photo/http://ayyaantuu.com

Si  amakabyankuru,  ibigaragalira  buri  wese  ni  uko  bitinywa  kuvugwa, iyo  ubona  imiryango  mpuzamahanga(ONG)  yarasezerewe  mu  gihugu  kubera  ko  imfashanyo  yatuzaniraga  itakinyuzwa  mu ngengo  y’imari  ya  Leta  bikaba  byarabaye  intandaro  yo  kuyisezerera  ngo  ntacyo  imaze,  uretse  kugambanira  abayobozi  b’igihugu  no  kubangamira  umutekano.

Zimwe  muli  izo  ONG  ni  CRS (Catholic  relief  services)  ari  nayo  izindi  ONG  zitandukanye  zari  zisanzwe  zinyuzaho  imfashanyo  yazo  mu  gufasha  abatishoboye  mu  kurwanya  inzara  mu  gihugu, aho  itumvikaniye  rero  na  Gouvernement  y’u  Rwanda  uburyo  bwo  kuyisaranganya  ubwayo  abo  ibona  bayikwiriye  ihitamo  kubireka.

Uretse  mu  migi  minini  ahandi  mu byaro  inzara iranuma, rurakinga  babili kandi  nta  rwinyagambuliro, barapfa, abandi  bagasuhuka  nabwo  batazi  iyo  bajya  cyangwa  ngo  bagire  uwo  batakira!

Noneho  hagakubitiraho  n’ibibazo  by’amahôro  ya  Leta : Umutekano  buri  rugo: 2.000F, Isuku: 2.000F, Mutuelle  de  Santé: Amakeya  guhera  ku mukene  nyakujya: 3.000F  kuzamura  kugeza  kuli  7.000F  kuli  buri  wese  utuye  mu muryango  umwe, abaturage  barashize!  Aliko  nyine  dictatures  zose  ni  uko  nta yirangiza  neza.

Hakaba  hari  andi  mabwiriza  gouvernement  yashyizeho  nayo  abangamiye  cyane cyane  abatuye  mu migi: ni  ukuvuga  ngo  congé  isanzwe (umunsi  w’ikiruhuko), iyo  ibaye  mu ntangiriro  ya  weekend (vendredi) automatiquement  n’umunsi  wo  ku  wa mbere  ukulikira  hagomba  kuba  ikiruhuko  ku bantu  bose, abacuruzi  mu kazi  gatandukanye  batangiye  kubyijujutira  bagaragaza ko  badakeneye  ibyo  biruhuko  kuko  bibicira  amaronko  yabo  kandi  bwacya  bakakwa  imisoro  ijya  mu  bifu  byabashyizeho  bene  ayo  mabwiriza.

Umucuruzi  umwe  ukorera  ahitwa  GAKILIRO  utarashatse  ko  nandika  amazina  ye,  ahuzuye  amazu  maremare  ya  za  cooperatives  z’ubucuruzi , aho  Prezida  Kagame  aherutse  gutaha  ku mugaragaro  yantangarije  muli  aya  magambo : ‘‘Ati  ibyo  biruhuko  byabo  bashyiraho  uko  bishakiye  babona  ko  tudakoze  tukabiishinga  barya  iki?, ak’imisoro  kaba  kashobotse  dore  ko  twanabuze  nabazikoreramo! Bazabanze  batubere  aba  commissionaires  mukudushakira  abazikoreramo, tubanze  tubone  n’ubwishyu  bw’ama  crédits  yaza  Banques  twafashe  tuyubaka’’.

Akomeza  agira  ati: ‘‘Iyo  habaye  ikiruhuko, uwakoreraga  5.000F/jour  acyura  800F, naho  1.000F agacyura  350F, ati ibyo ni  ugukandamiza  abaturage kandi  bisonzeye’’.

Muli  iki  gihe  kandi  RRA (ikigo  k’igihugu  gishinzwe  amahôro  mu  gihugu)  kirimo  kuzenguruka  igihugu  cyose  kigenzura  kikanafungira  abacuruzi  babereyemo  Leta  umwenda  w’imisoro, yewe  ubu  haravugwa  n’amaradio  yigenga  abili  yabaye  aka  BBC  ngo  kubera  iyo misoro  aliko mu  by’ukuri  nibyo  bitangazamakuru   byashoboraga  guhitisha  inkuru  zitagira  aho  zibogamiye  hakurikijwe  ubunyamwuga.

