.- Ministre Sebatware yagiranye imibonano na Wright, wari uhagarariye HCR mu Rwanda. Kuki adasobanurira Abanyarwanda ikibazo cy’ Abahindi n’Abapakistanais, uko bavuye muri Ouganda, uko bavuye mu Rwanda nyuma ya putsch ari Prefet wa Kigali, icyatumye hari abari mu Rwanda bakirukanwa bivuye mu nkiko? Abisobanuye ariko, igipirizo cy’ ikinyoma cy’ icyaha cya nationalisation y’ ubukomunisti cyarezwe Kayibanda cyasandara ! Umunyarwanda akamenya uko inyungu za Rubanda zaguye mu matsa zizira irari rizira gitangira.

Nyakwigendera Ministre w’ Ubutegetsi bw’ i Gihugu (bwonyine), Seth Sendashonga mu gihe cy’ umwaka umwe yanditse amabaruwa 720 atabariza Rubanda yahohoterwaga ikanicwa na FPR, ishyaka yari abereye umuyoboke.

A.S. Kagire inkuru, biriya byo kurega Prezida Kayibanda kuba umukomunisti no kwambura abantu ibntu byabo (natonalisation), wabisomye mukihe gitabo, bitihi se, wabyumvanye nde, hehe kandi ryari ? Aho byaba byaravugiwe, jye sinari mpari, uzabibaze abo wabyumvanye, bitihi se, uzasubire kuwabikubwiye, agusobanurire aho yabivanye.

Ikibazo cy’abahindi n’abirukanywe mu Bugande no mu Rwanda bamaze gucirwa imanza, iyo biba ngombwa byari gutangazwa na Ministère yari ishinzwe Amatangazo ya Leta, icyo kibazo cyarabayeho cyangwa se kitarabayeho, nticyarebaga Préfet kuko cyari mu rwego rw’igihugu. Abaziyatike baje mu Rwanda, birukanywe mu Buganda, baje arabacuruzi bo mu rwego rwohejuru, ntibaje basaba ubuhungiro, ahubwo basabaga kwemererwa gucuruza. Kugira ngo babone ibya ngombwa byose, dossier yerekeye icyo buri wese ashaka gukora, yagombaga kwemerwa na ministère ishinzwe ibyerekeranye nibyo ashaka gukora, byamara gutungana, akabona impapuro zimwemerera kuba mu Rwanda.

Ibyerekeye amabaruwa 720, Ministre Seth Sendashonga yanditse, ndetse amaherezo akayazira, Munyandamutsa uravuga ngo kuki ntanditse nibura kimwe cya gatatu cyayo nibuze. Rero Munyandamutsa, iyusoma igitabo cyanjye ufite ubushake bwo kumenya ibirimo no kubibwira abandi utiganye Semuhanuka kubera impamvu zawe bwite, ntiwari kwibaza icyo kibazo. Warikubona amabaruwa nanditse, ariyo yaturutseho ibyo wita ubugambanyi, siko nabyanditse kuko atariko byavuzwe. Ku nyandiko unyishyuza nanditse, ushaka kubimenya azabyisomere mu gitabo cyanjye. Cyangwa se mu magambo avunaguye, kuri radio Inkingi y’amahoro.

A.M. Amashyaka n’impuzamashyaka bakwiye kandi no kwiga uko hazajya ho itegeko ritegeka abanyapolitike mu gihe bari mu kazi ka Rubanda, komeka »logo » cg »auto-collant » z’ ababari inyuma batari Rubanda. Ibyo byaca amazimwe. Nk’ iyo, Habyarimana ajya kuba yarazaga mu nama yambaye za logo za Micombero, Simbananiye, Franc-maçons loge belge, abategetsi gakondo, cg Sebatware akaza nawe yambaye ize, impaka zari koroha, imiti y’ ibibazo byariho ikaboneka vuba aho gucengana.

