Archives mensuelles : mars 2016

Rwanda:ubutegetsi bwa FPR-Kagame bukomeje kuyoboresha igitugu Abanyarwanda.

Ni muli iyi minsi hirya no hino ku isi ndetse by’umwihariko ku banyarwanda batari bake, hakomejwe kuvugwa byinshi ku miyoborere y’u Rwanda rw’iki gihe aho Prezida Kagame adashaka kuva ku izima ngo asangire igihugu n’abandi banyarwanda binyuze mu biganiro by’amahoro, nkuko abenshi ndetse na bimwe mu bihugu by’inshuti z’u Rwanda bikomeje kumugiramo inama bimwotsa igitutu aliko we akaba yaravuniye ibiti mu matwi ahubwo yirirwa ahimba za techniques zuzuye ibinyoma zo kubamagana afatanije n’abambari be ari nako atanga intonorano itubutse kandi abanyarwanda barimo basuhukira mu bihugu by’ibituranyi kubera inzara.

Banyarwanda banyarwandakazi, birababaje kubona agatsiko kayoboye Leta ya FPR-KAGAME ku butegetsi mu Rwanda gakomeje kwirengagiza ibibazo abanyarwanda dufite kakaba katitaye ku mahoro n’iterambere ry’abaturage rirambye ry’ejo hazaza h’igihugu, binyuze muli gouvernement ishingiye ku matwara ya demokrasi! Tukaba dusanga bishobora kutugiraho ingaruka zikomeye ku hazaza heza h’igihugu cyacu.

Banyarwanda banyarwandakazi, Prezida Paul Kagame akomeje kwitoza kuziyimika nk’umwami w’u Rwanda igihe mandat ye izaba icyuye igihe muli 2017 aliko ntamenya ko na ‘’nyina wundi abyara umuhungu’’ cyangwa ko « akagabo gahimba akandi kataraza » bityo akaba ariyo mpamvu dukomeje kumugira inama yo gufata ingamba za kigabo akemera gusangira n’abandi banyarwanda bose ku meza amwe, naho ubundi aririwe ntaraye!

Banyarwanda banyarwandakazi, nsanga inzozi Prezida Kagame arimo ari nko « GUTEMA IGITI UKICARIYE » ! none se igihugu gikomeje gushingira ku muntu umwe gusa aho gushingira kuri système yubatse! Ni ikibazo gikomeye. Nibwo mwumva mwene iyi miyoborere ivaho nk’ikibabi gihubutse mu giti kikitura hasi. Urugero natanga nk’ibyabaye nyuma yihanurwa ry’indege yari itwaye nyakwigendera Prezida Yuvenali Habyarimana! None ntiwasanga Prezida Kagame adusubije mu birenze 94? Mwibaze namwe!

Uretse ko tutazabyemera kuko aribyo twiyemeje guharanira, ngira ngo ntawatekereza nkawe mu bihe bya 94 ubwo indege ya Prezida Habyarimana imaze guhanurwa yahamagariye abakuru b’ingabo ze kwambarira urugamba abemeza ko icyuho cyo gufata ubutegetsi mu Rugwiro kibonetse! Aribwo yakomeje no kwotsa igitutu ba mpatsibihugu kugirango bamufashe afate ubutegetsi ari nako abemerera nakari imurore ko ngo aramutse afashe Kigali nta bwoko bw’abatutsi bwapfa kandi ko banapfuye batarenga Magana atanu!

Banyarwanda banyarwandakazi, nimwiyumvire namwe uwo mukiza Prezida Kagame bamwe birirwa baririmba bavuga ko afite impuhwe ziruta iz’umwami YEZU KRISTU! (biherutswe gutangazwa n’umwe mu ba v/mayors ba Gasabo district), ni agahomamunwa pe!

Banyarwanda banyarwandakazi, nitwibaze kandi tuzirikane! Iyo se niyo miyoborere myiza n’ukwishyira ukizana twari dutegereje muli iki kinyejana? Gusa nyine nta gahora gahanze, igihe ni iki kuko P. Kagame agomba kwumva ko iyi si idasakaye buri wese yanyagirwa. Mugire amahoro.

Byanditswe ku wa 24/03/2016, na:

A.BEN NTUYENABO, KIGALI-RWANDA.

Rwanda : Dukurikije imyifatire ya Dr Gashumba Diane, ntiyari akwiye kuba ministri w’umuryango

Dr Gashumba Diane/photo igihe.com

Ni nyuma yuko icyari umwiherero w’abayobozi ushojwe, akaba kuli uyu wa 18/03/2016 prezida Kagame yafashe icyemezo cyo kwirukana uwari Ministri w’umuryango (MIGEPROF) Mme GASINZIGWA Oda yimika Dr.GASHUMBA Diane wagaragaye ahanini mu buyobozi bw’agatsiko aho yigeze kuyobora inama nkuru y’abagore ku rwego rw’igihugu ndetse akanayobora ibitaro bya Kibagabaga ho muli Gasabo district.

Aho hose Dr.Diane yakoze ntacyo yahamariye uretse mu bitaro bikuru bya Kaminuza (CHUK) aho nibura yapfaga kugerageza nk’umuganga ukora en equipe.

