Archives mensuelles : septembre 2015

Hagati yo kurwanya ubukene no kubaka demokarasi Kagame ahitamo iki?

Le 21/8 hano i Kigali habereye inama yari yateguwe na fondation Zenawi (fondation yitiriwe uwahoze ari premier ministre wa Ethiopie aza kwitaba Imana muri 2012). Muri iyo nama président Kagame na ministre w’intebe wa Ethiopie, bemeje ko Afurika igomba kurwanya ubukene, demokarasi ikaza nyuma.

Ministre w’intebe wa Ghana ndetse n’umunyamakuru wa BBC wari uyoboye ibyo biganiro bemeje ko iterambere ridafite demokarasi ridashobora kuramba. Uwo munyamakuru yibukije abo bayobozi ko kenshi bihisha inyuma y’iterambere bagejeje ku bihugu byabo maze bagahonyora uburenganzira bwa muntu. Imvugo itarashimishije umukobwa wa Zenawi. Twibuke muri Libiya ukuntu Khadafi yari yarateje imbere abaturage be ariko yarabimye ubwinyagambiriro. Nubwo imbaraga nyinshi zamukuyeho zavuye mu bazungu ariko byose byatangijwe n’abaturage be bari barambiwe igitugu.

Aha yirengagije ko ibyo bihugu nabyo ayo majoro byayaraye, kuko nabyo byanyuze mubihe by’intambara abakene bakandamijwe barwanya abifite. Nuko amashyaka agendera ku mahame ya gisocialiste yavutse. Abakire ari nabo bayoboraga bava kwizima bemera ko hashyirwaho ubutegetsi buturutse mu baturage, burengera abaturage. Bumvikana kuburyo ibihugu byabo bigomba gushyiraho inzego z’ubutegetsi ziharanira imibereho myiza ya buri mwene gihugu ndetse n’uburyo abayobozi bazajya bajyaho binyuze mu mucyo.

Ibyo bihugu biduha amasomo si ukutwanga cyangwa politiki ya mpatse ibihugu ahubwo ni uburyo bwo kutuburira ngo twe kunyura kure, twe gupfusha ubusa imbaraga n’igihe nkuko kwa Kadhafi byagenze, ahubwo duhite tujya ku byingenzi. Twubake iterambere rifite imizi muri demokarasi.

Banyarwanda rero igihe ni iki cyo kwima igihugu cyacu, ubuyobozi burwana ku nyungu zabari k’ubutegetsi ahubwo tukagiha ubuyobozi burebera buri mu nyarwanda wese, bityo twese tukabaho mu bwisanzure no mu bwubahane mu gihugu cyacu.

Zirikana ko art 101 ari Ndahindurwa

BURI MUTWE WA POLITIKI WEMEWE NA LETA YA FPR MU RWANDA WEMEREWE MILIYONI CUMI N’ENYE Y’AMANYARWANDA (14.000.000Frw)

Mu rwego rwo gukumira imfashanyo zishobora kwohererezwa imwe mu mitwe ya politiki yemewe mu Rwanda aribyo FPR yise imfashanyo-ndogano; Leta yiyemeje kujya igenera iyo mitwe budget yo gukoresha buri mwaka muli gahunda zayo. Ni muli urwo rwego mu Inama rusange y’abagize ubuyobozi bw’imitwe ya politiki yemewe mu Rwanda yateranye kuli uyu wa kane taliki ya 17/09/2015 ku cyicaro cy’ihuliro, yemejeko buri mutwe wa politiki ugiye guhabwa angana na miliyoni 14 zo gukoresha mu bikorwa byawo bya buri munsi. Ikindi hakaba haranatowe Prezida w’ihuliro mushya ariwe Hon. NYIRAHIRWA Vénéranda mu gihe cy’amezi atatu.

