Archives mensuelles : janvier 2016

Rwanda. Akarengane k’abomatari kubera ruswa

Akarengane na ruswa bikorerwa abanyarwanda by’umwihariko abamotari nkuko bigaragara kuri izi impapuro. Autorisation de transport ya taxi moto yagombaga kuba yararangiye le 13/10/2015 ariko kubera ubwoba bw’ibihano yishyuye indi autorisation mbere y’igihe ukwezi kumwe kugirango iyambere irangire le 14/09/2015. Akarengane bakorerwa ni uko RURA ivuga ko nta muntu kugiti cye wemerewe kwishyura autorisation de transport, ko zigurwa binyuze mu ma koperative ari nayo batangiramo amafaranga.

Akaga uyu mumotari yahuye nako ni uko kugeza magingo aya atari yahabwa autorisation kandi amaze amezi asaga ane yarishyuye amafaranga 32.500 Frw muri aya mafaranga harimo 22.500 Frw yishyurwa autorisation de transport y’imyaka ibiri na 10.000 Frw bivugwa ko ari igihembo gihabwa uzajya kwaka izi autorisation i Kigali kubera aya mafaranga yitwa ko ari igihembo. Umumotari iyo atari yayatanga bamusanga niwe mu rugo kuko baba bayakeneye cyane.

Ibibazo abamotari bahura nabyo ni uko babaha iki cyamezo kiri kumugereka barangiza ngo ntawe ugomba kubakoraho kandi bikavugirwa mu nama zirimo abapolisi n’abasirikare byageraho abapolisi bakabandikira ibihano nkuko bigaragara kuri contenention de 10.000 Frw yandikiwe le 25/01/2016.

Bref, aka ni akarengane dusabwa kwamagana kuko uyu mu motari byamubayeho. Yahamagaye Président wa COCTMO amusobanurira ibibazo afite amubwira ko basabye commandant wa Trafic police ya Rubavu ko batari bemerewe kurenga imbibi z’akarere kugeza ubwo umupolisi wari mu muhanda mu karere ka Rutsiro yahamagaye commandant we amusobanuza amubwira ko atabizi, aha ukaba wakwibaza niba hari police zitandukanye mu gihugu!

Rwanda. Intwari ni iki ? Intwari ni inde ?

Nkulikije ibikubiye muli report 2015 y’umuryango mpuzamahanga urondera agateka ka muntu(HRW) nsanga amarapports yawo ari nko kurangiza umuhango kuko nta gushidikanya ko hari umuyoboro uyu muryango wakiriramo intonorano za FPR na Prezida Kagame!

Nawe se ngo umuryango mpuzamahanga wita ku burenganzira bwa muntu( HRW) wishimiye kuba kuwa 30/01/2015 mu mwaka ushize u Rwanda rwaremeye amasezerano mpuzamahanga yo kurwanya iyicarubozo! Ibyo ni byiza rwose aliko se impirimbanyi za demokrasi mu Rwanda nka Mme INGABIRE Victoire Umuhoza, MUSHAYIDI Déo, Bernard NTAGANDA n’abandi…..ntabwo bo barebwa nibikubiye muli ayo masezerano?

Abantu barasirwa akamama na Police y’u Rwanda hirya no hino mu gihugu, urugero Dr. Gasakure, IMAMU Mugemangango wari wungirije umusigiti wa Kimironko n’abandi ntarondora byitwa ko baraswa bashaka gutoroka police! Aliko mu by’ukuri nta kuntu imbohe ishobora gucika umurinzi wayo byongeye kandi yambitswe n’amapingu ku buryo yabasha kwinyagambura biyoroheye! Birababaje kurenza urugero!

Kugeza magingo aya hasabwe amatohoza ku mirambo irenga mirongo ine y’abanyarwanda yishwe ibohewe amaboko inyuma izirikiyeho n’amabuye manini (à la FPR) ikaba yaragaragaye mu kiyaga cya Rweru ho mu Rwanda aliko kugeza magingo aya nta trace n’imwe y’abo bantu ugerageje no kubihwihwisa uba uhisemo kubasanga! yewe n’imiryango yaburiwe ababo ntishobora gukopfora! Imana izabakire mu bayo! umuntu akaba yibaza icyo uwo muryango mpuzamahanga Human Right Watch (HRW) kimwe n’umuryango nyarwanda wita ku burenganzira bwa muntu (NCHR) icyo yaba imariye abanyarwanda mu kutagaragaza aho ukuri kuba guherereye mu rwego rwo kurenganura abo bavandimwe!

