Archives mensuelles : janvier 2018

Rwanda : Gahunda yo kurasa abagororwa irakomeje

Bamusohoye yambaye imyambaro ye ngo bavuge ko yari yuriye igipangu agiye gutoroka bakamurasa. Iteknika riragwira!

Inkuru y’akababaro n’iraswa ry’umugorogwa muri gereza ya nyanza, witwa Jotham Nsengiyumva. Hari saa moya na 20′ mw’ijoro ryo kuwa 28-29/01/2018 ubwo humvikanye urufaya rw’amasasu ahagana mu kibuga cy’umupira inyuma y’inyubako cyangwa igipangu cya Romeo wing na Delta wing (ibamo imfungwa z’abavuye Sierra Leone, Arusha boherejwe na lonu, abayisiramu 38 bafunzwe 2016, na Nsengiyumva Jotham (wishwe) na col Gaheza.

Amakuru dufite ni uko uwo mugororwa yasohowe aho yabaga akajyanwa ku kibuga cy’ umupira. Mbere yuko araswa habanje kuza imodoka ya director wa gereza sp John Mukono n’iy’ umukuru wa polisi mu karere ka Nyanza abona kuraswa.

Uyu warashwe Nsengiyumva Jotham, ni mwene Ntahontuye André na Nyirabagarura Rahab yavutse mu 1992 wabarizwaga mu mudugudu wa Rugeshi , akagari ka Rukinanyana umurenge wa Cyuve , akarere ka Musanze , intara y’amajyaruguru, akaba yaruvukiye mu mudugudu wa Rusarabuye, akagari ka Raba, umurenge wa Minazi, akarere ka Gakenge, intara y’amajyaruguru. Yafunzwe le 19/03/2014 akatirwa burundu. Yari muri dosiye na wa mugitifi wa Cyuve nawe barashe.

Yaregwaga icyaha cy’ubugambanyi, guhungabanya umundendezo w’igihugu , ubugambanyi no kwinjiza intwaro mu gihugu , ibyaha biteganywa kandi bihanishwa ingingo za 446, 461, 471 z’ itegeko ngenga no 01/2012 ol ryo kuwa 02/05/2012 rishyiraho igitabo cy’amategeko ahana ibyaha mu Rwanda.

Uyu nyakwigendera niwe warezwe ibisasu byarashwe mu karere ka musanze bigahitana IP Mucyurabuhoro Clement , yanaregwaga gutera ibisasu byarashwe ku uwahoze ari maire wa musanze Mme Bonifride Mpembyemungu.

Uburyo uyu nyakwigendera yarashwemo ni kimwe nubwo Nsengimana Alfred wari executive w’umurenge wa Cyuve yarashwemo, kuko uyu nawe nkuko

Umugororwa Jotham Nsengiyumva (uriya w’inzobe). Imana imuhe iruhuka ridashira

twabivuze haruguru yabanje gusorwa muri gereza araraswa. Kandi ukurikije aho yarafungiye ntiwakwemeza ko yari agiye gutoroka kuko igipangu cyarindwaga bikomeye kandi icyumba yabagamo cyafungwaga imfunguzo zikabikwa na gereza. Uko niko yabayeho kuva yafatwa kuko na gereza ya pck 1930 yabayemo naho yabaga mu cyumba cya wenyine kirimo na douche na toilet nkuko byari bimeze aho yari afungiye muri gereza ya Nyanza. Uyu mugororwa nta hantu na hamwe yajyaga atarinzwe bikomeye , haba gusenga gusurwa n’abandi hose yabaga agiye . Ntiyari yemerewe kwidagaduru nk’abandi ndetse n’ uburinzi ijoro n’amanywa bwari bupanzwe inyuma neza neza y’icyumba yari afungiwemo. Kandi nawe yari abizi kuburyo atapima akinisha gutoroka.