Muli iyo nama kandi, umwe mu bakada bakuru ba FPR, MUSONI Protais, umuyobozi wa Panafricanism Movement Rwanda, muli iki gihe gishize wari waricajwe ku gatebe k’abatakigendana neza na FPR; yatanze ikiganiro kuri uwo muryango PANAFRICANISM MOVEMENT RWANDA ugamije kwimakaza ihame ry’ubunyafrika mu banyarwanda ndetse no mubatuye uyu mugabane, ngo ukaba uharanira ubufatanye hagati y’abanyafrika. Icyo gitekerezo cyazanywe na ba nyakwigendera Nkrumah, Lumumba….n’abandi nka ba Nyerere, Mandela aliko ntabwo kigeze kigera kuntego kugeza ubu, ati niyo mpamvu tugomba kugishimangira buhoro buhoro tukazakigeraho. Ati: uyu muryango uzatuma dushobora guhangana n’ingaruka uyu mugabane uhura nazo zituruka ku kwivanga kw’amahanga mu miyoborere y’uyu mugabane. Tugomba kuzamura ubuhahirane hagati yacu muli Africa noneho ku rwego rw’isi hakajya hahinduka amategeko gusa kugira ngo ibintu byose bibashe kuba byahura , bityo bizadufasha kwirinda abaduha amasomo ya demokrasi adahuye n’umuco wacu cyangwa kwongera guhabwa n’amahanga imirongo ngenderwaho mu by’ubukungu na politiki, ubwo ni ubukoloni tugomba gushyira iruhande. Akomeza agira ati: uyu muryango Panafricanism, ishami ry’u Rwanda turifuza ko uzahagaralirwa kuva ku rwego rw’umudugudu kugera ku rwego rw’igihugu.

Banyarwanda banyarwandakazi, ntituyobewe ko izi ari zimwe muli za techniques FPR irimo ikoresha mu kurangaza abanyarwanda n’abandi bose kugira ngo bibagirwe politiki mbi yayo bityo iminsi ibe yicuma.

Iyo Panafricanism se itarashobora gushyirwa mu bikorwa kugeza magingo aya uhereye ku isöko y’igitekerezo n’abakurikiyeho bose kandi bakiriho nka ba Museveni, Mugabe etc… , FPR niyo izabishobora? Keretse nibayita rwandisme!

Byanditswe kuwa 18/09/2015, na:
A.BEN NTUYENABO, KIGALI-RWANDA.

Rwanda : Ikibazo cyo kwamburwa ubutaka giteye inkeke

Gutabariza abaturage batuye mu ntara y’iburasirazuba, akarere ka Gatsibo, umurenge wa Rwimbogo, akagari ka Rwikiniro mu mudugudu wa Ndama, ni akagari ka munini mu midugudu ya Munini na Kabeza. Ibintu bimeze nabi muri gahunda leta yise iyo guhuza ubutaka.

Aho hantu mu mwaka wa 2013 baraje bahakora amatarasi ku ngufu za leta nta ninteguza barimbura insina, imyumbati, ibijumba, ibiti n’ibindi byari bifitiye abaturage akamaro gasumba kure ibyo byo guhuza ubutaka. Iyo myaka kandi bayirimbuye nta ngurane bahaye abaturage.

Iyo urebye gahunda yo guhuza ubutaka ni gahunda iri mu nyungu z’abantu bake na leta naho umuturage akabikeneramo. Kuko ubu aba baturage barahinga, bakabagara, hanyuma bagasarurira hamwe aho bita ngo ni muri hangali kuko ntawemerewe gutwaraho na duke murugo. Nk’ibigori iyo uciyemo icyo kotsa bakagufata ufatwa nk’umujura wese ugacibwa amande. Mu byukuri abaturage inzara igiye kubamara.

Mu guhinga kandi bategekwa kwishyura imbuto nifumbire mbere yo guhinga kandi ubwo abaturage baba babuze nibyo bararira. Ubuze imbuto ntahinge ndetse n’uwakerewe bose imirima yabo ihabwa abandi bantu ku ngufu za leta kandi ntawutinyuka kuvuga ngo buke kabiri.

NB:ibyo byose abaturage bari barabyakiriye ariko muri ino season yo mu kwa cyenda byahinduye isura kuko aho bakoze amaterasi batema imibyare yari yarongeye kumera ndetse abaturage batemaho ibitoki. Kandi hari amashyamba y’abantu ku giti cyabo mbere bagendaga batanga za ruswa ntarimburwe. None ubu haje umugoronome mushya twabashije kumenya kw’izina rimwe witwa { Clode } arimo gutegeka ngo insina n’ibiti byose birimburwe . Akabwira banyirabyo ngo babyirimburire kuko naza kubirimbuza bazishyura amande.

Abaturage rero baratabaza ngo barebe ko insina n’ibiti byabo byarokoka.

