Archives mensuelles : août 2017

Rwanda/Musanze : Abaturage baturiye parc y’ibirunga bagiye gusimbuzwa ibyana by’ingagi

Mu rwego rwo kwitegura umunsi wo ‘’kwita izina ingagi’’ ku nshuro ya 13 hateganijwe umuhango kuri uyu wa gatanu taliki ya 01/09/2017 mu Kinigi ho mu Karere ka Musanze; hakaba hari n’ibiganiro biri kubera hano i Kigali bihuje inzego zitandukanye mu kwiga no kubungabunga urusobe rw’ibinyabuzima n’ibidukikije hashyirwaho amategeko yihariye agenga ibihugu bigize afrika y’iburasirazuba by’umwihariko n’u Rwanda rurimo.

Uretse rero ibyo biganiro byashowemo amafranga na RDB (Rwanda Development Board), hari kandi n’ibitaramo binyuranye byo gukusanya amafranga yo kwagura icyanya cy’ingagi muli pariki y’ibirunga bavuga ko ziba ahantu hato bikazigiraho ingaruka kandi ari nako ziyongera nkuko umuyobozi mukuru wa RDB Mme Claire Akamanzi yabitangaje.

Bwana Mutanguha Eugène ukuriye ubuyobozi bw’amapariki y’igihugu muri RDB avuga ko bitewe n’akamaro kanini ingagi zifitiye ubukungu bw’u Rwanda biriya biganiro biri mu rwego rwo kwagura no kuzamura mu kubungabunga pariki z’u Rwanda kubera imbogamizi z’ubwiyongere bw’abaturage buri hejuru cyane cyane ahegereye za pariki bityo bigatuma bazangiza cyangwa inyamaswa zigasohokamo zijya mu mirima yabo. Ati kimwe mu ngamba twafashe rero zo guhangana n’iki kibazo cyane cyane kuri pariki y’ibirunga hakaba harimo kwongera ubuso bwayo hibandwa ahari icyanya cy’ingagi kuko byanagaragaye ko uko ziyongera zishobora kuzajya zirwana zikicana kubera kubura ubuhumekero kandi kuri twe ni igihombo ati dore ko iyi pariki y’ibirunga ubusanzwe yinjiriza igihugu miliyoni 17 z’amadolari ya Amerika buri mwaka ziyikomotseho , 92 % yayo agaturuka mu gusura ingagi.

Bwana Mutanguha akomeza avuga ko bitarenze imyaka itanu iri imbere bateganya kuzayongeraho 1/4 cyayo mu gihe yari ifite ubuso bungana na kilometero kare 160 gusa.

Uko mubibona rero ibibazo mu gihugu cyacu byarenze ivugiro ! sinibaza umushinga nyamukuru niba ari ukubanza kwimura abaturage mu dukeya twabo ngo ubone ubuhumekero bw’ibyana by’ingagi ugamije kuronka indamu zitazabageraho! Kuki se RDB nk’ikigo kiterambere ry’igihugu kitabanza ngo gitekereze kuri rubanda rwazahajwe na ya nzara yiswe Nzaramba byibura ngo gitumize abanyamurengwe basangiye gusahura igihugu bakoresha ibitaramo byo kurugoboka? Abaturage nibo bwenge n’ingufu za mbere mu iterambere ry’igihugu kuruta ingagi ni nabo bakwinjiza amadevises menshi mu gihe baba babonye ibyo kurya bituma ubwonko bwabo butekereza neza kuko aribo ba mbere igihugu kibereyeho kuruta kugenda ubagaraguza agati nkaho nta gaciro ubabonamo.

Byanditswe kuwa 29/08/2017, na:
A.BEN NTUYENABO, KIGALI-RWANDA.

Kigali/Rwanda : Amatora ararangiye, n’agahenge karangiye, none P. Kagame ati : mukure umwanda w’abazunguzayi mu mugi

Ni kuri uyu wa gatatu taliki ya 23/08/2017 habaye ikiganiro n’itangazamakuru gihuje abayobozi 300 bo mu nzego zinyuranye harimo abayobozi bashinzwe umutekano urwego rwa police n’ingabo, abo mu buyobozi bw’ibanze n’umujyi wa Kigali aho biyemeje gukora ibisa n’ihohotera rivanze n’ivangura baca burundu abazunguzajyi mu mugi wa Kigali.