Amakuru yandi dufite nuko nyuma yitoroka ry’umunyamakuru Ntamuhanga Cassien , ushinzwe operation ku rwego rushinzwe imfungwa n’abagororwa RCS kuwa 02/12/2018 yagiye gukoresha inama muri gereza ya Nyanza ahagarika imbere uyu nyakwigendera Nsengiyumva Jotham , col Michel Habimana na Brigadier general Bizimungu Mahoro Selaphin ababwira ko bagomba kwitonda kuko ngo bazaraswa nibapima gutoroka yanababwiye ko ubutaha yifuza gukora inama byibuze areba imirambo iryamye imbere ye, aho kuhahagarika abantu nkuko yabikoze.

Iraswa ry’uyu mugororwa rije risanga inkuru zitandukanye zavugaga ko imfungwa za politiki zifungiye muri gereza ya nyanza zizaraswa. Iraswa ry’uyu mugororwa ntagushidikanya ryapanzwe na leta kandi rikozwe nayo. Mwitege rero iraswa ry’abandi benshi kuko n’umugambi wateguwe na leta nkuko tutahwemye kubigaragaza.

Uretse uriya waguye muri gerezan kwicana mu Rwanda byahawe intebe. Mw’ijoro ryo kuri wa kabili rishyira ku wa 25/01/2018 ahagana mu masaha ya saa sita na saa saba z’ijoro muli centre y’ubucuruzi ya Nkoto mu mudugudu wa Karehe akagari ka Shiri umurenge wa Rugarika ho mu Karere ka Kamonyi mu cyahoze ari prefegitura ya Gitarama abasore babili Nsengumuremyi Peter na mugenzi we utaramenyekana amazina ye bari bitwaje ibyuma bica uwitwa Twagirimana Straton babimuteraguye mu mutwe no mu muhogo undi Eric Nteziryayo nawe baramukomeretsa bikomeye.

Umuvugizi wa Police mu ntara y’amajyepfo Bwana CIP Kayigi Emmanuel yatangaje ko bafatanyije n’abaturage na nubu bagishakisha abo bicanyi.

Ubwicanyi bwose burimo kubera mu gihugu cyacu no hanze buri guterwa n’imiyoborere mibi y’abayobozi ba Leta ya FPR dore ko umwera uturutse ibukuru bucya wakwiriye hose.

Jean-Michel Manirafasha
Kigali, Rwanda

Rwanda: senateri Jim Inhofe yaguye mu mutego wa politiki y’iteknika rya FPR

Mu Rwanda haravugwa kuri Discours y’umusenateur JIM Inhofe muli congrѐs y’amerika inama yateranye ku wa 23/01/2018, aherutse gufata igihe cy’iminota 40 yose asobanura ibigwi bya Prezida Pahulo Kagame nkaho bari bamushyizemo urushiko dore ko bitanabura mu rugo rwa Leta y’agatsiko.

Banyarwanda, niba atari ukwirengagiza aho Sénateur JIM Inhofe wa Oklahama ntiyaba yarihishe inyuma y’amahano yagwiriye u Rwanda kuva 1994, mu gihe ahisha amaso amabi yose na nubu agikorwa na Leta y’agatsiko ka FPR ? Ngicyo kimwe mu byiyumviro bya opinion publique hano mu Rwanda.

Barongera bati igihe ni iki ko abihishe inyuma y’akaga kagushije ishyano ku Rwanda bagenda bivamo buhoro buhoro kandi ko wa mugani inkono ihira ikibatsi.

Sénateur JIM Inhofe avuga ko Prezida Kagame afatwa nk’umuntu udasanzwe wahagaritse Jenoside yari yananiye ibihugu bikomeye byongeye akaba atarashatse no kwihorera ku batutsi basaga ibihumbi 800 byari bimaze kwicwa n’intagondwa z’abahutu b’interahamwe ko ahubwo akurikije amahitamo ye yasakaje ubumwe n’ubwiyunge atitaye ku bwoko ubu n’ubu, yakomeje abwira abari muli congrѐs ko iterambere u Rwanda rugezeho ari nk’igitangaza nyuma ya Jenoside uhereye ku bikorwa-remezo, ikoranabuhanga, guca amasachets ya plastique, abaturage bakora cyane, ubukungu buzamuka ,umutekano n’ibindi…. Ati niyo mpamvu mufataho nk’inshuti y’Amerika.