Ikindi iyo urebye umusaruro wavaga aho bakoze amatarasi mbere warutaga uhava ubu bahakoze amatarasi kuko bazamuye itaka ryo hasi ikuzimu kandi iryo taka ni umutuku nti ryera ubu abaturage bahingamo bakarumbya ugereranije na mbere batarahacukura.

Ikindi barunzemo imikingo igiye yegeranye kandi buri umwe ugira metero 2 zubugari ubwo ukageza aho umurima ugarukiye. Ku buryo aho umuntu yahingaga hagabanutse cyane. Ubwo rero kuba ubutaka buhingwa bwaragabanutse kubera iyo mikingo bacukuyemo hakiyongeraho ko bazamuye itaka ry’ikuzimu ritera, byateye abaturage batuye muri ako gace inzara idashira.

Usanga rero insina ndeste n’ibiti by’abo baturage bifite agaciro kurusha umusaruro uva muri ayo matarasi.

Ari nayo mpamvu abaturage batabaza nubwo batinya kuvuga ngo batabizira.

Kandi urebye ahantu bakora amatarasi iburasirazuba ni ahantu haringaniye kandi hateze ku buryo ubona hatari hakwiye amaterasi . Nkuko bizwi amaterasi yagenewe ahantu hahanamye. Ariko aba baturage bo muri aka gace babigirijeho nkana mu mugambi wo kwigarurira ubutaka bwabo kugira ngo bicwe ni nzara.

IKIBAZO CYO GITEZA CYAMUNARA IBYA RUBANDA KIRANZE KIBAYE INGUTU MU RWANDA

Nkurikije inyandiko yanjye naboherereje yerekeye guteza za Cyamunara hano iwacu mu Rwanda, ubu noneho hagezweho inkuru y’amahoteli aciriritse arenga ijana ashobora gutezwa Cyamunara kubera kunanirwa kwishyura inguzanyo z’amabanki zatumye yubakwa. Urugero: Hotel Alpha Palace(Remera), Eden Hill, Karisimbi Hôtel, Eldorado n’izindi zose ntarondora hano.

Impamvu nyamukuru y’ibyo bibazo nkuko ba Nyiramahoteli babidutangarije akaba ari uko Leta yakoresheje ingufu nyinshi mu gushishikariza abashoramali bo mu Rwanda kubaka amahoteri menshi yo kwakira abantu mu gihugu kandi umubare w’abakerarugendo hano iwacu ukiri hasi cyane.

Sylvestre MUPENDA uyobora Ihuliro ry’abanyamahoteri mu Rwanda( Rwanda Hotel Group), yadutangarije ko kuva mu 2007 kugeza 2013 bari bamaze kugera kubyumba 6.500 bivuye kuli 300, ati nyuma yo kubaka izo Hôtels ntizibona abo zakira kandi benshi muli twe zubatswe mu inguzanyo z’amabanki; kuburyo hôtels zacu ziri gutezwa Cyamunara n’amabanki ku giciro gito cyane; ikigo k’igihugu gishinzwe gukusanya imisoro nacyo nuko ntikitworoheye.

Akomeza avuga kandi ko kutishyura hari aho byashingiye ku nyungu bakwa n’amabanki iri hejuru, hagati 18 na 25 ku ijana, byongeye n’igihe gito bahabwa cyo kwishyura kiri hagati y’imyaka irindwi n’icumi.

Yakomeje agira ati hari nanone ikibazo gishingiye ku ikoreshwa riri hasi cyane ry’amahoteri yacu, riri hagati ya 1 na 5 ku ijana, bityo bikagorana kwishyura inguzanyo.

Ati: twagejeje kenshi kuli gouvernement ibyo bibazo byacu, ikaza ikatubeshya ngo twitegure igiye kuzana abashyitsi mu manama yewe ikanaza gushyira ibiro byayo mu mahoteri amwe namwe tugategereza abashyitsi aliko tugaheba. Ikindi nanone nubwo ayo mahoteri ari ku isoko ariko usanga mu baguzi nabo bibaza icyo bayakoreramo baramutse bashoye amafranga yabo! Ngaho aho bigeze iby’abanyamahoteri mu Rwanda na Leta ya FPR. Murakoze.

Byanditswe kuwa 07/09/2015, na:

A. BEN NTUYENABO
KIGALI-RWANDA.

Hagati yo kurwanya ubukene no kubaka demokarasi Kagame ahitamo iki ?