Bwana Nyamurinda Pascal umuyobozi w’umugi wa Kigali akaba yaratangaje ko kudakoresha ingufu ku bazunguzajyi n’ababagulira bituma batubahiriza amategeko yashyizweho kuva 2015 bikagaragazwa n’imyitwarire idahwitse yabo bityo umujyi wacu ubusanzwe uzwiho kurangwa n’isuku n’umutekano ukahononokera bitewe nabo.

Bwana Nyamurinda akaba yakomeje yemeza ko kimwe mu byaranze iyi minsi hagaragaye akajagari gakabije kugeza aho abo bazunguzajyi bari basigaye batumva ibyo tubabwira bagahitamo guhangana n’inzego z’ubuyobozi niz’umutekano, ibyo ntitugomba kubirebera ariyo mpamvu bigomba guhagarara burundu. Ati iyo akajagari nka kariya kagenda gakura turamutse tubijenjekeye kazavamo ibindi bibazo by’umutekano amazi yararenze inkombe.

Umuyobozi w’umugi wa Kigali yakomeje atangaza ko izo ngamba zigiye guhita zishyirwa mu bikorwa guhera uyu munsi aho abazunguzajyi bose bagiye gufatwa bagasubizwa kw’ivuko ryabo ati ntitwishingiye abica amategeko kubera ko bahisemo nabi baza kuzerera mu mujyi kandi ntacyo bafite bahakorera.

ACP BADEGE Theos umuvugizi wa police y’igihugu wari witabiriye icyo kiganiro yatangaje ko guhera ubu police y’igihugu igiye gushyira mu bikorwa icyo cyemezo ihashya burundu umuco mubi wari utangiye kwaduka wo gusuzugura inzego z’umutekano ati tugiye kwongera ingufu mu muhanda kuko dufite ibikoresho n’abapolisi bahagije kuruta DASSO.

Kubona Leta y’u Rwanda guhita ikoresha imbaraga za gisirikare cyangwa za police ngo irereka amahanga ko byose ari Smart nsanga atari igisubizo kirambye hagombye kubanza kubaho ubwenge n’ubushishozi hamenyekana impamvu nyayo abo bantu bahunga kw’ivuko ryabo bakaza kwirunda mu mugi noneho hagafatwa umwanzuro nyawo hatirengagijwe imibereho mibi bashobora kuba babayeho iyo kw’ivuko naho ubundi bitagenze bityo hazabaho ibisikana ry’imodoka zibacyura from Kigali nizindi zibatunda zibakuye mu cyaro basubira kuwuzunguzamo nubwo bwose Nyamurinda atekereza ko uzajya agaruka bazajya bamusubizayo kugeza ubwo arambiwe kuwugarukamo.

Tubibutse ko muli abo bazunguzajyi bavugwa higanjemo cyane n’abana b’abakobwa bahetse impinja birirwa basabiriza mu mugi.

Bamwe mu basesenguzi barabona ari ubundi buryo bwo guhohotera ikiremwa-muntu mu rwego rw’ivangura no gutera abaturage ubwoba aho kubutera umwanzi ! bityo uwavuze ati ‘‘ubwo amatora ya Kagame arangiye n’agahenge kararangiye’’ ntiyabeshye pe!

Byanditswe kuwa 24/08/2017, na:
A.BEN NTUYENABO, KIGALI-RWANDA.

Rwanda : Ya mashyaka yashyigikiye Kagame mu matora yahawe ibihembo

Nkuko twabitangarijwe kuri uyu wa 21/08/2017 n’umwe mu bakozi b’ihuliro bahoraho utarashatse kwivuga amazina yatubwiye ko ihuliro nyunguranabitekerezo ry’imitwe ya politiki yemewe na leta ya FPR (National Consultative Forum of Political Organisations – NFPO) uko ari cumi n’umwe ryateganyirijwe ingengo y’imali ingana na 1,009,198,325 FRW hakurikijwe ibikorwa byifuzwa mu mwaka wa 2017-2018. Icyegeranyo cyayo kikaba giteye ku buryo bukulikira:

1. Guteza imbere ibiganiro nyunguranabitekerezo bya politiki n’ubumwe bw’igihugu bikazatwara angana na 102,434,000 FRW ahwanye na 15.8 %.

