Archives mensuelles : avril 2017

Rwanda : Abantu barapfa umusubizo. Wa mutekano barata uri he ?

Abana batwikiwe muri ruhurura/photo bwiza.com

Ni muri iyi minsi aho ubugizi bwa nabi bumaze gukaza umurego mu kwibasira imitima y’abanyarwanda b’ingeri zose ku buryo bigaragara ko abashinzwe umutekano basigaye barananiwe gukumira mbere bene ibyo bikorwa bibi bimaze kuba akarande mu gihugu cyacu.

Banyarwanda banyarwandakazi, abaturage bakomeje kugirirwa nabi mu gihugu cyacu noneho ugasanga n’inzego zakabakemuriye ibibazo ntacyo zigikora.

Urugero nkuko nabivugaga akaba ari cases zerekeye ubugizi bwa nabi, iyicarubozo bikomeje kugaragara hirya no hino mu gihugu cyacu kandi cyitwa ngo dufite umutekano ! police na Dasso zirebera cyangwa rimwe na rimwe zikabigiramo uruhare mu kuwuhungabanya, hagira uvushwa ubuzima haba ku buryo bugaragara cyangwa hakoreshejwe andi mayeri bati turacyakora iperereza ! ryahe rirakajya ! umwana arica Se wamubyaye, umugore akica umugabo, umuturanyi akica undi bityo bityo…..kandi twarangiza ngo u Rwanda ni urwa mbere muli Afrika mu mutekano ?

Banyarwanda banyarwandakazi rero ingero ni nyinshi, bumwe mu bwicanyi buherutse bugaragaza ko mu gihugu cyacu abayobozi barimo n’abashinzwe umutekano atari uko ari ba ntibindeba ahubwo byabarenze.

Ni muli urwo rwego kuri uyu wa 27 mata 2017, umusore witwa Ndahimana Seth uri mu kigero cy’imyaka 19 yaraye ajugunywe muli rigole yapfuye hafi y’ikigo cy’urubyiruko ku Kimisagara (maison des jeunes ) mu mugi wa Kigali, urupfu rwe rukaba rutavugwaho rumwe na police y’igihugu yo yemeza ko nubwo igikora iperereza ko yaba yazize kwitura muri iyo rigole agahita apfa cyangwa ko ashobora kuba yari yanyoye ibiyobyabwenge nkuko twabitangarijwe n’umuvugizi wa police mu mu mugi wa Kigali SP Hitayezu Emmanuel.

Uwo nyakwigendera yigaga mu mwaka wa 6 w’amashuri yisumbuye akaba yari n’umukinnyi w’umupira w’amaguru (Imana imuhe iruhuko ridashira ).

Indi nkuru y’ubwicanyi irimo no kwihanira niyo mu ijoro ryo kuwa 26 mata 2017 aho umusaza witwa Jean Pierre Rutabaringoga yishe umuturanyi mugenzi we Bwana Bonaventure R. amujijije telephone ngendanwa yari yamutije ngo arayitindana, mu kuyitirura nibwo yakubiswe urushyi yitura hasi bamujyana ku kigo nderabuzima cya Mukarange akigerayo ashiramo umwuka.

Uyu mwicanyi Jean Pierre Rutabaringoga akaba yahise aburirwa irengero, aba bombi bakaba bari batuye mu Kagari ka Kayonza, umurenge wa Mukarange ho mu Karere ka Kayonza, intara y’iburasirazuba.

Umuvugizi wa police mu ntara y’iburasirazuba, bwana IP Kayigi Emmanuel kuri telefoni yatubwiyeko uyu J.Pierre yatorotse koko kuri ubu agishakishwa kugirango ashyikirizwe inzego z’ubutabera kuba yihaniye kandi amategeko ariho.

IP Kayigi yakomeje avuga ko anasaba by’umwihariko abanyarwanda cyane cyane abo mu ntara y’iburasirazuba kumva ko kwihanira atari umuco ko amategeko ntaho yagiye, ati bagerageze bace ukubiri n’ingaruka zo kwishyira mu bibazo bumve ko kwihanira atari umuti wo kubirangiza ahubwo bareke ubutabera bukore akazi kabwo.

Indi nkuru iteye agahinda nshaka gusorezaho kuko zose ntawazirondora ni iyabaye mu rukerera rwo kuri uyu wa gatanu taliki ya 28/04/2017 aho abana batatu b’inzererezi batwitswe n’abanyerondo hakoreshejwe essence, bikaba byabereye muli Ruhurura iherereye mu mugi wa Kigali rwagati ahahoze ETO-MUHIMA ku buryo babili bahise bahasiga ubuzima undi warokotse akomereka bikabije ! umuhanda wahise ufungwa muli urwo rukerera kugeza saa moya n’igice za mugitondo nibwo wongeye gufungurwa.

Umwe mu bashinzwe kurinda amwe mu mazu ari hafi aho yadutangarije yemeza ko abo bana batwitswe koko n’abanyerondo bujya gucya mu ma saa cyenda zo mu rukerera ! ati babasanze mu nzu shya irimo kubakwa babaturumburamo umwe ariruka baramufata, batangiye kumukubita yerekana na bagenzi be aho bari baryamye, ati nibwo abanyerondo bakomeje kujombajombayo inkoni umwe agize ubwoba nanone avamo avuga ko hakirimo abandi batatu ari nabo bahuriyemo n’ibyago byo guhita bamenwaho essence no guhita batangira gushya.

