Archives mensuelles : novembre 2015

Rwanda. Imbabazi za bihehe zirava he? Kuri Paul Kagame imvugo siyo ngiro!

Kuri 27/11/2015, mu muhango wo guherekeza umubyeyi we Asteria BISINDA witabye Imana kuya 22/11/2015 aguye mu bitaro byitiriwe umwami Roi-Faiçal azize uburwayi; Prezida Kagame yatangaje ko abuze inshuti ye magara! Ati uyu mubyeyi wanjye Asteria twabanye igihe kinini mu buhungiro hamwe ari umgabo ahandi umugore kubera ko papa yari yaritabye Imana muri za 1972, dukomeza ubuzima bubi imyaka 40 yose kugeza dutashye, ati ababyeyi bacu bahoraga batubwira kutazihorera kuko n’abashakaga kutwica mugihe twahungaga ni abo data yari yaragabiye ati muramenye mutazihorera narimwe kubabagiriye nabi! Ati asteria yahoraga ansaba by’umwihariko kuba umukristu nkagera ku rwego nk’urwe!

Prezida Kagame akomeza agira ati : ‘’u Rwanda rwashyize imbere imbabazi kuko ari umurage nasigiwe n’ababyeyi kuko ariyo nzira yonyine iganisha igihugu mu iterambere ati aliko ntangazwa n’abantu bambwira ngo mu Rwanda ntabwo nihanganira abatavugarumwe nanjye ati abavuga gutyo ni ukubasuzugura gusa, ati nihanganiye abatwiciye ndetse n’abaduhigaga nkaswe abatavugarumwe natwe??’’

Banyarwanda, banyarwandakazi, ijambo ’’imbabazi ‘’ prezida Kagame asa nuwibanzeho yaba se noneho urupfu rw’umubyeyi we Asteria (Imana imuhe iruhuko ridashira) rumushoboje gukanguka akamenya ko ntawe uruteguza? Ko kudatanga imbabazi cyangwa kwihorera bigira ingaruka zikomeye? Ejo cyangwa ejobundi tukumva zimwe mu mbohe zitavuga rumwe nawe nka Mme Ingabire Umuhoza Victoire, Mushayidi D. n’abandi…..bagiriwe imbabazi….?… Imana ishobora byose ibyuzuzemo umwuka muziranenge. Ati: ’’Ababyeyi banjye bahoraga bambwira kubabalira kuko n’abashakaga kubica ni abo data yari yaragabiye!!! kurinda duhungira muli Ouganda’’.

Banyarwanda, Banyarwandakazi, u Rwanda ntiruba ruvugwa nk’indengakamere mw’ ihohoterwa ry’ikiremwamuntu mu ruhando mpuzamahanga iyo Prezida Kagame aza kuba yarumvise akanubahiriza umurage n’impanuro z’ababyeyi be. Aliko ntibyamuca intege kuko igihe gishobora kuba ari iki, kuko imbabazi zose zituruka kuyaduhanze. Iyo uzihereranye hangirika byinshi bitagira igaruriro aka wa mugani ngo urwishigishiye ararusoma. Murakoze.

Ku wa 29/11/2015, na:
A.BEN NTUYENABO, KIGALI-RWANDA.

Rwanda. Ubutegetsi bwa FPR nibureke gukomeza kujijisha Abanyarwanda

Nkurikije umushinga w’ivugururwa ry’itegeko nshinga rya republika y’u Rwanda nkuko uherutswe kwemezwa na Sénat y’u Rwanda biragaragara ko ari umwe mu migambi mibisha y’ishyaka FPR yatangiranye nawo kuva igishingwa hagamijwe gufata ubutegetsi no kubugundira ubuziraherezo hifashishijwe amayeri n’ikiguzi uko cyaba kingana kwose. Ni muli urwo rwego rero abanyarwanda badashobora kwihanganira ingoma y’igitugu n’iterabwoba rikabije, by’umwihariko ntibazakomeza kwihanganira ikinyoma, uburiganya, ubwicanyi n’ubusahuzi bikorwa n’ubutegetsi bwa FPR yateje mu bana b’u Rwanda guhera taliki ya 01 ukwakira 1990 na nubu ikibikomeza, ikaba idashaka kwicarana n’abandi banyarwanda mu buryo bwo guhererekanya ubutegetsi mu mahoro.

Ubwo abadepite n’abasenateri imitwe yombi yari imaze kwemeza burundu umushinga w’itegeko nshinga rivuguruye yishimiye icyo gikorwa ivuga ko yesheje umuhigo kuba yubahirije ibyo abaturage basabye mu kuba bongeye kwicaza Paul Kagame mu Rugwiro nkuko nawe ubwe yabibahayemo umukoro, bishatse gusobanura ko byari umusaraba yari yarabahekesheje, aliko kwa kutareba kure aho igihugu kigana abadepite bo bumva ko bageze ku ntsinzi! Birababaje! uwabahanuye ko bagombye kwegura ntiyavuze ubusa, biragaragara ko nabo ari ba Rwabujindiri Ruryantiruhage! cyangwa aka wa mugabo Rutuku wavuze ati ‘’la démocratie en afrique c’est l’estomac’’, biteye agahinda! FPR nireke gushakira amata mu matako y’injangwe! kuko igihe ni iki cyo kwicarana n’abandi banyarwanda. Hagati aho kuri uyu wa 25/11/2015, Ministri w’intebe Murekezi Anastase akaba yarayoboye inama ya gouvernement isaba Prezida Paul Kagame kwihutisha ibisabwa byose kugira ngo réferendum ikorwe mu maguru mashya. (agashya ni uko uyu mu ministri w’intebe aribwo yahabwa uburenganzira bwo kuyobora inama ya gouvernement ku nshuro ya mbere kuva yashyirwa muli uriya mwanya..! biteye agahinda! aliko iyo wiyemeje kuba inkomamashyi nuko bigushyikira).

Banyarwanda banyarwandakazi, abategetsi bose barangwa n’imyitwarire nk’iyi nta mwanya bagombye guhabwa mu miyoborere y’abaturage, ni ba ‘’NTIBANYURWA’’ baba bifuza gutegeka ubuzima bwabo bwose bagamije kwikubira imitungo yose y’igihugu hamwe n’imiryango yabo gusa, abandi bagasigara baratagangaye bifuza kuba abacakara babo. nkuko bimaze kumera hano mu Rwanda.

Iri tegeko nshinga ryatekinitswe hagamijwe guha Paul Kagame uburyo bwo kuzategeka u Rwanda ubuzima bwe bwose hatiriwe hakorwa andi mavugururwa, gusa nuko no mukurikora mbonamo ubuswa bukabije, kuko niba ingingo ya 167 ije gukemura ubusabe bw’abaturage bo muli 2015 murumva bihuriyehe n’abaturage bo muli 2030 cyangwa 2050…….? Ibyo byose ni kubwumvikane bw’abagize inteko imitwe yombi kugira ngo itegeko nshinga ridoderwe umuntu umwe kurinda aguye ku butegetsi. Birababaje!

Banyarwanda banyarwandakazi, ubumwe n’ubwiyunge byagerwaho bite mu gihe politiki ya FPR ishingiye mu guhiga bukware no gukenesha abayirwanya, abatutsi n’abahutu batavuga rumwe na Paul Kagame? basenya amazu y’abaturage, hacuruza gusa utanga imisanzu ya FPR, bamwe bakirira ku bandi ku mpamvu zitandukanye n’ibindi…..!