2. Kubaka ubushobozi bw’imitwe ya politiki no guteza imbere umwuga wa politiki bizatwara angana na miliyoni 254,830,051 FRW ahwanye na 39.5 %.

3. Guteza imbere ihuliro no gutanga service nziza bikazatwara angana na miliyoni 288,555,949 FRW ahwanye na 44.7 %.

Igiteranyo cy’aya mafranga yose hamwe akaba ari 645.820.000 FRW yabaye atanzwe ku ikubitiro ku nkunga ya Leta ya FPR ingana na 400,000,000 FRW na 245,820,000 FRW yatanzwe n’ishami ry’umuryango w’abibumbye ryita ku majyambere UNDP/ONE UN kugira ngo afashe mu bikorwa by’ibanze bishoboka; asigaye kuri iriya ngengo y’imari twavuze hejuru ku bikorwa byose / total to be mobilized bikaba birimo biganirwaho with partners DFID, IDEA, UN WOMEN na NEVER AGAIN RWANDA nkuko bivugwa na Bwana BURASANZWE Oswald umunyamabanga nshingwabikorwa w’ihuliro ry’imitwe ya politiki mu Rwanda.

Bwana BURASANZWE Oswald akomeza yemeza ko kuri aka kayabo k’ingengo y’imari y’ihuliro ayoboye buri mutwe wa politiki uzabisaba uzahabwa 20,000,000 FRW azafasha mu bikorwa bitandukanye kuli buri mutwe harimo imyiteguro y’amatora y’abadepite muli 2018 ati: ( dore ko aya prezida yarangiye kandi yagenze neza ku buryo buri mutwe wa politiki wayoherejemo indorerezi ebyili kandi bigenda neza) byongeye abafashe no mu gutanga amahugurwa ya hato na hato ahabwa abayoboke bayo ku byerekeye indangagaciro zigenga abanyepolitiki; andi akazakoreshwa n’ihuliro ubwaryo mu bikorwa binyuranye by’imitwe ya politiki nko kuyigurira ibikoresho by’amahugurwa, kwishyura imishahara y’abakozi bahoraho b’ihuliro, gutegura inama rusange za buri gihembwe, gukomeza kwishyura ifatabuguzi ku mbuga za internet z’imitwe ya politiki, kwishyura ubukode bw’inzu ihuliro rikoreramo n’ibindi….. Iyi gahunda y’ibikorwa mu mwaka w’ingengo y’imari 2017-2018 ikaba yarateguwe hashingiwe ku igenamigambi ry’ihuliro ry’imyaka itanu (2016-2021), nguko !

Murabona rero ukuntu umutungo w’igihugu, mbese ibya rubanda, bikomeje gupfushwa ubusa mu bidafitiye abaturage umumaro. None se ko Kagame Paul avuga ko amashyaka yose yabaye umwe na RPF-INKOTANYI ibindi bikorwa byayo bishorwamo akayabo bene kariya kageni bimariye iki abanyarwanda? Aho ntikwaba ari ukugusha neza gusa abayobozi na bamwe mu bayoboke bayo kugira ngo hatagira ubavamo agakoma rutenderi nkuko byagaragaye hambere kuli Me Ntaganda Bernard ? Byaba byiza ihuliro risheshwe buri wese agakora ku giti cye mu rwego rwo kurengera ibya rubanda bityo tukaba twasagurira nibura abaturage b’umurenge wa Mageragere ayo kugura amamashini abazamulira amazi mu mugezi wa Nyabarongo aho ingona zibarya ijoro n’amanywa nta gitabara !

Byanditswe ku wa 22/08/2017 na:
A.BEN NTUYENABO KIGALI-RWANDA.

Rwanda : Uretse Mgr Ph. Rukamba abandi banyamadini bararutanze mw’irahira rya Kagame

Ku wa gatanu taliki ya 18/08/2017 kuri stade amahoro i Remera, Bwana KAGAME Paul yari yakoranije abanyarwanda b’ingeri zose kuva ku rwego rw’umudugudu aho amabus yaramutse atunda abaturage mu rukerera abajyana kuri stade, hakaba hari na bamwe mu banyamahanga batumiwe barimo abakuru b’ibihugu byo muli afrika bagera kuri 18 abo bose bakaba bari bitabiriye umuhango wo kurahirira kwongera kuyobora u Rwanda kwa Paul Kagame mu yindi mandat y’imyaka 7 iri imbere.