Dr. Diane GASHUMBA yarasanzwe azwiho gucana inyuma n’umutware we VAROIS bari barambikanye impeta aliko kubera ingeso mbi zo gucana inyuma bikaba byarabaviriyemo gutandukana (divorce). Dr. Diane akaba nyuma yo gukora divorce yarakomeje ingeso ye, akaba azwiho agashya yigeze kurangwaho aho yasohokanaga nuwari umusambane we, umushinjacyaha wa republika Bwana RUKANGIRA bikaza kugaragara naho bagera ku ngingo bose babireba! Ba gitimujisho babanyamakuru nka Assumani na Kalisa babibereye abahamya aliko ntibyabahira ndetse Assumani we bimuviramo kubikwa mu gihome (1930) imyaka ibili yose ku itegeko rya Substitut mu kwaha kwa FPR-KAGAME mu gukingira ikibaba uwo mudamu w’inkoramutima yabo.

Oda Gasinzingwa/photo agasaro.com

Banyarwanda banyarwandakazi , nimwiyumvire abayobozi prezida Kagame asigaye aduhitiramo! Izo nizo nyangamugayo abona zibereye kuyobora Ministère y’umuryango nyarwanda! Umenya ari uburyo asigaranye bwamufasha kuyobora igihugu aho atekereza ko gukoresha abarangwaho n’ingeso mbi nkizo ku mugaragaro ariyo ntwaro asigaranye! Ni agahomamunwa pe! mu matora aherutse mu gihugu cyacu umuntu nka Dr.Diane bavugaga ko afite imiziro, kuba byonyine bamukekaho izo ngeso zo guheheta no kutavugarumwe kw’abashakanye, byatumaga bamushyira ku ruhande kandi akenshi bigakorwa na FPR mu rwego rwo kubigira impamvu y’uwo itifuza none mukanya gato nkako guhumbya Prezida Kagame we abihaye umugisha abisiziriza ibara ry’umweru.

Banyarwanda banyarwandakazi, Mme Gasinzigwa nta miziro yamurangwagaho cyane uretse kunanirwa gukura inzererezi mu mihanda mu gihe cy’ibyumweru bibili yari yaratanze mbere yuko umwiherero uba, aliko kutamenya gushyira mu bikorwa ikinyoma cya FPR-KAGAME , arabizize! Niyihangane! Uretse ko nanone ntawabura icyo amunenga kuba ari mu bashinjaga bagenzi be Mme Mary Baine wahoze mu RRA, Rose Kabuye muli Protocole ya Leta n’abandi…, bari mu nama ya FPR-INKOTANYI abanenga kuba baratatiye igihango cya FPR-INKOTANYI cyo kudashyigikira ikinyoma bagamije gushyigikira abatware babo Prezida Kagame yashoye mu manza (col. Tom Byabagamba,Gén.Fank Rusagara, …).

Banyarwanda banyarwandakazi, ibyo byose akaba ari ingaruka zigaragara ziterwa n’agatsiko ka FPR-KAGAME, bikaba bisaba buri munyarwanda wese, inshuti z’u Rwanda guhaguruka tukarwanya agatsiko twivuye inyuma.

Mugire amahoro.

Byanditswe ku wa 19/03/2016, na:
A.BEN NTUYENABO, KIGALI-RWANDA.

Igihembo cyitiriwe Victoire Ingabire kiravugisha amagambure ubutegetsi bw’agatsiko bwa Kagame

Abantu bari babukereye

Kuva muli 2011, buri mwaka ishyirahamwe ry’abategarugoli ryitwa « Réseau Internationale des Femmes pour la Démocratie et la Paix (RiFDP) » rigenera umuntu cyangwa ishyirahamwe, wagaragaye uwo mwaka kuba yarashyigikiye bigaragara ubwitange n’ibikorwa bya Victoire Ingabire Umuhoza , byo kwitangira Demokarasi n’amahoro , ari nabyo ingoma ya Paul Kagame imufungiye kuva muli 2010.

Uyu mwaka igihembo cyagenewe abantu batatu aribo :

Abahawe ibihembo :
Fred Holt, Anneke Verbraecken, Partick Mbeko

– Umunyamakuru w’Umuholandikazi witwa Anneke Verbraecken ;
– Inzobere mubya politike ikomoka muli Congo ikaba ifite ubwenegihugu bwa Canada, Partick Mbeko ;
– N’uharanira uburenganzira bwa muntu ukomoka muli Norvège witwa Fred Holt.

Umuhango wo bubashyikiriza icyo gihembo wabereye I Bruxelles ku taliki ya12/3/2016. Hari abantu benshi cyane baturutse imihanda yose bazi ubutwari n’ubwitange bw’uwo mugore utaratinye kujya kubwira ingoma y’igitugu yimikajwe mu Rwanda ko abanyarwanda bakeneye ubwisanzure , Demakarasi n’amahoro, ibyo rero akaba yarabizize ubu akaba ari mu gihome cya “1930” i Kigali.

