Archives mensuelles : février 2017

Ubushinjacyaha byabugoye gusobanura icyaha burega Mlle Gasengayire Leonile

Léonille Gasengayire, Trésorière-adjointe du parti FDU-Inkingi

Léonille Gasengayire, Trésorière-adjointe du parti FDU-Inkingi

Uyu munsi tariki ya 23 Gashyantare 2017 nibwo urubanza mu mizi ubushinjacyaha bwa leta y’uRwanda buregamo umubitsi wungirije w’ishyaka FDU Inkingi Mlle Gasengayire Leonile rwaburanishijwe mu mizi n’urukiko rukuru rwa Karongi urugereko rwa Rusizi.

Ubushinjacyaha bukaba bushinja Mlle Gasengayire icyaha cyo guteza imvururu cyangwa imidugararo muri rubanda no kurwangisha ubuyobozi buriho giteganywa kandi gihanwa n’ingingo ya 463 yo mu gitabo cy’amategeko ahana cy’uRwanda.

Ubushinjacyaha bw’uRwanda bukaba bushinja Leonile icyi cyaha buvuga ko ngo yaba yarakanguriye abaturage bo mu kagali ka Bunyunju umurenge wa Kivumu akarere ka Rutsiro ngo gukomeza kwihingira mu masambu yabo ahateganyijwe kuzubakwa umudugudu w’icyitegererezo.

Leonile akaba yaburanye ahakana icyaha aregwa akavuga ko yagiye iwabo agiye kwisurira umuryango we dore ko aribwo yari agiye mu kiruhuko kuko asanzwe ari umunyeshuri muri kaminuza ko atari ajyanweyo no kugumura rubanda nkuko ubushinjacyaha bubivuga.

Ubushicyaha buvuga ko aho hantu ubuyobozi bw’akarere ka Rutsiro bwari bufite gahunda yo kubakamo umudugudu w’icyitegererezo ndetse bukaba bwari bwaramaze gutanga itegeko ko nta muturage wemerewe kongera guhingamo. Ubushinjacyaha kandi bwemerako nubwo iyi gahunda yari ihari nta kintu na kimwe ubuyobozi bw’akarere bwari bwaratangiye gukora kijyanye n’ibiteganwa n’itegeko ryo kwimura abantu dore ko Gasengayire afatwa nta gikorwa na kimwe cyari cyagakozwe haba kubara imitungo y’abaturage cyangwa se kubaha ingurane ikwiye. Ibi nibyo byatumye mu kwisobanura Mlle Gasengayire n’umwunganira mu mategeko Me Mukamusoni Antoinette berekanye ko Gasengayire akurikiranwe ku bintu bitagize icyaha kuko akarere ka Rutsiro kadafite uburebganzira bwo kubuza umuturage gukomeza gukora imirimo ye isanzwe mu isambu ye kandi kataramuha ibiteganywa n’amategeko nkuko bisobanurwa neza mu itegeko ryo kwimura abantu mu byabo ku bw’inyungu rusange. Ibi bikaba binashimangirwa n’ibivugwa muri iri tegeko ko na nyuma yo kubarura no kubara umutungo w’uzimuka ku bw’inyungu rusange itegeko ryemeza ko nyuma y’iminsi 120 umuturage abariwe iyo atishyuwe ayo masezerano aba ataye agaciro umuturage agasubirana umutungo we kuburyo iyo hatekerejwe gukomeza kumwimura bisaba ko yongera kubarirwa cyangwa agahabwa amafaranga yinyongera. Nyamara kuri iki kibazo cyafungishije Leonile ho bikaba ari agahomamunwa kuko usibye no kwishyura nta nuwari wabaze imitungo yabo.