Mu bahagaraliye amadini bagera kuri 5 muri uwo muhango harimo na Prezida w’inama nkuru y’abepiskopi Gatolika mu Rwanda Mgr Philippe RUKAMBA, mw’isengesho rye ritandukanye ni rya bagenzi be b’abayisilamu, abangilikani n’abandi…..akaba yaririnze kugira uwo akeza cyangwa aramya mu izina nkuko abandi bagiye babikora bashaka kumvisha rubanda ko Prezida Kagame ari impano Imana yahaye u Rwanda n’ibindi…. Philippe Rukamba rero we nyuma y’ikimenyetso cy’umusaraba yaragije Imana ubuyobozi bushya bugiye abusabira ku Mana ubwenge n’ubushishozi bwo kuzanira abanyarwanda umunezero nyawo kandi hakomezwa kunozwa umubano n’ibihugu by’amahanga. Ati Imana ibongerere ubushobozi n’ubunararibonye mu kwitangira abanyarwanda n’abababaye bose. Iyo myitwarire ya Mgr Rukamba ikaba itandukanye niyari iherutse kugaragara ku bepiskopi bagenzi be muli campain y’umukandida wa RPF-INKOTANYI Paul Kagame aho Mgr Smaragde Mbonyintege wa Kabgayi na Céléstin Hakizimana wa Gikongoro bari bitabiriye iryo yamamaza hamwe n’ibirangantego bya RPF kandi kuri bo tuzi ko ntawe ukeza abami babili.

Mu ijambo rye, Prezida Kagame amaze kurahilira imbere ya mubyara we direct Prezida w’urukiko rw’ikirenga Prof. Sam Rugege, yatangiye ashimira by’ibanze urubyiruko rwamutoye ku bwinshi ku nshuro ya mbere rwari rugejeje ku myaka yo gutora ati ni ugukomeza igihango dufitanye kuko mwambaye hafi. Yaboneyeho no gushimira kandi abakuru b’ibihugu bitabiriye uwo muhango abifuriza guteza imbere ubwo bufatanye haba ku Rwanda na Afrika muri rusange, ati nongere nshimire kandi n’abanyarwanda bose bongeye kungirira ikizere ati aliko ikiruta ni ikizere mwifitiye ubwanyu.

Kagame Paul yakomeje avuga ko u Rwanda n’Afrika bakwiye ubufatanye kuko bashoboye, ati tugomba gukora ibibereye abaturage bacu, Afrika ntifite ikibazo cya civilization ikeneye ibikorwa kuko turi abanyeshuri beza ’’sans aucun doute’’! Nguko uko yabyivugiye! Ati kuki abanyamahanga bumva ko bagomba kutubwira ibyabo ngo aribyo dushyira mu bikorwa ? Kagame yakomeje anenga ibihugu bishaka kugena uko u Rwanda na Afrika babaho ati politiki nkiyo niyo ikomeza gutakarizwa ikizere n’abaturage bacu. Yatanze urugero ku ndirimbo y’ikigoyi yakanyujijeho muli campain ye mu Karere ka Rubavu yavugaga ngo ’’nda ndambara yandera ubwoba’’ ati ni ukuvuga ko n’ibindi bihugu by’afrika bigomba gukomera ku busugire bwabyo kuko bireba abanyafrika twese. Nguko.

Uyu munyagitugu akaba yarivovotaga mu gihe nta délégation nimwe yoherejwe na UE, UK cg Amerika muli uwo muhango uretse bamwe muli ba Ambassadeurs bahagaraliye ibihugu byabo mu Rwanda.

