Nkuko dukomeje  kubyandikaho rero  muli  ibi  bihe  hari  udutendo  dutandukanye  tw’abaprezida  barangiza  mandats   zabo  aliko  ntibifuze  isimburana  ry’ubutegetsi  binyuze  mu mahoro  n’ubwumvikane, by’umwihariko  muli  Africa  yo  hagati. Umwe  muli  abo mvuga  Semuhanuka  akaba  nta  wundi  ariwe  Prezida  Paul Kagame  w’u  Rwanda. Murazi  ko  yamaze  guhindura  itegeko-nshinga  rya  republika  y’u  Rwanda  akoresheje  Kamarampaka  kugirango  akomeze  ahabwe  umwanya  wo  gutsimbarara  mu  Rugwiro  nyuma  ya mandat  ye  muli  2017, akaba  yirengagiza  ko  nta bandi  banyarwanda  nabo  bafite  ubushobozi  bwo  kuba  bahicara  aribyo  yakagombye  kubanza  kujyaho  impaka  n’abatavugarumwe nawe  bakeneye  gutaha  mu  rwababyaye.

Hano  mu  Rwanda  haba  abize  aciriritse  nay’ikirenga  aliko  iyo bageze  ku  butegetsi  ibitekerezo  byabo  bihinduka  bimwe  mu  ntego  imwe  rukumbi  yo  kugundira  ubuprezida  bagacecekesha  intiti  bakica  bagakiza,  bazereka  ko  bazi  ikoranabubingwa  kurusha  abandi  byongeye  kandi  ngo:’’  n’abami  bimaga  ingoma  bagategeka  ari  inkandagirabitabo  ikindi  ngo  na  Yezu  na  Nyina  basengwa  ku  isi  yose  nta  shuri  bigeze  bakandagiramo bityo  gutegeka   kuri  bo  bakabifata  nk’imbuto  ivukanwa’’. Ayo  ni  amagambo  ya  Prezida  Kagame  ku kibazo  cy’amatsiko  yabajijwe  n’abanyeshuri  bo  muli  Kaminuza  I  Ruhande  igihe  yari  yabasuye  ku  byerekeye  amashuri  yaba  yarize,  hari  muli  2008.

Banyarwanda  banyarwandakazi, icyo gisubizo  gishimangira  neza  ukuntu  Prezida  P. Kagame  yapanze  kuva  kera  kuzava  k’ubutegetsi  ari  uko  bagaciye, byongeye  kandi  turasanga  arangwa  n’ingengabitekerezo  imaze  kuba  akarande muli  FPR  yo  kuzarekura  ubutegetsi  isize  igaritse  imirambo  itabarika  y’inzirakarengane.

Banyarwanda  banyarwandakazi  rero  hari  impamvu  nyinshi  zituma  Prezida  Paul  Kagame  atifuza  isimburana  ry’ubutegetsi  mu  Rwanda:

1. Uburyohe bw’ingoma niyo  mpamvu  nyamukuru  ituma  atifuza  kuyivaho  keretse  aciwe  akaboko  kayifashe!  Kuri  we  ni  nkaho  yavuye  ku  bumuntu  akigira  akamana! Arica, agakiza  igihugu  cyabaye  nk’akarima  ke  ku  buryo  hasoroma  umupfukamiye, umupinze  agapfa  yicuza  icyo  yavukiye  ariyo mpamvu  yigize  akaha  kajyahe  arara  amajoro  adasinziriye  atekereza  kucyatuma  arama  ku  butegetsi  n’urubyaro  rumukomokaho.
2. Prezida Kagame atinya  ko  yazabazwa  ibibi  yakoze, akaba  nayo  ari impamvu  imuremereye! Yafashe  ubutegetsi  yishe  Prezida  Habyarimana  yasimbuye,  ararwana  mpaka  igihugu  akigaruliye  ari ko  agarika  n’ingogo  hakiyongeraho  n’impunzi   z’abahutu  yatsembeye  muli  Congo  n’izindi  cases nyinshi  zitabarika…..prezida   Kagame  rero  ntiyakwifuza  kuba  aka  Taylor  wahoze  ayobora  Liberia.
3. Bwana Kagame nka  Prezida  usanzwe  arya  icyo  ashatse, ingendo  z’indege  za  buri  gihe  mu  bihugu  ashatse, agatunga  ibyo  yifuza  byose  akoresheje  umutungo  rusange  w’igihugu  yitiranya  n’umufuka  we  sinshidikanya  ko  hari  abo yakwemera  basangira  ubutegetsi  hadakoreshejwe  ingufu  za  gisirikari.

Banyarwanda  banyarwandakazi, murabe  mwumva! gusa  ingero  ni  nyinshi, reka  mbe  mpiniye  aha, aliko  tunazirikane  ko  iminsi  y’umujura  itajya  irenga  mirongo  ine. Prezida  Kagame  ashatse  yafungura  urubuga  rw’ibiganiro  ku  bifuza  ko  ibintu  bihinduka  mu  mahoro  mu  gihugu  cyacu  inzira  zikigendwa. Mugire  amahoro.

Byanditswe  ku  wa  08/05/2016, na:
A.BEN  NTUYENABO, KIGALI-RWANDA.