Kuba kandi umutungo w’umuntu ari ntavogerwa ndetse bikaba binanditse no mu itegekonshinga ry’uRwanda ibi binashimangira ko nta tegeko umuturage yaba yishe mu gihe ari guhinga isambu ye kandi nta tegeko na rimwe yishe muyo igihugu kigenderaho. Kuba akarere karategetse ko abaturage batahinga amasambu yabo kirengagije ibiteganywa n’itegeko ahubwo bikaba byagakwiye gufatwa nko guhohotera abaturage ahubwo akarere akaba ariko kagakwiye kubazwa ibyo kwangisha abaturage ubuyobozi kuko kakoze ibinyuranyije nicyo itegeko ryemerera umuturage. Ikindi cyagarutsweho ni uko mu byukuri niyo usonye inyandiko mvugo z’abashinja Leomile bamwe usanga bemeza ko nubundi bari basanzwe bahinga ko ndetse nubu abatagira ubwoba ko bafungwa nubu bagihinga, hakibazwa uburyo Leonile yashinjwa gushishikariza abaturage guhinga kandi nubundi bahingaga?

Impungenge z’icyi cyaha zanatumye umucamanza abaza ubushinjacyaha ati « nonese Leonile afatwa agafungwa n’iki cyari cyakozwe kijyanye n’ibisabwa mu kwimura abantu? Akarere se kari karabaze imitungo y’abaturage?Kari se karabahaye ingurane? Aha ubushinjacyaha bwavuze ko imitungo yabo yari itarabarwa ndetse n’ingurane zari zitaratagwa ariko akarere kari karabujije abaturage guhinga kugirango ibizishyurwa bizabe bike.

Muri uru rubanza kandi humviswe abatangabuhamya bashinjura uregwa nkuko byari byasabwe ubushize ubwo uru rubanza rwasubikwaga ngo batumizwe n’urukiko kuko haba mu bugenzacyaha haba no mu bushinjacyaha iyi ngingo yo kumva abavuga ko Leonile arengana yari yabangamiwe bidasubirwaho. Aba batangabuhamya bakaba bose uko ari batanu bemeje ko nta numwe wigeze yumva cyangwa abona Leonile akangurira abaturage kwigomeka kuri iyi gahunda yo kubaka umudugudu kuburyo ndetse no mu nama yahamagawe shishi itabona tariki ya 24 Kanama 2016 itumijwe n’umurenge ufatanyije n’ingabo z’igihugu na polisi abaturage babwiwe ko abafite icyo bashinja Leonile bahaguruka mu nama bakamushinja ariko hakabura numwe umushinja aribwo nyuma bagiye batumiza umwe umwe ku murenge bakabazwa kuburyo mu babajijwe harimo umwe wanabwiye urukiko ko we yanabujijwe uburenganzira bwo gusoma ibyanditse n’uwamubazaga akamutegeka gusinya cyangwa ngo yakwanga agakoresha igiti bityo ngo agahitamo gusinya aho gukubitwa nkuko yari amaze kubisezeranywa.Uyu wavuze ko yahatiwe gusinya atabanje gusoma ibyanditswe akaba anemeza ko kuba yarangiwe gusoma bisobanuye ko uwamubujije yari yanditse ibyo atavuze bityo akanga ko abisomye yasaba ko ibyo atavuze bikurwamo.

Ibi kandi byuko hari habuze abashinja Leonile ku mugaragaro nkuko byari byasabwe mu nama nibyo Leonile n’umwunganizi mu mategeko we bambwiye umucamanza ko abatangabuhamya bose bamushinja ngo kuba yarababwiye ngo nibihingire niba batarahabwa ingurane ni abantu bo mu muryango umwe nubundi basanganwe amakimbirane kuburyo bagiranye n’imanza aho uyu muryango umushinja washakaga gufungisha abo mu muryango wa Leonile kuburyo hari n’uwahimbiwe dosiye yo gufata ku ngufu ariko urukiko rukamurenganura rukamugira umwere kuko rwari rwasanze ibyo bintu ari ibicurano. Ibi rero ngo bikaba bikwiye kwitonderwa kuko iyo ubisesenguye neza usanga ahubwo ubushinjacyaha n’ubugenzacyaha nyuma yo kubona ko abaturage muri rusange batashinje Leonile nkuko bari babisabwe mu nama ngo bwahisemo gukoresha abasanzwe bafitanye urwango n’umuryango wa Leonile maze nabo babisamira hejuru nk’uhuryo babonye bwo kumugerekaho inkono ishyushye mu buryo bworoshye.