Ayo  maradio  ni  Contact  FM  na  City Radio  za  hano  I  Kigali. Nka  City radio  bayemereraga  cyane  ku  biganiro  n’abaturage  ku  byerekeye  ihindurwa  ry’itegeko-nshinga  n’ibindi  bitagenda  neza  mu  gihugu  harimo  ruswa  yayogoje   RNP (Rwanda  national  police)  no  mu  butabera/Minijust (voir  rapports  UN  et  Transparence  Internationale  2015).

Banyarwanda  banyarwandakazi,  nkuko  niyemeje  kujya  mbagezaho  ibibera  hano  mu  gihugu, hari  igitekerezo  numva  cyo  gushyigikirwa; mbere  yuko  hiyambazwa  izindi ngufu  kuli iyi  Leta, harasabwa  kubanza  kuzitira  inzira  zose  zinyuzwamo  imfashanyo  zihabwa  u  Rwanda,  bityo  wa muturage  nubwo  azaba  abangamiwe  birushijeho  kubera  inzara  aliko  bizamukangura  mu kutagira  ubwoba  bwo  guharanira  uburenganzira   bwe  mu  gihugu. Mugire  amahoro.

Byanditswe  ku wa  18/08/2015  na:
A.BEN  NTUYENABO, KIGALI-RWANDA.

Senateri Karangwa Chrysologue wari uyoboye itsinda ryo guskusanya ibitekerezo

Muri gahunda yo guhindura itegeko nshinga kugira ngo Kagame agume k’ubutegetsi,  icyiciro cyari cyigezweho ni uko abadepite n’abasenateri bagombaga kujya guhura n’abaturage kuva le 20/7 kugeza le 11/8/2015 mu mirenge 416 igize igihugu.
Icyari cyibajyanye:

1. Kumva ibitekerezo by’abaturage by’uburyo ingingo yi 101 yahinduka
2. Kwumva izindi ngingo abaturage bifuza ko zihinduka.

Nyuma y’iminsi 3 nkurikirana ibi biganiro nibajije impamvu bari gupfusha ubusa amafaranga y’igihugu. Nta kintu na kimwe gishya cyavuzwe n’abaturage cyangwa abadepite. Bose kwari ugushimagiza Kagame ku buryo wagira ngo ni ukwamamaza nko mugihe cy’amatora! Iyo mba mu Rwanda rutanga ibitekerezo bikakirwa mba narahise mbasaba gusimbuka icyo gice cy’ikinamico, ayo mafaranga bakayakoresha bashaka uburyo abaturarwanda tubona amazi muri iyi mpeshyi kuko twishwe n’umwuma n’umwanda kubera ko amazi ari kubona umugabo agasiba undi !

Nishimye ko kuri 4/8 abashingamategeko nabo basanze barigukora ubusa bagasoza uyu mukino barimo. Bifuje kuwusoza bari kumwe n’intiti z’igihugu. Abanyamategeko, abarimu muri kaminuza n’abavuga rikijyana (leaders d’opinions). Aha aba bashingamategeko bari bizeye ibitekerezo bikomeye ariko naho bacyuye umunyu ! Nta gitekerezo gishya bunguwe n’intiti z’u Rwanda. Nazo zakomye mu mashyi zirashimagiza.

Ubutegetsi bwa Kagame bwatoje abanyarwanda kutavuga ibinyuranye nicyo bwifuza. Ubikoze akitwa umwanzi w’igihugu. Bityo abanyarwanda barerwa mu muco wo guceceka (culture of silence), ntibaguhishurire icyo bafite ku mutima. None ubutegetsi bwa Kagame buguye mu mutego wabwo. Bwari bwifuje kwereka amahanga ko abanyarwanda bisanzuye mu gihugu cyabo bavuga ibyo bashaka none bose barumye gihwa, bakomeza kwikiriza indirimbo ubutegetsi bwateye. None n’iyo umuntu yaba umuswa ate yakumva ate ko abanyarwanda bose batumiwe muri izo nama bavuga bimwe? Kugeza no kubitwa intiti z’igihugu ?