SP Hitayezu Emmanuel, umuvugizi wa police mu mugi wa Kigali yemeje aya makuru aliko kuri we ngo iperereza ryatangiye ati aliko ikigamijwe turashaka kumenya ababigizemo uruhare bose.

Banyarwanda banyarwandakazi, tubibutse ko uyu mutwe w’abanyerondo nawo ubusanzwe ukorana na police y’umurenge; umuntu akaba yakwibaza irindi perereza icyo rigamije kandi byarangije gushimangirwa ko byakozwe n’abanyerondo bamwe mu bagize inzego z’umutekano zikorana na police y’umurenge !

Banyarwanda banyarwandakazi, muriyumvira ko abanyarwanda banze bakaba bakabije ubugome ! biraterwa n’iki ? ni inzara se ? ni Jenoside se ? jye nsanga nta yindi mpamvu irimo gutuma abantu bihanira ni uko inzego zagombye kubarengera arizo ahanini zisigaye zihungabanya umutekano bityo iyo nta yubahirizwa ry’amategeko ririho bituma ubugizi bwa nabi bukorwa nta mupaka ari nako kwihanira biza ku mwanya wa mbere.
Murakoze.

Byanditswe kuwa 28/04/2017, na:
A.BEN NTUYENABO, KIGALI-RWANDA.

Rwanda: impanuro za prezida Kagame zisigaye zarahindutse ururondogoro

Aho ni mu nama ya 3 yateranye kuwa 22 mata 2017 ihuza abagore bibumbiye mu rugaga rw’umuryango RPF-INKOTANYI ubwo Prezida Kagame usigaye arangwa n’uburondogozi aho kuvugira mu mpanuro nk’umukuru w’igihugu; akaba yaranenze imyitwarire y’abana b’abakobwa basigaye bajya kwicuruza mu bihugu duturanye mu rwego rwo gushaka imibereho, Prezida Kagame akaba asanga bimaze kuba umuco, aribwo yabazaga abo bagore icyo bamufasha gukora ati dore ko bimaze kurenga inkombe ! ati ese tubireke tubirebere gusa twoye kugira icyo tubikoraho ? ati uwo muco waba ari uwuhe ?

Banyarwanda banyarwandakazi, Prezida Kagame arirengagiza ko no mubo yasabaga ubufasha uretse abakobwa avuga gusa ko harimo n’ababyeyi bafite ingo bagira batya bakerekeza iya Ouganda babeshye abagabo babo ko bagiye muli Business ! byahe birakajya ahubwo bagiye kwibera mu ma Lodge.

Prezida Kagame yakomeje abasaba guhagurukira byimazeyo uburere ndangagaciro bw’abana babo byarangaga umuco nyarwanda wo hambere, ati naho ubundi ntaho twaba tugana!

Prezida Kagame yibanze cyane ku muryango nyarwanda aho avuga ko nta mugore ukwiye gukubitwa n’umugabo kandi umuryango ubereyeho gukemura amakimbirane hagati ya bombi! Ati umugabo ukubita umugore we niwe wakabaye agomba gukubitwa ati kandi ndasaba inzego z’ibishinzwe kubigiramo uruhare ! nimwiyumvire namwe! Abagabo nimukenyere turagowe! Wajyaga umukoraho umuziza ko yaguciye inyuma police ikaba igutwaye kibuno mpa maguru none hiyongereyeho n’imiba y’ibiboko !

Prezida Kagame yakomoje no ku miyoborere y’abategarugori abashimira cyane intambwe bamaze kugeraho ababwira ko no mu gihe kiri imbere bitazabatangaza habonetse umugore uyoboye u Rwanda ! ati kandi si amakabyankuru kuko bizabaho mu bihe bya vuba !

Banyarwanda banyarwandakazi, none se muri abo Bakobwa na ba Nyina bataye umuco bishora muri izo ngeso mbi z’uburaya kugera aho basigaye bafata ingendo bajya kwicuruza hirya no hino mu bihugu duturanye nibo inzozi za Prezida Kagame zishingiraho zerekana ko hazavamo uyobora u Rwanda rw’ejo ? ndetse mu bihe bya vuba nkuko abyivugira ?

None se banyarwanda banyarwandakazi, niba atari za mvugo ebyiri Prezida Kagame ahorana byaba bimaze iki mu kuba yarahinduye itegeko-nshinga asaba abanyarwanda guhumiriza bongera kumuhundagazaho amajwi muli kanama 2017 ?

Banyarwanda banyarwandakazi, nkurikije aya magambo y’uyu muyobozi ntekereza ko imiyoborere ye yo gusarikwa n’inyota y’ubutegetsi yaba igeze ku ndunduro, bityo umuntu akaba atashidikanya avuze ko Prezida Kagame ariwe ugiye guheruka ingoma za Republika zaranzwe n’amahano y’ubwoko bwose mu gihugu cyacu.

Banyarwanda banyarwandakazi rero ndagirango mbibutse ko nta gukomeza kumira bunguri amadiscours y’iyi Leta ya FPR-KAGAME kuko wiringira umurozi akakumaraho urubyaro ! nawe se abavandimwe bacu bahejejwe ishyanga, byongeye ababyeyi bacu nabo, abana bacu bakomeje gupfira mu bihome hano mu Rwanda bagaburirwa intica ntikize y’ibigori gusa nkaho ari amatungo mu biraro !