Uyu musenateri ufitanye ubucuti bw’ubwiru na Prezida Kagame yageze aho akabiriza indoto ze dore ko akunze kuza mu Rwanda cyane ati hari aho nageze mu Rwanda nkeka ko ndi muli Leta z’unze ubumwe z’Amerika henshi hataboneka muli Afrika ! muriyumira !

Banyarwanda, Sénateur JIM Inhofe arirengagiza ibihumbi n’ibihumbagiza by’abantu baguye i Byumba, Nyacyonga, Gakurazo, Kibeho , mapping report/ONU, reports HRW, Amnesty international abajugunywe muli Rweru bo ntawamenye irengero ryabo none ati Prezida Kagame ntiyigeze yihorera! Iyavuga ati niko kazi yakoze gusa kugeza na nubu !

Sénateur Inhofe ntiyubahiriza amatwara ya demokrasi kuko yemera démocratie Kagamiѐnne widodeyeho itegeko-nshinga kugira ngo akomeze ahonyore abanyarwanda.

Banyarwanda, nkurikije ubusesenguzi buriho uyu musenateri asa nuca amarenga ko yaba yifuza Prezida Pahulo Kagame gukomeza kubabera icyambu mu karere k’ibiyaga bigari na Afrika muli rusange dore ko ari nawe ugiye kuyobora AU/2018. Aliko uyu nibitamuhitana mission azayigeraho yiyushye akuya yibwira ngo ashyigikiwe n’intare.

Byanditswe ku 27/01/2018, na :
A.BEN NTUYENABO, KIGALI-RWANDA.

Rwanda : Gahunda yo kuryoza abana b’abahutu ibyaha ba se bakoze irarimbanije

Prison Nyanza/photo twitter

Uhagarariye MAJ (maison d’aide à la justice) mu karere ka Nyanza witwa Dukundane Jean Frederic, kuwa gatatu yabwiye imfungwa za genocide zo muri gereza ya Nyanza ko abazitaba Imana batarishyura indishyi ko abana babo aribo bazishyuzwa, basanga ari nta mitungo basigiwe na ba nyakwigendera ngo bari guteganyirizwa uko abo bana babo bazajya bakora TIG (Travaux d’Intéret Géneraux) mu rwego rwo kwishyurira ababyeyi babo indishyi basize batishyuye.

Ibi yabivuze bitari mu byukuri muri gahunda ya muzanye kuko yari muri gahunda yiswe icyumweru cy’ubufasha mu by’amategeko (legal aid week) aho yari yazinduwe no gusobanura uko bafashwa gutangirwa ibirego Ku babifite binyuranye.

Jean-Michel Manirafasha
Kigali, Rwanda

Gatsibo : Abahinzi b’umuceri bo mu gishanga ya Ntende baratabaza

photo ingufu.com

Nkuko musanzwe mubizi, mu Rwanda FPR yihariye imitungo yose n’ibyiza byose by’igihugu, kugeza naho ishimuta n’ibya rubanda, ikabinyaga bikaba ibyayo ku ngufu.

Reka twerekeze muri domaine y’ubuhinzi, aho amasambu yose yahoze ari ay’abaturage Fpr yayashimuse, ubu akaba nta muturage n’umwe mu Rwanda ukigira isambu, yaba ari iyo yarazwe n’ababyeyi, cyangwa yarayiguze amafaranga ye.

Fpr yashimuse ubutaka, abaturage ibahindura abacakara bo kuyihingira, mu by’ukuri abaturage barahinga Fpr igasarura. Mbese ni SHIKU yagarutse yarahinduye izina bayita GUHUZA UBUTAKA.