Ubutegetsi bwa Kagame kubera gutinya ubwisanzure, bwemeje ko ibyo tubona bikorwa aribwo bw’isanzure! Ubu nibarebe ukuri mu maso bahereye ku myitwarire y’abitwa abanyabwenge b’igihugu. None se niba intiti z’igihugu nazo zibaho mu bwoba, zikaba nta gitekerezo kirebana n’ubuzima bw’igihugu zishobora gutanga, igihugu kiragana he?

Banyarwanda, nabasaba kuva mu ruziga rw’abatwumvisha ko nta kindi gishoboka muri uru Rwanda nta Kagame,  tugaharanira kubaho neza birenze ibyo tubona uyu munsi. Birashoboka niba duhaye u Rwanda ubuyobozi bufite amaraso mashya. Igihe ni iki.

Zirikana ko art 101 ari Ndahindurwa

Jules Rugero
Kigali-Rwanda

Ntangiye ndamutsa Abanyarwanda muri rusange kandi mbifurije amahoro aturuka ku Mana. Uyu munsi mu bwigenge ntayega bwa kiremwamuntu, mu bwisanzure bw’umunyagihugu cyigenga, no mu burenganzira mpabwa n’amategeko, ndagirango nsubize bimwe mu bibazo nagiye mbazwa ,nuko mbonereho no kugira icyo mvuga no kubindi Abanyarwanda bibaza muri iki gihe .Mbere yo gutanga igisubizo cyanjye ariko, mbona ko ari byiza kwibutsa mbere na mbere ko tugomba kuzirikana ko u Rwanda ari igihugu cyigenga, ko ari Repubulika kandi ko tugomba kuyibumbatira kugirango buri munyarwanda abeho mu mudendezo.

Hashize imyaka isaga makumyabiri amateka y’igihugu cyacu (Repubulika y’u Rwanda) ajemo kidobya igambiriye kuyagoreka no kujijisha abanyarwanda. Ibyobikaba byaratangiranye n’urugamba rwiswe urwa FPRI nkotanyi. Tutavuze byinshi kuri urwo rugamba, reka gusa twibutse ko rwaranzwe cyane no gukoresha ikinyoma ku buryo abarwitabiriye ku ikubitiro, batigeze basobanukirwa. Ibyo babwiwe sibyo babonye ; yewe n’ibyo babibye ubu bababajwe n’uko atari byo basarura. Muri iyi minsi, ib’intwari bamaze kwitandukanya n’imikorere y’iryo shyaka, bashishikariye kubitangaho ubuhamya. N’ubwo bwose bafatwa nk’abasebanya ariko, bo bagambiriye kugaragaza gusa agahinda batewe n’umutego w’ikinyoma bitabiriye, ndetse bamwe bikaba byarabaviriyemo guhemukira igihugu bakundaga mu bikorwa bimwe na bimwe bidahwitse bagiye bategekwa gukora.

Muri rusange kandi Abanyarwanda benshi bahagaritse umutima bibaza aho u Rwanda ruhagaze mu rwego rw’imiyoborere kandi batewe ipfunwe n’aho rurimo rugana. Ese ruracyari Repubulika yigenga ? Ese rwaba rwaraguzwe n‘ibikomerezwa by’imahanga ? Cyangwa nk’uko bamwe basigaye babyemeza rwabaye ingaruzwamuheto, rukaba burundu akarima k’abantu bake mu nyungu zabo bwite ?

Repubulika n’ubundi bwoko bw’ubutegetsi

Ibi bibazo binyuranye abantu bibaza nanjye njya mbyibaza . Mu buryo bwange rero nkaba mbona aho gukomeza kumera nk’aho byaturenze, ntacyo tubyumvamo, dukwiriye ahubwo kujya twiyibutsa kenshi amahame n’ibisobanuro bigenga inzira zihamye ibihugu byubakiraho icyizere cyabyo kuburyo burambye .

Muri urwo rwego duhereye ku gisobanuro shingiro cy’ijambo, « repubulika » riva mu kilatini « res publica »(chose publique) mu gifaransa, cyangwa (publicthing) mu cyongereza; tugenekereje mu rurimi rw’ikinyarwanda twavugako rivuga « ikintu cya rubanda » mbese « ikintu cya bose ».Mu buryo bw’ubutegetsi (by’umwihariko ibyo mu u Rwanda bita ubuyobozi), igihugu gihitamo kuba Repubulika cyangwa kuba Monarchie.