Banyarwanda banyarwandakazi, uretse ko abanyarwanda bakomeje guteseka aka kageni; inzara, ubuhunzi, ubwicanyi, gufungirwa ubusa nka Victoire Ingabire Umuhoza, Mushayidi n’abandi….ntitwagombye kubabazwa nuko umuntu yidodeyeho itegeko nshinga kuko nsanga ari amahire kuri twe, ni izindi ngufu za politiki twesheje kuburyo bigaragalira amahanga n’abandi bose bari bagishidikanya uburyo u Rwanda ruyobowemo nabi, bityo bikaba byakwihutisha amahinduka twese dutegereje. Abanyarwanda b’ingeri zose bakicarana bataryaryana mucyo nakwita ‘’Dialogue Inter –rwandais’’, byo ntsinzi y’amahoro arambye. Dukeneye ubuyobozi budafite aho bubogamiye bwunga abanyarwanda bwazashobora guhangana n’ingengabitekerezo FPR-INKOTANYI yatuzaniye. Mugire Amahoro.

Byanditswe ku wa 26/11/2015, na:
A.BEN NTUYENABO, KIGALI-RWANDA.

Rwanda : Ubugizi bwa nabi bumaze gufata indi ntera mu rwa Gasabo.

Uko bwije uko bukeye nta munsi w’ubusa urangira hano mu Rwanda utumvise amahano y’impfu z’ubugizi bwa nabi, ngabo abishwe n’abo bashakanye, abica abana babo, n’ibindi byinshi bishingiye ku mitungo.

– Muli iki cyumweru gishize umuturage witwa Ndayishimiye uri mu kigero cy’imyaka 33 wo mu Mudugudu wa AGAHAMA mu Murenge wa JABANA, Akarere ka GASABO yicishijwe inkoni nyuma yuko yemera icyaha akagisabira n’imbabazi, akaba yarakubiswe n’abagabo batanu barimo n’umukuru w’uwo mudugudu wa Agahama hamwe n’ushinzwe umutekano. Yashinjwaga kwiba inyundo y’umukuru w’uwo mudugudu akaba yarashyinguwe kuri iki cyumweru gishize taliki ya 22/11/2015 mu irimbi rya Ngiryi ho mu Karere ka Gasabo.

Abaturage badutangarije ko bibabaje, bavuga ko abayobozi nk’abo badakwiye kubayobora ahubwo bakwiye kujya bakanirwa urubakwiye.

Umunyamabanga nshingwa bikorwa w’uwo Murenge wa Jabana Bwana Kalisa J. Sauveur we yadutangarije ko abo bayobozi bakekwaho kwica uwo muturage batawe muri yombi, ati baramwihereranye kuko yabibye bamumaramo umwuka, ati ubu barimo gukurikiranwa n’inzego zibishinjwe.

– Mu Karere ka RUSIZI naho muli iki cyumweru gishize, ku wa kane taliki ya 19/11/2015, abaturage bo mu Kagali ka Nyange, Umurenge wa Bugarama bigabije akabari kitwa VIP BAR bangiza inyubako n’ibikoresho byayo nyuma yo gusanga umurambo w’umwana w’umukobwa w’imyaka 3 y’amavuko witwa Gisèle Irakoze yapfiriye mu cyobo gifata amazi y’ako kabari mu gikari cyako. Uburakari bwabo baturage bukaba bwarazamuwe n’amagambo ushinzwe umutekano w’ako kabari yari aherutse kubwira abaturage ko umwana azahafatira azamwica kandi ko yabiherewe uburenganzira na nyiri akabari yewe ngo n’ihene azafatira kuri ubwo butaka azayibage iribwe nta rubanza!. Ayo magambo akaba ariyo yateye abaturage uburakari bukabije bituma birara mu kabari bamenagura ibikoresho byose bahasanze bakoresheje amabuye.

Ibi bikorwa byahagaritswe n’abasirikare n’abapolisi banze ko iyo myigaragambyo yafata indi ntera. Nyuma y’inama yahuje abagize umutekano na Gitifu w’uwo murenge wa Bugarama Bwana Rukezambuga Gilbert banzuye ko bagiye gushakisha abagize uruhare bose kuli urwo rupfu rw’uwo mwana.

– RWAMAGANA naho haravugwa ibikorwa by’ubugizi bwa nabi, impfu z’abantu 3 bapfuye mu mpera z’iki cyumweru gishize mu Mirenge itandukanye y’ako karere:

.Umwana w’imyaka 2 watemwe na Se,
.Umugabo watemwe n’umugore We,
.Umusore w’myaka 24 ukirimo gukorerwa isuzuma ngo hamenyekane uburyo yapfuyemo.

Uwo mwana w’imyaka 2 wo mu murenge wa Karenge akaba yaratemwe na Se umubyara Nkizingoma Ramadhan w’imyaka 30 kubera amakimbirane yari asanzwe afitanye n’umugore We, ubwo yamuburaga agahitamo gutemesha umuhoro umwana we Niyomukamisha Hadidja. Ubu akaba ari mu maboko ya police. Umuvugizi wa police mu ntara y’uburasirazuba IP Emmanuel Kayigi avuga ko ubwo bugizi bwa nabi bukomoka ku makimbirane y’imiryango.

– Ahandi mu Karere ka Musanze, umurenge wa Muhoza, aho umugabo w’imyaka 32 akulikiranyweho icyaha cyo kwica umugore witwa Abayisenga Anathalie w’imyaka 23 y’amavuko amwitiranya n’uwo yavugaga ko yamwibye amafranga, akaba yemera icyaha akagisabira n’imbabazi kandi ko ntacyo yapfaga na nyakwigendera, akomeza avuga ko yari yanyweye ubwoko butandukanye bw’inzoga. Umuvugizi wa police mu ntara y’amajyaruguru CIP Robert Ngabonzima yemeje ko urupfu rw’uyu mugore rwamenyekanye ahagana saa moya za mugitondo kuri uyu wa 23/11/2015. Akomeza agira ati uyu mugabo yari yaraye asangira inzoga n’abagore b’indaya batatu bitwa BEBE, MAHORO hamwe n’uwo nyakwigendera ABAYISENGA, gusa aza kujya kuryamana na MAHORO kwa BEBE, bukeye nibwo yabonye ko yabuze amafranga, atangira kuyabaza MAHORO, kubera ko baturanye na ABAYISENGA yaje kubabyutsa ngo ajye kubagulira inzoga hanyuma amukubita agafuni inshuro eshatu mu mutwe aziko arimo kugakubita Mahoro. Iyaba amategeko yakurikizwaga uko bikwiye, uyu mugabo yahanwa na art.140 yo mu gitabo cy’amategeko ahana mu Rwanda ku gifungo kuva ku myaka 5 kugera ku cya burundu.

Banyarwanda banyarwandakazi, kumena amaraso cyari ikizira mu muco w’abanyarwanda aliko hari umugani uvuga ngo ‘’umwera uturutse ibukuru bucya wakwiriye hose’’. Ntibyumvikana ukuntu muli izi cases mbagejejeho z’ubwicanyi hari nahagaragaramo uruhare rw’abayobozi! Ari nayo mpamvu ku ruhande rw’abaturage nabo basigaye barahagurukiye kujya birwanaho uko bashoboye. Ubu bugizi bwa nabi biragaragara ko buba bwateguwe bugashyirwa mu bikorwa. Iri ni ihohoterwa rivanze n’ubwicanyi bw’ikirenga! Birasaba ubutabera bwigenga kuri bose butarebera agatsiko k’abantu runaka gusa!