Banyarwanda banyarwandakazi, ndabona buri wese ahagurukiye kugira icyo akora muli ririya kinamico ry’amatora yo muli kanama 2017, ndahamya ko umunyagitugu Prezida Kagame n’abambari be bashobora kuyabangira ingata birukanka amasigamana.

Mugire amahoro.

Byanditswe ku wa 26/04/2017, na:
A.BEN NTUYENABO, KIGALI-RWANDA.

Rwanda: Kubera umutima we unangiye, prezida Kagame yapfushije ubusa umugisha aherutse guhabwa Pope Francis

Le pape François et le président rwandais Paul Kagame, au Vatican le 20 mars 2017 photo http://fr.lalalay.com

Nibyo koko rero aho aherukiye mu ntebe ya penetensiya mu guhongerera ibyaha amaze gukorera abanyarwanda n’isi yose; Ni mu rugendo aherutse kugirira i Vatican kwa Nyirubutungane Pope Francis, aho Prezida Kagame yaba yaragabanye umugisha aliko kubera umutima we unangiye ntiyabasha kuwubyaza umusaruro muri ibi bihe Kiliziya gatolika yibukaho izuka ry’umukiza w’isi n’ijuru Yezu Kristu wemeye kuba igitambo cy’abanyabyaha b’isi yishyira mu maboko y’abishi be, aliko akerekana ko ari Imana azuka ku munsi wa 3.

Banyarwanda banyarwandakazi, Prezida Kagame nawe nsanga muri ibi bihe bya Pasika harimo n’icyunamo cy’abarokotse jenoside yakagombye guhongerera ibyaha bye nibura agirira imbabazi zimwe mu mbohe z’inzirakarengane abitse mu bihome bye bityo akaba atanze 1/3 by’icyiru cy’ibyaha bye, ariyo mpamvu atakagombye gupfusha ubusa ibi bihe kuko ari ingirakamaro kuri we, naho ubundi umutima unangiye unangukana nyirawo.

Ni kuri urwo ruzinduko rwanditsweho byinshi ku buryo bunyuranye n’ibitangazamakuru bitandukanye kugeza aho Louise Mushikiwabo, Ministri w’ububanyi n’amahanga akaba n’umuvugizi wa gouvernement y’agatsiko atangarije abanyamakuru yivuye inyuma ko yiyamye abavangira Leta bavuga ko imbabazi Nyirubutungane Pope Francis yasabiye abayoboke be ku ruhare baba baragize muli Jenoside zituzuye ataribyo; ko ahubwo Leta y’u Rwanda yishimiye urwo ruzinduko rwari rugamije kurushaho guteza imbere umubano mwiza Leta ya Vatican ifitanye n’u Rwanda.

Banyarwanda banyarwandakazi, abavangira Leta bavugwa aha hakaba harimo amashyirahamwe ya CNLG na IBUKA aho mu izina ry’abayobozi bayo aribo J.damascène Bizimana na Dr. Dusingizemungu J. pierre bafatanije na wa mwikorezi w’ibibindi wabo Bwana TOM Ndahiro bari bamaze iminsi batangaza ko izo mbabazi Nyirubutungane Pope Francis yasabiye abayoboke be bazishima aliko zituzuye ko yakagombye kugira n’icyo ashumbusha abacikacumu nko kubagenera indishyi z’akababaro n’ibindi……byongeye ngo agafata n’icyemezo cyo kwirukana abapadiri bagize uruhare muli Jenoside hanafatwa n’abakihishe hirya no hino mu maparoisses yo mu Rwanda no mu mahanga.

Banyarwanda banyarwandakazi, aba bayobozi b’aya mashyirahamwe uretse kuba ari ibisahiranda bakunze kwirengagiza ko Kiliziya gatolika mbere ya Jenoside yari igizwe n’abanyarwanda b’ingeri zose nk’andi madini yose yariho mu Rwanda kandi bigaragara ko ubutabera bwa nyuma y’intambara haba ubwo mu gihugu imbere cyangwa ubw’urukiko mpuzamahanga (TPIR) butatoranije ku bahamwaga n’ibyaha bose harimo n’abihayimana b’aba catholiques kuri ubu hakaba hari n’abari kurangiza igifungo bari barakatiwe nk’abandi banyarwanda bose.

Tuboneyeho no kwibutsa Ministri Mushikiwabo ko mu gihe cyose Leta avugira ikigendera ku kinyoma nta kizere izigera igirirwa ! uwo mubano mwiza avuga hagati y’u Rwanda na Vatican ugaragalira he ? bizatwibagiza abihayimana bacu Leta uvugira yahotoreye i Gakurazo se? ntawe uwushira amakenga ! kuko nta munyarwanda ugikeneye kumva akarimi keza gusa ! abanyarwanda dukeneye cyane cyane ubutabera n’ubwuzuzanye nyakuri kandi byange bikunde amaherezo ni munzu. Murakoze.

Byanditswe kuwa 17/04/2017, na:

A.BEN NTUYENABO, KIGALI-RWANDA.