Abafashe amagambo bose , cyane cyane abari bamaze guhabwa igihembo bagaragaje ko Victoire Ingabire yinjiye mu mateka y’isi nk’intwari itazigera yibagirana kandi ko urumuli yacanye rutazigera ruzima ahubwo ko abasigaye bagombye kwenyegeza ikibatsi.

Nkuko bisanzwe za maneko za Kagame zari zirekereje , uretse ko ntizanagombaga kuza zububa kubo byari ibya rusange. Ariko ibyo zabonye kandi zumvise zikabikorera rapport bigomba kuba byaratumye abari munda y’ingoma uhereye kuri Kagame ubwe, bata umutwe kugera aho bazabya isaso. Nguwo wa mu Ambassada mushya wiyita “Ambassadeur de Choc” Olivier Nduhungirehe utarigeraga avuga kuri icyo gihembo, yewe n’igihe yandikaga yitwa “Théoneste Rwemalika” , yahise avumbuka ku mbuga nkoranya-mbaga ( réseaux sociaux) avuga iby’icyo gihembo agerageza kubikerensa. Agahebuzo ni ikinyamakuru rutwitsi cyitwa “Rushyashya” cyandikwa n’uwitwa Gualbert Burasa uzwi kuba inkotsa y’ubutegetsi bwa FPR.

Uyu Gualbert Burasa akaba mwena André Kameya nawe wigeze kuba umwanditsi w’ikinyamakuru cya rutwitsi muli 1992-1994 cyitwaga “ Rwanda Rushya”. Kandi nibyo koko cyasize u Rwanda rushya. Umuhungu we rero ubu niwe wagororewe kugira uburenganzira bwo kwandika muri “Rushyashya” ibyo ashaka byose: gutukana, kubeshya no kubeshyera abandi, gutera ubwoba abitwa “hutu de service”, gusebya no gusenya ingo z’abakekwaho kudashyigikira ibikotanyi,… ibyo byose akaba adashobora kubikurikiranirwa kuko afite “ubudahangarwa” ahabwa na FPR.

Rushyashya ni ikinyamakuru rutwitsi

Nguwo rero uwo ubutegetsi bwa Paul Kagame bwahise busaba gusisibiranya uwo muhango w’igitangaza n’ingaruka zawo ubutegetsi buziko ziteye inkeke mu rwego mpuzamahanga kuko Victoire Ingabire arushaho kumenyekana no gufatwa nk’intwali mu rwego rwa ba Nelson Mandela, Aung San Suu Kyi, etc… Gusa “Rushyashya’’ ya mwene André Kameya yabikoranye ubuswa, n’ubugome bwinshi ku buryo nta n’umwe yewe no mu baturage bafungiye mu Rwanda ushobora kuyigirira icyizere.

Niba itangaza makuru ry’ ubutegetsi bwa Kagame ritinyuka kubeshya abanyarwanda nkana kuriya rivuga igikorwa cyabereye i Bulaya mu ruhame, iyo bagomba kubabwira ibyitwa ko bibera mu Rwanda, ntawe ushobora kubanyomoza, bababwira iki? Birumvikana ko none ho basya batambaye. Abanyarwanda rero baragowe mu nzego nyinzi, byagera mu kugezwaho abakuru byo bikaba agahomanunwa.

Icyo twakuramo ni uko abategarugoli bahuriye muli RiFDP bakomeje gutsinda ibitego by’umutwe ingoma y’agatsiko kandi ko ibikorwa byabo byo kumenyekanisha Victoire Ingabire bikomeza ari nako bitesha umutwe ubutegetsi bwamufungiye ubusa. Sibwo ubutegetsi bwa Kagame bugiye kuzajegejwa n’abagore, ku buryo atakekaga!

Jean-Michel Manirafasha

Rwanda:uburenganzira bwa muntu bukomeje guhohoterwa birenze urugero n’ubutegetsi bwa FPR-Kagame

photos d’archives igitondo.com et leprophete.fr

Mu gihe icyegeranyo cya HRW (umuryango mpuzamahanga uharanira uburenganzira bw’ikiremwa-muntu) cyo muli 2015 cyasohotse gitunga agatoki u Rwanda by’umwihariko mu guhonyora uburenganzira bwa muntu bikabije; u Rwanda rukisobanura runyomoza ibyo birego ko rubeshyerwa nkuko ku bategetsi b’u Rwanda babigize umuco wo guhora babeshyuza ukuri basigaho ikinyoma, na nubu amarapports arukorwaho usanga ntacyo rubyitayeho nka wa mwana utumva kandi afite amatwi n’ubwenge.

Nyuma y’ayo marapports y’amahanga, ubu haravugwa za descentes z’abadepite mu bigo bise Transit center’s byakira bikanakangulira bamwe mu rubyiruko kureka kwigira inzererezi aliko basanze atari uko bimeze ahubwo ntaho zitaniye n’amagereza asanzwe uretse ko umwihariko wazo ari ikiboko kivuza ubuhuha n’iyica-rubozo gusa. Ubwo Ministri Shehi Fazil Harelimana yitabaga commission y’abadepite ishinzwe kugenzura agateka ka muntu yabajijwe ibyiryo yicwa-rubozo asubiza ko atabizi ko agiye kubikulikirana! biteye agahinda kuba uri Ministri w’umutekano utazi ibibera mu gihugu!