Banyarwanda banyarwandakazi, nguwo umuhigo besheje, abadepite bacu mu kugeza abanyarwanda ku byiza bya démocratie.

Byanditswe kuwa 25 ugushyingo 2015, na:
A.Ben Ntuyenabo,Kigali-Rwanda.

Ibijya gucika bica amarenga. Ubuhanuzi bw’intambara mu Rwanda bwatumye bamwe bahunga

Muli iyi minsi hano mu Rwanda, mu turere dutandukanye n’umugi wa Kigali; haravugwa abantu bavuga ko ari abahanuzi b’Imana bakwirakwiza amakuru bavuga ko hagiye kuba intambara ikomeye mu Rwanda, ibyo bigatuma bamwe baratangiye gukuka imitima ariko bafata n’icyemezo cyo guhunga igihugu, abandi umugoroba washyika ndavuga hano mu mugi wa Kigali ugasanga buri wese arwana no kugera aho ataha bwangu; ari abagendesha amaguru cyangwa abifite bagendesha amamodoka yabo usanga bose basa nabatanguranwa mu gutaha, dore ko naho ibiciro ku modoka zitwara abagenzi byiyongereye bamwe basigaye bagerageza gutaha n’amaguru; urugero hano mu mugi wa Kigali umuhanda uturuka Gare (ville) – Nyabugogo-Gatsata-Karuruma.

Ahandi Quartier commercial – Mosquée Biryogo-Nyamirambo, aho hose usanga ari urujya n’uruza rw’imidoka n’abanyamaguru hakiyongeraho noneho n’abazunguzajyi babandi bacuruza imbuto, imyenda n’ibindi…baba bagendagenda ahantu hose, ku tubari, mu ingo etc….ibyo byose bakabikorana impungenge nubwo bwose hirya no hino kuli iyo mihanda haba harangwa abasilikare n’abapolisi ndetse na Dasso.

Ngarutse rero kuli abo bahanuzi, mu kagali ka Gahunga, mu Karere ka Gasabo, abaturage bamwe bamaze guhungira mu gihugu cya Ouganda kubera abapentenkote b’abarokore ngo bababwira ko ibintu hano mu Rwanda bigiye gucika, ko imbere aha hari chorale ikosora akaba ari intambara ikomeye igiye kuba mu Rwanda. Ubu haravugwa kandi abandi bagenzi babo bagera ku 9 bamaze gutabwa muli yombi mu Karere ka RUTSIRO, nabo kubera gukwirakwiza bene ayo makuru bemeza ko mu Rwanda hagiye kuba intambara ikomeye; abo bantu 9 bakaba barafashwe muli iki cyumweru gishize bazenguruka urugo ku rundi mu Mirenge itandukanye yo muli ako Karere ka RUTSIRO irimo RUHANGO, GIHINGA, NYABIRASI ubu bakaba bafungiye i Karongi.

Cpt. Geofrey Kagame ukuriye ingabo muli ako karere ka Rutsiro, kuli telefoni yagize ati :’’U Rwanda rufite Imana nta mpamvu yo kugenda bavuga ko batumwe nayo; akomeza avuga ko nta ntambara ihari kandi ko nta nizabaho kuko u Rwanda rufite umutekano usesuye byongeye kandi ingabo ziri maso, ati utifuriza u Rwanda amahoro ni Inyangabirama’’. Akaba asaba abaturage kuba maso no kwima amatwi abo bantu bashaka kubashora mu buhunzi.

Umuyobozi w’akarere ka Rutsiro, Bwana Gaspard BYUKUSENGE yadutangarije ko abo bantu biyita ko batumwe n’Imana bafashwe koko bakaba bari mu maboko ya police, ati bageze muli aka Karere ka Rutsiro baturutse mu mujyi wa Kigali, bagera i Rubavu na Nyaruguru, aliko ntibajya bagera mu nsengero cyangwa muli za paroisses hari abantu bajijutse ahubwo biyegerezaga abaciriritse bakabakusanya bagahita batanga ubwo buhanuzi bwabo.

Banyarwanda banyarwandakazi, aba bahanuzi barimo kugaragara cyane cyane mu matorero y’abapentekote (abarokore); ibi kandi bikaba byaragarutsweho n’uhagaraliye itorero ADEPR mu Rwanda ku munsi wo kwizihiza isabukuru y’imyaka 75 ya Yubile iryo Torero rimaze rishinzwe , aho Rev. Pasteur SIBOMANA Jean, imbere y’umushyitsi mukuru Ministri w’ubutegetsi bw’igihugu Bwana KABONEKA Francis nk’intumwa ya Leta muri uwo muhango; yahamagariye abakristo ba ADEPR kwirinda abahanuzi b’ibinyoma babagana akaba yaragaragaje ko ari abashaka kubavangira, yakomeje agira ati : ‘’Nk’umufatanyabikorwa wa Leta; abayoboke b’itorero mpagarariye basabye Prezida Kagame Paul gukomeza kuyobora u Rwanda’’, akomeza agira ati :’’Nyakubahwa Mushyitsi Mukuru ndagira ngo mbahe ubutumwa bw’abakristo bari hano n’abandi batari aha bifuza gukomeza kuyoborwa na Prezida wa republika dufite ubu Kagame Paul’’.

Nk’abakristo b’Itorero rya Pentekote mu Rwanda, twifatanije n’abandi banyarwanda gukomeza gushyigikira ibikorwa byose by’ubuyobozi bwiza dufite.

Ministri KABONEKA nk’uhagaraliye gouvernement nawe ati : ’’Itorero ADEPR ni umufatanyabikorwa mwiza wa Leta, igihugu kizakomeza gufatanya nawe mu bikorwa byose yiyemeje haba mu iterambere ry’abakristo n’abanyarwanda muli rusange, akomeza agira ati : ‘’Hamaze kugerwaho byinshi k’ubufatanye bwa Leta, amadini n’amatolero nyuma ya génocide yakorewe abatutsi 1994 igikenewe ubu ni ukubisigasira’’.

Banyarwanda banyarwandakazi, mwiyumviye ayo magambo y’abo bayobozi, by’umwihariko aya rév.pasteur SIBOMANA Jean! Ni ubutumwa butajyanye na gato n’umunsi nyamukuru w’abakristo!, ese koko nk’abakristo ba ADEPR twemere tujye dufatanya iyogezabutumwa na politiki? Jye nsanga twahitamo umwami umwe aho gukeza babili. Cyangwa ku mubare w’amadini n’amatolero dufite mu Rwanda bishoboka twakwongeraho Itorero ry’Imana rishya tukaryita FPR aho kuba umutwe wa politiki! tutarinze kujya tubinyuza mu yandi matechnika! Ibyo byose rero banyarwanda banyarwandakazi, iyo ubisesenguye usanga ari uburyo bwo gucinya inkoro ku uwariwe wese wiyemeje kuba inkomamashyi.

Byanditswe ku cyumweru taliki ya 22/11/2015, na:
A.BEN NTUYENABO, KIGALI-RWANDA.

BARAZIRA IKI?