A.S. Maze rero Alfonsi Munyandamutsa, nasanze waba usoma Bibiliya, mboneyeho kukwibutsa ko mbere yo kureba igitotsi kiri mu jisho rya muggenzi wawe, jyubanza gutokora umugogo uri mu ryawe.

Uzabanze umenye neza izo ugomba kwambara n’igihe ugomba kuzambarira, ubone ubugira inama abandi.

GIRA AMAHORO Y’IMANA.

André Sebatware
Bruxelles, kuri 18/05/2018.

Ukuli-niyo-ciment-yubumwe-bwumutamenwa
[Inyandiko ya Alphonse Munyandamutsa]

Rwanda : Leta ya FPR irimo kuvana abaturage mu manegeka ibarunda mu nsengero nkuko yabikoraga nyuma y’intambara ishaka kubatikiza

Paul Kagame et Edouard Ngirente

Ubwo yihanganishaga imiryango 18 y’abaturage babuze ababo mu Karere ka Karongi intara y’iburengerazuba kubera guhitanwa n’ibiza, Ministri w’intebe Dr. NGIRENTE Edouard yagize ati : Gouvernement yababajwe n’ibiza byabagwiririye ikaba yampaye ubutumwa bubihanganisha ati kandi ikaba yongeye gusaba abaturage muri rusange ubufasha mu gukumira ibi biza kugirango bidakomeza kutumaraho abantu . ngaho rero ! aho kuba abazaniye inkunga yihuse ahubwo nawe ayibategerejeho ! nanone ubwo yahuraga n’itangazamakuru rya hano mu gihugu kuri uyu wa 11/05/2018 akaba yashimangiye ko Leta idafite ubushobozi bwo kwita kubagezweho n’ibiza bose aka kanya nubwo bwose imaze gutanga asaga miliyoni 300 , ko hari gahunda ndende izafata imyaka irenga ibili ngo bose babe bashoboye kubona aho bikinga. Tubibutse ko kugeza ubu abantu barenga 215 bamaze kwicwa n’ibyo biza wongeyeho amazu arenga ibihumbi 10 yasenyutse burundu na hegitari zirenga ibihumbi 5000 Ha z’ubutaka buhinzeho imyaka yangiritse ku buryo hategerejwe indi nzara mu minsi iri mbere.

Banyarwanda burya koko izina niryo muntu ! Ministri w’intebe Dr. NGIRENTE SE ? uyu mugabo akibereye muli FMI nta bibazo by’amatiku n’ubutiriganya yahuraga nabyo aliko ubu akaba amaze guhitamo kugendana n’ikinyoma cya Semuhanuka igihugu cyubakiyeho kandi aziko ahagaraliye abanyarwanda bose. Birababaje !

Bamwe mu baturage ba Karongi basigaye iheruheru naganiriye nabo n’agahinda kenshi nibo bagize bati : aliko gouverinoma yacu izahora mu magambo yo kutwihanganisha gusa nkaho igifu kiyasya ! abandi nabo bati ngiyo guvernoma y’ubumwe bw’abanyarwanda duhora turirimba isigaye ibunza amagambo gusa ku itabaro imbere y’abakomeje guhitanwa n’ibiza hirya no hino mu gihugu cyacu. Ibyo akaba ari bimwe mu byiyumviro by’abaturage.

Si i Karongi gusa rero kuko umugi wa Kigali nawo umaze gufata icyemezo gikarihiye abaturage cyo kubavana ku ngufu za Leta aho bise amanegeka hose ukaba urimo kubarundanyiriza mu nsengero Leta yari iherutse gufunga kubera kutagira ibyangombwa nk’ibigega by’amazi, parking , za toilettes zihagije n’ibindi…. Ibyo ngo mu gihe bategereje aho bazaberekeza. Ikibabaje nuko ari izo nsengero ahanini zari zubakishijwe ibiti n’ibyondo ari nutwo tuzu twa banyagucibwa mu gihugu cyabo kuko bakennye cyane usanga ntaho bitaniye! byose wabifata nk’amanegeka ! Icyo gikorwa kikaba cyarahereye mu Karere ka Nyarugenge mu Murenge wa Kimisagara ahamaze kubarurwa ingo zigera kuri 90 zatangiye gucumbikirwa muli izo nsengero ari nako bahita bafungisha soudure amazu babagamo. Ubuyobozi bw’umugi wa Kigali bukaba butangaza ko icyo gikorwa kigomba gukomeza no mu yindi mirenge.