Izo transit center’s cyangwa ibigo ngororamuco byo mu Rwanda biravugwa ko aho kugororerwa muli ibyo bigo ntaho hataniye na za gereza nkuko Bamporiki Edouard umwe mu badepite bakuriye iyo commission yabibazaga Ministri Fazil mu nshingano ze, ati muli ibyo bigo ni iyicarubozo gusa aho usanga abaharokotse byitwa ngo bamaze kugororwa usanga nta mwambaro ukibakwira n’amaguru yarabyimbye kubera inkoni! Ati ibi bigo ni Gereza mu yindi forme!

Umuturage wo mu Karere ka Nyarugenge utarashatse kwivuga izina ati ntabwo narara ndamutse nivuze yagize ati hari mubyara wanjye wari ufungiye aho bita kwa Kabuga yahamaze amezi abili ati aliko avuyemo ntiyari akibasha kuvuga yarabaye nk’ikigoryi utamenya ko yigeze kuba umuntu kubera inkoni, inzara, ibiheri n’ibindi bibi byose …..ati nimwumve namwe umuntu uba avuye kugororwa aliko ahubwo yarapfuye mu bwonko n’ingingo! Ntacyo agishoboye kumalira igihugu! Birababaje cyane!

Undi musore nawe wajyanywe ahitwa Iwawa yantangarije ko ukigerayo ubanza gucishwa ku nkoni z’amezi 6 buri gitondo ku buryo ayo mezi yose igihe kinini ukimara mu mazi ya Kivu kugira ngo inkoni zorohe… Umara kuzikubitwa wiroha mu mazi ngo urebe ko bwira! Ni agahinda gusa gusa ku ngoma dusanga izasiga amateka mu gihugu cyacu abazadukomokaho bakazajya bavuga bati habayeho…

Ahandi havugwa ihonyora ry’ikiremwa-muntu ni mu Karere ka Nyabihu mu ntara y’uburengerazuba bw’u Rwanda aho abaturage nabo bafite ibibazo nko kwa Kabuga; baragira bati abana bacu, ababyeyi bacu, abavandimwe bacu bafungirwa mu kigo cy’inzererezi cya Karago bakubitwa bikabije dore ko naho nta vangura ari umwana, umusore, n’abasaza bafungirwa hamwe, ku buryo abenshi mu batambutse muli iki kigo byabaviriyemo ingaruka zo kwitaba Imana abandi kutagira icyo bimalira kubera inkoni.

Ubuyobozi bw’akarere ka Nyabihu, mu kugera ikirenge mu cya mukuru wabo shehi Fazil Harelimana, Ministri w’umutekano mu gihugu, butsemba buhakana ko nta yica-rubozo ribera muli icyo kigo ko ari aho bagororera inzererezi n’abanywa ibiyobyabwenge, ababivuga akaba arabashaka gusebya ubuyobozi.

Banyarwanda, Banyarwandakazi, kubera ibibazo byabarenze, abayobozi b’u Rwanda uhereye kuli Prezida Kagame imvugo yabo bose muli iki gihe ni ‘‘sinarimbizi, ngiye kubikulikirana’’, imyaka igashira indi igataha ; bibera mu kinyoma! Mbega ubuyobozi! Abayobozi b’u Rwanda basinziriye ku buryo utamenya igihe bazashilira ibitotsi, nkaba nsanga u Rwanda rukwiye gutabarwa byihutirwa.

Murakoze.

Byanditswe kuwa 16/03/2016, na:
A.BEN NTUYENABO,KIGALI-RWANDA.

Rwanda : Imyigaragambyo muri Gasabo District. Ikindi ni uko n’umwuka wa Sekibi uhawe ikicaro gihoraho na FPR-Kagame

1. RWANDA:GASABO DISTRICT:ABATURAGE BARIGARAGAMBIJE KUBERA UMUROZI BAVUGA KO YABAMAZEHO ABANTU

Ni ku gicamunsi cyo kuwa 10/03/2016 ubwo abaturage bo mu Kagari ka Ruhango Umurenge wa Gisozi, Akarere ka Gasabo bivumbuye bamenagura imodoka yabo biguriye yabafashaga kurinda umutekano.Hamwe n’umujinya mwinshi basobanura ko hari umurozi ugiye kubamaraho abantu kandi Leta irebera! Nibwo bigaragambije imbere yabashinzwe umutekano bashaka kwica uwo murozi bahamya ko ariwe wabarogeye abana babili b’umuturanyi wabo NKUNDINEZA Elias.

BIZIMANA Eugène ukuriye inkeragutabara, umutwe ushinzwe umutekano mu mudugudu wa Kanyinya byabereyemo ashimangira ko intandaro yo kwigaragambya ari urupfu rwabo bana babili bikekwa ko bapfuye barozwe n’uwo bita umurozi,akomeza avuga ko abo bana umukuru w’imyaka 4 n’umutoya w’amezi 9 bapfuye nyuma yo kujyanwa ku bitaro bya Kibagabaga barembye cyane Muganga abakojejemo inshinge biba iby’ubusa bose bibaviramo gushiramo umwuka bidatinze.