Des réfugiés rwandais au Sud-Kivu/radio okapi.

Imyaka ishize ari 25; abo nta bandi ni impunzi z’abanyarwanda, impinja, abana babangavu, abasore n’inkumi, abagabo n’abasaza buzuye ahanini mu mashyamba ya republika iharanira demokrasi ya Congo (DRC) barara banyagirwa ijoro n’amanywa batagira gitabaza!

Aliko se banyarwanda banyarwandakazi, niba koko icyaha ari gatozi bariya bana barazira iki ko batari bakavutse, abandi bafite imyaka itarenze ibili mu gihe Génocide yakorwaga? Kubona n’umuryango mpuzamahanga warageze aho ukaruca ukarumira! ni akumiro! akaje karemerwa aliko nanone ntagahora gahanze!

Igiteye agahinda kurusha ni ukuntu Ministri w’u Rwanda ushinzwe impunzi n’ibiza nawe wigeze guturana nabo mu buhungiro, Mme Mukantabana Séraphine ubona nawe nta mpuhwe abafitiye na gato akaba yifuza ko bataha bamanitse amaboko kandi bakabanza kwozwa ubwonko igihe nibura cy’amezi 3 ahitwa I Mutobo mu majyaruguru y’u Rwanda, akaba aherutse no gutangaza ko statut y’ubuhunzi ku mpunzi z’abanyarwanda ziri mu bihugu bitandukanye ku mugabane w’isi igomba kurangirana n’italiki ya 31/12/2017.

Banyarwanda banyarwandakazi, twibutse ko umuryango FPR wabayeho nyuma yo kumara imyaka 30 kw’impunzi z’abanyarwanda mu buhungiro, bamwe bataragiraga n’inkambi babamo, abandi bibera mu myobo nk’amafuku, barahejwe kwongera kuzakandagiza ikirenge mu rwababyaye, aliko igihe cyarageze Iyabaremye irabagoboka barataha nubwo bamwe muribo bongeye guciribwa iyamahanga kubera umwiryane no kwikubira kwa bamwe, byatumye bamwe banahasiga ubuzima.

Ingoma rero zisa ntacyo zipfana (iyi yo irarenze!!) niyo mpamvu ibiramambo n’abandi nabo nta kabuza igihe nkicyo kigomba kubashyikira. Ministri Mukantabana we na FPR yawe nabagira inama yo kunamura icumu naho ubundi haragowe!!. Icyo wifuza ko batagukorera nawe ntukakifurize undi.

Impunzi z’abanyarwanda ibihumbi 250 bivugwa ko zibarizwa mu mashyamba ya Congo-Kinshasa by’umwihariko, izindi muli Amerika, uburayi, hirya no hino ku isi bose ni abana b’u Rwanda. Igihe ni iki kuli FPR cyo kumva ko twese turi abavandimwe, tugomba kwicarana tugasaranganya bike cyangwa byinshi twarazwe n’abakurambere nkuko ibimenyetso bibyerekana. Iyaduhanze yarangije guca urubanza! ntitukabe ba birushywanubusa! Mugire amahoro.

Byanditswe kuwa 21/11/2015, na :

A.BEN NTUYENABO, KIGALI-RWANDA.

Rwanda: Kiliziya Gatolika mu Rwanda irasinziriye.

Musenyeri S. Mbonyintege : yitanguranijwe mu gusaba imbabazi bitari ngombwa!

Mu nama yahuje abakuru b’amatorero n’amadini na Ministri Kaboneka Francis w’ubutegetsi bw’igihugu muli iki cyumweru gishize ; Ministri Kaboneka yaburiye abiyita ko ari abakozi b’Imana bagamije izindi nyungu zabo ko bagiye kujya bafatirwa ibihano, agakomeza avuga ko hakiri n’icyuho mu uguhuza hagati ya leta n’amadini, ati urugero hari ibyo tujya dukora aliko ugasanga tubikora tudahuza. Ati ubu mu gihugu hose harabarwa amadini 714 n’imiryango ishamikiye ku madini 550, muli miliyoni 12 z’abanyarwanda.

Muli iyo nama kandi hagarutsweho inkuru yari imaze iminsi mu bitangazamakuru ya bamwe mu bakuru b’amadini bamaganaga icyemezo cy’abadepite cyo kudashyira ijambo ‘’Imana’’ mu itegeko-nshinga rivuguruye rya republika y’u Rwanda, barimo Réverend père Antoine RUTAYISIRE, GITWAZA, Mgr MBONYINTEGE Smaragde n’abandi….., ni muli urwo rwego muli iyo nama Mgr Smaragde Mbonyintege, umushumba wa Diocèse ya Kabgayi akaba na Prezida w’inama y’abepiskopi ba Kiliziya gatolika mu Rwanda yafashe ijambo asaba imbabazi avuga ko yasakuje yamagana icyemezo cy’inteko nshinga-mategeko nk’abandi banyamadini atabanje kubitekerezaho.

Mu minsi ishize rero ubwo abadepite bajyaga impaka ndende mu kudashyira Ijambo ‘’IMANA ISUMBA BYOSE’’ mu itegeko-nshinga rivuguruye ry’u Rwanda, nibwo benshi mu banyamadini babigarutseho babyamagana ku mugaragaro bagira bati ’’ibyo dukora byose, yaba igihugu, uwariwese byose tubikesha Imana, niyo yaturemye kuko isumba byose nta mpamvu yo kuyijyaho impaka bene ako kageni!!’’. Yewe na bamwe mu badepite ntibari bashyigikiye mu kwemeza iyo ngingo!

Jye nkaba nibaza igihe abandi banyamadini bazasabira imbabazi uretse Mgr Simaragde wa Kiliziya gatolika witanguranijwe mu kuzisaba bitari ngombwa!

Nyuma yizo mpaka zose rero Prezida Kagame yivugiye ubwe ko izo mpaka zitari ngombwa kuko ngo ‘’guhindura itegeko-nshinga atari ukwandika ibitabo by’ivanjiri’’, (murumva icyo yashatse kuvuga) bikaba byumvikana ko nta mpamvu nimwe yatumye Mgr Simaragde afata iya mbere mu kubisabira imbabazi. NIbyo navugaga rero ko Kiliziya gatolika isa nisinziriye kuva aho Génocide ibereye mu Rwanda, Kiliziya ikahatakariza intama zayo zitagira ingano hakiyongeraho nugushinjwa kwa hato na hato na Leta ya FPR kuba yaragize uruhare runini muli génocide yakorewe abatutsi n’abandi batavugaga rumwe nayo byongeye kandi ntinabisabire imbabazi, byatumye muli iyi myaka 25 ishize yose Kiliziya gatolika yitwararika mu buryo budasanzwe kubera amagambo akarishye y’abanyapolitiki batandukanye bo muli FPR bayishinjaga.

Kiliziya gatolika ikaba yarafashe umurongo wo kugenda biguruntege yibanda ahanini kwiyogeza-butumwa , uburezi no gufasha abatishoboye mu gihe cyose Leta ya FPR izaba igitegeka u Rwanda.

Ni akaga gakomeye kubona Agaca kakumaraho abana b’inkoko ugahindukira ugakoma yombi!! ntugire nicyo unabihingutsaho ngo utavaho ukoma rutenderi! ni ukwihangana gukomeye aliko birababaje pe!