Ntawarangiza adakomoje ku kuntu aba bacanshuro b’iyi Leta y’agatsiko yishongora bikabije ku banyamahanga, abenegihugu, ndetse n’abahisi n’abagenzi ko ariyo yonyine na Prezida Kagame bateje u Rwanda imbere ku buryo bugaragara mu gihe uyu acyakirira abashyitsi be muli stade amahoro, village urugwiro cyangwa aho atuye munsi ya Cathédrale St. Michel aho hose ntawe uyobewe ko hubatswe ku bwa Nyakwigendera Prezida Juvenali Habyarimana ! Iryo terambere bavuga riruta iry’abamubanjirije se ni irihe ?

Bavuga ko imvugo ariyo ngiro ndareba ngasanga Kagame arushywa n’ubusa ararahirira ibyo atazashyira mu bikorwa ! none se indahiro akora zo kurinda itegeko-nshinga no kubahiriza uburenganzira bwa muntu birihe ? Nabona ibyo arimo ari nko gusezera abanyarwanda bwa nyuma. Tubitege amaso !

Byanditswe ku wa 18/08/2017, na :

A.BEN NTUYENABO, KIGALI-RWANDA.

Rwanda : Mandat ya 3 ikomeje kuvugisha Paul Kagame amangambure

Paul Kagame/photo france24.com

Nibyo koko rero abakulikiranira hafi politiki y’u Rwanda barabona ko ibyo Paul Kagame arimo apanga nta kabuza bigiye kuzamupfira ubusa inama ya kigabo akaba ari ukwegura cyangwa akiyahura .

Kubera ibihe bidasanzwe igihugu cyacu kinjiyemo bitewe n’uyu mugabo Kagame nyuma yo gutechnika ingirwamatora biragaragara ko impungenge ari zose we n’abambari be ko bitazabahira mu gihe nta munsi w’ubusa ushira batisobanuye kuri mandat ya 3 nkaho hari uwigeze ayibahatira.

Akaba ari muli urwo rwego kuri uyu 13/08/2017 muli village Urugwiro ubwo uyu Prezida Kagame yagiranaga ibiganiro byihariye n’ikinyamakuru DAILY TELEGRAPH , Umunyamakuru yamubajije icyo atekereza ku bivugwa ko yashatse kugundira ubutegetsi ndetse nicyo yaba apanga kwemeza umuryango mpuzamahanga ko ari gufungura ikibuga cya demokrasi mu gihugu. Paul Kagame yamusubije ko ibyo bitamureba kandi ko atagomba kubaho nk’uko abategetsi b’ibihugu bikomeye Barack Obama, Trump cyangwa abo mu bihugu by’iburayi babayeho.

Muli icyo kiganiro, Prezida Kagame yakomeje yerekana ko ibyo bamusaba ari uburyo bari gukoresha bwo kumugamburuza bati : « Reka dukomeze tumwotse igitutu kugeza aho bizamuremerera ! ». Kuri Prezida Kagame ariko we ati ibyo ntacyo bivuze kuri jye kuko nta buzima nk’ubwabo nkeneye kubaho, yakomeje avuga ko adakeneye kubaho nk’Abongereza, Abanyamerika cyangwa Abafransa, ati ibyo ni imibereho yabo aho batuye niho batuye, nanjye ntuye mu Rwanda nkeneye kubaho nk’umunyarwanda, nk’umunyafrika ! Ati sinkeneye guhinduka uwo ntari we ! Prezida Kagame yunze mu rya Minister Mushikiwabo asa nuwemeza ko abazungu ari abarwayi bo mu mutwe aho yagize ati hashize imyaka 20 yose ibyo banenga u Rwanda ari nako bagenda babisubiramo uko imyaka itashye na nubu bakibivuga ati nkaba ntekereza ko hari ikitagenda kuri bo aho kuba ku Rwanda n’Abanyarwanda.

Prezida Kagame akaba yongeye gushimangira ko ibyavuye mu ngirwamatora yatsinze ari urugero rwiza rw’amahitamo y’Abanyarwanda, ati naho abo banyamahanga mbere ya byose bamenye yuko ntagomba kubaho nkabo, ati ibyo bikaba bisobanuye ko ndi hano kubera ko nubahirije ibyo nasabwe n’Abanyarwanda byongeye baranabyemeje babitorera muli referendum ati rero bahisemo icyo gukora kibabereye , nguko nimwiyumvire namwe !

