Abadepite bo mu Rwanda

Ntibyumvikana  ukuntu  buri  mushinga  wose  ushyikirijwe  inteko   utorwa  kubwiganze  bw’amajwi  ijana  ku  ijana! ni  ukuvugako  ahari  batumva  igisobanuro  k’ijambo ‘’Parlement’’, nta nubwo  batekereza  icyo  abaturage  baba babategerejeho  kandi  biragaragara  ko  nubundi  uburyo  bashyirwa  muli  iyo  myanya  ntaho  bitaniye na  za nominations.

Ubu  noneho  kuri  uyu  wa  4/11/2015 bemeje  umushinga  w’itegeko  rigena  imitunganyirize  y’ubwishingizi y’ibigenerwa  umugore  uri  mu  kiruhuko  cyo  kubyara; akazajya  ahabwa  umushahara  we  wose  mu gihe k’ibyumweru  12.

Bwana  Uzziel  NDAYISABA, SG  muli  Miniplan  yabwiye  abadepite ko  ayo  mafranga  azajya  ahabwa  umubyeyi azajya  akatwa  ku  mushahara  wa  buri  mukozi  wese  kabone  n’aho  yaba  atari  umugore  ndetse n’umukoresha  we.  Akomeza  avuga ko  inyigo  yagaragaje  ko  0.6%  ari  umusanzu  uzajya  utangwa  ku mushahara  mbumbe  wa  buri   mukozi, noneho  umukoresha  agatanga  0.3%  n’umukozi  agatanga  0.3% akazajya  ashyirwa  mukigega  kihariye  kizaba  kiri  muli  RSSB (Rwanda  Social  Security  Board).

Banyarwanda  banyarwandakazi, iri  tegeko  ryemejwe  mu gihe  bamwe  mu bakozi  bakorera  agashahara  ku kwezi  bavuga  ko  batakibona  ifunguro  rya  saa sita, aho  umwe  muribo  yantangarije  ko  asigaye  afata ifunguro  rimwe  mu minsi  ibili! Ati  sinabona  ibiryo ngo  mbone  nuko  ngera  kukazi, birumvikana  bitewe  n’ibiciro by’imodoka  zitwara  abagenzi  nabyo  byiyongereyeho  hafi  inshuro  ebyili  muli  iyi  minsi  uhereye  ku  italiki  ya 2/11/2015 kandi ngo  bikaba  bitazasubirwamo  mbere  ya  2017.

Abadepite  rero  munteko   siko  babibona, bigiza nkana  kandi  baziko  itegeko  rivuga ko  umushahara  w’umuntu ari  ntayegayezwa  kuko  uba  ufite  amategeko  awugenga, byongeye  kandi  baryemeje  ntawigeze  abaza  kubo bireba  ngo  bumve  icyo babivugaho, bose  ngo   batoye ‘’ Yego’’.

Abadepite  bagombye  kujya  impaka  na  Minecofin  ibifite  mu nshingano  zayo  mu kurebera  hamwe ahandi  ayo mafranga  yashyirwa   muli  icyo kigega  yaturuka.

Abadepite  ntibakagombye  kwemeza  uwo  mushinga  w’ikatwa  ryayo  mafranga  k’umukozi  utabyara  cyangwa se  udateganya  kwongera  kubyara, bagombye  kureba  ukuntu  yajya  akatwa  ababyara  gusa  cyangwa ababyifuza. Hagati  aho  abakozi  baribaza  ishyirwaho  ry’ibigega  buri  munsi  muli iki gihugu, uko bwije  uko bukeye  ko  bimaze  kubarambira  mu  guhahira  mu  mifuka  y’ubuyobozi  bwa  FPR  kandi  ingo  zabo  zirimo ubusa  bitwa  ngo  bakorera  Leta.

Muli  iri  tegeko  rishya  kandi  hongewemo  iminsi  y’ikiruhuko  igera  ku byumweru  12  kandi  umugore  wabyaye akazajya  ahabwa  umushahara  we  wose  100%, mu  gihe  itegeko  ryariho  ryo  muli  2009 mu  ngingo  yaryo  ya 66  ryavugaga ko  umugore  wabyaye  atari  mu  bwishingizi  bw’ikiruhuko  cyo  kubyara   ahembwa  umushahara we  wose  mu  byumweru  6  yashaka  kwiyongeza  ibindi  6  agahembwa  20%  y’umushahara  we  wose.

Banyarwanda  banyarwandakazi, iri  tegeko  ryaraye  ryemejwe  n’abadepite  riragaragara  nkaho  rikangulira abanyarwanda  kubyara   nta  gitangira, birababaje  ibitekerezo  nk’ibi  bitangwa  n’abakagombye  kureberera igihugu, aho  batabona  ingaruka  igihugu  gifite  kubera  ubwiyongere  bw’abaturage  bukabije, inzara  yugarije igihugu  n’ibindi…abakozi  bakorera  agashahara  k’ukwezi  bakaba  bamaze  kurambirwa  kwikorezwa  iyo  mizigo Leta  irimo  kubahekesha  muli  ibibihe.Murakoze.

Byanditswe  ku wa  05/11/2015, na:
A.BEN  NTUYENABO, KIGALI-RWANDA.