Byanditswe kuwa 18/11/2015 na:
A.BEN NTUYENABO,
KIGALI-RWANDA.

Ntawihuta nk’uwayobye

Hashize iminsi hahita ibiganiro binyuranye bivuga kubijyanye n’ibyo bise « guhindura itegekonshinga » .Mu magambo atangwa usangamo impirita nyinshi , guhubuka ndetse no gushyanukana umuvuduko uteye impungenge. Aho kugaragaza aho itegeko risanzwe ryaba ribangamiye igihugu cyangwa umuryango nyarwanda muri rusange , usanga ahubwo abantu bibanda mugutakana ibikabyo byinshi Perezida Kagame Paul, nk’umuntu udasanzwe, kuburyo byanteye kwibaza aho u Rwanda rurimo kugana.Ngo atambutse abandi banyarwanda bose kuburyo akiriho ntawe bahiga? Ngo afite uburenganzira bwo guhindura amahame ibihugu bikoresha n’Isi yose igenderaho,ngo kko ariwe, bigatuma u Rwanda rusumba ibinhdi bihugubyose ? Ngo Kagame Paul ni ikirenga, ngo asigiye na Yezu Kristu ?!!

Hari ibintu umuntu muzima yumva akabyibazaho kandi akiyemeza kudaterera iyo, ngo bitazaba nabi akababazwa n’uko yabibonye ntagire icyo akora. Nanjye iyo numvise ibivugwa, mbona ibintu bitoroshye ; cyane cyane ko ababivuga mbona bazineza ibyo barimo; ahubwo ko akenshi baba bagamije guhuma amaso rubanda idasobanukiwe . Nasubiye mumateka ngo ndebe umutegetsi twafatiraho urugero mu rwego rwo gufasha Abanyarwanda guhumuka bakirinda guhubukira kurohama. Mu by’ukuri mu mateka hari benshi bitwaye nka Kagame. Ndetse n’ubu dusanga adatandukanye cyane n’abategetsi bamwe na bamwe bo mu karere kacu. Hose banyotewe demukarasi, hari ukwigwizaho umutungo gukabije, abategetsi basahura ibihugu byabo, hari ubutabera buke, no gukabya gukandamiza abaturage…

Banyarwanda rero nibura nimurebe mu Kinyarwanda maze mwibukeko “utazi ubwenge ashima ubwe” mureke kohoka mu nzira y’ikinyoma, ibikabyo byo kwiyemera no kwirata gusa itazabata ku gasi? Kandi ntimwihutire kuvuga no kuyoboka buhumyi mudashishoje kuko burya ngo “ntawihuta nk’uwayobye”.

Urugero nafashe ni urw’umugabo Nelson Mandela tuzi twese. Gusa mbere yo gukomeza reka nisegure kurubyiruko nabwiye umushinga w’iyi nyandiko rukanseka cyane .Barambwiye ngo nubwo bikundira Kagame Paul ngo ntibabona aho umuntu yahera amugereranya na Mandela;ngo nange singakabye .Nge nabirenzeho ngirango gusa nerekane isura y’umutegetsi mwiza kandi ngo abantu bose babashe gusobanukirwa ko Kagame Paul adashobora kuba na gato umuyobozi uboneye, bihereye ku matwara amuranga.

Mureke twibaze. Niba Kagame Paul ameze uko avugwa,Mandela yaba yari iki mumaso yacu? Naho se niba Mandela yari uko tumuzi, aho ibyo tuvuga kuri Kagame Paul ntibyaba ari amahomvu,maze kumukurikira bikaba ari nko kwanga ukuri nkana no kwirahuriraho umuriro ?

Nelson Mandela na Kagame Paul bose ni abanyafurika b’abaperezida barwaniye kubohoza bene wabo barenganaga; kandi babigeraho babona instinzi,buri wese mu nzira ze. Ntatinze kuri ibi ariko, nubwo biboneka ko aba bagabo hari bike bahuriyeho barananyuranye cyane kuburyo uwashaka guhitamo uwakoresheje inzira nziza muribo, atakwibeshya ,keretse abigira nkana.

Mu nkomoko navugako Nelson Mandela yavaga mu bakene ariko kandi bihagazeho kuko se yari umutware mu bwoko bwabo, ariko ntiyabikangishaga. Kagame Paul nawe inkomoko ye ntihambaye cyane ariko we yibwira ko kuba yarababaye bimuha kuba igihanganjye ngo kuburyo yanazungura umwami nk’igikomangoma rwose cyavukanye imbuto!

Nelson Mandela yarezwe neza ajya mu mashuli kandi n’ubwo yari akandamijwe n’abazungu yarize aramenya ndetse araminuza. Kagame Paul nawe yararezwe, yaranize. Ariko abamwumva avuga bashidikanyako yaba yararezwe neza; kandi niba wenda ataraminuje mu mashuli , si ikosa kuko yari impunzi n’ubwo hari benshi babubanyemo ,ndavuga ubuhunzi,bitabujije kurangiza za kaminuza.

Mu Kinyarwanda ngo “imfizi ibyara uko ibyagiye”; ngo “ntanutanga icyo adafite” ariko nanone ngo “ubugabo buva hasi”. Buriya Nelson Mandela uwo yariwe ari muto, niwe yabaye mu byo yakoze nubwo amateka yamukozeho akanamuvangira. N’undi ni uko.Ngaha rero dore inzira ebyiri zihabanye.

Inzira ya Nelson Mandela yabaye inzira y’amahoro kuko ariyo yari amuri mu maraso. Inzira ya Kagame Paul yabaye iy’intambara kuko ariko ateye.Tutarondogoye, buri wese mu magambo n’ibikorwa bya niho dusanga ibigaragaza imyumvire yabo ndetse bikanaduha gusobanukirwa n’imigirire ya buri muntu.

Nelson Mandela yasobanuye uko yumvaga ibintu, bigatuma umuntu yahita yibwira uwo yari we akanumva imvano n’ishingiro ry’imiyoborere ye y’ indakemwa . Dore rero impamvu zihagije tuvuga ko yategetse neza,kandi bitaramutwaye igihe kinini ngo abe yanagwa muri wamutego mutindi wo kugundira ubutegetsi. Ntiyanategereje yewe na manda ya kabiri kuko yari amaze gutanga ikirekezo kiza kandi akinguriye buri mwana wa Afurika yepfo amahirwe angana n’ayabandi.

Kagame Paul nawe ngirango ibye bimaze gusobanuka ,kuburyo uretse gutinya kuvugisha ukuri, ntawuyobewe ko ubutegetsi bwe ntakigenda, kuburyo ubu arimo ashaka uko yabwizirikaho ngo kugera apfuye!Impamvu nuko ibibi byabaye byamaze kumutanga imbere kuburyo atazi icyo yavuga aramutse ibiryojwe atagifite ubudahangarwa. Aha ariko ntitwibagirwe hari n’ibyo nawe yaba yaragerageje kugeraho byiza nubwo aribyo bike.

Nelson Mandela yaravugaga ati narwanyije ubwikanyize bw’abazungu ndwanya n’ubwikanyize bw’abirabura .Ati umugambi wanjye mukuru wari uwo kubaka umuryango wisanzuye kandi ufite demukarasi ,kuburyo bose babana mu mudendezo kandi bafite amahirwe angana.