Ntawakwifuza aka wa mugani ngo « akaje karemerwa! ». Ahubwo nsanga mu gutsimbarara ku butegetsi k’uyu munyagitugu ari ukudashakira igihugu cyacu amahoro bitewe no kuba yarasuzuguye itegeko-nshinga ry’igihugu cyacu arivuyanga uko yishakiye ngaho ngo araha amasomo ya politiki Abanyarwanda yagize imbohe mu gihugu cyabo abandi ishyanga ! Iyo demokrasi y’ubudasa yazaniye Abanyarwanda yakweruye akavuga ko ari ubwoko bwa kane bw’Abanyarwanda ! Abatwa, Abatutsi , Abahutu hiyongereyeho n’agatsiko ka FPR aho kugira ngo akomeze kurindagiza Abanyarwanda !

Byanditswe ku wa 14/08/2017, na :
A.BEN NTUYENABO, KIGALI-RWANDA.

Rwanda : Umuryango wa Cpt J.C. Ntirugiribambe urasaba LONI ibisobanuro kw’ishimutwa ry’uyu musilikari

Ni nyuma y’imyaka ibili yose uhereye muli 2015 uyu musilikare Cpt Ntirugiribambe aburiwe irengero aho yari atuye I Nairobi muli Kenya abana n’uwitwa Sgt Emile Gafirita nawe washimuswe n’abantu bataramenyekana mu gihe yiteguraga kujya gutanga ubuhamya ku bacamanza b’abafransa ku byerekeye umuntu wahanuye indege yarimo Prezida Habyarimana na Ntaryamira w’u Burundi.

Uyu sgt Emile Gafirita bikaba byaravuzwe kenshi ko yaba yarashimuswe akanicwa na DMI ya Kagame aliko kugenza magingo aya nta kanunu kiyo dossier.

Kimwe rero n’uyu Cpt Ntirugiribambe, uyu musilikare wahoze muli EX-FAR akaba yari azwiho ubuhanga dore ko yari yaragiriwe ikizere n’umuryango w’abibumbye (ONU) mu gihe abandi bakoranye nawe muli EX-FAR barimo bahigishwa uruhindu, uyu musirikare w’umupentecosti akaba yaranafite ubunararibonye mu byerekeye Military analyst intelligence n’impamyabushobozi mu bya gisirikare -United States Army Commander- yari yarakuye muli USA (Arkansas).

Byongeye uyu musirikare akaba yaranagaragaye cyane mu kwita ku mpunzi z’abanyarwanda bari barahungiye muli Congo aho yageragezaga kuzikiza mu gihe ingabo z’inkotanyi zazihigishaga uruhindu, bikaba byaratumye zimwe zirokoka amasasu ya APR-Kagame mu mashyamba ya Congo nubwo bwose zananiwe gutaha kubera umutekano wazo.

Leta y’agatsiko ikaba yaragiye imutumaho kenshi ngo agaruke mu gihugu bakorane aliko ayibera ibamba arayihakanira . Ntibyarangiriye aho kuko umuryango mpuzamahanga ONU umaze kubona ukuntu yagerageje kwitangira impunzi wahise umugirira ikizere umwohereza kuwuhagaralira mu Rukiko mpanabyaha ku Rwanda rukorera I Arusha nk’umushakashatsi ku ruhande rw’abashinjwaga ibyaha bya Jenoside ku buryo yabaye mu manza zitandukanye atanga n’ubuhamya ku basirikare batari bake baburanijwe n’urwo Rukiko ari nako agira uruhare mu gutuma bamwe muri bo bakurikiranwagaho ibyaha bya Jenoside barekurwa abandi bagahabwa ibihano kubera ibyaha bashinjwaga.

Nyuma y’imyaka 2 rero uwo muryango we uri kumwe n’umwunganizi wawo mu mategeko ukaba usaba ibisobanuro TPIR n’umuryango mpuzamahanga ONU ku irigiswa ry’uyu muvandimwe wabo kuko aribo yari abereye umukozi.

Hakurikijwe ubusabe bw’uyu muryango Icyumba cy’urukiko MICT cyasigiwe ububasha na TPIR yacyuye igihe gitangaza ko ikifuzo cy’umuryango wa Cpt Ntirugiribambe cyakiriwe kandi ko hari amategeko y’urukiko agenderwaho mu gukingira abantu nkaba. Cpt Ntirugiribambe yaburiwe irengero mu gihe nanone umuryango mpuzamahanga wa ONU wari umaze kumuhindulira imirimo ugiye kumwohereza kuwuhagaralira mu gihugu cy’u Burundi.