Bukeye bwaho hamaze gushyingurwa iyo mirambo, abaturanyi ba Nkundineza elias bageze aho atuye bavuye ku itabaro bahasanga umuturanyi we inzu ku yindi utatabaye yibereye mu rugo bamubajije icyatumye adatabara abasubiza ko ibyo bitamureba ko adashinzwe no kubimenya.Kubera ko bamukekagaho uburozi bakomeje kumukulikirana nibwo abemereye ko ‘’ abo bana yabahaye umuceri utagira imboga’’.Abari bari aho bose bakimenya ko umugore wo muli urwo rugo ariwe wakoze ibara agaburira abo bana bahise baba nkabariye amavubi,batangira guteragura amabuye hejuru y’inzu yari yahungishirijwemo bashaka ko asohoka ngo bamwihanire aliko police n’inkeragutabara zibabera ibamba….ibintu byarakomeye noneho ingabo na police bagerageza guhungisha uyu mugore bamushyira mu modoka ishinzwe umutekano (ariyo yiguriwe na ba baturage) ngo bamucikishe nibwo abaturage bateye amabuye ya modoka bayimenagura ibirahuri.

Nyuma yaho ku wa 12/03/2016, Bwana NIRAGIRE Théophile, umunyamabanga nshingwa-bikorwa w’umurenge wa GISOZI yakoranye inama n’abagize inzego z’umutekano (ingabo na police) hagamijwe gushakisha no guta muri yombi abagize uruhare muli iyo myigaragambyo hakaba hamaze gufatwa batatu, akomeza avuga ko abafashwe bagiye gukorerwaho iperereza n’inzego z’umutekano ku buryo bwimbitse kandi ko utubari twose tutemerewe kugeza saa tatu z’ijoro tugifunguye kugeza ibibazo by’umutekano muke bikemutse.

Banyarwanda banyarwandakazi, hakurikijwe amategeko y’u Rwanda , biragoye kubonera ibihano umurozi kuko akenshi nta bimenyetso bikunze kugaragara muri ubwo bugizi bwa nabi ikindi nuko bariya bana bahise bashyingurwa nta autopsie bakorewe, gusa inzego z’ubucamanza mu kwaha kwa FPR zari zikwiye kubitangaho igisubizo nkuko zisanzwe zivugurura andi mategeko yose bisa no gukora amahano zibireba, ahubwo abaturage akaba aribo bahinduka abahungabanya umutekano kuko bashatse kwihanira. Ubu nandika iyi nkuru uwo mugore acumbikiwe kuri station ya police mu rwego rwo kumucungira umutekano.

Banyarwanda banyarwandakazi, nguwo umutekano muke ukomeje kurangwa mugihugu cyacu mu gihe Prezida Kagame n’abambari be bibereye mu binezaneza by’ubutegetsi bihaye ku gitugu. Murakoze.

2. RWANDA : UMWUKA WA SEKIBI UHAWE IKICARO GIHORAHO NA FPR-KAGAME MU RWA GASABO

Nkuko Sekibi (shitani) ikomeje kwigaragaza mu gihugu cyacu, mu minsi ishize twababwiraga umugambi wa Leta ya FPR, agashami k’ivugururwa ry’amategeko ahana y’u Rwanda aho karimo kanonosora ukuntu kagomba kuvanaho amategeko ahana ibyaha by’ubutinganyi, uburaya no gucana inyuma kw’abashakanye; noneho mu gihe gito bigaragaye ko hari nizindi mpamvu zasaga nizihishe inyuma yabyo zikaba zimaze kwigaragaza aho ubu mu gisa n’amahano mu Rwanda hamaze kwigaragaza amadini abiri yiyemerera ko aramya Shitani akaba arimo asaba ubuzima-gatozi bwo gukorera mu rwa Gasabo nk’izindi associations z’amadini zose, umwihariko wayo akaba ari uko azajya asenga aramya Shitani aho gukorera Imana(Tuzabagezaho amazina yayo RGB imaze kuyaha ubuzima gatozi).

Bwana BARIHUTA Aimé umuyobozi wungirije w’ikigo RGB(Rwanda governance board) gishinzwe gutanga ubuzima-gatozi ku mitwe ya politiki na za associations zishingiye ku madini mu rwego rwo gutanga uburenganzira bwo gukorera ku butaka bw’u Rwanda ahamya ko bakiriye ubusabe bw’ayo madini abili akorana na Shitani asaba kwemererwa gukora byemewe n’amategeko; akomeza avuga ko bidatunguranye uretse gusa ko ngo bari bamenyereye kwakira amadini agendera ku myemerere y’ijambo ry’Imana, akomeza agira ati ba nyirayo barabyiyemerera ko bakorana n’imbaraga za Sekibi ati kandi ntaho ahuriye na ya gakondo kuko ba nyirayo bavuga ko bakorana n’imyuka mibi, ati ni uburenganzira bwabo hakurikijwe itegeko-nshinga ry’u Rwanda ariyo mpamvu agomba kwemererwa gukorera ku butaka bw’u Rwanda, akomeza agira ati amategeko y’u Rwanda yemerera buri mwene- gihugu uburenganzira bwo gukora icyo ashaka harimo nubwo gusenga icyo ashaka nuko abyifuza. Ati nta mpungenge zikwiye kwibazwaho.