Ku italiki ya 01 Gashyantare 2016, umunsi w’intwari mu Rwanda! Intwari ni izihe? Intwari ni nde? Intwari se ni agatsiko k’abanyarwanda gahejeje abandi mu bihome? abandi ishyanga? Cyangwa karasa inzirakarengane ku manywa y’ihangu? Ababyeyi bacu se bishwe ku bwamaherere na Leta ya FPR bo bazashyirwa mu kihe kiciro cy’intwari? nta gahora gahanze tubitege amaso!

Banyarwanda banyarwandakazi rero , ni agahomamunwa gusa! Jye nsanga abakwiye kugirwa intwari ari nka Mme Victoire Ingabire UMUHOZA n’abandi bishwe urubozo twazajya twibuka kubw’ibikorwa n’ukuri kwabo mu guharanira ukwishyira ukizana kwa buri munyarwanda.Mubeho.

Rwanda. Abahinzi bakomeje gutabaza kubera « Nzaramba »!

Umuturage wo muri Rwabicuma mu karere ka Nyanza, yabwiye umunyamakuru wa radio 1 kuri uyu wagatatu le 27/1 ati ikintu kidashira ntakundi wacyita atari Nzaramba. Ati dufite inzara idashira twatejwe nuko ubutaka bwacu bwaciweho amaterasi, bwegurirwa abashoramari bahahinga urusenda, twe banyiri ubutaka baduha ibihumbi 70, bise icyata mutima. Abaturage baravuga ko aya amafaranga ntacyo yashobora kubamarira kuko niyo agomba kubatunga, bakariha amafaranga y’amashuri na mutuelle de santé. Abaturage bakomeje kubwira umunyamakuru ko abashoramari bafashe ubutaka bwabo ngo bahinge urusenda ruzajya rujyanwa ku masoko mpuzamahanga! Bati usibye ko twabwiwe ko isoko ryabuze n’umusaruro nimucye.

Ikibabaje abaturage bararirira ubutegetsi butabumva kuko basaba ko amafaranga bahabwa yo gukodesha ubutaka bwabo yongerwa cg se bagahabwa aho guhinga ibindi bihingwa byabatunga. Umuyobozi w’akarere ka Nyanza, Murenzi Aboudala yabakuriye inzira k’umurima kuko yavuze ko nta kindi gihingwa bashobora guhinga aho Rwabicuma kuko hari abashoramari bahatanze amafaranga menshi mugutunganya amaterasi no gutera urusenda. Ati gahunda ya leta ihari ni uguhinga urusenda! Kandi abaturage ntibasubizwa ayo materasi! Ikibabaje ni uko ntagisubizo afite kuri iyo nzara imereye nabi abaturage ayoboye!

Muri EDPRS II, ubutegetsi bwa Kagame buvuga ko bugomba gushyiraho ubuhinzi bwo gucuruza, noneho abahinzi bakavanwa muri uwo mwuga bagashakirwa ibindi byo gukora. None se abahinzi ba Rwabicuma bahawe iyihe mirimo yo kubatunga ko ubutaka bwabo bwahawe abashoramari ?

Ubu amajyepfo yose yu Rwanda arataka Nzaramba. No mutundi turere abahinzi barataka ko indwara za kirabiranya na kabore zimereye nabi ibyo bahinze.
Le 21/1 abahinzi b’ibirayi bahuye n’abatubuzi b’imbuto zabyo bababwira ko imbuto zabo zitagitanga umusaruro ko ubu ntacyo basaruye nabagize icyo basarura uturayi twari duto.

None se u Rwanda rutagihinga ibijumba, ntirweze ibirayi, nta bishyimbo, ntibahinge amasaka none bazahingira amasoko mpuzamahanga, 85% bari batunzwe n’ubuhinzi batungwe ni iki ? Ikindi kibazo ni uko nibihingwa byatoranyijwe ngo bihingirwe ayo masoko byagaragaye ko ayo masoko atigeze ashakwa. Ari abashoramari ubwabo ari abahinzi bose barahomba ! None bakomeze batubeshye ko u Rwanda mu myaka 4 isigaye tuzaba tubarirwa mu bihugu bifite umutungo uciriritse?( middle income country)

Ubutegetsi bwa Kagame niba budafashe ingamba nshya mu maguru mashya Nzaramba iragarika ingongo nkigihe cya Ruzagayura.