Urugero twatanga ni urw’abahinzi b’umuceri mu ntara y’iburasirazuba, akarere ka Gatsibo, mu gishanga gihingwamo umuceri cya NTENDE , gikuriwe na cooperative yitwa COPROPRIZ NTENDE. Aha abaturage bahindutse abacakara neza neza.

Abaturage barahinga ariko ntibemerewe kuryaho. Iyo bagufashe bakwirukana mu murima wawe bakahaha undi. Kuwa kabiri 23/01/2018 nibyo byabaye k’umuturage witwa Ntamushobora bafatanye ibiro 5 by’umuceri, uwitwa Kamana we yafatanywe ibiro 12, naho uwitwa Ntamfura we afatanwa ibiro 7 by’umuceri, bahise bamburwa uburenganzira bwo guhinga, imirima barayibaka ihabwa abandi mu buryo budasobanutse. Saba gusa hari n’abandi benshi, mu bihe bitandukanye bagiye barengana muri ubu buryo.

Tubibutse ko muri iki gishanga umuturage ahinga umuceri wa kwera, COPRORIZ ikamugenera igiciro, babaha 225 frw ku kiro , wajya kw’isoko ikiro ukakigura 900 frw.

Aya 225 babaha ku kiro bakatamo, amafaranga y’amazi, ayifumbire, ayo guterinkunga Fpr, mitweri, ay’amashuri, hakiyongeraho n’ibihano, iyo wakerewe guhinga, iyo inyoni zariyeho, iyo utaharuye imiferege y’amazi, niyo utabagaye neza kabone niyo warwaye ntubone umwanya wo kubikora aya yose urayatanga. Hari n’igihe amazi abura bagatabarwa n’imvura kandi bakazishyura amafaranga y’amazi. Ni akumiro.

Ibi kandi biba ku bahinzi b’umuceri, ni nabyo biba k’ubahinzi b’ibigori n’ibishyimbo, dore ko ari byo bihingwa byemerewe guhingwa mu karere ka Gatsibo. Iyo uhinze ikindi barakirandura ugacibwa amafaranga, cyangwa ugafungwa.

Abaturage bakeneye kurenganurwa.

Jean-Michel Manirafasha
Kigali, Rwanda

Mu Rwanda abantu bakomeje gupfa mu buryo budasobanutse

Umuco wo kwicana Pahulo Kagame yabibye mu Banyarwanda uranze ubaye akarande.

Nibyo koko rero hano mu Rwanda ihotorana cyangwa ubwicanyi bukorerwa mu miryango itandukanye buri munsi burabandanyije aho Leta ya Kagame nayo ahanini ibigiramo uruhare ari nako ihitamo gushishikariza abambari bayo kujya batanguranwa mu gutangariza abanyarwanda ko abapfuye muli ubwo buryo bikamenyekana bizajya byitirirwa ko bazize urw’ikirago cyangwa biyahuye kubera indwara z’ibisazi noneho police n’abaganga akaba aribo bemeza icyahitanye umuntu nyuma y’amaperereza n’isuzuma byabo.

Ntawe bitatangaza kuko atari amabwiriza atunguranye kuko n’ubundi byari bisanzwe aho inzego z’umutekano nka Dasso, Police, amarondo n’abandi aribo bamaze abantu ! urugero rwa hafi muli iki cyumweru ku wa 23/01/2018 mu Murenge wa Kazo ,akarere ka Ngoma hiciwe umugabo witwa NZABONIMANA Vénuste ubwo abashinzwe umutekano ku izina rya Dasso bamukubitaga iz’akabwana ngo kuko yatonganije umugore we gusa akaza kujya kwa muganga bikamuviramo urupfu.

Mu kwirengagiza kw’ikiremwa-muntu gikomeje guhohoterwa n’abambari b’agatsiko mu gihugu cyacu umuyobozi w’ako Karere ka Ngoma Bwana Nambaje Aphrodise akaba nta kindi abivugaho uretse ngo gutegereza iperereza rya Police ku cyateye urupfu rwe. Muriyumvira rwose !