Le 21/8 hano i Kigali habereye inama yari yateguwe na fondation Zenawi (fondation yitiriwe uwahoze ari premier ministre wa Ethiopie aza kwitaba Imana muri 2012). Muri iyo nama président Kagame na ministre w’intebe wa Ethiopie,bemeje ko Afurika igomba kurwanya ubukene, demokarasi ikaza nyuma.

Twibuke muri Libiya ukuntu Khadafi yari yarateje imbere abaturage be ariko yarabimye ubwinyagambiriro. Nubwo imbaraga nyinshi zamukuyeho zavuye mu bazungu ariko byose byatangijwe n’abaturage be bari barambiwe igitugu.

Le 5/9 mu muhango wo kwita izina ingagi wabereye mu Murera, président Kagame yongeye kubwira abanyarwanda ko icyo yimirije imbere ari ukurwanya ubukene naho ibyo kubatavuga rumwe bikazaza nyuma. Yanashushe nusubirizaho itangazo rya Amerika rivuga ko ridashyigikiye ibya commission yo kwandika bahindura iby’Itegeko Nshinga parlement yu Rwanda na président Kagame bashyizeho. Kagame yagize ati : abo baduha amasomo, twe turara ijoro tuzi icyo turitinyamo.
Aha yirengagije ko ibyo bihugu nabyo ayo majoro byayaraye, kuko nabyo byanyuze mubihe by’intambara abakene bakandamijwe barwanya abifite. Nuko amashyaka agendera ku mahame ya gisocialiste yavutse. Abakire ari nabo bayoboraga bava kwizima bemera ko hashyirwaho ubutegetsi buturutse m’ubaturage, burengera abaturage. Bumvikana kuburyo ibihugu byabo bigomba gushyiraho inzego z’ubutegetsi ziharanira imibereho myiza yaburi mwene gihugu ndetse n’uburyo abayobozi bazajya bajyaho binyuze mu mucyo.

Zirikana ko art 101 ari Ndahindurwa

J. Jules Rugero

IKIBAZO CY’ABANA B’INZEREREZI MU MUGI WA KIGALI.

Muli iki gihe abana benshi, ari abasabiriza, kimwe nabo bita ba mayibobo bongeye kugaragara cyane mu mugi wa Kigali, imwe mu mpamvu itera icyo kibazo akaba ari uko kuva mu mwaka wa 2012 Leta y’u Rwanda yafashe icyemezo cyo gufunga za orphelinats binyuze muli Ministère y’umuryango, abana bose babaga muli izo orphelinats bagashakirwa imiryango ibakira bajya kubamo buhoro buhoro k’ubwumvikane n’iyo Ministère noneho Leta ikajya inayibafashirizamo aliko nako inabakulikirana bikaba byari mu nshingano yiyemeje.Icyo ngo akaba cyari igikorwa kijyanye na ya gahunda ya Leta y’u Rwanda bise ‘‘Kwigira’’.

Ikibazo rero, bamwe muli abo bana bananiwe kuba muli iyo miryango, bananirwa kwiga, abandi barayitoroka bahitamo kwibera indaya na za mayibobo. Leta ikaba yari yaranabemereye ko izajya itanga buri kwezi ibihumbi 200 mu rwego rwo kubafashiriza muli iyo miryango! none ari ugukulikirana imibereho yabo muli iyo miryango n’ubufasha babemereye byose byarabuze, kandi bakitabwaho na za orphelinats ntakibazo bari bafite kuko hari n’abagiraneza benshi batandukanye babitagaho ubuzima bwabo bukagenda neza kugeza bakuze, kurusha kuba muli iyo miryango. Ibyo byose rero bikaba byarahagaze bahitamo kuyoboka imihanda birirwa mu masoko basabiriza abandi baryama aho babonye. Icyo cyemezo kikaba ari kimwe mu mpamvu zatumye abana b’inzererezi na za mayibobo biyongera mu migi y’u Rwanda, by’umwihaliko mu mugi wa Kigali. Izo ngaruka mbi zose zikerekana ifatwa ry’ibyemezo kuburyo buhubutse aribyo micungire mibi y’ibya rubanda.

Byatohojwe kuwa 05/09/2015 na:

A.BEN NTUYENABO,

KIGALI-RWANDA.

BA RUSAHURIRA-MU-NDURU MU BUKUNGU BW’U RWANDA.