Kagame Paul we ntagaragaza neza abo yarwaniye ;rimwe ngo ni abanyarwanda ,ubundi ngo Afurika,n’ubwo yivugira itsembabwoko ryakorewe abatutsi ;ntiyerura ngo yemeze ko ubwoko bw’abatutsi bubaho ngo anature avuge ubwoko bw’abahuru kandi ngo aharanire inyungu za bose.

Nelson Mandela yaravuze ati:Isomo twakuye mungorane twabayemo igihe kirekire rituma tugomba kubaka umuryango abantu b’isi yose bazishimira.Arongera aca iteka ati :ntibikabe,ntibikabe mugihugu cyacu ntibizongera kubaho aho umuntu akandamizwa n’undi muntu.

Kagame Paul ahora gusa yishongora akavangavanga abantu ababi n’abeza ,akabogama akibwira ko hari abantu baruta abandi ndetse akagena n’imikorere aho we n’abe aribo bagomba kugenera abandi bose uko bagomba kubaho.

Nelson Mandela ati tuzakora ubumwe buzatuma twubaka umuryango aho Abanyafurikayepfo bose ari abirabura ari n’abazungu bazajya bagenda bose bemye,nta bwoba mu mutima,kandi bizeyeko uburenganzira bwabo bwa kiremwamuntu budashobora guhungabana; ati tuzubaka igihugu cy’amahoro kibereye amabara yose n’isi yose.

Kagame Paul ngo ni igihangange hazakorwa ibyo ashaka n’uko abishaka; nta gahutu nta gatutsi gatwa we rwose ni ibindi.Hari abagomba kugera I Kigali nabobahahiga amanywa n’ijoro,hari abaciriwe ku Iwawa ,ntawugipfa kwirahira se ,ntawukitabaza inshuti z’umuryango kuberako ngo bamwe babaye umwanda n’ibigarasha. Ariko igikomeye cyane ni uko mugihe Isi irimo iba umudugudu Umunyarwanda we atakizerwa no mubihugu bituranyi kuburyo imipaka yahoze ari amasangano aduhuza n’abandi ,ubu yahindutse inkiko z’ irasaniro.

Nelson Mandela ngo yemeragako umuntu ukandamiza abandi nawe akeneye kubohoka nkabo; akagira ati umuntu ubuza undi uburenganzira bwe aba ari imbohe y’urwango,aba aheranwe n’ibihindizo by’urwikekwe, aho kuba imfura aba ari imfunya ku mutima. Ibi byatumye akorana neza n’abari baramutoteje bagera kumwanzuro w’amahoro .Yahoberanye n’uwamuhemukiye.

Kagame Paul yemerako ubangamira mugenzi we akwiye gusa urupfu,ngo yanakoresha kinubi yica isazi. Iyo urebye neza niyo mpamvu agira inzika , agashobora guhora, aho kubohora abatsikamiwe n’ababatsikamiye. Ahubwo ubona ameze neza nk’uriya Mandela avuga ko atari imfura. Ibi nibyo byamuteye kudategereza imyanzuro y’imishyikirano , agahitamo gucura inkumbi abo bashyikiranaga ngo kuko yakekaga ko nabo bashobora kumuhitana gusa.Ubu asigaye anahiga ibyegera bye n’abajyanama be ndetse n’abavandimwe.

Ubundi Nelson Mandela ngo ikintu kimwe cyamubabaje ni uko atigeze aba icyamamare ku Isi mu mukino w’iterana makofe. Ni ukuvugako igihe yarwaniraga ko abanyafurikayepfo banganya amahirwe yashakaga ko buri muntu yajya anakora icyo akunda kandi cyamufasha. Aha bitwibutse ukuntu yahereye ku ikipe yabo ya rugubi (rugby)kugirango yunge bene wabo.Abirabura mbere ntibayibonagamo kuko yari igizwe n’abazungu gusa.Mugihe gito abonye ko bamaze kumva ikcyerekezo gikwiye, yareguye aregama ,arekera abandi banyafurikayepfo nabo bashyiraho akabo nanubu biragenda neza.

Kagame Paul we ngo ikimubabaza kuruta ibindi ni uko atabamariye mo umujinya wose, ngo abamarire ku icumu kuburyo hari nabakigaruka bikaba ngombwa ko bakorana! Ni ukuvugako akibirwaye kuburyo aziha igihe gihagije ngo agere ku mugambi we. Mwibuke avuga ko ngo kumena amazi yuzuye ingunguru byagorana; ngo we azayavoma buhorobuhoro mpaka ayacogoje . Mugihe kirekire amaze ,arabona ko umugambi we atarawugeraho none agiye kwiyongeza kandi ngo ntawundi nkawe wabaho ngo azawurangize. Igihe bitaragerwaho azatsimbarara ku butegetsi ngo wenda azabuzire .

Maze rero Banyarwanda bavandimwe kuyavuga siko kuyamara .Gusa nafashe ingingo nke kuri bariya bagabo bombi ngo mbibutseko twibeshye mu gihe cyashize bikatugeza kure tutakekaga.Nkaba numva rero tudakwiye kugwa mu cyobo kabiri. Ngo Kagame Paul ni rudasumbwa ngo asigiye na Kristu ? Mboneyeho no kwibutsa uwabivuze ko Ubwami bwa Kristu atari ubwo kuri iyi si kandi ko we ataje ngo bamupfire nk’uko numvise babibwira Kagame, ahubwo yaje kudupfira ,ngaho niba Kagame ari mwiza nahare iyo ntebe ajye munka ze niba atarabeshyaga igihe yabivugaga.

Mu kwanzura ,ndagira nti “ akaburiye mu isiza ntikabonekera mu isakara”. Kagame yatangiye nabi akomeza nabi, azarangiza nabi. Bibiri nagatatu baduteye igipindi ngo Kagame Paul natorwa amahoro azaza haba haje Gacaca n’ibyayo; ngo ifaranga rizaboneka ,uko byabaye twarabibonye none ngo niwe mahirwe y’u Rwanda ni mumureke akore ibyo ashaka?

Icyakora niba ashigaje igihe cyo kwihana no kwigorora mu byo yangije, twese tuzamutora.Gusa ntakizere igihe yica ba Karegeya na ba Rwigara,igihe agihiga ba Kayumba agafunga ba Ingabire na Mushayidi na bagenzibabo bazira politiki, igihe akiyemerera ko abereyeho guhangana ,ikigambiriye kubarasa kumanywa y’ihangu; nge nabwira Abanyarwanda nti nimukenyere mukomeze kandi ijwi rya rubanda Imana iraryumva.

Kagame Paul yarivugiye ngo ntawambuka ikiraro atarakigeraho ;none iyo ndebye banyarwanda ingufu zakoreshejwe ngo abaturage bikorere ibikarito by’impapuro bazijyana I Kigali kandi amaposita akora,nkumva uko banyemeza ko mukanya nk’ako guhumbya Abanyarwanda ngo hafi ya bose bagize igitekerezo kimwe,bakakivuga mu gihe kimwe, mu buryo bumwe ngo Kagame agume ku butegetsi none n’inzego zose zikaba muminsi mike gusa zimaze kubisinyira ndababwiye ngo” ntawihuta nk’uwayobye”.Nimukanguke duhakanire Kagame Paul kunyura iriya nzirakuko imeze nk’imwe y’ubwato mu muhengeri.