Ni kuri uyu wa 22/01/2018 na none mu Kagari ka Mukungu, umurenge wa Kitabi akarere ka Nyamagabe, umugore witwa MUHAYIMANA Cécile w’imyaka 24 y’amavuko bamusanze iwe mu nzu yaratuyemo yapfuye yarafitanye umwana umwe n’umugabo bashakanye. Gitifu w’akagari ka Mukungu Mme Phoebe Mukamana yadutangarije kuri Phone ngendanwa ko nawe yabimenye aho umugabo wa Nyakwigendera atabarije ubwo yatahaga ahagana mu ma saa tatu z’ijoro agasanga umugore we mu ruganiriro rw’inzu yabo yapfuye ari mu mugozi usanzwe uzirikishwa inka yabo. Ati twahise dutabara twifashishije inzego z’umutekano ati tukaba dutegereje iperereza ku bufatanye na Police iby’urwo rupfu . Nguko !

Urundi rupfu kuri uyu wa 22/01/2018 ni urw’umugabo NKOMATI Pascal wari mu kigero cy’imyaka 35 y’amavuko wo mu Murenge wa Tare, akagari ka Gasarenda ho muli District Nyamagabe, umurambo ukaba watoraguwe mu Bwiherero bw’ishuri bigaragara ko yahotowe akajyanwa guhishwa muli uwo musarani w’ishuli aliko Gitifu w’umurenge wa Tare Bwana Mporayonzi David nawe kuri phone ngendanwa akaba yaradutangarije ko uwo Nyakwigendera yari asanzwe afite uburwayi bwo mu mutwe bityo ngo akaba yarituye mu cyobo cy’ubwiherero cy’ishuri primaire rya MUSE hafi yaho atuye. Ati ubu umurambo we uri gusuzumirwa mu bitaro bya Kigeme.

Banyarwanda muriyumvira ! tugereranije ibyiyumviro by’aba bayobozi twasanga tudashidikanyije ko ibyo Mr. TRUMP Donald avuga ku banyafrika ko ibihugu byabo bimeze nk’imisarani bisa n’ukuri , aho abayobozi b’agatsiko ka FPR baba bubaka ubwiherero budapfundikiye abantu bagwamo ! ni agahomamunwa !

Byanditswe ku wa 25/01/2018, na :
A.BEN NTUYENABO, KIGALI-RWANDA.

Abanyarwanda ntibakibasha kwinjira muri Uganda hakoreshweje indangamuntu

Paul Kagame et Yoweri Museveni

Mu gihe u Rwanda na Uganda ubu umubano utameze neza, ubu noneho ya gahunda yo kugendera ku irangamuntu isa niyahagaze. Ubu umunyarwanda kwambuka ajya uganda ntibyoroshye, nako bisa nibidashoboka kuko umuntu aragenda yagera ku mupaka bakamugarura, hari ababigerageje inshuro nyinshi barabagarura. Muri make urwikekwe ku mipaka rumeze nabi.

Ikindi ni uko ubu inkeragutabara ( abahoze ari abasirikare basezerewe ) bahora mu manama atarangira. Babwiwe ko bagomba guhora biteguye ko igihe icyo aricyo cyose bahamagarwa bakajya ku rugamba. Ubu bakajije amarondo yarakajijwe inkeragutabara ubu zahawe imyenda n’inkweto byo gukorana irondo. Abaturage bo bakubitwa buri munsi bazizwa irondo.

Muri make ubwoba ni bwose ku banyarwanda bari imbere mu gihugu. Barikanga intambara igihe icyo aricyo cyose. Kandi ubutegetsi nibwo bwirirwa buvugira ku maradiyo ko Uganda igiye gutera u Rwanda ifatanije n’abatavuga rumwe n’ubutegetsi . Ubu abategetsi b’inzego z’ibanze nabo ntibatinya kwerurira abaturage cyane cyane iyo bari mu miganda n’amanama ko Uganda ariyo mwanzi ukomeye u Rwanda rufite.