♦-Nkuko mperutse kubyandikaho, nyuma yo kwirukanwa kw’imiryango itagira aho ibogamiye (ONG) hafi ya yose mu gihugu cyacu, hashyizweho ikigega (AGACIRO DEVELOPMENT FUND), abanyarwanda b’ingeri zose , ibigo bya Leta, abikorera ku giti cyabo n’abandi barakitabiriye pe! aliko kugeza ubu babaye nkabarambirwa guhora batanga amafranga batamenya irengero ryayo bagahora babeshywa ko arimo kubyazwa inyungu.

♦-Ikindi ni ikigega nacyo cyiswe ISHEMA RYACU kimwe cyashyiriweho gufunguza mu gihugu cy’ubwongereza Lt. Général KARENZI KARAKE, nacyo kikaba cyarashyizweho mu gihe ari mu cyaro kimwe no mu migi by’u Rwanda nta gafaranga kakiharangwa kubera ubukene no gutanga imisanzu inyuranye ku buryo budasobanutse.Iki gikorwa cyo kwaka umusanzu wo gufunguza K. KARENZI nacyo kikaba cyarabaye nk’urwitwazo rwo gukomeza gusahura umuturage wakagombye gufashwa, kuko amafranga yaratanzwe, KARENZI arafungurwa, amafranga ntiyahabwa ubwongereza kandi ntiyanasubizwa abayatanze, ukaba wakwibaza aho bayashyira? aliko ibyo byose bikaba bigaragaza amafranga akoreshwa mu bikorwa binyuranye by’umwijima mu gihe mu giturage nta gafaranga nabusa kaharangwa, bikaba bizwi kandi ko Leta ya FPR muli ibi bihe ikoresha amafranga menshi cyane mu iperereza ryayo ikora mu kuneka abatavuga rumwe nayo aho bari hose haba hano mu Rwanda no mu mahanga, mu rwego rwo gushaka kubahitana hakoreshejwe ikiguzi uko cyaba kingana kwose binyuze munzira izo arizo zose zishoboka.

♦-Nkuko tubikulikirana umunsi kuwundi rero hakaba hari n’amafranga milliards 15 ziyongera kuzindi milliards 114 zahawe ishyaka FPR riri ku butegetsi, zose hamwe zikaba 129 milliards guhera muli 2008-2015, bigaragaza igihombo muli Banki Nkuru y’igihugu hakulikijwe audit financier y’intumwa za FMI ziherutse hano mu Rwanda muli rapport zagejejweho na Gouverneur wa Banki Nationale y’u Rwanda mumpera z’ukwezi gushize, aho uyu gouverneur yanikomye cyane ibinyamakuru ngo byiha gutangaza ibirebana n’ubukungu n’icungamali ya Leta kandi batabisobanukiwe.(yiyibagije ko tuziko ikintu cyose gikoze ku ifaranga ry’igihugu kigira ingaruka k’umwenegihugu wese uri ku buso iryo faranga rikoreshwaho) ariyo mpamvu byitwa ubusahuzi cyangwa FPR yariyibye!! (sinzi uko umuntu yabyita). Umuntu akaba yakwibaza impamvu FPR iguza BNR kandi haba hari ingengo y’imali iva mu misoro y’abaturage n’inkunga z’amahanga!

Gouverneur RWANGOMBWA John wa BNR rero, akaba avuga ko FPR yagurijwe aliko ntasobanure procédure uko iteye mu kwishyura kandi tuziko kwishyulira rimwe imbumbe amafranga angana kuriya bigoye.

♦-Ibijyanye n’ubukungu byo ni byinshi, hari nanone ibibazo biri hose mu gihugu byerekeye Cyamunara z’urudaca ku mitungo y’abaturage n’bacuruzi igurisha buri munsi kubera imyenda mu kubura ubwishyu bw’inguzanyo z’amabanki ahanini bitewe n’inyungu zikabije zakwa nayo mabanki ku bwumvikane n’amabwiriza ya banki nkuru y’igihugu (BNR).