Umwe mu baturage bimuwe yabajije Gitifu w’umurenge wa Kimisagara ati aho kudushyira muli izi nsengero namwe muziko mwazifunze kubera ko ntaho zitaniye n’amanegeka mwabaye mutujyanye muli stade ya Kigali ko nibura ho hisanzuye umuntu akajya abona uko yinyagambura ku manywa ashakisha imibereho noneho agataha hano ku mugoroba ? Gitifu yamusubije ko byatera ubuzererezi n’umwanda mu mugi.

Undi nawe ati aliko muli uyu mugi harimo imidugudu ihagije yubatswe ku bufatanye na Leta mwita iy’icyerekezo kandi akaba nta bantu bayibamo yewe habuze nuyikodesha cyangwa ngo agure hafi imyaka itanu irashize mwadusabiye bakaba bayiducumbikiyemo niba koko mu gihe gito muzaba mutuboneye aho kuba? (baramwirengagije ntacyo yasubijwe).

Banyarwanda rero muriyumvira abwirwa benshi akumva bene yo ! niyo mpamvu nkurikije ibyiyumviro by’aba baturage ndasanga kiriya gikorwa nta mpuhwe zikirangwa ahubwo cyagereranywa na za camps de concentration (voir NAZI) , kuko si ubwa mbere si n’ubwa nyuma FPR imenyereye kuragira abanyarwanda mu bwonko nk’amatungo ngaho ngo ni impuhwe ibagirira kandi hari andi matekinike ishaka gukorera kuri aba baturage ibasaruliraho! none se wasobanura ute ukuntu nka Leta ushinzwe abaturage usohora umuntu mu kazu ke ugashyiraho ingufuri na soudure ntaho ufite umwerekeza ako kanya! Ibiza biruta ibyo se ni ibihe ? aho kubimukiza birahumira ku murari bivuga ngo nta rupfu rwaruta urwo. Nguko!

Byanditswe ku wa 16/05/2018, na :
A.BEN NTUYENABO, KIGALI-RWANDA.

Rwanda : iyo ibiza bimaze gusiga ingogo niho prezida Kagame na gouvernement bibuka abaturage bya nyirarureshywa

Uyu mugabo Pahulo Kagame ukomeje kwibera mu Kirere no kwigaragaza mu ma film atangwaho akayabo gaturutse mu mitsi ya Rubanda rutagira kirengera amenya ko Ibiza bihari ari uko byamaze abanyarwanda ari nabwo yumva ko agomba kubabeshya bya nyirarureshywa yihanganisha imiryango yabuze ababo ko hagiye gushyirwaho ingamba zo gufasha abibasiwe n’ibyo biza mu gihe kirambye. Byahe se birakajya! (ubundi se yakoraga iki mu myaka 24 yose ishize ? ).

Ministère ifite Ibiza mu nshingano zayo ivuga ko amatohoza yashoboye gukora kuva mukwa mbere kugeza kuri 30/04/2018 hapfuye abantu 189 bishwe n’ibiza biturutse ku myuzure, inkangu n’amazu byabaguye hejuru, abakomeretse bakaba 275, inzu zasenyutse burundu 1201 naho izangiritse 4130 , hakaba n’amatungo yose hamwe 705 yapfuye.