Rwanda : Mu muhango wo gusoza icyunamo, umwe mu rubyiruko yabajije niba indege ya Habyarimana yahanuwe atariyo « Nyirabayazana » ?

Ni muli ibyo biganiro bikomeje kubera hirya no hino mu Rwanda, kuri uyu wa 13/04/2017 hakaba hashojwe icyumweru cyahariwe kwibuka ku nshuro ya 23 Jenoside yakorewe abatutsi muli 1994 by’umwihariko hibukwa abanyepolitiki bishwe bazira ibitekerezo n’ubutwari bwabo bwo kurwanya ingoma y’igitugu nkuko byagiye bigarukwaho na bamwe mu bayobozi b’agatsiko mu nsanganyamatsiko yahawe urwibutso rwa Rebero aho bashyinguye igira iti:’’ Twibuke Jenoside yakorewe abatutsi, Duharanire Imiyoborere myiza’’.

Tubibutse ko iki cyunamo uretse umwihariko wa gouvernement w’iminsi irindwi yashojwe ku mugaragaro, icyunamo kigomba gukomeza kugera ku minsi ijana.

Ni muli uwo muhango rero wabereye ku rwibutso rwa Rebero aho umushyitsi mukuru yari prezida wa Senat hon. Bernard MAKUZA na bamwe mu bayobozi b’agatsiko barimo n’abahagaraliye imitwe ya politiki 12 yibumbiye muli forum mu kwaha kwa FPR, dore ko Prezida Kagame atajya aboneka muri uwo muhango wo kwibuka abanyepolitiki kubera abahutu nabo bahashyinguye bazize ibitekerezo byabo mu gihe cya Jenoside (byakunzwe kuvugwa ko atazigera yunamira umuhutu uwariwe wese ! azagire amahirwe atazamera nka nyakwigendera col. Kanyarengwe wari waravuze ko azongera kumvikana n’umututsi ari uko umusatsi we wongeye kumera uko byamugendekeye bibara uwariraye ! ).

Hon. Bernard Makuza akaba yakomeje avuga ko icyateje Jenoside yateye aya mahano bibukiraho abasaga ibihumbi cumi na bine bashyinguye i Rebero harimo n’abanyepolitiki ari ingaruka z’umwiryane n’amacakubiri yatangiye mu gihe cy’ubukoloni noneho agashimangirwa n’ubutegetsi bw’abanyapolitiki babi bo muli republika ya mbere n’iya kabili ati bityo Jenoside ikagenda ishakirwa ibyangombwa byose ari nako igeragezwa kugera ku mugambi wari waragenwe nk’imperuka wo gutsemba abatutsi.

Banyarwanda banyarwandakazi, muriyumvira ! ugereranije aya magambo y’uyu munyapolitiki ntabwo washidikanya ko nawe atari mu bacuze umugambi wa Jenoside bitewe nuko yemeza ko wacuzwe igihe kirekire kandi Papa we umubyara Nyakwigendera umusaza Anastase MAKUZA yari umwe mubari bafite ideology yo kubohora rubanda nyamwishi muli za 1960 byongeye kandi uyu muhungu we uretse no kuba aho ageze yarabikesheje izo republika haba kwiga Kaminuza cyangwa kugabirwa imirimo myiza nta kuntu yaba atarakuranye n’iyo ngengabitekerezo nk’umurage yasigiwe na Se. Gusa ntibitangaje kuri uyu Bernard Makuza kuko atari we wenyine mu banyarwanda bataye umurongo w’abakurambere babo kubera indamu z’umuhemu Paul Kagame ingero ni nyinshi…..hari ba Rucagu, Dr Iyamuremye (umukwe wa Prezida Sindikubwabo n’abandi….

Ubwo hakaba hari n’umutangabuhamya wahoze ari EX-FAR caporal SIBOMANA Tadeyo watanze ubuhamya bw’ukuntu umugambi wa Jenoside wacurwaga n’abasirikare bakuru ba EX-FAR aliko anishinganisha ku bayobozi bari aho ko kubera ubuhamya yaba yaratanze abuha APR-INKOTANYI zimaze gufata ubutegetsi 1994 mu gihe yakoraga liste y’aba offociers bakuru ba EX-FAR bateguye Jenoside akayibashyikiriza none ubu mubo yatanze 28 bose hasigaye babili batarafatwa gusa kuko abandi bashyikirijwe inkiko barafungwa abandi barapfuye barimo nka col.NSABIMANA Alias castar, Sagatwa Elie, Dr. Akingeneye baguye mu ndege n’abandi… ! ati aliko muri iyi minsi natelefonywe n’abantu batandukanye umwe wo Budage undi muli Aziya bantera ubwoba bambwira ko nzagerwaho n’ingaruka zikomeye ! ati aliko kugeza ubu sinzi abaribo none nkaba mfite impungenge z’umutekano wanjye ?

Bwana Hon. Makuza yakomeje amuhumuriza avuga ko ntacyo azaba ko ntawe uzamukoraho ! akomeza anasaba abanyarwanda gushyira hamwe muri rusange mu kurwanya abapfobya Jenoside yakorewe abatutsi bakabikora bashikamye kandi ko nahandi yaba bazatabara.