Me .Antoinette yifashishije amatangazo y’ishyaka FDU Inkingi ndetse n’ibaruwa yandikiwe polisi isaba gufashwa gushakisha irengero rya Leonile akaba yanavuze ko uku gushaka gufungisha Leonile byanareberwa ku ku gisa n’itotezwa ryagiye rikorerwa Leonile rishobora kuba rishingiye ku bitekerezo bye bya politiki ndetse n’ishyaka abamo rya FDU Inkingi aha akaba yanibukije iby’ishimutwa ryigeze kumukorerwa ubwo yari agemuriye Ingabire Victoire agatwarwa n’abantu batamenyekanye umwirondoro wabo bamukuye mu mbago za gereza nkuru ya Kigali(1930) nyuma akaza kurekurwa kuburyo urukiko rukwiye kureba niba aba bantu bagendagenda aho Leonile akandagije ikirenge atari nabo baba bari inyuma y’iki gikorwa cyo kumukurikira naho yagiye kwisurira ababyeyi hanyuma byahurirana nuko aho atuye hari imwuka mubi wo kuvogera uburenganzira ku mitungo y’abaturage bikaba umwanya mwiza wo kuvuga ko yagumuye rubanda? Aha akaba yasabye urukiko mu bushishozi bwarwo naho kuhasuzuma.

Nyuma yo kwiregura ubushinjacyaha bwahawe ijambo ngo busabire uwo burega ibihano maze busaba ko Leonile yazakatirwa gufungwa imyaka 15.

Leonile we n’umwunganizi we babwira urukiko ko rwamurenganura rukamugira umwere kuko nta cyaha yigeze akora maze rugategeka ko afungurwa.

Nyuma yo kumva ibyavuzwe n’impande zombi urukiko narwo rwavuze ko uru rubanza ruzasomwa tariki ya 23 Werurwe 2017 saa cyenda z’amanywa.

Boniface Twagirimana,
Kigali-Rwanda

 

Rwanda: Prezida Kagame yapfunyikiye amazi abaturage b’akarere ka Nyagatare

photo Izuba rirashe.rw

photo Izuba rirashe.rw

Ni kuri uyu wa mbere taliki ya 13/02/2017 ubwo prezida Kagame yasuraga abaturage barimo n’abayobozi batandukanye mu karere ka Nyagatare, intara y’iburasirazuba, aho prezida Kagame yakirijwe ibibazo by’uruhuri byazonze abaturage kubera ubuyobozi bubi yabahaye. Mu nduru z’abaturage bitotomberaga abayobozi babo kuba batarashoboye gukemura ibibazo byabo bivugira ko wari umunsi wo kugeza kuli prezida Kagame ibibazo byabo imbonankubone akarengane bagiriwe aliko siko byabagendekeye!

Ubwo yaramaze kubagezaho ijambo rye ahanini ryabaye nk’indirimbo ’’umutekano, umutekano ku ngufu’’  abo baturage bifuzaga kubaza umwe ku giti cye batiriwe babanza kujonjorwa n’izo ngirwa-bayobozi babo bityo ntibyabakundira kuko uwo bashakaga imbonankubone bimunyuzeho ntawundi yari prezida Kagame, nubwo yashyizeho itsinda rigizwe na Ministri Kaboneka n’abandi kubanza kuyungurura ibibazo by’abo baturage aliko nabwo ntibanyuzwe.

Tubibutse ko ubwo Prezida Kagame yaherukaga gusura aka Karere ka Nyagatare hari ku wa 13/11/2014 aho yari yasezeranije aba baturage ibikorwa byinshi birimo centre de santé  ya GATUNDA yagombaga guhindurwamo ibitaro, gukwirakwiza amazi mu Mirenge ya Musheri, Rwimiyaga, Karangazi, Rwempasha, Matimba, hari kandi kubaka stade ya football n’uruganda rw’ibiryo by’amatungo, ibyo byose hamwe n’ibindi tutarondoye bikaba byaragiye nka nyomberi, abaturage amaso yaraheze mu kirere! Nta kizere gihari niba hari n’ibiteganywa gutangizwa nibura! cyangwa ngo ibyashoboye gutangizwa byuzuzwe abaturage bo guheranwa n’ikizere kiraza amasinde!Banyarwanda banyarwandakazi, aba baturage ba Nyagatare usanga ahanini bugarijwe n’ibibazo by’amasambu  yabo yanyazwe n’abambari ba Fpr imaze kwigarulira u Rwanda, abenshi bakaba barabanje guhunga intambara ya 1994 berekeza Ouganda bakaza guhindukira nyuma aribwo basangaga amasambu yabo yaratujwemo n’impunzi za 1959 bityo imanza zikabura gicibwa kugeza na nubu.