«  Monarchie » byo biva mu kigereki (mono) bivuga (seul) mu gifaransa na (only one) mu cyongereza naho mu kinyarwanda bikavuga wenyine/cyonyine ryiyunze n’ijambo rero «  arche »(pouvoir) mugifaransa, (power) mu cyongereza naho mu kinyarwanda bikavuga « ubutegetsi ». Ayo magambo iyo ahuye « monarchie » bivuga mu gifaransa (le pouvoir d’un seul) cyangwa (the power of only one) mu cyongereza.

Mu byukuri rero ubu ni uburyo bwa cyami. (Ubu buryo bukabamo ingeri nyinshi zagoragojwe mu myaka ya za 50, kugeza ubwo u Rwanda rwahisemo kuba Repubulika maze ingoma ya cyami ngo yari imaze imyaka irenga magana ane ikavaho. Muri Repubulika ubusugire bw’igihugu buba buri mu maboko y’abaturage, bashobora guha umuntu bitoreyengo abahagararire. N’ubwo uwo muntu agira abamufasha, abaturage nibo bonyine soko y’amategeko. Ubutegetsi bwite bwa Leta buharanira inyungu za bose, bukubahiriza itegeko rirengera abantu ku giti cyabo, mubwisanzure bwabose kandi nta busumbane.

Binyuranye n’ubwami kuko bwaba ubugendera ku ruhererekane bw’umubyeyi n’umwana, cyangwa aho umwami atorwa, buri gihe ubutegetsi buba buri mu maboko y’umuntu umwe gusa kabone naho yaba ari umwami ukoresha itegekonshinga (monarchie constitutionnelle) kuko ariwe ushyiraho minisitiri w’intebe. Ese gusubira hariya ni ugutera imbere ? Ese bwo byaba, ni kuriya byakorwa ku buryo repubulika yagenda maze n’uwari Perezida ejo akaba ariwe uba umwami  nk’uko tubyumva muri iki gihe?

Repubulika rero usanga yegeranye cyane na demokarasi (ubutegetsi bw’abaturage ,buva mu baturage ,bugatangwa n’abaturage bugakorera abaturage). Ariko iyo hatabaye ubushishozi ushobora gusanga Repubulikaitwaweintambike, igahinduka« dictature »(ubutegetsibw’igitugu), bukaba«oligarchie » (ubutegetsi bw’agatsiko) cyangwa se « théocratie » (ubutegetsi buvugako ngo buva ku mana).

Ubutegetsi bw’igitugu n’ubutegetsi bw’agatsiko burasa cyane, kandi bwegeranye rwose n’ubutegetsi buvuga ko buva ku mana kuko bwose buba bugamije kwigarurira burundu igihugu bugakandamiza abaturage ku nyungu za bamwe. Byongeye, ntibutinya no gukoresha ubwicanyi. Bukoresha iterabwoba bushingiye ku gisirikare (armée), ku mitwe yitwaye gisilikare (milice) cyangwa ku bwironde bushingiye ku miryango,ku bwoko, ku idini n’ibindi …

By’umwihariko, ubutegetsi bw’agatsiko usanga bwihishe inyuma y’uburyarya ku buryo utapfa kumenya utegeka kuko haba harimo uduhangange twinshi, ntawumenya neza ahoarenganira n’uwamurenganura ;ntawumenya neza uko inzego zikorana ;buhora buhindagura maze , ntawe urabutswe,bukagenda buhinduka nk’ubwami.