Banyarwanda banyarwandakazi, mbere yuko hasozwa iki cyumweru, hari kimwe mu biganiro nanone nashoboye gukurikirana ku wa 10/04/2017 ahaherereye mu kagari ka Karuruma, umudugudu wa Busasamana mu Karere ka Gasabo aho nasanze bamwe mu rubyiruko rubarirwa ku mashyi rwari rwagerageje kwitabira ibyo biganiro rugaragaza ko rutewe impungenge nuko rutabwizwa ukuri kuri Jenoside yabaye mu Rwanda! aha urubyiruko rukaba rukomeje kwibaza impamvu itomoye abanyarwanda basubiranyemo bakamarana bene kariya kageni ! bati ko ntakaburimvano byatewe n’iki cyangwa na nde ? nko kuvuga ko nta bisobanuro bifatika bahabwa dore ko abenshi bari bataravuka abandi bakiri impinja !

Umwana w’umukobwa witwa Mukanyarwaya Spéciose yateye urutoki abaza ati: ‘’Jyewe Jenoside yabaye mfite imyaka itatu y’amavuko kandi nibaza neza ko ubwicanyi bwakurikiyeho aribwo Jenoside bwatewe n’ihanurwa ry’indege y’uwari Prezida Habyarimana nabo bari kumwe, none dushyize mu kuri ntiyaba ariyo mpamvu yaba yarakomye imbarutso mu gushyira mu bikorwa umugambi w’abahigaga abatutsi ?

Mu gusubiza icyo kibazo, uwari uyoboye ibyo biganiro yatanze igisobanuro jye nakwita ko ntaho gitaniye na propaganda! yagize ati: Ihanurwa ry’indege yari iya Prezida Habyarimana siyo yateje Jenoside kuko na mbere hose yari yarateguwe ndetse igashyirwa no mu bikorwa rimwe na rimwe , ati muribuka abatutsi b’abagogwe urwo bapfuye, Ngororero, i Bugesera n’ahandi……, Muli 1994 rero bwo kwari ugutsembatsemba abatutsi basigaye kuko bitwaga inyenzi bose ari nako gushyira mu bikorwa Jenoside ya Karundura ! Ati byagaragaye ko rero hari n’abanyepolitiki bo mu kazu bari barambiwe kwihanganira Prezida Habyarimana kubera idindira ry’umugambi wabo wo kurimbura abatutsi burundu bigakubitana ko nawe atari yorohewe n’imishyikirano ya Arusha ari nako yotswa igitutu n’abazungu bigatuma mubyo yagombaga gusinya hari ibyo abanza kwanga nibyo yemeye gusinya yagaruka i Kigali ntibishyirwe mu bikorwa ! ati ibyo byose byatumye ba bahezanguni bo mu kazu ke babona icyuho cyo kumuvana mu nzira ari ko gufata icyemezo cyo guhanura indege yari imutwaye no guhita bashyira mu bikorwa umugambi wabo wa rurangiza wo gutsemba abatutsi.

Banyarwanda banyarwandakazi, ngirango muriyumvira ! murabona ikinyoma cya Leta y’agatsiko kizarangira ryari ? aliko iminsi y’umujura ntirenga 40.

Ku rundi ruhande rw’ababyeyi mu miryango nabo , iyo abana babajije icyo aricyo Jenoside yakorewe abatutsi nabo usanga bafite impungenge mu gusobanulira abana babo ukuri nyako bitewe no kudatinyuka gutobora ngo bavuge ku mbarutso ya Jenoside ishobora kuba yaratewe n’ihanurwa ry’indege y’uwari Prezida Habyarimana nkuko inkuru isigaye yarabaye kimomo ! kandi byumvikana ko ugerageje kubikomozaho wese ajyanwa amaguru adakora hasi bamubaraho icyaha cy’ingengabitekerezo bityo urubyiruko rukiri rutoya ugasanga rubana na confusion ruterwa n’imyumvire y’izo mpande zombi haba kuri Leta y’ikinyoma cyangwa ababyeyi babo batinya kuzira icyaha cy’ingengabitekerezo.

Banyarwanda banyarwandakazi rero, umuti uzaba uwuhe mu gihe Leta y’agatsiko ka FPR ikomeje kuba nyirabayazana mu kugoreka amateka y’igihugu cyacu ku nyungu zayo, itabwiza ukuri urubyiruko rwacu, abana bacu impamvu nyayo y’imbarutso ya Jenoside yakorewe abatutsi ? kandi nkuko tubikesha ikigo k’igihugu gishinzwe indangamuntu (NIDA) kiratugaragariza ko bene urwo rubyiruko navugaga haruguru ari urufite hagati ya 0-23 ans rwavutse muli 1994 rukaba rugera kuri Miliyoni eshanu n’ibihumbi magana atanu (5.500.000 ) bose hamwe.

Icyo kigo NIDA kandi kikaba cyemeza ko mulirwo abana bagera ku bihumbi Magana abili mirongo icyenda n’abitanu na Magana arindwi n’umunani (295.708 ) aribo bavutse mu gihe Jenoside yarimo ikorwa muli 1994. Bityo rero Leta y’agatsiko ikaba ifite impungenge z’uko mu gihe igenda ivamo itazabona uwo isigira umurage wo gukomeza ikinyoma n’amacakubiri byayo.