Ni muli urwo rwego muli uwo mubonano n’abaturage hari umukecuru witwa Musabyimana utuye mu Murenge wa Matimba aliko akaba ntaho afite ahengeka umusaya kubera ko ari umwe mu bahuye n’icyo kibazo akaba yari yarahunze intambara ya 1994 yerekeza muli ouganda, mu gihe ahungukiye 2009 asanga isambu yaratuyemo barayigabije! ati  Nyakubahwa prezida rwose ndasaba ko mwandenganura kuko inzego zose nazigejejeho icyo kibazo ati aliko kugeza nanubu ntibarayinsubiza! ati none rwose mbure n’akadugudu?

Prezida Kagame wari wabanje kumutega amatwi neza aho amariye kumva ko yari impunzi ya 1994 ikibazo yagishinze Ministri Kaboneka nawe wahise asisibiranya ajya kumwihererana kugira ngo bidakomeza gusakuza bikaba byatuma n’abandi bafite bene ibyo bibazo buririraho! ku buryo bamwe mu baturage batangiye kwibaza icyari kizanye Prezida Kagame kubasura niba adashoboye gusubiza ibibazo byabo kandi bari bamwiteze nk’umukiza! nawe akaba yibazaga impamvu abaturage bahora bategereje ko azabasura kugira ngo bamugezeho ibibazo byabo kandi hari abandi bayobozi bamuhagaraliye! ati aliko abayobozi banyu bakora iki? ati ntibyumvikana! Amaze gusubiza ibirenga bine yabwiye abaturage ko ibibazo byabo ari byinshi ko bitakemurirwa aho byose, ati nizeye ko byandikwa kandi byose bikazabonerwa umuti mu gihe cya vuba, ati Murakoze.

Banyarwanda banyarwandakazi, prezida Kagame siwe wabonye abava mu maso, yakomeje ajya kwisurira umupaka wa Kagitumba uhuza u Rwanda na Ouganda, bityo abaturage bataha batanyuzwe bimyiza imoso n’imbere nukuntu bari bakereye kwakira Mesiya wabo. Umuturage umwe utashatse kwivuga izina kubera impamvu z’umutekano we yambwiye ati uzi ukuntu tutashatse kugira icyo twikorera uyu munsi  dore ko amapfa atatworoheye kugeza magingo aya ngo ngaho twaje kureba umukiza! ati none aducitse nk’umugesera pe!

Banyarwanda banyarwandakazi, abaturage bakeneye umucunguzi byihutirwa batitaye kuli Leta y’agatsiko  Fpr-baringa ikomeje gushaka kubahuma amaso babona.

Biragaragara ko abenshi mu banyarwanda bamaze gusobanukirwa neza n’ikinyoma cya FPR-KAGAME aho ibizeza ibikorwa bikagenda bigakubita imyaka n’imyaka ntagikozwe ari nako bamwe bimurwa mu byabo nta ngurane bikavamo no kuhatakariza ubuzima. Nkaba nsanga igihe cyo kwirukana ingoma y’agatsiko kiri bugufi, ahasigaye akaba ari ugushyira mu bikorwa gusa. Murakoze.

 
Byanditswe ku 13/02/2017,na:
 A.BEN NTUYENABO, KIGALI-RWANDA.

 

Rwanda : prezida Paul  Kagame yishongoye bikabije ku bayobozi  n’abaturage  b’akarere ka Gasabo

photo wikipedia

photo wikipedia

 

 

 

 

 

 

 

 

 

 

 

Ni kuri uyu wa 07/02/2017 ubwo yabasuraga mu kiganiro yagiranyen’abayobozi batandukanye bo mu karere ka Gasabo  aho yabonanaga n’abagize inama ya comité mpuzabikorwa y’akarere.