Igiteye ubwoba rero, ari nako ubu bimeze mu Rwanda, ni iyo ubwo butegetsi bumaze kwivanga n’ubundi byagombye kuba bihabanye nka «  tyranie » (ubukonde) bugasa n’aho bushyigikiye kandi burengera igice kimwe cy’abaturage. Icyo gihe igitugu kigira abafana bakirengera, maze urenganywa cyangwa ukandamizwa agasigara ameze nkaho ariwe munyamakosa, amategeko aba asigaye ari nka baringa yo gukanga abatibona muri mu kigare. Uburyo bukoreshwa ni ubwa « Démagogie » bugamije kugusha bamwe mu baturage neza ngo bakekeko Leta ikora ibyo rubanda ishaka, nyamara ari ukugirango abategetsi biyambukire ikiraro kigezweho gusa, ubundi ibintu bigakomeza uko bisanzwe. Ibi bikarutwa rero nibura na « Populisme » (Ubutegetsi bw’ikigare) nayo itaboneye ; ariko nangwa nayo kuko icyo gihe ubutegetsi bukora ibyo abaturage basabye kugira ngo babukunde ; ariko bidasobanura ko nabwo buba bukora neza, kuko hari ibyifuzo biba bigarukira gusa mu gihiriri cyangwa mu kigare twakwita « masse » mu gifaransa. Icyo gihe imishinga nyayo izamura igihugu isimbuzwa utntu twa nyirarureshwa tugaragarira rubanda rugufi gusa ; nyamara ushaka gusobanukirwa n’ibikorwa akarushaho kugenda agwa murujijo gusa kuko ibintu biba bikorwa nta cyerekezo gihamye gihari.

U Rwanda ku muteremuko

Muri ibi bihe tugezemo , ngira ngo n’utabona yarumvishe ariko n’utumva nibwirako yaba atagishidikanya ukuntu ikinyoma kimaze kwigaragaza. Kandi burya ngo ibuye ryagaragaye ntiriba rikishe isuka.Mugihe amahanga menshi amaze kwibonerako burya mu Rwanda ishyamba atari ryeru, akamenya amahano yo muri rweru, hatangijwe gahunda zo kurushaho guhuma benshi mu banyarwanda amaso, ngo bibwireko ibintu byose ari byiza. Kandi hatangiye na gahunda yo kubeshya Abanyarwanda ko bo ubwabo bihagije kabone naho n’inkunga y’amahanga itaboneka . Abaturanyi ducana uwaka barabaze,intambara ziratutumba hakurya no hakuno hafi kumipaka yose. Amahanga yandi yitaruye nayo yakuyemo akayo karenge, imfashanyo zararumbye.Gusa turabibutsa ko mu Kinyarwanda umugabo umwe ngo agerwakuri nyina kandi burya n’inkingi imwe ndabarahiye ntigera inzu. N’aho u Rwanda rwagira ubushobozi bukomeyebute, kutabana n’amahanga ntibirufasha na mba kandi ntaho rwakwigeza. Nyamara kubaho ni ukubana naho ubundi …..

Hamaze kugenda haboneka n’ibindi bimenyetso bitoroshye bigaragaza ko u Rwanda ruri mu bihe bibi ; aho amahanga asigaye atinyuka guhagarika umwe mubayobozi bakuru b’ igihugu. Buriya ihagarikwa rya Karenzi, ni uburyo bwo kwerekana ko amatwara y’abayoboye u Rwanda atakijyana n’amahame agenga amahanga : ubutabera, ubwisanzure mu kuvuga icyo umuntu atekereza, uburenganzira ku mutungo bwite, ubwisanzure bw’itangazamakuru, uburenganzira mu matora adafifitse kandi ataziguye n’ibindi…(nibwira ko kugera kuri iyo ntera ariko kugira ijabo bizahesha u Rwanda ijambo mu ruhando rw’ayo mahanga. Ntabwo rwose ari uguhangana nk’uko dukunze kubyumva mu magambo asigaye avugwa kenshi n’abayobozi bagaragaza kunanirwa bidasubirwaho).Ahubwo abategetsibagenda barushaho kubangamira uburenganzira bwa rubanda no kunyuranya n’imiyoborere myiza amahanga ahuriraho.

Ubu havugwa cyane ikibazo cyo guhindura Itegekonshinga. Koko abaturage bafite uburenganzira bwo gukora icyo bashaka mu gihugu cyabo. Ariko na none ntibafite ububasha bwo gukora icyobashaka uko bishakiye kose. Aha rero niho haturuka imbaraga z’itegeko cyangwa ingufu z’amahame agenga uburyo bw’imibanire y’abantu ku buryo n’amahanga adashobora kubirebera gusa atabyamaganye.