Rubyiruko rwacu, bana bacu ni mwe Rwanda rw’ejo, nimwe mizero y’igihugu cyacu, ndabamenyesha ko iyo ugize amahirwe yo kwicara ku ntebe ya Kaminuza niyo waba uri umuswa utabura icyo uyivanaho , bityo rero mugerageze gushishoza, mukomere k’ukuri kwuzima kwanyu, have self confidence ! kugirango mutazagwa mu ruzi murwita ikiziba !

Mugire amahoro y’Imana.

Byanditswe kuwa 13/04/2017, na:
A.BEN NTUYENABO, KIGALI-RWANDA.

Rwanda: Ubutumwa bwa FPR-Inkotanyi mw’itangizwa ry’icyunamo mu midugudu yose yo mu Rwanda

Ni kuri uyu wa 7 mata 2017 aho mu midugudu yose yo mu Rwanda habereye ibiganiro byo kwibuka ku nshuro ya 23 Jenoside yakorewe abatutsi; mu rwego rwo gutangiza icyo cyunamo rero nkuko bisanzwe bigenda imirimo yose yari yahagaze kuva ku gicamunsi kugeza mu ma saha yo ku mugoroba yewe na ma banks amwe namwe nka Banque populaire yarafunze umunsi wose.

Insanganyamatsiko y’icyunamo ku nshuro ya 23 ikaba igira iti:’’ Kwibuka inshuro ya 23 turwanya ingengabitekerezo ya Jenoside dushyigikira ibyo twagezeho’’.

Muri ibyo biganiro ahenshi bititabiriwe na benshi wasangaga nta rubyiruko na mba rwabarangwagamo ku buryo intumwa za FPR-INKOTANYI zari zatoranijwe mu gutanga icyo kiganiro nyamukuru cya mbere mu kwibuka ku nshuro ya 23 zagiye zibigarukaho mu gusoza zinenga iyo myifatire y’urubyiruko kutitabira kandi ngo arirwo rukenewe mu kumenya ayo mateka dore ko ngo abenshi muribo bari bakiri bato cyangwa bataravuka mu gihe cya Jenoside.

Mu Midugudu yo mu Mirenge igera kuri itatu JABANA, GATSATA na KINYINYA yo muli District Gasabo ho mu mugi wa KIGALI nagerageje kugeramo, ibyo biganiro byibandaga cyane no kwongera kwikoma ubwoko bw’abahutu muri rusange ko babifashijwemo n’umwaduko w’abazungu n’abihayimana barimo les pères blancs b’abacatholiques ko aribo bazanye amacakubiri mu banyarwanda bavuga ko ubwoko bw’abatutsi ari inzoka, ibisebe by’imifunzo n’ibindi……ko nta mututsi ukwiye gukomeza kubana n’umuhutu kubera ubwikanyize bwabo.

J.Bosco umwe mubatangaga ibiganiro mu mudugudu wa Jabana ho mu murenge wa Jabana avuga ko ibyo byose byatangiye gufata intera cyane aho ingoma ya cyami isezerewe na Parmehutu na Aprosoma kuva 1959, 1963, 1972 hicwa abatutsi hirya no hino mu gihugu, mu Bugesera, Bweyeye n’ahandi hose byitwa ngo inyenzi zateye igihugu. Ati ubwo byarakomeje muli republika ya mbere n’iya kabili biromberejwe imbere na ba prezida Kayibanda na Habyarimana bigera aho bishyika kuri Jenoside bari baragambiriye kuva icyo gihe cyose, barafashe stratégie ko kuba ari Majority ibintu byose ari ibyabo aho batakwimitse ubunyarwanda nkuko FPR-INKOTANYI yabigenje aho imaze kubohoreza u Rwanda yaciye amacakubiri n’akarengane!

Muri ibyo biganiro hagiye hagarukwa ku magambo ya Dr. Léon MUGESERA ufungiye muli Gereza ya Kigali ko ari umwe mu Bahutu b’intagondwa wakunze kubiba amacakubiri avuga ko abatutsi yitaga les envahisseurs bagomba gucishwa iyubusamo muri Nyabarongo bagasubizwa muli Ethiopie mu bafarasha aho bakomoka.

Uretse ibyabereye mu midugudu, ni kuri uwo mugoroba nanone mu muhango wo gucana urumuli rw’ikizere mu Rwibutso rwa Gisozi ahari hateraniye imbaga igizwe n’abayobozi banyuranye bo mu gihugu; amaze gucana urumuli rw’ikizere, Prezida Kagame na Mme we hamwe n’intumwa y’umuryango w’afrika yunze ubumwe dore ko ari nayo mushyitsi mukuru wenyine wagaragaye muri uwo muhango; Prezida Kagame mu ijambo rigufi yavuze ko yihanganisha abarokotse Jenoside yakorewe abatutsi ati nubwo batakaje imiryango yabo aliko batatakaje igihugu kandi ko batari bonyine akomeza avuga ko ibyo byose byatewe n’abanyapolitiki babi.

Bwana DUSINGIZEMUNGU J.Pierre, Prezida wa Ibuka we yavuze ko bashimira Prezida wa Republika n’ingabo zari iza Fpr-inkotanyi uburyo zahagaritsemo Jenoside igihugu kikaba cyarongeye kwiyubaka bundi bushya, ati aliko haracyari ingengabitekerezo ya Jenoside ikomeje kurangwa mu gihugu! Ati mwabonye cyangwa mwumvise mu cyumweru kimwe gishize ahatemwe inka eshatu zose z’abarokotse Jenoside! abandi nabo bagafata amagufwa y’imbwa bagashyira mu mifuka bakayajugunya mu nzibutso! (byabaye I Tumba muli Huye).