Banyarwanda, ubabaye niwe ubanda urugi ! Dukomeze twemere gahunda zigerageza ziri kudukorerwaho? Dukomeza gucyena no gusonza? Igihe kirageze ngo ubutegetsi bwa Kagame bwumve abo buyobora !Ariko namwe abayoborwa mu menye ko mutazumvwa mutavuze!

Abatabizi bicwa no kutabimenya koko!

Nkulikije ibihe bya politiki bitandukanye igihugu cyacu kimaze kunyuramo muli iyi myaka 25 ishize abanyarwanda tugendera ku iteknica ry’ikinyoma cya FPR na Prezida Kagame kugira ngo bakomeze igundira ry’ubutegetsi babonye mu Rwanda nyuma y’imeneka ry’amaraso y’inzirakarengane zitabarika; naribajije nti ese abanyarwanda dufite amaso yo kureba? Kuko ureba aba anatekereza, cyangwa se ntiturakura mu mutwe! niyo mpamvu nahereye kuri uyu mugani ngira nti ‘’abatabizi bicwa no kutabimenya koko! ‘’.

Kubona bamwe mu Banyarwanda batarahumuka ngo bamenye icyo ijambo demokrasi ribabwira ! Kimwe muri ibyo akaba ari ugusimburana ku butegetsi bw’igihugu mu rwego rwo kwirinda imvururu zishingiye ku moko, icyenewabo, ihohoterwa ry’ikiremwamuntu muri rusange mu rwego rwo gushaka iterambere rirambye, bakaba batabikozwa! ahubwo barahindutse inkomamashyi bamwe badatinya no kwitiranya Prezida Kagame na Yezu , abandi ngo ni impano y’Imana , n’ibindi…….twagwiririwe n’amahano ntitwabimenya! Birababaje!

Nyuma y’ibyo byose bivugwa rero mbona ntaho abanyarwanda tugeze cyangwa turimo tugana aho tureka kwiringira Imana yaduhanze tukiringira ibiremwa n’udutsiko twabyo ahanini usanga twarivuruguse mu bwicanyi butabarika haba mu Rwanda no hanze yarwo. (FPR na Kagame) !

Nshyigikiye umunyarwanda wese wifuza impinduka n’isimburana ry’ubutegetsi binyuze mu mahoro kuko nemera ko nta muntu kamara ubaho, ni agasuzuguro gakabije ku banyarwanda bose,byongeye ni ukwisuzugura; by’umwihariko abize kandi bafite n’ubushobozi bwo kuba bahatanira ubuyobozi bw’igihugu.

Banyarwanda, Banyarwandakazi, nshuti z’u Rwanda, nkuko twabyiyemeje tugomba gukomeza urugamba rwo guhindura imyumvire vuba na bwangu bityo uyu mwaka wa 2016 dutangiye utazadusiga muli aka gasuzuguro! twoye gukomeza gushyigikira amafuti dutiza umurindi Prezida Kagame n’agatsiko ke kugirango bakomeze kugundira ubutegetsi ubuziraherezo kuko byazatuviramo amahano! Nshuti z’u Rwanda dufatanye nta kuruhuka mu guhanura uyu mugabo Prezida Paul Kagame ijuru ritaratugwira!! dore ko baca umugani mu kinyarwanda ngo ‘’amatwi arimo urupfu ntiyumva’’, biragaragalira buri wese ko uyu mugabo agomba kugenda yaba ku neza cyangwa ku nabi.

Banyarwanda, Banyarwandakazi, kuva muli 2010 muziko Prezida Paul Kagame yakoresheje amayeri yose harimo gushaka ko abaturage bamukunda ku ngufu none bigeze aho avuga ko intebe akicayeho mu rugwiro ari Abanyarwanda byabyifuje kandi ko atabahemukira! Ibyo byose akabikora atitaye ku ngaruka zabyo, gusa Imana ijye ifasha Abanyarwanda mu bihe nk’ibi. Mugire amahoro.

Byanditswe kuwa 27/01/2016, na:
A.BEN NTUYENABO,
KIGALI-RWANDA.

Prezida Kagame yagombye gutera ikirenge mu cya mugenzi we wa Senegal prezida Macky Sall.

Niba ntibeshya ni ubwa mbere mu mateka y’isi birenze kuba demokrasi aho umuprezida yigabanyiriza umubare w’imyaka ya mandat y’umukuru w’igihugu yatorewe n’abaturage nta mpamvu z’uburwayi cyangwa iza politiki zibimuteye ari ukugira ngo gusa yubahirize ibyo yasezeranije abaturage n’amahanga cyane cyane abatavuga rumwe nawe.