Ngayo nguko.

Jean-Michel Manirafasha

Prezida Kagame yabeshye abadiplomate kubyo gutuza impunzi zo muri Israheli na Libiya

Paul Kagame/photo france24.com

Rwanda : Prezida Pahulo Kagame yabeshye abadiplomates ko kubera amateka mabi igihugu cyanyuzemo agiye gutanga ubufasha atuza abimukira ba Israël na Libye ku butaka bw’u Rwanda.

Ni kuri uyu wa kabili taliki ya 16/01/2018 mu muhango wo kwakira ba Ambassadeurs bashya n’abasanzwe, abakira ku meza mu kubifuriza umwaka mushya wa 2018; Pahulo Kagame ari kumwe na bamwe mu bayobozi bakuru b’igihugu n’ingabo avuga ku byerekeranye n’impunzi z’abimukira b’abanyafrika yabatangarije ko akurikije amateka mabi igihugu cye cyanyuzemo u Rwanda rwiyemeje gutanga umusanzu rwakira impunzi z’abimukira bo muli Libye ndetse n’abo muli Israël yatinye gukomozaho kandi hari amakuru yizewe twahawe n’umwe mu bakozi bakuru ba Ministѐre y’ububanyi n’amahanga y’u Rwanda utarashatse kwivuga amazina kubera impamvu z’umutekano ko ashobora kugirirwa nabi akaba ahamya ko habayeho amasezerano mu bwiru na Israël mu ibanga rikomeye (uretse ko ryamaze gushyirwa ku ka rubanda) hagati ya bamwe mu bayobozi bakuru b’ibyo bihugu byombi hagamijwe cyane cyane indonke n’ubucuruzi ku ruhande rwa bamwe mu bayobozi bakuru b’u Rwanda , bigaragara ko amafranga yose azagenerwa izo mpunzi z’abimukira azinjira mu mifuka yabo ba Rusahuliramunduru bonyine babyitirira igikorwa cy’ubudashyikirwa u Rwanda ruzaba rukoze.

Uwo mutangabuhamya akaba yarakomeje antangariza ko asanga hashobora kuba hari umugambi mubisha wo kuzarohwamo abo bimukira nyuma yuko bazaba bamaze gutuzwa ku butaka bw’u Rwanda ati birashoboka ko twazumva bahinduwe umutwe w’abarwanyi nkuko za M23 n’indi mitwe yagiye ivuka… ati icyo nakwongeraho nuko hari amakuru mfite yuko bamwe muli izo mpunzi ntaramenya imibare neza zarangije no gusesekara mu gihugu cyacu bwihishwa ariyo mpamvu kubera kubura icyo yasubiza mu miryango mpuzamahanga yamaganiye kure ubwo bucuruzi bw’abantu Leta y’u Rwanda yabuze uko yabyifatamo imbere y’umufatanyabikorwa ariwe Israël ikaba irimo isisibiranya ivuga ko nta mwanzuro w’amasezerano yagezweho hagati yayo na Israël. Nguko.

Banyarwanda, uretse uburyarya bw’indengakamere bwa Pahulo Kagame biragaragara ko nta kindi agamije atari ukukomeza gusonga abanyarwanda ! nawe se rubanda rwinshi muli iki gihe ruhanganye n’ubuzima bugoye aho umuntu atakigira icyo akora, ubushomeri burenze urugero, ubutaka buke kandi nabwo butagitanga umusaruro na busa, aho ababyeyi babigize akarande mu gukubitira abana kuryama byongeye n’impunzi zitandukanye zahungiye mu gihugu cyacu zirarira ayo kwarika kubera intica ntikize zahabwaga na HCR yagabanijwe (reba mu nkambi z’abarundi n’abanyecongo: MAHAMA na GIHEMBE ) bashyingura buri munsi none Pahulo Kagame ati reka nongereho n’abandi !