Padiri Athanase MUTARAMBIRWA

RWANDA/KAYONZA (KIBUNGO) : GUSENYERA ABATURAGE BIRABANDANYIJE

Ni akarengane pe! mu gihe abarebera hafi iby’imyubakire basanga ko igishushanyo-mbonera cyahawe umugi wa Kayonza (Kibungo) kitajyanye n’ubushobozi bw’abaturage bahatuye bityo bagasaba ko hatekerezwa ikindi; umuyobozi w’intara y’uburasirazuba Mme Odette Uwamariya arihanangiriza abaturage abasaba kujya bakulikiza amategeko agenga imyubakire akanongeraho ko abayobozi bazajya bakingira ikibaba abubaka muli izo nzira zinyuranijwe n’igishushanyo-mbonera bazajya bakatirwa urubakwiye; ati biragaragara ko ayo mazu yubakwa haba harimo uruhare rw’abayobozi barya ruswa n’abaturage bafite imyumvire idasobanutse barara bubaka ijoro ryose abandi babumba amatafari bayahishe.

Ikibabaje abo baturage cyane rero ni ukuntu basabwa gusenya mu gihe bazubatse ubuyobozi burebera zikarinda aho zuzura ndetse zimwe mulizo zaranatuwemo. Nabajije umunyamabanga nshingwa-bikorwa w’akagari ka Nyagatovu ho muli secteur Mukarange, SEBINEZA Kiyonga ansubiza ko ahanini ari abaturage bananiza abayobozi bakanga gukulikiza amategeko agenga imyubakire.

Umuturage umwe mu basabwe gusenya utarashatse kwivuga izina yantangarije ati’’ urumva umuntu aba yarafashe amafranga ya Banki! Ubu se koko mbigenze nte? Ko ntawe natakira ! tumaze kumenyera kurenganywa! ati ubu rwose sinzi icyo navuga, hasigaye gusaba Imana ikagira uko itugenza’’.

Kugeza ubu hakaba hamaze gusenywa inzu zigera kuri 30, 10 muri zo zaruzuye na banyirazo bazibagamo. Ikindi kigaragara ni ruswa ivugwa muli iryo yubaka cyane cyane mu bayobozi b’ibanze kimwe mu ndandaro y’ibyo bibazo, nkuko Mme Odette w’intara y’uburengerazuba nawe ubwe abyemeza, akavuga ko bagiye gushyiraho ingamba zuko umuturage azajya asenyerwa ari uko n’umuyobozi wamukingiye ikibaba abihaniwe.

Banyarwanda banyarwandakazi, wumvise amagambo y’uwo muyobozi wakwibaza uti ese noneho ko bavuga ko ‘’Umweru uturutse ibukuru ukwira hose’’ aho ntiyaba agiye kwikoraho bitewe nuko akarengane na ruswa muli iki gihugu bisa n’ibyaherewe umugisha ikambere!

Gusa ntawakwirengagiza akarengane karenze bitavugwa muli iki gihugu cyacu, ubwo twabazaga umuyobozi wa transparency international ishami ry’u Rwanda (TI-R) icyo abivugaho; Mme INGABIRE Marie Immaculée yatubwiye ko mu gukemura ibyo bibazo ahanini bo bashinzwe ubuvugizi no gukulikirana mu mizi uko akarengane kakozwe noneho bakabishyikiriza inzego z’ibishinzwe z’ubutabera byananirana bigashyikirizwa uwego rw’umuvunyi. Akomeza agira ati nkubu tuzi twese ko inkiko gacaca zarangije imirimo yazo aliko hanze aha hari abafite imanza zaciwe nabi barenganijwe, bagakatirwa imyaka 40 cyangwa burundu bikaza kugaragara ko urubanza rutanabayeho! Abo bose tukaba twabasaba kujulirira inkiko zisanzwe kuko nyine iza gacaca zarangije imirimo yazo natwe tuzakomeza kujya tubavuganira kuko ariyo nshingano nyamukuru y’umuryango duhagaraliye.

Ni muli urwo rwego bamwe mu baturage barenganijwe mu manza zinyuranye, basaba umuyobozi wa TI-R kubabera umuvugizi kwa Prezida wa Republika bakemererwa gusubirishamo imanza zabo zose kugirango barebeko babona ubutabera bwuzuye. Ngaho rero ibibazo byaranze ubutabera bwa Gacaca ni ingorabahizi! Mme Ingabire yijeje ababagana bose ko bo batajonjora ati tuzakomeza ubuvugizi bwanyu aliko namwe mujye mutubwiza ukuri ku bibazo byanyu kugirango tubone uko tubikulikirana kugeza bikemutse.

Byanditswe ku wa 12/11/2015, na :
A.BEN NTUYENABO, KIGALI-RWANDA.

Rwanda : FPR irahamagarira abanyeshuri kurwanya abavuga nabi ubutegetsi bwayo

Kuwa 07/11/2015 muri kaminuza yigenga ya Byumba (IPB) ishami rya Kiramuruzi riherereye muri Gatsibo habereye inama ya FPR aho umushyitsi mukuru yari umugabo witwa Ntegera Patrique ukora mu nzego za FPR mu karere ka Gatsibo.

Ubwo nyine bategetse abanyeshuri bose guhagarika amasomo ngo bajye muri iyo nama. Ubwo abarimu n’abanyeshuri bose bateranira muri salle kumwumva ubwo indirimbo zisingiza Kagame nizisingiza FPR sinakubwira.

Uwo mugabo yavuze amagambo menshi cyane ariko ay’ingenzi ni aya akurikira:

Yagize ati mugomba guhagurukira guhangana n’uwariwe wese ushaka gusenya urwanda. Ati ntimukareke umuntu utema ishami ry’igiti kandi ariryo wicayeho.

Ati Abanyarwanda baba hanze batunzwe no guheha amabyi (mwihangane ndagerageza kubisubiramo nkuko yabivuze) y’abakecuru, birirwa basebya urwanda bashaka kurusenya. Ati bose rero mugomba guhangana nabo nk’abantu bize mukoresheje imbuga nkoranyambaga nka twita, facebook nizindi.

Akinjira yavuze ko yishimiye ko abona abagore n’abakobwa aribo beshi ahita abibutsa kimwe mu byivugo by’intore z’abakobwa kigira kiti << mutima w’urugo ni nyampinga ubereye urwanda sinzatesha agaciro uwakanshubije.>> ati kagame niwe wabahaye agaciro ubundi mutagiraga.

Yakomeje avuga ko ubu ari uburezi bwa bose ngo abana bose bariga ngo sinko kubwa Habyarimana higaga igice kimwe. Yatanze urugero rw’ahantu yize i Gahini avuga ngo mbere umwana yakarabaga akwedura amazuru ngo arebe ko igipfunsi cyakwirwamo ngo ariko ubu nta moko ari mu Rwanda. Ngo hari umwana w’umuhutu w’i Butare wabaye uwavmbere none ubu arakora muri presidence.

Yakomeje agira ati ibyabaye 1959 ntabwo byari levolution ahubwo byari ubwicanyi ngo n’abazungu b’ababirigi bagizemo uruhare. Ngo ibyo byarakomeje kugeza muri za 90 igihe Habyarimana yitwaga petit president, Mobutu akaba frere we, naho Mitera w’ubufaransa akaba pere we.