Uwo nta wundi ni Prezida MACK Sall w’igihugu cya Sénégal, nka kimwe mu bihugu bimaze kwanikira ibindi muli demokrasi ku mugabane w’afrika.

Prezida MACK Sall akaba aherutse gusohora umushinga w’itegeko –nshinga rya republika urangwamo n’icyemezo cy’uko yigabanirije imyaka igize manda ye yo gukomeza kuyobora igihugu cya Sénégal .

Itangazo rya prezidansi ry’igihugu cya Sénégal rigakomeza rivuga ko uyu mushinga w’itegeko ushyizweho hakulikijwe ishimangira ry’ibyagezweho muli demokrasi n’iyubahiriza ry’ibyo Prezida Mack Sall yari yarasezeranije abaturage b’igihugu cye. Nkuko uwo mushinga ubigaragaza rero, mandats z’umukuru w’igihugu cya Sénégal ntizizongera kurenza imyaka 5 uhereye kuli Prezida MACK Sall uriho ubu;umushinga ugakomeza uvuga ko nta muntu n’umwe wemerewe manda zirenze ebyiri zikulikiranye.

Icyo cyemezo cya Prezida MACK Sall kikaba kije giturutse ku ngendo yakoze muri 2012 aho yari yarabyemereye abaturage b’igihugu cye, mu myanzuro y’inama yabahuje irimo abanyepolitiki, abaturage ndetse by’umwihariko n’abatavugarumwe n’ubutegetsi, yari yarabaye ku mataliki ya mbere y’ukwa kamena 2008 na 29 gicurasi 2009.

Banyarwanda, Banyarwandakazi, kuli Prezida MACK Sall w’igihugu cya Sénégal ’’imvugo niyo ngiro’’, umugabo wavutse kuwa 11 ugushyingo 1961 akaba ari prezida wa Sénégal kuva taliki ya 2 mata 2012; abaye umwe mu baprezida b’afrika b’intangarugero n’indashyikirwa muli demokrasi; ni ikitegererezo cy’ahazaza h’umugabane wa Africa. Nkaba nsanga ba giti mu jisho nabo uhereye cyane cyane kuli Prezida Kagame n’abandi. bakagombye kwisubiraho aho kugira ngo bahitemo inzira y’umwijima no kuba ibicibwa mu ruhando rw’amahanga.

Mugire amahoro.

Byanditswe kuwa 24/01/2016, na:
A.BEN NTUYENABO,
KIGALI-RWANDA.

Rwanda: prezida Kagame yasangiye ubunani n’abahagaraliye ibihugu byabo mu Rwanda.

Nkuko bisanzwe bigenda uko umwaka utashye habaho umuhango w’umuhuro utegurwa na Ministère mu nshingano zayo mu rwego rwa diplomatie hagati ya Prezida wa republika n’abahagaraliye imiryango mpuzamahanga idafite aho ibogamiye n’abahagaraliye ibihugu byabo mu Rwanda mu rwego rwo gusangirira hamwe ubunani; ni kuri uyu wa 15/01/2016 mu masaha y’igicamunsi muli village urugwiro habereye uwo muhuro wagaragayemo by’umwihariko isura ya politiki y’u Rwanda muli iki gihe, aho Prezida Kagame wasaga nudafite umutima mu gitereko yihutiye kubanza gushimira bamwe mu ba diplomates ku bw’ubutumwa bamwoherereje bumwihanganisha kubera kubura umubyeyi we witabye Imana mu mwaka ushize.

Yakomeje agira ati nashimye akazi gakorwa n’abahagaraliye ibihugu byabo n’imiryango mpuzamahanga idafite aho ibogamiye mu Rwanda, ati kuri twe ni ingirakamaro cyane kuko mu Rwanda dufite ’’intego zo gutera imbere’’.(nkaho abandi ntazo bagira!). Ati :’’abanyarwanda bakora ngo ubwabo babeho neza, bo bagena ahazaza habo’’, akomeza ababwira ati : nk’intumwa z’ibihugu byanyu , muri mu mwanya mwiza wo kuba aba mbere mu guhamya ibi, hanyuma mukabitangariza abo muhagaraliye iyo babibasabye! nko kubamenyeshako bagomba kujya batanga rapports zabo kubabatumye hakurikijwe ibyo yabagejejeho gusa! (à la FPR seulement), ko ibindi bitabareba!