Impanuro ya twese

Guhemukira Abanyarwanda, kwishongora no gutuka amahanga birajyana u Rwanda mu icuraburindi risa nk’umwijima rwabayemo mugihe cy’intambara y’inkundura yo ku Rucunshu; benshi bemezako ari nayo ntango igaragara y’amacakubiri n’umwiryane mu Rwanda.Ubumwe n’ubuvandimwe by’Abanyarwanda byaturikiye munda y’ingoma igihe Rutalindwa na mwene se Musinga barasanye bapfa Kalinga.

Dore ihame ritari iryo mu mahanga gusa: ubutegetsi bugomba guherekanywa mu mucyo hakurikijwe gahunda n’amabwiriza asanzwe azwi, kandi yumvikanyweho nta butiriganya no gushaka kujijisha rubanda mu nyungu za bamwe. Uretseko tugifite n’ibindi bibazo byinshi tutarakemura kuva imbaga y’Abanyarwanda yatikira cyanecyane muri 1994, amacakubiri n’umwiryane , uburyarya, ubutiriganya n’ amanyanga biri mu gihugu,(mu bayobozi kimwe no muri rubanda) birahangayikishije, biteye ubwoba, bibuza impunzi gutaha, bigatera rubanda guhunga maze mu kwiheba abantu ntibabashe kubona aho umuti w’ibyo byose uzava.

Burya ngo ntawuca urumureba. Ikintu kitugoye mbere na mbere ni uko ikibazo cy’Abanyarwanda aribo ubwabo bagomba kucyikemurira. Ni byiza ariko biranagoye. Niyo mpamvu harimo impaka nyinshi,kubogama maze buri wese akishyira aheza bikazamo no gutsimbarara, guhangana no guhigana.

Nyamara ariko nanone hari amahirwe tubifitemo. Reka mbigereranye n’ubwandure bw’umubiri simvuze ubwandu si iby’indwara ndimo. Ahubwo twariyanduje ,turasa nabi ,dukeneye kwisukura. Aha rero bizatworohera kuko tudakwiye kujyana ubwambure bwacu hanze.Nimucyo dukarabire iwacu ,abavandimwe basiritane kandi buri wese acye. Umunyamwanda cyane yoza abandi, bajya kumugeraho akitaza ngo batabona ko yahomye.

Ntamwere uturimo, twese twarahemukiranye wenda kuburyo bunyuranye . Ariko twemere tujye hamwe dusubize ubwenge kugihe ;dusubize amaso inyuma dufate intera imwe maze dutangire bundi bushya. Niyo mpamvu rero mbere ya byose dukeneye ibiganiro n’imishyikirano mu mpande zose, tukagena icyerekezo cy’igihugu cyacu twese . Nta kamara,ntawavukanye imbuto,twese turareshya kandi twese turi abagenzi na nyuma y’abariho ubu, hazaza abandi tutagomba gusigira amatongo,n’ibihombo.

Maze rero ngo zitukwamo nkuru. Abo bayobozi nibatubimburire.Nituzongere gucurika no kuvanga ibintu twitwaje ngo ntidusanzwe,ngo baratwanga n’ibindi…Kagame nahagarike vuba biriya byo gukinisha itegekonshinga maze niba koko ashoboye kubohora u Rwanda arukize n’ariya marangamutima ya hato na hato. Ngaho natangize ibihe bishya koko aho Abanyarwanda bose bagomba kumvako itegekonshinga ari ihameshingiro ridakorwaho uko bwije n’uko bukeye. Nonese ubu aho ibintu bigeze yakumva uwakongera kwigisha Abanyarwanda kubyara abana umunani cyangwa cumi ?Hari n’ibindi byinshi bitaremereye cyane nibwirako tudashobora gusubiraho inyuma.Na rubanda rero nireke gutsindwa n’ubwoba ngo bayoboke buka cyangwa buhumyi. Nibamenye uburenganzira bwabo kandi bagaragaze ibyo batishimiye ntagihunga banamagane akarengane bashize amanga.

Mu rwego rw’isi hariibibazo bisa nibyamaze gukemuka bitagomba guteranya abantu.Twamaze kumenya uburyo buboneye bwo kuyobora ibihugu, nibukurikizwe.Tuziko amahanga yose agenda ashaka kujya hamwe, natwe tubigire intego. Nonehoniba twaranamenye uburenganzira bwa muntu nihagira ubivagaho ntitukabishe nk’aho intego yacu yari iyindi.Ahubwo nihagira ubudushishikariza twishime ,aho kumubonamo umuhemu tumugire inshuti .Nonese umuntu yakubwira ngo mugire amahoro mugapfaiki igihe nawe waba uri umunyamahoro.Umunyarugomo niwe ubuza kurwana nawe akurema uruguma.