Hagati aho umushinjacyaha John Philpot wahoze aburanira bamwe mu bashinjwa ibyaha bya Jenoside muli TPIR akaba avuga ko amakuru afite kuri Cpt Ntirugiribambe ashobora kuba akiriho ariko akaba yarakorewe iyicarubozo yaranavunaguwe amagufwa. !Nguko Tubitege amaso!

Banyarwanda banyarwandakazi biragaragara ko ntawe uyoberwa umwiciye, uhereye kuri ubu buhamya bw’uyu mushinjacyaha John Philpot wemeza ko akiriho aliko akaba ngo yarakorewe iyicarubozo byongeye akaba yarabanaga nuriya witwa Sgt Emile Gafirita washimutiwe iwe agahita anicwa mu gihe yagombaga gutanga ubuhamya ku bacamanza b’abafransa ku byerekeye umuntu wahanuye indege ya Prezida Habyarimana ntawashidikanya ko izo cases zose zari manipulated by RPF-INKOTANYI kimwe n’abandi benshi bagiye bashimutwa cyangwa bakicwa muli ubwo buryo! Twabibutsa nka Minister Seth Sendashonga wishwe kuya 16/05/1998 ! icyo gihe Kenya yacanye umubano n’u Rwanda; hari kandi Col. Patrick Karegeya wishwe kuya 12/01/2014 aho umwicanyi we ariwe Paul Kagame yabyigambye mu giterane cy’amasengesho asoza umwaka muli Serena Hôtel ya Kigali ahari hateraniye abayobozi bakuru b’igihugu , aho muri icyo giterane Prezida Kagame abajijwe impamvu ibitangazamakuru byo hanze bikomeje gushinja ubuyobozi bw’u Rwanda ubwo bwicanyi, yasubije ubwe ko nundi nkawe adakwiye kureberwa ! nguko ! ni ishyano pe !…….ngabo ba Col. Lizinde Théoneste, CEO Turatsinze wayoboraga BRD tutibagiwe na Général Kayumba Nyamwasa wageragejwe kwicwa inshuro 3 zose muli South Africa aliko Imana igakinga akaboko. Yewe ntawabarondora!

Banyarwanda banyarwandakazi rero , mbona ari ngombwa cyane kujya duhora twibukiranya amabi yose yakozwe kandi agikomeza gukorwa n’iyi ngoma-mpotozi ya FPR-KAGAME kugeza magingo aya nkuko nayo iba iticaye ubusa muguhora ishaka amayeri yose yo gusibanganya ibimenyetso. Mugire amahoro.

Byanditswe ku wa 11/08/2017, na:
A.BEN NTUYENABO, KIGALI-RWANDA.

Rwanda: nyuma y’amatora, Dr. Frank Habineza na Philippe Mpayimana bararirira mu myotsi

Mu gihe UE yagaragaje amanyanga ya Komisiyo y’igihugu y’amatora mu Rwanda (NEC) mu guheza bamwe mu bashakaga kwiyamamariza umwanya w’umukuru w’igihugu n’andi matati menshi yaranzwe nayo; abaciriwe isiri na RPF-INKOTANYI bakemererwa na NEC aribo Dr. FRANK HABINEZA na Mr. PHILIPPE MPAYIMANA bagaragaje ko bishimiye uko igikorwa cy’ingirwamatora cyateguwe na Leta y’agatsiko, aliko kandi ukaba wakwibaza impamvu aba bakandida bongeraho ko babangamiwe cyane n’inzego z’ibanze z’ubutegetsi bwa RPF-INKOTANYI aho Dr. Frank Habineza we amaze gutangarizwa amajwi y’agateganyo yabaye nkunyagiwe n’imvura ku buryo yari yiheje no kuba yagira icyo atangariza abanyamakuru muli ako kanya avuga ko ananiwe !