Banyarwanda uyu mugabo yabanje akita kubo afite mu gihugu cye aho kwitwaza ngo ni igikorwa cy’urukundo afitiye abo bimukira b’abanyamahanga ! kuki se atabanza gukora ubuvugizi ku bindi bihugu byihagije dore ko ari nawe uramukiwe mu kuyobora Afrika yunze ubumwe muli uyu mwaka wa 2018 ?

Ababisesengulira hafi barabona ko ari undi muvuno pahulo Kagame yavumbuye wo kubaka imitwe mishya y’amabandi yitwaje intwaro mu gihugu cyacu ngaho ngo aravana abimukira b’abanyafrika mu kaga avuga ko kamwibutsa amateka mabi u Rwanda rwabayemo kandi ari uburyo bwo kuzishakamo indonke no gukomeza kuzikoresha nk’abacakara igihe zizarambirirwa zikazongera gushaka iy’ubuhunguro. Birababaje cyane !

Byanditswe ku wa 17/01/2018, na:
A.BEN NTUYENABO, KIGALI-RWANDA.

Rwanda : Toni 14 z’ibitabo bya QOR-AN z’Abayisilamu zigiye gutezwa cyamunara

FPR-Inkotanyi se yaba yatangiye gushyira mu bikorwa itegeko ryo kujya imulikirwa imvano y’imitungo n’impano z’amatolero n’amadini kandi ritaremezwa n’inteko imitwe yombi? byaba ari agahomamunwa !

Ni muli iyi minsi aho ikigo k’igihugu cy’imisoro n’amahôro gitangarije ko kigiye guteza cyamunara Tonnes 14 na kg 470 z’ibitabo bitagatifu bya kisilamu aribyo QOR-AN n’amacartons 1444 apima Tonnes 22 na kg 100 by’imbuto z’imizabibu bita ‘Itende’ abayisilamu bakunze kurya mu gisibo cya Ramadhan, bikaba bimaze hafi imyaka ibili mu bubiko bwa MAGERWA ( Magasins généraux du Rwanda ) aho byafatiriwe n’ikigo cy’imisoro n’amahôro (RRA). Cyamunara iteganijwe ku wa 28/01/2018.

Umuryango w’abayisilamu mu Rwanda ukaba uvuga ko nta bushobozi ufite wo kwishyura miliyoni 30 zose z’amanyarwanda usoreshwa nicyo kigo kuri uwo muzigo.

Nkuko tubikesha Sheikh Mbarushimana Suleyman akaba n’umujyanama wa Mufti w’u Rwanda yadutangarije ko ibyo bikoresho byose byari impano yatanzwe n’igihugu cya Arabie Saoudite ku bayisilamu bo mu Rwanda, ati ntibyumvikana kuba byishyuzwa umusoro kandi atari iby’ubucuruzi cyangwa iby’umuntu ku giti cye ahubwo ari ibintu birebana n’idini gusa ubusanzwe bidasora.

Sheikh Mbarushimana Suleyman akomeza avuga ko nubundi ibyo bitabo ari ibyabayisilamu gusa kuko aribo bigenewe ati naho iyo cyamunara yashyirwa mu bikorwa ntitwakwemera ko byandagara kuko mu bayisilamu igitabo cy’Imana tugiha agaciro gakwiye bityo bikazaba ngombwa ko ari twe tunabigura mu gihe ibiganiro twasabye na Leta kuri icyo kibazo bitagize icyo bigezeho.

Banyarwanda, bakristu, bayisilamu, kimwe na Bibiliya ku bakristu, QOR-AN nayo ni igitabo gitagatifu cyubahwa cyane n’abayisilamu n’abandi batari bo ku isi hose bityo kikaba kitari gikwiye gutezwa cyamunara kuko byaba ari igikorwa kidahesha Imana icyubahiro yo idakorera mu muvundo cyangwa muli ba Rusahuliramunduru nk’ikigo cy’imisoro n’amahôro cya Pahulo Kagame (RRA).