Ku byerekeranye n’imyaka mu mirima by’umwihariko hamaze kwangirika ibirenga hegitari ibihumbi 4000Ha wabiha agaciro bikangana na hafi Miliyari 4Frw zirenga. Ministère y’ubuhinzi n’ubworozi ikaba itangaza ko hari ikigega k’ingoboka isigaranye ku baturage bagizweho nizo ngaruka kirimo Toni ibihumbi 7 z’ibigori na Toni ibihumbi 4 z’ibishyimbo gusa kandi ko kwongera guhinga ari mu mpeshyi harebwa ku bijumba cyangwa imboga.
Ibindi byibasiwe ni ibiraro 33 by’imihanda byatengutse nkaho wasangaga imihanda imwe n’imwe itakiri nyabagendwa ifunze kubera imyuzure urugero nk’umuhanda hafi y’ikiraro cy’Uruzi rwa Nyabarongo ugana i Runda aho abaturage cyangwa imodoka ntoya bamara nk’iminsi ine badashobora kucyambuka bava cyangwa bagana mu mujyi wa Kigali kandi mu byukuri icyo kiraro hashize imyaka igera kuri itatu Gouvernement ibinyujije kuri Ministère yayo y’ibikorwa-remezo hakozwe inyigo y’ukuntu cyazamurwa hejuru ku buryo amazi ataba menshi ngo akirenge.

Mu gushaka umuti w’ibiza rero, Ministri Kaboneka Francis w’ubutegetsi bw’igihugu we avuga ko Leta igiye gukoresha ingufu mu kwimura abaturage batuye mu manegeka !

Banyarwanda , uyu mu Ministri arirengagizako hashize igihe kirekire hakozwe urutonde rw’abaturage ku rwego rw’imidugudu Leta yagombaga kwimura mu manegeka aliko ko kugeza ubu bamwe kuri urwo rutonde babuze aho icyo gikorwa cyahereye ! dore ko haje kwinjirwamo n’ikimenyane bamwe muri bo bagahanagurwa ku rutonde bivugwa ko ari abahutu bagomba kwirwariza kandi basabwa kuhava ! nguko !

Ministri Kaboneka akomeza avuga ko abanyarwanda bagomba kumvira inama zo kwimuka bahabwa n’abayobozi aho gutegereza kuzahavanwa n’ibiza!

Ministri ushinzwe Ibiza no gucyura impunzi Mme De Bonheur Jeanne d’Arc, umwe mu bafatanyamahano na Police y’igihugu mu kurasa impunzi z’abanyekongo mu nkambi ya Kiziba nazo zugarijwe n’inzara aho kuzirengera avuga ko Leta idashinzwe guhangana n’ibiza yonyine ati buri muturage wese agomba kugira uruhare mu guhangana nabyo!

Ministri Marie Solange Kayisire ushinzwe imirimo y’inama y’abaministres we araburira abanyarwanda ko imvura itarahita naho Ministre Dr. Biruta Vincent w’amashyamba n’ibidukikije ati bitewe nuko imvura ikigwa abanyarwanda bajye bakulikirana amakuru atangwa n’ibiro by’iteganyagihe ry’ikirere !

Banyarwanda bavandimwe uretse ko umuntu avuga ibigoramye umuhoro ukarakara murabona aya mangambure y’aba bayobozi hari icyo yafasha abaturage muli ibi biza ? dore ko nta na ONG z’abagiraneza nka CRS zikibarizwa mu gihugu cyacu ngo zibe zagoboka ba nyagupfa nkuko byari bimenyerewe! ndahamya rero ko nta gisubizo kirambye mbona kuko nta ntumbero Leta y’agatsiko ifite mu bigomba gukemurwa.

Byanditswe ku wa 07/05/2018, na :
A.BEN NTUYENABO, KIGALI-RWANDA.

Mu Rwanda akarengane k’abahinzi : baratemerwa amasaka ateze bakamburwa amasambu ngo abe urwuri rw’inka

Aha ni mu ntara y’iburasirazuba mu karere ka Kirehe mu kagali ka Rubirizi.

Nkuko muri bubyumve muri iyi audio, mu Rwanda hari icyorezo cyo gutema amasaka ateze andi akaragirwa inka bitwaje ngo ni mu mafamu (farm) agenewe aborozi.