Banyarwanda banyarwandakazi, nimwiyumvire rwose ! aho u Rwanda rwacu na FPR-KAGAME rugeze! nta gushidikanya ko ruri mu minsi ya nyuma! ndasanga ubutaha abanyarwanda bashobora kuzinjira ayo madini mashya à la FPR!

Banyarwanda banyarwandakazi, Imana dusenga idukize aya madini pe! kugeza aho abasenga shitani bagiye gutangira gukorera mu gihugu cyacu mu buryo buhawe umugisha na FPR-KAGAME! ni akumiro pe! ubuyobozi buragwira.

Banyarwanda banyarwandakazi, tubibutse ko igihugu cyacu cy’u Rwanda cyaragijwe ’’CHRISTU-MWAMI’’, nta gushidikanya duhamije ko abambari ba Sekibi n’ababashyigikiye nta mwanya bafite mu rwa Gasabo. Bwana barihuta na Leta ya FPR aho batakwemereye ubuzima gatozi Ishyaka FDU-INKINGI ryo rifite byinshi rishobora kugeza ku banyarwanda bahisemo kwimakaza Sekibi mu gihugu cyacu ! aliko mwoye gato mwirebere icyo azana!

Mugire amahoro y’Imana yo yaduhanze.

Byanditswe kuwa 12/03/2016, na:
A. BEN NTUYENABO, KIGALI-RWANDA.

Rwanda : ingendo z’urudaca za prezida Kagame zirambiye abanyarwanda

Prezida Kagame muri Guineya kuya 8/3/2016 (photo igihe.com)

Nibyo koko rero abanyarwanda benshi bamaze kurambirwa n’ingendo za buri munsi Prezida Kagame ahoramo byongeye zikaba nta musaruro zitanga ari nako zitwara akayabo k’umutungo uva mu mitsi y’abanyarwanda. Abasesenguzi babona ko hari indi turufu ishobora kuba ikinwa na FPR kugirango bucye kabiri. Tubitege amaso.

Nyuma yuko akubuka mu ruzinduko muli America dore ko wagirango niho afite urugo rukomeye kurusha hano iwacu mu Rwanda, yari yajyanywe no guhura na bamwe mu banyarwanda n’abanyamahanga mucyo yise « meet the president » kuko yasanze izina ’’Rwanda day’’ niyonka yaravumbuye ubusahuzi buyiberamo bukozwe na FPR, akaba yarayobeje uburari ahindura amazina ku buryo utarabukwa;nanone ubu akaba avuye mu Sénégal aho yari yitumiye mu ihuliro mpuzamahanga rya Next Einstein Forum ryari riteraniye I Dakar kuva kuri uyu wa 8/03/2016; hamwe n’itorero rimuherekeje ry’umuhanzi nyarwanda TETA Diane bakaba bahavuye berekeza muli Guinea aho zimwe mu nkomamashyi ze zivuga ko yakiriwe nka Messiah ndetse agahabwa n’ikamba! Birababaje cyane rwose! Ubwo abana b’u Rwanda inzara igiye kubamalira ku icumu basuhukira hirya no hino, abandi mu mashyamba ya Congo, abandi ishyanga naho Prezida Kagame we yibereye mu iraha asigaye yarateye umugongo igihugu, atakifuza kukibamo kandi ariwe ugihagarariye! Byongeye akaba asigaye agenda yitwaje n’itorero ryishyurwa mu mutungo w’igihugu rigomba kumutaramira n’abambari be aho ageze hose!

Banyarwanda banyarwandakazi, si amakabyankuru, ntawe utihera ijisho ngo abone ko Prezida Kagame yaba aboneka nkuri mu bibazo bikomeye muli iki gihe akaba ariyo mpamvu yateye umugongo igihugu cyacu yibera mu mahanga nkaho ariho asezera kuli iyi si ya Rurema! Ni ugutangirira hafi nyabuneka! Tudasubira mu rwobo nk’urwo FPR-KAGAME yatuzaniye muli 1994.

Banyarwanda banyarwandakazi, ntumwa za rubanda aribo ba depite reka mbibarize, ko nabonye mumaze iminsi mwibasiye Ministere y’ubuhinzi n’ubworozi ku gihombo gikabije yateje Leta ya FPR, kuki mutatumije na ex-Ministre KARIBATA Agnes wabanjirije abayiyobora muli iyi mandat nkuko byagaragaye ko ariwe waba warateje icyo gihombo asahulira muli FPR uwo mutungo ? Abayobora ubu baba bazira iki ko ibimenyetso bihari?