Bayisilamu nshuti z’Imana , ASSALAM ALAIKUM, nimuhaguruke muharanire uburenganzira bwanyu kuko igihe kirageze dore aho mwaherewe rimwe ngo mufatanije na wa mutwe w’iterabwoba Islamic state ubundi ngo nimuraswe ku manywa y’ihangu none ngo nibabasenyereho n’imisigiti ! (burya igitabo cy’amagambo y’ubutumwa bw’Imana nicyo musigiti cyangwa urusengero rwacu).

Byanditswe ku wa 12/01/2018, na :
A.BEN NTUYENABO, KIGALI-RWANDA.

Rwanda: Pahulo Kagame ageze aho afunga gereza ya kigali 1930 ayishakamo umusaruro.

Gereza ya Kigali 1930 ni imwe mu nyubako zubatswe mu gihe cy’abakoloni zari zisigaye zitarasenywa na Leta y’agatsiko. Biravugwa ko rero Gereza 1930 ya Nyarugenge ari imwe mu bizaranga umurage w’amateka y’u Rwanda nkuko ubuyobozi bw’umugi wa Kigali buherutse kubitangaza bwemeza ko iyo Gereza isanzwe yubatswe ku butaka buri mu maboko y’umugi wa Kigali nta kabuza ariwo ugomba kugena ikibukorerwaho nyuma yo kwimurwa kw’abagororwa bose bari bayifungiyemo bityo hakazubakwamo amacumbi hashakirwa n’abashoramari bazahakorera indi mishinga yumvikanyweho na Leta y’agatsiko ari nako hasigasirwa inyubako y’iyo Gereza yari ihasanzwe.

Hagati aho ikigo gishinzwe ingoro z’umurage z’amateka y’u Rwanda kikaba gitangaza ko Gereza ya 1930 izatanga umusaruro mu bukerarugendo kuko ngo izaba yerekana amateka ya ba Rutuku b’ababiligi mu Rwanda nkuko ay’abadage yerekanwa n’inzu ya KANDT.

Ni muli urwo rwego abari bayifungiyemo barimo gushwirashwizwa bajyanwa mu yandi magereza hirya no hino mu gihugu ari nako abo bafungwa ba nyakujya bakomeje kuburana n’ababo babasuraga batagisobanukirwa neza naho bimurirwa.

Nkuko urwego rushinzwe imfungwa n’abagororwa (RCS) rwabitangaje rero, abagororwa b’abagore bagera kuri 500 bari bakiri muli iyo Gereza ya Nyarugenge izwi nka 1930 barimo n’abanyepolitiki nka Mme INGABIRE Victoire Umuhoza utavugarumwe na Leta y’agatsiko bategereje kwimurirwa muli Gereza shya ya MAGERAGERE bitarenze ukwezi kwa Gicurasi 2018. Bamwe muri bagenzi babo nabo b’abagabo bakaba barimuriwe muli Gereza ya MUHANGA bita GWANTANAMO y’i Rwanda .Nguko.

Banyarwanda nkuko bamwitaga akiri hakurya muli NRA ya Ouganda, uyu Pilato Pahulo Kagame aho gufungura abo amaze kurundarunda muli ibyo bihome ku bwinshi nk’imbagwa kuri we yumva yahitamo kubakiza ubuzima abahotora niko yamye ateye Pilato ka Yezu ! mu gihe yakagombye kuba atera ikirenge mu cya mugenzi we Prime Minister of Ethiopia DESSALEH uherutse gutangaza ko imfungwa zose za politiki mu gihugu cye zirekurwa ! aliko kuri we imbabazi za bihehe zava he ! keretse ku iherezo rye .

Byanditswe ku wa 08/01/2018 , na :
A.BEN NTUYENABO, KIGALI-RWANDA.