Bwana Dusingizemungu yakomeje avuga ko bashimira Nyirubutungane Pope Francis kuba yarasabiye abayoboke be imbabazi ku ruhare baba baragize muli Jenoside yakorewe abatutsi mu Rwanda ati aliko icyo twifuza ni uko mu bihugu byose ku isi hashyirwaho amategeko arwanya ingengabitekerezo ya Jenoside mu rwego rwo guhangana nayo.

Banyarwanda banyarwandakazi, muriyumvira ko ari ibiganiro nyamukuru ku rwego rw’imidugudu ari amagambo y’abayobozi ntagushidikanya ko aribyo ngengabitekerezo igamije guheza abatavugarumwe na Leta y’agatsiko n’abanyarwanda b’abanyantegenke, kuko bikomeje bitya sinzi aho igihugu cyaba cyerekeza? nawe se aho kuba ibi biganiro byaba umusingi w’ubumwe n’ubwiyunge ahubwo niyo macakubiri ! none se abahutu n’abatutsi baziyunga bate wowe utanga ikiganiro uvuga ko umwanzi w’umututsi yabaye umuhutu kuva ku mwaduko w’abazungu kugera kuri Jenoside? wowe se uri miseke igoroye?

Banyarwanda banyarwandakazi, ibikorwa bibi birigaragaza ndasanga igihugu cyacu ubumwe n’ubwiyunge bikiri kure igihe cyose Leta ya FPR-INKOTANYI ikiyobora u Rwanda.Abarokotse twese nidukomeze twihangane aliko twime amatwi abaduhuhura batuliraho ngo barimo baratuvugira kandi ari ibirura.
Murakoze.

Byanditswe kuwa 08/04/2017, na:
A.BEN NTUYENABO, KIGALI-RWANDA.

Rwanda: Komisiyo y’igihugu y’amatora (NEC) mw’ ikinamico ry’amatora ya prezida wa republika – 8/2017

Ni mu na

Kagame-at-Umuganda-with-residents-of-Nduba-in-Gasabo-District-Kigali-26-November-2011

ma ngaruka-kwezi yo ku wa 30/03/2017 ya bamwe mu bayobozi b’imitwe ya politiki bibumbiye mu cyo bise forum des partis politiques y compris le FPR aho Bwana Kalisa MBANDA, Prezida wa komisiyo y’igihugu y’amatora yatanze ikiganiro ku mushinga w’amabwiriza ya komisiyo y’igihugu y’amatora agenga itora rya prezida wa republika muli 2017.

Bwana Kalisa MBANDA akaba yarashishikarizaga abo bayobozi gukurikirana ibijyanye n’amatora ya prezida wa republika abasaba kugeza kubo bayobora amabwiriza n’ibisobanuro bishoboka byose kugirango igikorwa cy’amatora ya prezida Kagame azarusheho kugenda neza mu 2017. Yakomeje avuga ko nk’abafatanyabikorwa b’imena basabwe gufasha nkuko babisanganywe.

Muri icyo kiganiro kandi Bwana MBANDA yagarutse no ku bwitabire buteye isoni ku rubyiruko mu gihe cy’amatora aho yagize ati : urubyiruko rwaratunaniye aho ujya kubona igihe cy’amatora batonda umurongo inyuma y’umudozi w’inkweto kuko azibadodera cyangwa inyuma y’umutetsi w’ibiryo byabo akaba aribo bahundagazaho amajwi ! ati birababaje ! Bwana Mbanda yeruriye abari muli iyo nama ko urubyiruko rw’u Rwanda rw’iki gihe ariko rumeze ati ntiwamenya imirerere yarwo ati byongeye kandi ni uko nururangije kaminuza ari uko ! yakomeje asaba abafatanyabikorwa b’amashyaka mu gukomeza kubafasha gushishikariza urubyiruko ibyiza by’amatora ya prezida wa republika bagiye kwinjiramo.

Bwana MBANDA yakomeje abagezaho bimwe muri ibi bikurikira bikubiye mu mushinga w’amabwiriza agenga itora rya prezida wa republika by’umwihariko:

1.GUSINYISHA ABASHYIGIKIYE UMUKANDIDA.

-Gusinyisha abashyigikiye umukandida wigenga bitangira iminsi cumi n’itanu (15) mbere y’umunsi wo gutangira kwakira candidature.

-Umukandida wigenga asinyishiriza abamushyigikiye ahantu hatarenze hamwe mu Karere yamenyesheje ubuyobozi bw’akarere mu nyandiko, akagenera copie Umuhuzabikorwa w’amatora ku rwego rwa Zone y’amatora Akarere gaherereyemo, byongeye kandi format y’urupapuro asinyishirizaho abamushyigikiye ayihabwa na Komisiyo y’igihugu y’amatora iriho na cachet yayo. Ikindi ni uko urutonde rw’abamufasha muri icyo gikorwa rushyikirizwa Komisiyo y’igihugu y’amatora ku rwego rw’igihugu mu minsi cumi n’itanu (15) mbere yo gutangira gusinyisha abamushyigikiye.