Umwanzuro

Abanyarwanda dukundane ,twubahane,dufashanye muri byose tuzi neza ko nanyina w’undi abyara umuhungu.Kugira uburenganzira bumwe ,no kureshya imbere y’amategeko ni nkingi ihamye ya Repubulika kandi niyo nzira nyayo ya Demokarasi n’amajyambere arambye.

Gukunda igihugu ni uguteganyiriza ahazaza, ni ugukora imishinga irambye; si ukiwireba no kwikunda.Bityo niduhere kuri bike byamaze kubakwa ,dushyireho natwe ibyo dushoboye byo muri iki gihe tuzi nezako abazaza nyuma bazazana udushya twabo,bagashima ibyo twagezeho,bagakosora bimwe bakurikije imyumvire mishya bazazana kandi bagatangira n’ibindi biturenze tudashobora gusobanukirwa muri iki gihe cyacu.

Inyabutatu nyarwanda ni umwihariko numva ukwiriye no kujya mu byiza bitatse u Rwanda(nge aho kubikuraho nanabigira nyaburanga y’akabanga k’u Rwanda nkabishingana muri UNESCO) mugihe twese dusa,tukavuga ururimi rumwe,tukagira iyobokamana rimwe,mureke tubwubakireho maze koko Gahutu ,Gatwa na Gatutsi mwishyire kandi mwizane mu Rwanda rwacu.

Padiri Athanase MUTARAMBIRWA

Kagame n’ishyaka rye FPR hari gahunda bamurikiye abanyarwanda babasezeranya kuyibagezaho. Uyu munsi bifuza ko Kagame aguma ku butegetsi iyo mishinga igeze he? Turibanda ku bikorwa remezo

1. Imihanda: usibye mu mujyi wa Kigali n’imihanda minini ubutegetsi bwa Kagame bwasanzeho, mu byaro imihanda yarasibamye, ahandi ni ibinogo gusa. Ibiraro byarashaje biracika. Ubu umuturage wa Shyira ntiyarema isoko rya Kibagabaga kuko ntaho yaca. Abaturage ba Bugesera bahora basaba umuhanda watuma bahahirana n’abaturage bo mu tundi turere tw’i Burasirazuba kuko aho banyuraga ikiraro cyaracitse.
2. Amashanyarazi : ubutegetsi buvuga ko abafite amashanyarazi bageze kuri 25% kandi ko bazaba ari 70% muri 2017. Ariko tariki ya 27/7/2015, abashinzwe iby’amashanyarazi bari kumwe na ministre w’ubutegetsi bw’igihugu Kaboneka,  bavuze ko ibi bidashoboka kuko abanyarwanda batuye batatanye. Ese uyu munsi nibwo ubutegetsi bwa Kagame bwamenya ko abanyarwanda batuye batatanye bajya gusezeranya ibidashoboka abanyarwanda ntibari babanje kureba ibishoboka n’ibidashoboka?
3. Amazi: ministre w’intebe Murekezi yasezeranyije abanyarwanda ko uyu mwaka wa 2015 abanyarwanda bazaba bafite amazi 100%. Hamwe na hamwe robinets zirahari, ariko ziheruka amazi umunsi abayobozi bazifotorezagaho imbere y’itangazamakuru. Abanyamakuru Mutabaruka na Célestin bo kuri radio 1, umuturage yarabahamagaye bari mu kiganiro cy’ibyasohotse mu itangazamakuru abasaba ubuvugizi ngo iwabo mu Mutara babone amazi. Baramushubije mu rwenya rwabo bati nk’uko Bibiliya itubwira ni ugutegereza Yesu

Banyarwanda banyarwandakazi rero mumenye ko ibyo kwizera ibitatangaza bya FPR, ari nko gutegereza Yezu ko agaruka. Abanyarwanda bati agapfa kaburiwe ni impongo.

J.Jules Rugero
Kigali-Rwanda