Mu ijambo rye abambari be bakunze kwita impanuro, Prezida Kagame yabakuriye inzira ku murima ababwira ku byerekeranye n’inzara ivugwa mu gihugu, ati iyo  imvura itaguye ukugemulira nawe ntabishake wumva ko wabeshwaho n’iki? waba uwande? ati icyo gihe urapfa! kuko aba ari wowe uba wizize! ati mugomba kumenya kwishakamo ibisubizo kuko ku isi nta muntu ufite ububasha bwo kugusha imvura uko abishaka, akomeza avuga ko mu gihe imvura itaguye abaturage bagomba kumenya uburyo bwo kureka amazi  y’imvura, ati nibatabikora bazasonza bapfe kuko ntakundi bizabagendekera cyangwa bahore basabiriza.

Banyarwanda banyarwandakazi, uretse ubwishongozi bw’uyu muyobozi gusa, murabona se abaturage bemeye guhebera urwaje bazakurahe ibikoresho byo gufata amazi yo gukoresha mu buhinzi no mu gihe imvura itaguye? Ese abaturage babuze ayo banywa kugeza ubwo basigaye basangira ibirohwa n’amatungo, bazabona ayo kuhira imyaka? ayo mazi yonyine se anabonetse  yasimbura ibyo gushyira mu gifu?

Prezida Paul Kagame arirengangiza inzara iri mu gihugu hose akemeza ko nihari yagaragaye mu ntara y’iburengerazuba n’amajyepfo gusa! prezida Kagame yongeyeho kandi ko nubwo imvura itagwa abaturage bagomba no kuyoboka imigezi bakayibyaza umusaruro! birabaje pe! abanyarwanda bateye agahinda rwose aho uwakabarengeye yigize ntibindeba ati nimutishakamo ibisubizo mukeka ko ari nde uzabibakorera? ati ‘’muzapfa’’!

Paul Kagame yakomoje no ku mutekano ababwira ko uko igihugu gitera imbere twese tugomba kubigiramo uruhare twirindira umutekano n’ibiva mu musaruro wacu by’umwihariko, dutanga amakuru ku gihe y’abanywi b’ibiyobyabwenge kuko ahanini aribo bihisha inyuma yo guhungabanya umutekano n’ubujura, ati kuko iyo bidakozwe namwe bibagiraho ingaruka.

Prezida Kagame yakomeje avuga no kibazo cy’itangwa rya ruswa, ati nubwo ibyegeranyo bitandukanye bishyira u Rwanda mu myanya ya mbere mu kurwanya ruswa ntibisobanuye ko turi ibihangange! ati ku bayobozi ikintu cy’inyerezwa ry’umutungo, kwikanyiza ibigenewe abo uyobora bikaba ibyawe,ku isonga wowe uyobora ukagira ibyo utwara kurusha abandi by’umwihariko, ibisigaye bikagabanywa abakungirije aliko ukibagirwa ko ibyo byose bikugiraho ingaruka! zitanakugezeho uyu munsi wibwira ngo warazicitse buracya zikakugeraho, bisobanuye ko wowe muyobozi uba wahindutse igitotsi muli système kandi ubundi inshingano zawe zagombye guhera ku mutima-nama wawe kugirango ushobore kuzuza ibyo ushinzwe.

Prezida Paul Kagame yakomeje abwira abo bayobozi ko nibaramuka babirwanije bizacika aliko nibaceceka ruswa izakomeza ihabwe intebe muli système,ati rero banyarwanda ni ugukomeza urugamba rwo gutera imbere mu kwigira kuko ntawe ugomba kutugira, ati duhange duhereye ku by’iwacu, duhahe iby’iwacu made in Rwanda, dusagurire n’amahanga.

Banyarwanda banyarwandakazi, izi mpanuro nkuko bamwe bazita ziragaragaza intege nke z’uyu muyobozi Paul Kagame mu guhangara abo yahaye amata bamwe bitwa ibifi binini (ibikomerezwa) aho bidakorwaho kandi iyo ruswa ivugwa ikaba ahanini yarashinze imizi muli byo! ahubwo ugasanga abagezwa mu nkiko ari rubanda rugufi bene ngofero gusa, barimo abamotari n’abashoferi nkuko biherutse kwemezwa na Prezida w’urukiko rw’ikirenga muli rapport 2016 y’imanza za ruswa zaburanishijwe n’inkiko aho bigaragara ko abashoferi n’abamotari aribo baza ku isonga ku kigereranyo cya 14/35, ari naho uyu Prezida Sam Rugege  yaboneye n’umwanya wo kubwira itangazamakuru ko urukiko rw’ikirenga atarirwo rushinzwe gushaka ibikomerezwa birya ruswa ngo biburanishwe.