Ubu se akayabo k’amafranga Leta isohora ku ngendo za buri munsi Prezida Kagame ahoramo mu mahanga azabazwa na nde ko mbona musa n’abicaye mu ntebe ya penetensiya? Bavandimwe badepite, bashiki bacu bagore bacu, dore ko ari namwe mugize umubare munini mu nteko nshinga-mategeko, kuri uyu wa 8/03/2016 mwizihije isabukuru yanyu turifuza ko wababera urumuri nyarwo rwo kwigobotora icuraburindi, mugakanguka mukagerageza guca intege ba rusahuriramunduru bose bihishe muli iki gihugu cyacu ntawe murobanuye. Igihe ni iki cyo gutekereza ku heza hazaza h’igihugu cyacu aho kwirirwa turirimba umuntu ngo ni Messiah nawe ubwe atazi aho agana naho ava. Mugire amahoro n’ubugingo.

Byanditswe ku wa 09/03/2016, na:
A.BEN NTUYENABO, KIGALI-RWANDA.

Rwanda. Gatsata sector: Itechnica mu matora ya FPR-NEC (National Electoral Commission) atumye benshi beguzwa.

Itechnica rya FPR-NEC (national electoral commission) ryabaye mu matora aherutse mu nzego z’ibanze n’izihariye za Leta mu Rwanda ritumye abenshi mu bayobozi beguzwa ku gitutu ,akaba abenshi ari abari basanzweho mbere bakaba bari bongeye kugirirwa ikizere n’abaturage aliko bikaba byari bibangamiye umurongo w’amalisti yakozwe mu itechnica rya FPR-NEC hagamijwe impinduka mubari basanzweho. Ibyo bikaba byaratangiye ahanini mu mwaka ushize wa 2015 aho abatari bake begujwe ndetse bamwe muribo bakanafungwa by’urwiyerurutso nk’uwari umuyobozi w’akarere ka Rubavu Bwana CHEIH Bahame Hassan n’umunyamabanga nshingwa-bikorwa ndetse bagasabirwa no gufungwa igihe cy’umwaka kugirango bihabwe umugisha; kimwe n’ahandi henshi byarabaye mu cyahoze ari prefegitura ya Cyangugu ubu hitwa Rusizi aho Team yose y’abayobozi bagera kuri 15 na njyanama yabo begujwe muli ubwo buryo mu mpera z’umwaka wa 2015.

Banyarwanda banyarwandakazi, ibyo byose byateguraga itechnica ridasanzwe muli aya matora y’ibanze nay’inzego zihariye za Leta yabanjirijwe na referendum; ayo maco y’inda nini, kwikubira cyangwa kugabira uwo ushaka gukorwa na Leta ya FPR akaba ariyo ntandaro y’izo ngaruka ku bayobozi.

Ubu haravugwa iyeguzwa ry’abayobozi b’imidugudu itanu mu karere ka Gasabo, umurenge wa Gatsata aho abo bayobozi bari basanzweho mbere bari bongeye kugirirwa ikizere muli aya matora aliko kubera ko mbere yuko aba bari basabwe kutongera kwiyamamariza mandat shya byabaviriyemo kweguzwa! Birababaje ! demokrasi ziragwira!

Abo bayobozi akaba ari abo mu tugari twa Nyamabuye, Nyamugari na Karuruma ho mu Murenge wa Gatsata bakaba begujwe kuli uyu wa 3/03/2016 mu gihe kitarenze ukwezi kumwe bari bongeye kugirirwa ikizere n’abaturage hari taliki ya 8/02/2016 babahundagazaho amajwi. Abo ni KAYIRANGA Muzamira wari umukuru w’umudugudu w’Akamwunguzi, KAMUZINZI wari umukuru w’umudugudu w’Amarembo, NIYOMUGABO Viateur wa Ndengo, BAMURANGE Césarie wa Rwesero na MUNYANEZA wa Nyagasozi mu kagari ka Karuruma. Abo bose bari basanzwe muli mandat yacyuye igihe aliko ubuyobozi bw’umurenge wa Gatsata bukaba bwari bwababujije kwongera kwiyamamaza muli iyi mandat.

Mu kuyobya uburari, UWINKINDI Angélique umukozi ushinzwe irangamimerere mu murenge wa Gatsata usanzwe asimbura umuyobozi w’umurenge yadutangarijeko ibivugwa ko abo bayobozi begujwe atari ukuri ko ntawabashyizeho igitutu ngo begure kandi ko ubwegure bwabo butarasuzumwa ngo bwemezwe, akongeraho ko gusa abo bayobozi bajyaga bahwiturwa kenshi kubera imikorere yabo.

Mayor RWAMURANGWA Steven w’akarere ka Gasabo avuga ko icyo kibazo atakizi aliko ngo agiye kugikulikirana ngo arebe niba hari ukundi byagenze noneho habe hafatwa icyemezo cyo kubasubiza.

Banyarwanda banyarwandakazi, ngizo ingaruka z’amatora atechnitswe à la FPR-NEC, by’umwihariko udushya turimo tubera mu Murenge wa Gatsata, akarere ka Gasabo ho mu mujyi wa Kigali.Murakoze.

Byanditswe ku wa 07/03/2016, na:
A.BEN NTUYENABO, KIGALI-RWANDA.