Mu bwishongozi bwe, Prezida Kagame yakomeje ababwira kandi ko Diplomatie y’u Rwanda nta mupaka, ko u Rwanda rugira uruhare mu mibanire mpuzamahanga hagamijwe gusobanura icyo abanyarwanda aricyo nk’abantu, yungamo ashimangira ko nta gushidikanya guhari, ati abanyarwanda dukeneye kuba abo turi bo, dushobora no gukora mu rwego rwo kurushaho kuba abo turi bo ubu. ‘’ ati icyo nicyo turwanira kugeraho’’.

Prezida Kagame akaba yashoje ijambo rye abifuriza umwaka mwiza no kuzakomeza gukorana n’u Rwanda muli byinshi ruteganya kugirango rugere ku iterambere rwifuza kandi rukwiye.

Banyarwanda, Banyarwandakazi, iyo usesenguye ayo magambo nta gushidikanya ko akubiyemo ubwishongozi ntagereranywa buvanze n’umujinya muranduranzuzi akaba aribyo biyoboye igihugu cyacu muli iki gihe aliko jye nkaba nakwihanulira Prezida Paul Kagame mucira uyu mugani uvuga ko »Utazi ikimuhatse areba imb… ya Se igitsure ».

Mugire amahoro.

Byanditswe kuwa 16/01/2016, na:
A.BEN NTUYENABO, KIGALI-RWANDA.

Ishyaka FPR na prezida Kagame bazahabwa isakramentu rya Penetensiya na nde?

Nkulikije imanza za politiki abayanyarwanda bamaze iminsi buhagizwamo ku maherere adafite shinge na rugero uretse ihohotera gusa rishingiye ku batavugarumwe n’ubutegetsi cyangwa kuzira ko ufitanye isano nukekwaho ibyaha runaka kandi tuziko icyaha ari gatozi; binteye gutanga urugero ku rubanza rw’abagabo Col. Byabagamba Tom, Général Rusagara Frank na Sergent Kabayiza rwabuze gicibwa rukaba rutegereje gukatwa hakurikijwe amabwiriza cyangwa icyifuzo cy’Imana y’u Rwanda Nyakubahwa Kagame aho ubutabera bukorera mu kwaha kwe bupanga bamwe mu ba colonels bakajyanywa ku murongo mu nkiko (musururu moja! ) bakajya gushinja bagenzi babo ibinyoma, yewe bamwe muli bo ntibagitinya no gutuka abo baje gutangaho ubuhamya ngo barabashinja imbere y’inteko y’abacamanza irebera! Ibi byabaye kuri umwe muli aba basirikare navuze haruguru ariwe Gén. RUSAGARA Frank kuwa 06/01/2016 aho umutangabuhamya we Col. Camille KAREGE yamwise umurwayi wo mu mutwe ndetse yongeraho ko n’umuryango we ari uko!

Uyu Général RUSAGARA Frank nubwo izi manza FPR yamuroshyemo zitamworoheye aliko yababajwe cyane nariya magambo ko arwaye mu mutwe we n’umuryango we! Yibaza ukuntu umurwayi wo mutwe azanwa mu rukiko mbere yo kujyanwa kwa muganga!

Banyarwanda banyarwandakazi, biteye agahinda mu kwibaza aho ubutabera nk’ubu buganisha igihugu! Kubona mu mikirize z’imanza nyinshi nk’izi usanga hariho Team iba yapanzwe aribo batangabuhamya mu gushinja ibinyoma imbere y’abacamanza barebera bakanga bakirengagiza ukuri bakubona! Ngo batavaho batera ibuye ku Karere bikabaviramo kubika imbehe zabo! Ibi byose bikaba biterwa na ya système juridique yituriye mu kwaha kwa FPR na Prezida Kagame iba igamije gukanira urukwiye (uburyo bwa Yezu na Pilato).

Banyarwanda banyarwandakazi, ntawazuyaza mu guhamya ko ubutabera bw’u Rwanda bugeze aharindimuka! ariyo mpamvu mu gutangira iyi nkuru nibazaga uzaha isakramentu rya Penetensiya FPR na Prezida Kagame! yewe na Mgr Mbonyintege ubanza noneho atabyemera ! Tubitege amaso.

Byanditswe ku 09/01/2016, na :
A.BEN NTUYENABO, KIGALI-RWANDA.