Prezida Kagame rero aho kugira ngo yirukane ibyo bisambo abona ko byamunze système yahisemo kujya abihindurira amakoti aliko ntibive ku ntebe z’ubuyobozi. Birababaje!

Banyarwanda banyarwandakazi, muriyumvira namwe! Marie Immaculée INGABIRE uyobora umuryango transparency International rwanda ati ibifi binini birya ruswa nibifatwe nabyo bishyikirizwe inkiko. Prezida w’urukiko rw’ikirenga Prof.Sam RUGEGE nawe ati urukiko ntirushinzwe gushaka ibikomerezwa birya ruswa! bizagenda bite rero ko système yose irwaye? niyegure itange umwanya kuko abanyarwanda batari bacye biteguye kuvana igihugu cyabo mu kangaratete.

Mugire amahoro.

Byanditswe kuwa 10/02/2017, na:
A.BEN NTUYENABO,KIGALI-RWANDA.

 

Rwanda:Ese aho ntihaba habura ukoma imbarutso ngo ingoma y’igitugu ya FPR irindimuke burundu ?

ShyakaNi mu gihe abaturage bemeye guhebera urwaje bakabaho mu karengane karenze urugero kugeza aho bamwe bicwa n’inzara, bagafungwa,bakaraswa ku manywa y’ihangu isi yose irebera ntigire icyo ibikoraho kubera ubutegetsi bw’igitugu.

Tuvuge nko mu byegeranyo byerekeranye n’imiyoborere myiza, agateka ka muntu, aka gatsiko ka Fpr kayoboye u Rwanda gakunze kwigamba ko iterambere n’imibereho myiza y’abaturage kabiteje imbere ku buryo budasubirwaho mu gihe impunzi z’abanyarwanda zikubye inshuro zirenga eshatu kuruta mbere ya jenoside,yaba iza politiki, izahunze inzara, izageretsweho kurigisa umutungo w’igihugu,izo zose mu rwego rwo kuzitera ubwoba ngo hatagira numwe wongera gukandagiza ikirenge mu rwa Gasabo!

Banyarwanda, Banyarwandakazi, ese koko uru ruhuri rw’ibibazo aka gatsiko ka Fpr kikoreye bizabonerwa umuti ryari?mu gihe abanyarwanda b’impunzi narondoye bose muli ibyo bice byose bitandukanye batishimiye imiyoborere y’iyi ngoma y’igitugu ibahejeje ishyanga?byongeye kandi bakaba babona ibatindiye kuvaho?dore ko abari imbere mu gihugu bo bahebeye urwaje!

Banyarwanda, Banyarwandakazi, tubibutse ko ubu butegetsi biragaragalira buri wese ko bwihishe inyuma y’itegeko-nshinga ryateknitswe n’umunyagitugu Prezida Paul Kagame utifuza kugira uwo basimburana ku butegetsi mu mahoro no kugira ngo abone icyuho cyo gutsimbarara ku butegetsi ubuziraherezo,duhereye ku mateka y’iki gihugu ibi bikaba bishimangira ko nta gihe na kimwe u Rwanda rwigeze rugendera ku mategeko uhereye ku ngoma za cyami yaba no mu bihe bya za republika.