Yashoje yibutsa abaraho inkuru ya Yona wo muri bibilia wanze gutumwa urufi rukamumira. Ati namwe rero mugomba kwemera gutumwa ibibi ntibikabe murebera nimwanga gutumwa urufi ruzabamira.

Iyi gahunda kandi iri mu bigo byose mu Rwanda aho FPR irimo gukora icengezabinyoma mu bana b’abanyarwanda. Kandi ngo ikaba izakomeza.

Munyumvire namwe ibinyoma n’iterabwoba rya FPR ishyira ku Banyarwanda.

Rwanda. Imungu ya ruswa iyogoje itangazamakuru ryo mu rwa Gasabo

Nkuko Ministre w’ubutabera w’u Rwanda Bwana Businge Jonhson yabitangarizaga akanama k’umuryango w’abibumbye gashinzwe uburenganzira bw’ikiremwa-muntu I Genève muli Suisse aho yoherejwe nk’intumwa ya Leta mu gutanga rapport isobanura ihonyorwa rya muntu ku birego birebana n’u Rwanda; yongeyeho ko mu Rwanda ikibazo kibahangayikishije bafite ubu ari Itangazamakuru ku buryo barikulikiranira hafi umunsi ku wundi ngo ritavaho rimera nkaya maradio yahozeho mbere y’intambara ya RTLM aribyo byatuviriyemo Génocide yo muli 1994.

Ibi Businge akaba abivuga yirengagije ibirego u Rwanda ruregwa birimo ubwicanyi, gufungwa kw’abatavuga rumwe na FPR, kutisanzura mu bitekerezo, ihohoterwa ry’ubwoko bwose haba mu magereza cyangwa ahandi hatazwi hafungirwa inzirakarengane.

Ni muli urwo rwego hari icyegeranyo cy’umuryango utegamiye kuli Leta urwanya ruswa n’akarengane mu Rwanda TRANSPARENCY INTERNATIONAL-RWANDA (TI-R), ku bushakashatsi cyakoze ku birebana n’itangazamakuru mu Rwanda kuva muli 2003 hatangira Itangazamakuru ryigenga ririmo amaradiyo, ryakomeje gukura aliko rikaba rirangwa na Ruswa ku buryo bugaragara ariko ntibuvugwe cyane.

TI-R iravuga ko , mu bakora Itangazamakuru 388 babajijwe muli ubwo bushakashatsi, bose bavuze ko itangazamakuru ryo mu Rwanda ririmo Ruswa. Abandi bagenerwabikorwa cyangwa abakorana naryo, muli 1093 babajijwe nabo bose (100%) bemejeko itangazamakuru mu Rwanda ririmo Ruswa.

Mw’ itangazamakuru ryo mu Rwanda, ubushakashatsi bwagaragaje ko abakora itangazamakuru ubwabo bemeza ko Ruswa y’amafranga (66%) ariyo yiganje cyane mu mwuga wabo, hagakulikiraho n’icyenewabo (60%), ikimenyane (54%), Ruswa ishingiye ku gitsina (43%), no guhabwa impano (39%).

Abakorana n’itangazamakuru biswe abafatanyabikorwa b’itangazamakuru, bemeje ko Ruswa y’amafranga ariyo yamunze itangazamakuru (72%), igakulikirwa n’icyenewabo (61%), ruswa ishingiye ku gitsina (49%), ikimenyane (48%), no guhabwa impano (35%).

Ubu bushakashatsi bwagaragaje bidasubirwaho ko ibijya bivugwa mu matamatama ko itangazamakuru ryo mu Rwanda ryamunzwe na Ruswa bifite ishingiro.

Ruswa kandi igaragara no mubayobozi b’ibitangazamakuru mu gihe cyo gutanga akazi n’ibindi; urugero kwemera kuzatanga amafranga runaka igihe uzaba uhawe akazi. Wahembwa nka 800.000frw nawe ukagomba kuzamuha 200.000frw.

Ruswa nanone iza ku isonga ni ugushaka no guhabwa amatangazo yamamaza (advert). Ku batabizi, burya ku bitangazamakuru hafi ya byose mu Rwanda bitunzwe no kwamamaza(advert), iki cyiciro kikaba cyaramunzwe na Ruswa ku kigero cya (45%) ushingiye ku buhamya bw’abakora itangazamakuru ubwabo, naho washingira ku buhamya bw’abakorana n’itangazamakuru ugasanga ko ruswa muli iki cyiciro iri ku kigero cya (34%).

Akenshi iyo ibigo bikomeye bigiye kuguha kontaro yo kubyamamaza, bigusaba ko nta kintu nakimwe uzabavugaho kibi.

Ubu bushakashatsi bwanacukumbuye inkomoko ya ruswa ivugwa mw’ itangazamakuru ryo mu Rwanda maze basanga inzego z’abikorera (private sector) arizo za mbere mu gutanga ruswa, hagakulikiraho inzego z’ubutegetsi bwo hejuru muli Leta, hagakulikiraho inzego z’ibanze.

Hari abanyamakuru bahabwa ruswa n’abayobozi b’uturere, yaba ari gukora inkuru, akibagirwa amahame y’umwuga. Hari n’igihe abanyamakuru bahanahana amazina ya ba mayors bakunze gutanga za ruswa.

Ubu bushakashatsi bugaragaza ko ibitangazamakuru by’ubucuruzi cyangwa by’abantu ku giti cyabo aribyo bibonekamo ruswa (73%) cyane kurusha ibitangazamakuru bya Leta (24%).

Ikindi ubushakashatsi bwagaragaje ni uko ibinyamakuru bisohoka ku mpapuro (print media) aribyo birya ruswa cyane hagakulikiraho amaradiyo, hakaza n’ibinyamakuru byandika kuli internet.

Amafranga atangwa cyangwa akakirwa nka ruswa mu itangazamakuru ryo mu Rwanda ari hagati ya 5.000 na 1.500.000 Frw.

Abahanzi bo bagaragaje ko nta muhanzi ushobora kuzamuka adatanze ruswa ku banyamakuru aribyo bita (kuguha hit). Mu bindi byagaragajwe n’ubu bushakashatsi ni ijambo ryitwa ‘’GITI’’, ku banyamakuru rikunzwe gukoreshwa nk’amafranga y’urugendo cyangwa ayo guhaha amafunguro ahabwa umunyamakuru igihe agiye mu kazi ko gutara amakuru atayahawe n’ikigo cy’itangazamakuru akorera ahubwo akayahabwa n’uwamutumiye ngo atare amakuru.

Banyarwanda, Banyarwandakazi, nubwo umuryango (TI-R) ntako uba utagize ngo ubwire Leta n’ibitangazamakuru mu kwikubita agashyi, ndahamya ko kurandura ruswa mu itangazamakuru ryo mu Rwanda bitazigera bishoboka kubera inzego nkuru z’ubutegetsi zayigize intwaro ikomeye haba hano mu Rwanda cyangwa mu mahanga ntawe ubiyobewe, nkaba nsanga gutakambira Leta ya FPR mu gufata ingamba zo kuyikumira ari nko gucurangira abahetsi. Byongeye kandi iyi ruswa mu itangazamakuru ryo mu Rwanda ikaba ifite ingaruka nini ku gihugu, yaba ku bukungu no kugeza amakuru ku banyarwanda. Mugire amahoro.

Byanditswe ku wa 8/11/2015, na:

A.BEN NTUYENABO, KIGALI-RWANDA.

Amakuru ki ?

Amakuru