2016: Umwaka wo gushyira akadomo kw’iherezo ry’ingoma ya Semuhanuka

Paul Kagame

Uwo ntawundi mwumva tuvuga muli iki gihe mu bitangazamakuru bitandukanye byo ku isi; ni Prezida Pawulo Kagame umaze kwiyemerera kuba umwami w’u Rwanda nkaho yananiwe kugarura Umwami Kigeri NDAHINDURWA uheze mu buhungiro! nibura kugira ngo areke kwishyira ku karubanda yigira ibyo adakwiye.

Prezida Kagame rero n’ishyaka rye FPR mu kwirengagiza ibibazo by’ingutu byugarije igihugu cyacu cyane cyane byerekeye politiki, uburezi n’ubukungu by’ igihe kiri imbere, akaba amaze kwiyemeza icyerekezo 2050 nyuma yuko arangije gushyira mu bikorwa iteknika ry’itegekonshinga na referendum yegetse ku Banyarwanda hutihuti batarasobanukirwa n’ikinyoma ariho abikoreza.

Ibyo byose abanyarwanda bakaba babona bibitura hejuru nk’ishami rihanutse mugiti bitunguranye ! ngo ni uburyo bwo gushimangira ibyagezweho muli vision 2020 kandi itararangira! bityo ngo bikaba bigamije no kwongera ubukungu mu gukomeza kurushaho kwigira no kwigenera kw’abanyarwanda.

Mu ijambo rye risoza umwaka wa 2015, Prezida Paul Kagame wagaragaraga nk’utiyizeye nkaho urufunguzo rwo gukomeza ubuzima bwe bisigaranywe n’abari mu kwaha kwe gusa yongeye kwemeza abanyarwanda ku ngufu ko aribo basabye ko itegeko nshinga rivugururwa bakaryemeza no muli referendum, yagize ati: ‘’Mwansabye kuzakomeza kuyobora igihugu nyuma ya 2017! Yongeraho ati nta kuntu ntabyemera, ati aliko si ugushaka umuyobozi w’igihugu uzakomeza ubuziraherezo kuko nanjye atariko nabyifuza!

Banyarwanda Banyarwandakazi muriyumvira ko Prezida Paul Kagame akomeje kwivuguruza mu magambo ye buri kanya haba imbere y’abanyarwanda cyangwa amahanga,amagambo ya Prezida Paul Kagame ntanarimwe ahuza! Ni ukuvuga ko kuri we kuyobora igihugu ubuziraherezo abibonamo umurage aliko ku bandi hari impamvu zabitera kuburyo bizageraho habe ihererekanwa ryazagirira akamaro igihugu cyacu!

Prezida Paul Kagame akomeza avuga ko ariyo mpamvu yifuje gukomeza inzira yatangiye yo guhindura igihugu nkuko abyifuza, ati nzakomeza gushimangira ubuyobozi butekanye kuburyo n’abatunenga bitewe nuko badashaka kutwumva birashoboka ko amaherezo twazumvikana buri wese niyubaha undi, ibiganiro bikaba byaba intangiriro.

Banyarwanda Banyarwandakazi, nta narimwe uyu mugabo yigera atobora ku mugaragaro mu gihe gikwiye ngo atangaze ko yinjiye mu gikorwa runaka ahubwo nkuko akunze kubyivugira akora nka wa muserebanya witwa icyugu nicyo kibanza kunyeganyeza aho gikandagiye kugira ngo kirebe ko hakomeye kibone gitere intambwe!

Ni muli urwo rwego rero adashobora kuvuga ku mugaragaro ko agiye kuganira n’abatavugarumwe nawe cyangwa ngo avuge ko atanze imbabazi kumfungwa ahejeje mu bihome barimo Mme Ingabire Victoire Umuhoza (le male Mandela du Rwanda), Mushayidi Déo n’abandi bazira guharanira ukwishyira ukizana kwa buri munyarwanda wese.

Banyarwanda Banyarwandakazi , igihe twari dutegereje cyarasohoye nta gucika intege kuko ibyiza bigeze mu marembo aho buri munyarwanda wese anyotewe n’ubwisanzure busesuye muli uyu mwaka dutangiye wa 2016. Uzababere uw’intsinzi ihebuje. Murakoze.

Byanditswe kuwa 04/01/2016, na:
A.BEN NTUYENABO, KIGALI-RWANDA.

Amakuru ki ?

Amakuru