Gusa ibibi birarutanwa nko muli republika ya 2 (iyemerwa ry’amashyaka menshi) hashyizweho agasamusamo kayo aliko umusaruro wavuyemo ntibyateye kabiri  kuko byakurikiwe n’imeneka ry’amaraso atagira ingano! Byumvikane rero ko aka gatsiko ka Fpr kanyuze mu mivu y’amaraso n’imiborogo atari ko konyine gashobora gusubiza ibintu mu buryo kadafatanije n’abandi, ahubwo kabisubije irudubi ku buryo na bamwe mu banyarwanda batabizi bagatije umurindi kugeza magingo aya; byongeye kandi bakaba aribo ahanini bashyirwa imbere mukujya gushishikariza n’abanyamahanga  politiki y’ikinyoma cya Fpr; urugero navuga nka Bwana Prof. Shyaka Anastase, umuyobozi  w’ikigo k’igihugu gishinzwe imiyoborere myiza (RGB), uyu mugabo ni umwe mu bateknisiye bakoreshwa na Leta y’agatsiko mu nyungu zayo binyuze mu byegeranyo akunze gusohora bijyanye n’imiyoborere y’igihugu kandi akenshi ari ibinyoma,bityo ugasanga umuryango mpuzamahanga wabigenderaho nkaho byakozwe n’umuntu w’umunyakuri.

Birababaje!nko  mu cyegeranyo gishize Bwana prof.Shyaka umaze kubona nawe ubwe ko bikabije mu guhora abeshya abanyarwanda ko mu gihugu hari imiyoborere myiza uwavuga ko nta yandi mahitamo agifite ntiyaba abeshye bityo tugasanga nawe yari akwiye guhebera urwaje nk’abandi aho kugira ngo akomeze asohore ibyegeranyo atitaye kuri comments! ni nko kuvuga ngo nzajya mbisohora ndetse mbishishikarize n’abanyamahanga abe aribo mpa n’urubuga rwo kubitangaza bityo ntibizambarweho jyenyine! yoo! mbega ishyano!

Ni muli urwo rwego kuri uyu wa 31/01/2017, hakurikijwe imurika ry’icyegeranyo ku nshuro ya kane cyerekeye ishusho y’imiyoborere mu Rwanda, Bwana prof.Shyaka, umukuru w’ikigo k’igihugu gishinzwe imiyoborere myiza (RGB) yifashishije  Bwana LAMIN MAMADOU Manneh directeur ushinzwe guhuza ibikorwa bya ONU mu Rwanda mu kumufasha kumvikanisha icyo cyegeranyo, kubera intonorano za Fpr uyu munyamahanga asigaye asa naho avugira Leta y’agatsiko, nta na rimwe ashobora kuyinenga akaba yarahinduwe ikiraro bambukiraho bityo ibyo yumvikanishije bikaba byafatwa nk’ihame.

Muri iryo murika rero Bwana LAMIN Manneh avuga ko UN yishimiye umusaruro umaze kuboneka mu gushyiraho umurongo ukomeye w’imiyoborere myiza mu Rwanda, ati UN yishimiye uburyo ubu bushakashatsi bukorwamo n’ikigo k’igihugu gishinzwe imiyoborere myiza (RGB) kandi ko izakomeza gufasha uko ishoboye.

Bwana LAMIN Manneh yakomeje avuga ko azakomeza gukora ubuvugizi kugirango UN ikomeze kubishyigikira,akomeza agira ati : UN irishimira cyane ishyirwa imbere ry’imiyoborere myiza kuko ariyo igeza ku iterambere rirambye ryifuzwa n’abaturage.

Mu kwanzura, Prof Shyaka we yasabye Leta gukomeza gushyira mu bikorwa inama yahawe mu byegeranyo byabanje, ati Leta izazirikane kandi ibikubiye muli iki cyegeranyo gishya ku nshuro ya kane,akomeza asobanura ko mu myaka itanu ishize igipimo cy’umutekano n’ituze rusange cyongeye kuza ku mwanya wa mbere na 92.62% kivuye kuri 91.6% cyariho muli 2014.ati naho icy’imitangire ya service cyagarutse ku mwanya wa nyuma n’amanota 72.93% mu gihe cyari gifite 72.00% muli 2014.

Banyarwanda, Banyarwandakazi, muriyumvira amwe mu mateknike y’abayobozi  b’iki gihugu uko bagenda batugurisha buhoro buhoro kuri ba mpatsebihugu aho basigaye biyambaza abanyamahanga mu gukomeza kutuyobya  nkaho tudafite ubwenge. NTITUZABYEMERA!!

 Byanditswe ku wa 02/02/2017, na:
A.BEN NTUYENABO, KIGALI-RWANDA.