Urugero: Isoko ryo ku KABEZA hano ku Kicukiro mu mugi wa Kigali ririmo gutezwa Cyamunara na I.M BANK kubera inguzanyo yahaye umugabo witwa SEWAYEZU Louis yo kugura iryo soko akaba yarabuze ubwishyu byongeye kandi na RRA (Ikigo k’igihugu gishinzwe imisoro nacyo cyari giherutse kurifungira imisoro abaturage baricurulizamo barasakuza, nibwo Maire w’akarere ka Kicukiro akomakomye RRA irarifungura aliko ikibazo nticyarangira, aho bigeze akaba igisigaye kwari ukuriteza Cyamunara avuyemo akishyurwa Banki , RRA ndetse no kwishyura imisoro abaturage barikoreragamo bari baratanze, bitashoboka hagakomeza gukurikiranwa indi mitungo y’uwo mugabo Louis aho iherereye hose, ali nako tubona bizamugendekera kuko mu cyamunara cyabaye ku wa 01/09/2015 hagati ya Banki, umuhesha w’inkiko n’abaguzi; amafranga menshi yakigaragayemo akaba atararengaga ibihumbi 800.000 frw kandi Banki ishakamo milliards 2 n’ibihumbi 100 by’amafranga y’u Rwanda kugirango yiyishyure, cyamunara ikaba yarasubitswe ikazasubukurwa mumpera zuku kwezi kwa cyenda.

Uretse rero n’inyungu zihanitse, ureba ubukene buri mu gihugu ugasanga nta kundi abaturage babigenza ahubwo baba bashaka nayo gukoresha mu mibereho yabo bwite, ibibatunga n’ibindi, kugirango bashobore kuramuka , batitaye cyane ko ari inguzanyo bazishyura.

♦-Urundi rugero:RSSB (Isanduku y’ubwiteganyirize bw’abakozi bitaga Caisse sociale du Rwanda), ubu icyo kigo Leta iherutse no kwirukana umuyobozi mukuru wacyo Dr. UFITIKIREZI kubera igihombo mu micungire yacyo, kiratakamba kubera kubura amafranga ya Pension z’abakozi yashowe mu kubaka imidugudu igezweho n’amazu maremare hirya no hino mu gihugu bizeye kuyabyaza umusaruro none amenshi yabuze abayajyamo kuburyo umwaka 2013-2014 Auditeur Général w’igihugu yagaragaje ko bamaze guhomba milliards 65 zose z’amafranga y’u Rwanda udashyizeho 2014-2015, kandi bakaba babona igihombo gikomeza. Akaba ari muli urwo rwego ikigo cyafashe icyemezo cyo kugurisha amwe muli ayo mazu kugirango batazavaho babura burundu pension z’abakozi.Amazu ateganyijwe kubanza gushyirwa ku isoko nkuko babidutangarije, akaba ari imiturirwa yubatse i KARONGI ( Kibuye), MUSANZE (Ruhengeri) na RWAMAGANA(Kibungo).

Umukozi umwe wo muli department of economy ya BNR utarashatse kuntangariza amazina ye kubera umutekano yambwiye ko ibibazo mu birebana n’ubukungu mu gihugu ari byose, ko hagombye gufatwa ingamba zikomeye kuko mu minsi iza ubukungu bw’u Rwanda buzarushaho kuba bubi cyane! ati harimo iyeri rya FPR rikomeye!! bikaba byerekana imicungire mibi y’imali y’igihugu.

♦-Banyarwanda banyarwandakazi, iyo nsensenguye ibibera mu Rwanda muli iki gihe mbona benshi basa nabasahuranwa nkaho ijuru rigiye kubagwaho, kuburyo iyo uganiriye nuwariwe wese usanga yibaza amaherezo nkaho yicaye kuli Bombe igiye kumuturikana. Bavandimwe nshuti biradusaba kwihangana abagifite icyizere cyo kubaho no gutekereza imigambi ikwiye kugihugu cyacu mugihe kiri imbere, mbona ko kitazarambirana. Mugire amahoro.

Byateguwe kuwa 05/09/2015, na :
A. BEN NTUYENABO,
KIGALI-RWANDA.

Kurema igihugu bundi bushya birashoboka?

Ni kenshi usanga abantu bagiye k’ubutegetsi bakoresheje intwaro, usanga bavuga ko bifuza kurema igihugu bundi bushya!