Nkuko mwagiye mu bibona mu nkuru zabanje, ikibazo giteye gutya: mu Rwanda aborozi bahawe amafamu( inzuri z’inka) ndetse banahabwa n’ibyangombwa byayo ni ukuvuga ko mu rwego rw’amategeko bari bayafiteho uburenganzira nk’ayabo. Ubwo butaka bwanganaga na hegitari 25 kuzamura kuri buri mworozi. Noneho kubera ubukungu bwifashe nabi mu Rwanda, abo borozi nabo bagenda bagurishaho buhoro buhoro abahinzi bakeneye kwihingira, aha buri muhinzi waguze n’umworozi nawe yagendaga yandikisha ubutaka aguze agahabwa icyangombwa cyabwo mu buryo bwemewe n’amategeko kandi ibi byakorwaga n’inzego bwite za Leta.

Amakuru twahawe n’umuntu uri hafi y’ingoma , yatubwiye ko mu minsi ishize prezida Kagame yakoranye inama n’aborozi (imwe mu manama y’ibanga bagira) noneho ababaza ibibazo bikurikira:

1. Amafamu mwahawe muracyayafite yose? Aborozi bati yego.
2. Ese muyabyaza umusaruro? Bati yego.

Kubera ko yari afite raporo, ati twabahaye amafamu ngo abahutu mubahake babakorere, none ndabona ahubwo arimwe mugiye guhinduka abagaragu babo, nuko ati nubwo muvuga ko bariya bantu nta bwenge bagira ahubwo babarusha ubwenge cyane, kuko baciye bugufi bakoresha amaboko yabo none bageze naho bigarurira n’amafamu y’aborozi, ati iki kibazo ndashaka ko gikemuka vuba cyane.

Niyo mpamvu mu ntara y’iburasirazuba mu turere twa Nyagatare, Gatsibo, Kayonza na Kirehe ibintu byacitse , nizo mbaraga z’umurengera mubona muri ibi bintu, amarira ni yose amaganya ni yose nkuko muri bubyumve muri iyi audio.

Aba baturage hafi ya bose bamazemo imyaka irenga 10 bafitemo amazu imirima, intoki, n’indi myaka, ubu byose byataye agaciro nk’amazu barimo kuyasenya ntakundi baraza bakakwaka icyangombwa cyawe cy’ubutaka noneho bakagusubiza udufaranga twintica ntikize urugero nk’umuntu waguze mu myaka 5 ishize hegitari yaguraga amafaranga 800000 rf none ubu irimo kugura million 4 (4000000 rf), ubwo arasubizwa 800000 rf. adashobora kugira icyo amumarira, imanza zirimo aha kandi ni agatereranzamba kuko hari nkuwaguraga n’umworozi nawe akagurishaho abandi bahinzi, ubwo we arasabwa kubasubiza agurishije imitungo ye niba ayifite, mbese ni amarira masa. Iki gikorwa aborozi bo barakishimiye cyane kuko batanze ubutaka bugura make cyane none babugaruriwe bugura menshi. Ariko aha naho harimo ubusambo bukabije kuko umworozi utabashije gusubiza abo yagurishije leta izana undi muntu utamenya aho aturutse akishyura bwa butaka bukaba bubaye ubwe.

Tubibutse ko mu Rwanda nubwo hari abantu bake bitwa ko ari aborozi batunze ubutaka hafi ya bwose bw’u Rwanda, kuko umwe aba afite hegitari 25 kuzamura, hari umubare munini w’abanyarwanda batagira naho bashinga akazu gato k’amabati 5 hitwa ahabo. Nibura 80% by’ubutaka bw’u Rwanda butunzwe n’abantu bita ko ari aborozi batanageze no ku 10%. Birababaje noneho naho umuntu abiriye ibyuya bahamwake ku ngufu.

Ngayo nguko iby’iwacu.

Jean-Michel Manirafasha