2. AHAMANIKWA IBYAMAMAZA ABAKANDIDA.

-Birabujijwe kumanika ibyamamaza umukandida mu isoko, ku mavuriro, ku mashuri, ku nsengero, ku nkingi z’amashanyarazi n’aho abagenzi bategera imodoka, gusa bishobora kumanikwa ku nyubako no ku binyabiziga igihe umukandida abyumvikanyeho na ba nyirabyo.

3. KWIYAMAMAZA HAKORESHEJWE IKORANABUHANGA.

– Birabujijwe gukoresha imbuga nkoranyambaga za Leta n’iz’ibindi bigo bigamije inyungu rusange mu gikorwa cyo kwiyamamaza, izemewe n’amategeko mu gikorwa cyo kwiyamamaza hubahirizwa amategeko ya Komisiyo y’igihugu y’amatora akaba harimo Facebook, Twitter, Website, WhatsApp, na SMS.

-Umutwe wa politiki cyangwa umukandida wifuza kwiyamamaza akoresheje ikoranabuhanga abimenyesha mu nyandiko Komisiyo y’igihugu y’amatora hasigaye nibura amasaha mirongo ine n’umunani (48) ngo atangire kwiyamamaza kandi akanagaragaza mu nyandiko uburyo bw’ikoranabuhanga azakoresha. Mu gihe umwe muri aba hari abo ateganya bazamwamamaza, agomba gushyikiriza Komisiyo y’igihugu y’amatora urutonde ruriho amazina, numero ya phone, numero ya carte d’identité rw’abo yifuza ko bamwamamaza hakoreshejwe ikoranabuhanga, n’aho bakirira cyangwa boherereza ubutumwa bwabo (email address).

-Umukandida wese wifuza kwiyamamaza akoresheje ikoranabuhanga ashyikiriza mu nyandiko Komisiyo y’igihugu y’amatora ubutumwa bwose, amafoto n’ibindi byose ateganya kuzifashisha mu gikorwa cyo kwiyamamaza hasigaye nibura amasaha mirongo ine n’umunani (48) ngo atangire kwiyamamaza kugirango Komisiyo ikore isuzuma mu kwemeza cyangwa igasaba ko bihinduka.

Igihe cyose bibaye ngombwa Komisiyo y’igihugu y’amatora ishobora kwiyambaza izindi nzego zibifite mu nshingano zazo kugirango ishobore gukurikirana imigendekere y’igikorwa cyo kwiyamamaza hakoreshejwe ikoranabuhanga, ni muli urwo rwego umukandida wese cyangwa abamwamamaza baryozwa ibyaha bakoze mu gikorwa cyo kwiyamamaza no kwamamaza hakoreshejwe ikoranabuhanga, nko gukoresha by’umwihariko amazina y’undi muntu igihe hoherezwa ubutumwa hagamijwe kwiyoberanya.

4. GUHAGARIKA IBIKORWA BYO KWIYAMAMAZA.

-Hakoreshejwe uburyo ubwo aribwo bwose, ibikorwa byo kwiyamamaza bigomba guhagarikwa hasigaye amasaha 24 mbere y’umunsi w’itora kandi ibyamamaza bikaba byakuwe aho byamanitswe kumunsi ubanziriza itora, byongeye kandi nta nuwemerewe kwambara imyenda cyangwa ibindi byose byamamaza kuri uwo munsi no ku munsi w’itora.

5. GUHAGARARIRWA K’UMUKANDIDA.

-Urutonde rw’abazahagaralira abakandida rushyikirizwa ishami rya Komosiyo y’igihugu y’amatora mu Karere hasigaye nibura amasaha mirongo irindwi n’abiri (72) mbere y’umunsi w’itora.

Banyarwanda banyarwandakazi ngayo amwe mu mabwiriza agomba gukurikizwa mu gihe cy’amatora y’umukuru w’igihugu 2017, mwiyumviye ko hari n’ibihano bishobora kuba biteganijwe ku munyarwanda uziyamamaza cyangwa uzamamaza binyuranije nayo. Ikindi ni uko mu gusoza iki kiganiro Bwana Mbanda yamenyesheje ko batekereje no ku banyarwanda bafite ubumuga bwo kutabona aliko bazi gukoresha inyandiko ya ‘’ Braille ‘’ ko bazayifashisha mu gutora.

Iyi nama rusange ya bamwe mu bayobozi bahagaraliye imitwe ya politiki n’abadepite yarimo na Bwana NSENGIYUMVA Fulgence(hutu de service) akaba na Sekereteri wa Leta ushinzwe agriculture wari waje gutanga ikiganiro kijyanye nuko umusaruro w’ubuhinzi wifashe muli iki gihe. Ikaba yarashojwe n’umuhango wo gushyiraho abagize bureau shya y’ihuliro ry’amashyaka yemewe na FPR igizwe na Hon. Deputé MUKAKARANGWA Clotilde ukomoka mu ishyaka PDC (nk’umuvugizi w’ihuliro) na Mme NDANGIZA Madina ukomoka mu ishyaka PDI ( nk’umuvugizi wungirije w’ihuliro).

Murakoze.

Byanditswe ku wa 07/04/2017, na :

A.BEN NTUYENABO, KIGALI-RWANDA.

Amakuru ki ?

Amakuru