Muri univerisite, campus Huye (Ruhande), ku banyeshuri 11.000, abitabiriye amatora ni 250 gusa, naho abarimu babo batoye ntibarenga batatu

Mu gihe commission y’igihugu y’amatora mu Rwanda (NEC) yishimira uko igikorwa cy’amatora y’abajyanama rusange nay’abakandida b’abagore bavuyemo 30% by’abagize inama njyanama z’uturere yabaye kuwa 22/02/2016 cyagenze; bamwe mu banyarwanda ntibishimiye na busa uko yateguwe nuko yashyizwe mu bikorwa, bakaba bavuga ko yaranzwe n’iteknica risanzwe rikorwa na FPR-KAGAME. Urugero rwa hafi ni abanyeshuri bo muli UNR Campus y’ I RUHANDE mu karere ka HUYE barenga ibihumbi cumi na kimwe (11.000) bivugira ko batatoye mu bwisanzure cyangwa bamwe bagahitamo kubireka kubera ko basabwaga gutora abakandida batigeze babona, ku buryo ku munsi w’amatora , mu marembo ya Kaminuza hari indangururamajwi n’abashyushyarugamba bahamagalira abanyeshuri kujya gutora ku ngufu.

Abanyeshuri ba kaminuza y’I RUHANDE bakaba barinubiraga kutamenya neza imyirondoro n’ibigwi by’ abakandida bagombaga gutorwa uwo munsi, bakomeza bahamya ko batahawe agaciro kandi bagize umubare munini (ugera ku bihumbi 11), bagatunga agatoki commission y’igihugu y’amatora (NEC) ko mugihe abakandida bazengurukaga utugari biyamamaza batigeze bazirikana no kuza kwiyamamariza muli kaminuza. Mu batarashatse kwivuga amazina; umunyeshuri umwe yagize ati ‘’birababaje kuba dutora abantu batadusabye amajwi ngo twumve n’ibigwi byabo kandi aritwe bayobozi b’ejo!!’’. Undi nawe akomeza agira ati ‘’ kubera gutora abo tutazi wageraga mu cyumba cy’itora amarangamutima akaba ariyo akuyobora ukaba ushobora gutora utarusha abandi ibigwi nta nicyo yazamalira abanyarwanda’’. Undi nawe ubarizwa muli kaminuza y’iburasirazuba yagize ati ’’ndabura umwaka umwe ngo ndangize, niba jyewe na bagenzi banjye twaratoye umuntu udashoboye ni ukuvuga ko twahemukiye abanyarwanda azasigara ahagaraliye twaratashye! Akomeza avuga ko kaminuza atari maternelle kuko iyo habaye kwerekana abakandida natwe tuboneraho kubagira inama kubyo twifuza bazadukorera’’.

Mu nama yagiranye n’abagombaga kuba indorerezi z’ayo matora, bajonjowe mu bagize imitwe ya politiki mu kwaha kwa FPR na bamwe mu nkoramutima za FPR zikorera mu bigo bya Leta (dore ko nta ndorerezi nimwe ituruka mu mahanga yari ihari); Bwana Prof. KALISA MBANDA, Umuyobozi wa commission y’igihugu y’amatora yabahaye amabwiriza yo kutagira icyo batangariza ibinyamakuru byaba ibyo hanze cyangwa mu gihugu mu gihe cy’amatora nyirizina yo kuwa 22/02/2016, yakomeje abasaba kuzabera Leta yabo inyangamugayo zayo matora birinda ikintu cyose cyatuma amatora avugwa nabi.

Prof. MBANDA yakomeje abaganilira ukuntu abanyeshuri bakunze kuvuyanga amatora muli rusange ati nko mu matora ashize y’inzego z’ibanze twatangajwe n’ukuntu muli campus y’I RUHANDE habarizwa abanyeshuri ibihumbi birenga 11 ati aliko abitabiriye iryo tora bakaba batararenze 250 byongeye kandi abarimu babo nabo abatoye ntibarengaga 3 gusa muli campus yose! Ati ni akumiro pe! akomeza agira ati ‘’abo banyeshuri 250 tuvuga ko batoye nabo batonze umurongo muremure cyane inyuma y’umwe mu bakandida wari usanzwe abadodera inkweto (cordonnier) indi mirongo isa nisigayeho ubusa ! twe n’abaturage bakeya basigaye twarumiwe pe!! akomeza avuga ko ntakundi babigenza ko ari ugukomeza kujya babakangulira iby’amatora.

Banyarwanda banyarwandakazi, nguko uko amatora yo mu Rwanda asigaye ategurwa ku buryo utarenganya abo banyeshuri kuko babibonamo iteknica rikorerwa muli NEC-FPR aho amalistes y’abakandida asohoka hazwi n’abazinjizwa muli iyo myanya, bityo abanyeshuri bakihitiramo gutonda umurongo inyuma y’ubafitiye akamaro nk’uriya mu cordonnier, nuko gusa iyo hagize ubaca murihumye agatorwa atyo hari ubwo ahita ategekwa kwiyandikira ibarwa yegura ku mpamvu ze nkuko byagenze mu karere ka Bumbogo ho muli Kigali aho abaturage bitoreye umukuru w’umudugudu bikaza kumuviramo kweguzwa kuko atari kuli liste y’iteknica. Mugire amahoro.

Byanditswe kuwa 01/03/2016, na:

A.BEN NTUYENABO, KIGALI-RWANDA.

Amakuru ki ?

Amakuru