Aliko amaze gusanga ko bishobora kumuviramo inkurikizi, ni kuri uyu wa 6/08 yisubiyeho ikiniga kimaze gushira abwira itangazamakuru ko amajwi aherutse kubona mu matora ya Prezida ari intsinzi ikomeye nk’ishyaka ryahanganaga n’andi icyenda yose yakoze coalition yiyomeka ku mukandida wa RPF-INKOTANYI Kagame Paul ! yakomeje avuga ko amajwi o.47% babonye bayemera aliko ko batabyishimiye nkuko bari babitekereje ! ati aho twiyamamarije hose abanyarwanda bakunze ibitekerezo byacu ari nako bifuza impinduka mu gihugu cyacu ati kandi abenshi bari babitwijeje.

Dr. FRANK Habineza udashobora kwerura ngo avuge ashize amanga yakomeje atangaza ko hari aho bagiye kwiyamamaza mu ntara y’iburasirazuba bakamuhitiramo mu irimbi hatari hateganijwe ! Dr. Frank yagerageje guca amarenga yerekana ko ishyaka rye ryabangamiwe bikomeye n’abayobozi b’inzego z’ibanze guhera mu Karere ka Rusizi, Nyamasheke, Nyagatare n’ahandi… ati bamwe badutera amabuye abandi batwitambika mu mayira abandi nabo batwohereza mu marimbi nkuko nabivuze haruguru .

Dr. Frank yakomeje avuga ko no kumunsi w’itora nyirizina ari ko byabagendekeye aho indorerezi 500 bari bohereje ahantu hatandukanye zangiwe kwinjira mu byumba by’itora izindi zigakumirwa kwinjira ahabarurirwaga amajwi ati niyo mpamvu nk’ishyaka rya politiki tutakwirirwa tuvuga ko hari icyatubayeho kandi nta kimenyetso dufite ! ati ni ukuvuga ko ibyavuye mu matora byose tubyakira uko bimeze ! ati kubona tutabonye na 1% n’ukuntu twamaze imyaka 4 yose dutegura aya matora ari nako tuhatakariza imitungo yacu !birababaje!

Banyarwanda banyarwandakazi niba atari ukwirengagiza se tuvuge ko Dr. Frank yajyanywe mu kibuga na RPF atazi ikinyoma akina nacyo icyo aricyo ? niyihangane ! urwishigishiye ararusoma ! kuko n’ubutaha avuga kwinjira mu matora y’inteko ishinga amategeko niko bizamugendekera , nkaba namugira inama yo kwirinda gukomeza kugendera mu kigare cya RPF kuko igeze aharindimuka.

Byongeye kandi akaba ari no kuri uyu wa 08/08/2017 aho uyu mukandida usa nuwihebye amaze gutangariza ikinyamakuru Umuseke cyandikira hano mu Rwanda ko bitewe no gutsindwa kuri iyi ngirwamatora ya Prezida wa republika y’u Rwanda yumva ashobora no guhita yegura ku mwanya w’ubuyobozi bw’ishyaka Green Party ! muriyumvira namwe ! umunyarwanda yise umwana we ngo ‘’BAJYAGAHE …

Naho Ku majwi 0.73, umukandida Philippe Mpayimana we ugira icyo apfana n’abamenyerewe nk’abikorezi b’ibibindi byagaragaye ko bitamubabaje na busa ko yaba yarinjijwe mu gikorwa azi impamvu n’uburyo kizarangira ariyo mpamvu yatangaje ko yishimiye uko ingirwamatora yagenze akaba anashimira Paul Kagama n’ishyaka RPF kuba batsinze amatora by’umwihariko ! Mpayimana akomeza avuga ko nubwo atabashije gutsinda amatora aliko ko aramutse ahawe umwanya muli gouvernement shya ntakabuza yawemera ati ikingenzi upfa kuba ari umwanya abaturage bankeneyemo ati kandi nanone bikaba bishingiye ku bushake n’ubwitonzi nagaragaje muli aya matora ! nguko nguko!

Banyarwanda banyarwandakazi, nimwiyumvire namwe ! ngiyo demokrasi abambari ba FPR-KAGAME bifuriza abanyarwanda bose . Tubiteze amaso !

Byanditswe ku ya 08/08/2017, na:
A.BEN NTUYENABO, KIGALI-RWANDA.

Amakuru ki ?

Amakuru