Hari ukurema igihugu bushya wubaka ibikorwa remezo by’ibanze : amazu, imihanda, etc. Kuburyo umuntu wasura icyo gihugu acyizi mbere y’intambara asanga koko igihugu cyarubatswe. Ese ubundi ufite abanyepolitiki b’inyangamugayo, ukagira ibihugu by’inshuti bikaguha inkunga z’amafaranga, ukubaka ibikorwa remezo hari igitangaza se kirimo? Abatabishobora nibo bacye!
Hari uguhindura igihugu bushya uhindura imitekerereze n’imyumvire. Kugirango habeho guhindura imyumvire n’imitekerzreze y’abanyagihugu, bisaba abanyepolitiki b’inyangamugayo, batagira indimi 2, ibyo bavugira ku karubanda, nibyo bavuga biherereye bari kumwe nabo bahuje umugambi. Bagomba kuba abanyepolitiki badashyiraho gahunda yo guhuma abantu amaso ubeshya ko buri wese yiga ariko mu kazi hakabamo kurobanura. Ubeshya abaturage ko bisanzura kandi uvuze icyo udashaka umufunga! Ibyo byose bikorwa abaturage baba babibona bakicecekera. Gukora politiki yo guhuma abantu igihu mu maso ntabwo ishobora guhindura imyumvire n’imitekerereze y’abanyagihugu.

Guhindura imitekerereze n’imyumvire y’abanyagihugu, bisaba abanyapolitiki b’inyangamugayo , bava mu bice byose by’abanyagihugu. Bakigira hamwe kandi bakemeranywa ku mahame remezo agomba kugenga igihugu cyabo. K’uburyo niyo bagira amashyaka menshi ariko habaho amahame remezo bose bagenderaho. Kugeza ubu igihugu cya Afrique du Sud nicyo cyonyine cyabigezeho. ANC n’imitwe yari iyishamikiyeho hamwe na National Party ishyaka ry’abazungu n’indi mitwe yari ibashamikiyeho, bose baciye bugufi bemera kuganira ngo bashyireho amahame remezo, atuma abo muri icyo gihugu babana neza ibihe byose. N’ubwo muri Afrique du Sud abazungu bakandamije abirabura igihe kinini, ntabwo abirabura babaye imbohe z’amateka.

Bahisemo kureba imbere, birinze kugendera kuri politiki yo gukinga abaturage igihu mu maso bahisemo gutanga ubwisanzure busesuye kuri buri mu nyagihugu. Ubu demokarasi yashinze imizi ntawe uryamirwa. Ikibazo cy’ingutu basigaye barwana nacyo ni ubukene. Abanyepolitiki baho ntibarindiriye ko ababayeho mugihe cya apartheid babanza gupfa ngo abanyafurika yepfo babone gishyiraho gahunda yo guhindura imitekerereze n’imyumvire. Ahubwo ababaye muri apartheid n’abayirwanyije bicaye hamwe nta kubeshyana bumvikana uko baca burundu iyo politiki mbi yari yaratsikamije bamwe! Ari uwatsikamiwe ari uwatsikamiye (oppressed& oppressor), bose baciye bugufi baraganira! Gutegereza ko ngo hari abagomba gusaza, abavutse nyuma akaba aribo bubaka sosiyete nshya ni ukwibeshya.

Ubu mu Rwanda usanga abambari ba FPR na Kagame bavuga ngo ni agume k’ubutegetsi nyuma ya 2024 hazaba hari indi génération, iyi ni politiki y’igihu. Guhindura amateka wibwira ko abo uri kurera bazayamira bunguri muri iki gihe ni ukwibeshya cyane haje technologie. Kugirango mu Rwanda abanyarwanda bahindure imyumvire n’imitekerereze turandure burundu iby’amako n’inkurikizi mbi zabyo ni uko hazabaho mu Rwanda Inama Ngoboka Gihugu (dialogue interrwandais), ihuza abanyepolitiki bo mu ngeri zose, ari abari k’ubutegetsi cg abatavuga rumwe nabwo, bakumvikana ku mahame remezo agomba kugenga igihugu cyacu.

Uyu munsi guhindura Itegeko Nshinga ry’igihugu hari igice cy’abanyarwanda gihejwe, ugahitamo kujyana nabarwana n’imbehe zabo gusa, birerekana ko kugera k’ubumwe bw’abanyarwanda bikiri kure, amahoro n’iterambere birambye mu rwa Gasabo bikiri inzozi. Kuko ibyo tubona uyu munsi ni ivu rirengeje k’umuriro!

Niduharanire impinduka yigihe cyose itagarukira kuri twe turiho uyu munsi !

Amakuru ki ?

Amakuru